ལེའུ་དྲུག་པ། དཔེ་དོན་རྣམ་གྲངས་རྣམ་པར་བཀོད་པ།

 དེ་ནས་ཡང་དྲང་སྲོང་རིག་པའི་ཡེ་ཤེས་ཀྱིས་འདི་སྐད་ཅེས་གསུངས་སོ། །ཀྱེ་དྲང་སྲོང་ཆེན་པོ་ཉོན་ཅིག །

དང་པོ། གནས་ལུགས་ནད་གཞི་དང་དེ་དག་ངོས་འཛིན་པ་དང་གསོ་བའི་ཚུལ་བཅས་རྩ་བ་གསུམ་ལ། །

གཉིས་པ། རྩ་བ་དང་པོ་ལའང་རྣམ་པར་གྱུར་བ་དང་མ་གྱུར་པ་སྟེ་སྡོང་པོ་གཉིས། རྩ་བ་གཉིས་པ་ལ་བལྟ་བ་དང་རེག་པ་དང་དྲི་བའི་སྡོང་པོ་གསུམ་དང༌། །རྩ་བ་གསུམ་ལའང་ཟས་དང་སྤྱོད་ལམ་དང་སྨན་དང་དཔྱད་བཅས་བཞི། དེ་རྣམ་དྲིལ་བས་སྡོང་པོ་དགུ་རུ་འདྲིལ། །

གསུམ་པ། ཡལ་གར་རྣམ་པར་མ་གྱུར་པ་ལུས་ལ་ནད་དང་། ལུས་ཟུངས་དང་དྲི་མའི་ཡལ་ག་གསུམ། །རྣམ་པར་གྱུར་བ་ནད་ལ་རྒྱུ་དང་རྐྱེན་དང་འཇུག་སྒོ་དང་གནས་དང་ལམ་དང་། །ལྡང་དུས་དང་འབྲས་བུ་དང་ལྡོག་རྒྱུ་དང་མདོ་དོན་རྣམས་ཀྱི་ཡལ་ག་དགུ། །

རྩ་བ་གཉིས་པར་བརྟག་པར་སྡོང་པོ་གསུམ། བལྟ་བ་ལ་ལྕེ་དང་ཆུ་གཉིས་ལ་བལྟ་བ་རེག་པ་རྩ་ལ་བལྟ་བ་རླུང་དང་། མཁྲིས་པ། བད་ཀན་གསུམ། །དྲི་བ་ལ་སློང་རྐྱེན་དང་ན་ལུགས་དང་གོམས་པ་དང་གསུམ། །རླུང་མཁྲིས་བད་ཀན་གསུམ་པོའི་ཟས་ལ་ཟས་གསུམ་སྐོམ་གསུམ་དྲུག་སྟེ་དེ་གསུམ་ཀའི་སྤྱོད་ལམ་གསུམ། །རླུང་མཁྲིས་བད་ཀན་གསུམ་གྱི་སྨན་ལ་རོ་དང་ནུས་པ་གཉིས་གཉིས་ཏེ་དྲུག །རོ་ནུས་དེ་དག་སྦྱར་ཐབས་ཞི་བྱེད་རྐྱང་པ་དྲུག་དང་སྦྱོང་བྱེད་རེ་རེ་སྟེ་གསུམ། །དཔྱད་གསུམ་རྣམས་དྲིལ་བས་ཡལ་ག་བཞི་བཅུ་རྩ་བདུན་གྱེས་པ་ཡིན། །

བཞི་པ། རྒྱས་པའི་ལོ་འདབ་དང་པོ་རྣམ་པ་མ་འགྱུར་བའི་སྡོང་པོར་ལོ་འདབ་ཉི་ཤུ་ལྔ། །སྡོང་པོ་གཉིས་པ་རྣམ་པར་གྱུར་བའི་ལོ་འདབ་ནད་ཀྱི་ཟིན་ཏིག་དྲུག་ཅུ་རྩ་གསུམ་དང༌། །སྡོང་པོ་གསུམ་པར་བལྟ་བ་ལོ་འདབ་དྲུག་དང་། སྡོང་པོ་བཞི་པར་རེག་པའི་རྩ་རྒྱུད་ལ་ལོ་འདབ་གསུམ་དང་། །སྡོང་པོ་ལྔ་པར་དྲི་བ་ཡི་ལོ་འདབ་ཉེར་དགུ སྡོང་པོ་དྲུག་པར་རླུང་གི་ཟས་སྐོམ་ལོ་འདབ་བཅུ་བཞི་དང༌། །མཁྲིས་པའི་ཟས་སྐོམ་ལོ་འདབ་བཅུ་གཉིས་དང་བད་ཀན་གྱི་ཟས་སྐོམ་ལོ་འདབ་དགུ། །སྡོང་པོ་བདུན་པར་སྤྱོད་ལམ་ལ་ལོ་འདབ་དྲུག་དང་སྡོང་པོ་བརྒྱད་པར་སྨན་གྱི་རོ་ལ་ལོ་འདབ་དགུ་དང་ནུས་པ་ལ་དགུ། །ཁུ་བ་ལ་ལོ་འདབ་གསུམ་དང་སྨན་མར་ལ་ལོ་འདབ་རྣམ་པ་ལྔ། །ཐང་དང་ཕྱེ་མ་ལ་ལོ་འདབ་བཞི་བཞི་སྟེ་བརྒྱད་དང་རིལ་བུ་ལ་ལོ་འདབ་རྣམ་པ་གཉིས། །ཏྲེས་སམ་ལ་ལོ་འདབ་ལྔ་དང་སྦྱོང་བྱེད་ལ་མི་འདའི་བཅོས་ཐབས་དགུ་སྟེ་དྲིལ་བས་སྨན་ལ་ལོ་འདབ་ལྔ་བཅུ། །དཔྱད་སྡེ་བདུན་དང་བཅས་ཏེ་དེ་ཡང་གནས་ལུགས་ནད་ནད་གཞི་ལ་ལོ་འདབ་བརྒྱད་ཅུ་བརྒྱད་ཡོད་དོ། །ལོ་འདབ་གཞན་ཡང་སུམ་ཅུ་རྩ་བརྒྱད་པ་ནི་ངོས་བཟུང་བརྟག་པ་སྟེ། །བཅོས་པའི་ཐབས་ཀྱི་རྩ་བ་ལ་ཟས་སྤྱོད་སྨན་དཔྱད་སོགས་དགུ་བཅུ་རྩ་བརྒྱད་དོ། །དེ་གསུམ་ག་སྤྱིར་སྡོམས་པས་ལོ་འདབ་ཉིས་བརྒྱ་དང་ཉི་ཤུ་རྩ་བཞིར་རྒྱས་པ་ཡིན། །

ལྔ་པ་ནི། མེ་ཏོག་ལ་གཉིས་ཏེ་ནད་མེད་པ་དང་ཚེ་རིང་བ་གཉིས་རབ་ཏུ་གསལ་གསལ་བར་འཆར་བ་ལ། །དྲུག་པ། འབྲས་བུ་ནི་ལྷ་དང་མིའི་ཆོས་ལུགས་དང་འཕགས་པའི་ནོར་བདུན་དང་། ཚེ་འདི་དང་ཕྱི་མར་བདེ་བ་དང་གསུམ་དུ་སྨིན། །

དེ་ལྟར་དཔེ་དང་དོན་སྦྱར་ཏེ་རྣམ་གྲངས་བཀོད་པ་ཡི། །འོ་མ་ལས་སྙིང་པོ་མར་ལྟ་བུར་གསོ་དཔྱད་ཐམས་ཅད་ཀྱི་སྙིང་པོ་བསྡུས་པའི་རྩ་རྒྱུད་འདི་ནི། ཤེས་རབ་ཆེ་ཞིང་བློ་གྲོས་དང་ལྡན་འགའ་ཡི་སྤྱོད་ཡུལ་ལས། །གཞན་དག་བློ་རྨོངས་པའི་སྐྱེ་བོ་རྣམས་ཀྱིས་ནི་འདི་ཉིད་ཚིག་དོན་རྟོགས་པར་མི་འགྱུར་རོ། །སྤྲོས་པར་དགའ་ན་རྒྱ་ཆེན་པོའི་གཞུང་གཞན་བཤད་རྒྱུད་དང་མན་རྒྱུད་ཕྱི་རྒྱུད་གསུམ་དུ་བལྟ་བར་གྱིས་ཤིག་ཅེས་གདམས་པའོ། །ཞེས་གསུངས་ནས་དྲང་སྲོང་རིག་པའི་ཡེ་ཤེས་དེ་སྨན་པའི་རྒྱལ་པོའི་ཐུགས་ཀར་ཐིམ་པར་གྱུར་ཏོ། །

བདུད་རྩི་སྙིང་པོ་ཡན་ལག་བརྒྱད་པ་གསང་བ་མན་ངག་གི་རྒྱུད་ལས་དཔེ་དོན་གྱི་རྣམ་གྲངས་རྣམ་པར་བཀོད་པའི་ལེའུ་སྟེ་དྲུག་པའོ། །

བདུད་རྩི་སྙིང་པོ་ཡན་ལག་བརྒྱད་པ་གསང་བ་མན་ངག་གི་རྒྱུད་ལས་རྩ་བའི་རྒྱུད་ཅེས་བྱ་བའི་མཆན་བུ་མདོར་བསྡུས་འདི་ཉིད་༸འབྲི་གུང་ཆོས་ཀྱི་གྲགས་པས་བཏབ་པ་རྫོགས་སོ།། །།

ཡར་རྒྱབ་ཆོས་ཀྱི་རྒྱལ་པོའི་རྒྱལ་རྔ་དེ། །

བློ་གྲོས་རྒྱལ་པོའི་དབྱུག་གུས་བསྐུལ་བའི་ཚེ། །

གསོ་རིག་བསྟན་པའི་ལོ་ཐོག་རྒྱས་བྱེད་པའི། །

མི་ཟད་ཆོས་ཀྱི་ཆར་པ་འདི་ཕབ་བོ། །མངྒལཾ།། །།

མཐའ་མའི་འདོན་ཐེངས་།: 28.05.2019 ཉིན། 11:11 AM