སྦྱོར་བ་སྨན་ཞེས་པ་རོ་ནུས་ཞུ་རྗེས་ལ་སོགས་པ་བསྡེབས་ནས་སྦྱོར་བ་བྱས་ཏེ་ནད་ཀྱི་རིགས་མཐའ་དག་སེལ་བར་བྱེད་པས་ན་སྦྱོར་བ་སྨན་ཞེས་སྨོས་པ་ཡིན་ལ། དེ་ཡང་ནད་ཀྱི་ངོ་བོ་ལུས་དང་སྲོག་ལ་གནོད་ཅིང་གདུང་བར་བྱེད་པ་དེ་ཉིད་གསོ་བར་བྱེད་པའི་གཉེན་པོ་ལ་ཟས་སྤྱོད་སྨན་དཔྱད་བཞི་ཡོད་པ་ལས། །འདིར་སྦྱོར་བ་སྨན་གྱི་གནས་བསྟན་པར་སྨན་གྱི་རོ་དང། ཞུ་རྗེས། ནུས་པ། སྦྱར་ཐབས་བཅས་རྣམ་པ་བཞིའི་སྒོ་ནས་བསྟན་ཡོད། སྨན་གྱི་རོ་བཤད་པ་ལའང་རོ་དེ་གང་ལ་བརྟེན་ནས་སྐྱེད་པར་བྱེད་པའི་གཞི་བསྟན་པ་དང། རོ་རང་ལའང་བྱེ་བྲག་

དེ་ཡང་བཤད་པའི་རྒྱུད་ལས། སྐྱེ་སར་སྐྱེས་དང་དུས་སུ་བཏུས་པ་དང༌། །སྐམ་གསེད་ལེགས་དང་སོ་མ་རྙིང་པ་དང༌། །དུག་འདོན་འཇམ་བཙལ་འཕྲོད་པར་སྦྱར་བའོ། །ཞེས་རྣམ་པ་བདུན་དུ་གསུངས་སོ།། དང་པོ། སྐྱེ་སར་སྐྱེས་པ།  དེ་ཉིད་ལས། གངས་ཅན་འབིགས་བྱེད་བསིལ་དྲོད་རང་གནས་སྐྱེས། །ཉི་ཟླའི་སྟོབས་ལྡན་སྐྱེ་སར་སྐྱེས་ཞེས་བྱ། །ཞེས་གསུངས་པའི་དོན་ནི་སྔར་གོང་དུ་བཤད་པས་འཐུས་ལ། བདུད་རྩི་བུམ་པ་ལས། རོ་རྣམས་ཀྱི་ནི་དབྱེ་བ་ལས། །ས་ཕྱོགས་སྐམ་ཞིང་ས་གཞི་བཟང༌། །དུར་ཁྲོད་ཤིང་ཆེན་ལྷ་གནས་དང༌། །གཡང་ས་ཕྱོགས་མཁར་ཅན་མ་གཏོགས། །