ལེའུ་སོ་གཅིག་པ། གཙོ་འཁོར་ལ་རྒྱུད་གཏད་པ་བསྟན་པ།

དེ་ནས་ཡང་གསོའ་(གསོ་)བ་རིག་པ་འཛིན་པ་དཔྱད་བུ་ཁྲི་ཤེས་ཀྱིས་གསོལ་པ། ཀྱེ་འཚོ་མཛད་སྨན་པའི་རྒྱལ་པོ་ཆེན་པོ་ལགས། ཕུན་སུམ་ཚོགས་པའི་གསོ་རྒྱུད་ཟབ་མོ་འདི།། སྟོན་ནས་(གནས་)ཡུལ་ལ་ཁྱེད་(ཁྱད་)པར་ཡོད་ལགས་སམ།། འདི་དོན་བཀྲོལ་ནས་བདག་ལ་བཤད་དུ་གསོལ།། དེ་སྐད་ཞུས་པས་སྟོན་པས་བཀའ་སྩལ་(བསྩལ་)པ།། རྒྱལ་པོའི་དཀོར་འདྲ་ཕུན་སུམ་ཚོགས་པ་སྟེ།། གསོའ་(གསོ་)བ་འདི་ཡིས་མི་འདུལ་གསོ་དཔྱད་མེད།། ཁོག་འབུམ་རྒྱ་ཆེན་ནམ་མཁའི་གཏོས་དང་འདྲ།། ཐམས་ཅད་གསལ་བ་མཁའ་ལ་ཉི་ཤར་འདྲ།། འདུ་བ་འཇོམས་པ་མེ་ལ་ཆུ་བཏབ་འདྲ།། སྡུག་བསྔལ་སེལ་བ་ཚངས་པའི་གླུ་དབྱངས་འདྲ།། སྒྲ་ཐོས་སྤྲོ་བ་ཁུ་བྱུག་གསུང་དབྱངས་འདྲ།། ཀུན་ལ་དཀོན་པ་ཨུད་པལ་(ཨུཏྤལ་)མེ་ཏོག་འདྲ།། རྒྱུད་འདིས་གསོའ་(གསོ་)རིག་གཞན་མ་ཟིལ་གནོན་པ།། ཉི་མ་ཤར་དང་སྐར་ཚོགས་ཟིལ་གནོན་འདྲ།། དུས་མིན་འཆི་བ་བཟློག་པའི་འཁོར་ལོ་འདི།། འཆི་བ་སྲོག་སྐྱོབ་བདུད་རྩིའི་བུམ་པ་འདྲ།། དཔྱད་བུ་ལ་སོགས་གསོའ་(གསོ་)བ་འཛིན་པ་ལ།། རྒྱུད་འདི་ངེས་གཏད་བསྟན་པ་ཁྱེད་ཅིས་(ཀྱིས་)ཟུང་(བཟུང་)།། ཁྱེད་ཀྱིས་གཞན་ལ་གཏེར་གཉེར་སྟོང་པ་ཡང་།། སངས་རྒྱས་བསྟན་པ་གཉེན་པོ་འཛིན་པ་དང་།། དཔོན་སློབ་དམ་ཚིག་སྲོག་ལྟར་བསྲུང་པ་དང་།། འབྱེད་པའི་ཤེས་མིག་ཉི་ལྟར་གསལ་བ་ལ།། བཏང་བཞག་ཐབས་ལ་སྲང་ལྟར་སྙོམས་པ་དང་།། གསོ་བ་རིག་པའི་རྒྱུད་ལ་མོས་པ་དང་།། གཞན་ཕན་སེམས་བསྐྱེད་ཅན་ལ་འདི་གཏད་གཅིག། རྒྱུད་འདིའི་ཡོན་ཏན་བསམ་ལས་འདས་མོད་ཀྱིས།། བསམ་འཕེལ་དབུལ་བ་སེལ་བའི་ནོར་བུ་འདྲ།། འདི་ཡིས་སྡུག་བསྔལ་ནད་རྣམས་སེལ་བར་བྱེད།། རྒྱུད་འདི་བྲིས་སམ་འཆང་ངམ་ཀློག་པ་དང་།། གནས་པའི་ཡུལ་དུ་འདུ་བའི་ནད་མི་ཚུགས།། ཞེས་གསུངས་སོ།།

བདུད་རྩི་སྨན་གྱི་མདོ་དགུ་ལས་སྡུག་བསྔལ་ཞི་བྱེད་གསོའ་(གསོ་)བ་སྨན་འབུམ་དཀར་པོ་ལས་གཙོ་འཁོར་ལ་བརྒྱུད་(རྒྱུད་)གཏད་པའི་ལེའུ་སྟེ་སུམ་ཅུ་སོ་གཅིག་པའོ།། །།

མཐའ་མའི་འདོན་ཐེངས་།: 05.08.2023 ཉིན། 10:12 AM