སྐབས་ ༢༠ སློབ་ཐོན་སྨན་པ་རྣམས་ལ་ལས་བཀོད་བརྒྱབ་ཡོད།

བཞུགས་སྒར་སྨན་རྩིས་མཐོ་སློབ་ཁང་ནས་སློབ་ཐོན་སྨན་སློབ་སྐབས་ ༢༠ པ་རྣམས་ལ། འགྲོ་ཕན་སྨན་རྩིས་ཁང་འཛིན་སྐྱོང་ནས་ལོ་གཅིག་རིང་ཡན་ལག་སྨན་ཁང་ཁག་ཏུ་ཉམས་གསོག་གོ་སྒྲིག་ཞུས་རྗེས། འཇམ་དཔྱད་དང་སྐམ་ཁབ་ལག་ལེན་གྱི་ཟབ་སྦྱོང་སྤྲད་ཡོད། དེ་ནས་རང་མོས་ཕྱིར་ཐོན་པ་ཕུད་ལྷག་མ་སྐབས་ ༢༠ སྨན་པ་གསར་པ་རྣམས་ལ་འཛིན་སྐྱོང་ནས་དགོས་མཁོ་ལྟར་ལས་ཀ་བསྐོ་བཞག་བྱས་ཡོད།

དེ་ཡང་འགྲོ་ཕན་སྨན་རྩིས་ཁང་གི་ཕྱི་ནང་གི་གནས་སྟངས་དབང་གིས་གནས་སྐབས་ལས་བྱེད་ས་མིག་གསར་སྐྲུན་བྱེད་ཐབས་མེད་ཀྱང་། ད་རེས་སྨན་སློབ་སྐབས་ ༢༠ སྨན་པ་གསར་པ་རྣམས་ལ་རྒྱུགས་སྤྲོད་ལམ་ནས་སྨན་པ་གྲངས་བཞི་ལ་ཡན་ལག་སྨན་ཁང་ཁག་ཏུ་བརྟག་དཔྱད་སྨན་པའི་ས་མིག་ཏུ་བསྐོ་བཞག་གནང་ཡོད་པ་དང་། དེ་བཞིན་དམིགས་བསལ་བུད་མེད་སྨན་པ་གསུམ་ལ་སྦེང་ལོར་སྨན་རྩིས་མཐོ་སློབ་ཁང་དང་དེ་གའི་ཡན་ལག་སྨན་ཁང་གཉིས་སུ་འཇམ་དཔྱད་པར་བཀོད་སྒྲིག་བྱུང་ཡོད། དེ་ནས་ཡན་ལག་སྨན་ཁང་ཁག་ཏུ་སྨན་པ་བཅུ་གཅིག་ལ་སྨན་རྩིས་ལས་སྣེ་བའི་ས་མིག་ཏུ་ལས་བཀོད་གནང་ཡོད། ཁོང་ཚོ་ལོ་ངོ་གཉིས་རིང་ཆོད་གན་གྱི་ཚུལ་དུ་གནས་ཡོད།

མཐའ་མའི་འདོན་ཐེངས་།: 26.07.2023 ཉིན། 9:52 AM