ལེའུ་སོ་བདུན་པ། མཆེར་ནད་གསོ་བ།

དེ་ནས་ཡང་དྲང་སྲོང་རིག་པའི་ཡེ་ཤེས་ཀྱིས་འདི་སྐད་ཅེས་གསུངས་སོ། །ཀྱེ་དྲང་སྲོང་ཆེན་པོ་ཉོན་ཅིག །མཆེར་པའི་ནད་ལ་རྒྱུ་རྐྱེན་དབྱེ་བ་དང༌། །རྟགས་དང་བཅོས་ཐབས་རྣམ་པ་བཞི་རུ་བཤད།།

སྤྱི་དོན་དང་པོ་རྒྱུ་ནི་མ་ཞུ་རླན་གྲང་དྲག་ཤུལ་སྐྱེད། །སྤྱི་དོན་གཉིས་པ་དབྱེ་བ་མཆེར་ནད་ཚ་བ་ཁྲག་སྦོས་དང༌། །མཆེར་རླུང་མཆེར་པའི་བད་ཀན་རླུགས་པ་ལྔ།།

སྤྱི་དོན་གསུམ་པ་མཆེར་ནད་དང་པོ་ཚ་བ་ཆང་འཐུངས་དྲོས་ཚེ་སྦོ། །ལྕེ་སྔོ་ནག་འདི་ཁྲ་དབུགས་རྒོད་མཆུ་དང་གདོང་པ་སྨུག །རྐང་ལག་སྦྲིད་ཅིང་གཡོན་གྱི་རྩིབ་ཐུང་གཟེར། །གཉིས་པ་ཁྲག་སྦོས་དེ་འདྲ་བཞིན་མདོག་སྔོའམ་སེར། །ཁོང་ལྕི་སྦོ་འཁྲོག་བྱེད་ཅིང་མ་མཆུ་ཐུར་དུ་འཕྱང༌། །གསུམ་པམཆེར་རླུང་ལུས་སྐྲངས་སྦོ་འཁྲོག་འཇུ་སྟོབས་ཆུང༌། །སྒྲེག་པའམ་འོག་རླུང་དོན་ཐོན་ན་བདེ་སྙམ་བྱེད། །བཞི་བ་མཆེར་པའི་བད་ཀན་མཆུ་ལ་བད་ཀན་ཆགས། །གྲང་དང་དགོང་དུས་སྦོ་ལ་གཡོན་ངོས་གཟེར། །ལྔ་བ་རླུགས་པ་སྦོ་འཁྲོག་ཕྱི་ས་དྲི་མ་མི་ཐུབ་འཆོར།།

སྤྱི་དོན་བཞི་བ་བཅོས་ཐབས་དང་པོ་མཆེར་ཚད་ལི་ཤི་ཀ་ཀོ་ལ། །སུག་སྨེལ་གུར་ཀུམ་ཏིག་ཏ་གསེར་མེ་ཏོག །སླེ་ཏྲེས་ཀ་ར་སྦྱར་བའི་ཕྱེ་མ་བཏང༌། །ཀ་ཀོ་ལ་དང་གུར་ཀུམ་ཨ་རུ་ར། །ཀ་ར་སྦྱར་བཏང་མཆེར་པའི་སྲིན་ལག་རྒྱབ་དང་ངར་གདོང་རྟ་མཐུར་རྩ་ལ་གཏར། །གཉིས་པ་ཁྲག་སྦོས་ནད་ལ་མ་ནུ་པི་པི་ལིང༌། །སུག་སྨེལ་ཤུ་དག་དོང་གྲ་སྒ་དམར་ན་ལེ་ཤམ། །ཁ་རུ་ཚྭ་དང་ཤིང་ཚ་རྒྱམ་ཚྭ་དང༌། །བུ་རམ་སྦྱར་བཏང་ངར་གདོང་མཆེར་རྩ་རྟ་མཐུར་གཏར། །གསུམ་པ་མཆེར་པའི་རླུང་དང་བཞི་བ་བད་ཀན་གཉིས་ཀ་ལ། །ཤིང་ཀུན་ཁ་རུ་ཚྭ་ཡི་བསྡུས་ཁུ་བཏང༌། །ད་ལིས་སུག་སྨེལ་ཤིང་ཚ་ཁ་རུ་ཚྭ། །ཟི་ར་ཚ་བ་སྒ་པི་ཕོ་གསུམ་དང་བུ་རམ་སྦྱར། །མཆེར་པའི་སྟེང་དང་བཅུ་གཅིག་པའི་དབུ་མ་དང་གཡས་གཡོན་དུ་མཚོན་རེ་རེ་སྟེ་ཁ་གསུམ་བསྲེག །ལྔ་བ་རླུགས་པའི་ནད་ལ་ཨ་ཤོ་གནྡྷ་དང༌། །རྒྱམ་ཚྭ་ཁ་རུ་ཚྭ་ཡི་ཕྱེ་མ་བཏང༌། །བསྲེག་པ་མཆེར་པའི་སྟེང་དང་བཅུ་གཅིག་ཁ་གསུམ་གོང་བཞིན་མཛོ་དང་རྟོལ་ཤ་བྱིན། །དབང་པོ་ལག་པ་གེ་སར་ནཱ་པད་པུ་རྣམ་པ་གསུམ། །བུ་རམ་སྦྱར་བས་མཆེར་པའི་ནད་ཀུན་སེལ། །ཞེས་གསུངས་སོ།།

བདུད་རྩི་སྙིང་པོ་ཡན་ལག་བརྒྱད་པ་གསང་བ་མན་ངག་གི་རྒྱུད་ལས་མཆེར་ནད་གསོ་བའི་ལེའུ་སྟེ་སོ་བདུན་པའོ།། །།

མཐའ་མའི་འདོན་ཐེངས་།: 20.02.2021 ཉིན། 12:22 PM