ལེའུ་ཞེ་དྲུག་པ། རྣ་ནད་ཕུས་འདེབས་བཅོས་པ།

གཉན་ནད་རྣ་རྩ་ཕུས་འདེབས་ཞེས་བྱ་བ། །ངོ་བོ་གཉན་རིམས་སྤྱི་དང་འདྲ་བ་ལས། །མེད་ཕྱིར་འདི་རུ་རྟགས་བཅོས་གཉིས་སུ་བསྡུས། །རྣ་སྦུགས་འཁྱུག་ལ་གཟེར་ཞིང་ཟ་འགྲམ་སྐྲངས། །རྩ་གྲིམས་ཆུ་དམར་དྲོད་ཆེ་རྩེ་ (ཕུས་འདེབས་ངོས་མ་ཟིན་ན་བར་རྟ་སྐྲངས་པ་སོགས་ནད་གཞན་དུ་འགྱུར་བས་ནན་ནས་བཅོས་སྒྲིམ་པའོ།) འདར་འབྱུང༌། །བཅོས་ཐབས་སྨན་སྔགས་དཔྱད་ཟས་སྤྱོད་ལམ་ལྔ། །སྨན་ནི་ཁོང་དུ་ཁྱུང་སྟེང་གུ་གུལ་དང༌། །སྟག་ཤ་དངུལ་ཆུ་མུ་ཟི་བསྣན་ལ་བཏང༌། །ཡང་ན་སྨན་ཆེན་བཞི་སྦྱོར་གང་འོས་ཤིས། །བྱུག་པ་ཟབ་ལག་ཅན་དང་བྲག་ཞུན་དང༌། །ཀྱི་ཧོང་སྟག་ཤ་དྲི་ཆུ་སྦྱར་ཏེ་བྱུག  །ཡང་ན་རང་བྱུང་གཉིས་དང་བོང་ང་ནག  །གུ་གུལ་སྟག་ཤ་ཤུ་དག་སྦྱར་བ་བྱུག །བཙན་དུག་སྲན་ཙམ་ཞིབ་བཏགས་ཆུར་སྦྱར་ལ། །ནན་ཏ་པ་ཡ་ཤ་ཕཊ་ཅེས་པའི། །སྔགས་ (ཉུང་མཐའ) སྟོང་བཏབ་པའི་ཐིགས་པ་རྣ་བར་བླུག །མ་ཕན་བྱ་ཁྱུང་ལྔ་པ་ཚད་ལྡན་སྟེང༌། །ཟ་འོག་བེར་གསོལ་རྩལ་ལྡན་རྒྱལ་པོ་ལ། །ནུ་ཞོ་འཛག་པའི་བཙུན་མོ་ཡིད་འོང་མ། །དུང་ཐོད་བཅིངས་པའི་བློན་པོས་ཁ་ལོ་བཅས། །དྲག་པོའི་ལམ་ནས་ཐུར་དུ་སྦྱང་བ་གཅེས། །ཟས་དང་སྤྱོད་ལམ་གཉན་ཚད་སྤྱི་བཞིན་ནོ། །ཞེས་བདུད་རྩི་སྙིང་པོ་ཡན་ལག་བརྒྱད་པ་གསང་བ་མན་ངག་ཡོན་ཏན་རྒྱུད་ཀྱི་ལྷན་ཐབས་ཟུག་རྔུའི་ཚ་གདུང་སེལ་བའི་ཀཏྤཱུ་ར་དུས་མིན་འཆི་ཞགས་གཅོད་པའི་རལ་གྲི་ཞེས་པ་ལས་རྣ་ནད་ཕུས་འདེབས་བཅོས་པའི་ལེའུ་སྟེ་ཞེ་དྲུག་པའོ།།

མཐའ་མའི་འདོན་ཐེངས་།: 11.11.2020 ཉིན། 10:46 AM