འཇམ་དཔྱད་ལག་ལེན་སློབ་ཁྲིད་ལེགས་གྲུབ།

ཕྱི་ལོ་ ༢༠༢༣ ཟླ་ ༤ ཚེས་ ༡ ནས་ཟླ་ ༥ ཚེས་ ༡༥ བར་ཟླ་གཅིག་དང་ཕྱེད་ཀའི་རིང་སྐུ་བཅར་སྨན་པ་འཇིགས་མེད་དགེ་འདུན་ལགས་ཀྱིས་སྐབས་ ༢༠ སྨན་པ་ཉེར་གཅིག་རྣམས་ལ་བོད་ཀྱི་གསོ་བ་རིག་པའི་འཇམ་དཔྱད་ཁོངས་སུ་དུགས་དང་བྱུག་པ་གཉིས་ཀྱི་ལག་ལེན་སློབ་ཁྲིད་དང་རྒྱུགས་སྤྲོད་རྗེས་ལག་འཁྱེར་གསོལ་བསྩལ་གནང་ཡོད།

ད་ཐེངས་སྤྱི་ཁྱབ་འགན་འཛིན་མཆོག་གི་དམིགས་བསལ་དགོངས་གཞི་དང་ལམ་སྟོན་ལྟར། སྐབས་ ༢༠ སྨན་པ་གྲངས་ཉེར་གཅིག་རྣམས་ལ་ཕྱི་ལོ་ ༢༠༢༣ ཟླ་ ༤ ཚེས་ ༡ ཉིན་སྔ་དྲོ་ཚོུད་ ༩་༣༠ ཐོག་སྨན་རྩིས་མཐོ་སློབ་ཚོགས་ཁང་དུ་སྤྱི་ཁྱབ་འགན་འཛིན་མཆོག་དང་། འཇམ་དཔྱད་སློབ་ཁྲིད་པ་སྐུ་བཅར་སྨན་པ་འཇིགས་མེད་དགེ་འདུན་ལགས། དེ་བཞིན་སྐམ་ཁབ་སློབ་ཁྲིད་པ་སྨན་རམས་པ་བསོད་ནམས་རྡོ་རྗེ་ལགས་ཀྱི་གཙོས་འབྲེལ་ཡོད་ལས་བྱེད་རྣམས་ལྷན་འཛོམས་ཐོག་ཟབ་སྦྱོང་དབུ་འཛུགས་མཛད་སྒོ་ཞིག་བསྐྱངས་གནང་། དེ་དུས་སྤྱི་ཁྱབ་འགན་འཛིན་མཆོག་ནས་སྨན་པ་གསར་པ་རྣམས་ལ་ཟབ་སྦྱོང་འདིར་དོ་ནན་དགོས་པའི་ལམ་སྟོན་གསུང་བཤད་གནང་གྲུབ་རྗེས་འཇམ་དཔྱད་སློབ་ཁྲིད་འགོ་འཛུགས་ཞུས།

དེ་ཡང་ཟླ་གཅིག་དང་ཕྱེད་ཀའི་རིང་གི་མཛད་རིམ་བསྒྲིགས་པ་བཞིན། བོད་ཀྱི་གསོ་བ་རིག་པའི་བྱུག་པ་དང་དུགས་ཀྱི་ལག་ལེན་གཉིས་ཀྱི་གཞུང་བཤད་སློབ་ཁྲིད་དང་། ལག་ལེན་དམར་ཁྲིད་གནང་རྗེས་སློབ་ཕྲུག་རྣམས་རེ་རེ་བཞིན་དཔྱད་བཅོས་དེ་གཉིས་ཀྱི་ཚོད་ལྟའི་ལག་ལེན་རྒྱུགས་སྤྲོད་དང་། དེ་ནས་དངོས་གཞིའི་ལག་ལེན་རྒྱུགས་སྤྲོད་བླངས་ཡོད། དེ་ལྟར་སྨན་པ་གསར་པ་རྣམས་ནས་བློ་རིག་སྒྲིམ་སྟེ་དོ་སྣང་ཆེན་པོས་ཟབ་སྦྱོང་ལ་ཉམས་ཞུགས་གནང་བས་བུམ་པ་གང་བྱོའི་ཚུལ་དུ་དུགས་དང་བྱུག་པའི་ལག་ལེན་རྣམས་གདེང་འཁེལ་བ་ཤེས་ཐུབ་ཡོད་པས་སྐབས་ ༢༠ སྨན་པ་ཉེར་གཅིག་ལ་འགྲོ་ཕན་སྨན་རྩིས་ཁང་ནས་འཇམ་དཔྱད་ལག་འཁྱེར་བསྩལ་གནང་ཡོད།

མཐའ་མའི་འདོན་ཐེངས་།: 26.07.2023 ཉིན། 9:36 AM