ལེའུ་ཉེར་གཅིག་པ། སེར་པོ་རྟ་འདོད་སྦྱོར་བ།

ཐར་ནུ་འདུལ་བར་བཞེད་ན། དཔྱིད་དུས་བརྐོས་ལ་མཐེའུ་ཆུང་ཙམ་དུ་གཏུབ་སྟེ། ཞོ་མ་བོ་བར་བྱ། དེ་ཆང་གི་ནང་ནུབ་པར་བྱ་སྟེ། ར་ཤ་ཁམ་ཆེ་བ་ཅིག་བཅུག་ལ་བཙོ། ཆང་ཐར་ནུ་ལ་ཐིམ་པ་དང་། ར་ཤ་ས་འོག་ཏུ་བཞག དེ་མི་དང་དུད་འགྲོ་གང་གིས་ཟོས་ཀྱང་འཆིའོ། །ཐར་ནུ་རྣམས་སྐུད་པ་ལ་བརྒྱུས་ལ་གྲིབ་སྐམ་བྱའོ། །གྲགས་རྒྱལ་ཅུང་གི་བཞེད་པ་ནི། ཐར་ནུ། ཆུ་རྩ། ཤུ་དག དཔའ་བོ་སེར་པོ། དུར་བྱིད། ཨ་རུ་ར། གུ་གུལ། གླ་རྩི། རྒྱ་ཚ་དེ་རྣམས་ཞིབ་པར་བཏགས་ལ། ཁྱེའུའི་ཆུ་དང་སྦྱར་ལ་གཏང་། སྐྱུགས་པ་སྲུང་། འཁྲུ་བ་རབ་ཏུ་བསྔགས་ཏེ་ནད་ཕྱིར་དབྱུང་། དམིགས་གཞན་དུད་པ་དང་སྦྱར། རྒྱ་ཆེར་བྱུག དཀར་དམར། མངར་སྐྱུར་ཤ་རུལ་རལ་དུབ་དང་། བུད་མེད། ཉི་མ། མེ་དང་། རྟ། ཆུ། གཉིད་རྣམས་སྤང་ངོ་། །ལོག་ན་ལུམས་བྱ། རོ་ནི་མངར་ཁུས་འདོན། རྗེས་ནི་ཟླ་བའི་བར་དུ་ངལ་དུབ་སྤང་། དེ་རུ་སྦྱོར་བ་ཀུན་འདུས་བསྲུང་བའི་མཆོག་ཀྱང་ཡིན། དེ་ཡིས་རང་ཞིར་མ་སོང་དམིགས་དེར་ག་པུར་མར་བསྲེས་བྱུག རྣག་རྗེས་ཤ་བསྙོན་ཤུ་དག་གིས་བཅད། མར་ཁུ་ཆེན་པོས་བྱུག དེའི་སྟེང་དུ་ལུམས་ཀྱིས་ནན་བྱ། ཕན་པར་འགྱུར། གྲེ་བ་གག་རོ་མིའི་རུས་པའི་བྱ་འུར་དང་། ཅུ་གང་བག་གཅིག་བསྲེས་པས་གྲེ་བར་བཏབ་ན་སོས་པར་འགྱུར་རོ། །ནད་ཡིན་མིན་བརྟག་པ་ལ། ཨ་རུ་ར། ཐར་ནུའི་ཐང་གཏང་བས། ཡིན་ན་སྐྲངས་འབུར་ངེས་པར་འོང་། ཨ་རུ་ར་སུམ་ཆ། སུག་སྨེལ་བཞི་ཆ་ཞིབ་པར་བཏགས་ལ་གླ་རྩི་རེ་ཙམ་ཁོང་དུ་གཏང་བས་སྙིང་སྐྲངས་བསྲུང་། སྙིང་སྐྲངས་ཐུབ་ན་ལོག་པའི་འཇིགས་པ་མེད། དྲག་པོ་གཏུམ་པོ་ཤོག་ཤིང་དང་། །གསེར་གྱི་མེ་ཏོག་ཀ་མོ་ཉ། །མཾ་ས་ཀ་ར་དྲུག་འགྱུར་དང་། །མི་བསྐྱོད་པ་ཡི་རྟ་ལ་བསྐྱོན། །ཐུབ་པ་ཆེན་པོ་གལ་ཆེ་སྟེ། །སྙིང་ལ་སོང་ཡང་ཐུབ་པར་ངེས། །སྦྱར་ཐབས་བཙན་དུག་ར་དུག་དང་། །ཨ་རུ་ར་གསུམ་ལྷན་ཅིག་བཏགས། །དེ་ནས་དྲི་ཆུ་བར་པ་དང་། །སྦྱར་ལ་རློན་བཏགས་ཡུན་རིང་བྱ། །ནག་པོར་སོང་ན་འབྱོངས་པ་ཡིན། །རེ་ལྕག་ཐར་ནུ་ལྕེ་ཚ་གསུམ། །ལྷན་ཅིག་ལོགས་སུ་ཞིབ་པར་བཏགས། །ཤིན་ཏུ་འབྱོངས་པར་གྱུར་པ་ཡང་། །ཁ་དོག་སེར་པོ་སྣུམ་པར་འགྱུར། །ཐུན་ཚད་ནད་ཚབས་ཆེ་ཆུང་སྦྱར། །རྟགས་དང་ཟས་སྤྱོད་གཞན་དང་མཐུན། །ཐུན་དང་ཚད་ཀྱི་སྦྱོར་གཉིས་ལས། །འདི་ནི་སྦྱོར་བ་ཚད་བཅོས་ཅིག །སེར་པོ་རྟ་འདོད་སྦྱོར་བའོ། །ས་མཱ་པྟ་མི་ཐི།། །།

མཐའ་མའི་འདོན་ཐེངས་།: 18.07.2019 ཉིན། 11:30 AM