ལེའུ་དྲུག་པ། ལུས་ཀྱི་ལས་དང་དབྱེ་བ་བསྟན་པ།

དེ་ནས་ཡང་དྲང་སྲོང་རིག་པའི་ཡེ་ཤེས་ཀྱིས་འདི་སྐད་ཅེས་གསུངས་སོ། །ཀྱེ་དྲང་སྲོང་ཆེན་པོ་ཉོན་ཅིག །ལུས་ཀྱི་ལས་ནི་ཐམས་ཅད་དུ་ལུས་ངག་ཡིད་དང་གསུམ། །དགེ་དང་མི་དགེ་དགེ་སྡིག་གཉིས་ཀར་ལུང་མ་བསྟན་པ་ལ་སྤྱོད་པར་བྱེད་། །བྱེ་བྲག་དུ་དབང་པོ་ལྔ་ཡིས་རང་གི་ཡུལ་གཟུགས་སོགས་འཛིན། །

ལུས་ཀྱི་དབྱེ་བ་རྟེན་དང་ན་ཚོད་དང༌། རང་བཞིན་དང་ནད་ཀྱི་སྒོ་ནས་དབྱེ་བ་བཞི། །དང་པོ་རྟེན་གྱིས་དབྱེ་ན་ཕོ་མོ་མ་ནིང་གསུམ། །

གཉིས་པ་ན་ཚོད་དབྱེ་བ་སྐྱེས་ནས་ལོ་བཅུ་དྲུག་བར་བྱིས་པ། །དེ་ལས་ལུས་ཟུངས་དབང་པོ་གཟི་མདངས་སྟོབས། །འཕེལ་བར་འགྱུར་བ་ལོ་བདུན་ཅུའི་བར་དུ་དར་མ་སྟེ། །ལོ་དོན་ཅིག་དེ་ལས་སྟོབས་སོགས་ཟད་པས་ཕན་ཆད་རྒན་པོ་ཡིན། །

གསུམ་པ་རང་བཞིན་རྐྱང་པ་དང་ལྡན་པ་དང་འདུས་པ་དང་བདུན། །དེ་ལ་རླུང་གིས་བསྐྱེད་པའི་མི་རྣམས་ནི། །དབྱིབས་སྒུར་ཤ་སྐེམ་མདོག་སྔོ་སྨྲ་བ་མང༌། །གྲང་ལྷགས་མི་བཟོད་འགྲོ་ཚེ་སྒྲ་དང་བཅས། །ནོར་ཆུང་ཚེ་ཐུང་གཉིད་སྲབ་ལུས་བོངས་ཆུང༌། །གླུ་དང་དགོད་དང་འཐབ་མོ་མདའ་ལ་དགའ། །མངར་སྐྱུར་ཁ་ཚའི་རོ་ལ་སྲེད་པ་སྟེ། །བྱ་རྒོད་ཁྭ་ཝའི་མཚན་ཉིད་ལྡན་པ་ཡིན། །

མཁྲིས་པའི་རང་བཞིན་སྐོམ་དད་བཀྲེས་ཤས་ཆེ། །སྐྲ་ལུས་མདོག་སེར་བློ་རྣོ་ང་རྒྱལ་ཆེ། །རྔུལ་ཆེ་དྲི་ང་ཚེ་ནོར་ལུས་བོངས་འབྲིང༌། །མངར་ཁ་བསྐ་བསིལ་ཟས་ལ་སྲེད་པ་སྟེ། །སྟག་སྤྲེ་གནོད་སྦྱིན་མཚན་ཉིད་ལྡན་པ་ཡིན། །

བད་ཀན་རང་བཞིན་ཅན་ནི་ལུས་བསིལ་ཞིང༌། །རུས་ཚིགས་མི་མངོན་ཤ་རྒྱས་ཁ་དོག་དཀར། །དབྱིབས་དགྱེ་བཀྲེས་སྐོམ་ཉོན་མོངས་ཐན་པ་བཟོད། །ལུས་ཚོ་ཚེ་རིང་ནོར་མང་གཉིད་མཐུག་ཅིང༌། །ཞེ་སྡང་འདམ་རིང་རང་བཞིན་ངང་རྒྱུད་བཟང༌། །ཚ་སྐྱུར་བསྐ་རྩུབ་ཟས་ལ་སྲེད་པ་སྟེ། །སེང་གེ་ཁྱུ་མཆོག་མཚན་ཉིད་ལྡན་པ་ཡིན། །ལྡན་དང་འདུས་པ་འདྲེས་ལས་ཤེས་པར་བྱ། །

བཞི་པ་ནད་ཀྱིས་དབྱེ་བ་རྣམ་པར་མ་གྱུར་པ་དང་གྱུར་པ་གཉིས་ལས། །རྣམ་པར་མ་གྱུར་པ་ལུས་རང་བཞིན་དུ་གནས་པ་ཐ་མལ་པ་ལ་སྟེ། །ནད་མེད་གནས་དང་རིང་དུ་འཚོ་བར་བྱ། །རྣམ་པར་གྱུར་པ་ནད་ཀྱིས་བཅོམ་པའི་ལུས་དེ་ལ་ཟས་སྤྱོད་སྨན་དཔྱད་སོགས་ཀྱིས་གསོ་བར་བྱའོ། །ཞེས་གསུངས་སོ། །

བདུད་རྩི་སྙིང་པོ་ཡན་ལག་བརྒྱད་པ་གསང་བ་མན་ངག་གི་རྒྱུད་ལས་ལུས་ཀྱི་ལས་དང་དབྱེ་བ་བསྟན་པའི་ལེའུ་སྟེ་དྲུག་པའོ།། །།

མཐའ་མའི་འདོན་ཐེངས་།: 28.05.2019 ཉིན། 11:38 AM