ལེའུ་ཉེར་གཉིས་པ། ཆ་བྱད་དཔྱད་ཀྱི་གནས། 

དེ་ནས་ཡང་དྲང་སྲོང་ཡིད་ལས་སྐྱེས་ཀྱིས་འདི་སྐད་ཅེས་ཞུས་སོ། །ཀྱེ་སྟོན་པ་དྲང་སྲོང་རིག་པའི་ཡེ་ཤེས་ལགས། །ཆ་བྱད་དཔྱད་ཀྱི་གནས་ལ་ཇི་ལྟར་བསླབ་པར་བགྱི། །འཚོ་མཛད་སྨན་པའི་རྒྱལ་པོས་བཤད་དུ་གསོལ། །ཞེས་ཞུས་པ་ལས།

སྟོན་པས་གསུངས་པ། ཀྱེ་དྲང་སྲོང་ཆེན་པོ་ཉོན་ཅིག །ནད་ལས་གསོ་བར་བྱེད་པའི་གཉེན་པོ་ཡི། །ཆ་བྱད་དཔྱད་ཀྱི་གནས་ལ་བསླབ་པ་ནི། །དཔྱད་དངོས་དང་དཔྱད་ཀྱི་ལག་ཆ་ཆ་བྱད་རྣམ་པ་གཉིས། །

ལུས་ཀྱི་ཕྱི་ནས་ནད་རྣམས་འབྱིན་པ་དང༌། །ཞི་བར་བྱེད་པ་གང་ཡིན་པ་དེ་ནི་དཔྱད་ཡིན་ཏེ། །དེ་ཡང་འཇམ་དང་རྩུབ་དང་དྲག་པོ་གསུམ། །འཇམ་པོའི་དཔྱད་ལ་ནད་ཞི་བར་བྱེད་པ་དུགས་དང་ནད་ཞི་བ་དང་འབྱིན་པ་གཉིས་ཀ་བྱེད་པར་ལུམས་དང་ནད་ཞི་བར་བྱེད་པ་བྱུག་པ་དང་གསུམ་མོ། །རྩུབ་པའི་དཔྱད་ལའང་ནད་འབྱིན་པར་བྱེད་པ་གཏར་དང་ནད་ཞི་བར་བྱེད་པ་བསྲེག་པ་དང་ནད་ཞི་བ་དང་འདྲེན་པ་གཉིས་ཀ་བྱེད་པ་དབུག་པ་དང་གསུམ་མོ། །དྲག་པོ་ཤ་ལྤགས་འདྲལ་བ་དང་ཤ་རུས་གཅོད་པ་དང་རུས་པ་འདྲུད་པ་དང་རྣག་སོགས་འབྱིན་པ་བཞི། །

དཔྱད་བྱ་བ་དེ་ཡི་ཆ་བྱད་ཀྱི་རྣམ་པ་ལ་ཟུག་རྔུ་བརྟག་པའི་དཔྱད་དང་། །སྐམ་པ་དང་གཙགས་བུ་དང་ཐུར་མ་དང་ཕྲན་བུ་དང་ལྔའོ། །

དེ་ལ་དང་པོ་ཟུག་རྔུ་བརྟག་པའི་དཔྱད། །རྩེ་ཞབས་གཉིས་སྦོམ་ཕྲ་མེད་པའི་ཟླུམ་པོ་སྲིད་སོར་དྲུག །ཁབ་མགོ་ཞེས་བྱ་བས་མགོ་བོའི་རུས་པ་ཆག་གམ་མ་ཆག་བརྟག །

ཐུར་མའི་མགོ་ཟླུམ་པོ་ཅན་དང་བྲ་བོ་ལྟར་ཟུར་གསུམ་ཅན་དང་རྩེ་ཀྱོག་དང་དེས་ཀྱང་མ་རྟོགས་ན་རྩེ་གུག་པ་དང་། །སྦྲུལ་མིག་ཟླུམ་ལ་མིག་གཉིས་ཅན་དང་ཟངས་དུང་ཁ་འདྲ་སོར་བཅུ་གཉིས་རྨ་དང་མདེའུ་འཛོལ་ན་ཟངས་དུང་ཁ་འདྲ་བས་བརྟག དཔྱད་དེ་དག་ཕྲ་ལ་འཇམ་པས་ཡན་ལག་ཟུག་རྔུ་རྣམས་བརྟག་པར་བྱའོ། །

ཐུར་མ་སོར་བརྒྱད་ལ་དབལ་དང་ལྡན་པས་རྩེ་མོ་བུག་པ་སྐར་ཁུང་ཅན་དེ་ཡིས། །སྐྲངས་པ་རྣག་ཏུ་སྨིན་ནམ་མ་སྨིན་བརྟག །སྐྲངས་སྟེང་དུའང་རྣག་གི་གང་འདུག་ན་སྨིན་པའི་རྟགས་དང་། ཁྲག་འདུག་ན་མ་སྨིན་པའི་རྟགས་དང་དེའི་སྟེང་དུ་མེ་བཙའ་བཏབ་པས་མྱུར་དུ་སྨིན་འོང་།

ཐུར་མ་སྦུབས་ཅན་བའི་ནུ་མ་འདྲ་བ་སོར་གསུམ་པ། །སྦོམ་ཚད་སོར་མོ་ཕོ་ལ་ལྔ་སྟེ་མོ་ལ་དྲུག །དེའང་ནད་ལ་བལྟ་བ་ལ་བུ་ག་གཉིས་པར་བྱ། །ལས་དངོས་ལ་བུ་ག་གཅིག་པ་གློ་ལ་དཀར་ཁུང་ཅན། །དེ་འདྲ་གཞང་འབྲུམ་ནད་ལ་བུ་ག་གཉིས་པས་བལྟ་བ་དང་བུ་ག་གཅིག་པ་དང་གློ་དཀར་ཅན་གྱིས་གཅོད་ལ་སྦྱར། །བལྟ་བ་དང་གཅོད་པ་གཉིས་ཀར་ནད་པའི་འཕོང་དུ་ཉི་མ་ཕོག་པར་བྱས། ཁ་སྦུབ་ཏུ་འབྲུམ་པ་ཚུད་པར་བྱས་ལ་སྙུང་བུས་བཞར། །

ཟུག་རྔུ་འབྱིན་པ་སྐམ་པའི་སྡེ་ཚན་ནི། །སེང་གེའི་ཁ་ལྟར་ཡོད་པ་དང་ཀང་ཀ་དང་བྱ་རོག་གི་མཆུ་ལྟར་རྣོ་བ་བཅས། །སྲིད་སོར་བཅོ་བརྒྱད་པ་ལ་བསྣོལ་བའི་འབྲེལ་མཚམས་སུ་གཟེར་བཏབ་པ། །རྩ་བ་ལྕགས་ཀྱུའི་དབྱིབས་ལྡན་པར་ཨ་ལོང་བཏགས་པ་ནི། །རུས་པ་ལ་ཟུག་པའི་ཟུག་རྔུའི་མདེའུ་འབྱིན་ལ་སྦྱར། །

སྐམ་པའི་དབྱིབས་དེ་འདྲ་སོར་བརྒྱད་ལ་རྩེ་མོ་བྱིའུ་མཐིང་རིལ་གྱི་མཆུ་འདྲ་བ། །རྩེ་མོ་ཤིན་ཏུ་ཕྲ་བས་ཤ་དང་རྒྱུས་པའི་ཟུག་རྔུ་དབྱུང༌བར་བྱ། །

སྐམ་པ་སྦུབས་དང་ལྡན་པར་སྲིད་སོར་བཅུ་གཉིས་ཡོད་པ་དྲང་ཞིང་གསང་ལ་མཁྲང༌བ། །དེའི་ནང་ནས་སྡོམ་པ་འདམ་བུའི་མཆུ་ཞེས་བྱ་བ་སྟེ། །རྨ་གཏིང་དུ་ལུས་པའི་ཟུག་རྔུ་མདེའུ་དབྱུང་ལ་སྦྱར། །ཐུར་མའི་སོ་ཕྲ་བ་ལ་རྩ་བ་གདུ་བུས་བསྡམས་པ་ནི། །ཙུ་མོ་ཏི་ཞེས་བྱ་བ་སྟེ་རྩ་རོ་རྒྱུས་པ་དབྱུང༌བ་ལ་བྱ། །

ཤ་འདྲལ་བ་དང་ཁྲག་དབྱུང་བའི་ཕྱིར་གཙགས་བུའི་སྡེ་བསྟན་པ། །རྩེ་མོ་བྱེའུ་སྦུ་གུའི་སྒྲོ་དང་འདྲ་བའི་ཟླུམ་པོ་སོར་དྲུག་པ་ཅན། །ཤ་གསེབ་ཀྱི་ཁྲག་རྩ་རྐྱང་པ་དག་ལ་འདེབས་ལ་སྦྱར། །གྲིའི་སྒལ་འདྲ་བ་རྒྱབ་མདུན་གཉིས་པོ་སོ་ལྟག་ཉལ་རྩེ་རྣོ་བས་སྣོད་ཀ་དང་རྩེ་ཆུང་ལ་གཏར་བར་བསྔགས། །སྟ་རེ་ཁ་དང་འདྲ་བ་ནི་རུས་སྟེང་གི་རྩ་ལ་གཏར་བར་བྱ། །ཆུ་གྲི་འདྲ་བས་སྐྲངས་ལ་ཕན་པའི་ཞལ་ཞལ་བྱ། །བལ་མགར་བའི་ཟངས་གྲིའི་དབྱིབས་ཅན་ཏེ་མན་ངག་རྒྱུད་དུའང་། གནད་ལ་ཟེམ་ལ་ཇུ་ཙེས་ཞལ་ཞལ་བྱ་ཞེས་གསུངས་སོ། སོར་བརྒྱད་པ་ཟོར་བའི་དབྱིབས་ཀྱིས་ལྕེ་སྐྲངས་གཤག །གཙགས་འདྲ་གྲིའི་དབལ་འདྲ་བ་བྲང་བ་ཅན་གྱིས་མགོ་རྨ་འདྲ། །

དབུག་པའི་ཐུར་དཔྱད་སྲིད་སོར་དྲུག་པ་ལ། །མགོ་འོག་ལུས་ཤོང་ཐུར་ཞབས་ཟླུམ་ཞིང་ལྡིག་པར་བྱ། །དེའང་སྦུབས་ཡོད་པ་ཐུར་མ་ནི་རྩེ་མོ་སྦལ་མགོ་ལྟ་བུ་གློ་དཀར་བུག་ཕ་ཡོད་པ་ཡིས། །བྱང་ཁོག་ནག་གི་རླངས་འཁྱིམས་གསེང་དང་སྙིང་ཆུ་མཆིན་ཆུ་གཙག །སྦུབས་ཡོད་པའི་ཐུར་རྩེ་སྨྱུ་གུ་ཁ་ལྟར་གསེགས་ཅན་གྱིས་དམུ་ཆུ་གཙག །བྱིད་པོའི་བྱིའུ་ཆེའི་མཆུ་འདྲས་བྱང་ཁོག་རྣག་གསང་དབྱེ། །

སྦུགས་མེད་པ་ནས་དང་འདྲ་བའི་ཐུར་མ་ནི་སྒལ་ཚིགས་སྐྲན་ལ་སྦྱར། །གློ་སྙིང་རྒྱུ་ལོང་མཁལ་མར་རྣག་སོགས་དབྱུང་བར་ཐུར་མ་སྦལ་མགོ་འདྲ་བ་སྣུམ་ལ་ཅུང་རྣོ་བ་བསྔགས། །ཟངས་ཐུར་རྩེ་མོ་བྲ་བོ་འདྲ་བས་མིག་སྤྲིན་དབུག་ཅིང་བར་འགྲིབ་ལ་སྦྱར། ཐུར་མ་མཐོ་གང་རྩེ་མོ་འབྲི་ལྕེ་ཁ་ཐུར་ཞབས་དྲང་བ་ཡིས་སྐྲན་དང་ཆུ་སེར་ཅུར་འབྱིན་བྱ། །ཐུར་མའི་མདུང་རྩེའི་སོ་འདྲ་བ་ཡིས་ཡན་ལག་རྣག་ཆུ་གང་ཡོད་སར་དབུག །

གཞན་ཡང་ཆ་བྱད་ཕྲན་བུའི་སྡེ་ཚན་བསྟན་པ་ནི། །ཀྱོང་བུ་ནི་སྟེ་བུའི་ཁ་ལྟ་བུ་སོ་གཉིས་པ་དང་བེ་ལེ་ཁ་ལེབ་མོ་རྩེ་གུག་པ། །རྐོ་མའི་མཆུ་འདྲ་སོར་དྲུག་ཡོད་པའི་ཡུ་བ་ཅན། །ལྕགས་བཟང་ངར་ལྡན་མགོ་ཡི་རུས་པ་འབྲད། །སོག་ལེ་ཞེང་དུ་སོར་གཉིས་ཡོད་པ་སོ་ཞིབ་པ། །སྲིད་སོར་བཅུ་པས་རུས་པ་ལྷག་པ་རྣམས་འབྲེག་པ་དང་། །ཆན་པ་ཕྱམ་རྩེའི་དབྱིབས་ལྡན་རྣོ་བས་རྨ་ཡི་རྩ་རྒྱུས་བཅད། །འདེལ་སྒོ་སྦུབས་ཅན་སོར་ལྔ་པ་གསོར་རྩེ་སོག་ལེའི་ཁ་འདྲ་བ། །སྐྱེད་པར་འཁོར་ལོ་ལྡན་པས་རུས་པ་ལ་ཁུང་བུ་འབུགས་པའི་གསོར། །ཡུང་བ་སོར་བཅུ་བེ་ལེ་ཁ་ལེབ་མོ་སོ་ཡོད་པ་འདྲ་བར་རྩེ་གུག་པ། །རྣ་བ་དང་སྣ་དང་གྲེ་བའི་འབྲུམ་པ་བཅད། །མངལ་ཐུར་མཐོ་གང་རྩེ་མོ་གུག་པ་ལྕགས་ཀྱུ་ལྟ་བུས་བུ་ཤི་དབྱུང༌། ཇི་སྐད་དུ། ཐུར་མ་རྩེ་མོ་གུག་པ་ནི། མངལ་གྱི་ཐུར་མ་ཞེས་བྱ་སྟེ། །ཞེས་གསུངས་སོ། །ཆ་བྱད་སྦྲུལ་མགོ་ལྟ་བུས་རྡེའུ་དབྱུང་བར་བྱ། །ཐུར་མ་གྲོ་སོག་སྦུབས་ཅན་འབྲིང་ཚད་ཙམ་མཁྲང་ལ་དྲང་བས་གསང་ལ་འཇམ་པར་མགོ་འཇུག་མེད་པ་ལ། །སོར་བཅུ་གཉིས་པའི་ཚད་ཀྱི་འཕྲུལ་ཐུར་གྱིས་ཆུ་འགགས་གཙག །ཐུར་མ་རྩེ་ཀྱོག་སྲིད་སོར་བཅུ་པས་སོ་སྲིན་བསྲེག །སྦུབས་ཐུར་སོར་བཅུ་རྩ་བའི་བུ་ག་སྦོམ་ལ་སོར་མོ་བསྐོར་བ་ལྔ། །རྩེ་མོ་ཁ་དབྲག་གིས་ཁ་སྣར་དུ་བ་རྔུབ། །ཐུར་མ་སྦུབས་ཅན་ཞེང་དུ་སོར་བཅུ་ཐེམ་བུ་ལྟ་བུའི་ཁ་ཡོད་པས། །གྲེ་བར་སྨན་གདབ་པ་དང་ལྕེ་ཆུང་བསྲེག་པ་གཉིས་ལ་སྦྱར། །ཐུར་མ་རྩ་བའི་སྦུབས་ལ་མཐེ་བོང་ཤོང་བ་ལ། །རྩེ་བུག་སྲན་མ་ཤོང་ཙམ་སོར་བརྒྱད་པ། །རྐེད་པ་དང་རྩ་བར་སྦོམ་ལ་འཁོར་ལོ་དཀྲིས་པ་ནི། །གཅེ་འུ་ཞེས་བྱས་འཇམ་རྩི་ནི་རུ་བཏང༌། །གཅེའུ་དེ་འདྲ་ཕྲ་མོ་རྨ་བཀྲུ་བ་ལ་སྦྱར། །འཇིབས་རྒྱུ་རྔབས་རྭ་དཔངས་སུ་སོར་ལྔ་དང་ཁ་རྒྱ་ལ་སོར་གསུམ་ཤོང་ཙམ། །རྩེ་མོ་བུག་པ་ཡུངས་ཀར་ཤོང་བས་ཆུ་སེར་དྲང༌། །མི་ཡི་བུམ་པ་ལྟོ་བའི་འཁྱུད་འཁོར་སོར་ནི་བཅོ་བརྒྱད་ལ། །དཔངས་སུ་སྲིད་སོར་བཅུ་གཉིས་ཁ་ཟླུམ་རྒྱར་སོར་མོ་བཞི་ཤོང་པ། །དེ་ཡིས་ཕྱི་སྐྲན་འཇུ་ཞིང་འདྲེན་པ་ལ་སྦྱར་བར་བྱ་བ་དང་རླུང་སྟོད་འཚངས་དང་རླུང་གཟེར་ལའང་ཕན་པའོ། །མེ་ལོང་པགས་པའི་སྤུ་གྲི་ཟླ་ཚེས་དབྱིབས་ལྟ་བུ་ཡིས། མགོ་བོའི་སྐྲ་བཞར་བ་དང་ཡོག་ཐོད་ཀྱི་མགོ་ལྟ་བུ། །སྲིད་དུ་སོར་བཅུ་ཡོད་པ་ཏེལ་པ་ཞེས་བྱ་བ་སྟེ། །འབྲས་དང་ལྷོག་པ་སོགས་སྐྲངས་པ་བསྲེག་པར་བྱ། །རྣོ་བའི་དབལ་དང་ལྡན་པ་ཕྲ་ལ་འཇམ་ཞིང་རྩེ་མོ་གུག་པོ་ནི་ཤ་ཡི་ཁབ་ཅེས་བྱ། །ཤ་དང་པགས་པ་རལ་བ་བཙེམ་ལ་སྦྱར། །དེ་ལྟར་ཆ་བྱད་གཞན་ཡང་ནད་གང་དང་བལྟས་ལ་གང་མཁོ་སྤྱད་དེ་སྦྱར་རོ། །ཅེས་གསུངས་སོ། །

བདུད་རྩི་སྙིང་པོ་ཡན་ལག་བརྒྱད་པ་གསང་བ་མན་ངག་གི་རྒྱུད་ལས་གཉེན་པོ་ཆ་བྱད་བསྟན་པའི་ལེའུ་སྟེ་ཉི་ཤུ་རྩ་གཉིས་པའོ། དེ་ལྟར་ལེའུ་གཅིག་ནི་ཆ་བྱད་དཔྱད་ཀྱི་གནས་ཏེ་བདུན་པའོ།། །།

མཐའ་མའི་འདོན་ཐེངས་།: 28.05.2019 ཉིན། 12:37 PM