གཉིས་པ་བར་དུ་དགེ་བ་གཞུང་གི་དོན་བཤད་པ་ལ་བཞི་སྟེ། རྩ་རྒྱུད། བཤད་རྒྱུད། མན་ངག་རྒྱུད། ཕྱི་མ་རྒྱུད་བཤད་པའོ། །དང་པོ་ལ་གཉིས། གླེང་བསླང་བ་དང༌། རྩ་རྒྱུད་དངོས་བཤད་པའོ། །དང་པོ་ལ་གསུམ། གླེང་བསླང་བའི་གཞི། ལན་དངོས། ལེའུའི་མཚན་བསྟན་པའོ། །དང་པོ་ལ་གཉིས། གསུང་བ་པོའི་སྟོན་པ་བཤད་པ་དང༌། ཞུ་བ་པོའི་དྲང་སྲོང་བཤད་པའོ། །

གཉིས་པ་ རྩ་རྒྱུད་དངོས་བཤད་པ་ལ་གསུམ། རྩ་རྒྱུད་ཞུ་བ། དེའི་ལན། རྫོགས་ཚིག་བསྟན་པའོ། །དང་པོ་ནི། དེ་ནས་ཞེས་པ་ནས་ཞེས་ཞུས་པ་ལས་ཞེས་པའི་བར་གྱིས་བསྟན་ཏེ། གོང་དུ། རོ་ཙ་ལས་གཉིས་རྒྱུད་གསུམ་སྤྱི་ཁྱབ་ཡིན། ཞེས་པའི་ཚིག་འདི་ཉིད་གསུངས་པའི་རྗེས་ཐོག་དེ་མ་ཐག་དེ་ནས་དྲང་སྲོང་ཡིད་ལས་ སྐྱེས་ཀྱིས་སྟོན་པ་དྲང་སྲོང་རིག་པའི་ཡེ་ཤེས་ལ་འདི་སྐད་ཅེས་ཞུས་སོ་ཞེས་པ་ ཡིན་ཏེ།

གསུམ་པ་ངོས་འཛིན་རྟགས་ཀྱི་རྩ་བ་བཤད་པ་ལ་གསུམ། བཀའ་བསྒོ་བ་དང༌། གཞུང་དངོས། ལེའུའི་མཚན་ནོ། །དང་པོ་ནི། དེ་ནས་ཞེས་པ་ནས་ཉོན་ཅིག་ཅེས་པའི་བར་གྱིས་བསྟན་ཏེ། གནས་ལུགས་གཞིའི་རྩ་བ་ལས་འཕྲོས་པའི་དོན་ལྷག་མ་མ་ལུས་པར་གསུངས་ཚར་བའི་རྗེས་ཐོག་དེ་ནས་ཡང་དྲང་སྲོང་རིག་པའི་ཡེ་ཤེས་ཀྱིས་འདི་སྐད་ཅེས་གསུངས་སོ། །ཀྱེ་དྲང་སྲོང་ཆེན་པོ་ཡིད་ལས་སྐྱེས་འཁོར་དང་བཅས་པ་ལེགས་པར་ཉོན་ལ་ཡིད་ལ་ཟུངས་ཤིག་ཅེས་གདམས་པའོ། །