ལེའུ་བཞི་པ། མེ་དང་དུ་བའི་ཚུལ་དུ་གནས་པ་ངོས་འཛིན་རྟགས་ཀྱི་དོན་བསྟན་པ།

 དེ་ནས་ཡང་དྲང་སྲོང་རིག་པའི་ཡེ་ཤེས་ཀྱིས་འདི་སྐད་ཅེས་གསུངས་སོ། །ཀྱེ་དྲང་སྲོང་ཆེན་པོ་ཉོན་ཅིག །

ནད་ལ་བལྟ་བ་དང་རེག་པ་དང་དྲི་བས་ཡོངས་སུ་ཤེས་པར་བྱ་སྟེ་དེ་ཡང་བལྟ་བ་ནི། །མིག་གིས་བལྟ་བ་སྟེ་གང་ལ་བལྟ་ན་་ལྕེ་དང་ཆུ་ལ་བལྟས་ནས་བརྟག །བརྟག་པ་འདི་ནི་སྨན་པའི་མིག་གི་མཐོང་བ་ཡུལ་རིག་པ་ཡིན་ནོ། །སོར་མོས་རེག་པ་ནད་གང་ཡིན་གྱི་བརྡ་སྦྱོར་བའི་འཕྲིན་པ་ལྟ་བུ་ནི་རྩ་ལ་བལྟ་བ་སྟེ། བརྟག་པ་འདི་ནི་སྨན་པ་རྣམ་དཔྱོད་དང་ལྡན་པ་དག་གི་དོན་རིག་པ་ཡིན་ནོ། །ངག་གིས་དྲི་བ་ནི་ནད་སློང་བའི་རྐྱེན་གང་གིས་བྱས་ད་ལྟ་ན་ལུགས་ཅི་ལྟར་འདུག་ཟས་གང་ཕན་གང་གནོད་དྲི་བ་སྟེ། །བརྟག་པ་འདི་ནི་སྨན་པའི་རྣ་བས་ཐོས་པ་སྒྲ་རིག་ཡིན། །

དེ་དག་རྒྱས་པར་དབྱེ་ན་ལྕེ་ལ་བརྟག་པ་ནི། རླུང་གི་ལྕེ་ནི་དམར་ཞིང་སྐམ་ལ་རྩུབ། །མཁྲིས་པའི་ལྕེ་ནི་བད་ཀན་སྐྱ་སེར་མཐུག་པོས་གཡོགས། །བད་ཀན་ལྕེ་ནི་སྐྱ་གླེག་མདངས་མེད་འཇམ་ལ་རློན། །

ཆུ་ལ་བརྟག་པ་ནི། རླུང་གི་ཆུ་ནི་ཆུ་འདྲ་ལྦུ་བ་ཆེ། །མཁྲིས་པའི་ཆུ་ནི་དམར་སེར་རླངས་ཆེ་དྲི་མ་དུགས། །བད་ཀན་གྱི་ཆུ་ནི་དཀར་ལ་དྲི་རླངས་ཆུང༌། །

རྩ་ལ་བརྟག་པ་ནི། རླུང་གི་རྩ་ནི་རྐྱལ་སྟོང་སྐབས་སུ་སྡོད། །མཁྲིས་པའི་རྩ་ནི་མགྱོགས་རྒྱས་གྲིམས་པར་འཕར། །བད་ཀན་རྩ་ནི་བྱིང་རྒུད་དལ་བའོ། །

ངག་གི་དྲི་བ་ནི། དྲི་བ་ཡང་ལ་རྩུབ་པའི་ཟས་སྤྱོད་ཀྱི། །རྐྱེན་གྱིས་གཡལ་འདར་བྱ་རྨྱང་གྲང་ཤུམ་བྱེད། །དཔྱི་དང་རྐེད་པ་རུས་ཚིགས་མ་ལུས་ན། །གཟེར་བ་ངེས་མེད་འཕོ་ཞིང་སྟོངས་སྐྱུགས་བྱེད། །དབང་པོ་མི་གསལ་ཤེས་པ་འཚུབ་པ་དང་། །བཀྲེས་དུས་ན་ཞིང་སྣུམ་བཅུད་ཕན་པར་ངེས། །རྣོ་ཞིང་ཚ་བའི་ཟས་དང་སྤྱོད་ལམ་གྱིས། །ཁ་ཁ་མགོ་ན་ཤ་དྲོད་ཚ་བ་དང༌། །སྟོད་གཟེར་ཞུ་རྗེས་ན་ཞིང་བསིལ་བ་ཕན། །ལྕི་ལ་སྣུམ་པའི་ཟས་དང་སྤྱོད་ལམ་གྱིས། །དང་ག་མི་བདེ་ཁ་ཟས་འཇུ་བ་དཀའ། །སྐྱུག་ཅིང་ཁ་མངལ་ཕོ་བ་འཚིང་སྟེ་སྒྲེག །ལུས་སེམས་ལྕི་ལ་ཕྱི་ནང་གཉིས་ཀ་གྲང༌། །ཟོས་རྗེས་མི་བདེ་ཟས་སྤྱོད་དྲོ་ན་འཕྲོད། །དེ་ལྟར་བརྟག་ཐབས་སུམ་ཅུ་རྩ་བརྒྱད་ཀྱིས། །ནད་ཀུན་འཁྲུལ་མེད་ངེས་པར་གཏན་ལ་འབེབས། །ཞེས་གསུངས་སོ། །

བདུད་རྩི་སྙིང་པོ་ཡན་ལག་བརྒྱད་པ་གསང་བ་མན་ངག་གི་རྒྱུད་ལས་ངོས་འཛིན་རྟགས་ཀྱི་ལེའུ་སྟེ་བཞི་པའོ།། །།

མཐའ་མའི་འདོན་ཐེངས་།: 28.05.2019 ཉིན། 11:10 AM