ལེའུ་བཅོ་བརྒྱད་པ། ཁ་ཟས་བསྲུང་བ་དང་ཟས་ཚོད་རན་པར་བཟའ་བ།

དེ་ནས་ཡང་དྲང་སྲོང་རིག་པའི་ཡེ་ཤེས་ཀྱིས་འདི་སྐད་ཅེས་གསུངས་སོ། །ཀྱེ་དྲང་སྲོང་ཆེན་པོ་ཉོན་ཅིག །དུས་ཀུན་ཏུ་ནི་ཟས་ཚོད་རན་པར་བཟའ། །ཟས་རྣམས་ལྕི་ཡང་ཚད་ལས་དཔག་བྱ་སྟེ། །ཡང་ལ་འགྲངས་ཤིང་ལྕི་ལ་ཕྱེད་འགྲངས་ཙམ། །བདེ་བླག་འཇུ་སླ་ཚོད་ཟིན་ཞེས་སུ་བཤད། །དེ་ནི་ལུས་འཚོ་མེ་དྲོད་སྐྱེད་བྱེད་ཡིན། །གལ་ཏེ་ཟས་ཚོད་མ་ཟིན་ཆུང་གྱུར་ན། །སྟོབས་མདངས་མི་འཕེལ་རླུང་ནད་མ་ལུས་འབྱུང༌། །ཚད་ལས་ཐལ་ན་མ་ཞུ་བེ་སྣབས་སྐྱེད། །དེ་ཡིས་མེ་མཉམ་རླུང་རྒྱུའི་རྩ་སྦུབས་བཀག །ཕོ་བའི་དྲོད་ཉམས་ཉེས་པ་མ་ལུས་སྐྱེད། །དེ་ཕྱིར་ཟས་དང་ཕོ་བའི་མེ་དྲོད་སྦྱར། །ལྟོ་བའི་ཆ་གཉིས་ཟས་ལ་ཆ་གཅིག་སྐོམ། །ཆ་བཞི་པ་ནི་རླུང་གི་གནས་སུ་བཞག །ཟས་ཟོས་རྗེས་སུ་སྐོམ་འཐུངས་ངོམས་དང་ཁྱབ། །ཟས་འདྲུལ་འཇུ་ཞིང་ལུས་བརྟས་སྟོབས་འཕེལ་བྱེད། །སྐད་འགགས་གློ་རྡོལ་ལུད་པ་ཆམ་པ་སོགས། །ནམ་ཚོང་ཡན་ཆད་ནད་ལ་གནོད་པ་ཡིན། །མེ་དྲོད་ཆུང་ལ་ཤ་ཟོས་ཆང་འཐུང་བྱ། །མི་འཇུ་སྦོས་ན་ཟོས་རྗེས་ཆུ་སྐོལ་བཏུང༌། །སྐེམ་པོ་རྒྱས་པར་བྱེད་ན་ཆང་བཏུང་བྱ། །སྦོམ་པོ་དབྲི་ལ་སྦྲང་རྩིའི་ཆུ་བཏུང་ངོ༌། །ཞོ་ཆང་དུག་སྦགས་སྦྲང་རྩི་ཟོས་པ་ལ། །རྗེས་སུ་ཆུ་བསིལ་འཐུངས་ན་ཕན་པ་ཡིན། །ཟས་ཟོས་བར་མཐའ་ཐོག་མར་སྐོམ་འཐུངས་ན། །ཉམ་འཚག་རན་ཞིང་སྦོམ་དང་སྐེམ་པོར་འགྱུར། །ཉེས་པ་ལམ་མིན་མི་འགྲོ་མེ་དྲོད་འབར། །ལུས་ཡང་དང་ག་བདེ་ལ་དབང་པོ་གསལ། །སྟོབས་ཆེ་བཤང་གཅི་འོག་རླུང་བདེ་བར་རྒྱུ། །ཟས་ཚོད་ལེགས་པར་ཟིན་ལས་འབྱུང་བར་འགྱུར། །ཞེས་གསུངས་སོ།།

བདུད་རྩི་སྙིང་པོ་ཡན་ལག་བརྒྱད་པ་གསང་བ་མན་ངག་གི་རྒྱུད་ལས་ཁ་ཟས་བསྲུང་བ་དང་ཟས་ཚོད་རན་པར་བཟའ་བའི་ལེའུ་སྟེ་བཅོ་བརྒྱད་པའོ།། །།

མཐའ་མའི་འདོན་ཐེངས་།: 14.12.2022 ཉིན། 10:16 AM