ལེའུ་གསུམ་པ། གནས་ལུགས་ནད་གཞི། 

དེ་ནས་དཔྱད་བུ་ཁྲི་ཤེས་ཀྱིས་གསོལ་བ། །རྣམ་མཁྱེན་སངས་རྒྱས་སྟོན་མཆོག་སྨན་གྱི་བླ། །གསོ་རིག་འབུམ་སྡེ་ཆེན་པོ་རྣམ་བཞི་ལས། །ཐུགས་འབུམ་མཁའ་སྔོན་ལེའུ་བདུན་གསུང་(གསུངས)པ། །སོ་སོར་དབྱེ་ནས་བདག་ལ་བཀའ་སྩོལ་ཞིག །ཅེས་ཞུས་པ་ལ་སྟོན་པས་བཀའ་སྩལ་(བསྩལ)པ། དཔྱད་བུ་ལ་སོགས་གསོ་རིག་འཛིན་པ་ཀུན། །དང་པོ་ཐུག་(ཐུགས) འབུམ་མཁའ་སྔོན་གནས་བསྟན་པ། །རྕ་བ་གསུམ་ལ་དྲིལ་བའི་སྡོང་པོ་དགུ། གྱེས་པའི་ཡལ་ག་བཞི་བཅུ་རྩ་བདུན་ཏེ། །ལོ་འདབ་ཉིས་བརྒྱ་རྩ་བཞི་རྒྱས་པ་ཡིན། །གསལ་བའི་མེ་ཏོག་འབྲས་བུ་ལྔ་རུ་སྨིན། །འདི་དག་ཐུགས་འབུམ་མཁའ་སྔོན་སྡོམ་(བསྡོམས)སུ་བཤད། །དེ་ཉིད་རྒྱས་པར་བཀྲལ་(བཀྲོལ)ན་འདི་ལྟ་སྟེ། །ནད་དང་ལུས་ཟུངས་དྲི་མ་རྣམ་པ་གསུམ། །རྣམ་པར་མ་གྱུར་པ་དང་གྱུར་པ་ལས། །ལུས་ཀྱི་གནས་རྣམས་འཇོམས་པར་བྱེད་པ་ཡིན།  ནད་ནི་རླུང་དང་མཁྲིས་པ་བད་ཀན་གསུམ། །རླུང་ལ་སྲོག་འཛིན་གྱེན་རྒྱུ་ཁྱབ་བྱེད་དང་། །མེ་ཉམས་(མཉམ)ཐུར་སེལ་རྣམ་པ་ལྔ་རུ་བཤད། །མཁྲིས་པ་འཇུ་བྱེད་མདངས་སྒྱུར་སྒྲུབ་བྱེད་དང་། །མཐོང་བྱེད་མདོག་གསལ་དག་དང་ལྔ་རུ་བཤད། །བད་ཀན་རྟེན་བྱེད་མྱག་བྱེད་མྱོང་བྱེད་དང་། །ཚིམ་བྱེད་འབྱོར་བྱེད་ལྔ་དང་བཅོ་ལྔར་བཤད། ། ལུས་ཟུང་(ཟུངས)དྭངས་མ་ཁྲག་ཤ་རྐང་ཚིལ་རུས་པ། །ཁུ་བ་དང་བདུན་ཡིན་དྲི་མ་བཤང་གཅི་གཉིས། །དེ་ལྟར་རྣམ་གྲངས་ཉི་ཤུ་རྩ་ལྔའོ། །རོ་དང་ནུས་པ་སྤྱོད་ལམ་རྣམ་གསུམ་གྱིས། །ཐམས་ཅད་མཉམ་པར་གནས་པས་འཕེལ་འགྱུར་ཞིང༌། །དེ་ལས་ཟློག་(ལྡོག)པ་གནོད་པར་འགྱུར་བ་ཡིན། །ནད་ཀྱི་(ནི)སྐྱེ་བར་བྱེད་པའི་རྒྱུ་གསུམ་སྟེ། །དེ་ལ་ལྷན་ཅིག་བྱེད་པའི་རྐྱེན་བཞི་ཡིས། །འཇུག་སྒོ་རྣམ་པ་དྲུག་ཏུ་ཞུགས་ནས་ནི། །ལུས་ཀྱི་སྟོད་སྨད་བར་དུ་གནས་བཅས་ཤིང༌། །རྒྱུ་བར་བྱེད་པའི་ལམ་ནི་བཅོ་ལྔ་རུ། །ན་སོ་ཡུལ་དུས་དགུ་རུ་འཕེལ་བྱེད་དེ། །འབྲས་བུ་སྲོག་གཅོད་པ་ཡི་ནད་དགུར་སྨིན། །ལྡོག་པའི་རྒྱུ་ནི་བཅུ་དང་གཉིས་སུ་འགྱུར། །མདོ་དོན་དྲིལ་བས་ཚ་གྲང་གཉིས་སུ་འདུས། །དེ་ལྟར་དྲུག་ཅུ་རྩ་གསུམ་གསོ་བྱའི་ནད། །དེ་ལ་འདོད་ཆགས་ཞེ་སྡང་གཏི་མུག་གསུམ། །རླུང་མཁྲིས་བད་ཀན་རིམ་པས་སྐྱེད་པའི་རྒྱུ། །དེ་ལ་དུས་གདོན་ཟས་དང་སྤྱོད་ལམ་བཞིས། །དེ་དག་འཕེལ་དང་ཟད་པར་གྱུར་ནས་ནི། །པགས་ལ་གྲམ་ཞིང་ཤ་ལ་རྒྱས་པ་དང༌། །རྩ་རུ་རྒྱུ་ཞིང་རུས་ལ་ཞེན་པ་དང༌། །དོན་ལ་བབ་ཅིང་སྣོད་དུ་ལྷུང་བར་འགྱུར། །བད་ཀན་ཀླད་པ་ལ་བརྟེན་སྟོད་ན་རྒྱས། །མཁྲིས་པ་མཆིན་མཁྲིས་ལ་བརྟེན་བར་ན་རྒྱས། །རླུང་ནི་དཔྱི་སྐེད་ལ་བརྟེན་སྨད་ན་རྒྱས། །རུས་པ་རྣ་བ་རེག་བྱ་སྙིང་སྲོག་ལོང༌། །ཁྲག་རྔུལ་མིག་དང་མཆིན་མཁྲིས་རྒྱུ་མ་དང༌། །དྭངས་མ་ཤ་ཚིལ་རྐང་ཁུ་བཤང་གཅི་དང༌། །སྣ་ལྕེ་གློ་མཆེར་ཕོ་མཁལ་ལྒང་པ་རྣམས། །ལུས་བཟུང་དྲི་མ་དབང་པོ་དོན་སྣོད་ལྔ། །རླུང་མཁྲིས་བད་ཀན་རྒྱུ་བའི་ལམ་དུ་བཤད། །རྒས་པ་རླུང་མི་དར་མ་མཁྲིས་པའི་མི། །བྱིས་པ་བད་ཀན་མི་ཡིན་ན་སོས་གཉན། །ངད་ཅན་གྲང་བ་རླུང་གི་ཡུལ་ཡིན་ཏེ། །སྐམ་ས་ཚ་གདུང་ཆེ་བ་མཁྲིས་པའི་ཡུལ། །རླན་ཅན་སྣུམ་པ་བད་ཀན་ཡུལ་དུ་བཤད། །རླུང་ནད་དབྱར་དུས་དགོང་དང་ཐོ་རངས་ལྡང༌། །མཁྲིས་པ་སྟོན་དུས་ཉིན་གུང་མཚན་གུང་ལྡང༌། །བད་ཀན་དཔྱིད་དུས་སྲོད་དང་སྔ་དྲོ་ལྡང༌། །འཚོ་བ་གསུམ་ཟད་འདུ་བ་གཤེད་དུ་བབས། །སྦྱོར་བ་མཚུངས་དང་གནད་དུ་བབ་པ་དང༌། །དུས་འདས་རླུང་ནད་སྲོག་རྟེན་ཆད་པ་དང༌། །ཚ་བ་ལ་འདས་གྲང་བ་གཏིང་མཁར་(འཁར)དང་། །ཟུངས་ཀྱིས་མི་ཐུབ་རྣམ་པར་འཚེ་བ་རྣམས། །འབྲས་བུ་སྲོག་གཅོད་ནད་དགུ་ཞེས་སུ་བཤད། །རླུང་མཁྲིས་བད་ཀན་ཞི་དང་མ་ཞི་བ། །གཉིས་གཉིས་བཞི་རུ་ལྡོག་པས་བཅུ་གཉིས་སོ། །རླུང་དང་བད་ཀན་གྲང་བ་ཆུ་ཡིན་ཏེ། །ཁྲག་དང་མཁྲིས་པ་ཚ་བ་མེ་རུ་འདོད། །སྲིན་དང་ཆུ་སེར་ཚ་གྲང་ཐུན་མོང་གནས། །དེ་ལྟར་རྣམ་གྲངས་བརྒྱད་ཅུ་རྩ་བརྒྱད་ཀྱིས། །ནད་གཞིའི་རྣམ་པ་མ་ལུས་ཤེས་པར་འགྱུར། །ཞེས་གསུངས་སོ། །

གསོ་རིག་ཐུགས་འབུམ་མཁའ་སྔོན་ལས་གནས་ལུགས་ནད་གཞིའི་ལེའུ་སྟེ་གསུམ་པའོ།། །།

མཐའ་མའི་འདོན་ཐེངས་།: 17.01.2023 ཉིན། 2:43 PM