ལེའུ་ཞེ་དགུ་པ། གླང་ཐབས་བཅོས་པ།

དེ་ནས་ཡང་དྲང་སྲོང་རིག་པའི་ཡེ་ཤེས་ཀྱིས་འདི་སྐད་ཅེས་གསུངས་སོ། །ཀྱེ་དྲང་སྲོང་ཆེན་པོ་ཉོན་ཅིག གླང་ཐབས་ནད་ལ་རྒྱུ་རྐྱེན་དབྱེ་བ་དང༌། །རྟགས་དང་བཅོས་ཐབས་རྣམ་པ་བཞི་ཡིས་བསྟན།།

རྒྱུ་རྐྱེན་མ་ཞུ་བ་དང་མི་འཕྲོད་ཟས། །རྔུལ་གྲང་སྲིན་འཁྲུགས་གདོན་ལས་འབྱུང་བར་བྱེད།།

དབྱེ་བ་གནས་དང་ནད་རིགས་རྣམ་པ་གཉིས། །གནས་ནི་དོན་གླང་སྣོད་གླང་རྩ་གླང་གསུམ། །དོན་གླང་མཆིན་གླང་མཆེར་གླང་རྣམ་པ་གཉིས། །སྣོད་གླང་ཕོ་བ་རྒྱུ་མ་ལོང་དང་གསུམ། །རྩ་གླང་ཕྱི་རྩ་ནང་རྩའི་གླང་ཐབས་གཉིས། །རིགས་ནི་ཚ་གྲང་སྲིན་དང་གཉན་གླང་བཞི། །ཚ་གླང་མཆིན་མཆེར་གཉིས་ཀྱི་ཁྲག་འཁྱགས་དང༌། །ཁྲག་དང་མཁྲིས་པ་ཕོ་ལོང་ལྷུང་ལས་འབྱུང༌། །གྲང་གླང་ཕོ་བར་མ་ཞུ་ལྷུང་བ་དང༌། །རྒྱུ་ལོང་ནང་དུ་ཐུར་སེལ་འཁྱིལ་ལས་འབྱུང༌། །སྲིན་གླང་ཕོ་ལོང་གཉིས་སུ་སྲིན་འདྲིལ་ལ། །གཉན་གླང་ཕོ་བ་རྒྱུ་མར་གཉན་བབས་པའོ།།

དེ་རྟགས་མཆིན་གླང་གཡས་ངོས་མཆིན་སྟེང་གཟེར།  །རྔུལ་གྲང་རྗེས་ལ་ནད་ལྡང་རྩ་ཆུ་ཚ། །མཆེར་གླང་མཆེར་སྟེང་རྩིབ་ཐུང་གཟེར་བ་དང༌། །སྦོ་འཁྲོག་བྱེད་ཅིང་ཆུ་གྲང་འཐུངས་ན་ན། །ཕོ་བ་གླང་ཐབས་ལྷེན་སྣའི་འོག་ཏུ་ན། །རྒྱུ་མའི་གླང་ཐབས་ལྟེ་བའི་འོག་ཏུ་ན། །ལོང་གླང་ལྟེ་བའི་གཡས་གཡོན་ཐད་ཀར་ན། །ཚ་གླང་རྒྱུ་རྐྱེན་ཚ་བས་བསླང་བ་དང༌། །ལུས་རྔུལ་གསུས་པ་ཆུང་ལ་ལྡང་དུབ་བྱེད། །ཁྲག་གམ་མཁྲིས་པ་འཁྲུ་སྐྱུག་རྩ་ཆུ་ཚ། །ཁྱད་པར་ཕོ་བ་ལོང་དུ་ཁྲག་ལྷུང་ན། །གྲང་རྗེས་ན་ཞིང་སྒྲེག་ལ་སྐྱུག་ཚུལ་སྟོན། །རོ་རྒྱབ་མཆིན་དྲི་སྦྲག་ཅིང་ཚ་རུམ་བྱེད། །མཁྲིས་པ་ལྷུང་ན་ཁ་སྐམ་སྐོམ་དད་ཆེ། །ཁ་ཁ་མཁྲིས་པར་སྐྱུག་ཅིང་གཟེར་འབྱུང་སྒྲེག །གྲང་གླང་རྒྱུ་རྐྱེན་གྲང་བས་ལྡང་བ་ལ། །སྦོ་ལྡེང་ལྡང་དུབ་མེད་པར་ཐེར་ཟུག་ན། །མ་ཞུ་བད་ཀན་སྐྱུག་ཅིང་གྲང་རྔུལ་བྱེད། །ཁྱད་པར་མ་ཞུ་མི་འཕྲོད་ཟོས་རྗེས་ལྡང༌། །རུས་སྒྲེག་མང་ཞིང་སྐྱུག་ལ་ཟོས་ཐོག་ན། །ལོང་དུ་སྨུག་པོ་འཐབ་པའི་གླང་ཐབས་ནི། །ཐུར་རླུང་མི་ཐོན་ཕར་འབོར་ཚུར་འབོར་རྒྱུ། །འགྲངས་དང་མཚན་མོའི་དུས་སུ་ཁྱད་པར་ན། །ལྟོགས་ཤིང་ཉིན་མོའི་དུས་ན་ཅུང་ཟད་བདེ། །རྒྱུ་མར་ཐུར་སེལ་འཁྱིལ་བས་ཕྱེན་མི་ཐོན། །གྱེན་དུ་འཁྱིལ་ཞིང་སྦོ་འཁྲོག་ཧྲིལ་ཧྲིལ་ན། །ཚབས་ཆེ་རླུང་གིས་གཅུས་ཤིང་འཁྲིལ་ན་སྤང༌། །ཕོ་ལོང་སྲིན་གླང་དཀར་མངར་གྲང་རྗེས་ན། །དྲུ་བུར་འདྲིལ་ལམ་ཚ་ལ་འབུགས་སྙམ་བྱེད། །ལྡང་དུབ་ཆེ་ལ་ལངས་དུས་སྲན་གླགས་མེད། །ཕོ་བ་རྒྱུ་མར་གཉན་བབས་གྲིས་དཀྲུགས་འདྲ། །ཕོ་བ་སྒྲིམས་ལ་ཉྭ་འབྲོས་བ་སྤུ་ལྡོག །རྩ་འཇུར་རྣ་བ་སླེབ་ཅིང་རྫི་མ་ཆག །ཕྱི་རྩ་གླང་ཐབས་ལྟེ་བའི་ཟུར་གཉིས་འཕར། །ནང་རྩ་གླང་ཐབས་སྲོག་རྩ་གཟེར་འཁྲུག་འཕར།།

བཅོས་ཐབས་མཆིན་གླང་གྲོག་ཞིང་བསྲོས་པས་བདུག །དྲི་ཆུར་བྲག་ཞུན་བ་ཤ་ཀ་སྦངས་བཏང༌། །གུར་ཀུམ་(ཅུ་གང་བ་ལེ་ཏིག་ཏ་ཨུཏྤལ་ཨ་རུ་མཚེ་ཀ་ར་)བདུན་དང་ཅུ་གང་(གུར་ཀུམ་སེ་འབྲུ་སུག་སྨེལ་བྲག་ཞུན་ཏིག་ཏ་པི་ལིང་ཚ་ལ་ཀ་ར)བརྒྱད་པ་སྦྱར། །རུ་ཐུང་རྩ་ལ་གཏར་ལ་ཁྲག་ཤེད་བཅག །མཆེར་གླང་སེ་འབྲུ་རྒྱམ་ཚྭ་བཞི་ཐང་བཏང༌།།མ་ནུ་སེ་འབྲུ་སུག་སྨེལ་(ཀ་ཀོ་ལ་རྒྱམ་ཚྭ་པི་ལིང་ཀ་ར་དྲུག་པ་ཆུ་སྐོལ་)འཕུལ་ལ་བྱིན། །ཡོས་སམ་སྲན་ཕུབ་དུགས་བྱ་མཆེར་རྩ་གཏར། །དེ་གཉིས་ཞི་དཀའ་ལྕུམ་རྩ(ཨ་རུ་དུར་བྱིད་རྒྱམ་ཚྭ་)འི་ཐང་གིས་སྦྱང༌། །སྣོད་གླང་གང་ཡང་དཔྱད་མཆོག་སྦྱོངས་ཡིན་པས། །སྟར་བུ་དུང་ཐལ་སྦྲུལ་ཤ་རྒྱམ་ཚྭ་དང༌། །དུར་བྱིད་བུ་རམ་དྲི་ཆུའི་རིལ་བུས་སྦྱང༌། །སྣོད་དུ་ཁྲག་མཁྲིས་མ་ཞུ་ལྷུང་བ་འདོན། །ཁྱད་པར་ཕོ་གླང་སྐྱུགས་ལ་རྒྱུ་མ་བཤལ། །ལོང་གླང་ནི་རུ་ཧ་ཡིས་དྲང་བར་བྱ། །ཚ་གླང་དུགས་གཏར་(བྲག་ཞུན་བ་ཤ་བ་ལེའི་ཐང་ལ་དོམ་མཁྲིས་གུར་ཀུམ་བཏབ་)ཐང་(ཨ་རུ་བྲག་ཞུན་གླ་རྩི་བོང་ང་དོམ་མཁྲིས་གུར་ཀུམ་སུག་སྨེལ་པྲི་ཡངྐུ་ལི་ཤིའི་)ཕྱེ་(ཨ་རུ་དུར་བྱིད་ལྕུམ་རྩ་རྒྱམ་ཚྭའི་)སྦྱོངས་ཀྱིས་བཅོས། །མཆིན་ཁྲག་ཕོ་བར་ལྷུང་ན་(སྟར་བུ་དུང་ཐལ་སོགས་ཀྱིས་)སྦྱང་བ་གཅེས། །རུ་ཐུང་གཏར་ཞིང་ཡོས་སམ་ཆུ་རྡོས་བདུག བྲག་ཞུན་དོམ་མཁྲིས་གུར་ཀུམ་(ཨུཏྤལ་བཞི་པ་ཀ་ར་)སྦྱར་ལ་བཏང༌། །མཁྲིས་པ་ལྷུང་ན་གཡའ་ཀྱི་(དུར་བྱིད་རྒྱམ་ཚྭ་)སྦྱོངས་སྐྱུགས་སྦྲག །རྗེས་ལ་སེ་འབྲུ་(བཞི་པའི་སྟེང་དུ་གུར་ཀུམ་དུག་ཉུང་གསེར་མེ)བདུན་པ་སྦྱར་བར་བྱ། །གྲང་གླང་དུགས་(ཚ་བ་གསུམ་)ཐང་(ཤིང་ཀུན་ཚྭ་གསུམ་)ཕྱེ་མ་བསྲེག་པས་བཅོས། །མ་ཞུ་ལྷུང་ན་(སྤྱང་ཚེར་དུར་བྱིད་རྒྱམ་ཚྭ་པི་ལིང་གི་)སྐྱུགས་རྗེས་དྲོད་སྨན་(སེ་འབྲུ་ཚ་བ་གསུམ་རྒྱམ་ཚྭ་ཁ་རུ་ཚྭ་)སྦྱར། །སྨུག་པོ་འཐབ་ལ་རུ་རྟ་དྲུག་པ་དང༌། །ཆུ་ལོ་ཧ་བོའི་དུགས་བསྟེན་རུ་ཐུང་གཏར། །ལྟེ་ཟུར་གཉིས་བསྲེག་ནི་རུ་འཇམ་རྩི་སྤེལ། །རྒྱུ་མར་རླུང་འཁྱིལ་མེས་བསྲོ་བཀྲུ་འཇམ་བཏང༌། །ཤིང་ཀུན་(ཁ་རུ་ཚྭ་ཕོ་རིས་སྒ་བུ་རམ་)བཞི་པའི་ཕྱེ་མ་ཆང་གིས་དབུལ། །སྲིན་ལ་རྒྱ་ཚྭ་དྭ་བའི་རྩ་བའམ། །ཤུ་ཏི་བུ་རམ་སྦྱར་བའི་རིལ་བུའམ། །ལང་ཐང་ཙེའམ་ཐང་ཕྲོམ་སྒོག་སྐྱའམ། །དཀར་པོ་ཆིག་ཐུབ་དྲི་ཆུར་སྦྱར་བས་འཇོམས། །རྟ་སྦངས་ཕུར་མོ་སྤྲུ་རྩའི་དུགས་ཀྱིས་བདུག །གཉན་གླང་ལྷོག་དུག་གསུམ་(གང་རུང་དང་པི་ལིང་རྒྱམ་ཚྭ་དྲི་ཆུར་བཏབ་)གྱི་སྦྱོར་བའམ། །བྱ་ཁྱུང་རིལ་བུས་བསད་རྗེས་རྒྱལ་བློན་(ཐར་ནུ་ཆུ་རྩ་)སྔོན་བུ་སྦྱར། །རྩ་གླང་རྐེད་པ་བཅག་ཅིང་རྩ་བཞི་བཅིང༌། །བཤལ་གཏར་ཚད་སྦྱང་མེ་ཡིས་རླུང་ལམ་དགག །མང་དུ་ཕྱེ་ལ་ནད་ངོས་མ་འདྲེས་ཟུངས། །ཉུང་དུ་བསྡུས་ལ་ལག་ལེན་གཉིས་སུ་དྲིལ། །ཞེས་གསུངས་སོ།།

བདུད་རྩི་སྙིང་པོ་ཡན་ལག་བརྒྱད་པ་གསང་བ་མན་ངག་གི་རྒྱུད་ལས་གླང་ཐབས་བཅོས་པའི་ལེའུ་སྟེ་བཞི་བཅུ་རྩ་དགུ་པའོ།། །།

མཐའ་མའི་འདོན་ཐེངས་།: 20.12.2022 ཉིན། 4:42 PM