དྷ་ས་སྨན་རྩིས་མཐོ་སློབ་ཁང་ཁྲིམས་མཐུན་ངོས་ལེན་ཐོབ། 

འགྲོ་ཕན་སྨན་རྩིས་ཁང་གི་དྷ་ས་སྨན་རྩིས་མཐོ་སློབ་ཁང་ལ་རྒྱ་གར་དབུས་གཞུང་ཨཱཡུཥ་ལྷན་ཁང་ནས་ཕྱི་ལོ་ ༢༠༢༢-༢༠༢༣ ནང་དུ། ཉེ་བའི་གཙུག་ལག་སློབ་མའི་(སྨན་པ་བཀའ་བཅུ་པ་)སློབ་ཚན་དུ་སློབ་ཕྲུག་བཅོ་ལྔ་བསྡུ་ལེན་བྱེད་ཆོག་པའི་བཀའ་འཁྲོལ་ཐོབ་པའི་གཏམ་བཟང་གི་གནས་ཚུལ་ཞིག་ཐོན་ཡོད།

དེ་ཡང་ཕྱི་ལོ་ ༢༠༢༢ ཟླ་ ༧ ཚེས་ ༡༩ ཉིན་ཧི་མཱ་ཅལ་མངའ་སྡེ་གཞུང་གི་ཨཱཡུཥ་སྡེ་ཚན་ནས་འགག་བྱ་མེད་པའི་ལག་འཁྱེར་ (NOC-No Objection Certificate) གནང་བ་དང་།

དེ་བཞིན་ཟླ་ ༨ ཚེས་ ༡ ཉིན་ཧི་མཱ་ཅལ་མངའ་སྡེའི་ཁྱབ་ཁོངས་མཎ་ཌི་རྗོང་དུ་རྟེན་གཞི་བྱས་པའི་ Atal Medical & Research University (AMRU) ཨཊལ་སྨན་བཅོས་དང་ཉམས་ཞིབ་གཙུག་ལག་སློབ་གཉེར་ཁང་གི་གཙོ་སྐྱོང་འོག་དེབ་སྐྱེལ་ཟིན་ཅིང་། དྷ་ས་སྨན་རྩིས་མཐོ་སློབ་ཁང་འདི་བཞིན་གཙུག་ལག་སློབ་གཉེར་ཁང་གི་འབྲེལ་ཁོངས་ངོས་ལེན་གྱིས་ཕྱག་ཡིག་གནང་ཡོད།

དེ་ནས་འདི་ལོའི་ཟླ་ ༡༠ ཚེས་ ༡༧ ཉིན་ National Commission for Indian System of Medicine (NCISM) རྒྱ་གར་རྒྱལ་ཡོངས་སྨན་གྱི་ལྷན་ཚོགས་ནས་རང་རེའི་མཐོ་སློབ་ཁང་གིས་ཉེ་བའི་གཙུག་ལག་སློབ་མའི་སློབ་ཚན་ཆེད་དུ། སློབ་ཕྲུག་བཅོ་ལྔ་ཕྱི་ལོ་ ༢༠༢༢ - ༢༠༢༣ སློབ་དུས་ནང་དུ་བསྡུ་ལེན་བྱེད་ཆོག་པའི་ཆ་རྐྱེན་ལྡན་པའི་བཀའ་འཁྲོལ་སྩལ་ཐོབ་བྱུང་ཡོད། དེ་ཡང་བཀའ་ཁྲོལ་དེ་བཞིན་ཟླ་ཤས་སྔོན་དུ་འབྲེལ་ཡོད་སྡེ་ཚན་ནས་བསྐོ་བཞག་ལྟར་རྟོག་ཞིབ་ཚོགས་ཆུང་ཁག་སྨན་རྩིས་མཐོ་སློབ་ཁང་དུ་ཕེབས་ཏེ་ཞིབ་ནན་གྱིས་རྟོག་ཞིབ་རིམ་པ་ཁག་གྲུབ་རྗེས་ཆོག་མཆན་གནང་བ་ཞིག་ཡིན། རིང་མིན་དྷ་ས་སྨན་རྩིས་མཐོ་སློབ་ཁང་དུ་འདི་ལོའི་ཡིག་རྒྱུགས་ཐབས་ལམ་ (NCISM -NEET SR UG 2022-2023) བརྒྱུད་ནས་རྒྱུགས་འཕྲོད་པའི་སྨན་གྱི་སློབ་མ་གྲངས་ངེས་བཅོ་ལྔ་འབྱོར་མཚམས་སློབ་ཁྲིད་འགོ་འཛུགས་བྱ་རྒྱུ་རེད་འདུག

མཐའ་མའི་འདོན་ཐེངས་།: 31.03.2023 ཉིན། 10:25 AM