སྨན་རྩིས་དྲ་བ།

དཔལ་ལྡན་རྒྱུད་བཞི་བཀའ་དང་བསྟན་བཅོས་གང་ཡིན་སྐོར།

བརྗོད་བྱ་སྤེལ་མཁན། རྩོམ་སྒྲིག་པ། (admin) ཟླ་ཚེས། 19.03.2011
གླེང་སྟེགས། >> ལོ་རྒྱུས་སྐོར།

དཔལ་ལྡན་རྒྱུད་བཞི་བཀའ་དང་བསྟན་བཅོས་གང་ཡིན་གྱི་སྐོར་ལ་བཤད་སྲོལ་མ་འདྲ་བ་ཁག་ཅིག་ནི།

བོད་གངས་ཅན་གྱི་གསོ་རིག་རྩ་བ་དཔལ་ལྡན་རྒྱུད་བཞི་ཞེས་པ་འདི་ཉིད་ལ་སྔར་ནས་ད་ལྟ་བར་དུ་བཀའ་དང་བསྟན་བཅོས་གང་ཡིན་སྐོར་ལ་མཁས་པའི་བཞེད་ཚུལ་མི་མཐུན་པ་མང་ཞིང་། སྐབས་སྐབས་སུ་དེའི་སྐོར་ནས་རྩོད་གླེང་ཡང་འབྱུང་བཞིན་ཡོད་པ་རེད། ལ་ལས་དྲང་སྲོང་ལྷུང་བ་རི་དྭགས་ཀྱི་གནས་སུ་སྟོན་པ་བཅོམ་ལྡན་འདས་ཤཱཀྱ་ཐུབ་པས་གསུང་ཚུལ་དང་། ཁ་ཆེ་པཎ་ཆེན་གྱིས་གཡུ་ཐོག་ལ་གསུངས་པ་དང་། ཁ་ཆེ་པཎ་ཆེན་གྱིས་བེ་རོ་ཙ་ནར་གསུངས་པ། བེ་རོ་དང་གཡུ་ཐོག་སོ་སོ་ནས་མཛད་ཚུལ། བེ་རོས་གཡུ་ཐོག་ལ་གསུང་ཚུལ། སློབ་དཔོན་པདྨས་བསམ་ཡས་སུ་གཏེར་དུ་སྦས་པ། གཡུ་ཐོག་གསར་མས་མཛད་ཚུལ། གཏེར་སྟོན་གྲྭ་བ་མངོན་ཤེས་ཀྱིས་གཏེར་ནས་བཏོན་ཚུལ། བོན་གྱི་འབུམ་བཞི་ནས་བཤུས་ཚུལ་བཅས་མང་དག་ཅིག་ཡོད་པ་ནས་དོན་དངོས་ཐོག་གཟིགས་པ་པོ་རྣམས་ཀྱིས་ཅི་ཞིག་ཡིན་པར་དགོངས་ཀྱི་ཡོད།

མཐའ་མའི་འདོན་ཐེངས་།: 31.03.2011 ཉིན། 11:41 AM

<< སྔ་མ།

དཔྱད་བརྗོད་བཀོད་པ།

རི་ཆུང་སྨན་པ། དཔྱད་བརྗོད་སྤེལ་མཁན། སྐུ་མགྲོན། ཟླ་ཚེས། 18.05.2012 ཉིན། 1:30 PM
བོད་ཀྱི་གསོ་བ་རིག་པའི་གཞུང་ལུགས་ཀུན་གྱི་མ་ཕྱི་《བདུད་རྩིའི་སྙིང་པོ་ཡན་ལག་བརྒྱད་པ་གསང་བ་མན་ངག་གི་རྒྱུད་》ཞེས་སམ་བསྡུས་མིང་དུ་《གསོ་རིག་རྒྱུད་བཞི་》 ཞེས་བྱ་བ། སྡེ་ཚན་བཞི་དང་ལེའུ་བརྒྱ་དང་ཉི་ཤུའི་བདག་ཉིད་ཅན་འདི་ནི་གཡུ་ཐོག་གསར་མ་ཡོན་ཏན་མགོན་པོས་(༡༡༢༦་་་༡༢༠༢)རང་གི་མི་རབས་ནས་མི་རབས་བརྒྱུད་པའི་གདོད་མའི་བོད་ཀྱི་གསོ་ཐབས་རིག་པ་དེ་ཉིད་གཞི་མར་བྱས་ཐོག རྒྱ་དཀར་ནག་དང་། ཞང་ཞུང་ཏ་ཟིག་ལ་སོགས་པའི་སྐབས་དེ་དུས་བོད་དང་ས་འབྲེལ་ཆེ་ཞིང་ལོ་རྒྱུས་སུ་འབྲེལ་བ་གཏིང་ཟབ་ཡོད་པའི་རྒྱལ་ཁབ་ཁག་གི་གསོ་དཔྱད་རིག་པའི་སྙིང་བཅུད་རྣམས་བླངས། དེའི་སྟེང་བོད་རང་གི་ཡུལ་ལུང་དང་ཁོར་ཡུག བོད་མིའི་ཁམས་དང་མཐུན་པའི་གསོ་དཔྱད་ཀྱི་རིག་པ་གསར་བསྒྲིགས་གནང་བ་ཞིག་ཡིན་ཏེ། འཇམ་མགོན་ཀོང་སྤྲུལ་གྱིས།(འོག་མཆན།༠༡) གཞུང་ཐམས་ཅད་ཀྱི་དོན་བསྡུས་བདུད་རྩི་སྙིང་པོ་ཡན་ལག་བརྒྱད་པ་གསང་བ་མན་ངག་གི་རྒྱུད་ཆེན་བཞི། རྒྱུད་ཆུང་བདུད་རྩི་བུམ་པ། ཆ་ལག་འགའ་ཞིག་བཅས་མཛད། ཞེས་དང་། དེ་བཞིན་སུམ་པ་མཁན་པོས།(འོག་མཆན།༠༢) རྒྱལ་བས་རྒྱ་གར་དུ་འདུལ་བ་ལུང་དང་བསྡུས་རྒྱུད་སོགས་ལས་གསུངས་པའི་གསོ་རིག་སྐོར་དང་། འཇམ་དཔལ་གྱིས་རི་བོ་རྩེ་ལྔར་གསུངས་པར་གྲགས་པའི་སོ་མ་རཱ་ཛཱ་ལེའུ་བརྒྱ་བཅུ་གཉིས་དང་། ཀླུ་སྒྲུབ་ཀྱི་སྦྱོར་བ་བརྒྱ་པ་སོགས་དང་། དཔའ་བོའི་སྨན་དཔྱད་ཡན་ལག་བརྒྱད་པའི་སྙིང་པོ་བསྡུས་པ་ལེའུ་བརྒྱ་ཉི་ཤུ་འགྲེལ་བཅས་དང་། དེའི་རྒྱ་ཆེར་འགྲེལ་བ་ཁ་ཆེ་ཟླ་བ་མངོན་དགས་མཛད་པའི་ཟླ་ཟེར་སོགས་རྒྱ་གཞུང་བདུན་སོགས་ཀྱི་གནད་རྣམས་བསྡུས་པའི་བོད་གཡུ་ཐོག་པས་བསྡུས་པའི་སྙིང་ཐིག་ལས་ཤེས་སླ་གཞུང་རྒྱུད་བཞིར་གྲགས་པ་མང་ཉུང་འཚམ་ལ་དོན་འདུས་པའི་ལེགས་ཆ་ཅན་དེ་ཉིད་་་་་་། ཞེས་གསུངས་ཡོད།

འོན་ཏེ་ཁ་ཅིག་གིས་སངས་རྒྱས་ཀྱི་བཀའ་ཡིན་པ་དང་། ཁ་ཤས་ཀྱིས་སྟོན་པ་ཤེས་རབ་མེ་བོ་ཆེས་གསུངས་པའི་འབུམ་བཞིའི་ཚན་བཤུས་ཡིན་པ། ཡང་ཁ་ཅིག་གིས་རྒྱ་གར་ཚེའི་རིག་བྱེད་ཀྱི་གཞུང་ཡིན་པ་དང་། ལོ་ཆེན་བཻ་རོས་བསྒྱུར་བ། གཡུ་ཐོག་རྙིང་མས་མཛད་པ་སོགས་ཀྱི་རྩོད་རྙོག་རྫོགས་རྒྱུ་མེད་པ་རང་ཕོར་གཙང་འཛིན་གྱི་ཕྱོགས་ལྷུང་གི་བསམ་པ་ཁོ་ན་ལས། ལོ་རྒྱུས་གཞུང་དོན་ཐོག་ཞིབ་འཇུག་གི་བདེན་ཚིག་དང་། སྒྲུབ་བྱེད་ཕྲ་མོ་ཙམ་ཡང་མེད་པའི་གཏམ་སྣ་ཚོགས་ཡིན་པས་ལོ་རྒྱུས་ལ་ཞིབ་པར་དཔྱད་པར་བྱའོ།།

འོག་མཆན།
༠༡། ཀོང་སྤྲུལ་ཡོན་ཏན་རྒྱ་མཚོས་བརྩམས། རྡོ་རྗེ་རྒྱལ་པོ་དང་ཐུབ་བསྟན་ཉི་མས་བསྒྲིགས། 《ཤེས་བྱ་ཀུན་ཁྱབ་མཛོད།》《ཐེག་པའི་སྒོ་ཀུན་ལས་བཏུས་པ་གསུང་རབ་རིན་པོ་ཆེའི་མཛོད་བསླབ་པ་གསུམ་ལེགས་པར་སྟོན་པའི་བསྟན་བཅོས་ཤེས་བྱ་ཀུན་ཁྱབ།》 མི་རིགས་དཔེ་སྐྲུན་ཁང་། ༢༠༠༢
༠༢། སུམ་པ་ཡེ་ཤེས་དཔལ་འབྱོར། མཚོ་སྔོན་ཞིང་ཆེན་བོད་ཀྱི་གསོ་རིག་ཞིབ་འཇུག་ཁང་དང་བོད་ཀྱི་གསོ་བ་རིག་པའི་གནའ་དཔེ་ཕྱོགས་བསྒྲིགས་དཔེ་ཚོགས་རྩོམ་སྒྲིག་ཚོགས་པས་བསྒྲིགས། 《སུམ་པའི་སྨན་ཡིག་ཕྱོགས་བསྒྲིགས།》 བོད་ཀྱི་གསོ་བ་རིག་པའི་གནའ་དཔེ་ཕྱོགས་བསྒྲིགས་དཔེ་ཚོགས། ཨ།༠༥༤ མི་རིགས་དཔེ་སྐྲུན་ཁང་། ༢༠༠༧
གངས་ཅན་ དཔྱད་བརྗོད་སྤེལ་མཁན། སྐུ་མགྲོན། ཟླ་ཚེས། 22.05.2011 ཉིན། 11:33 AM
ཞང་ཞུང་དམར་ཡིག་ཡང་ངས་ཧ་གོ་ ཞང་ཞེས་པའི་ཡུལ་དེ་ཡང་ངས་ཧ་གོ་ ངས་དྲིས་པའི་དྲི་བར་ལན་དྲང་པོར་འདེབས་དང་ ཁྱེད་ཨ་མའི་བུ་ཡིན་ན་
རྒྱུད་བཞི་གཡུ་ཐོག་པས་བརྩམས་པའི་ཁུངས་གང་ཡང་མི་འདུག དཔྱད་བརྗོད་སྤེལ་མཁན། སྐུ་མགྲོན། ཟླ་ཚེས། 19.05.2011 ཉིན། 11:51 AM
གཡུ་ཐོག་རྙིང་མའི་རྣམ་ཐར་ལས། གཡུ་ཡོག་པ་དགུང་ལོ་སོ་ལྔའི་ཐོག་རྒྱ་གར་ནས་ཕྱིར་འཁོར་དུས་རྒྱལ་པོས་རྒྱུད་བཞི་གཏེར་ནས་འདོན་དགོས་གསུངས་ཀྱང༌། གཡུ་ཐོག་པས་བདག་རྒྱ་གར་ལ་ད་དུང་སྐྱར་གཅིག་འགྲོ་བ་དེ་བར་མི་འདོན་ཞུས་ཞེས་དང༌། ཡང་དེ་ཉིད་ལས། དགུང་ལོ་ཞེ་ལྔ་བཞེས་དུས་གཏེར་ནས་སྤྱན་དྲངས། དགུང་ལོ་ང་ལྔ་པར༧༦༢ A. C.ཀོང་པོ་སྨན་ལུང་དུ་བྱོན་ནས་གསོ་རིག་སློབ་གྲྭ་བཙུགས་ཏེ་སློབ་མ་སུམ་བརྒྱ་ཙམ་ལ་རྒྱུད་བཞི་འཆད་ཉན་བྱས་ཚུལ་བཀོད་ཡོད་པ་རེད། དེས་ན་གཡུ་ཐོག་རྙིང་མ་ཡང་རྒྱུད་བཞིའི་རྩོམ་པ་པོ་མིན་པ་མ་ཟད། དེའི་གོང་དུ་རྒྱུད་བཞི་གཏེར་དུ་སྦས་ཡོད་པ་གསལ་པོར་བསྟན་འདུག
རིན་ཆེན་བཟང་པོ། དཔྱད་བརྗོད་སྤེལ་མཁན། སྐུ་མགྲོན། ཟླ་ཚེས། 18.05.2011 ཉིན། 9:56 AM
རྒྱུད་བཞི་སྟོན་པ་གཤེན་རབ་ཀྱིས་གསུངས་པའི་བཀའ་ཡིན་ཚུལ་དང་། དེའི་ཤེས་བྱེད་དུ་རྒྱུད་བཞི་འབུམ་བཞི་ནས་བཅོས་ཚུལ་སོགས་རབ་རིབ་ཀྱི་སྒྲུབ་བྱེད་སབ་སོབ་ཅིག་བཀོད་འདུག་པ་ལ་འདི་ལྟར་ཏེ། དེང་གི་དུས་སུ་ཧམ་བཤད་དང་ཁབ་མིག་ནང་གི་ཕྱོགས་ལྷུང་གི་རིག་པ་དྲི་ཅན་དག་གིས་དུས་ནམ་ཡང་བདེན་པ་མི་ཟིན་པས། དེང་ནི་དུས་རབས་ཉེར་གཅིག་པ་དང་ཚན་རིག་གི་དུས་རབས་དང་འཛམ་གླིང་ཀུན་གཉིད་སད་ཚར་བའི་དུས་རབས་ཤིག་ཡིན་སྟབས་དངོས་གཙོ་སྨྲ་བའི་ལྟ་གྲུབས་ཤིག་གིས་དཔྱད་པ་དཔྱད་ཅིང་སྤེལ་དགོས་པ་ལས་ཁ་གྲག་ཚད་ཐམས་ཅད་ཕྱོགས་ལྷུང་དང་ངར་འཛིན་གྱིས་རུལ་དྲི་འཐུལ་ཡོང་ན་རང་ཚང་དང་ཅོལ་ཆུང་ཀླད་མེད་ཅིག་ཡིན་པ་ལས་གཞན་དུ་མེད། དཔེར་ན་ཁྱེད་ཀྱིས་བཀོད་པའི་བཤད་ཚུལ་དེ་ལ་རིག་པ་མགོ་མཚུངས་ཀྱིས་འབུམ་བཞི་ནི་རྒྱུད་བཞི་ལས་ཚུར་བསྒྱུར་བ་ཙམ་དུ་མ་ཟད། བསྒྱུར་མཁན་དེ་ཡང་ཡིག་རྩ་དང་དོན་རྩ་གཉིས་ཀའི་ཆུ་ཚད་དམའ་བའི་ཁར་ཉེ་རིང་ཆགས་སྡང་གིས་བཟི་འཐོམ་པ་ཞིག་ཡིན་པ་རྒྱུད་འབུམ་གཉིས་ཀའི་ཚིག་དོན་ལ་ཞིབ་བསྡུར་བྱས་ཚེ་གཞན་ལྟ་ཅི་ཀ་ངོ་ཡིག་ང་ཐུབ་ཙམ་དག་གིས་ཀྱང་གསལ་བོར་རྟོགས་ཐུབ་པ་ནི་ཤེས་སླ། ད་དུང་གཞན་དུ་ན་ཁྱེད་ཀྱིས་ཞང་ཞུང་གི་སྐད་ཡིན་ན་བོན་ཚིག་དང་བོན་ཆོས་ཡིན་པའི་མ་ཁྱབ་པ་ཙམ་གྱི་འགྲོ་ལུགས་ཀྱང་ཤེས་ཀྱི་མེད། ཞང་ཞུང་ནི་ཡུལ་གྲུ་ཞིག་དང་སྔ་མོའི་དུས་སུ་བོན་སྟོན་གཤེན་རབ་མཆོག་གིས་བོན་ཆོས་སྤེལ་མྱོང་བའི་ཡུལ་གྲུ་ཞིག་དང་། ཡུལ་དེ་ན་བོན་ཙམ་དུ་མ་ཟད་ཆོས་ལུགས་གཞན་དག་དང་དད་འདུན་བྱུང་བའི་དུས་རབས་ཀྱང་བྱུང་ཡོད་པ་གསལ་པོ་རེད། དེ་བཞིན་དུ་ཞང་ཞུང་གི་སྐད་དུ་ཡོད་པའི་བོན་ཆོས་མིན་པའི་གཞུང་དང་མདོས་ད་ལྟ་ཡང་ནང་བའི་ཆོས་སྐྱོང་མང་དག་ཅིག་གི་ཆོ་གའི་ནང་དུ་ཡོད་པ་མིག་དབང་གི་ཡུལ་དུ་ཕར་བཞག་རྣ་ཐོས་ཙམ་ཡང་མེད་པ་རེད། ད་མདོར་བསྡུས་ན། ཁོ་རེ་ད་དུང་གྲུབ་མཐའ་རྩོད་པའི་ཚད་གཞི་ལོན་མེད་པར་ལོ་རྒྱུས་དང་ཆོས་འབྱུང་རྒྱལ་རབས། ལྷག་པར་དུ་དེང་རབས་ཀྱི་ལོ་རྒྱུས་ཞིབ་འཇུག་གི་རིགས་ལམ་སོགས་ལ་སློབ་སྦྱོང་མང་ཙམ་གནང་དགོས་པ་རང་གིས་རང་དང་རང་རྩོམ་ལ་ལྟོས་དང་དེ་ནས་ཁ་ཚུར་གྲག་གོ།།
གངས་ཅན་ དཔྱད་བརྗོད་སྤེལ་མཁན། སྐུ་མགྲོན། ཟླ་ཚེས། 17.05.2011 ཉིན། 2:33 PM
ང་ཚོ་གངས་ཅན་པ་ནི་ཁྱེད་དང་ང་ཞེས་ཕུངས་ནས་མ་བསྡད་པར་གངས་ཅན་སྤྱི་དང་འགྲོ་བ་ཡོངས་ལ་ཕན་ཐོག་སུས་བྱས་ཀྱང་ཆོག་ ད་བལྟ་འདིར་ཁྱེད་རང་གི་འདོད་ཚུལ་བྱས་ན་དེ་ལྟར་ཡིན་ཆོག་མོས་ འོན་ཀྱང་བོན་པོ་ནི་བོད་ཀྱི་ཆོས་རྒྱལ་ཚོའི་དུས་ནས་ནང་པ་ཡིན་པ་རེད་པས་་་་དེ་ལྟར་ཡིན་ན་ཆོས་རྒྱལ་ཚོས་རྒྱ་གར་ལ་མཐུ་མི་སོགས་གསེར་དངུལ་བསྐུར་ནས་གཏོང་དགོས་དོན་ཅི? དེ་བཞིན་སྟོན་པ་ཤེས་རབ་ཀྱི་ཐུགས་སྲས་སྟོན་པ་བཅོམ་ལྡན་འདས་ཁྱེད་ཚོའི་འདོད་པ་ལྟར་ན་ སྟོན་པ་ཤེས་རབ་ཀྱི་སྔར་སྟོན་ཟིན་པའི་ཆོས་ཤིག་ཡང་བསྐྱར་སྟོན་པ་བཅོམ་ལྡན་འདས་ཀྱིས་སྟོན་པ་དེ་འདོད་སྐྱོན་མི་ཡོང་ངམ་? དེ་སྔ་༧གོང་ས་མཆོག་བོན་གྱི་དགོན་པར་ཕེབས་སྐབས་དེའི་སྐབས་ཀྱི་བཀའ་སློབ་ཁྱེད་ཀྱི་སན་ཡོད་ངེས་ གནས་ཚུལ་འདི་འདྲ་བར་ང་ཚོ་བརྩོད་པ་མ་རྒྱབ་པར་སོ་སོའི་སྤྱི་ཚོགས་ལ་ཕན་གང་ཐུབ་ཐུབ་བྱེད་དགོས་་་་ང་དང་ཁྱེད་ཞེས་བསྡད་ན་ཡོངས་ཏབས་རྩ་བ་ནས་མེད་
དཔལ་ལྡན་རྒྱུད་བཞི་ཟེར་ནའང་བོན་གྱི་སྟོན་པས་གསུང་པའི་བཀའ་ཁོ་ན་ཡིན། དཔྱད་བརྗོད་སྤེལ་མཁན། སྐུ་མགྲོན། ཟླ་ཚེས། 17.05.2011 ཉིན། 9:54 AM
འབུམ་བཞི་དང་རྒྱུད་བཞིའི་འབྲེལ་བའི་སྐོར།
ལྔ་སྙིགས་ཐ་མའི་དུས་འདིར་དཀར་པོ་དགེ་བཅུའི་དབང་སྒོ་གཉིད་ཀྱིས་འཐིབས་ཤིང་། ངན་གཡོ་དུག་ལྔའི་རྣམ་ཤེས་ཁ་རལ་ཕྱིར། མཐོ་དོགས་དང་སྨད་དགའ། རང་རྒྱལ་དང་གཞན་ཕམ་གྱི་བསྒྲུབ་བྱ་ཁོ་ནར་དམིགས་པའི་སྐྱེ་བོ་འགས། འབུམ་རྒྱུད་གཉིས་ནི་འབྲེལ་མེད་རྭ་རུ་གཡས་གཡོན་ལྟ་བུར་སྨྲ་བཞིན་ཡོད་ནའང་། དོན་དུ་རྒྱས་བསྡུས་དང་། ཚིག་སྦྱོར་སྙན་མི་སྙན། ཚིག་གནས་གོང་འོག བོན་གྱི་ཐ་སྙད་སྦས་མ་སྦས་ཀྱི་ཁྱད་པར་ཙམ་ལས་བཀའ་དང་བཀའ་བརྟེན་གྱི་ཚུལ་དུ་གནས་པ་ཞིག་ཡོད།
དེ་ཡང་དང་པོ་འབུམ་རྒྱུད་གཉིས་ཀྱི་དངོས་ཡོད་ལེའུའི་གྲངས་རྒྱས་བསྡུས་ལ་གཞིག་ན། ཐུགས་འབུམ་ལ་ལེའུ་བདུན་ཡོད་པའི་ནང་ནས་འབུམ་བཞིའི་ཡོན་ཏན་ནམ་ཆེ་བརྗོད་བཤད་པ་རྣམས་རྩ་རྒྱུད་དུ་འཁོད་མེད། གཞན་དྲུག་པོའི་ཞུ་བ་བོ་དང་ཞུས་ལན་གསུང་མཁན་གྱི་མཚན་བསྒྱུར་བ་ཙམ་ལས་གཞུང་དོན་ཚིག་ཟིན་ཇི་མ་ཇི་བཞིན་ཡིན་པ་ལས་ལོགས་སུ་མེད། ཐ་ན་གླེང་གཞིའི་ལེའུ་རུ་གསུངས་པའི་ཕུན་སུམ་ཚོགས་པ་ལྔ་ལས་དྲང་སྲོང་གི་སྒྲ་བཤད་དེ་ཡང་ཚིག་སྦྱོར་བདེ་མི་བདེ་ཙམ་ལས་ས་ཚིགས་དེ་རང་དུ་བཞག་ཡོད། གོང་གི་རྩ་རྒྱུད་ལས་བཏོན་པའི་འབུམ་བཞིའི་ཡོན་ཏན་བཤད་པའི་ལེའུ་དེར་འཛེམ་དགོས་པའི་གནས་ཚུལ་གང་ཡོད་ཅེ་ན། སྤྱིར་བོན་གྱི་སྒོ་མོ་བརྒྱད་ཁྲི་བཞི་སྟོང་དང་། མདོར་བསྡུས་ན་ཐེག་པ་རིམ་པ་དགུ། དེ་ལས་བསྡུས་པ་སྒོ་བཞི་མཛོད་ལྔའི་ནང་རྒྱུད་འདི་འཕན་ཡུལ་རྒྱས་པའི་འབུམ་སྡེའི་ཁོངས་སུ་བྱོན་ཚུལ་སོགས་བོན་གྱི་ཐ་སྙད་མང་དྲགས་པའི་རྐྱེན་གྱིས་འགོད་མ་ནུས་པའི་རྟགས་སུ་མངོན།
དེ་བཞིན་སྨན་འབུམ་སོ་གཅིག་ལས་ཕྱི་རྒྱུད་ཉེར་བདུན་བསྡུས། དཔྱད་འབུམ་དང་བཤད་རྒྱུད་གཉིས་ཀྱི་ལེའུའི་གྲངས་མཉམ་པར་ཡོད། ནད་འབུམ་གོ་གསུམ་ལས་མན་ངག་རྒྱུད་གོ་གཉིས་སུ་བསྡུས་ཡོད། འབུམ་བཞི་ལས་རྒྱུད་བཞིའི་ས་བཅད་དང་ལེའུའི་གྲངས་ཉུང་བར་ཡོད་ཀྱང་གཞུང་གི་གསོ་དཔྱད་ཀྱི་ཆ་ནས་མ་ལག་མ་ཚང་བ་གང་ཡང་མེད་ལ་དོན་མཚུངས་སུ་གནས་སོ།
ཚིག་སྦྱོར་གྱི་ཁྱད་པར།

དཔལ་ལྡན་རྒྱུད་བཞི་འདི་ཉིད་ཚིག་གི་སྡེབ་སྦྱོར་སྙན་ལ་ཚིག་རྐང་འགྲིག་པ། རྗོད་བྱེད་བདེ་ཞིང་ཕྱིས་བྱུང་མཁས་པའི་རྣམ་དཔྱོད་དང་འབྲེལ་བའི་བསྟན་བཅོས་ཡང་དག་ཅིག་ཡིན་པ་ནི། གཞུང་འདི་ཉིད་མ་ཕྱི་དང་འབྲེལ་ཚུལ་ལ་བརྟག་ན་རྟོགས་ནུས་སོ། །
འབུམ་བཞི་ནི་དེ་ལས་ལྡོག་སྟེ། སྔར་སྲོལ་གྱི་བརྡ་རྙིང་མང་སྟབས་བརྗོད་མི་བདེ་བའི་ཐ་སྙད་དང་། ཚིག་རྐང་རིང་ཐུང་ཆ་མི་སྙོམ་ཞིང་བཅད་ལྷུག་གང་དུ་མ་ངེས་པའི་ལུགས་སྙིང་བཀའ་རྟགས་ཀྱི་རང་མདངས་མངོན་པའི་གཞུང་རྨད་པོ་ཆེ་ཞིག་ཡིན་པ་ནི་མཇལ་བ་ཙམ་གྱིས་ཀྱང་ཤེས་སླའོ།
ཚིག་གོང་འོག་གི་ཁྱད་པར།

རྒྱུད་བཞིའི་གཞུང་ཚིག་ཕལ་ཆེ་བ་ནི། མ་ཕྱི་དང་ཆུ་ལ་ཆུ་བཞག་གི་ཚུལ་དུ་ཡོད་ནའང། ཚིག་བཅད་རེ་འགའ་སྟོད་སྨད་གོང་འོག་བརྗེས་ཏེ་བཞག་པ་དཔེར་མཚོན་ན། “སྦོམ་ལ་རགས་པར་འཕར་ན་ཕོ་ཡི་རྩ། །མི་ཁ་འོང་ན་ཆུ་ཚན་ཁོལ་འདྲ་འཕར། །”ཞེས་པའི་ཤད་བར་གཉིས་དེ་རིམ་བཞིན། “ཕོ་ཡི་རྩ་ནི་སྦོམ་ལ་རགས་པར་འཕར། །ཆུ་ཚན་ཁོལ་འདྲ་མི་ཁ་འོང་བའི་རྩ། །”ཞེས་པ་ལྟ་བུ་གོང་འོག་བསྒྱུར་བའི་རིགས་ཤིན་ཏུ་མང་།
འགའ་ཞིག་ཏུ་ཚིག་འཁོར་གཉིས་གཅིག་ཏུ་སྦྲེལ་བ་ཡང་ཡོད་དེ། དཔེར་ན། སྨན་འབུམ་ལས། “དྲག་དང་རྒྱས་དང་གྲིལ་དང་མགྱོགས་པ་དང་། །གྲིམ་དང་འཁྲང་བ་རྣམས་ནི་ཚ་བའི་རྩ། །”ཞེས་ཚ་བའི་སྤྱི་རྩ་དྲུག་དེ་ཕྱི་རྒྱུད་དུ། “དྲག་རྒྱས་གྲིལ་མགྱོགས་གྲིམ་འཁྲང་ཚ་བའི་རྩ། །” ཞེས་བསྡུས་ཡོད།
དེ་དག་ནི་སྔོན་མའི་ཀླད་པ་རྙིང་བས་མིག་མཐའ་སྒྲིབ་པའི་སྐྱེ་བོ་ཆེ་གེ་མོའི་ལོག་རྟོག་གཞོམ་ཕྱིར། འབུམ་བཞིའི་ཚིག་རྣམས་བསྒྱུར་ཚུལ་དཔེ་དམར་རྗེན་དུ་བཀོད་པ་ཞིག་ཡིན་གྱི་རིག་པའི་སྤྱན་ལྡན་རྣམས་ཀྱི་མདུན་དུ་བཞད་གད་ཀྱི་ཡུལ་ལས་མ་འདས། གཞན་ཡང་རྒྱུད་འདིའི་ཕུགས་དོན་ཞང་ཞུང་རང་དུ་ངེས་ལ། སྤྱིར་བཏང་འབུམ་རྒྱུད་གཉིས་ཀའི་གཞུང་དུ་སྔོ་སྨན་གྱི་མིང་དང་། དཔྱད་ཆའི་མིང་སོགས་བོད་དང་རྒྱ་དཀར་ནག་གང་གི་ཚིག་མཛོད་དུ་མ་གསལ་བའི་ཞང་སྐད་ཧ་ཅང་མང་ལ། ལྷག་པར་རྒྱུད་བཞིའི་མཇུག་བྱང་དུ་གག་ལྷོད་དང་རིམ་གདོན་སྲུང་བའི་སྔགས་རྣམས་ཞང་སྐད་གཤའ་མར་ལྷག་ཡོད་པས་དེ་དག་ནི་རྩ་བ་ཞང་ཞུང་ལ་ཐུག་པའི་དཔང་པོ་ཡིན་པར་སེམས་སོ། །
མདོར་ན་འབུམ་རྒྱུད་གཉིས་འབྲེལ་བ་ཤིན་ཏུ་ཟབ་ཅིང་བརྗོད་དོན་གཅིག་ཏུ་འགྱུར་བའི་མ་ཚད། ཆེས་ཕུལ་བྱུང་གི་རིག་གཞུང་ཞིག་སྟེ། ཉམ་ཐག་འགྲོ་བའི་སྐྱབས་མགོན་བཞི་བརྒྱ་ནད་ཀྱི་གཉེན་པོ། གསོ་རིག་ཀུན་གྱི་རྒྱལ་བོ་འདི་ལ་མ་ཚང་བའི་གསོ་དཔྱད་མེད་ནའང་། མ་རུང་ནད་ཀྱི་དགྲ་དཔུང་གཞོམ་པ་ལ་གཏོ་དཔྱད་གཉིས་ཟུང་འབྲེལ་དུ་དགོས་པ་ནི་གལ་ཆེ་བར་སྣང་སྟེ། གཞུང་ལས། “བརྒྱ་དང་རྩ་གཅིག་ཀུན་བརྟགས་གདོན་ཡིན༼པས༽། །གདོན་བཅོས་རིམ་འགྲོ་སྨན་མེད་ཕལ་ཆེ་འཚོ། །གདོན་བཅོས་མེད་ན་སྨན་དཔྱད་མི་ལེན་བྱེད། །དཔེར་ན་མདའ་ཚབ་གཞུ་ལ་བཙལ་བ་འདྲ། །”ཞེས་དང་། ཕྱི་རྒྱུད་ལས། “བརྒྱ་དང་རྩ་གཅིག་ཀུན་བརྟགས་གདོན་ཡིན་པས། །དེ་མ་བཅོས་པར་སྨན་དཔྱད་ལེན་མི་འདོད། །གདོན་བཅོས་སྨན་མེད་འགྱུར་ཀྱང་འཚོ་བ་ཡོད། །དཔེར་ན་དཔུང་བ་གསར་བའི་བཙོན་བུ་འདྲ། །”ཞེས་སོགས་གསུངས་པས་སོ། ། ། །
གཡུ་ཐོག་བུ། དཔྱད་བརྗོད་སྤེལ་མཁན། སྐུ་མགྲོན། ཟླ་ཚེས། 15.05.2011 ཉིན། 8:59 AM
རྒྱུད་བཞི་འདི་ཉིད་བཀའ་བསྟན་གང་ཡིན་ཤེས་དགོས་ན།
ཐོག་མར་རྒྱུད་རང་གི་ལྟ་གྲུབ་དཔྱིས་ཕྱིན་པ་ཤེས་དགོསལ།
དེ་ནས་དེ་དང་འབྲེལ་བའི་ལོ་རྒྱུས་ཀྱི་རྒྱབ་ལྗོངས་ཡག་པོ་ཞིག་ཤེས་དགོས།
དེ་རྣམས་དཔྱིས་ཕྱིན་པ་ཞིག་ཤེས་སོང་ན།
བཀའ་བསྟན་གྱི་རྣམ་བཞག་ཤེས་རྒྱུར་དེ་ཙམ་དཀའ་ངལ་མེད།

སྨན་མིང་འཛིན་པ་་ངག་དབང་ དཔྱད་བརྗོད་སྤེལ་མཁན། སྐུ་མགྲོན། ཟླ་ཚེས། 12.05.2011 ཉིན། 12:11 PM
༄༅་བཀའ་ལ་དབྱེར་ན་དུ་མ་ཡོད་། སངས་རྒྱས་ཀྱིས་གསུང་གི་བཀའ་ སངས་རྒྱས་ཀྱིས་བྱིན་གྱི་བཀའ་ རྗེས་སུ་གནང་བའི་བཀའ་བཅས་ཡོད་།
འདི་གསུམ་ལས་ལྷག་པའི་སངས་རྒྱས་ཀྱི་བཀའ་ཞིག་ཕལ་ཆེར་དཀའ་། དཔལ་ལྡན་རྒྱུད་བཞི་ནི་གལ་སྲིད་བཀའ་ཡིན་ཚེ་འདི་གསུམ་གང་ལ་ངོས་འཛིན་དགོས་སམ་།
དཔལ་ལྡན་རྒྱུད་བཞི་འདི་ནི་གངས་ཅན་པའི་མཐུན་མོང་མ་་ཡིན་པའི་བསྟན་བཅོས་དམིགས་བསལ་བ་གཅིག་ཡིན་ དཔལ་ལྡན་རྒྱུད་ཡོངས་གངས་ཅན་པའི་མཁས་དབང་གཡུ་ཐོག་པས་ཡང་མཛད་པ་མིན་ལ་སངས་རྒྱས་ཀྱི་བཀའ་ཡང་རྩ་བ་ནས་མེད་པ་མིན་དེ་བཞིན་ཡུལ་གཞན་དང་རྒྱལ་ཁབ་གཞན་གྱི་ལེགས་བྱང་དུ་མ་ཡོད་པ་མཁས་ལེན་ཆོག་ དེ་དུས་མི་དམངས་ཀྱི་བློ་གྲོས་དང་སྤྱི་ཚོགས་ཀྱི་གོམས་པྱོགས་དང་བསྟུན་ནས་སངས་རྒྱས་ཀྱི་བཀའ་བལྟ་བུར་མཛད་ནས་གླིང་གཞི་གླེང་སློང་གི་ངོ་བོར་མ་བཅོས་ཚེ་དུས་རབས་དེའི་སྐབས་མི་རྣམས་སངས་རྒྱས་ཀྱི་བཀའ་མ་གཏོགས་གཞན་ལ་ཡིད་ཆེས་མི་བྱེད་པས་རྒྱུ་མཚན་ཡིན་
དོགས་པ་རྭ་ཅན། དཔྱད་བརྗོད་སྤེལ་མཁན། སྐུ་མགྲོན། ཟླ་ཚེས། 10.05.2011 ཉིན། 3:10 PM
རྒྱུད་བཞི་འདི་ཉིད་བཀའ་དང་བསྟན་བཅོས་གང་ཡིན་མིན་བསྐོར་ཁ་ཚོན་ཆོད་པ་ལ། ཐོག་མར་བཀའ་དང་བསྟན་བཅོས་ཀྱི་དོན་རྟོགས་དགོས་སྙམ།
དེ་འདྲ་སོང་ཙང་ཁྱེད་རྣམ་པས་ཐོག་མར་བཀའ་དང་བསྟན་བཅོས་ཟེར་བ་དེ་གང་འདྲ་ཞིག་ལ་བརྗོད་ཀྱི་ཡོད་པ་དེ་ངོ་སྤྲོད་གནང་རོགས།
གཡུ་ཐོག་བུ། དཔྱད་བརྗོད་སྤེལ་མཁན། སྐུ་མགྲོན། ཟླ་ཚེས། 08.05.2011 ཉིན། 8:58 AM
དཔལ་ལྡན་རྒྱུད་བཞི་འདི་ནི་བོད་ཀྱི་རིག་གཞུང་གི་རྟོག་གམ་རྩེ་མོར་གྱུར་བའི་ནོར་བུ་བླ་ན་མེད་པ་ཞིག་ཡིན།
འོན་ཀྱང་དེ་ཉིད་བྱུང་རབས་ཀྱི་ཐད་ལ་བཤད་ཚུལ་མི་འདྲ་བ་མང་དུ་འདུག་པ་ནི།
དུས་རབས་ཀྱི་འཕོ་འགྱུར་དང་ཕྱོགས་རེའི་ལྟ་ཚུལ་སོགས་ལས་བྱུང་བ་གོར་མ་ཆགས།
དེས་ན་རང་རེ་རྗེས་འཇུག་པ་རྣམས་ནས་ཉེ་ཚེ་བའམ་ཕྱོགས་རིས་ཀྱི་བློ་དོར་ནས།
ཡང་དག་པའི་ལུང་རིགས་ཀྱིས་མཐའ་རྒྱན་ཏེ་དཔྱད་པ་དཔྱིས་ཕྱིན་པ་ཞིག་གནང་གལ་ཆེ།
དེ་ལྟར་ན་རིག་གཞུང་འདིའི་རྒྱུད་རིམས་དང་བསྟུན་ཏེ་དུས་སྐབས་དེ་དང་དེའི་ལོ་རྒྱུས་སོགས་ཤེས་དགོས་ལ།
རི་གཞུང་འདི་ཉིད་རྒྱུད་འཛིན་བྱེད་པའི་མཁས་དབང་རྣམས་ཀྱི་འདོད་ཚུལ་ཡང་གསལ་བོར་ཤེས་དགོས།
དེ་དག་ལས་ཀྱང་རྒྱུད་བཞི་རང་གི་གཞུང་ཚིག་རྣམས་ལ་བསམ་གཞིགས་ལེགས་པོ་རེ་གནང་ཐུབ་ན།
རང་གི་རང་ལ་ངེས་ཤེས་ཀྱི་བདེན་ཁ་ཞིག་སྐྱེ་སྲིད།
དཔྱད་བརྗོད་སྤེལ་མཁན། སྐུ་མགྲོན། ཟླ་ཚེས། 02.05.2011 ཉིན། 3:55 PM
དེང་དུས་ཀྱི་མཁས་པ་འགས་རྒྱུད་བཞི་ཡོན་ཏན་མགོན་པོ་རྙིང་མས་བརྩམས་ཚུལ་གསུངས་པའང་བྱུང་བ་རིག་པ་དང་མཐུན་དཀའ་ཞིང་། ཅི་སྟེ་དེ་འདྲ་ཞིག་ཏུ་ངེས་པར་བསྒྲུབ་འདོད་ན་རྒྱུད་བཞི་ཆ་ཚང་གཡུ་ཐོག་ཡོན་ཏན་མགོན་པོ་རྙིང་མས་བརྩམས་ཏེ་ཡོངས་གྲགས་མ་གནང་བར་གཏེར་དུ་སྦས་པ་ཕྱིས་སུ་གྲྭ་པ་མདོན་ཤེས་སམ། ཡང་ན་གཡུ་ཐོག་ཡོན་ཏན་མགོན་པ་གསར་མ་སུ་རུང་ཞིག་གིས་གཏེར་ནས་བཞེས་ཞེས་བཤད་ན་རིགས་པའི་གནོད་པ་ཉུང་ངམ་སྙམ།
ཟམ་གདོང་རིན་པོ་ཆེས་གནང་བའི་གླེང་བརྗོད་ལས་བཏུས།
རིན་བཟང་ལགས་སུ་ཕུལ་བ། དཔྱད་བརྗོད་སྤེལ་མཁན། སྐུ་མགྲོན། ཟླ་ཚེས། 26.04.2011 ཉིན། 12:51 PM
ཁྱེད་ཀྱིས་རྒྱུད་བཞི་བཀའ་ཡིན་པའི་སྒྲུབ་བྱེད་ཡང་དག་གཅིག་བཀོད་ཐུབ་ན་ངོ་མཚར་ཆེ།
གཟི་མིག་ལགས། རིན་བཟང་གིས། དཔྱད་བརྗོད་སྤེལ་མཁན། སྐུ་མགྲོན། ཟླ་ཚེས། 21.04.2011 ཉིན། 9:34 AM
རྩ་རྒྱུད་ཀྱི་གླེང་གཞིའི་ནང་དུ་ཕུན་ཚོགས་ལྔ་ལྡན་བཀོད་པ་ནས་ཤེས་ཐུབ་པོ།
གཟི་མིག་གསུམ་པ་ དཔྱད་བརྗོད་སྤེལ་མཁན། སྐུ་མགྲོན། ཟླ་ཚེས། 19.04.2011 ཉིན། 8:00 PM
དཔལ་ལྡན་རྒྱུད་བཞི་སངས་རྒྱས་ཀྱི་བཀའ་ཅི་ཕྱིར་ཡིན་ནམ? ཅུང་འབྲེལ་བརྗོད་དྲ་བརྩལ་གླེང་ཤོག་ནང་དུ་གསུངས་དང་གྲོགས་པོ་ལགས་
རིན་ཆེན་བཟང་པོ། དཔྱད་བརྗོད་སྤེལ་མཁན། སྐུ་མགྲོན། ཟླ་ཚེས། 19.04.2011 ཉིན། 10:09 AM
དཔལ་ལྡན་རྒྱུད་བཞི་ནི་བཀའ་ཡིན་པར་འདོད་ལ། བོད་ཀྱི་མཁས་པ་གོང་མ་ཚོས་ཀྱང་དེ་ལྟར་བཞེད་ཀྱི་འདུག
ས་འཛིན་དཀར་པོ། དཔྱད་བརྗོད་སྤེལ་མཁན། སྐུ་མགྲོན། ཟླ་ཚེས། 11.04.2011 ཉིན། 2:39 PM
སྨན་རྩིས་དྲ་བ་ཕེབས་པའི་བཀའ་དྲིན་ཆེ།
སྨན་པ་ངག་དབང་བློ་གྲོས་ དཔྱད་བརྗོད་སྤེལ་མཁན། སྐུ་མགྲོན། ཟླ་ཚེས། 31.03.2011 ཉིན། 4:26 PM
སྨན་རྩིས་དྲ་རྒྱའི་་འགན་འཛིན་ལགས་སྤྱིར་དྲ་རྒྱ་གསར་པ་ཡག་པོ་འདུག་་་་འོན་ཀྱང་་་་དྲ་རྒྱ་འདིའི་ནང་གི་་བརྗོད་གཞི་གང་ཞིག་ལ་ད་ཆ་་བསམ་ཚུལ་ག་ཚོད་སྤེལ་ཡོད་མེད་བརྗོད་གཞིའི་ཟུར་དུ་དོན་་གྱི་མིན་འདུག་པས་མ་འོངས་པར་བརྗོད་གཞིའི་མགོ་བརྗོད་དུ་བསམ་ཚུལ་སྤེལ་མཁན་གྱི་ཁ་གྲངས་དོན་ཐུབ་ན་དགོས་པ་ཤིན་ཏུ་ཆེ་ལ་དེ་གལ་ཆེན་པོ་རེད་་་་ད་དུང་བསམ་ཚུལ་གཅིག་ཞུས་ན་་དབྱིན་ཡིག་དྲ་རྒྱ་དེའི་་ནང་ལ་ཡན་ལག་ཁག་སོ་སོའི་ལས་བྱེད་ཡོངས་ཀྱི་འདྲ་དཔར་དང་ལས་མི་འམ་སྨན་པ་ཡོངས་ཀྱི་མིང་གཞུང་ངེས་པར་དུ་དགོས་ངེས་འདུག་མང་པོ་ཤིག་གནས་སྤོས་ཟིན་ཀྱང་ད་དུང་མིང་གཞུང་རང་སོར་བཞག་འདུག་པས་ཐུགས་ཞིབ་ངེས་པར་དུ་དགོས་
གཟི་མིག་གསུམ་པ་ དཔྱད་བརྗོད་སྤེལ་མཁན། སྐུ་མགྲོན། ཟླ་ཚེས། 31.03.2011 ཉིན། 4:03 PM
༄༅་།། དཔལ་ལྡན་རྒྱུད་བཞི་ནི་བོད་ཀྱི་མི་པོ་དམ་པས་མཛད་པའི་བསྟན་བཅོས་་ཁོ་ན་ཡིན་་་འོན་ཀྱང་དེའི་ནང་ལ་མི་རིགས་འདྲ་མིན་དང་རྒྱལ་ཁབ་འདྲ་མིན་གྱི་ལེགས་ཆ་ཉེན་ཁོག་ཡོད་་
སྐུ་མགྲོན་ལགས། དཔྱད་བརྗོད་སྤེལ་མཁན། རྩོམ་སྒྲིག་པ། ཟླ་ཚེས། 31.03.2011 ཉིན། 11:22 AM
གནས་འདིར་དཔྱད་བརྗོད་འགོད་མཁན་ལ་སྨན་རྩིས་པ་ཞིག་ཡིན་པའི་ལྟ་ཚུལ་དེ་འདྲ་བཟུང་མེད་ལ་སུ་ཕེབས་ཀྱང་ཆོག་པ་ཡིན། འོན་ཀྱང་སྨན་རྩིས་རིག་གཞུང་ཡར་རྒྱས་གཏོང་རྒྱུར་དམིགས་པ་ཞིག་ཡིན་པས་བརྗོད་བྱ་སྨན་རྩིས་དང་འབྲེལ་བ་ཡོད་ན་ལེགས།
དྲ་རྒྱ་དོ་དམ་པར་ཕུལ་པའི་དོགས་དྲི་ཆུང་ངུ་ཞིག དཔྱད་བརྗོད་སྤེལ་མཁན། སྐུ་མགྲོན། ཟླ་ཚེས། 30.03.2011 ཉིན། 10:31 PM
༅༅། །བཀུར་འོས་སྨན་རྩིས་དྲ་བ་དོ་དམ་པ་ལགས།
དྲ་བ་འདིའི་ནང་དཔྱད་བརྗོད་དང་མཆན་འདེབས་པར་ཆ་རྐྱེན་གང་ཞིག་ཚང་དགོས་སམ། སྨན་པ་དང་། རྩིས་པ་ངེས་པར་ཡིན་དགོས་པ་རེད་དམ། ལྷག་པར་དུ་སྨན་པའི་ལྷན་ཚོགས་ནང་དེབ་བསྐྱེལ་བྱས་པའི་སྨན་པ་ཞིག་ཡིན་ངེས་དགོས་སམ། ངས་བརྗོད་འདོད་པ་ནི་སྨན་པ་དང་། རྩིས་པ་གཉིས་ལས་གཞན་པའི་ང་དང་ང་ལྟ་བུ་དྲ་བ་ལྟ་ཀློག་བྱ་རྒྱུར་དགའ་བའི་མི་ཚོས་དཔྱད་བརྗོད་སྤེལ་ཆོག་གམ། གསལ་བརྗོད་ཞིག་ཡོང་བ་ཞུ།


ཐུགས་རྗེ་ཆེ།

བཀའ་ལན་ཞིག་གནང་སྐྱོངས་ཡོང་བ་དང་། བཀའ་ལན་ལ་གཞིགས་ཏེ་དཔྱད་བརྗོད་སྤེལ་རྒྱུ་ཡིན།


ཚོད་རྟ་ཡིན། དཔྱད་བརྗོད་སྤེལ་མཁན། སྐུ་མགྲོན། ཟླ་ཚེས། 30.03.2011 ཉིན། 12:56 PM
དྲ་རྒྱ་དེ་ལེགས་པོ་བཟོ་འདུག

དཔྱད་བརྗོད་འགོད།