སྨན་རྩིས་དྲ་བ། - ལོ་རྒྱུས།

༄༅། །གངས་ལྗོངས་གསོ་རིག་བསྟན་པའི་ཉིན་བྱེད་རིམ་བྱོན་གྱི་རྣམ་ཐར་ཕྱོགས་བསྒྲིགས། པར་གཞི་དང་པོ།
(གསོ་རིག་མཁས་དབང་རིམ་བྱོན་གྱི་དཀར་ཆག)

1
2
3
4
5
6
7
8
9
10
11
12
13
14
15
16
17
18
19
20
21
22
23
24
25
26
27
28
29
30
31
32
33
34
35
36
37
38
39
40
41
42
43
44
45
46
47
48
49
50
51
52
53
54
55
56
57
58
59
60
61
62
63
64
65
66
67
68
69
70
71
72
73
74
75
76
77
78
79
80
81
82
83
84
85
86
87
88
89
90
91
92
93
94
95
96
97
98
99
100
101
102
103
104
105
106
107
108
109
110
111
112
113
114
115
116
117
118
119
120
121
122
123
124

ལྷ་ལྡན་སྨན་རྩིས་ཁང་གི་བྱུང་རབས་མདོར་བསྡུས།

བརྗོད་བྱ་སྤེལ་མཁན། རྩོམ་སྒྲིག་པ། (admin) ཟླ་ཚེས། 11.02.2011
ལོ་རྒྱུས། >>

ལྷ་ལྡན་སྨན་རྩིས་ཁང་གི་བྱུང་རབས་མདོར་བསྡུས།

འགྲོ་ཕན་སྨན་སྨན་རྩིས་ཁང་གི་གདན་རབས་དྲི་མེད་ཤེལ་གྱི་མེ་ལོང་ལ་སྣོན་འཕྲི་བྱས་ཏེ་བསྒྲིགས།

ཨོཾ་ཨ་ཐཱ། ཚོགས་གཉིས་རྟ་ལྗང་ཅན་གྱིས་ཉེར་དྲངས་པའི། །མཚན་དཔེའི་འོད་སྟོང་མཁྱེན་བརྩེའི་གཟི་འབར་བ། །སྐྱེ་དགུའི་སྙིགས་ལྔའི་གདུང་མུན་སེལ་མཛད་མཁན། །ཉིན་བྱེད་སྨན་རྒྱལ་བདེ་གཤེགས་བརྒྱད་ལ་འདུད། །རྒྱལ་བ་སྨན་བླའི་གསང་གསུམ་ཡོན་ཏན་ཀུན། །གངས་ཅན་སྨན་པའི་རྗེ་བོར་ལེགས་སྣང་བ། །སྐྱེས་ཚད་སྨན་དུ་བསྡེབས་པའི་ཆོ་ག་མཁན། །འགྲོ་བའི་མགོན་པོ་གཡུ་ཐོག་པ་དེར་འདུད། །མཐའ་བཞིའི་གསོ་རིག་བདུད་རྩིའི་རྒྱ་མཚོའི་རྒྱུན། །དད་བརྩོན་ཡུར་དྲངས་ལྗོངས་འདིའི་རྫིང་རིང་ལ།།བསྐྱིལ་བའི་བྱེད་པོ་ལོ་ཆེན་བཻ་རོ་དང༌། །གཏེར་སྟོན་གྲྭ་མངོན་སོགས་ལ་ལྷག་པར་དད། །སྨན་རྩིས་དགོངས་དོན་བསམ་འཕེལ་དབང་རྒྱལ་དངོས། །མ་ཡིས་བུ་ལ་བརྩེ་ལྟར་མངོན་གཅེས་ཞིང༌། །དར་རྒྱས་རྒྱལ་མཚན་སྤོར་མཆོད་དེ་འཛིན་སྐྱེ།།རྗེ་བོར་བཀུར་མཁན་ཆོས་རྒྱལ་བསྔགས་པའི་གནས། །ཁ་བའི་ལྗོངས་འདིར་ཕན་བདེ་པད་མོའི་ཚལ། །འཛུམ་དང་མི་འཛུམ་གང་ལ་ལྟོས་པའི་མགོན། །རྒྱལ་བའི་དབང་པོ་བསྟན་འཛིན་རྒྱ་མཚོའི་སྡེ། །འཚོ་བཞེས་གཡུང་དྲུང་རིས་སུ་སྨིན་གྱུར་ཅིག །དྲི་མེད་གངས་ལྗོངས་ཤེལ་གྱི་མེ་ལོང་ལ། །ནག་ཕྱོགས་སྲིན་པོའི་གཡའ་ཡིས་ཆེས་བསླད་ཀྱང༌། །སྨན་རྩིས་དུང་གི་རང་མདངས་མི་འགྱུར་བར། །ཇི་སྲིད་ཉི་ཟླ་ཟུང་དང་ཅིག་ཅར་འཕྲོས། །

ཞེས་ཚིགས་སུ་བཅད་པའི་མེ་ཏོག་གི་ཕྲེང་བས་མདུན་བསུས་ནས།དེ་ཡང་གངས་རི་རྭ་བས་ཁོར་ཡུག་ཀུན་ཏུ་བསྐོར་བའི་བསིལ་ལྡན་ཁ་བ་ཅན་གྱི་ལྗོངས་འདིར་དར་བའི་སྨན་དང་རྩིས་ཀྱི་རིག་པའི་ལྟེ་གནས་དང༌།འགྲོ་མཆོག་གཙོ་བོར་གྱུར་པའི་རྐང་གཉིས་མིའི་ལུས་ཅན་གྱི་སྲོག་གི་དཔུང་གཉེན།ཕན་བདེ་ཉི་ཟླ་ལྟ་བུའི་སྨན་རྩིས་ཁང་ཞེས་སྙན་པའི་གྲགས་པ་ཕྱོགས་ཀྱི་བུ་མོའི་རྣ་ལུང་དུ་མཛེས་པ་འདི་ཉིད་ནི་རབ་བྱུང་བཅོ་ལྔ་བའི་ནང་ཚན་མེ་འབྲུགསྤྱི་ལོ་༡༩༡༦ལོ་ལ།ྋརྒྱལ་བ་སྐུ་ཕྲེང་བཅུ་གསུམ་པ་ཆེན་པོའི་ྋསྐུའི་བླ་སྨན་པ་དང་སྤྱི་ཁྱབ་མཁན་པོ་གཅིག་ལྕོགས་མཛད་མཁན་མི་རྗེ་བཀྲས་ཁང་དངོས་གཞི་བྱམས་པ་ཐུབ་དབང་ཞེས་བཅུ་ཕྲག་རིག་པའི་གནས་ལ་མཁྱེན་རྩལ་རྫོགས་ཤིང༌། རིས་མེད་འགྲོ་ལ་ཕན་བདེའི་དགའ་སྟོན་འབད་མེད་དུ་སྩོལ་མཁན། གངས་ཅན་སྨན་པའི་གཙུག་ནོར་ལྟ་བུ་གང་ཉིད་ནས་སྨན་རྩིས་གཙོ་བོར་གྱུར་པའི་བོད་ཀྱི་རིག་གནས་སློབ་གསོའི་ཞུ་སྒོ་ཁག་རྣམས་དུས་རབས་དང་མཐུན་པར་ཉམས་པ་སླར་གསོ་དང༌། མི་ཉམས་གོང་འཕེལ་ཐོག་སྐྱེ་འགྲོ་ཀུན་ལ་ནད་མེད་ལང་ཚོའི་དཔལ་ཡོན་ཅིག་ཅར་དུ་འབྱུང་ཕྱིར་ལྷ་སར་སྨན་རྩིས་སློབ་གྲྭ་ཞིག་གསར་འཛུགས་བསྐྱངས་རྒྱུ་དང༌། དེའི་འགོ་འཛིན་དུ་ཡང་མཁས་དབང་བྱམས་པ་ཐུབ་དབང་རང་ཉིད་ཀྱི་དངོས་སློབ་ལྕགས་རི་རིག་བྱེད་འགྲོ་ཕན་གླིང་གི་ཕུལ་དུ་བྱུང་བའི་སྨན་རྩིས་རིག་པ་སྨྲ་བ་མཁྱེན་རབ་ནོར་བུ་མཆོག་འབྲས་སྤུངས་སྨན་སྦྱིན་པའི་ལས་འཁུར་ཞུ་མུས་ཡིན་པ་ཁོང་ལ་འོས་བབས་ཆེ་ཚུལ་བཅས་ྋརྒྱལ་དབང་སྐུ་ཕྲེང་བཅུ་གསུམ་པ་མཆོག་ལ་སྙན་ཞུ་འབུལ་གནང་མཛད་པ་ལྟར། ྋརྒྱལ་དབང་བཅུ་གསུམ་པ་ཆེན་པོས་ལྷ་སར་གཞི་རྒྱ་ཆུང་ཙམ་གྱི་སྨན་རྩིས་སློབ་གྲྭ་གསར་འཛུགས་ཆོག་པ་དང༌། མཁྱེན་རབ་ནོར་བུ་ལ་གཞུང་ཞབས་རྩེ་སྐོར་ལས་ཚན་པའི་གོ་གནས་ཐོག་སྨན་རྩིས་ཁང་དང༌། ལྕགས་པོ་རི་རིག་བྱེད་གྲྭ་ཚང་གཉིས་ཀའི་དབུ་འཛིན་གཅིག་ལྕོགས་གནང་དགོས་པའི་ཕྱག་རྟགས་ཕེབས།

སྨན་རྩིས་སློབ་གྲྭ་ཐོག་མའི་ཚུགས་ཡུལ་ནི། བསྟན་རྒྱས་གླིང་གི་ནུབ་ངོས་ཁང་རྙིང་སྒོ་ར་ཤར་ནུབ་གཉིས་ལས་ཤར་གྱི་ཉིས་ཐོག་ཀ་བ་གཉིས་ལ་སློབ་ཁྲིད་གནང་ཡུལ་ཚོགས་ཁང་༼རྗེས་སུ་སྨན་སྦྱོར་ཁང་༽དང༌། དེ་ནས་ལྷན་རྒྱས་ཁང་ཞེས་ནད་པ་གཏོང་ཡུལ་ཀ་བ་གཅིག་དང༌། ཞབས་ཕྱི་སྒང་ལྕམ་གང་མ་གཅིག རྩིས་ཁང་ཀ་བ་བཞི། མཁྱེན་རབ་ནོར་བུའི་བཞུགས་ཤག་ལྕམ་གང་མ་གཅིག དེ་འཕྲོས་འོག་ཁང་རྣམས་སློབ་ཕྲུག་གི་ལས་ཤག་དང༌། སྨན་གྱི་དོས་ཁང༌། གཉེར་ཚང༌། ཐབ་ཚང༌། ཤིང་ཁང་བཅས་པར་ཀ་བ་བཅུ་དྲུག་ཙམ་དང༌། སྒོ་ར་ཤར་ནུབ་ཀྱི་བར་ཤུར་ཀ་བ་གཉིས་ལ་སྨན་བརྫོགས་རྡོ་གཏུན་འཇོག་ས་བྱས། དེ་རྗེས་རང་གཞུང་བཀའ་ཤག་ནས་ད་དུང་གཏོར་རྒྱག་གླིང་ཀ་དང༌། གཡུ་ཐོག་ཟམ་པ་ནས་བྱུས་བཏིང་གླིང་བར་གྱི་འདམ་ར་ཡོངས་རྫོགས། དེ་བཞིན་བསྟན་རྒྱས་གླིང་གི་མདུན་ངོས་ས་ཆའི་བདག་དབང་བཅས་པ་སྨན་རྩིས་ཁང་ལ་གསོལ་རས་གནང་བ་དེ་དག་ལེགས་བཅོས་ཀྱིས་སློབ་གྲྭའི་ཁོར་ཡུག་དང༌། ལམ་གྱི་གཡས་གཡོན་ཀུན་ཏུ་ཨ་ག་རུ་དང་པདྨ། སྨན་རྩྭའི་མེ་ཏོག་སྣ་ཚོགས་སྡུག་གུར་བཀྲ་བའི་ལྷན་སྐྱེས་ཀྱི་དྲི་ངད་དང་སྦྱར་བྱུང་དྲི་ཞིམ་སྤོས་ཀྱི་དུད་སྤྲིན་སོགས་ནི་འགྲན་པ་བཞིན་དུ་མཁའ་ལ་འཕྱུར་བཞིན་ཡོད་པ་མ་ཟད། ཞོགས་པའི་སྐྱ་རེངས་དང་པོ་ཤར་བ་དང་དྲན་ཤེས་རྣམ་པར་དག་པའི་སློབ་ཕྲུག་རྣམས་ནི་མཚར་སྡུག་པདྨའི་གེ་སར་བཞད་པར་རྐང་དྲུག་གཞོན་ནུས་བཅུད་ལ་རོལ་བ་བཞིན། རྒྱུད་བཞི་དང་བཻ་དཀར། སྙན་སུམ་ལེགས་བཤད་སོགས་སྐྱོར་སྦྱོང་གི་སྒྲ་དབྱངས་གསར་པའི་མགྲིན་རྔ་ཕྱོགས་ཀྱི་མཛེས་མའི་སྙན་ལམ་དུ་ལྷང་ལྷང་སྒྲོག་པ་སོགས་ངོ་མཚར་བའི་ཁྱད་པར་སྟོང་གིས་སྒེག་པའི་སྨན་རྩིས་སློབ་གྲྭ་ཞེས་གྲགས་པའི་བ་དན་དཀར་པོ་ཕྱོགས་བཅུར་གཡོ་བ་དེ་ཉིད་དུས་ཡུན་ཐུང་ངུ་ཞིག་གི་ནང་གྲ་སྒྲིག་བྱ་བ་མཐའ་དག་གེགས་མེད་ལམ་ལྷོང་ལྡན་པའི་སྒོ་ནས་མགྱོགས་མྱུར་དང༌། བདེ་ལེགས་ངང་བཙུགས་ཐུབ་པ་བྱུང་བ་ནི། སྤྱིར་བཀའ་དྲིན་སྲིད་ན་འགྲན་ཟླ་མ་མཆིས་པ་ྋརྒྱལ་བ་སྐུ་ཕྲེང་བཅུ་གསུམ་པ་ཆེན་པོས་བདག་རྐྱེན་ཚད་མེད་གནང་བ་དང༌། ཁྱད་པར་དུ་བཀྲས་ཁང་སྤྱི་ཁྱབ་མཁན་པོ་བྱམས་པ་ཐུབ་དབང་མཆོག་གི་ཐུགས་ཁུར་ཟབ་མོའི་ཇུས་འགོད་སློབ་སྟོན་འོག་མཁྱེན་རབ་ནོར་བུ་རང་ཉིད་ཀྱི་ལྷག་བསམ་རྣམ་པར་དག་པའི་འབད་བརྩོན་བཅས་ལ་བརྟེན་ནས་བྱུང་བ་བསྙོན་དུ་མེད་དོ། །

སྨན་རྩིས་ཁང་འཛུགས་དགོས་པའི་རྒྱུ་རྐྱེན་དང་དམིགས་ཡུལ། བོད་དང་བོད་ཆེན་པོ་ཞེས་ཡོངས་སུ་གྲགས་པའི་ཆོས་ལྡན་གྱི་རྒྱལ་ཁབ་འདིར། མཁས་མཛངས་ལྡན་པའི་ཆོས་རྒྱལ་རིམ་བྱོན་གྱིས་བསྐྱངས་པའི་ལོ་ངོ་ཉིས་སྟོང་ལྷག་ལ་ཉེ་བའི་དུས་ཡུན་ནང༌། ཆོས་དང་རིག་གཞུང་སྤྱི་དང༌། ལྷག་པར་དུ་དྲང་སྲོང་དཔྱད་བུ་ཁྲི་ཤེས་ནས་སྨན་པ་དུང་གི་ཐོར་ཅོག་ཅན། གཡུ་ཐོག་རྙིང་མ་ཡོན་ཏན་མགོན་པོ། གཏེར་སྟོན་གྲྭ་བ་མངོན་ཤེས་སོགས་གསོ་རྩིས་རིག་པ་གཙོས་པའི་རིག་གནས་ཆེ་ཕྲ་ཀུན་ལ་མཁྱེན་དཔྱོད་ཀྱི་མངའ་བརྙེས་པའི་མཁས་ཆེན་དམ་པ་རྣམས་ནས་གཅེས་ནོར་དུ་བཞག་པའི་སྨན་རྩིས་རིག་པའི་གཞུང་ལུགས་འདི་མི་ཉམས་གོང་སྤེལ་ཆེད་ྋརྒྱལ་མཆོག་ལྔ་པ་ཆེན་པོ་དང་དེའི་གོང་དུའང་སྨན་གྱི་སློབ་གྲྭ་རེ་ཟུང་བཙུགས་ཏེ་འགྲོ་ལ་ཕན་པའི་འཕྲིན་ལས་ཀྱི་བཀའ་དྲིན་གཞལ་མེད་བསྐྱངས་ཟིན་པ་དེ་ལྟར་ཡང༌། འོན་ཀྱང་དུས་དང་སྤྱི་ཚོགས་ཀྱི་འཕོ་འགྱུར་སོགས་ཕྱི་ནང་གི་རྒྱུ་རྐྱེན་སྣ་ཚོགས་ལ་བརྟེན་མཐའ་འཁྱོལ་དཀའ་ཙམ་བྱུང་བ་དང༌། བོད་མི་བྱིངས་རྩྭ་ཐང་དང་རི་སྒང༌། ལུང་ཁུག་སོགས་ལ་ཆགས་ཡོད་པས་འགྲིམ་འགྲུལ་སྟབས་བདེ་བོ་མེད་པས་ན། ནད་གཞི་ཚབས་ཆེའམ་ནད་རིམས་སོགས་བྱུང་སྐབས་དུས་ཐོག་སྨན་བཅོས་བྱེད་མི་ཐུབ་པའི་དཀའ་ངལ་དང༌། བོད་སྟོད་སྨད་ཀྱི་ཡུལ་གྲུ་རེ་འགར་སྨན་པ་གྲྭ་ཚང་རེ་ཟུང་ཡོད་ནའང་དེ་དག་ནང་དགོན་པའི་བཅའ་ཁྲིམས་དང་ཆོ་ག་ཕྱག་ལེན་གྱི་ལས་འགན་ལྕི་བ་སོགས་ཀྱི་རྐྱེན་པས་སྤྱི་ཚོགས་ཁྲོད་དུ་ཕན་རླབས་དེ་ཙམ་ཐོན་མི་ཐུབ་པའི་དཀའ་ངལ་བཅས་སེལ་ནས། སྐྱ་སེར་དང་རིགས་རུས་ཁྱད་མེད་ཀྱི་བློ་གསར་དོན་གཉེར་ལྡན་པས་སྨན་རྩིས་རིག་པ་འདིར་ཅི་དགར་ལོངས་སུ་སྤྱོད་རྒྱུ་དང༌། ལུང་ཁུག་འགའ་རེ་ན་གདོད་མའི་སྤྱི་ཚོགས་ནས་བཟུང་འཚོལ་སྒྲུབ་བྱུང་བའི་ནད་གཞི་ཁག་ཅིག་ལ་གཅིག་ཆོག་སྨན་བཅོས་ཀྱི་མན་ངག་ཟབ་མོ་ཡོད་པ་དག་འཚོལ་སྒྲུབ་ཀྱིས་གངས་ལྗོངས་ཡངས་པའི་ཁྱོན་ལ་ཁྱབ་བརྡལ་བཏང་ནས་མི་དམངས་ལ་ཞབས་འདེགས་ཞུ་རྒྱུ། སྔོན་བྱོན་མཁས་དབང་རྣམས་ཀྱི་བརྩམས་ཆོས་ཕྱོགས་བསྒྲིགས་དང་ཞིབ་འཇུག སྔོན་ལས་ལྷག་པའི་སྒོ་ནས་རྫོང་གཞིས་ཁག་གི་མི་དམངས་ཀྱི་བདེ་རྩ་དང་ཁེ་ཕན་ཁོ་ན་ལ་དམིགས་ཏེ་སྨན་བཅོས་བྱེད་རྒྱུ། བོད་ཀྱི་སྨན་རྩིས་རིག་པའི་བང་མཛོད་འདི་ཉམས་པ་སོར་ཆུད་དང་ཡོད་པ་རྒྱུད་འཛིན། མེད་པ་གསར་འདྲེན་བྱེད་རྒྱུ། སྨན་རྩིས་གཉིས་ཀྱི་ཤེས་ཡོན་འབུར་དུ་ཐོན་པའི་མི་སྣ་གང་མང་གསོ་སྐྱོང་བྱས་ཏེ་ཆོལ་ཁ་གསུམ་གྱི་ཡུལ་ཕྱོགས་གང་སར་འགྲོ་དོན་དུ་ཞབས་འདེགས་ལེགས་པར་བསྒྲུབ་ཐུབ་པ་བྱ་རྒྱུ་བཅས་སོ། །

སློབ་ཕྲུག་བསྡུ་ཕྱོགས་དང་ཡོངས་ཁུངས། སློབ་ཕྲུག་བསྡུ་ཕྱོགས་སྐོར་བཀའ་ཤག་ཕྱག་རྟགས་དགོངས་དོན་སྐྱེ་འགྲོའི་ཕན་བདེར་དམིགས་ནས་སྨན་རྩིས་སློབ་གྲྭ་གསར་འཛུགས་གནང་རྒྱུ་ཐུགས་གཏན་འཁེལ་ཚུལ་དང༌། སློབ་ཕྲུག་གི་ཆ་རྐྱེན་སྐོར་དགོན་སྡེ་ཡིན་ཚེ་གྲྭ་གཞོན་བློ་གསལ་དང༌། ཡི་གེ་འབྲི་ཀློག་ཤེས་པ། སྐྱ་རྩ་བརྟན་ལྡན། སྔགས་འཆང་རྩིས་པ་ཡིན་རིགས། རིག་གནས་ཀྱི་རྨང་གཞི་ངེས་ཅན་ཡོད་པ་བདམས་ནས་གཏོང་དགོས་པ་སོགས་ཀྱི་བཀའ་རྒྱའི་ནང་དོན་ལྟར་དུས་བཀག་ནང་སློབ་ཕྲུག་གཏོང་རྒྱུ་དང་ལེན་ཞུ་བའི་ལམ་སྲོལ་ཆགས། དཔེར་ན། ཐེངས་དང་པོར་སྨན་རྩིས་ཁང་དུ་སློབ་ཕྲུག་གཏོང་དགོས་པའི་དགོན་སྡེ་ནི་ལྷོ་ཁ་སྨིན་གྲོལ་གླིང་དང༌། རྩེད་ཐང་ལྔ་མཆོད་གྲྭ་ཚང༌། རྩེད་ཐང་དགའ་ལྡན་ཆོས་འཁོར། ཨེ་ཆ་དཀར་ཆོས་སྡེ། ཟུར་མཁར་མདོ་སྔགས་གླིང༌། དོལ་གསུང་རབ་གླིང༌། གོང་དཀར་བདེ་ཆེན་ཆོས་འཁོར། ཡར་འབྲོག་བསམ་སྡིང་དགོན། ཤངས་དགའ་ལྡན་ཆོས་འཁོར། པ་སྣམ་དགའ་བ་གདོང༌། ཆུ་ཤུར་ཆོས་འཁོར་ཡང་རྩེ། བྲག་ཡེར་པ་དགའ་ལྡན་གསང་སྔགས་ཡང་རྩེའི་དགོན། འབྲི་གུང་མཐིལ་སོགས་ཡིན་པ་དང༌། དེ་ཚོའི་ནང་སྨིན་གྲོལ་གླིང་གི་སྨན་སློབ་འཇམ་དཔལ་དང༌། རྩིས་སློབ་བདེ་སྔགས་བསྟན་འཛིན་སོགས་མི་དྲུག རྩེད་ཐང་ལྔ་མཆོད་ནས་སྨན་སློབ་བློ་བཟང་བཀྲ་ཤིས། རྩེད་ཐང་དགའ་ལྡན་ཆོས་འཁོར་ནས་སྨན་སློབ་དཔལ་ལྡན། ངག་དབང་རྒྱལ་མཚན། ཨེ་ཆ་དཀར་ཆོས་སྡེ་ནས་སྨན་སློབ་འོད་གསལ། ཟུར་མཁར་མདོ་སྔགས་གླིང་ནས་སྨན་སློབ་བློ་བཟང་ཐབས་མཁས། དོལ་གསུང་རབ་གླིང་ནས་སྨན་སློབ་ཐུབ་བསྟན། ཡར་འབྲོག་བསམ་སྡིང་དགོན་ནས་སྨན་སློབ་ལྷ་ཡུལ་དང༌། རྣམ་གྲོལ་ཆོས་དབང༌། བྲག་ཡེར་པ་ནས་སྨན་སློབ་འཕྲིན་ལས་དབང་གྲགས། ཆུ་ཤུར་ཆོས་འཁོར་ཡང་རྩེ་ནས་རྩིས་སློབ་ཆོས་ལྡན་དཔལ་འབར། པ་རྣམ་དགའ་བ་གདོང་ནས་རྩིས་སློབ་ཨ་ཡ་བློ་བཟང་བཅས་མི་གྲངས་བཅོ་བརྒྱད་དང༌། གཞན་ཡང་ལྕགས་རི་འགྲོ་ཕན་གླིང་ནས་རྩིས་སློབ་སྟོད་ལུང་ཆུ་བཟང་པ་ངག་དབང་ཆོས་གྲགས་དང༌། ལྷོ་བྲག་དོན་གཉིས་གླིང་གི་སྨན་སློབ་ངག་དབང་ཡེ་ཤེས། དེ་མིན་གཞོན་ཁྲལ་སྨན་བརྫོགས་མཁན་དང་མ་བྱན་བཅས་མི་བཞི། དབུས་ནས་སྔགས་འཆང་རྩིས་སློབ་གཙང་རལ་ཚེ་དབང་དོན་ལྡན། འབྲོམ་ཐོད་ནས་རིན་ཆེན། གཙང་ནས་རྩིས་སློབ་སྲི་ཐར། ཚེ་དོན། བྱ་ངང་ཨ་ཇོ་ཞེས་པ་སོགས་དང༌། ད་དུང་སེ་ར་ནས་ཟུར་ཞུགས་སྨན་སློབ་བསྟན་ཆོས་དང༌། འབྲས་སྤུངས་ནས་རྩིས་སློབ་མི་རབས་ལགས་ཞེས་པ་སོགས་ཡིན་ལ་དེའི་རྗེས་ཡོང་ཁུངས་རྒྱ་ཆེ་རུ་བཏང་སྟེ་བོད་ས་སྟོད་སྨད་བར་གསུམ་དང་དམག་སྒར་སོགས་ནས་ཀྱང་སློབ་ཕྲུག་གཏོང་སྲོལ་ཡོད།

སློབ་གྲྭའི་འཚོ་ཐབས། དེའི་དུས་སུ་སྨན་རྩིས་ཁང་གི་ཆ་རྐྱེན་ཤིན་ཏུ་ཞན་པ་དང་དགེ་སློབ་ཀྱི་འཚོ་བར་མཚོན་ན་འགན་འཛིན་མཁྱེན་རབ་ནོར་བུ་མཆོག་ལ་རང་གཞུང་བཀའ་ཤག་ནས་གཞུང་ཞབས་རྩེ་དྲུང་ལས་ཚན་པ་གནས་ལྔ་པའི་ཕོགས་ཐོབ་བཞེས་རྒྱུ་ཡོད་པ་ལས། དགེ་བའི་བཤེས་གཉེན་གཞན་པ་རྣམས་ལ་རང་གཞུང་རྩེ་དྲུང་ཡིག་ཚང་ལས་ཁུངས་ནས་འཚོ་ཐབས་ཙམ་ལས་དམིགས་བསལ་གྱི་ཕོགས་ཐོབ་སོགས་གང་ཡང་བཞེས་རྒྱུ་མེད། དེ་བྱིངས་སློབ་ཕྲུག་དགོན་སྡེ་ཁག་ནས་ཡོངས་རིགས་ལ་དགོན་པའི་འགྱེད་ཕོགས་དང༌། སྔགས་འཆང་རྩིས་པའམ་ཟུར་ཞུགས་རྣམས་ལ་ཁྱིམ་ཚང་རང་ནས་འགྲོ་གྲོན་གཏོང་དགོས་པ་ལས་མཐུན་འགྱུར་རོགས་རམ་གྱི་ཡོང་ཁུངས་མེད་པར་བརྟེན་སློབ་སྦྱོང་བྱེད་རིང་དཀའ་ངལ་ཆེ་ཙམ་ཡོད། ཡིན་ནའང་སྐབས་དེའི་སློབ་མ་རྣམས་ཡོང་ཁུངས་སོ་སོ་ནས་དྲག་གྲས་འདེམས་ཀ་བྱས་པ་ཤ་སྟག་ཡིན་པས། རྨང་གཞིའི་ཤེས་ཚད་སོགས་མཐོ་བོ་ཡོད་པར་བརྟེན་སྨན་རྩིས་གཉིས་ཀྱི་སྦྱངས་འབྲས་ལ་གཞན་དྲིང་མི་འཇོག་པའི་གྲུབ་འབྲས་བླངས་ཡོད།

སློབ་ཡུན། སྐབས་དེར་སྨན་པ་སྦྱངས་ན་ལོ་གསུམ་དང༌། རྩིས་དཀར་ནག་སྦྱངས་ཚེ་ལོ་གཉིས། སྨན་རྩིས་གཉིས་ལྡན་བསླབ་ན་ལོ་ལྔ་བཅས་ཀྱི་གཏན་འབེབས་མཛད་ཡོད།

སྦྱང་བྱའི་སློབ་ཚན། སྦྱང་བྱའི་སློབ་ཚན་གཙོ་བོ་ནི། ༡ སྨན་པ་ཡིན་ཚེ། རྒྱུད་བཞི། འགྲེལ་པ་བཻ་སྔོན། རྩ་རྒྱུད་སྡོང་འགྲེམས། བཤད་རྒྱུད་སྡོང་འགྲེམས། བྱང་ཁོག་ཡུལ་ཐིག ནད་སྨན་སྤྲོད་པའི་ཉམས་ཡིག སྨན་གྱི་ནུས་པ་ཕྱོགས་བསྡུས། གསོལ་འདེབས་སྣང་པ་མཐའ་ཡས་སོགས་དང་ཆོས་སྤྱོད་བཅས་སྨན་དཔེ་ལེ་ཚན་བཅོ་བརྒྱད་བློ་འཛིན་རྒྱུགས་སྤྲོད་བྱེད་དགོས། ད་དུང་བྱང་ཁོག་ཡུལ་ཐིག་དང་རྩ་ཐིག་ནག་ཐིག་ཅེས་པ་སློབ་ཕྲུག་ཆུང་གྲས་བདམས་ནས་དེའི་ལུས་པོར་ཡུལ་ཐིག་དང་རྩ་གནད་རུས་གནད་ཀྱི་ཐིག་རིས་བྲིས་རྗེས་ངག་སྐྱོར་མཛུབ་བཙུགས་ཀྱིས་ཐོག་ནས་རྒྱུགས་འབུལ་ཐུབ་པ་དགོས། ༢ རྩིས་དཀར་ནག་སྦྱངས་ཚེ། འབྱུང་རྩིས་མན་ངག་ཟླ་བའི་འོད་ཟེར་ལས་སྐོར་འགོ་སྤྱིའི་རྣམ་བཞག་དང༌། སྐར་རྩིས་སྔོན་འགྲོ། ལྔ་པ་འཕྲོད། དུས་སྦྱོར། རྐང་བརྒྱ། དབྱངས་འཆར། ཀེག་རྩིས། བག་རྩིས། གཤིན་རྩིས་བཅས་དང་དེ་དག་གི་རྡེའུ་ཕྲ་བཅས་སྦྱངས་དགོས་པ་མ་ཟད། སྐར་རྩིས་པ་མི་གཉིས་ཐུན་མོང་ནས་ལོ་གཅིག་གི་ལོ་ཐོ་ཆ་ཚང་བརྒྱབ་སྟེ་རྒྱུགས་འབུལ་ཞུ་ཐུབ་དགོས། དེ་མིན་སྨན་རྩིས་གཉིས་ཀྱི་ཐུན་མོང་གི་སྦྱང་བྱའི་རིག་གནས་སྐོར་ལ། སུམ་རྟགས་རྩ་བ་དང༌། ལེགས་བཤད་ལྗོན་དབང༌། རྟགས་ཀྱི་འཇུག་པའི་དཀའ་གནད་གསལ་བའི་མེ་ལོང༌། རང་རྒྱུད་ཞི་བར་བྱེད་པའི་ཐབས་ལ་བྱང་ཆུབ་ལམ་སྒྲོན་དང༌། བཤེས་སྤྲིངས། ཇོ་བོ་རྗེའི་བསྟོད་པ། ད་དུང་དཔེ་དོན་སོགས་ལེགས་པར་རྟོགས་ཐུབ་པའི་ཆེད་སྙན་ངག་དང་མངོན་བརྗོད། སྡེབ་སྦྱོར་དང་སྒྲ་སོགས་སྦྱང་དགོས་སོ། །

རྒྱུགས་སྤྲོད་ཚད་གཞི་དང་ལག་འཁྱེར་སྤྲོད་སྟངས། གོང་གསལ་སྨན་པ་ཐོན་པའམ་རྩིས་པ་ཐོན་པ་ཇི་ལྟར་ཡང་སྦྱངས་འབྲས་ཀྱི་ནང་དོན་དང་རྒྱུགས་སྤྲོད་ཀྱི་ཚད་གཞི་རྒྱས་བསྡུས་སོགས་ཁྱད་ཡོད་སྟབས། སྐབས་དེར་སྨན་རྩིས་གཉིས་ལྡན་གྱི་སློབ་གྲྭ་ཐོན་པ་ཡིན་ན་དང་པོའི་དང་པོ་དང༌། སྨན་པ་རབ་བམ་རྩིས་དཀར་ནག་གཉིས་ཀ་ཐོན་པར་ཨང་དང་པོ། སྨན་པ་དང་རྩིས་པ་སྤྱིར་བཏང་ཐོན་པར་ཨང་གཉིས་པ་བཅས་སྩལ་སྲོལ་ཡོད། སྨན་པ་རབ་ཀྱི་རྒྱུགས་གཞིའི་ཚད་ནི་རྒྱུད་བཞི་ཆ་ཚང་བློ་རྒྱུགས་སྤྲོད་དགོས་པ་དང༌། སྨན་པ་འབྲིང་གི་རྒྱུགས་གཞིའི་ཚད་ནི་རྒྱུད་གསུམ་ཆ་ཚང་བློ་རྒྱུགས་ཐོག་མན་ངག་རྒྱུད་ནས་ཚ་གྲང་གལ་མདོ་དང་རི་ཐང་མཚམས་ལེའུ་གཉིས་བཅས་ཐེངས་དང་པོའི་བློ་རྒྱུགས་སྤྲོད་དགོས། དེ་ནས་མུ་མཐུད་རྒྱུད་བཞི་དང་དེའི་འགྲེལ་པ་བཻ་སྔོན་གྱི་ཚིག་དོན་གཉིས་ལ་སྦྱངས་པ་དཔྱིས་ཕྱིན་པ་བྱས་ནས་རྒྱུགས་འབུལ་ཞུ་དགོས་པར་མ་ཟད། ཆོས་སྤྱོད་ཅེས་པའི་སྨན་དཔེ་ལེ་ཚན་བཅོ་བརྒྱད་བློ་འཛིན་བྱས་ཏེ་ཐེངས་གཉིས་པའི་བློ་རྒྱུགས་འབུལ་དགོས། རྩིས་སློབ་ཡིན་ན་གོང་ཞུས་རྩིས་དཔེ་དེ་དག་སྦྱངས་པ་དང་རྩིས་འབྲས་ཞིབ་རྒྱས་འཁོད་པའི་ཆེད་རྩོམ་ཡིག་རྒྱུགས་ཕུལ་ན་རྩིས་པ་འབྲིང༌། དེའི་སྟེང་སློབ་མ་གཉིས་ཀྱིས་ཐུན་མོང་གིས་ལོ་གཅིག་གི་ལོ་ཐོ་ཆ་ཚང་བཏོན་ན་རྩིས་པ་རབ་བཅས་ཡིན། སྨན་པའི་ལག་འཁྱེར་ཐོག་ལན་ཛཱའི་ཡི་གེ་བྷེ་ཥ་ཛེ་སྨན་པཞེས་པ་དང༌། རྩིས་པའི་ལག་འཁྱེར་ལ་གྷ་ཎི་རྩིས་པ་ཞེས་པའི་དམ་ཕྲུག་བ་སོ་བརྐོས་མ་སྒོང་གཟུགས་ཅན་གཉིས་སོ་སོར་བསྐྱོན། གལ་ཏེ་སྨན་རྩིས་གཉིས་ལྡན་ཡིན་ཚེ། དེར་དམ་ཕྲུག་ཉིས་བརྩེགས་ཅན་གྱི་ལག་འཁྱེར་སྩལ་སྲོལ་འདུག ཐ་མར་ཕྱིར་ལོག་སྐབས་བཀའ་ཤག་ནས་བཀའ་འཛིན་ཞུས་ཏེ་ཕར་ལམ་གཞིས་དགོན་དང༌། དམག་སྒར་རང་ལ་མ་སླེབས་པར་ས་གནས་སོ་སོར་རྟ་འུལ་དོས་ཁལ་ཕྲན་ཙམ་བསྐུལ་ཆོག་པའི་དམིགས་བསལ་གཟིགས་སྐྱོང་ཡོད།

སློབ་གྲྭའི་སློབ་ཚན་གྱི་སྐོར། ཉིན་རེར་སློབ་ཚན་ཚོགས་ཐེངས་དྲུག་ཡོད་པ་དང་སློབ་ཚན་རེ་ལ་དུས་ཡུན་ཆུ་ཚོད་ ༢ ཙམ་ཡིན།

སློབ་ཚན་དང་པོ། ཞོགས་པའི་སྐྱ་རེངས་དང་པོ་ཤར་བ་དང་ཆབས་ཅིག་སློབ་ཕྲུག་རྣམས་མལ་ལས་ལངས་ཏེ་དུས་ཚོད ༥་༣༠ ནས་སློབ་འགོ་བཙུགས་ཏེ་ཐོག་མར་འཇམ་དབྱངས་གང་བློ་མ་ཞལ་འདོན་བྱས་རྗེས་ཉིན་རེའི་བློ་འཛིན་ཚད་གཞི་ཁག་འཛིན་གྲྭའི་རྒན་བདག་ལ་བློ་རྒྱུགས་འབུལ་དགོས། དེ་ནས་ཞོགས་ཇའི་གསོལ་ཚིགས་བར་གསེང་ཡིན།

སློབ་ཚན་གཉིས་པ། ཞོགས་པའི་ཆུ་ཚོད ༨་༠༠ ནས་སློབ་ཕྲུག་རྣམས་སློབ་ཁང་དུ་ཚང་འཛོམས་ཐོག་དགེ་རྒན་ཕེབས་ཏེ་སྨན་དང་རྩིས་སོ་སོའི་གཞུང་ལུགས་ཀྱི་ཟབ་མོའི་གནད་ལ་ལུང་དང་རིག་པའི་བཤད་འཁྲིད་དང་དོགས་གནད་ཁག་ལ་གསེད་བཀྲོལ་གནང༌། སློབ་ཚན་འདི་གྲོལ་བ་དང་ཆབ་གསང་སོགས་ཀྱི་ཆེད་བར་གསེང་ཅུང་ཡོད། དེ་རྗེས་སློབ་ཁང་གི་ཡང་སྟེང་དུ་ཕེབས་ཏེ་དགེ་སློབ་ལྷན་འཛོམས་ཐོག་བསངས་མཆོད་དུད་སྤྲིན་མཁའ་ལ་འཁྲིགས་པ་ཞིག་གཏོང་སྲོལ་ཡོད།

སློབ་ཚན་གསུམ་པ། སྔ་དྲོ་ཆུ་ཚོད་ ༡༠་༣༠ ཙམ་ལ་ཡང་བསྐྱར་སློབ་ཁང་དུ་འཛོམས་ཏེ་སློབ་ཕྲུག་རེ་རེ་ནས་འཁྱུག་ཡིག་སོགས་ཡིག་གཟུགས་མི་འདྲ་བ་ཡིག་ཕྲེང་བཅུ་ཙམ་འབྲི་དགོས་པ་དང༌། དེ་མིན་སྡོང་འགྲེམས་རྒྱག་སྟངས་དང་ས་བྲིས་སོགས་སྦྱང་དགོས། དེ་ནས་ཆུ་ཚོད་གཉིས་ཙམ་ལ་ཉིན་གུང་གི་གསོལ་ཚིགས་དང་ངལ་གསོའི་བར་གསེང་གི་དུས་ཚོད་ཡིན།

སློབ་ཚན་བཞི་བ། ཉིན་རྒྱབ་ཆུ་ཚོད་ ༣་༠༠ ཙམ་ནས་སྨན་རྩིས་སློབ་ཕྲུག་མཉམ་བསྲེས་ཐོག་སློབ་དཔོན་མཁྱེན་རབ་ནོར་བུ་མཆོག་ངོ་ཕེབས་ཀྱིས་སྨན་རྩིས་དང་རིག་གནས་སོགས་མན་ངག་བཀའ་ལུང་ཟབ་རྒྱས་ཀྱི་བཀའ་དྲིན་སྩོལ་བ་ཡིན། དམ་པ་འདིའི་ཡོན་ཏན་གྱི་ཚད་ནི་སུས་ཀྱང་དཔོག་པར་མི་ནུས་ཏེ། དགེ་བ་ལ་རྟག་ཏུ་སྤྲོ་བའི་བརྩོན་འགྲུས་དང༌། ཚིག་དོན་སྔར་མ་བཟུང་བ་གསར་དུ་འཛིན་པའི་སྙིང་སྟོབས། བཟུང་ཟིན་བརྗེད་པར་མི་འགྱུར་བའི་གཟུངས། འགྲོ་ལ་བརྩེ་བའི་སྙིང་རྗེ། བྱ་བ་མཐའ་དག་དོན་ལྡན་དུ་འགྱུར་པའི་བག་ཡོད་སོགས་མཛད་པའི་ཆ་ཕྲ་མོ་ཙམ་ཡང་སྨྲ་བསམ་བརྗོད་ལས་འདས་པ་ཡིན་ནོ། །སློབ་ཚན་འདི་གྲོལ་རྗེས་དུས་ཚོད་གཉིས་ཙམ་ལ་དགོང་དྲོའི་གསོལ་ཚིགས་དང་ངལ་གསོའི་བར་གསེང་ཡིན།

སློབ་ཚན་ལྔ་བ། ཕྱི་དྲོའི་ཆུ་ཚོད་ ༥་༠༠ ནས་ ༦་༠༠ བར་སློབ་ཚན་ལྔ་བ་ཡིན་ལ་དེའི་ནང་ཉིན་དེར་བློ་འཛིན་ཚད་གཞི་གཏན་འབེབས་ལྟར་བློ་འཛིན་དང་བསྐྱར་སྦྱོང་ལ་འབད་འབུངས་དཔག་མེད་བྱས་ཏེ་ཉིན་རྗེས་མའི་སློབ་ཚན་དང་པོའི་སྐབས་ངག་རྒྱུགས་ཆུ་བཞུར་པ་ལྟར་འབུལ་ཐུབ་པ་བྱ་རྒྱུ་དེ་ཡིན།

སློབ་ཚན་དྲུག་པ། སྨན་སློབ་དང་རྩིས་སློབ་ཁག་བགོས་ཀྱིས་ཐོག་ཁའི་བར་ཁྱམས་གཡས་གཡོན་དུ་སྨན་སློབ་ཀྱིས་རྒྱུད་གསུམ་དང༌། རྩིས་སློབ་ཀྱིས་འབྱུང་རྩིས་དང་སྐར་རྩིས་སྔོན་འགྲོ་སོགས་སྙན་པའི་དབྱངས་རྟ་དང་ལྡན་པའི་སྒོ་ནས་ངག་སྐྱོར་བྱ་དགོས་པ་དང༌། དབྱངས་རྟ་ངག་སྐྱོར་ཀྱི་སློབ་ཚན་འདིའི་དུས་གྲོལ་ཚད་འཛིན་སློབ་དཔོན་མཁྱེན་རབ་ནོར་བུ་མཆོག་ནས་སྟངས་འཛིན་གནང་བཞིན་ཡོད། གྲོལ་ཆོག་དགོངས་ཁྲོལ་སྩལ་པ་དང་བྱང་ཆུབ་ལམ་སྒྲོན། བཤེས་པའི་སྤྲིངས་ཡིག་བཅས་དབྱངས་ལ་གྱེར་ནས་ངག་སྐྱོར་ཚར་གཅིག་འདོན་དགོས་པ་དང་དེ་ནས་ཉིན་དེའི་སློབ་ཚན་ཡོངས་སུ་རྫོགས་པ་ཡིན།
སློབ་གྲྭའི་གུང་གསེང༌། སྤྱིར་ཟླ་རེའི་ནང་དུ་གུང་གསེང་རིགས་གཉིས་ཡོད། ཚེས་ ༥ དང་ཚེས་ ༣༠ ཉིན་གཉིས་ལ་གུང་གསེང་ཡིན། འོན་ཀྱང་མཚན་མོའི་དབྱངས་རྟ་ལ་དྲངས་པའི་ངག་སྐྱོར་རང་འཇགས་སྐྱོར་དགོས། ཚེས་ ༡༤ དང་ཚེས་ ༢༩ ལ་དབྱངས་རྟའི་ངག་སྐྱོར་མི་དགོས་པར་གུང་གསེང་ཡིན། དེ་མིན་ལོ་གསར་ལ་གུང་གསེང་ཉིན་ཁ་ཤས་དང༌། དུས་ཆེན་ཁག་དང་ལྟད་མོ་ཆེ་གྲས། ངན་པ་དགུ་འཛོམས་དང་བཟང་པོ་བཅུ་འཛོམས་བཅས་ལ་གུང་གསེང་གཏོང་སྲོལ་ཡོད།

སྨན་རྩིས་ཁང་གི་སྤྱི་ཁྱབ་བདག་འཛིན་སྐོར། སྨན་རྩིས་ཁང་གི་སྤྱི་ཁྱབ་བདག་འཛིན་དེ་བོད་གཞུང་རྩེ་ཡིག་ཚང་ལས་ཁུངས་ལ་ཡོད་པ་དང༌། སྨན་རྩིས་སློབ་ཕྲུག་གསར་འཛུགས་དང་སློབ་ཐོན་སྨན་པ་དང་རྩིས་པར་ལས་བསྐོ། སློབ་ཁང་དང་ཚོགས་ཁང་སོགས་ལ་འཛིན་ཆས་ཀྱིས་མཚོན་པའི་དགོས་མཁོའི་རིགས། ཕྱི་ནང་གི་རྒྱུ་རྐྱེན་སོགས་ལ་བརྟེན་ནས་ཕྱིར་འཐེན་བྱུང་པའི་སློབ་མའི་དགོངས་ཞུའི་རིགས་ལ་སོགས་པ་རྩེ་ཡིག་ཚང་བརྒྱུད་དགོས་པ་ལས་སྨན་རྩིས་ཁང་གི་འགན་འཛིན་ལ་རང་དགར་ཐག་གཅོད་བྱེད་པའི་དབང་ཚད་མེད། གཞན་ཡང་གལ་འགངས་ཆེ་བའི་ལས་དོན་རིགས་དང་དགེ་ལས་གསར་འཛུགས་བྱེད་ཕྱོགས་བཅས་རྩེ་ཡིག་ཚང་ལ་སྙན་སེང་གིས་ཐག་གཅོད་བྱེད་དགོས་པ་དང༌། དེ་མིན་ནང་རྐྱེན་ཕྲན་བུའི་རིགས་དང་རྒྱུན་ལྡན་གྱི་ལས་དོན་སོགས་ལ་བཅའ་ཡིག་རིན་པོ་ཆེའི་དགོངས་དོན་གཞིར་བཟུང་གིས་འགན་འཛིན་མཆོག་དང་རྒན་བདག་ཚོས་གྲོས་བསྡུར་བྱས་ཏེ་ཐག་གཅོད་བྱེད་ཆོག་པ་ཡིན།

ལོ་རྒྱུས་འཕེལ་རིམ། ས་རྟ་སྤྱི་ལོ་ ༡༩༡༨ལོ་སྟེ། སྨན་རྩིས་ཁང་བཙུགས་ནས་ལོ་གསུམ་འཁོར་ལ་ཉེ་སྐབས། ཐེངས་གཉིས་པའི་སློབ་མ་བསྡུ་རྒྱུའི་གསལ་བསྒྲགས་གནང༌། དགོན་སྡེ་ཁག་ལ་གསལ་བསྒྲགས་གནང་པའི་ཆ་རྐྱེན་དུ་རང་ལོ་བཅུ་གསུམ་ནས་བཅོ་བརྒྱད་བར། ཡི་གེ་འབྲི་ཀློག་ལ་བྱང་ཆ་ལྡན་པ། སྐྱེས་རུས་ཁུངས་གཙང༌། སྐྱ་རྩ་བརྟན་ལྡན། སྐྱེས་གཟུགས་ལེགས་ཤིང་རྣམ་རིག་གསལ་བ་སོགས་འཁོད་འདུག ལོ་དེར་ྋརྒྱལ་མཆོག་བཅུ་གསུམ་པ་རྗེ་བཙུན་ངག་དབང་བློ་བཟང་ཐུབ་བསྟན་རྒྱ་མཚོ་འཇིགས་བྲལ་ཕྱོགས་ལས་རྣམ་པར་རྒྱལ་བའི་སྡེ་དཔལ་བཟང་པོའི་སྐུ་བཅར་བླ་སྨན་ཆུང་བ་བྱ་སྦུག་དམ་ཆོས་དཔལ་ལྡན་སྐུ་ན་སྨིན་པའི་རྐྱེན་གྱིས་དགོངས་ཞུ་གནང་པའི་ཚབ་ཏུ། སྨན་རྩིས་ཁང་གི་འགན་འཛིན་མཁྱེན་རབ་ནོར་བུ་མཆོག་ལ་དམིགས་བསལ་བདག་རྐྱེན་ཚད་མེད་པའི་སྒོ་ནས་སྐུ་བཅར་བླ་སྨན་ཆུང་བ་བསྐོ་བཞག་གནང་རྒྱུར་ཕྱག་རྟགས་ཕེབས་པ་ལྟར་གསར་མཇལ་གྱི་རྟེན་འབྲེལ་མཛད་སྒོ་སྔར་སྲོལ་བཞིན་དུ་མཛད། སྨན་རྩིས་སློབ་ཕྲུག་བསྡུ་ལེན་ཕྱག་རྟགས་སྔ་ཕྱི་གཉིས་སྩལ་ཏེ་སློབ་ཕྲུག་ལྔ་བཅུ་ཙམ་ལ་འཕེལ་རྒྱས་ཕྱིན་ཡོད། བླ་སྨན་མཁྱེན་རབ་ནོར་བུ་མཆོག་ནས་སློབ་དཔོན་བཀྲས་ཁང་སྤྱི་ཁྱབ་མཁན་པོ་གང་གི་ཞབས་པད་མུ་མཐུད་བསྟེན་པ་དང༌། ྋརྒྱལ་དབང་བཅུ་གསུམ་པའི་སྐུའི་སྨན་བཅོས་དང༌། གསོལ་སྨན་སྦྱར་རྒྱུ་བཅས་པར་སྒོ་གསུམ་རྣམ་པར་དག་པའི་སྒོ་ནས་སྲི་ཞུའི་བྱ་བ་ལྷག་བསམ་རྣམ་དག་གིས་འཁུར་དུ་བཞེས། ད་ལྟ་ཤིང་དཔར་དུ་འཁོད་པའི་ཉེར་མཁོའི་སྨན་སྦྱོར་འཆི་མེད་བདུད་རྩིའི་བུམ་བཟང་ཞེས་པ་སྐབས་དེ་དུས་ཕྱོགས་བསྡུས་མཛད་ཅེས་གྲགས། སྨན་རྩིས་ཁང་གིས་སྨན་རྩིས་མི་སྣ་གསོ་སྐྱོང་བྱེད་རྒྱུ་ཕུད། ད་དུང་ལས་ཀ་གཞན་དག་གཉིས་ཡོད་པ་ལས། སྔ་སོར་སློབ་དཔོན་བཀྲས་ཁང་སྤྱི་ཁྱབ་མཁན་པོ་བྱམས་པ་ཐུབ་དབང་མཆོག་གིས་བྱིས་པའི་བདེ་ཐབས་ལ་དམིགས་ཏེ་བྱིས་པ་ཉེར་སྤྱོད་ཀུན་ཕན་ཟླ་བའི་མེ་ལོང་ཞེས་པ་གསར་རྩོམ་གནང་བ་ལྟར། རྫོང་གཞིས་ཁག་ ༩༦ ལ་བྱིས་པ་ཉེར་སྤྱོད་ཀྱི་སྨན་ཁག་བསྐུར་རྒྱུ་དང༌། ཕྱོགས་མཚུངས་བྱིས་པའི་སྐྱེས་སྐར་བརྟག་པའི་ཚེ་རྩིས་འབྲས་བུ་བཏོན་ཏེ་བསྐུར་རྒྱུའི་ལས་འགན་ཡོད། སྐབས་དེར་རྫོང་གཞིས་ཁག་ནས་བྱིས་པ་ཉེར་སྤྱོད་ཀྱི་སྨན་ཡོན་ཌམ་དཀར་རེ་དང༌། ཁ་བཏགས། བྱིས་པའི་ཚེ་རབས་ལས་རྩིས་ཀྱི་རྩིས་ཡོན་ཞོ་གསུམ་སོགས་ཆེ་ཤོག་ཆུང་ཤོག་གིས་རྩེ་ཡིག་ཚང་ལས་ཁུངས་ལ་སྙན་ཞུ་དང་སྦྲགས་ནས་འབུལ་དགོས་ཤིང༌། རྩེ་ཡིག་ཚང་ལས་ཁུངས་ནས་སྙན་ཞུ་དང་དངུལ་རྣམས་སྨན་རྩིས་ཁང་ལ་གསོལ་རས་སྩལ་རྗེས་བྱིས་པ་ཉེར་སྤྱོད་ཀྱི་སྨན་ཁག་བསྐུར་རྒྱུ་དང༌། སྐྱེས་སྐར་ཚེ་རྩིས་ཤོག་ལྷེ་བཏོན་ཏེ་རྫོང་གཞིས་གང་ཡིན་ཁ་ཡིག་བརྒྱབ་ནས་བསྐུར་བ་དང༌། ཆབས་ཅིག་དཀར་ཆག་བཟོས་ཏེ་འདྲ་ཡ་སྨན་རྩིས་ཁང་ནས་ཉར་ཚགས་བྱེད་སྲོལ་འདུག རྒྱུ་མཚན་ནི་བྱིས་པ་ཉེར་སྤྱོད་དང་བྱིས་པའི་ཚེ་རྩིས་སྐོར་ལ་ཟླ་དྲུག་མཚམས་རྫོང་གཞིས་ཁག་གིས་ཡིག་ཚང་ལས་ཁུངས་ལ་རྩིས་ཁྲ་སྙན་ཞུ་འབུལ་རྒྱུའི་གཏན་འབེབ་ཡོད་པ་ལྟར་ཕྱོགས་བསྡོམས་སྐབས་སུ་ཧེ་བག་ཡོད་མེད་ཞུས་དག་དང་དཔྱད་གཞི་གནང་བར་མེད་དུ་མི་རུང་བ་ཡིན། དེའི་དུས་སུ་སྨན་རྩིས་ཁང་ལ་བྱིས་པ་ཉེར་སྤྱོད་ཀྱི་སྨན་བསྐུར་རྒྱུའི་ལས་ཀ་དང༌། ཚེ་རབས་ལས་རྩིས་རྒྱག་རྒྱུའི་ལས་འགན་ཧ་ཅང་ཆེ་བར་བརྟེན་བྱིས་པ་ཉེར་སྤྱོད་ཀྱི་སྨན་རྣམས་ཁ་བྱང་ཨང་གྲངས་ཅན་དང༌། ཚེ་རྩིས་དཔེ་ཐུང༌། དེ་བཞིན་སྐྱེས་སྐར་བརྟག་པའི་འབྲས་བུ་དང་དབྱངས་འཆར་གཟའ་དགུའི་རེའུ་མིག་ཤོག་ལྷེ་བཅས་ཆེད་མངགས་ཤིང་པར་བརྐོས་པར་མ་ཟད། ཚེ་རྩིས་འགོ་བརྗོད་དུ། འདུས་པའི་བསོད་ནམས་ས་གཞི་ལ། །དལ་རྟེན་འབྱོར་པ་རབ་རྒྱས་ཤིང༌། །དུས་མིན་འཆི་བ་ལས་སྒྲོལ་ཏེ། །ཕན་བདེའི་ལམ་བཟང་སྟོན་པར་ཤོག །ཅེས་པའི་མཆོད་བརྗོད་ཅན་གྱི་ཤོག་ལྷེ་པར་བརྐོས་མཛད་ཡོད། སྐབས་དེར་སྨན་རྩིས་ཁང་གི་དགེ་སློབ་ཚོས། ཉིན་མོ་ནད་པར་སྨན་བཅོས་དང༌། བྱིས་པ་ཉེར་སྤྱོད། སྐྱེས་སྐར་ཚེ་རྩིས། ལོ་ཐོ་རྩོམ་སྒྲིག་སོགས་ཀྱི་ཕྱག་ལས་ཧ་ཅང་ལྕི་བོ་ཡིན།

སྨན་རྩིས་ཁང་ཐོག་མར་བཙུགས་སྐབས་ཉིན་རེར་ནད་པ་བཅུ་ཕྲག་འགའ་ལས་མེད་པ་དང༌། སྨན་རྒྱུའི་ཡོང་ཁུངས་སྔོ་སྨན་རྣམས་དབྱར་དུས་དགེ་སློབ་སྒྲིག་འཛུགས་ཀྱིས་སྨན་འཐོགས་ལ་ཕེབས་ནས་བཏོགས་པ་དེས་རང་མཁོ་རང་ལྡེང་དང༌། ཁྲོག་སྨན་རིགས་རང་གཞུང་བཀའ་ཤག་གི་བླ་ཕྱག་ལས་ཁུངས་དང༌། རྩེ་ཕྱག་ལས་ཁུངས་སོ་སོ་ནས་སྨན་ཕོགས་ཞུས་ཏེ་ཁུངས་བསྐྱེལ་བྱེད་དགོས་པ་ལས་དམིགས་བསལ་སྨན་གྱི་མ་རྩ་ལྟ་བུ་གང་ཡང་མེད། དེ་རྗེས་ནད་པ་མང་དུ་སོང་ཞིང་སྨན་གྱིས་འགྲོ་གྲོན་ཆེ་བའི་དབང་གིས་ཁྲོག་སྨན་ཉོ་སྒྲུབ་ཆེད་དུ་སྨན་རྩིས་ཁང་རང་གིས་གཞན་དག་ས་ནས་མ་རྩ་གཡར་ཏེ་བལ་ཚོང་བརྒྱབ་པར་ལྷོ་ཁ་དར་རྒྱས་གླིང་གི་སྨན་སློབ་བློ་བཟང་དང༌། མཚུར་ཕུའི་སྨན་སློབ་སངས་རྒྱས་ཆོས་འཕེལ་གཉིས་བཏང་རྗེས་རྒྱ་གར་བརྒྱུད་འབྲས་བུ་གསུམ་དང༌། བཟང་དྲུག ཨར་ནག་སོགས་ཉོ་ཐུབ་པ་དེས་སྨན་རྒྱུའི་དཀའ་ངལ་གནས་སྐབས་སེལ་ཐུབ་པ་བྱུང༌། དེ་རྗེས་སྨན་རྩིས་ཁང་རིམ་བཞིན་ཡར་རྒྱས་འགྲོ་བ་དང་སྦྲགས་ལྕགས་རི་གྲྭ་ཚང་གི་འཚོ་བྱེད་རྣམས་ཀྱང་སྨན་རྩིས་ཁང་དུ་སློབ་ཁྲིད་ཞུ་བར་བཅར་དགོས་པ་སོགས་ལ་བསྟུན་མཚན་མོའི་དཔེ་ཁྲིད་གནང་བཞིན་པ་དེ་དག་ཞོགས་པའི་དུས་ཚོད་ལ་བསྒྱུར་བ་དང༌། སྨན་རྩིས་ཀྱི་དཔེ་ཆ་བློ་འཛིན་དང་ངག་སྐྱོར་བྱེད་ཆེད་ཞོགས་པ་དང༌། མཚན་མོ་སྐྱོར་རྟ་ཚུགས་རྒྱུའི་གཏན་འབེབས་ཀྱང་གསར་དུ་གནང་སྟེ་སློབ་སྦྱོང་དམ་འཛིན་དང་སྒྲིག་ལམ་ནན་པོས་སློབ་གྲྭ་གཉེར་སྐྱོང་གི་འགོ་དེ་ནས་ཚུགས་ཞེས་གསུངས། དེའི་སྐབས་སུ་གོང་དཀར་བདེ་ཆེན་ཆོས་འཁོར་གྱི་རྩིས་པའི་དགེ་རྒན་འཇམ་དཔལ་མཐུ་སྟོབས་ལགས་དང༌། ཟུར་མཁར་མདོ་སྔགས་གླིང་གི་སྨན་དགེ་བློ་བཟང་ཐབས་མཁས། རྩེད་ཐང་དགའ་ལྡན་ཆོས་འཁོར་གྱི་སྨན་རྩིས་གཉིས་ལྡན་དཔལ་ལྡན་ལགས་ལྟ་བུས་སྨན་རྩིས་ཁང་གི་དགེ་རྒན་གྱི་ཕྱག་ལས་གནང་ཐུབ་པ་བྱུང་བ་དེར་སློབ་དཔོན་བཀྲས་ཁང་སྤྱི་ཁྱབ་མཁན་པོ་བྱམས་པ་ཐུབ་དབང་མཆོག་ནས་ཚད་མཐོའི་གདེངས་འཇོག་དང༌དགྱེས་ཚོར་ཆེན་པོས་བསྔགས་བརྗོད་མཛད་ཅེས་གྲགས།

སྨན་རྩིས་ཁང་ཚུགས་པའི་མེ་འབྲུག་ལོ་ནས་བཟུང་མཁས་དབང་མཁྱེན་རབ་ནོར་བུ་མཆོག་གིས་དབུ་འཁྲིད་འོག་རྩིས་དགེ་འཇམ་དཔལ་མཐུ་སྟོབས་ལགས་དང༌། གཞན་ཡང་སྨན་རྩིས་ཁང་གི་རྩིས་པ་ཚོས་ལོ་རེའི་ལོ་ཐོ་ཆ་ཚང་བཏོན་རྒྱུའི་འགོ་ཚུགས། དེ་ནས་བཟུང་ལྷོ་ཁ་སྨིན་གྲོལ་གླིང་གི་རྩིས་པ་དང༌། སྟོད་ལུང་མཚུར་ཕུའི་རྩིས་པ་རྣམས་ཀྱིས་ཀྱང་ལོ་རེར་སྨན་རྩིས་ཁང་ལ་ལོ་ཐོ་ཆ་ཚང་རེ་རྒྱུགས་འབུལ་ཞུ་རྒྱུའི་ལམ་ལུགས་གསར་དུ་བཙུགས། སྨན་རྩིས་ཁང་གི་ལོ་རེའི་ལེ་ཐོའི་སྤར་ཤིང་བཟོ་མཁན་དགོས་ཚེ་བཟོ་ཁང་དོ་དམ་ལ་སྙན་གསེང་ཞུས་རྗེས་རྡོ་ཤིང་སྤྱི་པས་གཞུང་ལས་ཀྱི་ཁོངས་ནས་ཤིང་བཟོ་ཁ་ཤས་གཏོང་རྒྱུ་དང༌། དེ་བཞིན་སྤར་པ་རྣམས་ལོ་ལྟར་བོད་ཟླ་བཅུ་གཅིག་པའི་ནང་ལེ་ཐོ་སྤར་རྒྱག་ལས་ཀར་ཀྲིག་ཅར་གྱིས་ཡོང་རྒྱུའི་གཏན་འབེབས་ཡོད། ལེ་ཐོའི་ཁ་གྲངས་ཐོག་མར་སྟོང་ཕྲག་རེ་གཉིས་ཙམ་ནས་རྗེས་སུ་ལྔ་སྟོང་དང༌། ཆིག་ཁྲི་ཙམ་བར་འཕར་ཏེ་བོད་ཆོལ་ཁ་གསུམ་གྱི་ས་གནས་ཁག་ཡོངས་རྫོགས་དང༌། དེ་མིན་རྒྱ་གར། འབྲུག་ཡུལ། འབྲས་ལྗོངས། ལ་དྭགས་སོགས་ལ་འགྲེམས་སྤེལ་གྱིས་རྩིས་ཀྱི་ཁྱབ་ཁོངས་ཡར་རྒྱས་གོང་འཕེལ་ཇེ་ཆེར་ཕྱིན།

ས་ལུག་སྤྱི་ལོ ༡༩༡༩ལོར་སྡེ་སྲིད་སངས་རྒྱས་རྒྱ་མཚོ་མཆོག་གིས་ཕྱག་སྲོལ་མཛད་པ་ལྟར་སྨན་རྩིས་ཁང་དང་ལྕགས་པོ་རི་གྲྭ་ཚང་གཉིས་ཀྱི་སྨན་སློབ་གྲངས་ལྔ་བཅུ་ལྷག་ཙམ་གྱིས་གཏོར་རྒྱག་གླིང་གའི་ནང་སྒར་རྒྱག་ཐོག་སྐབས་དང་པོའི་ཁྲོག་སྨན་སྨན་ངོ་གཟབ་རྒྱས་ཤིག་བཤར་བ་དང༌། དངོས་གཞི་ཐོན་སྐོར་གྲལ་སྒྲིག་ཉིན་སློབ་དཔོན་བཀྲས་ཁང་སྤྱི་ཁྱབ་མཁན་པོ་བྱམས་པ་ཐུབ་དབང་སྐུ་ངོ་མ་ཕེབས་ནས་ཚན་གྲངས་གཟིགས་བཟོས་སྩལ་བའི་མཛད་སྒོ་བསྐྱངས་གནང་པ་དང༌། དེ་ཉིན་ཚོགས་དམངས་ལ་འཇམ་དཔལ་མཚན་བརྗོད་ཀྱི་ལྗགས་ལུང་དང་མཛད་སྒོ་ཟབ་རྒྱས་གནང་བའི་མཇུག་ཏུ་ཨང་དང་པོར་གསེར་ཌམ་གཅིག་གིས་གསོལ་རས་བཀའ་དྲིན་བསྐྱངས་ཤིང་སྨན་རྩིས་དགེ་སློབ་རྣམས་དང་མཉམ་དུ་དྲན་རྟེན་སྐུ་པར་སྒྲོན། དེ་དུས་ཁྲོག་སྨན་བཤར་བའི་ཨང་དང་པོ་ནི་རྩེད་ཐང་ལྔ་མཆོད་ཀྱི་སྨན་སློབ་བློ་བཟང་བཀྲ་ཤིས་དང༌། གཉིས་པ་རྩེད་ཐང་དགའ་ལྡན་ཆོས་འཁོར་གྱི་སྨན་སློབ་ངག་དབང་རྒྱལ་མཚན་ཡིན།

ལྕགས་བྱ་སྤྱི་ལོ ༡༩༢༡ལོར་རང་གཞུང་བཀའ་ཤག་གིས་བཀའ་རྒྱ་ཕེབས་དགོངས་ལྟར་སྤྱི་ཁྱབ་མཁན་པོ་བྱམས་པ་ཐུབ་དབང་མཆོག་གིས་བླ་སྨན་ཆུང་བ་མཁྱེན་རབ་ནོར་བུ་མཆོག་ལ་མཐོང་རྒྱུད་ཕྱག་ལེན་དམར་འཁྲིད་ཀྱི་གདམས་པ་དངོས་སུ་གནང་ཆེད། དངུལ་ཆུ་བཙོ་བཀྲུ་ཆེན་མོ་གསར་བསྐྲུན་ཕྱག་བསྟར་གནང༌།

དེ་དུས་ད་དུང་སྨན་སློབ་རྣམས་ལ་ནད་ཐོག་ལག་ལེན་ཐད་མྱོང་གོམས་ཐོན་པའི་ཆེད་དུ་བསླབ་གྲལ་ལྟར་སྨན་དཔེ་ཐོན་པ་མི་གཉིས་ཀྱིས་ཟླ་བ་གཅིག་རིང་སློབ་དཔོན་མཁས་དབང་མཁྱེན་རབ་ནོར་བུའི་སྐུ་དྲུང་དུ་ནད་པ་གཏོང་བར་འགྲོ་དགོས་པ་དང༌། ཞོགས་ལྟར་ནད་པ་གཏོང་རེས་གཉིས་ཀྱིས་སྔོན་ལ་གད་ཕྱིས་གཙང་སྦྲ་སོགས་ལེགས་པར་བྱས་རྗེས་སྨན་གྱི་བྱིན་རླབས་ཕུད་མཆོད་སྐྱོར་རྒྱུ་དང༌། དེ་ནས་སློབ་དཔོན་མཁས་དབང་མཁྱེན་རབ་ནོར་བུའམ་ཐུགས་སྲས་ཐུབ་བསྟན་ལྷུན་འགྲུབ་ཕེབས་རྗེས་ནད་པ་གཏོང་རྒྱུའི་འགོ་ཚུགས། དེའི་རིང་སློབ་དཔོན་གྱིས་རྩ་ཆུ་ན་ལུགས་སོགས་ལ་བརྟག་དཔྱད་དང༌། སྨན་བཅོས་ཇི་ལྟར་གནང་བའི་སྐོར་ལག་ལེན་གྱི་མན་ངག་དངོས་སུ་ཐོབ་པའི་གོ་སྐབས་ཡག་ཤོས་ཤིག་ཡིན་ལ། ཐ་ན་སྨན་ཐུན་ཤོག་ཆག་རྒྱབ་རྒྱུ་ཡན་ཆད་དེ་དུས་སྦྱོང་བརྡར་ཐེབས་ཡོང༌། ཡང་སྐབས་རེ་རང་ཉིད་ནད་པ་གཏོང་རེས་མིན་རུང་སྨན་པ་བགྲེས་པ་དང་མཉམ་དུ་ལྷ་སའི་གླིང་སྐོར་ལམ་གྱི་སྤྲང་སློང་ལ་ནད་སྐོར་རྒྱབ་རྒྱུའི་ལས་ཀ་དང༌། ས་གནས་གཞན་ལ་འགོས་ནད་ཁྱབ་གདལ་སྐབས་སུ་རིམས་ནད་འགོག་བཅོས་བྱེད་པར་ཞིང་འབྲོག་ཁུལ་དུ་འགྲོ་སྐབས་དགེ་རྒན་དང༌། དགེ་ཕྲུག་ཟུང་སྦྲེལ་གྱིས་མངགས་གཏོང་གནང་བ་སོགས་སློབ་ཕྲུག་དག་ལ་གཞུང་དང་ལག་ལེན་ཁ་མི་བྲལ་བའི་ཐབས་ལམ་སྣ་ཚོགས་གནང་སྲོལ་ཡོད་པ་ཡིན་ནོ། །

ཆུ་ཁྱི་སྤྱི་ལོ་ ༡༩༢༢ལོར་ཉེ་རབས་བོད་ཀྱི་གསོ་རིག་བསྟན་པའི་བདག་པོ་སློབ་དཔོན་བཀའ་དྲིན་མཚུངས་མེད་བཀྲས་ཁང་སྤྱི་ཁྱབ་མཁན་པོ་བྱམས་པ་ཐུབ་དབང་ྋརྒྱལ་དབང་བཅུ་གསུམ་པ་ཆེན་པོའི་བླ་སྨན་སྐུ་བགྲེས་པོའི་ཐུགས་འགན་བཞེས་མུས་སུ་བསྙུན་གཞིས་རྐྱེན་པས་ནོར་བུ་གླིང་ཁར་སྐུ་གཤེགས་སོ། །དམ་པ་བཀའ་དྲིན་ཅན་ཁོང་གི་འདས་མཆོད་དགོངས་རྫོགས་ལ་སློབ་དཔོན་མཁྱེན་རབ་ནོར་བུ་གཙོས་པའི་སྨན་རྩིས་ཁང་གི་དགེ་སློབ་ཡོངས་ནས་སྨོན་ལམ་དང་སྟོང་མཆོད་སོགས་མཆོད་སྤྲིན་རྒྱ་ཆེར་མཛད། བཀའ་དྲིན་རྗེས་དྲན་གྱི་ཚུལ་དུ་དམ་པ་གང་གི་རྣམ་ཐར་མདོར་བསྡུས་ཤིག་ཞུས་ན། ཞོལ་བཀྲས་ཁང་གི་ཡབ་མེས་ཀྱི་ཕ་གཞིས་ནི། ལྷོ་ཁ་ཆང་ཁྱིམ་དང་ལྷོད་ལུག་ནམ་མཁའ་དངོས་གཞི་གཉིས་ཡིན་པས་ཆང་ཁྱིམ་པའམ་དངོས་གཞི་བྱམས་པ་ཐུབ་དབང་ཡང་ཟེར། ཁོང་དགུང་ལོ་ཞེ་གཉིས་ཐོག་ལྷོ་བྲག་ཏུ་རྫོང་དཔོན་གྱི་ཕྱག་ལས་གནང་སྐབས་བསྙུན་གཞི་དྲག་པོ་ཞིག་ཕོག་པར་སྨན་བཅོས་བྱས་ནས་སངས་དྲག་ཏུ་སོང་བས་རྐྱེན་བྱས་ཏེ་གསོ་རིག་ལ་སྦྱངས། མེ་བྱ་སྤྱི་ལོ་ ༡༨༩༧ལོར་ྋརྒྱལ་དབང་བཅུ་གསུམ་པ་མཆོག་གིས་མཁན་ཆུང་གི་གོ་གནས་དང་སྐུ་བཅར་བླ་སྨན་བགྲེས་པར་བསྐོ་བཞག་མཛད། ལྕགས་བྱི་སྤྱི་ལོ་ ༡༩༠༠ལོར་ྋརྒྱལ་དབང་བཅུ་གསུམ་པ་ཆེན་པོ་མཆོག་ལས་ཚིགས་ཕྱི་མའི་སྡོམ་པ་མནོས། ྋརྒྱལ་དབང་བཅུ་གསུམ་པ་ཆེན་པོ་མཆོག་བོད་བསྟན་སྲིད་ཀྱི་དབང་གིས་ལྷ་སར་བཞུགས་མ་ཐུབ་པར་རེ་ཞིག་རྒྱ་ནག་དང༌། སོག་ཡུལ། རྒྱ་གར་སོགས་ལ་ཕེབས་སྐབས་སྐུ་བཅར་བླ་སྨན་གྱི་ཐུགས་འགན་བཞེས་ནས་ཞབས་ཞུའི་ཁོངས་ཕེབས་ཏེ་ཡུལ་ཕྱོགས་དེ་དག་ལ་གསོ་དཔྱད་ཀྱི་འཕྲིན་ལས་དང་སྙན་པའི་གྲགས་པ་ཁྱབ་པར་བྱས། མེ་འབྲུག་སྤྱི་ལོ་ ༡༩༡༦ལོར་ལྷ་ས་སྨན་རྩིས་ཁང་གསར་འཛུགས་ཀྱི་ཇུས་འགོད་དང་ཐུགས་འགན་བཞེས། ས་ལུག་སྤྱི་ལོ་ ༡༩༡༩ལོར་བཀའ་ཤག་གིས་བཀའ་སྩལ་བ་ལྟར་རིན་ཆེན་མང་སྦྱོར་དང༌། དབང་རིལ་ཟླ་ཤེལ་སོགས་གསར་བཟོ་དང་སྐུ་དངོས་ནས་བླ་སྨན་མཁྱེན་རབ་ནོར་བུ་མཆོག་ལ་ཞལ་ཁྲིད་ཀྱི་ལག་ལེན་གནང་ཆེད་དངུལ་ཆུ་བཙོ་བཀྲུ་རྒྱས་པ་ཕྱག་བསྟར་གནང༌། ལྕགས་བྱ་སྤྱི་ལོ་ ༡༩༢༡ལོར་སླར་ཡང་སྐུ་སྒེར་གྱིས་བཙོ་བཀྲུ་ཆེན་མོ་ཕྱག་ལེན་བསྟར་བ་སོགས་སྨན་དཔྱད་ཀྱི་གཞུང་ལུགས་ལག་ལེན་ཀུན་ལ་མཁས་ཤིང་གྲུབ་པའི་མངའ་བརྙེས་པ་མ་ཟད། ལྕགས་རི་འགྲོ་ཕན་གླིང་གྲྭ་ཚང་འཛིན་སྐྱོང་དང༌། ཕྱིས་སུ་སྨན་རྩིས་ཁང་གསར་འཛུགས་སོགས་ཀྱི་དོན་ལ་ཐུགས་ཁུར་ཚད་མེད་བཞེས་པས་མཚོན་སྨན་རྩིས་གཉིས་གཙོས་པའི་རིག་གཞུང་རྣམས་མི་ཉམས་གོང་འཕེལ་དང་ཉམས་པ་སླར་གསོའི་ལས་དོན་ལ་ཕན་པའི་མཛད་པ་མཐར་ཕྱིན་ཤིང་བཀའ་དྲིན་བླ་ན་མེད་པ་བསྐྱངས་ཡོད་དོ། །

ཆུ་ཕག་སྤྱི་ལོ་ ༡༩༢༣ལོར་ཐེངས་གཉིས་པའི་ཁྲོག་སྨན་སྨན་ངོ་བཤར་སྐབས་ལྕགས་རི་གྲྭ་ཚང་གི་སྨན་གྲྭ་སུམ་ཅུ་སོ་ལྔ་དང་སྨན་རྩིས་ཁང་གི་སྨན་སློབ་མི་གྲངས་བཞི་བཅུ་ཞེ་ལྔ་བཅས་བསྡོམས་པས་སྨན་པ་བརྒྱད་ཅུ་ཙམ་གྱིས་ལྕགས་རི་རིག་བྱེད་གླིང་གི་ཆབ་གཞུག་གི་དུས་དང་བསྟུན་ནས་ཁྲོག་སྨན་འཁྲུངས་དཔེ་ཡིད་བཞིན་འདོད་འཇོའི་བུམ་བཟང་གཞིར་བཟུང་གཏོར་རྒྱག་གླིང་གའི་ནང་སྒར་རྒྱག་སོགས་སྔར་སྲོལ་བཞིན་བསྐྱངས། ལྕགས་རི་འགྲོ་ཕན་གླིང་གི་སྨན་གྲྭ་འགའ་སྨན་སློབ་ཡོངས་ཀྱི་ཡང་རྩེར་སླེབས་པས་ཐིག་རྩིས་ཀུར་རྩིས་རྒྱག་སྐབས་སྨན་རྩིས་ཁང་གི་སློབ་མ་རྗེས་སུ་ལུས་ཏེ་བོང་བུ་ནག་པོ་སོགས་ལས་ཚན་མང་པོ་བྱེད་དགོས་སྟབས་སློབ་དཔོན་མཁྱེན་རབ་ནོར་བུ་མཆོག་ལ་ཉེ་རིང་དང་ཕྱོགས་ལྷུང་གི་འདུ་ཤེས་ཞེས་པ་དྲི་མ་ཙམ་ཡང་མ་མཆིས་མོད། སྨན་དགེ་འགས་བྱ་བ་དྲང་བདེན་མ་བྱས་པར་ཕྱོགས་ཞེན་དང་མཁྲེགས་འཛིན་བྱས་པར་བརྟེན་ཡང་བསྐྱར་འགྱུར་ལྡོག་གནང་སྟེ་ལྕགས་པོ་རི་དང༌། སྨན་རྩིས་ཁང་གཉིས་ཁག་བགོས་ཀྱིས་གཡས་གྲལ་ལྕགས་པོ་རི་དང༌། གཡོན་གྲལ་སྨན་རྩིས་ཁང་བྱས་ནས་ཐོན་སྐོར་གྲལ་སྒྲིག་ཚན་གྲངས་སོ་སོར་གཞིགས་ཏེ་གསོལ་རས་སྩལ། དེ་ཉིན་སྐུ་མགྲོན་གྲས་སུ་བཤད་གྲྭ་རྩིས་དཔོན་དང་རྩིས་དཔོན་ལུང་ཤར། ཛ་སག་ཚ་རོང་སོགས་ཕེབས་ཡོད། གོང་ཞུས་གནད་དོན་དེའི་རྐྱེན་པས་ལྕགས་རིའི་དགེ་རྒན་ཆེན་མོ་གཅིག་དང་སྨན་སློབ་ཉི་ཤུ་ལྷག་གསང་སྟབས་ཀྱིས་འབྲས་ལྗོངས་དང༌། བལ་ཡུལ། མདོ་སྨད་ཁུལ་བཅས་ལ་ཡུལ་བྱོལ་དུ་འཁྱམས། དེ་ནས་སྨན་གྲྭ་འགས་རང་གཞུང་བཀའ་ཤག་ལ་སྨན་རྩིས་ཁང་གི་འགན་འཛིན་མཆོག་གིས་ད་རེས་ཁྲོག་སྨན་བཤར་སྐབས་དྲང་བཞག་དང་བདེན་རྫུན་གྱི་དབྱེ་བ་གང་ཡང་མེད་པར་ཐབས་སྐྱོ་ཡིད་སྡུག་གི་གནས་ཚུལ་འདི་དང་འདི་བྱས་པ་རེད་ཅེས་ཞུ་ཡིག་ཐེངས་མང་ཕུལ་བའི་ནང་དོན་སྙིང་པོ་ནི། གལ་ཏེ་རང་གཞུང་ནས་བློ་གཟུ་བོར་གནས་པའི་རྟོག་དཔྱོད་སྔོན་དུ་བཏང་ནས་དོན་རྩར་བདེན་དོན་རྣལ་མ་ཞིག་མ་གནང་པར་དགྲ་འདུལ་གཉེན་སྐྱོང་དང་ཆགས་སྡང་དགེ་སྡིག་གི་བྱེད་སྤྱོད་མར་མེ་གསལ་ལ་མི་གསལ་བཞིན་བཞག་ན་ལྕགས་རི་རིག་བྱེད་གླིང་གི་སྨན་གྲྭ་གནས་ཆགས་དཀའ་བའི་སྐོར་ཞུས། དེ་ནས་རང་གཞུང་གིས་ཞིབ་འཇུག་བྱས་འབྲས་རྒྱལ་དབང་མཆོག་ལ་སྤྱན་འབུལ་ཞུས་པའི་མཐའ་མའི་ཐག་གཅོད་དུ། ཡེ་ཤེས་ཀྱི་ཉི་མ་འབུམ་ཕྲག་གཅིག་ཏུ་བསྒྲིལ་བའི་༧གོང་ས་བཅུ་གསུམ་པ་ཆེན་པོས་ཞལ་སྔ་ནས་མཁས་དབང་མཁྱེན་རབ་ནོར་བུ་མཆོག་གིས་སྨན་རྩིས་ཁང་གི་འགན་འཛིན་གནང་རྒྱུ་ལས་ལྕགས་རི་རིག་བྱེད་གླིང་དང་སྨན་རྩིས་ཁང་གཉིས་ཀྱི་འགན་གཅིག་ལྕོགས་བཞེས་མི་དགོས་པའི་བཀའ་ཕབ། བླ་སྨན་ཨོ་རྒྱན་བསྟན་འཛིན་མཆོག་ལ་བདག་རྐྱེན་དང་བཅས་ལྕགས་རི་རིག་བྱེད་གླིང་གྲྭ་ཚང་གི་འགན་འཛིན་དུ་བསྐོ་བཞག་མཛད། དེ་ནས་དུས་ཡུན་ཅུང་མ་འགོར་བར་དེ་སྔོན་ནས་བཟུང་བོད་རྒྱལ་ཁབ་ཀྱི་རྫོང་གཞིས་ཁག་ལ་སྨན་རྩིས་ཁང་ནས་བྱིས་པ་ཉེར་སྤྱོད་དང༌། སྐྱེས་སྐར་ཚེ་རྩིས་བརྒྱབ་པའི་བྱ་བར་གྲུབ་འབྲས་ངེས་ཅན་ཞིག་བྱུང་རུང་རྗེས་སུ་རྫོང་གཞིས་ཁ་ཤས་ཀྱིས་ལས་ཀ་དེ་དག་རྙོག་དྲ་དང༌། མི་སེར་ལ་དོ་ཕོག་ལྟ་བུར་བསྙད་འདོགས་ཀྱིས་རྒྱབ་བཤད་བྱས་པའི་སྟེང་སློབ་དཔོན་བཀའ་དྲིན་ཅན་བཀྲས་ཁང་སྤྱི་ཁྱབ་མཁན་པོ་བྱམས་པ་ཐུབ་དབང་མཆོག་སྐུ་གཤེགས་པ་སོགས་ཀྱིས་རྐྱེན་པས་བྱིས་པ་ཉེར་སྤྱོད་དང་སྐྱེས་སྐར་ཚེ་རྩིས་བརྩི་རྒྱུའི་ལས་སྒོ་དེ་དར་སྤེལ་གཏོང་མ་ཐུབ་པར་རེ་ཞིག་ཇེ་ཉུང་དུ་གྱུར།

ཤིང་བྱི་སྤྱི་ལོ་ ༡༩༢༤ལོར་མཁས་དབང་མཁྱེན་རབ་ནོར་བུ་མཆོག་གིས་སྨན་རྩིས་གཉིས་ཀྱིས་གཙོས་པའི་རིག་གནས་མཐའ་དག་རྒྱུད་འཛིན་གོང་འཕེལ་གཏོང་རྒྱུ་དེ་སྨན་རྩིས་ཁང་གི་ལྟེ་བའི་ལས་འགན་ཞིག་ཏུ་གཟིགས་ནས་སྨན་རྩིས་ཀྱི་གཞུང་དང༌། མན་ངག་ལག་ལེན་སྐོར་སོགས་མྱོང་འཁྲིད་གནང་རྒྱུར་ཐུགས་འཁུར་སྔར་ལས་ཆེ་བ་གནང་པར་མ་ཟད། ཞོར་དུ་སྨན་རྩིས་ཤེས་བྱའི་སྐོར་རྩོམ་སྒྲིག་གནང་རྒྱུ་ལས་འཁུར་བཞེས་པས་ལོ་དེ་རང་ལ་རྒྱུད་བཞིའི་ས་བཅད་སྟག་མོའི་རྔམ་ཐབས་དང༌། ནད་མིང་ཚིགས་སུ་བཅད་པ་རིན་ཆེན་ཕྲེང་བ། ཕྱི་མ་རྒྱུད་ཀྱི་སྤྱི་དོན་སྡོམ་ཚིག་གཞུང་དོན་སྒོ་བརྒྱ་འབྱེད་པའི་ལྡེ་མིག གངས་ཅན་སྨན་པའི་གྲོང་ཁྱེར་ལྕགས་རི་བཻཌཱུར་འགྲོ་ཕན་རིག་བྱེད་གླིང་གི་ཁྲོག་སྨན་འཁྲུངས་དཔེ་བསྡུས་པ་ཡིད་བཞིན་འདོད་འཇོའི་བུམ་བཟང་། ཕྱི་རྒྱུད་རྩ་ཆུའི་ལྷན་ཐབས། བྱིས་པ་བཙའ་ཐབས་ཀུན་ཕན་ཟླ་བའི་མེ་ལོང་། བྱིས་པའི་ནད་རིགས་མ་ལུས་བཅོས་པའི་ཉམས་ཡིག་སོགས་སྨན་དཔེ་ཁག་བདུན་ཙམ་རྩོམ་འབྲི་དང་དཔར་སྐྲུན་ཐུབ་པ་དེས་ལྕགས་རི་གྲྭ་ཚང་གི་བློ་གསར་གཞོན་ནུ་རྣམས་དང༌། རྒྱ་ཁྱབ་རྫོང་གཞིས་ཁག་ནས་ཕེབས་པའི་སྨན་རྩིས་ཁང་གི་སྨན་སློབ་ཡོངས་ཀྱིས་གསོ་རིག་གཞུང་འགྲེལ་མང་པོའི་དགོངས་དོན་བདེ་བླག་ཏུ་རྟོགས་པར་ཕན་པ་ཆེས་ཆེར་བྱུང་བར་མ་ཟད། རྗེས་སུ་སྨན་རྩིས་ཁང་གི་སྨན་གཞུང་སློབ་འཁྲིད་ཁ་སྐོང་གི་ཡིག་ཆ་ཆོས་སྤྱོད་ཅེས་པ་ཚང་མས་བློ་འཛིན་གྱིས་རྒྱུགས་སྤྲོད་བྱེད་རྒྱུའི་གཏན་འབེབས་ཀྱང་གནང་ཡོད།

ཤིང་གླང་སྤྱི་ལོ་ ༡༩༢༥ལོ། གནས་ཚུལ་དང་དགོས་དབང་ལྟ་བུས་མཁས་དབང་མཁྱེན་རབ་ནོར་བུ་མཆོག་གིས་ཕྱིན་ཆད་སྨན་རྩིས་ཁང་གི་འགོ་འཛིན་གནང་རྒྱུ་ལས་ལྕགས་རི་གྲྭ་ཚང་གི་འགན་དབང་མུ་མཐུད་བཞེས་མི་དགོས་པའི་བཀའ་བསྒྱུར་སྩལ་ནས་བཟུང་སྨན་རྩིས་ཁང་དང༌། ལྕགས་པོ་རི་སོ་སོས་འཆད་ཉན་བསྐྱངས་འགོ་ཚུགས་པར་བརྟེན། ལོ་འདི་ནས་བཟུང་སྡེ་སྲིད་སངས་རྒྱས་རྒྱ་མཚོའི་ཕྱག་སྲོལ་བཞིན་སྨན་རྩིས་ཁང་གིས་བྲག་ཡེར་བ་སོགས་ལ་སྨན་འཐོགས་འགྲོ་རྒྱུའི་ལམ་སྲོལ་ཐོག་མར་བཟོས་སོ། །

རབ་རྒྱལ་ལྕགས་རྟ་སྤྱི་ལོ་ ༡༩༣༠ལོར། ༸རྒྱལ་དབང་བཅུ་གསུམ་པ་ཆེན་པོ་མཆོག་གིས། ད་ཕན་སྨན་རྩིས་ཁང་བཙུགས་ནས་མ་འོངས་བརྒྱུད་འཛིན་གསོ་སྐྱོང་དང༌། ནད་པར་སྨན་བཅོས་བྱེད་རྒྱུ། རྒྱ་ཁྱབ་རྫོང་གཞིས་ཁག་ལ་བྱིས་པ་བཙའ་ཐབས་དང༌། བྱིས་པ་ཉེར་སྤྱོད། སྐྱེས་སྐར་ཚེ་རྩིས་རྒྱག་རྒྱུ་སོགས་ཆབ་འབངས་ལ་སྨན་པའི་ལས་གཞི་མང་པོ་འགྲུབ་ཐུབ་པའི་ཁར་སྨན་རྩིས་ཁང་གི་ཆེ་མཐོང་དང་སྙན་གྲགས་ཀྱང་ཇེ་ཆེར་གྱུར་ཡོད་སྟབས་སྔར་ཡོད་དགོན་སྡེ་རྣམས་ཀྱི་སྟེང་ད་དུང་སླར་ཡང་གཞིས་དགོན་ཁག་ནས་སྨན་རྩིས་སློབ་གཉེར་བྱེད་མཁན་བསྡུ་དགོས་པའི་བཀའ་ལུང་ཕེབས་པ་ལྟར་བཀའ་ཤག་ནས་ཁུངས་སོ་སོར་བཀའ་རྒྱ་སྩལ། དེ་དུས་ཀྱི་དགོན་སྡེའི་གྲས་སུ་ལྷོ་ཁ་སྣེ་གདོང་རྫོང་རྩེ་ཚོགས་པ། བན་ཚང་དགོན། དར་རྒྱས་གླིང༌། འཕྱོངས་རྒྱས་རི་བོ་བདེ་ཆེན། འཕྱོས་ལམ་རིམ་དགོན། འཕྱོས་དཔལ་རི་དགོན། འཕྱོས་བཀྲ་ཤིས་བདེ་ཆེན། འཕྱོངས་རྒྱས་རི་བོ་ཆོས་གླིང༌། འོན་ཆོས་སྡིང་དགོན། གོང་དཀར་ཆོས་སྡེ། རྫིང་ཆེ་དགོན། གོང་དཀར་བཤད་སྒྲུབ་གླིང༌། གྲ་ནང་གདེངས་མགོ་ཆེ། གྲྭ་ཐང་དགོན། བདུན་ཕུད་ཆོས་འཁོར། སྐྱིད་གཤོངས་ར་སྨད། བྱམས་པ་གླིང༌། ཚོང་དུས་དགོན། ཨེ་ཆ་དཀར་ཆོས་སྡེ། ཆོས་འཁོར་རྒྱལ། དྭགས་པོ་བམ་རི་ཆོས་སྡེ། དྭགས་པོ་དགའ་ལྡན་རབ་རྒྱས། འབྲུག་གསང་སྔགས་ཆོས་གླིང༌། གཉལ་ཟངས་ཆེན་དགོན། ཀོང་པོ་བཀྲ་ཤིས་ཆོས་སྡེ། འབྲི་གུང་ཡང་རི་ཁ། འབྲི་གུང་མཐིལ། ཀ་ཚལ་དགོན། མལ་གྲོ་རིན་ཆེན་གླིང༌། ཐང་སྐྱ་དགོན། བདེ་ཆེན་གསང་སྔགས་ཁ་པ། ཡང་ཅན་དགོན། འཕན་པོ་ཎ་ལེན་དྲ། ཞ་སྟོད་དགོན། མཚུར་ཕུ། ཆུ་ཤུར་ཆོས་འཁོར་ཡངས་རྩེ། སྙེ་མོ་རྒྱས་བྱེད་དགོན། སྙེ་མོ་བྱེ་དཀར་ཆོས་སྡེ། གྲོ་མོ་དུང་དཀར་དགོན། བཀའ་རྒྱུད་དགོན། སྟོད་ཤེལ་དཀར་ཆོས་སྡེ་སོགས་ནས་བཀའ་རྒྱ་གཞིར་བཟུང་གིས་སྨན་རྩིས་སློབ་མ་བསྡུ་ལེན་བྱས་པ་གྲངས་དྲུག་ཅུ་ཙམ་བར་འཕེལ་རྒྱས་ལ་ཕྱིན་ཡོད། དེ་དུས་ཀྱི་སྨན་རྩིས་དགེ་རྒན་ནི། ལྷོ་ཁ་སྨིན་གྲོལ་གླིང་གི་སྨན་དགེ་ཐུབ་བསྟན་དཔལ་འབར་འཇམ་དཔལ། དོལ་གསུང་རབ་གླིང་གི་སྨན་དགེ་ཐུབ་བསྟན། ཡར་འབྲོག་བསམ་སྡིང་དགོན་གྱི་སྨན་དགེ་རྣམ་གྲོལ་ཆོས་དབང༌། སྙེ་མོ་རྒྱས་བྱེད་དགོན་གྱི་རྩིས་དགེ་བློ་བཟང་ཐབས་མཁས། རྡོ་བྲག་ཨེ་ཝམ་ལྕོག་སྒར་གྱི་རྩིས་དགེ་བྱམས་པ་འདི་ནི་ྋརྒྱལ་བ་སྐུ་ཕྲེང་བཅུ་གསུམ་པ་ཞལ་བཞུགས་དུས་སྨན་རྩིས་ཁང་ནས་རྟ་བཅོས་སྨན་པ་གཏོང་དགོས་པའི་བཀའ་ལྟར་ཆུ་ཤུར་ཆོས་འཁོར་ཡང་རྩེའི་རྩིས་པ་འཇམ་དཔལ་མཁྱེན་བརྩེ་དང་མཉམ་དུ་ནོར་གླིང་དུ་གཏོང་གནང་མཛད། བྱམས་པ་ལགས་རྟ་བཅོས་སྨན་པ་ནས་རིམ་གྱིས་ྋརྒྱལ་བའི་གསོལ་སྨན་འབུལ་མཁན་ཆགས་ཏེ་མཐར་ཆུ་བྱ་ལོར་ྋརྒྱལ་བ་སྐུ་ཕྲེང་བཅུ་གསུམ་པ་ཞིང་ལ་ཕེབས་དུས་གསོལ་སྨན་འབུལ་ཉེས་སྐོར་གྱིས་ཁྲིམས་གཅོད་ཕོག་ནས་དྭགས་པོར་རྒྱང་འབུད་ལ་ཕེབས་དགོས་བྱུང༌།ལགས་སོགས་ཀྱིས་གནང་ནས་སྨན་རྩིས་ཀྱི་བྱ་བ་མུ་མཐུད་ཡར་རྒྱས་བྱུང་ཡོད། དེའི་སྐབས་གྲ་བཞི་དངུལ་ཁང་བཙུགས་ཚར་བ་དང༌། གཞུང་ཕྱག་ནས་སྨན་རྒྱུའི་མ་རྩར་གསེར་དངུལ་གང་འཚམ་གསོལ་རས་བསྩལ་བ་དེའི་སྐྱེད་ཀས་སྨན་རིགས་མཁོ་སྒྲུབ་བྱེད་རྒྱུ་བྱུང་བར་བརྟེན་སྨན་གྱི་ཆ་རྐྱེན་སྔར་ལས་ཡག་ཏུ་སོང༌། འོན་ཀྱང་རྩ་ཆེའི་སྨན་རིགས་སོགས་བླུ་ཉོ་བྱེད་པར་མ་དངུལ་མ་འདང་བའི་དཀའ་ངལ་སྔར་བཞིན་གནས་རུང་མཁས་དབང་མཁྱེན་རབ་ནོར་བུ་མཆོག་གི་འགྲོ་དོན་འཕྲིན་ལས་ཧ་ཅང་རྒྱས་པ་དང༌། སྐྱེ་བོ་དྲག་ཞན་མེད་པ་དུ་མས་རང་རང་འཁོས་ཀར་གཟིགས་ནས་དད་འབུལ་ཞུ་མཁན་བྱུང་རིགས་མཐའ་དག་སྨན་རྒྱུ་ཉོ་བྱེད་ཁོ་ནར་བེད་སྤྱོད་མཛད་པའི་དབང་གིས་སྨན་སྦྱོར་ཚད་ལྡན་སྤུས་དག་བཟོ་ཐུབ་པ་བྱུང་སྟེ་སྨན་རྩིས་ཁང་གི་ནད་པ་དང༌། སྐོར་བསྐྱོད་སྨན་ ཆུ་སྤྲེལ་སྤྱི་ལོ་ ༡༩༣༢ལོར། མཁས་དབང་མཁྱེན་རབ་ནོར་བུ་གློ་བུར་དུ་རྩེ་འགགས་ལ་ཕེབས་དགོས་པའི་བརྡ་ཐོ་འབྱོར་བ་ལྟར་དེ་འཕྲལ་ཕེབས་དུས་ྋརྒྱལ་དབང་སྐུ་ཕྲེང་བཅུ་གསུམ་པ་ཆེན་པོའི་བཀའ་བསྒྱུར་ཕེབས་དོན། དེ་རིང་ནས་བཟུང་མཁྱེན་རབ་ནོར་བུས་བླ་སྨན་ཆུང་བའི་ལས་འགན་བཞེས་མི་དགོས་པའི་ཁྱབ་བསྒྲགས་གནང༌། དགོས་པ་རྒྱུ་མཚན་གང་ཡིན་སྐོར་ལ་སྐབས་དེར་མཁྱེན་རབ་ནོར་བུ་མཆོག་གིས་ཀྱང་སྔོན་དཔག་གནང་ཐུབ་མེད་ཀྱང༌། ཆུ་བྱ་སྤྱི་ལོ་ ༡༩༣༣ལོར་ྋརྒྱལ་དབང་མཆོག་དགོངས་པ་གཞན་དོན་དུ་ཕེབས་རྗེས་སྐུའི་གསོལ་སྨན་འབུལ་ཕྱོགས་སོགས་ལ་བསྙད་ནས་སྨན་པ་བྱམས་པ་ལགས་ཉེས་དོན་རྩད་གཅོད་ཀྱིས་ཁྲིམས་སར་ཐུག་པ་སོགས་བྱུང་ཡང༌། མཁྱེན་རབ་ནོར་བུ་མཆོག་རྒྱལ་བའི་བླ་སྨན་གྱི་ཐུགས་འགན་མེད་པ་དེས་ལབ་གླེང་གང་ཡང་མ་བྱུང་བ་དང༌། སྨན་རྩིས་ཁང་སྔར་བཞིན་ཡར་རྒྱས་བྱུང་བ་དེ་ནི་རྒྱལ་བ་སྐུ་ཕྲེང་བཅུ་གསུམ་པ་ཆེན་པོའི་མ་འོངས་སྔོན་གཟིགས་ཀྱིས་དགོངས་པ་རླབས་ཆེན་བཞེས་པར་གཞི་ནས་ཡིད་ཆེས་ངེས་རྙེད་ཀྱི་དད་པ་སྐྱེ་བའི་སྐོར་མཁྱེན་རབ་ནོར་བུ་མཆོག་གི་ཞལ་སྔ་ནས་ཡང་ཡང་གསུངས་པར་གྲགས།

ཤིང་ཁྱི་སྤྱི་ལོ་ ༡༩༣༤ལོར་རྭ་སྒྲེང་རྒྱལ་ཚབ་མཆོག་ཁྲིར་ཕེབས་པ་དང༌། སྲིད་བློན་གླང་མདུན་ཀུན་དགའ་དབང་ཕྱུག་གིས་ཕྱག་རོགས་གནང་བའི་སྐབས་སུ་ཡང་སྨན་རྩིས་ཁང་ལ་སྔར་མུས་ལྟར་གཟིགས་སྐྱོང་ཆེ་བ་མ་ཟད། རང་གཞུང་རྩེ་ཡིག་ཚང་ལ་བཀའ་ཕེབས་པ་ལྟར་མཁས་དབང་མཁྱེན་རབ་ནོར་བུ་མཆོག་ལ་མཁན་ཆུང་གི་གོ་གནས་སྩལ་བ་དང༌། སྐུ་མཆེད་ཐུབ་བསྟན་ལྷུན་གྲུབ་ལ་རྩེ་དྲུང་ལས་ཚན་གནས་ལྔ་བའི་ཐོབ་ཐང་སོགས་སྩལ།

ས་སྟགསྤྱི་ལོ་ ༡༩༣༨ལོར་སྨན་རྩིས་ཁང་མུ་མཐུད་ཡར་རྒྱས་ཡོང་བ་དང༌། ཆབ་འབངས་བདེ་རྩར་ཕན་ཐོགས་ཡོང་ཆེད་སྔར་ཡོད་དགོན་སྡེ་ཁག་ནས་སྨན་རྩིས་སློབ་ཕྲུག་གཏོང་སྲོལ་ཡོད་པ་དེའི་སྟེང་དམག་སྒར་ཁག་ནས་ན་གཞོན་དྲག་གྲས་བདམས་ཏེ་སྨན་རྩིས་ཁང་ལ་སློབ་གཉེར་བྱེད་པར་ཡོང་རྒྱུའི་སྐོར་ལ་བཀའ་ཤག་ནས་རྒྱལ་ཚབ་ར་སྒྲེང་རིན་པོ་ཆེར་སྙན་ཞུ་འབུལ་གནང་མཛད་པར་ཕྱག་རྟགས་ཕེབས། དེ་དུས་ཀ་དང་སྐུ་སྲུང་དམག་སྒར་དང༌། ཁ་དང་གྲ་བཞི་རྒྱ་སྦྱོང་དམག་སྒར། ག་དང་གཞིས་རྩེ་རྒྱ་སྦྱོང་དམག་སྒར། ང་དང་རྒྱལ་རྩེ་དམག་སྒར། ཅ་དང་དིང་རི་དམག་སྒར། ཆ་དང་མེ་སྒྱོགས་དམག་སྒར། ད་དུང་ཇ་དང༌། ཉ་དང༌། ཏ་དང༌། ཐ་དང༌། ད་དང་བཅས་ཀྱི་དམག་སྒར་བཅས་ནས་མང་བར་སྨན་རྩིས་སློབ་ཕྲུག་མི་གྲངས་བཞི་དང༌། ཉུང་བར་མི་གཉིས་སྨན་རྩིས་སློབ་གཉེར་བྱེད་པར་གཏོང་རྒྱུའི་འགོ་ཚུགས། སྐབས་དེར་དམག་སྒར་ཁག་གི་སློབ་ཕྲུག་ཚོར་བོད་དམག་སྤྱི་མཚུངས་ལྟར་ཟླ་རེ་དམག་ཕོགས་དང་། གླ་བདག་ནས་དབྱར་དགུན་གྱོན་དོད། ཡི་གེ་སྦྱང་རྒྱུའི་སྦྱང་ཤིང་བཅས་དམག་སྤྱི་ཁང་ནས་གནང་གི་ཡོད་ཀྱང༌། དགོན་སྡེ་ཁག་གི་སྨན་རྩིས་སློབ་གཉེར་བྱེད་མཁན་ལ་གཞིས་དགོན་གྱི་འགྱེད་ཕོགས་ཁོ་ན་ལས་གཞན་གྱི་ཐོབ་ཆ་མེད་པར་བརྟེན་ཁོང་ཚོའི་འཚོ་བར་དཀའ་ངལ་ཆེ་ཙམ་ཡོད་པ་ཐག་གཅོད་ཆེད་དུ། རྒྱལ་ཚབ་ར་སྒྲེང་རྒྱལ་ཐོག་སྐབས་གྲྭ་གཞོན་སློབ་ཕྲུག་རྣམས་ལ་དམག་མི་དཀྱུས་མའི་དམག་ཕོགས་ཟླ་རེ་འབྲུ་ཁལ་གཉིས་དང༌། རློན་དོད་དངུལ་སྲང་དོ་སྤྲོད་རྒྱུར་དམིགས་བསལ་གྱི་བདག་རྐྱེན་གསོལ་རས་སྩལ། དེ་ནས་བཟུང་གྲྭ་ཕོགས་ཀྱི་ཕོགས་འཛིན་བཀའ་ཤག་དང༌། དམག་མིའི་ཕོགས་འཛིན་དམག་སྤྱི་ཁང་ལ་ཞུ་རྒྱུ་མ་ཟད། སྨན་རྩིས་དགེ་རྒན་གཉིས་ལ་སྡིང་དཔོན་གྱི་ཕོགས་ཐོབ་འབྲུ་ཁལ་བཞི་དང་དམག་མི་གཉིས་ཀྱི་དམག་དོད་དངུལ་སྲང་བརྒྱད་ཅུ་ཐམ་པ་ལེན་རྒྱུའི་ཆོག་མཆན་གནང་བ་བཅས་ཀྱིས་དགེ་སློབ་ཚོའི་འཚོ་བ་ལྡབ་འགྱུར་གྱི་དྲག་ཏུ་ཕྱིན་པ་དང༌། ཐོས་བསམ་སློབ་གཉེར་བྱེད་རྒྱུར་བསྐུལ་མ་ངེས་ཅན་ཞིག་ཐེབས་བཅུག་པར་མ་ཟད། སྨན་རྩིས་ཁང་གི་ནུབ་ངོས་སུ་སློབ་ཁང་གསར་བཞེངས་དང༌། ལས་ཤག མཁས་དབང་མཁྱེན་རབ་ནོར་བུ་མཆོག་ལ་གཟིམ་ཤག་སོགས་ཨར་ལས་གསར་སྐྲུན་གྱི་ལས་སྒོ་རྒྱ་ཆེ་མཛད།

ཆུ་ལུག་སྤྱི་ལོ་ ༡༩༤༣ལོར། སྨན་རྩིས་ཁང་གི་ཐེངས་གསུམ་པའི་ཁྲོག་སྨན་སྨན་ངོ་ཉིན་བདུན་རིང་སྔར་སྲོལ་ལྟར་གཏོར་རྒྱག་གླིང་ཀར་སྒར་རྒྱག་ཐོག་སྨན་སྣ་ལྔ་བརྒྱ་བདུན་ཅུ་དོན་ལྔའི་ངོས་འཛིན་རྒྱས་བཤད་གངས་ལྗོངས་སྨན་པའི་གྲོང་ཁྱེར་ལྕགས་རི་འགྲོ་ཕན་རིག་བྱེད་གླིང་གི་འཁྲོག་སྨན་འཁྲུངས་དཔེ་བསྡུས་པ་ཡིད་བཞིན་འདོད་འཇོའི་བུམ་བཟང་གཞིར་བཟུང་མཛད་པ་དང༌། སྨན་དགེ་རྣམས་ཀྱིས་སྨན་སློབ་སོ་སོའི་སྦྱངས་འབྲས་ལ་གཞིགས་ནས་ཨང་རིམ་ལྟར་བྱ་དགའ་གསོལ་རས་སྩལ། དེ་སྐབས་སྨན་ངོ་ཨང་དང་པོ་མལ་གྲོ་རིན་ཆེན་གླིང་གི་སྨན་སློབ་ངག་དབང་དགེ་འདུན་དང༌། ཨང་གཉིས་པ་མཚོ་སྣ་དགོན་པ་རྩེའི་སྨན་སློབ་འཇམ་དབྱངས་བཀྲ་ཤིས། ཨང་གསུམ་པ་དྭགས་པོ་དགའ་ལྡན་རབ་རྒྱས་ཀྱི་སྨན་པ་ཚུལ་ཁྲིམས་བཅས་ལ་བང་རིམ་བཞིན་མཚན་གྲངས་གཟིགས་བཟོས་གསོལ་རས་སྩལ།

མེ་ཕག་སྤྱི་ལོ་ ༡༩༤༧ལོར་རྒྱལ་ཁབ་ཏུ་ནང་སྲིད་རྩོད་རྙོག་གི་དུས་ཟིང་ཡམ་ཡོམ་ཆེ་ཡང༌། སྟག་བྲག་རྒྱལ་ཚབ་རིན་པོ་ཆེ་ནས་སྨན་རྩིས་ཁང་ལ་སྔར་བཞིན་གཟིགས་བསྐྱངས་ཆེ་བའི་ཁར་མཁས་དབང་མཁྱེན་རབ་ནོར་བུའི་སྐུ་མཆེད་ཐུབ་བསྟན་ལྷུན་གྲུབ་མཆོག་ལ་མཁན་ཆུང་གི་གོ་གནས་སྩལ་ཏེ་ྋརྒྱལ་བ་སྐུ་ཕྲེང་བཅུ་བཞི་བ་དང༌། སྟག་བྲག་རྒྱལ་ཚབ་རྣམ་གཉིས་ཀྱི་སྐུའི་བླ་སྨན་གཅིག་ལྕོགས་བསྐོ་བཞག་གནང༌། དེ་དུས་རང་གཞུང་བཀའ་ཤག་བརྒྱུད་མདོ་དབུས་ཁམས་གསུམ་ནས་སློབ་ཕྲུག་བསྡུ་བཞེས་ཀྱི་གསལ་བསྒྲགས་གནང་བ་དང༌། དེའི་སྟེང་འབྲུག་དང༌། ལ་དྭགས་བཅས་པའི་སློབ་ཕྲུག་ཁྱོན་བསྡོམས་དགེ་སློབ་མི་གྲངས་བརྒྱད་ཅུ་ཙམ་ལ་འཕེལ་རྒྱས་ཕྱིན། དེ་སྔོན་ནས་དཀའ་ངལ་འཕྲད་བཞིན་པའི་སྨན་རྩིས་ཁང་གི་དགེ་སློབ་ཚོའི་མེ་ཤིང་གནད་དོན་ཐག་གཅོད་མ་བྱུང་བ་དེ་དག་བོད་དམག་བྱིངས་དང་འདྲ་མཚུངས་འདམ་ར་ནས་ལ་མག་རྒྱག་ཆོག་པའི་ཆོག་མཆན་དང༌། ཕྱོགས་མཚུངས་སློབ་ཕྲུག་ཚོའི་སློབ་གཉེར་ལ་ཤུགས་རྐྱེན་མི་ཡོང་བའི་ཆེད་དུ་བཀའ་ཤག་ནས་སོ་ནམ་ལས་ཁུངས་བརྒྱུད་སྟོད་ལུང་ཁུལ་ནས་སྨན་བརྫོགས་གླ་པ་མི་དྲུག་ཉར་འགུགས་གནང་ཆོག་པའི་ཆོག་མཆན་སྩལ་བ་སོགས་དམིགས་བསལ་ཆེ།

ལྕགས་སྟག་སྤྱི་ལོ་ ༡༩༥༠ལོར་ྋསྐྱབས་མགོན་ྋརྒྱལ་བའི་དབང་པོ་ཐམས་ཅད་མཁྱེན་ཅིང་གཟིགས་པ་ཆེན་པོ་སྐུ་ཕྲེང་བཅུ་བཞི་བས་རྒྱལ་སྲིད་བཞེས་པ་དང༌། རང་གཞུང་བཀའ་ཤག་ནས་ཕྱག་རྟགས་ཕེབས་པ་ལྟར་སླར་ཡང་སྨན་རྩིས་ཁང་གསར་རྒྱག་རྒྱ་བསྐྱེད་གནང་སྟེ་སྒོ་ར་ཤར་ནུབ་དབྱེ་བ་མེད་པ་གཅིག་གྱུར་དང༌། མདུན་ལ་སློབ་ཕྲུག་གི་ལས་ཤག་ཁང་མིག་བཅུ་དྲུག་དང༌། སྒོ་ར་རྒྱབ་ཀྱི་ཐོག་ས་ཉིས་ཐོག་དབུས་སུ་ཚོམས་ཆེན་ཀ་བ་དྲུག དེའི་རྒྱབ་སྨན་སྦྱོར་ཁང་ཀ་བ་བཞི། ནུབ་ཏུ་སྨན་བཅོས་ཁང་ཀ་བ་གཉིས། ཤར་ཏུ་རྩིས་ཁང་ཀ་བ་གཉིས། མཁྱེན་རབ་ནོར་བུ་དང་ཐུབ་བསྟན་ལྷུན་གྲུབ་གཉིས་ཀྱི་གཟིམ་ཤག་ཀ་གཅིག་ལྕམ་གང་མ་རེ། དཔེ་མཛོད་ཁང་ཀ་བ་གཉིས་རེ་བཅས་དང༌། གཞན་ཡང་སྨན་དགེ་དང་རྩིས་དགེ་རྣམ་པའི་གཟིམ་ཤག སློབ་ཕྲུག་གི་སྡོད་ཤག དོས་ཁང༌། གསོལ་ཐབ། གཉེར་ཚང་སོགས་ལ་བསྡོམས་པས་རྒྱ་ཁྱོན་དེང་སང་ཡོད་མུས་ཀྱི་བོད་ལྗོངས་སྨན་རྩིས་ཁང་ཞེས་པའི་རྒྱ་ཁྱོན་ཙམ་དེ་བཞིན་གསར་བསྐྲུན་བྱུང༌།

མེ་སྤྲེལ་སྤྱི་ལོ་ ༡༩༥༧ལོའི་ལོ་མཇུག་ཏུ། མཁས་དབང་མཁྱེན་རབ་ནོར་བུ་མཆོག་ལ་ྋགོང་ས་ྋརྒྱལ་བའི་དབང་པོ་སྐུ་ཕྲེང་བཅུ་བཞི་བ་ཆེན་པོ་མཆོག་ནས་སྐུ་བཅར་མཁན་ཆེན་དར་ཧན་གྱི་གོ་གནས་སྩལ་ཞིང་དུས་ཡུན་རིང་པོ་མ་སོང་བར་སྤྱན་གཉིས་སྐྱ་འགྲིབ་ཀྱིས་མི་གསལ་བ་ལྟ་བུར་གྱུར་ནའང་སྨན་རྩིས་ཁང་གི་འཛིན་སྐྱོང་དང་འཆད་ཉན་གྱི་བྱ་བ་མུ་མཐུད་སྤེལ་བཞིན་ཡོད།

ས་ཕག་སྤྱི་ལོ་ ༡༩༥༩ལོར་རྒྱ་དམར་སྲིད་གཞུང་གིས་བོད་ཀྱི་སྲིད་དབང་ཡོངས་རྫོགས་བཙན་འཕྲོག་བྱས་པ་མ་ཟད། དམངས་གཙོ་བཅོས་བསྒྱུར་སོགས་མིང་སྙན་པོ་སྣ་ཚོགས་ལ་ཁ་གཡར་ནས་ྋརྒྱལ་དབང་ལྔ་བའི་སྐབས་ནས་བཙུགས་པའི་འཛིན་སྐྱོང་སྡེ་ཚན་ཡོད་ཚད་མེད་པར་བཟོས་པའི་དུས་མཚུངས་སུ། བོད་ཀྱི་སྨན་རྩིས་གཉིས་ཀྱི་རིག་གཞུང་རྒྱུད་འཛིན་པ་གསོ་སྐྱོང་བྱེད་སའི་ལྟེ་གནས་ཡིན་པའི་སྨན་རྩིས་ཁང་དེ་བཞིན་སྨན་ཁང་ཙམ་ལ་བསྒྱུར་བ་དང༌། ཆབས་ཅིག་ལྕགས་པོ་རི་དང་སྨན་རྩིས་ཁང་གཉིས་ཟླ་བསྒྲིལ་བཏང་སྟེ་མིང་ཙམ་ཡང་མ་བཞག་པར་ལྷ་ས་གྲོང་ཁྱེར་དམག་དོན་བཀག་སྡོམ་ཨུ་ཡོན་ལྷན་ཁང་གི་སྒོ་བསྟེན་སྨན་ཁང་ཨང་གཉིས་པ་ཞེས་བཏགས་ཏེ་མཁས་དབང་མཁྱེན་རབ་ནོར་བུ་མཆོག་ལ་དེའི་ཡོན་ཀྲང་འགན་འཛིན་ཞེས་པའི་མིང་ཙམ་ལས་བདག་དབང་ཡོད་ཚད་རྒྱ་དམར་དྲག་པོའི་སྲིད་གཞུང་གིས་བཟུང༌།

མཁས་དབང་མཁྱེན་རབ་ནོར་བུ་མཆོག་ནི་རབ་བྱུང་བཅོ་ལྔ་བའི་ཆུ་ལུག་སྤྱི་ལོ་ ༡༨༨༣ལོར་ལྷོ་ཁ་རྩེད་ཐང་དུ་སྐུ་འཁྲུངས་ཤིང༌། ཐོག་མར་རྩེད་ཐང་ལྔ་མཆོད་ཁང་གི་ཆོས་སྒོར་ཞུགས། དེ་ནས་ལྕགས་རི་རིག་བྱེད་གླིང་ལ་སྨན་གྲྭ་བསྡུ་རྒྱུ་རྩེ་ཡིག་ཚང་གིས་བཀའ་བརྒྱ་ཕེབས་པ་ལྟར་སློབ་ཞུགས་མཛད། བཀྲས་ཁང་སྤྱི་ཁྱབ་མཁན་པོ་སྐུའི་བླ་སྨན་བྱམས་པ་ཐུབ་དབང་མཆོག་དང་ཁུ་ནུ་བླ་མ་བསྟན་འཛིན་རྒྱལ་མཚན་སོགས་མཁས་དབང་བཅུ་ཕྲག་ལ་ཉེ་བ་སློབ་དཔོན་དུ་བསྟེན་ནས་སྒྲ་སྙན་སྨན་རྩིས་ཀྱིས་མཚོན་པའི་ཤེས་བྱའི་གནས་མཐའ་དག་ལ་སྦྱངས་བརྩོན་ལྷོད་མེད་བྱས་ཏེ་མཁས་པའི་གོ་འཕང་བརྙེས། དགུང་ལོ་ཉེར་དགུའི་ཐོག་འབྲས་སྤུངས་དགོན་པའི་སྨན་སྦྱིན་པའི་ཐུགས་འགན་བཞེས། མེ་འབྲུག་སྤྱི་ལོ་ ༡༩༡༦ལོར་ྋརྒྱལ་དབང་བཅུ་གསུམ་པའི་བཀའ་དགོངས་བཞིན་སྨན་རྩིས་ཁང་དང་ལྕགས་རི་རིག་བྱེད་གྲྭ་ཚང་གཉིས་ཀའི་སྤྱི་འདོམས་གཅིག་ལྕོགས་ཀྱི་ཐུགས་འགན་བཞེས། ས་རྟ་སྤྱི་ལོ་ ༡༩༡༨ལོར་སྐུ་བཅར་བླ་སྨན་ཆུང་བའི་ཐུགས་འགན་བཞེས། ཆུ་སྤྲེལ་སྤྱི་ལོ་ ༡༩༣༢ལོར་ྋགོང་ས་ྋསྐྱབས་མགོན་བཅུ་གསུམ་པ་ཆེན་པོ་མཆོག་ནས་བླ་སྨན་ཕྱིར་འཐེན་གནང་དགོས་པའི་བཀའ་རྒྱ་ཕེབས། མེ་བྱ་སྤྱི་ལོ་ ༡༩༥༧ལོར་གོང་ས་སྐུ་ཕྲེང་བཅུ་བཞི་བ་ཆེན་པོས་སྐུ་བཅར་མཁན་ཆེན་དར་ཧན་ཞེས་པའི་གོ་གནས་སྩལ། དགུང་ལོ་བརྒྱད་ཅུའི་བར་གཞན་དོན་གྱི་འཕྲིན་ལས་རྒྱ་ཆེར་བསྐྱངས་ཏེ་རབ་རྒྱལ་ཆུ་སྟག་སྤྱི་ལོ་ ༡༩༦༢ལོ་དབྱུག་ཟླའི་ཚེས་ཉེར་བརྒྱད་ལ་དགོངས་པ་ཆོས་དབྱིངས་སུ་བསྡུས།

ཡ་ང་སྙིང་རྗེ་བྲལ་བའི་རྒྱ་དམར་གྱི་དྲག་པོའི་འགལ་རྐྱེན་དུ་མ་ལ་བརྟེན་ྋགོང་ས་ྋསྐྱབས་མགོན་སྐུ་ཕྲེང་བཅུ་བཞི་བ་ཆེན་པོ་མཆོག་དང༌། བོད་མི་ཁྲི་ཕྲག་ཁ་ཤས་བོད་བདེ་ལྡན་ཞིང་དུ་བཞུགས་མ་ཐུབ་པར་ཁྱིམ་མཚེས་ཡུལ་གྲུ་རྒྱ་གར་དང༌། འབྲུག འབྲས་ལྗོངས། བལ་ཡུལ་སོགས་སུ་བཙན་བྱོལ་དུ་ཕེབས་རྗེས་སུ། རྒྱ་དམར་སྲིད་གཞུང་ནས་ཡང་བསྐྱར་སྨན་རྩིས་ཁང་གི་རྗེས་ཤུལ་ཙམ་ཡང་ལྷག་མེད་བཟོ་བའི་ངན་ཇུས་བཏང་སྟེ། ལྕགས་བྱི་སྤྱི་ལོ་ ༡༩༦༠ ལོའི་ལོ་མཇུག་ཙམ་ལ། སྨན་རྩིས་ཁང་དུ་གྲོང་ཁྱེར་མི་དམངས་སྨན་ཁང་སྤོ་རྒྱུ་དང༌། དེའི་ཁོངས་སུ་བོད་སྨན་སྡེ་ཁག་གཅིག་འཛུགས་རྒྱུ། མཁས་དབང་མཁྱེན་རབ་ནོར་བུའི་བཞུགས་ཡུལ་གཞན་ལ་སྤོ་རྒྱུ་སོགས་བྱས་ཀྱང༌། སྐབས་དེར་ཁོ་ཚོས་ཁ་འཇམ་དམངས་གཙོ་བཅོས་བསྒྱུར་གྱི་སྲིན་ལག་གིས་མི་གསོད་ཁྲག་སྦྱོར་གྱི་འཁོར་ལོ་བསྐོར་བཞིན་ཡོད་སྟབས་ཉིན་རེར་ནད་པ་མི་གྲངས་བརྒྱ་དང་ལྔ་བཅུ་ནས་ཉིས་བརྒྱ་བར་འཕར་སྣོན་བྱུང་ཡོད་པའི་རྐྱེན་གྱིས་འགྱུར་ལྡོག་གཏོང་མ་ཐུབ་པར་ད་བར་མུ་མཐུད་འཛིན་སྐྱོང་བྱེད་དགོས་བྱུང་ཡོད་པ་བཅས་སོ།། །།

མཐའ་མའི་འདོན་ཐེངས་།: 12.02.2011 ཉིན། 8:29 AM

<< སྔ་མ།

ནང་གསེས་དཀར་ཆག

ཡིག་ཆ་གསར་ཤོས།

རྒྱལ་སྤྱིའི་ཨྰརོགྱ་2017ཚོགས་ཆེན་དང་པོ།

ཕྱི་བཅོས་གསོ་ཐབས་ཀྱི་ཟབ་སྦྱོང་དམར་ཁྲིད།

སྨན་རྩིས་ཁང་ལ་འབུལ་བ་གསོལ་རས་བསྩལ།

ཨ་གར་སོ་ལྔ་འམ་ཚངས་ལྷའི་གཏམ་རྒྱུད།

མཇུག་དོན།

སྨན་པ་མཁས་ཆེན་དབྱངས་ཅན་ལྷ་མོ།

མཁས་དབང་ངག་དབང་ཆོས་གྲགས།

ལྕགས་པོ་རིའི་དགེ་རྒན་སྐལ་བཟང་ལེགས་བཤད།

ཐུགས་སྲས་ཐུབ་བསྟན་ལྷུན་གྲུབ།

མཁས་དབང་མཁྱེན་རབ་ནོར་བུ།

བཀྲས་ཁང་བྱམས་པ་ཐུབ་དབང་།

འཚོ་བྱེད་རྡོ་རྗེ་རྒྱལ་མཚན།

ཀརྨ་འཇིགས་མེད་ཆོས་ཀྱི་སེངྒེ།

བླ་སྨན་བྱ་སྦུག་པ་དམ་ཆོས་དཔལ་ལྡན།

སློབ་ཐོན་པ་རྣམས་ལ་སྩལ་བའི་བཀའ་སློབ།