ཏོག་དབྱིབས་གཉན་རིམས་རྣམ་པ་གསར་པར་གཟབ་ནན་བཀོད་ཁྱབ།

ཕྱི་ལོ་ ༢༠༢༣ ཟླ་ ༡༢ ཚེས་ ༢༡ འཁོད་བོད་མིའི་སྒྲིག་འཛུགས་འཕྲོད་བསྟེན་ལས་ཁུངས་ནས་དམིགས་བསལ་ལྷོ་སྤྱི་གཙོས་ས་གནས་འགོ་འཛིན་དང་། སྨན་ཁང་ཁག་གི་འགན་འཛིན་རྣམ་པར་དེང་སྐབས་རྒྱ་གར་ལྷོ་ཕྱོགས་ཀེརལ་དང་ཀར་ན་ཊ་ཀའི་ནང་དུ་ཁྱབ་གདལ་འགྲོ་བཞིན་པའི་ཏོག་དབྱིབས་གཉན་རིམས་༡༩ ཡི་རྣམ་པ་གསར་པ་ JN.1 ཞེས་པའི་ཐད་གཟབ་ནན་ཐུགས་སྣང་དགོས་པའི་ལམ་སྟོན་བཀོད་ཁྱབ་ཅིག་ཕེབས་ཡོད།

འཕྲོད་བསྟེན་ལས་ཁུངས་ནས་ལམ་སྟོན་བཀོད་མངགས་འདི་ལྟར་ཕེབས་ཡོད་དེ།

༡། ལྷོ་ཕྱོགས་ཁུལ་གནས་རང་རེའི་གཞིས་སྒར་ཁག་དང་། ལྷག་པར་དུ་དེ་གའི་ཁྱབ་ཁོངས་དགོན་སྡེ་གྲྭ་ཚང་ཁག་ནང་དགེ་འདུན་པ་འདུ་ཚོགས་ སྐབས་དང་། སློབ་གྲྭའི་ནང་སློབ་ཕྲུག་ཚོགས་འཛོམས། མང་ཚོགས་འདུ་འཛོམས་ལ་སོགས་པའི་སྐབས་སུ་ནད་འབུ་ཁྱབ་གདལ་མི་འགྲོ་བའི་དམིགས་བསལ་ཐུགས་སྣང་ཡོང་བ་དགོས་རྒྱུ།

༢། ཁྲོམ་ལ་སོགས་པའི་ཕྱི་ཁག་ཏུ་མི་ཚོགས་འཛོམས་སར་བསྐྱོད་སྐབས་སྔོན་ཚུད་ནས་ཁ་རས་གྱོན་རྒྱུས་མཚོན་པའི་འཕྲོད་བསྟེན་གྱི་སྔོན་འགོག་གོ་རྟོགས་གནང་དགོས།

༣། ནད་རྟགས་ཡོད་པའི་དོགས་གཞི་འབྱུང་ཚེ་ལམ་འཕྲལ་སྨན་ཁང་བསྟེན་གཏུགས་ཀྱིས་བརྟག་དཔྱད་དགོས་པ་ལས་སྣང་མེད་དུ་མ་ཤོར་བ་སྔོན་ཚུད་ནས་ཐུགས་གཟབ་དགོས།

༤། ས་གནས་ཀྱི་འཕྲོད་བསྟེན་སྨན་ཁང་ལ་དོགས་གཞི་ཅན་གྱི་ནད་པ་འབྱུང་ཚེ་ལམ་འཕྲལ་ཟུར་འཇོག་དགོས་པ་ལས་ནད་པ་བྱིངས་མཉམ་ཟོམ་འཇོག་མ་བཞག་པར་ད་ལྟ་ནས་འོག་གྲབས་དགོས།

༥། དེ་སྔ་ལྟར་ས་གནས་མངའ་སྡེ་གཞུང་དང་རྫོངས་སྨན་ཁང་གི་འགོ་ལས་དང་ལྷན་འབྲེལ་ལམ་གྱིས་ལམ་སྟོན་ཕེབས་ཁག་ལ་དམ་འཛིན་དགོས་རྒྱུ།

བཅས་བཀོད་ཁྱབ་ལམ་སྟོན་ཕེབས་ཡོད་པ་བཞིན་མང་ཚོགས་ནས་ཀྱང་དེ་དེ་བཞིན་གྱིས་ཉེ་བའི་ཉམས་མྱོང་ལ་དཔག་སྟེ་རང་གི་འཕྲོད་བསྟེན་ལ་རང་གཅེས་རང་སྲུང་དགོས་རྒྱུ་གལ་ཆེ་དོན་ཆེན་དུ་བཟུང་དགོས་པ་དང་། གཞན་གྱིས་དཀྲོག་གཏམ་ལ་དབུ་མ་འཁོར་བར་འབྲེལ་ཡོད་བོད་མིའི་སྒྲིག་འཛུགས་ཀྱི་འཕྲོད་བསྟེན་ལས་ཁུངས་དང་མངའ་སྡེ་གཞུང་། བོད་ཀྱི་གསོ་རིག་སྨན་པ་དང་འཕྲོད་བསྟེན་སྨན་ཁང་གི་སྨན་པ། འགན་འཁུར་མི་སྣའི་ལམ་སྟོན་བཀོད་མངགས་རྣམས་ཇི་བཞིན་ལག་བསྟར་དགོས་གལ་ཆེ།།

མཐའ་མའི་འདོན་ཐེངས་།: 22.12.2023 ཉིན། 12:06 PM