དཔྱད་ལྔ་བྱུག་པ་རུང་བ་དང་མི་རུང་བ་དང༌། །བྱ་བའི་ཐབས་དང་ཕན་ཡོན་དང་རྣམ་པ་བཞི་ལས། །རུང་བ་ནི་ལུས་རྩུབ་པ་དང་ཁྲག་དང་ཁུ་བ་ཟད་པ་དང་། །ལུས་སྟོབས་ཆུང་བ་དང་རྒས་པ་དང་མྱ་ངན་དང་སེམས་ལས་ཆེ་བ་དང་། །མིག་འགྲིབ་པ་དང་གཉིད་མེད་པ་དང་འབད་རྩོལ་ཆེན་པོའི་བྱ་བས་ལུས་ངལ་ཞིང་དུབ་པ་དང༌། །ཁྱད་པར་རླུང་གི་ནད་ཀུན་ལ་སྣུམ་བྱུག་བསྟེན་པར་བྱ་བ་ཡིན། །ལྤགས་པའི་ནད་འབྲུམ་བུ་དང་ཐོར་པ་དང་སྐྲངས་པ་ལ་ལྡེ་གུ་བྱུག།

མི་རུང་བ་ནི་མ་ཞུ་བརླ་རེངས་དབྱིག་དུག་ཡི་ག་འཆུས། །དམུ་རྫིང་དང་བད་ཀན་སྨུག་པོའི་ནད་ལ་སྣུམ་བྱུག་སྤང༌།།

བྱུག་པ་བྱ་ཐབས་ལྟག་པའི་སྡུད་སྒོ་དང་ཚིགས་པ་དྲུག་པ་དང་བདུན་པ་རྐང་ལག་གི་མཐིལ་བཞི་ལ། །མིའི་ཚིལ་དང་རྐང་སོགས་ཞུན་ཆེན་བྱུགས་ལ་རུས་ཞུན་བཟོ་ཚུལ་ནི། ས་དོན་བྲུས་པའི་ནང་དུ་ཞུན་འཛེད་སྣོད་ཀྱི་རྫ་མ་ཁ་གྱེན་ལ་བཅུག རྫ་གཞན་ཞིག་གི་མཐིལ་དུ་ཞུན་འཛག་པའི་བུག་པ་བྱ་མིག་ཙམ་མང་དུ་བྱས་པའི་ནང་དུ་རུས་རྙིང་ཚོན་པོ་ཁྲམ་ཁྲུམ་བརྡུངས་པ་བླུག་ལ་ཁ་དམ་པར་བཅད། འཛེད་སྣོད་ལ་ས་འོག་དང་རུས་པའི་སྣོད་ས་སྟེང་དུ་འོང་བར་བྱས་ཏེ། སླ་གཉིས་བརྩིགས་ལ་བར་མཚམས་འདགས་པས་བཅད་དེ་ཕྱོགས་ཀུན་ནས་མེ་ཆུང་ཡུན་སྲིངས་ལ་བཏང་བས་རུས་ཞུན་འབྱུང་བར་འགྱུར་རོ། །ཚུལ་འདི་ཙན་དན་མར་ཁུ་དང་། བདུད་རྩིའི་མར་ཁུ་དང་། བཅུད་བསྡུད་མར་ཁུ་རྣམས་ཀྱང་གྲུབ་པ་ཡིན་ནོ། །མཉེ་ཞིང་སྐམས་ནས་ཕྱེ་ཡིས་དྲིལ་ཕྱིས་བྱ། །དེས་ནི་སྙིང་རླུང་དང་འདྲེ་ཆགས་པ་དང་འབྲས་ནད་འཇོམས་པར་བྱེད། །བསྐུ་མཉེ་ཀུན་ལ་བྱུག་མཉེ་དྲིལ་ཕྱིས་གསུམ་ཀ་དེ་ལྟར་ཤེས་པར་གྱིས་ཤིག། ཡུངས་དཀར་སོགས་འབྲུ་མར་གྱི་བྱུག་པ་དེ་བཞིན་གཉིད་མེད་པ་དང་རླུང་ནད་རྣམས་འཇོམས། །ཡང་བློ་རྣོ་བ་དང་དྲན་པ་གསལ་བར་འདོད་པ་ལ་རྩི་མར་གསར་འཇམ་བཞུས་པའི་ཞུན་མར་བྱུག །སྨྱོ་བ་དང་འབོག་པ་དང་བརྒྱལ་བའི་ནད་ལ་ལོ་ལོན་པའི་མར་རྙིང་པའི་ཞུན་བྱུག །ཆུ་སེར་དང་ཟ་འཕྲུག་ལ་རྟ་དང་རྐྱང་དང་བོང་བུའི་ཚིལ་ལུ་བྱུག །མཁལ་མ་གུད་ཅིང་ཉམ་ཆུང་བ་དང་ས་བོན་འཛག་པ་ལ། །སྲམ་མམ་ད་བྱིད་ཀྱི་ཚིལ་བུས་རྐེད་པའི་ཚིགས་ལ་བྱུག །ཤིག་དང་སྲོ་མང་པ་ལ་ཤ་བའི་ཚིལ་བུ་བྱུག །ཁྱིས་རྨུགས་ནས་རྨ་རེད་པ་ནད་གཞན་དང་བསྡོངས་པ་ལ་ཁྱི་ཡི་ཚིལ་བུ་བྱུག །གླང་ཤུ་ལ་ཕག་པའི་ཚིལ་དང་མུ་ཟི་ནག་པོ་བྱུག །གདོང་པའི་འབྲུམ་བུའི་ཤུལ་མེད་པར་བྱེད་ན་ར་ཚིལ་ཞུན་དང་འབྲི་མོག་བྱུག །ཤུ་བ་དང་རྨ་རྒན་ལ་ཙན་དན་ཉག་རོང་ཙན་དན་དང་སྒྲོན་ཤིང་དང་ཤུག་པ་ལ་གོང་བཤད་བཞིན་བཟོས་པ་མར་ཁུ་བྱུག །མིག་འགྲིབ་པ་ལ་བྱ་རྒོད་དང་ཕག་པའི་ཚིལ་བུ་འམ། །འབྲི་མར་དང་གོ་སྙོད་སྦྱར་བས་རྐང་མཐིལ་བྱུག །ཡན་ལག་བརྒྱད་པར་། རྐང་པའི་རིམ་གྲོ་བྱ་ཞེས་གསུངས་པ་རྐང་མཐིལ་དུ་བསྐུ་མཉེ་བྱ་ཞིང་རྐང་རྗེན་མི་བྱ་་བ་སོགས་མན་ངག་རྒྱུད་ནས་གསུངས་པ་ལྟར་ཡིན་ནོ། །རླུང་ནད་རུས་པར་ཞུགས་པས་རུས་པའི་གཏིང་ནས་ལྷང་ལྷང་ན་བ་ལ། །བཅའ་སྒ་དང་འབྲུ་མར་སྦྱར་བའི་བྱུག་པ་བྱ། །གཉིད་མེད་ན་གླ་རྩི་དང་མར་དཀར་སྦྱར་བས་མགོ་དང་ལུས་ཀུན་ལ་བྱུག།

ཡང་ལྡེ་གུའི་བྱུག་པ་ནི་མུ་ཟི་སེར་པོ་ར་དུག་པ་ནག་པོ་དང་མི་དང་ཁྱིའི་བྲུན། །ཤུ་དག་ནག་པི་རྭ་གང་འབྱུང་གི་གཞོབ་དྲི་ཆུས་དང་སྦྱར་བས་ལྷོག་པ་འཇོམས། །མུ་ཟི་སེར་པོ་དང་ལན་ཚྭ་ཕབས་དུ་བ་རལ་པ་རྣམས་མར་རྙིང་དང་སྦྱར་བའི། །ལྡེ་གུ་བྱུགས་ནས་ཉི་མར་བསྲེགས་ན་ཤུ་བ་གསར་རྙིང་ཐམས་ཅད་སེལ་བར་བྱེད། །བྱི་བའི་བྲུན་དང་གསེར་རྡོ་མཐིང་ཆགས་པས་རྡོ་ཡིན་མིའི་ནུ་ཞོས་རྣག་སྣ་འདྲེན། །རྣག་མེད་པར་སྐྲངས་པ་དང་དེའི་ཟུག་གཟེར་ཡང་གཅོག་པར་བྱེད། །སྲད་དཀར་ཐལ་བ་རྟ་དང་བོང་བོའི་འོ་མ་སྦྱར་བས། །རྨ་རྒན་དང་རྣག་འཛག་པ་དང་འབྲས་ཐབས་སུ་སོང་བ་སོགས་སེལ། །ཏིལ་དཀར་ནག་གི་ཕྱེ་མ་ཆུར་ཁུར་བཏབ་བསྐོལ་བ་བྱུགས་པས་དྲེག་ནད་སེལ། །ཤུ་དག་ནག་པོ་དང་རྒྱའི་སོ་མ་ར་ཛ་འབྲས་བུ་ཨ་བར་སྐྱུར་གསུམ། །སླེ་ཏྲེས་དང་བའི་ལྕིས་སྨྱག་ཀོ་མོག་བསྐམས་ཤུལ་གྱི་ས་རྩི་མོ་ཡིས་ཚ་བས་སྐྲངས་པ་སེལ། །ཁང་པར་ཆགས་པའི་དུད་པ་ཡུང་བ་སེར་པོ་སྐྱེར་པ་རུ་རྟ་དུག་མོ་ཉུང༌། །དར་བ་དང་སྦྱར་བས་ཤུ་ཐོར་དང་ཁྱེ་མ་དང་ལྤགས་པའི་ནད་ཐམས་ཅད་སེལ། །ཡུངས་ཀར་ཤུ་དག་ནག་པོ་རྒྱམ་ཚྭ་སེང་ཕྲོམ་སྤྱིར་ཞུར་གྱིས་ཕྱེ་མ་ཆུར་སྦྱར་ནས། །གདོང་བྱུག་ན་ངོ་ཁབས་དང་ཁྱེ་མ་དང་འབྲུམ་ཐོར་ཐམས་ཅད་སེལ། །འོམ་བུ་ཨ་རུ་ར་དང་དྲི་ཆུ་སྦྱར་བའི་བྱུག་པས། །དུག་ནད་ལས་གྱུར་པའི་ཡན་ལག་སྐྲངས་པ་སེལ་བར་བྱེད། །ཙན་དན་དཀར་དམར་ཀྱི་ལྕེ་ཧོང་ལེན་གངས་ཆུ་སྦྱར། །ཁྲག་གཟེར་དང་ལྤགས་ནད་ཀྱི་རིགས་ཚ་བ་དང་གཉན་མེ་དབལ་སེལ། །སྐྱུ་རུ་ཨུཏྤལ་སྔོན་པོ་མར་གསར་ལུས་ཀུན་བྱུག །ལུས་རྔུལ་བ་མི་སྐམས་པར་འབྱམས་པ་དང་རིམས་ནད་དང་ཚ་བ་ཕྱི་ཤོར་བ་སེལ། །ཁང་པར་ཆགས་པའི་དུད་པ་རུ་རྟ་ཆུ་རྩ་རེ་ལྕག་རྣམས་ཀྱི་ཐལ་བ་དང་། །ལན་ཚྭ་དང་ཆང་གི་ཕབས་ཟོ་མར་སྦྱར་བས་ཀོང་(སྐོགས་)ཤུ་དང་ཟ་འཕྲུག་སེལ། །སྦྲུལ་ནག་ལྷོ་མོན་ནས་བྱུང་བ་བཟང་བོད་ཀྱི་འདིས་དུག་འདོན་མཁས་ན་ཚབས་རུང་པགས་པ་དུ་བ་མ་ཤོར་བསྲེགས་པ། །ཕག་ཚིལ་དང་སྦྱར་ལ་བྱུགས་ན་ཤ་བཀྲ་དང་བས་ལྡགས་སེལ། །ཤོག་ཤིང་སྔོན་བུ་སྲུབ་ཀ་ཞོ་དང་སྦྱར་བས་ཟ་འཕྲུག་སེལ།། དེ་ལྟར་བྱུག་པའི་ཕན་ཡོན་ནི་ཚེ་རིང་བ་ང་དབང་པོ་གསལ་བར་བྱེད་པ་ཡིན་ནོ། །ཞེས་གསུངས་སོ།།

བདུད་རྩི་སྙིང་པོ་ཡན་ལག་བརྒྱད་པ་གསང་བ་མན་ངག་གི་རྒྱུད་ལས་དཔྱད་ལྔ་བྱུག་པའི་ལེའུ་སྟེ་ཉི་ཤུ་རྩ་བཞི་པའོ།།  །།

མཐའ་མའི་འདོན་ཐེངས་།: 23.02.2021 ཉིན། 4:21 PM