ལེའུ་སོ་དྲུག་པ། གཉན་རིམས་རྨེན་བུ་བཅོས་པ།

གཉན་རིམས་ཚིགས་ལ་བབས་པ་རྨེན་བུའི་ནད། །རྒྱུ་རྐྱེན་གནས་ས་བཅོས་ཐབས་བཞི་ཡིས་བསྟན། །རྒྱུ་ནི་གཉན་ཚད་སྤྱི་དང་འདྲ་བ་ལ། །རྐྱེན་ནི་དྲག་ཤུལ་སོགས་ཀྱིས་རླུང་ཁྲག་འཁྲུགས། །དེ་དག་ཚིགས་སུ་འབབ་པར་བཤད་ནའང༌། །ཕལ་ཆེར་སྐེ་མཇིང་མིག་ཟུར་སྣེ་ས་རུ། །སྐྲངས་པའི་མདོག་དང་ཆེ་ཆུང་སྲ་སྙི་དྲོད། །ཟུག་གཟེར་སྨིན་པ་དཀའ་སླ་འཕེལ་འབྲི་སོགས། །སྣ་ཚོགས་འབྱུང་བས་རིགས་བརྒྱད་གསུངས་མོད་ཀྱང༌། གནས་དེར་ལྦ་བའམ་ཉུང་གཤེར་འཁྱགས་འདྲ་ཞིང༌། །ཡུན་གནས་འབབ་སའི་དབང་གིས་ངོ་ལེན་སླ། །འོན་ཀྱང་ལ་ལར་སེར་བ་རུས་ཞེས་པའི། །སྐྲངས་པོ་དེ་དང་འཁྲུལ་བས་བརྟག་པ་གཅེས། །བཅོས་ཐབས་སྨན་དཔྱད་ཟས་སྤྱོད་རྣམ་བཞི་སྟེ།  །སྨན་ནི་ཁོང་དུ་བྱ་ཁྱུང་ལྔ་པའི་སྟེང༌། །དངུལ་ཆུ་སྟག་ཤ་གུ་གུལ་སེང་ལྡེང་སྦྱར། །སིངས་པོས་འཕུལ་བཏང་ཕྱི་ནས་ཀླད་རུས་དག །ཚྭ་དང་སྟག་ཤ་འཛིན་པ་སྦྱར་ལ་བྱུག །མ་ཞི་སྟེང་དུ་མེ་ཡིས་ཚོས་པར་བསྲེག །འབམ་པོ་བྱ་བྲ་སྦང་མས་རྣག་ཏུ་འགུགས། །རྙིངས་ཤིང་རྒྱས་ནས་སྣུམ་འཆོས་དུགས་བྱ་གཅེས། །ཟས་སྤྱོད་གཉན་ཚད་སྤྱི་དང་མཐུན་པར་བཅོས། །མ་ཞི་གང་ཉེའི་རྩ་ལ་གཏར་བའམ། །ཟུག་མེད་འཕྱང་བ་བཅད་དམ་བཏོན་རྗེས་བསྲེག །ཅེས་བདུད་རྩི་སྙིང་པོ་ཡན་ལག་བརྒྱད་པ་གསང་བ་མན་ངག་ཡོན་ཏན་རྒྱུད་ཀྱི་ལྷན་ཐབས་ཟུག་རྔུའི་ཚ་གདུངས་སེལ་བའི་ཀཏྤཱུ་ར་དུས་མིན་འཆི་ཞགས་གཅོད་པའི་རལ་གྲི་ཞེས་པ་ལས་གཉན་རིམས་རྨེན་བུ་བཅོས་པའི་ལེའུ་སྟེ་སོ་དྲུག་པའོ།།

མཐའ་མའི་འདོན་ཐེངས་།: 11.11.2020 ཉིན། 10:27 AM