ལེའུ་བཅོ་ལྔ་པ། གནས་སྐབས་ཀྱི་སྤྱོད་ལམ་བསྟན་པ།

དུས་སུ་སྤྱད་པའི་སྤྱོད་ལམ་བསྟན་ཟིན་པའི་རྗེས་ཐོག་དེ་ནས་ཡང་དྲང་སྲོང་རིག་པའི་ཡེ་ཤེས་ཀྱིས་འདི་སྐད་ཅེས་གསུངས་སོ། །དེ་ཡང་ཀྱེ་ཞེས་བོས་ནས་དྲང་སྲོང་ཆེན་པོ་ཡིད་ལས་སྐྱེས་འཁོར་དང་བཅས་པ་རྣམས་ལེགས་པར་ཉོན་ལ་ཡིད་ལ་ཟུངས་ཤིག་དང་ངས་བཤད་པར་བྱའོ་ཞེས་མཚམས་སྦྱར་ནས་བྱ་བ་སྤྱོད་ལམ་གྱི་གནས་ལས་གསུམ་པ་གནས་སྐབས་སུ་སྤྱད་པར་བྱ་བའི་སྤྱོད་ལམ་གྱི་ཁྱད་པར་བསྟན་པ་ནི་འདི་ལྟ་སྟེ་ཞེས་པའོ།།

ཚེ་རིང་ཞིང་ནད་མེད་པར་འདོད་པ་རྣམས་ཀྱིས་དུས་དང་གནས་སྐབས་ཐམས་ཅད་དུ་བཀྲེས་པ་དང་སྐོམ་པ་དང་སྐྱུག་པ་དང་གཡལ་དང་སྦྲིད་པ་དང་དབུགས་དང་གཉིད་དང་ལུད་པ་དང་མཆིལ་མ་དང་བཤང་བ་དང༌། འཕྱེན་དང་གཅིན་དང་ཁུ་བ་རྣམས་འབྱུང་བ་ལ་མངོན་དུ་ཕྱོགས་པ་དེའི་ཚེ་ན་གང་དགར་བཏང་བར་བྱའི་ཤུགས་དེ་ནི་ནམ་ཡང་བགག་པར་མི་བྱའོ།།

གང་ཞིག་ཤིན་ཏུ་བཀྲེས་པར་གྱུར་ཀྱང་ཁ་ཟས་བཀག་པར་གྱུར་ན་ལུས་ཞིག་ཅིང་ཉམ་ཆུང་བ་དང་ཡི་ག་འཆུས་ལ་མགོ་བོ་འཁོར་བའི་ནད་འབྱུང་བར་འགྱུར་བས། དེ་ལ་ཁ་ཟས་ཡང་ཞིང་སྣུམ་དྲོ་དང་ལྡན་པ་ཆུང་ངུ་ཆུང་ངུ་ནས་སྦྱར་བས་སེལ་བར་བྱེད་ཅིང༌། དེ་བཞིན་དུ་སྐོམ་པར་གྱུར་ཀྱང་བཏུང་བ་བཀག་ན་ཁ་སྐམ་ཞིང་མགོ་བོ་འཁོར་བ་དང༌། སྙིང་ནད་འབྱུང་ལ་མྱོས་པ་ལྟར་དྲན་པ་དང་མི་ལྡན་པར་འགྱུར་བས། དེ་ལ་ནི་བཟའ་བ་དང་བཏུང་བ་བསིལ་བར་བྱས་པའི་ཆོ་ག་ཐམས་ཅད་ཕན་པར་འགྱུར་རོ། །སྐྱུག་པ་བཀག་པ་ནི་དང་ག་འགགས་པ་དང་དབུགས་མི་བདེ་བ་དང་སྐྱ་རྦབ་དང་མེ་དབལ་དང༌། གཡན་པ་དང་འབྲས་དང་མཛེ་དང་མིག་ནད་དང་ལུད་པའི་ནད་དང་རིམས་ནད་ལ་སོགས་པ་འབྱུང་བར་འགྱུར་བས་དེ་ལ་ནི་སྨྱུང་བར་གནས་ཤིང་ཙནྡན་དང་ཨ་ག་རུ་ལ་སོགས་པའི་དུད་པ་རྣོན་པོ་རྔུབ་པ་དང་དེ་འདྲ་བའི་ཁུ་བས་ཁ་བཀང་སྟེ་དབོ་བར་བྱའོ། །སྦྲིད་པ་བཀག་པ་ལས་ནི་མིག་ལ་སོགས་པའི་དབང་པོ་མི་གསལ་ཞིང་མགོ་བོ་ན་བ་དང༌། གཉའ་བ་དང་གཉན་པའི་གནད་གཉིས་སུ་འདུས་པའི་གནད་རྣམས་རེངས་ཏེ་འགྱུར་མི་ཤེས་པ་དང༌། ཁ་ཕྱོགས་གཅིག་ཏུ་ཡོ་ཞིང་འགྲམ་ཆག་ཅེས་བྱ་བའི་རླུང་ནད་དུ་འགྱུར་བས་དེ་ལའང་དུད་རྣོན་དང་སྣ་སྨན་དང་ཉི་མ་ལ་བལྟ་བ་སོགས་པའི་ཆོ་གས་བསལ་བར་བྱའོ། །གཡལ་བཀག་པ་ནའང་སྦྲིད་པ་བཀག་པ་ལས་བྱུང་བའི་ནད་དེ་འདྲ་བ་འབྱུང་བས་ཆོ་ག་ནི་རླུང་འཇོམས་པར་ནུས་པ་ཐམས་ཅད་ཕན་པ་ཡིན་ནོ། །རྩོལ་བས་ངལ་ཞིང་དུབ་པའི་དབུགས་ཐབ་ཐོབ་པོ་དེ་ཉིད་བཀག་པ་ལས་ནི་སྐྲན་དང་སྙིང་ནད་འབྱུང་བས་མྱོས་ཤིང་མི་དྲན་པར་འགྱུར་བ་དེར་ནི་ངལ་གསོ་བ་དང་རླུང་འཕེལ་སེལ་བའི་ཆོ་ག་ཉིད་ཕན་ནོ། །གཉིད་བཀག་པ་ལས་ནི་གཡལ་མང་བ་དང་ལུས་སྙོམ་པ་སྟེ་སྒྱིད་ལུག་པ་དང་མགོ་བོ་ལྕི་བ་དང་མིག་འགྲིབས་ཤིང་ཁ་ཟས་མི་འཇུ་བ་དག་འབྱུང་བས། དེ་ལ་ཤ་ཁུ་དང་ཆང་ཞིམ་པོ་བཏུང་བ་དང༌། བསྐུ་མཉེ་བྱ་ཞིང་གཉིད་ལོག་བས་ཕན་པར་འགྱུར་རོ། །ལུད་པ་བཀག་པས་ནི་ལུད་པ་ཉིད་འཕེལ་ཞིང་དབུགས་མི་བདེ་བ་དང༌། ཤ་སྐེམ་པ་དང་སྐྱིགས་བུ་དང་སྙིང་ནད་དང་ཡི་ག་འཆུ་བར་འགྱུར་བས་དེར་ནི་ལུད་པ་བསལ་བའི་ཆོ་ག་བཅའ་སྒ་དང་པི་པི་ལིང་ལ་སོགས་པ་བུ་རམ་དང་སྦྱར་བའི་ལྡེ་གུ་ལྟ་བུ་བརྒྱད་པ་རྩ་འགྲེལ་ལས་བྱུང་བ་ལྟར་བྱའོ། །མིག་ལས་འབྱུང་བའི་མཆི་མ་བཀག་པ་ལས་སྙིང་དང་མགོ་བོ་ན་བ་དང་སྣ་ཆུ་འཛག་ཅིང་མགོ་བོ་འཁོར་བ་དང་ཡི་ག་འཆུས་པར་འགྱུར་བས་དེ་ལ་ཆང་བཏུང་ཞིང་གཉིད་ལོག་པ་དང་ཡིད་དུ་འོང་བའི་གྲོགས་ཀྱིས་གཏམ་སྙན་སྨྲ་བ་རྣམས་ཕན་ནོ། །འཕྱེན་བཀག་པ་ལས་རྟུག་པ་སྐམ་ཞིང་འཕྱེན་ཏེ་འོག་རླུང་དང་བཤང་བ་འགགས་པ་དང༌། སྐྲན་དང་སྦོས་ཤིང་གཟེར་བ་དང༌། མིག་རྟུལ་ཏེ་མི་མཐོང་བ་དང་ལུས་ཀྱི་དྲོད་ཆུང་ཞིང་སྙིང་ནད་བསྐྱེད་པར་འགྱུར་ལ། བཤང་བ་བཀག་པས་གྱེན་དུ་ལོག་སྟེ་ཁ་རུ་མི་གཙང་བ་དངོས་སུ་འབྱུང་བ་དང་ཀླད་པ་ན་ཞིང་རྐང་ལག་གི་ཉྭ་འགྱུར་བ་དང་ཆམ་པས་འདེབས་པ་དང༌། དེར་མ་ཟད་སྔར་འཕྱེན་བཀག་པ་ལས་འབྱུང་བར་བཤད་པའི་ནད་དུ་འགྱུར་ཞིང༌། གཅིན་བཀག་པ་ལས་ཀྱང་རྡེའུའི་ནད་དང་ཆུ་སོའི་ནད་སྲི་བ་སོགས་དང་ཕོ་མཚན་གྱི་ནད་དང་དཀུ་སྟེ་བརླའི་ནད་རྣམས་སུའང་སྔར་འཕྱེན་བཀག་པ་ལས་འབྱུང་བའི་ནད་འབྱུང་བས། དེ་རྣམས་བསལ་བའི་སྨན་འཇམ་པོའི་རེང་བུ་མས་ནས་བཏང་ཞིང་ལུས་ཆུ་ཚན་ནམ་བདུད་རྩི་ལྔའི་ལུམས་ཀྱིས་བཅིང་བ་དང༌། བསྐུ་བྱུག་དང་དུག་དང་སྨན་མར་ལ་སོགས་པ་བསྟེན་པར་བྱའོ། །ཁུ་བ་བཀག་པ་ལས་ཀྱང་ཁུ་བ་དེ་ཉིད་འཛག་ཅིང་ཕོ་མཚན་ན་བ་དང༌། ཆུ་འགགས་ཤིང་རྡེའུ་འཕེལ་བ་དང་དབང་པོ་ལྡང་བར་མི་ནུས་པ་སོགས་མ་ནིང་དུ་འགྱུར་བས་དེ་ལ་ཡང་མས་བཏང་བ་དང་ལུས་བཅིང་བ་གོང་ལྟར་བྱས་ལ་བུད་མེད་ལ་སྤྱད་པར་བྱའོ། །དེ་བཞིན་དུ་ཏིལ་ལ་སོགས་པའི་འབྲུ་མར་དང༌། འོ་མ་དང་ཁྱིམ་བྱའི་ཤ་དང་ཆང་ཞིམ་པོ་རྣམས་བཏང་བས་ཕན་པར་འགྱུར་བ་ཡིན་ནོ།།

བཤད་ཟིན་པ་དེ་ལྟར་བཀྲེས་སྐོམ་ལ་སོགས་པའི་ཤུགས་ནི་ཉེ་བར་བཀག་པ་དང་ཡང་ན་མི་འབྱུང་བཞིན་དུ་ནན་གྱིས་བཙིར་བ་དེ་འདྲ་བ་ཡིས་ནི་དངོས་སུ་སྨོས་པ་དེ་རྣམས་སུ་མ་ཟད་རིམས་ལ་སོགས་པའི་ནད་ཀུན་ཀྱང་འབྱུང་བར་འགྱུར་ཞིང་འཕྲལ་དུ་ཡང་རླུང་འཁྲུགས་པར་འགྱུར་བས་དེ་ཕྱིར་རླུང་དེའི་གཉེན་པོའི་ཟས་དང་སྨན་དང་སྐོམ་ལ་སོགས་པ་སྦྱར་བར་བྱའོ། །དེ་བཞིན་དུ་ནད་གང་ལའང་སྨྱུང་བར་གནས་པ་དང༌། ཞི་བྱེད་ཀྱི་སྦྱོར་བས་བཞུ་བ་བྱས་ཏེ་རེ་ཞིག་ནད་མེད་པར་གྱུར་ཀྱང༌། ནམ་ཞིག་ན་ནད་ཀྱི་རོ་མ་དེ་ལས་ལྡང་བར་འགྱུར་བ་སྲིད་པས་ན་ཐོག་མ་ཉིད་ནས་བཤལ་སྐྱུག་ལ་སོགས་པའི་སྦྱོང་བྱེད་ཀྱིས་རྩ་བ་ནས་ལེགས་པར་སྦྱངས་ན་སླར་མི་འབྱུང་བ་ཡིན་ལ། དེའི་ཕྱིར་དགུན་སྟོད་དང་དགུན་སྨད་ཀྱི་དུས་སུ་བསགས་པའི་བད་ཀན་གྲང་ནད་དེ་དཔྱིད་དུས་ལྡང་བར་འགྱུར་བ་དེའི་སྐབས་སུ་སྐྱུགས་ཀྱི་སྒོ་ནས་སྦྱང་བ་དང༌། སོས་ཀ་བསགས་པའི་རླུང་ནད་དབྱར་དུས་སུ་ལྡང་བའི་སྐབས་སུ་འཇམ་རྩི་ལ་སོགས་པས་སྦྱང་བ་དང༌། དབྱར་ག་བསགས་པའི་མཁྲིས་པ་སྟོན་དུས་སུ་ལྡང་བའི་སྐབས་སུ་བཤལ་གྱི་སྒོ་ནས་སྦྱང་བ་སྟེ། དེ་ལྟ་བུའི་སྒོ་ནས་ལེགས་པར་སྦྱངས་པས་ན་ནད་རོ་རྩ་བ་ནས་ཐོན་ཏེ་ནད་མེད་པར་འགྱུར་བས་ན་ལོ་རེའི་དུས་སུ་དཔྱད་པར་བསྔགས་པ་ཡིན་ནོ། །དེ་ལྟར་ན་མི་གང་ཞིག་དུས་རྟག་ཏུ་རང་གི་ལུས་ལ་ཕན་པའི་ཟས་དང་སྤྱོད་ལམ་འཆད་འགྱུར་དང་བཤད་ཟིན་པའི་ཚུལ་དེ་རྣམས་ལ་ལེགས་པར་བརྟགས་ཤིང་བརྟགས་ཏེ་འདི་བྱས་ན་ནི་འདི་ལྟ་བུའི་འབྲས་བུ་འབྱུང་ཞིང་འདི་བྱས་ན་ནི་འདི་ལྟ་བུ་རྫོགས་ཤིང་མཐར་ཕྱིན་པར་མི་འགྱུར་རོ་ཞེས་ཤེས་པར་བྱས་ནས་སྤང་བླང་བྱེད་པ་དང༌། རང་གི་བློས་དེ་ལྟར་བརྟག་པར་མ་ནུས་ན། གསོ་བ་རིག་པའི་ཚུལ་མ་ལུས་པ་ཁོང་དུ་ཆུད་པའི་མཁས་པ་ཉམས་དང་ལྡན་པ་བསྟེན་ཏེ། དེས་ཇི་ལྟར་སྨྲས་པ་བཞིན་བྱེད་པ་དེ་དག་ལ་ནི་ནད་ཅི་ཡང་མི་འབྱུང་བ་ཡིན་ནོ། །དེ་བས་ན་ནད་ཀུན་གློ་བུར་དུ་མི་སྐྱེ་བར་བྱ་བའི་ཕྱིར་དང༌། གལ་ཏེ་སྐྱེས་པ་རྣམས་ཀྱང་ཉེ་བར་ཞི་བར་བྱ་བའི་ཕྱིར་དུ་གནས་སྐབས་ཀྱི་སྤྱོད་པ་ཉེ་བར་སྤྱད་པར་བྱ་བའི་ཆོ་ག་འདི་ཉིད་མཆོག་ཏུ་བསྔགས་པ་ཡིན་པས་དྲན་ཤེས་བཞིན་དུ་ཉམས་སུ་ལོངས་ཤིག་ཅེས་གསུངས་སོ།།༔

བདུད་རྩི་སྙིང་པོ་ཡན་ལག་བརྒྱད་པ་གསང་བ་མན་ངག་གི་རྒྱུད་ལས་དུམ་བུ་གཉིས་པ་བཤད་པའི་རྒྱུད་ཀྱི་གནས་སྐབས་ཀྱི་སྤྱོད་ལམ་བསྟན་པའི་ལེའུ་སྟེ་བཅོ་ལྔ་པའོ།། །།

མཐའ་མའི་འདོན་ཐེངས་།: 05.09.2023 ཉིན། 11:23 AM