སྐབས་༡༧ རྗེས་ཀྱི་སྨན་པ་རྣམས་ལ་དེབ་སྐྱེལ་ལག་ཁྱེར་གནང་གཏན་འཁེལ་ཡོད།

ཕྱི་ལོ་ ༢༠༢༣ ཟླ་ ༡༠ ཚེས་ ༢༤ ཉིན་འགྲོ་ཕན་སྨན་རྩིས་ཁང་གི་སྤྱི་ཁྱབ་འགན་འཛིན་ཐུབ་བསྟན་ཚེ་རིང་མཆོག་གིས་བསྲིངས་པའི་རིག་གསལ་ཨང་ ༢༧༩ ནང་གསལ་ལྟར། རྒྱ་གར་སྲོལ་རྒྱུན་སྨན་གྱི་ལྷན་ཚོགས་(NCISM)ཀྱི་ཁྱབ་ཁོངས་ཡུ་ནཱ་ནི་དང་། སིདྡྷ། གསོ་བ་རིག་པའི་ཚོགས་ཆུང་(Board of Unani, Siddha & Sowa-Rigpa, BUSS)ནས་ཕྱི་ལོ་༢༠༡༨ སྐབས་ ༡༧ དང་དེའི་རྗེས་ཀྱི་སློབ་ཐོན་སྨན་པ་རྣམས་ལ་དེབ་སྐྱེལ་ལག་འཁྱེར་གནང་གཏན་འཁེལ་ཡོད་པའི་གཏམ་བཟང་གི་གནས་ཚུལ་ཞིག་ཐོན་ཡོད། 

དེ་ཡང་ཕྱི་ལོ་ ༢༠༡༧ སྔོན་ཏེ་སྨན་པ་སྐབས་ ༡༦ བར་དཀའ་བཅུ་པ་བསླབ་པ་ཐར་སོན་པ་རྣམས་ལ་ན་ནིང་ཕྱི་ལོ་ ༢༠༢༢ ནས་དེབ་སྐྱེལ་ལག་འཁྱེར་བསྩལ་འགོ་འཛུགས་ཟིན་ཡོད།  ད་ཐེངས་སྐབས་ ༡༧ རྗེས་ཀྱི་བཀའ་བཅུ་པ་བསླབ་པ་ཐར་སོན་པ་རྣམས་ལ་དེབ་སྐྱེལ་ལག་འཁྱེར་གནང་གཏན་འཁེལ་བ་དང་། ད་ལྟའི་ཆར་སྨན་པ་སྐབས་ ༡༧། ༡༨། ༡༩། ༢༠། བར་གྱི་དཀའ་བཅུ་པའི་སྨན་པ་ཕལ་ཆེ་བ་འགྲོ་ཕན་སྨན་རྩིས་ཁང་དུ་ཞབས་འདེགས་ཞུ་བཞིན་པ་དང་། སྐབས་ ༢༡ པ་རྣམས་འགྲོ་ཕན་སྨན་རྩིས་ཁང་གི་ཡན་ལག་སྨན་ཁང་ཁག་ཏུ་ཟླ་དྲུག་ཕྱི་མའི་ཉམས་གསོག་ཞུ་བཞིན་ཡོད་ལ། སྐབས་ ༢༢ སྨན་སློབ་རྣམས་སྨན་པའི་འཐོན་རྒྱུགས་ཆེན་མོའི་རྒྱུགས་སྤྲོད་ལས་རིམ་འགྲོ་བཞིན་ཡོད། དེ་ལྟར་འགྲོ་ཕན་སྨན་རྩིས་མཐོ་སློབ་ཁང་ནས་བསླབ་པ་ཐར་སོན་པའི་སྨན་པ་དཀའ་བཅུ་པ་ཡོངས་ལ་ཁྲིམས་མཐུན་དེབ་སྐྱེལ་ལག་འཁྱེར་འཐོབ་རྒྱུ་ངེས་གཏན་འཁེལ་ཡོད།

མཐའ་མའི་འདོན་ཐེངས་།: 26.10.2023 ཉིན། 4:53 PM