ལེའུ་གྱ་བཞི་པ། སྐེའི་རྨ་གསོ་བ།

དེ་ནས་ཡང་དྲང་སྲོང་ཡིད་ལས་སྐྱེས་ཀྱིས་འདི་སྐད་ཅེས་ཞུས་སོ། །ཀྱེ་སྟོན་པ་དྲང་སྲོང་རིག་པའི་ཡེ་ཤེས་ལགས། །ཡན་ལག་བྱང་ཁོག་མགོ་ལ་མ་གཏོགས་པའི། །སྐེ་ཡི་རྨ་ལ་བཅོས་ཐབས་ཇི་ལྟར་བགྱི། །འཚོ་མཛད་སྨན་པའི་རྒྱལ་པོས་བཤད་དུ་གསོལ། །ཞེས་ཞུས་པ་དང༌།  དྲང་སྲོང་རིག་པའི་ཡེ་ཤེས་ཀྱིས་འདི་སྐད་ཅེས་གསུངས་སོ། །ཀྱེ་དྲང་སྲོང་ཆེན་པོ་ཉོན་ཅིག །སྐེ་ནི་ཡར་གྱི་མགོ་ལ་མི་གཏོགས་ཏེ། །མར་ལ་བྱང་ཁོག་སྟོད་སྨད་ལ་མི་གཏོགས།  །ཡན་ལག་རྣམ་པ་བཞི་ལའང་གཏོགས་མ་ཡིན། །སྐེ་ནི་རུས་པའི་མཁར་ལ་རྩ་ཡི་འཕྲང༌། །ཤ་དང་ཆུ་རྒྱུས་ཀུན་གྱི་འདྲིལ་ས་ཡིན། །རུས་གཉན་ལྷ་བ་འབྱེར་བས་མགོ་དང་འདྲ། །རྩ་གཉན་རྩ་ཐིགས་གསོག་པས་བྱང་ཁོག་འདྲ། །ཤ་དང་ཆུ་རྒྱུས་གཉན་པས་ཡན་ལག་འདྲ། །དེ་ཕྱིར་གསུམ་འགྱུར་སྐེ་ཡི་བཅོས་ཐབས་བསྟན།།

སྐེ་ལ་རུས་པའི་འཕང་ལོ་རྣམ་པ་ལྔ། །ལྟག་པ་མཁར་དང་མཁར་མཚམས་བྱ་འདབས་བཞི། །ལྟག་པ་མཁར་མཚམས་རྒྱུངས་པའི་གནད་ཡིན་ཏེ། །རྒྱུངས་པ་ཟིན་ན་ལྟག་པ་དགྱེ་བོར་འགྲོ། །མགོ་ལྕི་ཁ་ལྕེ་སྐམ་ལ་དྲི་ཆུ་སྡོམ། །མིག་འགྲིབ་སྟོད་གཟེར་སྒྱིད་འཁྲིལ་ཡན་ལག་ཕྲ། །གསོ་བའི་ཐབས་མེད་བདུན་དགུའི་དུས་ན་འཆི།   མཁར་དང་བྱ་འདབས་རྩར་ཟིན་གསོ་དཀའ་སྟེ། །རྒྱ་ཚྭ་བྱང་པ་རུ་རྟའི་རེང་བུ་གཞུག །རྣག་ཞུགས་རུས་པ་བྲུད་ལ་ལྷ་ཁྲག་སྤྲད། །ཕྱིང་པ་བག་འདག་སྦྱར་བས་ཁ་ཤ་ལྟེམ། །མར་ཚིལ་སྒོ་ང་སྦྱར་བའི་ཁ་ཞུན་བྱ། །ཧོང་ལེན་གླ་སྒང་སེང་ལྡེང་བགྲུངས་ཐང་ངམ། །ཡང་ན་སྟབ་སེང་ཤིང་མངར་བསྡུས་ཐང་བཏང༌།།

སྐེ་ཡི་རྩ་ལ་ཕྱི་རྩ་ནང་རྩ་གཉིས། །ཕྱི་ཡི་རྩ་ལ་ཁྲག་རྩ་ཆུ་རྩ་གཉིས། །རླུང་ཁྲག་གཉིས་འདོམ་འཕར་རྩ་དག་དང་གསུམ། །འཕར་རྩ་ཨོལ་གོང་མིད་པའི་བར་ན་ཡར། །གློ་བུ་སྙིང་རྩ་གསེར་གྱི་སྐུད་པ་ཡོད། །དེ་ཆོད་རྩིད་བུ་སོ་སྙིང་ཟིན་པ་འདྲ། །ཞག་གྲངས་བཅུ་གཅིག་ཚུན་ཆད་ནང་དུ་འཆི། །ཨོལ་གོང་པ་ཡི་གཡས་གཡོན་འདབས་ན་ཡར། །སྙིང་རྩ་གཉིད་ལོག་རྩེ་འདྲ་རྣམ་གཉིས་ཡོད། །རྩ་དེ་རྦད་ཀྱིས་ཆོད་ན་ཨ་ཅང་ཆེ། །བརྡབས་ཀྱང་ཕོག་སྔ་འགྱེལ་སྔར་འགྲོ་བ་ཡིན། །དེ་ནས་ཕྱིར་ལ་ཕུན་རེ་བཅལ་བ་ན། །སྙིང་རྩ་རྩེ་ནག་རྣམ་པ་གཉིས་ཡོད་དེ། །རྩ་དེ་ཆོད་པར་མ་གྱུར་བཅོས་གླགས་ཡོད། །དེ་ནས་ཕྱིར་ལ་ཕུན་རེ་བཅལ་བ་ན། །གློ་སྙིང་བསྡོངས་པའི་ཁྲག་རྩ་རྩེ་ཆུང་ཡོད། །དེ་ཆོད་ཁྲག་མི་ཆོད་དེ་འབོག་ནས་འཆི། །དེ་དག་བཙན་བརྡུངས་འཐེམས་ཆོད་གསོ་བའི་ཐབས། །མོད་དུ་གོང་འོག་མེ་རྒྱས་གདབ་པར་བྱ། །ཁྲག་མ་ཐུབ་ན་རྨ་ལ་རྒྱ་ཁྱིམ་བཅའ། །མི་དང་གླང་དང་ཁྱི་ནག་ཉ་རྩ་མོ། །དོམ་མཁྲིས་ཀ་ར་དཀར་པོ་སྦྱར་ལ་བཏང༌། །རླུང་ཆེ་ནམ་ཟླ་གྲང་དུས་སྦང་གར་དང༌། །ཞུན་མར་སྤོད་ནན་བག་ཕྱེ་བོང་སྤུས་མནན། །རྨ་བུག་ཁོལ་བཏོན་མཁྲིས་སྣ་ཞོ་སྦྱར་བཏང༌། །ཚ་བ་རྒྱས་དང་དྲོ་དུས་བསྐོལ་ཞོ་དང༌། །བག་ཕྱེ་ཤིང་མངར་སྦྱར་བ་གོང་བཞིན་ནོ། །ལྟག་པ་ཆུ་བའི་གཡས་གཡོན་གཉིས་ན་མར། །ཆུ་རྩ་སྦུ་གུ་ཅན་ཞེས་བྱ་བ་ཡོད། །དེའི་ཕྱིར་མཚོན་གང་ཆུ་རྩ་སྒྲིལ་མ་ཡོད། །དེ་གཉིས་ཆོད་ན་གཡས་གཡོན་སྣེ་བསྣོལ་བྱེད། །གཉའ་རེངས་སྨད་འཕྱེས་དྲི་ཆུ་འགགས་ནས་འཆི། །རྣ་ཤལ་འོག་ན་ཆུ་རྩ་རཏྣ་ཡོད།  །དེ་ཆོད་ལག་པ་བཤལ་སྦྲིད་བྱ་བ་ཉམས། །དེ་དག་བཅོས་ཐབས་གོང་འོག་མེ་རྒྱས་གདབ། །རྨ་ལ་ཨ་ས་སྣུམ་ནན་ཚན་དོས་བདུག །སྨད་འཕྱེས་གླ་རིལ་བཙོས་པའི་ལུམས་སུ་གཞུག །གཉའ་རེངས་ལག་པ་ཞ་ན་བདུད་རྩིའི་ལུམས། །དྲི་ཆུ་འགགས་ན་ཆུ་སྨན་ནི་རུས་དྲང༌། །ནང་རྩ་བཅུ་གསུམ་ཆོད་ན་དྲི་ཆུ་སྡོམ། །ཡན་ལག་གཅུད་ལ་བོར་སྙམ་ལོག་པར་འཛིན། །ཁ་ཁ་ལྕེ་སྐམ་གདོང་སྣུམ་མིག་སྤྲིན་སེར། །མགོ་འཁོར་ཟས་སྐྱུག་མཁས་ཀྱང་བཅོས་སུ་མེད།།

མདུན་གྱི་རྒྱངས་ཤ་ལས་བྱེད་ཆོད་པ་ན། །ཨ་ས་འོལ་སྐོམ་མར་ཚིལ་དྲོད་བབ་མནན། །ཧྲེམ་ན་ཨ་ས་བ་དང་ཚོས་ལུམས་བྱ། །ཧྲེམ་མེད་སྐྲངས་ན་གོང་གི་ཆས་དང་འདྲ། །ཨོལ་གོང་མིད་པ་རྐེད་དུ་ཆད་ན་འཆི། །གཤགས་ན་མཁྲིས་པ་བཏབ་ལ་རྒྱུས་པས་བཙེམ། །སྐྱི་དཀར་སྤྱིན་ཆུ་བག་འདག་ཕྱིང་པ་ལྟེམ། །ཟས་སྐོམ་བསིལ་ལ་འཇམ་པའི་ནུར་ཐུག་བཏང༌། །ཨོལ་གོང་རླུང་ཤོ་སྐྲངས་ན་དཀར་ནག་མཚམས། །སྔོན་བུ་སྤྱི་གཙུག་གསེར་གྱིས་བསྲེག་པར་བྱ།།

ལྟག་པའི་ཆུ་ལེབ་ཆོད་ན་ཨ་ཅང་ཆེ། །གཤགས་ཀྱང་ཕོག་སྔ་འགྱེལ་སྔར་འགྲོ་བ་ཡིན། །ལུས་པོ་ཐག་པས་གཅུད་ལ་བོར་བ་འདྲ། །མཁྲིས་སྣ་རྡོ་རྒྱུས་ཤུ་དག་ཨ་རུའི་ཐལ། །ཁུར་ཞོ་ཁྱེ་འཐུང་ནུ་ཞོའི་ལྡེ་གུ་ཡིས། །ཆུ་བའི་ཉྭ་གཡོག་སྐྱི་དཀར་སྤྱིན་ཆུས་ལྟེམ། །རྨ་ཡི་འཇིབ་རྩིར་ཕྲུམ་སར་བཏབ་པར་བྱ། །ཉལ་འདྲེས་མི་བྱ་ཙོག་གེ་བསྡད་ལ་གསོ། །མདོར་ན་རུས་པ་མགོ་ཡི་ཚུལ་དུ་བཅོས། །རྩ་གཉན་བྱང་ཁོག་ཚུལ་དུ་བཅོས་པར་བྱ། །ཤ་དང་ཆུ་རྒྱུས་ཡན་ལག་ཚུལ་དུ་བཅོས། །བསིལ་འཇིབ་དྲགས་ན་དྲི་ཆུ་སྡོམ་པར་བྱེད། །དྲོད་ལུམས་དྲགས་ན་རྩ་ཁ་འབུ་བར་བྱེད། །མེ་བཙའ་དྲགས་ན་ཆུ་རྒྱུས་འཁུམས་པས་ན། །དེ་ཕྱིར་གསུམ་འཛོམ་བསིལ་དྲོད་སྙོམས་པར་བཅོས། །ཞེས་གསུངས་སོ།།

བདུད་རྩི་སྙིང་པོ་ཡན་ལག་བརྒྱད་པ་གསང་བ་མན་ངག་གི་རྒྱུད་ལས་སྐེའི་རྨ་གསོ་བའི་ལེའུ་སྟེ་བརྒྱད་ཅུ་རྩ་བཞི་པའོ།། །།

མཐའ་མའི་འདོན་ཐེངས་།: 21.12.2022 ཉིན། 10:28 AM