ལེའུ་ཉེར་གཅིག་པ། སྨན་གྱི་སྡེ་ཚན་དང་སྦྱར་ཐབས་བསྟན་པ།

དེ་ནས་ཡང་དྲང་སྲོང་རིག་པའི་ཡེ་ཤེས་ཀྱིས་འདི་སྐད་ཅེས་གསུངས་སོ། །ཀྱེ་དྲང་སྲོང་ཆེན་པོ་ཉོན་ཅིག །སྦྱར་ཐབས་སྡེ་ཚན་དུ་སྦྱོར་བ་དང་རོ་སྦྱོར་བ་དང་ནུས་པར་སྦྱར་བ་གསུམ་ལས། །དང་པོ་ནད་གང་སེལ་བ་སྨན་གྱི་སྡེ་ཚན་དུ་སྦྱོར་བ་བསྟན་པ་ནི་འདི་ལྟ་སྟེ། །

ག་བུར་ཙན་དན་དཀར་པོ་གི་ཝཾ་དང༌། །ཅུ་གང་གུར་ཀུམ་ཨུཏྤལ་སྔོན་པོ་རྣམས། །ཚ་བ་ཐུན་མོང་སྤྱིར་འཇོམས་སྨན་སྡེ་ཡིན། །

ཏིག་ཏ་གསེར་གྱི་མེ་ཏོག་དུག་མོ་ཉུང༌། །བོང་ང་དཀར་པོ་རྩ་མཁྲིས་གཡའ་ཀྱི་མ། །ཀྱི་ལྕེ་སྐྱེར་པ་མཁྲིས་པ་སེལ་བའི་སྡེ། །

ཙན་དན་དམར་པོ་མཛོ་མོ་སེང་ལྡེང་དང༌། །ཧོང་ལེན་བ་ཤ་ཀ་དང་སྐྱུ་རུ་ར། །རེ་སོན་སྤང་རྩི་དོ་བོ་བཙོད་དང་ཚོས། །ཁྲག་ནད་སེལ་བར་བྱེད་པའི་སྨན་སྡེ་ཡིན། །

གི་ཝཾ་གསེར་གྱི་མེ་ཏོག་བོང་ང་དཀར། །ག་དུར་བྱི་ཚེར་དེ་བ་པར་པ་ཏ། །ཁྲག་རྐང་རིམས་ནད་སེལ་བའི་སྨན་སྡེ་ཡིན། །

གླ་རྩི་བོང་ང་དཀར་སེར་དམར་པོ་གསུམ། །ཁྱུང་སྡེར་དཀར་སྨུག་དཔའ་བོ་དཀར་སེར་རྩད། །རྣམ་པར་རྒུ་ཐུབ་སྟག་ཤ་ཧ་བོ་དང༌། །ཡུང་བ་གང་ག་ཆུང་དང་རེ་རལ་དང༌། །འོམ་བུ་སྤང་རྒྱན་སྤང་རྩི་དོ་བོ་དང༌། །སེ་རྒོད་སྐྱེར་པའི་བར་ཤུན་དུག་སྨན་སྡེ། །

ཅུ་གང་ཤིང་མངར་རྒུན་འབྲུམ་སྟར་བུ་དང༌། །རུ་རྟ་ག་དུར་ཨ་ཀྲོང་སྲོ་ལོ་དཀར། །སུག་འདྲ་ལ་སོགས་གློ་སྨན་སྡེ་ཚན་ཡིན། །

སླེ་ཏྲེས་ཀཎྜ་ཀ་རི་ཨ་ག་རུ། །གོ་སྙོད་རུ་རྟ་གུ་གུལ་སྒོག་སྐྱ་རྣམས། །རླུང་དང་ཚད་པར་ལྡན་པའི་སྨན་སྡེ་ཡིན། །

བསེ་ཡབ་མ་ནུ་འུ་སུ་སྟར་བུ་དང༌། །ཨུཏྤལ་སེ་འབྲུ་སྒ་སྐྱ་སྐྱུ་རུ་ར། །བད་ཀན་ཚ་བ་སེལ་བའི་སྨན་སྡེ་ཡིན། །

སྨན་སྒ་སྒ་སྐྱ་ཤིང་ཀུན་ཁ་རུ་ཚྭ། །བཙོང་སྒོག་བད་རླུང་སེལ་བའི་སྨན་སྡེ་ཡིན། །

སེ་འབྲུ་ཕོ་བ་རིས་དང་པི་པི་ལིང༌། །སྨན་སྒ་ཙི་ཏྲ་ཀ་དང་ཀ་ཀོ་ལ། །སུག་སྨེལ་ཤིང་ཚ་འཇམ་འབྲས་བྱི་ཏང་ག །ད་ལིས་ཟི་ར་ནག་པོ་ལ་ལ་ཕུད། །དབྱི་མོང་སྲུབ་ཀ་ལྕེ་ཚ་ཙབས་རུ་ཚྭ། །རྒྱ་ཚྭ་རྒྱམ་ཚྭ་རྭ་ཚྭ་ཐལ་ཚྭ་རྣམས། །བད་ཀན་གྲང་བ་སེལ་བའི་སྨན་སྡེ་ཡིན། །

ཛཱ་ཏི་བུ་རམ་རུས་སྣ་རླུང་སྨན་ཡིན། །སྤོས་དཀར་ཐལ་ཀ་རྡོ་རྗེ་སོ་མ་ར། །སེང་ལྡེང་སྐྱེར་པ་ཆུ་སེར་སྨན་གྱི་སྡེ། །

གླ་རྩི་ཤིང་ཀུན་སྒོག་སྐྱ་མ་རུ་ཙེ། །ཐང་ཕྲོམ་ལང་ཏང་ཙེ་དང་བྱི་ཏང་ག །དྲེས་འབྲུ་འབུ་སྐྱོགས་ཕུར་ཐལ་སྲིན་ཤིང་འབྲུ། །དྭ་བ་གཡེར་མ་སྤྲུ་མ་སྲིན་སྨན་སྡེ། །ཀ་པེད་བིལ་བ་ད་ཏྲིག་མོན་ཆ་ར། །སྨག་དང་ཐ་རམས་ན་རམས་རྒྱ་སྐྱེགས་ཤིང༌། །གཙོད་ཁྲག་བྱ་རྐང་འཁྲུ་གཅོད་སྨན་སྡེ་ཡིན། །

རྒྱ་ཚྭ་རྒྱམ་ཚྭ་གསེར་གྱི་བྱེ་མ་དང༌། །སྡིག་སྲིན་སུག་སྨེལ་ཉི་དགའ་ཆུ་སྨན་སྡེ། །སོན་ཆ་རི་ཤོ་སྤྱང་ཚེར་ཤུ་དག་དང༌། །གསེར་ཕུད་འབྲི་ཏ་ས་འཛིན་སྐྱི་འབྲུ་དང༌། །གཡའ་ཀྱི་ཡུངས་ཀར་ལ་སོགས་སྐྱུགས་སྨན་སྡེ། །

ཨ་རུ་དནྡ་དོང་ག་ཤྲཱི་ཁཎ། །དུར་བྱིད་ཐར་ནུ་ལྕུམ་རྩ་སྔོན་བུ་དང༌། །ཁྲོན་བུ་ཙི་སྟག་རེ་ལྕག་ཆུ་རྩ་རྣམས། །འཁྲུ་བར་བྱེད་པའི་སྨན་གྱི་སྡེ་ཚན་ཡིན། །

སྦྱར་ཐབས་རོ་སྦྱོར་དང་ནུས་པར་སྦྱོར་བ་གཉིས་ལས། །དང་པོ་རོ་བསྡེབས་སྦྱོར་བ་ལྔ་བཅུ་རྩ་བདུན་ནི་འདི་ལྟར་ཏེ། །རོ་གཉིས་གཉིས་པར་སྦྱར་བ་ལ་མངར་བ་ལྔ་དང་སྐྱུར་བ་བཞི། །མངར་སྦྱོར་ལྔ་ནི། མངར་སྐྱུར་སྦྱར་བས་རླུང་མཁྲིས་སེལ། མངར་དང་ལན་ཚྭ་སྦྱར་བས་འདུས་པ་སེལ། མངར་དང་ཁ་བ་སྦྱར་བས་རླུང་མཁྲིས་སེལ། མངར་དང་ཚ་བ་སྦྱར་བས་འདུས་པ་སེལ། མངར་དང་བསྐ་བ་སྦྱར་བས་འདུས་པ་སེལ།

སྐྱུར་སྦྱོར་བཞི་ནི། སྐྱུར་དང་ལན་ཚྭ་ཀ་ཚ་དང་། སྐྱུར་དང་ལན་ཚྭ་བསྐ། སྐྱུར་དང་ལན་ཚྭ་ཚ་བ་བསྐ། སྐྱུར་དང་ཁ་ཚ་བསྐ་བ་རྣམས་ཀྱིས་འདུས་པ་སེལ།  །ལན་ཚྭའི་སྦྱོར་བ་གསུམ་ལ་ཁ་བའི་སྦྱོར་བ་གཉིས་ཚ་བའི་སྦྱོར་བ་གཅིག་ལས། ལན་ཚྭ་སྦྱོར་བ་གསུམ་ནི། ལན་ཚྭ་ཁ་བ་སྦྱར་བ་དང་། ལན་ཚྭ་ཚ་བ་སྦྱར་བ་དང་། ལན་ཚྭ་བསྐ་བ་སྦྱར་བ། ཁ་སྦྱར་གཉིས་ནི། ཁ་བ་དང་ཚ་བ་སྦྱར་བས་འདུས་པ་སེལ། ཁ་བ་དང་བསྐ་བ་སྦྱར་བས་བད་མཁྲིས་སེལ། ཚ་སྦྱོར་གཅིག་ནི། ཚ་བ་དང་བསྐ་བ་སྦྱར་བས་འདུས་པ་སེལ་ལོ། །གསུམ་དུ་སྦྱར་ལ་མངར་སྦྱོར་བཅུ་དང་སྐྱུར་བའི་སྦྱོར་བ་དྲུག་ལས། མངར་སྦྱོར་བཅུ་ནི། མངར་སྐྱུར་ལན་ཚས་འདུས་པ་སེལ། མངར་སྐྱུར་ཁ་བས་འདུས་པ་སེལ། མངར་སྐྱུར་ཚ་བས་འདུས་པ་སེལ། མངར་སྐྱུར་བསྐ་བས་འདུས་པ་སེལ། མངར་ཚ་ལན་ཚྭས་འདུས་པ་སེལ། མངར་བསྐ་ལན་ཚྭས་འདུས་པ་སེལ། །མངར་ཚ་ལན་ཚས་འདུས་པ་སེལ། མངར་བསྐ་ལན་ཚྭས་འདུས་པ་སེལ། མངར་ཚ་བསྐ་བས་འདུས་པ་སེལ། མངར་ཁ་བསྐ་བས་འདུས་པ་སེལ།

སྐྱུར་སྦྱོར་དྲུག་ནི། སྐྱུར་དང་ལན་ཚྭ་ཁ་བ་སྦྱར་བས་འདུས་པ་སེལ། སྐྱུར་ཚ་ལན་ཚས་བད་རླུང་སེལ། སྐྱུར་བསྐ་ལན་ཚས་འདུས་ནད་སེལ། སྐྱུར་ཁ་བསྐ་བས་འདུས་པ་སེལ། སྐྱུར་ཚ་བསྐ་བས་འདུས་པ་སེལ།  །ལན་ཚྭའི་སྦྱོར་བ་གསུམ་ལ་ཁ་བའི་སྦྱོར་བ་གཅིག་པུ་ཉིད་ལས། །ལན་ཚྭ་སྦྱར་བ་གསུམ་ནི། ལན་ཚྭ་ཁ་ཚ་བས་འདུས་པ་སེལ། །ལན་ཚྭ་ཁ་བསྐ་བས་འདུས་པ་སེལ། ལན་ཚྭ་ཚ་བསྐ་སྦྱར་བས་འདུས་པ་སེལ། ཁ་སྦྱར་གཅིག་པུ་ནི། ཁ་བ་དང་ཚ་བ་དང་བསྐ་བ་སྦྱར་བས་འདུས་པ་སེལ། །བཞི་སྦྱར་མངར་བ་བཅུ་དང་སྐྱུར་བ་བཞི་ལན་ཚྭ་བ་གཅིག་ལས། མངར་བ་བཅུ་ནི། མངར་སྐྱུར་ལན་ཚྭ་ཁ། མངར་སྐྱུར་ལན་ཚྭ་ཚ། མངར་སྐྱུར་ལན་ཚྭ་བསྐ། མངར་སྐྱུར་ཁ་ཚ། མངར་སྐྱུར་ཚ་བསྐ། མངར་སྐྱུར་ཁ་བསྐ། མངར་ལན་ཚྭ་ཁ་ཚ། མངར་ལན་ཚྭ་ཁ་བསྐ། མངར་ལན་ཚ་ཚ་བསྐ། མངར་ཁ་ཚ་བསྐ་བཅས་སོ། སྐྱུར་བ་བཞི་ནི། སྐྱུར་དང་ལན་ཚྭ་ཁ་ཚས་བད་རླུང་སེལ། སྐྱུར་ཁ་ཚ་བསྐས་བད་མཁྲིས་སེལ་ལོ། ལན་ཚྭ་གཅིག་ནི། ལན་ཚྭ་དང་ཁ་བ་ཚ་བ་བསྐ་བས་འདུས་པ་སེལ་ལོ། །ལྔ་སྦྱོར་མངར་བ་ལྔ་ལ་སྐྱུར་བ་གཅིག་ལས། ལྔ་སྦྱོར་ལྔ་ནི། མངར་སྐྱུར་ལན་ཚྭ་ཁ་ཚ་དང་། མངར་ལན་ཚྭ་ཁ་ཚ་བསྐ་བཅས་ལྔས་འདུས་ནད་སེལ་ལོ། སྐྱུར་སྦྱོར་གཅིག་ནི། སྐྱུར་བ་དང་ལན་ཚྭ་ཁ་བ་ཚ་བ་བསྐ་བས་འདུས་པ་སེལ་ལོ།

དེ་ལྟར་བཤད་པའི་རོ་སྦྱོར། །རོ་བཞི་སྦྱོར་པ་དང་རོ་གཉིས་སྦྱོར་པ་ལ་སོ་སོར་བཅོ་ལྔ་རེ་ཡོད་པ་དང་རོ་ལྔ་སྦྱོར་བ་བྱས་པ་དྲུག་དང་། །རོ་གསུམ་དུ་སྦྱོར་པ་ཉི་ཤུ་བཅས་རོ་ལྔ་བཅུ་རྩ་དྲུག་དང་དེའི་སྟེང་རོ་མངར་སྐྱུར་ལན་ཚྭ་ཁ་ཚ་བསྐ་དྲུག་ཏུ་སྦྱར་བ་གཅིག་བསྣན་པས་རོ་སྦྱོར་ལྔ་བཅུ་རྩ་བདུན་ནོ། །སླར་དེའི་སྟེང་རོ་རྐྱང་པ་དྲུག་བསྣན་པ་སྟེ་བསྡོམས་པས་དྲུག་ཅུ་རྩ་གསུམ་མོ། །དེ་དག་འཕེལ་ཟད་བདུན་ཅུ་རྩ་བཞིའི་གཉེན་པོར་གང་ལ་གང་འཚམས་གྱིས་སྦྱོར་བར་བྱའོ། །

ནུས་པར་སྦྱར་བ་ལ་ཞི་བྱེད་དང་སྦྱང་བ་གཉིས་ལས། །དང་པོ་ཞི་བྱེད་སྨན་སྦྱོར་སྡེ་ཚན་ལྔ་འམ་བདུན་དུ་འདུས་ཏེ། །དེ་ཐང་དང་ཕྱེ་མ་རིལ་བུ་ལྡེ་གུ་སྨན་མར་ལྔའི་སྟེང་། །སྨན་ཆང་དང་འབྲི་ཏ་ཁཎྜགཉིས་བསྣན་པ་ཏེ་བདུན་དུ་བཤད། །

གཉིས་པ་སྦྱོང་བྱེད་ནི་རླུང་ལ་འཇམ་རྩི་དང་མཁྲིས་པར་བཤལ་བད་ཀན་ལ་སྐྱུགས་འདུས་པ་ལ་ནི་རུ་ཧ། །མགོ་དང་ནམ་ཚོང་ལ་སྣ་སྦྱོངས་ཏེ་དེ་རྣམས་ཉེས་གསུམ་དང་འདུས་པ་དང་མགོ་ནད་རྣམས་འབྱིན་པར་བྱེད་དོ། །

སྤྱིར་ཀུན་རྟགས་དང་གཞན་དབང་ལྟར་སྣང་ཡོངས་གྲུབ་དང་། བྱེ་བྲག་ཉེས་པ་གཙོ་བོ་རིགས་གནས་ཀྱིས་བསྡུད་པའི་བཞི་བརྒྱ་རྩ་བཞི་ནད་ཀྱི་གཉེན་པོར་འཚམ་པར་སྦྱོར་རོ། །ཞེས་གསུངས་སོ། །

བདུད་རྩི་སྙིང་པོ་ཡན་ལག་བརྒྱད་པ་གསང་བ་མན་ངག་གི་རྒྱུད་ལས་སྨན་གྱི་སྡེ་ཚན་དང་སྦྱར་ཐབས་བསྟན་པའི་ལེའུ་སྟེ་ཉི་ཤུ་རྩ་གཅིག་པའོ། དེ་ལྟར་ལེའུ་གསུམ་ནི་སྦྱོར་བ་སྨན་གྱི་གནས་ཏེ་དྲུག་པའོ།། །།

མཐའ་མའི་འདོན་ཐེངས་།: 28.05.2019 ཉིན། 12:31 PM