༄༅། །བདུད་རྩི་སྙིང་པོ་ཡན་ལག་བརྒྱད་པ་གསང་བ་མན་ངག་གི་རྒྱུད་ལས་དཔལ་ལྡན་
བཤད་པའི་རྒྱུད་ཀྱི་བཀའ་མཆན་ཐེམ་སྤང་མ་
ཞེས་བྱ་བ་བཞུགས་སོ།།

ལེའུ་སོ་གཅིག་བཤད་པའི་རྒྱུད་ཀྱི་བཀའ་གནད་མཆན་བུ་གསལ་བར་བྱས་པའོ།།

 ལེའུ་དང་པོ། བཤད་རྒྱུད་ཀྱི་བསྡོམ་ཚིག་བསྟན་པ། 

༄༅། །དེ་ནས་ཞེས་པ་ཇི་སྐད་དུ། ཡི་གེ་ཨོཾ་དང་དེ་ནས་སྒྲ། གཉིས་པོ་འདི་དག་སྔོན་ཚངས་པའི། མཁུར་ཚོས་བརྟོལ་ཏེ་མངོན་པར་ཕྱུང་། དེ་ན་འདི་གཉིས་བཀྲ་ཤིས་ཡིན། ཞེས་ཐོག་མར་བཀྲ་ཤིས་པའི་དོན་དུ་དེ་ནས་ཞེས་དང་། རྩ་རྒྱུད་གསུངས་པའི་འཇུག་ཐོག་དེ་མ་ཐག་པ་དེ་ནས་ཞེས་མཚམས་སྦྱོར་རོ། སྟོན་པ་སྤྲོས་པའི་མཐའ་བཅོམ་ཡང་དག་པའི་དོན་དང་ལྡན་མཚན་མ་ལས་འདས་སེམས་ཅན་ཐམས་ཅད་ཚེ་རིང་པོར་འཚོ་བར་མཛད་པའི་སྨན་གྱི་བླ་མ་བཻཌཱུརྱ་འོད་ཀྱི་རྒྱལ་པོ་དེས་ཏིང་ངེ་འཛིན་དེ་སྔ་མ་དེ་ལས་བཞེངས་ཏེ། ཚིག་དོན་ཕུན་སུམ་ཚོགས་པར་སྨྲ་བའི་སྟོབས་དང་ལྡན་ཞིང་རི་དྭགས་གཞན་འཇོམས་པའི་སེང་གེ་ལྟ་བུ་ཞེས་བྱ་བའི་སྨན་གྱི་ཏིང་ངེ་འཛིན་ལ་སྙོམས་པར་ཞུགས་སོ། །སྙོམས་པར་ཞུགས་མ་ཐག་ཏུ་དབུའི་གཙུག་ནས་འོད་ཟེར་ཁ་དོག་བརྒྱ་སྟོང་དུ་མ་ཕྱོགས་བཅུར་འཕྲོས་པས་ཕྱོགས་བཅུའི་འགྲོ་བ་སེམས་ཅན་ཐམས་ཅད་ཀྱི་ལུས་ཀྱི་ཉེས་པའི་སྐྱོན་བསལ། རླུང་མཁྲིས་བད་ཀན་གྱི་ནད་ཐམས་ཅད་ཞི་བར་བྱས་ནས་སླར་དབུའི་གཙུག་ཏུ་འདུས་པ་ལས། སྤྲུལ་པའི་སྟོན་པ་དྲང་སྲོང་རིག་པའི་ཡེ་ཤེས་ཞེས་བྱ་བ་ཞིག་སྐུ་ལས་སྤྲུལ་ཏེ་མདུན་གྱི་བར་སྣང་ལ་བཞུགས་པ་ལས། །

གསུང་ལས་སྤྲུལ་པའི་དྲང་སྲོང་ཡིད་ལས་སྐྱེས་ཞེས་བྱ་བ་དེས་སྟོན་པ་ལ་ཕྱག་དང་སྐོར་བ་བྱས་ནས་འདི་སྐད་ཅེས་ཞུས་སོ། །ཀྱེ་སྟོན་པ་དྲང་སྲོང་རིག་པའི་ཡེ་ཤེས་ལགས། །བསྡུས་དོན་རྩ་རྒྱུད་དེ་ལྟར་གསུངས་ལགས་ན། །བཤད་པའི་རྒྱུད་ལ་ཇི་ལྟར་བསླབ་པར་བགྱི། །འཚོ་མཛད་སྨན༌པའི་རྒྱལ་པོས་བཀའ་སྩོལ་ཅིག །དེ་སྐད་ཅེས་ཞུས་པ་དང༌། །སྐུ་ལས་སྤྲུལ་པའི་དྲང་སྲོང་རིག་པའི་ཡེ་ཤེས་དེས་འདི་སྐད་ཅེས་གསུངས་སོ། །ཀྱེ་དྲང་སྲོང་ཆེན་པོ་ཡིད་ལས་སྐྱེས། །གཉིས་པ་བཤད་པའི་རྒྱུད་ལ་བསླབ་པ་ནི། །འགྲོ་དྲུག་གཙོ་བོར་གྱུར་པ་མི་ལུས་ལ། །མི་ན་གནས་དང་ན་བ་གསོ་བ་དང༌། །ཚེ་རིང་ཆོས་ནོར་བདེ་བ་སྒྲུབ་པའི་ཕྱིར། །

གསོ་བ་རིག་པའི་དོན་རྣམས་མདོར་བསྡུ་ན། །གསོ་བྱའི་ལུས་དང་་གསོ་བྱེད་གཉེན་པོ་དང་ཇི་ལྟར་གསོ་བའི་ཐབས་དང༌། །གསོ་བ་པོ་དང་རྣམ་པ་བཞི་རུ་བཤད། །དེ་ལས་རྩ་བ་དང་པོ་གསོ་བར་བྱ་བའི་ཡུལ་བསྟན་པ་ལ། །གང་གི་དོན་དུ་གསོ་བ་ལུས་དང་ནི། །གང་གསོ་བ་ལུས་དེ་ལས་བྱུང་བའི་ནད་དུ་བསྟན་པ་གཉིས། །

རྩ་བའི་གཉིས་པ་ནད་དེ་ལ་གསོ་བར་བྱེད་པའི་གཉེན་པོ་ནི། །སྤྱོད་ལམ་དང་ཟས་དང་སྨན་དང་དཔྱད་དང་བཞི་རྣམས་སོ། །

རྩ་བའི་གསུམ་པ། ནད་དེ་གཉེན་པོས་ཇི་ལྟར་གསོ་བ་ལ་ཡང་། །རྣམ་པར་མ་གྱུར་པ་ནད་མེད་པར་གནས་ཤིང་ཡུན་རིང་དུ་འཚོ་བ་དང༌། །རྣམ་པར་གྱུར་བ་ན་བ་གསོ་བར་བྱ་བ་གཉིས་སོ། །དེ་ལ་ནད་ངོས་བཟུང་བརྟག་པའི་ཐབས་དང་ནི། །རྟོགས་ནས་ཇི་ལྟར་གསོ་བའི་གསོ་ཚུལ་དང༌། །གང་གིས་གསོ་བའི་གསོ་ཐབས་གསུམ་དུ་བཤད། །

རྩ་བའི་བཞི་པ། དེ་ལྟར་གསོ་བར་བྱེད་པའི་གསོ་བ་པོ་སྨན་པ་བཅས། །རྩ་བ་བཞི་ལ་ཡན་ལག་བཅུ་གཅིག་སྟེ། །འདི་དག་བཤད་པའི་རྒྱུད་ཀྱི་སྡོམས་ཚིག་ཡིན། །ཞེས་གསུངས་སོ། །

བདུད་རྩི་སྙིང་པོ་ཡན་ལག་བརྒྱད་པ་གསང་བ་མན་ངག་གི་རྒྱུད་ལས་བཤད་པའི་རྒྱུད་ཀྱི་སྡོམས་ཚིག་བསྟན་པའི་ལེའུ་སྟེ་དང་པོའོ། །དེ་ལྟར་ལེའུ་གཅིག་ནི་རྩ་བ་མདོར་གནས་ཏེ་དང་པོའོ།།  །།

མཐའ་མའི་འདོན་ཐེངས་།: 28.05.2019 ཉིན། 2:13 PM