ལེའུ་བདུན་པ། འབུམ་བཞིའི་ཡོན་ཏན་བཤད་པ།

དེ་ནས་ཡང་དཔྱད་བུ་ཁྲི་ཤེས་ཀྱིས། རིན་པོ་ཆེ་བེེ་ཌཱུརྱའི་མཎྚལ་རིན་ཆེན་སྣ་ཚོགས་ཀྱིས། རི་རབ་རི་བདུན་རོལ་མཚོ་གླིང་བཞི་གླིང་ཕྲན། ཉི་ཟླ་བཀྲ་ཤིས་རྟགས་བརྒྱད་རིན་ཆེན་ནོར་བདུན་སོགས་ལྷ་མིའི་མཆོད་སྤྲིན་གྱི་རྒྱན་དུ་མིས་བརྒྱན་པ་གཅིག་སྟོན་པའི་མདུན་དུ་ཕུལ་ནས། ལྷ་ཕྱག་ལན་བརྒྱར་འཚལ་ནས་གསོལ་བ། བསྟན་པའི་གཙོ་བོ་ཐམས་ཅད་མཁྱེན། །འབུམ་སྡེ་འདི་ཡི་ཡོན་ཏན་གང་། །མ་འོང་(འོངས)སེམས་ཅན་དོན་ཆད་(ཆེད)དུ། །བདག་ཅག་འཁོར་ལ་གསུངས་པར་ཞུ། །ཞེས་ཞུས་སོ། །དེ་ལ་སྟོན་པས་བཀའ་སྩལ་(བསྩལ)པ། གཡུང་དྲུང་བོན་མཆོག་རིན་པོ་ཆེ། །རྒྱ་ཆེ་ནམ་མཁའི་མཐའ་དང་མཉམ། །གྲངས་མོང་(མོད)རྩི་ཤིང་ནགས་ཚལ་འདྲ། །གཏིང་ཟབ་མཐའ་ཡི་རྒྱ་མཚོ་འདྲ། །མདོར་བསྡུས་བརྒྱད་ཁྲི་བཞི་སྟོང་སྟེ། །དེ་བསྡུས་ཐེག་པ་རིམ་པ་དགུ། །དེ་བསྡུས་སྒོ་བཞི་མཛོད་ལྔའི་ནང་། །འཕན་ཡུལ་རྒྱས་པའི་འབུམ་སྡེ་འདི། །སངས་རྒྱས་བཀའ་ཡི་སྙིང་ཁུ་ཡིན། །ལུང་རྟོགས་བོན་གྱི་ཡང་བཅུད་ཡིན། །མ་རིགས་(རིག)མུན་སེལ་སྒྲོན་མེ་ཡིན། །སྡུག་སྔལ་(བསྔལ)མཚོ་སྐམ་ཉི་མ་ཡིན། །བག་ཆགས་བཀྲུ་བའི་ཆུ་བོ་ཡིན། །འགྲོ་བ་སྐྱོབས་པའི་དཔུང་གཉེན་ཡིན། །བགེགས་རྣམས་བསྲེགས་པའི་མེ་དཔུང་ཡིན། །གདོན་རྣམས་འདུལ་བའི་ཐོག་མདའ་ཡིན། །བདུད་དཔུང་འདུལ་བའི་ཐོ་བ་ཡིན། །བྱད་ཁ་བཟློག་པའི་འཁོར་ལོ་ཡིན། །དུག་ལྔ་རྩད་གཅོད་རལ་གྲི་ཡིན། །བར་ཆད་བཟློག་པའི་རྒྱལ་པོ་ཡིན། །མུ་སྟེག་(སྟེགས)འདུལ་བའི་གཤེན་པོ་ཡིན། །བཞི་བརྒྱ་ནད་སེལ་སྨན་ལྷ་ཡིན། །དགོས་འདོད་འབྱུང་བའི་ནོར་བུ་ཡིན། །བླ་མེད་བསྒྲུབ་པའི་ལམ་མཆོག་ཡིན། །གང་གིས་མི་ཤིག་(ཞིག) གཡུང་དྲུང་བྲག། འགྲོ་ཀུན་སྡུག་སྔལ་(བསྔལ) ཞི་ཕྱིར་དང་། །ཞིང་ཁམས་བདེ་ལེགས་འཕེལ་བ་དང་། །སངས་རྒྱས་བསྟན་པ་དར་བ་དང་། །གསོ་རིག་བརྒྱུད་འཛིན་སྐལ་ལྡན་ཀུན། །འབུམ་སྡེ་འདི་ལ་མོས་པར་བྱ། །འབུམ་སྡེ་འདི་ལ་འདུན་པར་བྱ། །འབུམ་སྡེ་འདི་ལ་བསླབ་པར་བྱ། །འབུམ་སྡེ་འདི་ལ་སྤྱོད་པར་བྱ། །རང་དོན་མཁས་པར་སྦྱོང་འགྱུར་ན། །ལྷ་དབང་ལག་གི་ནོར་བུ་འདྲ། །གཞན་དོན་སྨན་གྱི་སྦྱིན་བཏང་ན། །སྟོང་གསུམ་གསེར་གྱི་སྦྱིན་བཏང་མཉམ། །བསོད་ནམས་རྒྱ་མཚོ་ཉེར་མི་ཕོད། །དྲི་མེད་སངས་རྒྱས་སྨན་ལྷའི་ཞིང་། །སྤོས་ཀྱིས་བརྒྱན་པའི་འཇིག་རྟེན་དུ། །སྨན་ལྷའི་རྒྱལ་པོའི་གོ་འཕོང་(འཕང)ཐོབ། །སངས་རྒྱས་ཐོབ་པ་གོར་མ་ཆགས་(ཆག)། ཞེས་གསུངས་སོ། །

གསོ་རིགས་(རིག)ཐུགས་འབུམ་མཁའ་སྔོན་ལས་འབུམ་བཞིའི་ཡོན་ཏན་བཤད་པའི་ལེའུ་སྟེ་བདུན་པའོ། །གསོ་རིགས་(རིག)པའི་རྩ་བ་བདུད་རྩི་སྨན་གྱི་མདོ་དགུའི་མདོ་སྡེ་གསུམ་པ་བདུད་རྩི་བང་མཛོད་འབུམ་བཞིའི་མདོ་ལས། འབུམ་སྡེ་བཞི་རུ་ཡོད་པའི་ལེའུ་དང་པོ་རྩ་བའི་ཐུགས་འབུམ་ནམ་མཁའ་སྔོན་པོ་རྫོགས་སོ། །

རྒྱལ་བ་གཤེན་རབ་ཐུགས་དབྱིངས་ཀུན་གསལ་ཁྱོན། །ཟབ་མོ་བཀའ་ཡི་ཆུ་འཛིན་འཁྲིགས་པའི་དཀྱིལ། །རྗེས་འཛིན་རིམ་བྱོན་ལེགས་བཤད་དབྱར་རྔ་སྒྲོགས། །ཟད་མེད་གཡུང་དྲུང་བོན་གྱི་ཆར་ཆེན་འབེབས། །འཛིན་མའི་ཞིང་ལ་སེམས་ཅན་སངས་རྒྱས་སོན། །བསྟན་འཛིན་སྐྱེས་བུའི་དཔྱད་རིགས་སོ་ནམ་གྱིས། །འགྲོ་ཀུན་བདེ་སྐྱིད་དགེ་བའི་ལོ་ལེགས་ཤིང་། །ཡང་དག་བླ་མེད་འབྲས་བུ་མྱུར་ཐོབ་ཤོག། བདུད་རྕི་སྨན་གྱི་མདོ་དགུའི་བརྒྱུད་རིམ་ནི། སངས་རྒྱས་བསྟན་པའི་གཙོ་བོ་དཔྱད་བུ་ཁྲི་ཤེས་ལ་གསུངས། དེས་དམུ་ཙ་ཏྲ་ཧེ་ལ་བཤད། དེས་གསེར་ཐོག་ལྕེ་འབྱམས་ལ་བཤད། དེས་སྟོང་རྒྱུད་མཐུ་ཆེན་ལ་བརྒྱུད། དེས་གྱིམ་ཚ་རྨ་ཆུང་ལ་བརྒྱུད། དེས་བན་དྷེ་མི་བདུན་གྱིས་ཆོས་སུ་བསྒྱུར་སྐབས། དཔེ་ཆ་མེ་ལ་སྲེགས་པའི་གྲབ་(གྲབས)བྱས་དུས། བོན་པོ་མི་བདུན་གྱིས་ཁྱེར་ནས་གཙང་སྟོད་བྱེ་མ་གཡུང་དྲུང་གསང་ཕུག་ཏུ་སྦས། ཕྱིས་དུས་ལ་བབ་ཙམ་ན། གཙང་གི་གཤེན་པོའི་བུ་འཚོ་སྲིད་པའི་རྒྱལ་པོ་ཞེས་པས་གཏེར་ཞལ་ཕྱེས་ནས། རྨེའུ་མཁས་པ་དཔལ་ཆེན་ལ་སྤེལ་བའོ། །བསྟན་པའི་གསལ་བྱེད་ཀྱི་ཞབས་འདེགས་ཁམ་(ཁམས)ཡུལ་རྐམ་གྱི་བཙུན་པ་དྲུང་མུ་ཉི་ཝེར་གྱིས་བགྱིས་པ་སརྦ་ཛ་ཡནྟུ། །བཀྲ་ཤིས། །ཞལ་དྲོ། །བྱིན་ཆེ། །སངས་རྒྱས་སྨན་བླའི་རྗེས་སུ་འཛིན་པར་ཤོགདགེའོ། །ལེགས་སོ།། །།

མཐའ་མའི་འདོན་ཐེངས་།: 17.01.2023 ཉིན། 2:35 PM