སྨན་རྩིས་དྲ་བ། - མདུན་ངོས།

སྨན་པ་དཀའ་བཅུ་པའི་བསླབ་གཞི་རྩ་འཛིན་གསར་པ་གཏན་འབེབས་གསལ་བསྒྲགས།
བརྗོད་བྱ་སྤེལ་མཁན། རྩོམ་སྒྲིག་པ། (admin) ཟླ་ཚེས། 19.11.2022
མདུན་ངོས། >>

སྨན་པ་དཀའ་བཅུ་པའི་བསླབ་གཞི་རྩ་འཛིན་གསར་པ་གཏན་འབེབས་གསལ་བསྒྲགས།

རྒྱ་གར་རྒྱལ་ཡོངས་སྨན་གྱི་ལྷན་ཚོགས་ཀྱིས་ངོས་འཛིན་ཡོད་པའི་ད་ལྟའི་ཆར་གསོ་བ་རིག་པའི་མཐོ་རིམ་སློབ་གཉེར་ཁང་བདུན་ཡོད། དེ་ཀུན་ལ་ཐུན་མོང་དུ་ཁྱབ་པའི་ National Commission for Indian System of Medicine (Minimum standard of Undergraduate Sowa-Rigpa Education) Regulations, 2022 རྒྱ་གར་རྒྱལ་ཡོངས་སྨན་གྱི་ལྷན་ཚོགས་(ཉེ་བའི་གཙུག་ལག་སློབ་མའི་གསོ་བ་རིག་པའི་ཤེས་ཡོན་གྱི་ཉུང་མཐའི་ཚད་གཞི་) སྒྲིག་ཁྲིམས། ༢༠༢༢ ཞེས་པ་ཕྱི་ལོ་ ༢༠༢༢ ཟླ་ ༡༡ ཚེས་ ༡༧ འཁོད་པའི་རྒྱ་གར་གྱི་གཞུང་འབྲེལ་གསར་ཤོག་ भारत का राजपत्र The Gazette of India ཞེས་པའི་ནང་དུ་ཐུན་མོང་མ་ཡིན་པའི་སྡེ་ཚན་ཁོངས་སུ་འདོན་སྤེལ་གནང་ཡོད།

སྒྲིག་ཁྲིམས་ཀྱི་ཡིག་ཆ་དེའི་ནང་གསོ་བ་རིག་པའི་མཐོ་རིམ་སློབ་གཉེར་ཁང་སོ་སོས་ད་ནས་བཟུང་བྱེད་སྒོ་རྣམ་གྲངས་གང་ཞིག་ཇི་ལྟར་ཕྱག་བསྟར་དགོས་པའི་ལམ་སྟོན་ཁ་གསལ་བསྟན་གནང་ཡོད། དེ་ཡང་དོན་ཚན་གཙོ་བོ་བཅུ་དྲུག་དང་དེ་དག་ལའང་ནང་གསེས་མང་པོར་ཕྱེ་ནས་བསྟན་ཡོད་པའི་དོན་ཚན་རྣམས་ཀྱི་ངོ་བོ་ཙམ་སྨྲོས་ན་འདི་ལྟ་སྟེ། ༡། འགོ་འཛུགས་དང་མིང་བྱང་ཐུང་ངུ་། ༢། ཐ་སྙད་ཀྱི་ངེས་ཚིག ༣། གསོ་བ་རིག་པའི་སྨན་དཔྱད་རབ་འབྱམས་པའི་ལས་འཆར། ༤། སློབ་མ་འཛུལ་ཞུགས་ཆེད་དུ་ཚང་དགོས་པའི་འོས་ཆོས། ༥། ལས་འཆར་འདིའི་དུས་ཡུན། ༦། བསླབ་པ་མཐར་སོན་སྐབས་ལག་ཁྱེར་བྱ་དགའ་སྤྲད་ཕྱོགས། ༧། སློབ་ཁྲིད་བརྒྱུད་ལམ་སྐད་ཡིག ༨། སློབ་གཉེར་བྱ་ཕྱོགས། ༩། རྒྱ་གར་སྨན་གྱི་ལམ་ལུགས་སུ་དེང་རབས་མདུན་སྐྱོད་དང་། ཚན་རིག འཕྲུལ་ལས་ཡར་རྒྱས་ཀྱི་ཁ་སྣོན་ཆེད་དུ་ཐབས་ཚུལ་གྱི་རིམ་པ། ༡༠། རྒྱུགས་སྤྲོད། ༡༡། དཔྱད་ཞིབ། ༡༢། སློབ་ཐུན་སོ་སོའི་སློབ་ཚན་དང་། དྲི་ཤོག་གི་ཁ་གྲངས། སློབ་ཁྲིད་ཀྱི་དུས་ཡུན། ཨང་ཐོབ་བགོ་འགྲེམས། ༡༣། སློབ་མ་རྣམས་སློབ་ཁྲིད་དུས་ཡུན་ནང་མཐོ་སློབ་གཞན་ལ་གནས་སྤོས་བྱ་ཕྱོགས། ༡༤། རྒྱས་བཅད་ཀྱི་ཉམས་གསོག་ལས་རིམ། ༡༥། དཔེ་ཁྲིད་སྐུ་ཡོན། ༡༦། དགེ་རྒན་གྱི་ཉམས་མྱོང་དང་ཤེས་ཚད་སྐོར་བཅས་ཡིན།

དེ་ཡང་སྨན་པ་དཀའ་བཅུ་པའི་ལས་འཆར་འདིའི་དུས་ཡུན་ནི་ལོ་ངོ་ལྔ་དང་ཕྱེད་ཀ་ཡིན་ལ། དེ་ཡང་སློབ་ཐུན་གསུམ་དང་ཉམས་གསོག་དུས་ཡུན་གཅིག་སྟེ། ཆེད་ལས་སློབ་ཐུན་དང་པོ་དང་། གཉིས་པ། གསུམ་པའམ་མཐའ་མ་རེ་རེ་ལ་ཟླ་གྲངས་བཅོ་བརྒྱད་རེ་ཆ་བགོས་ཀྱིས་ལོ་བཞི་དང་ཕྱེད་ཀ དེ་ནས་རྒྱས་བཅད་ཉམས་གསོག་ལ་དུས་ཡུན་ལོ་གཅིག་བཞག་ཡོད་པས་ཁྱོན་ལོ་ལྔ་དང་ཕྱེད་ཀ་ཡིན། སློབ་ཁྲིད་ཀྱི་བརྒྱུད་ལམ་སྐད་ཡིག་ནི་བྷོ་ཊི་སྟེ་བོད་སྐད་རང་ཡིན། ཆེད་ལས་སློབ་ཐུན་གསུམ་གྱི་བསླབ་གཞི་རྩ་འཛིན་གཏན་འབེབས་ཟིན་པ་ལྟ་བདེ་ཆེད་དུ་རེའུ་མིག་ནང་བཀོད་པ་འདི་ལྟར།

	ཆེད་ལས་སློབ་ཐུན་དང་པོའི་སློབ་ཚན།	ཆེད་ལས་སློབ་ཐུན་གཉིས་པའི་སློབ་ཚན།	ཆེད་ལས་སློབ་ཐུན་མཐའ་མའི་སློབ་ཚན།
༡	གསོ་རིག་ལོ་རྒྱུས་དང་གཞི་རྩའི་ལྟ་གྲུབ།	སྨན་རྫས། ༢	རྨ་གསོ་བ།
༢	གྲུབ་པ་ལུས།	ཞི་བྱེད་སྨན་གྱི་སྦྱར་ཐབས།	དཔྱད་ཀྱི་བཅོས་ཐབས།
༣	ནད་བརྟག་ཐབས། ༡	ངོས་འཛིན་རྟགས། ༢	སྦྱོང་བྱེད་ལས་ལྔ།
༤	ཐ་མལ་ནད་མེད།	གསོ་བྱེད་ཐབས།	བྱིས་ནད་གསོ་བ།
༥	སྨན་རྫས། ༡	ཚད་པ་གསོ་བ།	མོ་ནད་གསོ་བ།
༦	སྐད་ཡིག	ལུས་སྟོད་དང་དོན་སྣོད་གསོ་བ།	གདོན་ནད་གསོ་བ།
༧	གསོ་དཔྱད་རྩིས་རིག	ཐོར་ནད་དང་གསང་ནད་གསོ་བ།	དུག་ནད་གསོ་བ།
༨	བློ་རྒྱུགས།	བློ་རྒྱུགས།	ཞིབ་འཇུག་ཐབས་ལམ་དང་བསྡུར་རྩིས།
༩	རྩ་རྒྱུད་ཡང་ན་བཤད་རྒྱུད་སྡོང་འགྲེམས།	མན་རྒྱུད་སྡོང་འགྲེམས།	བློ་རྒྱུགས།
༡༠	རང་མོས་སློབ་ཚན། (ཉུང་མཐར་ ༣)	རང་མོས་སློབ་ཚན། (ཉུང་མཐར་ ༣)	ཕྱི་རྒྱུད་སྡོང་འགྲེམས།
༡༡			རང་མོས་སློབ་ཚན། (ཉུང་མཐར་ ༣)