ལེའུ་སོ་ལྔ་པ། བྱང་ཁོག་རིན་པོ་ཆེའི་རྣག་སྐེམས་ཀྱི་སྦྱོར་བ།

ཨོཾ་སྭསྟི་སིདྡྷཾ། ཨོཾ་ཨཱཿཧཱུྃ། བཅོམ་ལྡན་འདས་སྨན་གྱི་བླ་ལ་ཕྱག་འཚལ་ལོ། །བྱང་ཁོག་རིན་པོ་ཆེའི་རྣག་སྐེམས་འདི་ལ་དངུལ་ཆུ་ཞོ་གཅིག མུ་ཟི་སྲང་གཉིས། ཨ་རུ་ར་ཚུམ་གཅིག དེ་རྣམས་ཞིབ་པར་བཏགས་ལ་རང་གི་དྲི་ཆུས་སྦྱར་སྟེ། རྫ་སོ་བཏང་བའི་ནང་དུ་མུ་ཟི་མ་བཏུལ་བ་སྲང་གཅིག་འོག་ཏུ་བཏིང་། དེའི་སྟེང་དུ་ཟངས་སྲབ་པོ་བསླེབས་ལ་བཞག དེའི་སྟེང་དུ་དངུལ་ཆུ་བླུགས། དེའི་སྟེང་དུ་མུ་ཟི་སྲང་གཅིག་གིས་ཟངས་ཁྱབ་པར་གཡོགས། ཁ་ཆོད་འགྲིགས་པར་བྱས་པའི་སྟེང་དུ་བུག་པ་བྱས་ལ། འདག་པ་དང་ལྕི་བ་བསྲེས་པས་དུད་པ་འཆོར་བར་དགག སྤང་བཟང་པོའི་མེས་བསྲེག་གོ། ཚོས་མ་ཚོས་ལྟ་བ་ནི། བུག་པ་ན་མར་ལྕགས་ཕྲ་མོ་གཅིག་བརྒྱབ་པས་སོབ་ཀྱིས་སོང་ན་ཚོས་པ་ཡིན། མ་ཕད་ན་བསྐྱར་ལ་བསེག་གོ། ཚོས་པ་དང་། ཟངས་དང་། དངུལ་ཆུ་འདྲེས་པས་སྔོ་ལེབ་པ་རབ་ཅིག་འོང་། སྔོ་སྐྱར་འདུག་ན་ཤིན་ཏུ་ཚོས་པ་ཡིན། སྨུག་པོར་འདུག་ན་མ་ཚོས་པ་ཡིན། ཐལ་བ་དེ་དང་། ཡུང་བ་དང་། པ་ཏོ་ལ་དང་། ལི་ག་དུར་དང་། སོ་མ་ར་ཛ་དང་། ཐལ་ཀ་རྡོ་རྗེ་དང་། རྒྱ་རུ་དང་། བསེ་རུ་དང་། གྭ་དོར་དང་། དེ་རྣམས་ཞིབ་པར་བཏགས་ལ། སྦྲང་གིས་རི་ལུ་བྱས་ལ། དང་པོ་རིལ་མ་ཙམ་གཏང་། དེ་ནས་གསུམ་མམ་གཉིས་ཞོ་རེ། དེ་ནས་ལུས་ཀྱི་ཚོད་དང་སྦྱར་ལ་ཅི་རིགས་པར་གཏང་ངོ་། །བྱང་ཁོག་རྣག་གིས་ཁེངས་ཀྱང་སོས་པར་འགྱུར་རོ། །རྗེ་བཙུན་ས་སྐྱ་པ་ནས་བརྒྱུད་པའོ།། །།

མཐའ་མའི་འདོན་ཐེངས་།: 18.07.2019 ཉིན། 2:31 PM