ཚུལ་ཁྲིམས་རྒྱ་མཚོ།

- བྱམས་པ་འཕྲིན་ལས།

མཁས་དབང་ཚུལ་ཁྲིམས་རྒྱ་མཚོ་མཆོག་ནི་སྤྱི་ལོ་ ༡༩༢༤ ལོར་བདེ་ཆེན་ཁུལ་དུ་སྐུ་འཁྲུངས་པ་དང་། སྤྱི་ལོ་ ༡༩༢༨ ལོར་སྤྲུལ་སྐུར་ངོས་འཛིན་གནང་རྗེས་དགུང་ལོ་ལྔ་ལ་ཕེབས་དུས་ཡི་གེ་འབྲི་ཀློག་ནས་དབུ་ཚུགས་སྟེ་ཆོས་ལུགས་ཀྱི་གཞུང་སོགས་ལ་ལོ་བཅུ་ལྷག་ཙམ་ཐོས་བསམ་དཔྱིས་ཕྱིན་པ་གནང་བར་བརྟེན་རྨང་གཞི་བཟང་པོ་འཛུགས་ཐུབ་པ་བྱུང་ཡོད། དགུང་ལོ་བཅོ་བརྒྱད་ནས་བཟུང་ཆོས་ལུགས་བྱེད་སྒོ་ཆ་ཚང་གནང་བ་དང་ཕྱོགས་མཚུངས་སྨན་པའི་ཕྱག་ལས་ཀྱང་མུ་མཐུད་གནང་། བཅིངས་འགྲོལ་བཏང་རྗེས་སྔ་རྗེས་སུ་བདེ་ཆེན་ཁུལ་གྱི་སྲིད་གྲོད་ཨུ་ཡོན་དང་སྨན་རྫས་དོ་དམ་ཙུའུ་ཡིས་ཙུའུ་ཀྲང་གི་འགན་བཞེས། སྤྱི་ལོ་ ༡༩༨༠ ལོར་བདེ་ཆེན་ཁུལ་སྨན་ཁང་གི་བོད་སྨན་ཚན་ཁག་ལ་ཕྱག་ལས་གནང་། སྤྱི་ལོ་ ༡༩༨༧ ལོ་ནས་སྤྱི་ལོ་ ༡༩༩༨ ལོ་བར་བདེ་ཆེན་ཁུལ་བོད་ལུགས་སྨན་ཁང་གི་ཡོན་ཀྲང་གི་དབུ་གནས་བཞེས། ཁོང་གི་སྔ་རྗེས་སུ་གསུང་རྩོམ་པོད་གཉིས་བརྩམས་གནང་མཛད་པའི་ནང་གི་གཅིག་ནི་སློབ་དཔོན་དང་མཉམ་རྩོམ་གནང་བའི་བོད་ལུགས་གསོ་རིག་གི་སྙིང་བཅུད་བསྡུས་པ་ཞེས་པ་འདི་ནི་གསོ་རིག་རྒྱུད་བཞི་རྨང་གཞིར་བཞག་པའི་སྟེང་དགེ་སློབ་གཉིས་ཀྱི་ཡུན་རིང་ནད་ཐོག་རིག་པའི་ཕྱག་ལས་གནང་ནས་ཐོབ་པའི་ཉམས་མྱོང་ཕུན་སུམ་ཚོགས་པ་རྣམས་ཕྱོགས་གཅིག་ཏུ་བསྡེབས་ནས་བཀོད་གནང་བ་ཡིན་པར་བརྟེན་བེད་སྤྱོད་ཀྱི་རིན་ཐང་ཆེན་པོ་ལྡན་ཡོད་ལ་ཕྱི་རབས་རྣམས་ལ་རིན་ཐང་བྲལ་བའི་ནོར་བུ་ཞིག་བཞག་པ་རེད། གཞན་ཞིག་ནི་ཞང་ཁོང་ཉིད་དང་སྨན་གཉེར་འབུམ་རམས་པ་ཡང་སན་ཅིང་གཉིས་ཀྱི་རྩོམ་སྒྲིག་གནང་བའི་བདེ་ཆེན་བོད་སྨན་ཞེས་དེབ་སྟོད་སྨད་གཉིས་ཡོད། དཔེ་དེབ་དེའི་ནང་སྨན་སྣ་ ༥༩༨ ཙམ་བསྡུ་རུབ་གནང་བ་མ་ཟད་ཞིབ་ཚགས་ཆེན་པོས་སྨན་གྱི་སྐྱེ་གནས་དང་། ནུས་པ། གྲུབ་ཆ་སོགས་བཀོད་པའི་དཔེ་དེབ་རྩ་ཆེན་ཞིག་ཡིན། གཞན་ཡང་ཁོང་གི་གཙོ་སྐྱོང་གནང་ནས་སྔ་རྗེས་སུ་བོད་སྨན་ ༥༦ སྦྱོར་བཟོ་གནང་བ་རྣམས་ལེགས་འགྲུབ་བྱུང་ཡོད། ལྷག་པར་དེའི་ནང་ནས་རིན་ཆེན་རཏྣ་བསམ་འཕེལ་སོགས་སྨན་སྣ་དྲུག་སྦྱོར་བཟོ་གནང་བ་དེས་བདེ་ཆེན་ཁུལ་གྱི་སྟོང་ཆ་ཁ་སྐོང་གནང་། ཁོང་ཉིད་སྤྱི་ལོ་ ༡༩༨༨ ལོར་རྒྱལ་ཁབ་འཕྲོད་བསྟེན་པུའུ་ནས་རྒྱལ་ཡོངས་འཕྲོད་བསྟེན་ཡ་རབས་ཀྱི་སྔོན་ཐོན་མི་སྣར་འདེམས་པ་དང་། སྤྱི་ལོ་ ༡༩༩༡ ལོར་ཡུན་ནན་ཞིང་ཆེན་གྱི་ཀྲུང་དབྱིའི་མཁས་དབང་མི་བཅུའི་ཁོངས་སུ་འདེམས་ཐོན་བྱུང་ཡོད། ཡང་སྒོས་རྒྱལ་སྲིད་སྤྱི་ཁྱབ་ཁང་ནས་ཁོང་ལ་ཀྲུང་གོའི་ཚན་རིག་མི་སྣའི་དམིགས་བསལ་གྱི་ལེགས་སྐྱེས་འབུལ་མཁན་གྱི་བྱ་དགའ་གནང་ཡོད།།

- འདི་ནི་མཁས་དབང་བྱམས་པ་འཕྲིན་ལས་ཀྱིས་བརྩམས་པའི་དེབ་《གངས་ལྗོངས་གསོ་རིག་བསྟན་པའི་ཉིན་བྱེད་རིམ་བྱོན་གྱི་རྣམ་ཐར་ཕྱོགས་བསྒྲིགས། པར་གཞི་གཉིས་པ་》ནས་ཟུར་འདོན་ཞུས།

མཐའ་མའི་འདོན་ཐེངས་།: 04.06.2018 ཉིན། 11:40 AM