ལེའུ་རེ་དྲུག་པ། སུར་ཡའི་ནད་བཅོས་པ།

དེ་ནས་ཡང་དྲང་སྲོང་རིག་པའི་ཡེ་ཤེས་ཀྱིས་འདི་སྐད་ཅེས་གསུངས་སོ། །ཀྱེ་དྲང་སྲོང་ཆེན་པོ་ཉོན་ཅིག །སུར་ཡའི་ནད་ལ་གྱུར་ཚུལ་དབྱེ་བ་དང༌། །རྟགས་དང་བཅོས་ཐབས་རྣམ་པ་བཞི་ཡིས་བསྟན།།

གྱུར་ཚུལ་ཟས་སྤྱོད་རྐྱེན་གྱིས་ཁྲག་འཕེལ་དང༌། །མཚོན་ཁྲག་ལུས་དང་འགྲམས་ཁྲག་གཏར་མ་འཆུན། །རིམས་དུག་ཚ་བ་རྩར་བབས་མ་གཏར་བས། །ཁྲག་ངན་ཆུ་སེར་དོན་སྣོད་རྩ་མིག་འདུས། །སྐྲངས་ཤིང་བརྣགས་ན་འབྲས་ལྟར་འགྱུར་བ་ཡིན།།

དབྱེ་བ་གློ་མཆིན་མཁལ་མ་ཕོ་ལོང་ལྔ།།
དེ་རྟགས་གློ་བའི་སུར་ཡ་མཆན་འོག་སྐྲངས། །སྟོད་གཟེར་གློ་མང་མཆིན་པ་མཆིན་སྟེང་སྐྲངས། །སྟོད་གང་ཉལ་བ་མི་ཤེས་མཁལ་མ་ནི། །མཁལ་སྟེང་སྐྲངས་ཤིང་དྲི་ཆུ་སྲི་བ་ཡིན། །ཕོ་ལོང་སྦོ་འཁྲོག་བྱེད་ཅིང་སྟེང་དུ་སྐྲངས། །ཀུན་ཀྱང་སྨིན་ནས་རྣག་ཁྲག་ཤེ་རུལ་འཛག །སྐབས་སུ་གསོག་ཅིང་གློ་སློང་ལྡང་བར་བྱེད།།

བཅོས་ཐབས་འབྱེད་ཐང་བཏང་རྗེས་མང་དུ་གཏར། །དེ་འོག་ལྟོ་དང་རྩ་ནས་དག་པར་སྦྱང༌། །བྲག་ཞུན་འོམ་བུའི་ཁཎྜ་དམིགས་ལ་བྱུག །བདུད་རྩི་ལྔ་ཡི་ལུམས་ཀྱིས་སྐྲངས་པ་འདུལ། །ཡང་ན་མེ་ཏོག་སྣ་ཚོགས་ལུམས་སུ་གཞུག །མ་ཞི་འབམ་པོ་བྱ་བྲ་སྤྲུ་མ་ཡི། །ལུམས་ཀྱིས་རྣག་ཏུ་བཀུག་ལ་སྨིན་ནས་བརྟོལ། །སྦང་མའི་འཇིབས་བྱ་ཧྲེམ་ན་ལུམས་དང་སྤེལ། །རྣག་འབྱམས་དངུལ་ཆུའི་རིལ་བུས་སྐེམ་པ་དང༌། །གར་བབས་གནས་དང་སྦྱར་བའི་ཕྱེ་མ་སྦྱར། །འབའ་སམ་མར་ལ་རྭ་སྣ་མཁྲིས་སྣ་དང༌། །བཟང་དྲུག་སྦྲང་དང་སྦྱར་བས་སྐེམ་པར་བྱེད། །རྩ་སྒོ་རྨ་ཡི་སྟེང་དུ་མེ་བཙས་མནན། །ཞེས་གསུངས་སོ།།

བདུད་རྩི་སྙིང་པོ་ཡན་ལག་བརྒྱད་པ་གསང་བ་མན་ངག་གི་རྒྱུད་ལས་སུར་ཡའི་ནད་བཅོས་པའི་ལེའུ་སྟེ་དྲུག་ཅུ་རྩ་དྲུག་པའོ།། །།


 

མཐའ་མའི་འདོན་ཐེངས་།: 21.12.2022 ཉིན། 9:48 AM