སྨན་རྩིས་དྲ་བ། - རྣམ་འགྲེལ་གསེར་གྱི་ཤིང་རྟ།

སྐབས་བཅོ་བརྒྱད་པ། དུས་བཞིའི་ཐར་ངེས་པ་བསྡུ་བའི་ཚུལ་བཤད་པ།

བརྗོད་བྱ་སྤེལ་མཁན། རྩོམ་སྒྲིག་པ། (admin) ཟླ་ཚེས། 16.12.2013
རྣམ་འགྲེལ་གསེར་གྱི་ཤིང་རྟ། >> སྐབས་བཅོ་བརྒྱད་པ། དུས་བཞིའི་ཐར་ངེས་པ་བསྡུ་བའི་ཚུལ་བཤད་པ།

ད་ནི་སྐབས་བཅོ་བརྒྱད་པ་དུས་བཞིའི་མཐར་ངེས་པ་བསྡུ་བའི་ཚུལ་བཤད་པ་ལ་བསྟན་བཤད་གཉིས་ལས། དང་པོ་ནི། དུས་བཞིའི་མཐའ་རུ་སོགས་སོ། །གཉིས་པ་ལ། བྱེད་པའི་སྟོང་རྩིས་དང༌། གྲུབ་པའི་མཐའི་སྟོང་རྩིས་སོ། དང་པོ་ནི། གཟའ་རྣམས་ཀྱིས་རང་རང་གི་དཀྱིལ་འཁོར་ལན་གཅིག་འཁོར་བའི་གྲངས་ནི་གཟའ་རང་རང་གི་ཞག་གཅིག་ཏུ་འགྱུར་ཏེ། སྤེན་པའི་དཀྱིལ་འཁོར་ལོ་སུམ་ཅུ། སྒྲ་གཅན་གྱི་ལོ་བཅོ་བརྒྱད། ཕུར་བུ་ལོ་བཅུ་གཉིས། མིག་དམར་གྱི་ཟླ་བ་བཅོ་བརྒྱད། ཉི་ལྷག་སངས་གསུམ་གྱི་ཞག་སུམ་བརྒྱ་དྲུག་ཅུ། ཟླ་བའི་ཞག་སུམ་ཅུའོ། དེ་དག་ཀྱང་རགས་རྩིས་ཏེ། རྒྱུ་མཚན་ཟླ་བ་ལ་ཞག་གསུམ་ཙམ་གྱིས་མང་བ་དང༌། མིག་དམར་ལ་ཟླ་བ་བཞི་དང་ཞག་ཉེར་བདུན་ཆད་པ་སོགས་སྔར་བཤད་པའི་གཟའ་རང་རང་གི་དཀྱིལ་འཁོར་གྱི་ཞག་གྲངས་རྣམས་ཟླ་བ་དང་ལོར་དྲིལ་བས་ཤེས་སོ། །དཀྱིལ་འཁོར་རགས་པ་དེའི་ཕྱེད་ནི་གཟའ་ཞག་ཕྱེད་ཡིན་པས། སྤེན་པའི་ལོ་བཅོ་ལྔ། སྒྲ་གཅན་གྱི་ལོ་དགུ། ཕུར་བུའི་ལོ་དྲུག མིག་དམར་གྱི་ཟླ་བ་དགུ། ཉི་ལྷག་སངས་གསུམ་གྱི་ཟླ་བ་དྲུག་རེ། ཟླ་བའི་ཞག་བཅོ་ལྔའོ། དེ་དག་བསྡོམས་པས་མི་ལོ་སུམ་ཅུ་རྩ་གཉིས་དང་ཟླ་བ་ཕྱེད་བཅས་གསུམ་ནི་གཟའ་རྣམས་ཀྱི་ཞག་ཕྱེད་ཡིན་ནོ། དེ་ཡོན་ཏན་གསུམ་གྱིས་བསྒྱུར་བས་ལོ་གོ་དྲུག་དང་ཟླ་བ་ཕྱེད་བཅས་བཅུའོ། །དེ་ལ་ལོ་གྲངས་དེ་ཉིད་ཀྱི་ཡེ་ཤེས་ཀྱི་རླུང་སོ་གཉིས་ཆ་བུ་ལོན་དུ་བླངས་པའི་ལོ་གསུམ་དང་ཕྱོགས་གསུམ་བསྣན་པས་ལོ་བརྒྱ་སྟེ་གཟའ་ཞག་ཕྱེད་དང་གཉིས་སོ། དེ་གཉིས་ཀྱིས་བསྒྱུར་བས་གཟའི་ཞག་གསུམ། དེ་བཅུས་བསྒྱུར་ཟླ་བ་གཅིག དེ་བཅུ་གཉིས་ཀྱིས་བསྒྱུར་བས་ལོ་གཅིག དེ་བརྒྱས་བསྒྱུར་བས་གཟའ་རྣམས་ཀྱི་བུ་ལོན་དང་བཅས་པའི་ལོ་བརྒྱའོ། །དེ་གནས་གཉིས་འོག་མར་བཅུས་ཕྱེ་བའི་ནོར་གྱིས་སྟེང་མར་ཕྲི་བ་ནི་བུ་ལོན་མེད་པའི་གཟའི་ལོ་བརྒྱ་སྟེ། མི་ལོ་ས་ཡ་གཉིས་ཆིག་འབུམ་དྲུག་ཁྲི་ཡོད་དོ། དེ་ནི་དུས་བཞི་ཆེན་པོའི་ཕྱེད་ཡིན་ཞིང་གཙོ་བོའི་རྩ་གཡོན་པའི་དཀྱིལ་འཁོར་ལྔ་རྒྱུ་བའི་ཡུན་ཚད་དོ། འདིར་གཙོ་བོ་ཞེས་པ་ནི། ཁམས་ལེར་སྲིད་རྩེའི་ལྷ་ལ་གཙོ་བོ་ཞེས་བཤད་པ་དང་མི་གཅིག་སྟེ། དེའི་དབུགས་རེ་ལ་ལོ་ཉི་ཁྲི་ཆིག་སྟོང་དྲུག་བརྒྱ་རེ་ཡོད་ལ། འདིའི་དབུགས་རེ་ལ་ལོ་སྟོང་ཉིས་བརྒྱ་ལས་མེད་པའི་ཕྱིར་ཏེ། འཕོ་ཆུང་གཅིག་གི་ཚད་བཞི་འབུམ་སུམ་ཁྲི་ཉིས་སྟོང་ལ་སུམ་བརྒྱ་དྲུག་ཅུས་བགོས་པས་དེ་ཉིད་འབྱུང་བའི་ཕྱིར་རོ། དེས་ན་འདི་ནི་འཕོ་ཆེན་གཉིས་ལ་དུས་བཞི་རྫོགས་པར་བསྟན་པའི་ཆེད་དུ་ཕྱི་རོལ་དུ་དུས་བཞི་ཆེན་པོ་ལན་དྲུག་ལ་ཉིན་ཞག་ཏུ་བྱེད་པའི་གཙོ་བོ་ཡོད་དེ་ཞེས་དགོངས་ཏེ་བསྟན་པ་ཡིན་གསུངས་སོ། །དེ་ལྟར་ངེས་པར་བྱས་ནས་དུས་བཞིའི་ཚད་ནི། དུས་བཞི་ཆེན་པོའི་ཕྱེད་ལོ་མཁའ་མཁའ་ཐིག་སྟོང་རོ་གཟུགས་ལག་པ་ལ་ལྔས་བགོས་པས་གཙོ་བོའི་དཀྱིལ་འཁོར་གཅིག་གི་གྲངས་དང་རྩོད་ལྡན་གྱི་ཚད་དོ། །དེ་གནས་བཞིར་བཞག་པའི་འོག་མ་རང་སོར་བཞག དེའི་སྟེང་མ་གཉིས་ཀྱིས་བསྒྱུར། དེའི་སྟེང་མ་གསུམ་གྱིས་བསྒྱུར། དེའི་སྟེང་མ་བཞིར་བསྒྱུར་བས་སྟེང་ནས་མར་རིམ་པ་བཞིན་དུ་ས་ཡ་བདུན་འབུམ་སོགས་རྫོགས་ལྡན་དང་ས་ཡ་གཅིག་སོགས་སུམ་ལྡན་དང༌། འབུམ་ཚོ་བརྒྱད་དང་སོགས་ཀྱིས་གཉིས་ལྡན་དང༌། བཞི་འབུམ་སུམ་ཁྲི་སོགས་ཀྱིས་རྩོད་ལྡན་གྱི་ཚད་དེ། དུས་བཞི་པོ་བསྡོམས་པས་ས་ཡ་ཕྲག་བཞི་དང༌། སུམ་འབུམ་དང༌། ཁྲི་ཕྲག་གཉིས་འོང་ལ། དུས་བཞི་མཐར་ཉ་དང་བུ་མོ་མ་གཏོགས་པའི་ཁྱིམ་བཅུ་ན་གཟའ་དགུ་པོ་གང་ཡང་མེད་པས་ཁྱིམ་དེ་རྣམས་སྟོང་པར་སོང་ཞིང་གཟའ་རྣམས་ཀྱིས་རྒྱུ་བའི་ལོངས་སྤྱོད་ཀྱང་སྟོང་པར་ཞུགས་ཏེ་གཟའ་ཐམས་ཅད་ནམ་གྲུའི་སྟེང་དུ་ཚོགས་པར་གསུངས་པ་ནི་མ་དག་བྱེད་པ་བརྗོད་པའི་ཕྱིར་དགོས་པའི་དབང་གིས་གསུངས་པར་ཟད་དེ། བགོ་བྱའི་གཞི་དང་བགོད་བྱེད་ཀྱི་དཀྱིལ་འཁོར་ཐམས་ཅད་འཇིག་རྟེན་གྱི་གྲགས་ཚོད་ཇི་ལྟ་བ་བཞིན་དུ་མཛད་པའི་ཕྱིར་རོ། །ཇི་ལྟར་ན། འདིར་ནི་དུས་བཞི་ཆེན་པོའི་ཚད་ཀྱི་ལོ་ཚོགས་ཇི་སྙེད་པ་སུམ་བརྒྱ་དྲུག་ཅུས་བསྒྱུར་བས། མཁའ་ཐིག་མཁའ་སྟོང་ནམ་མཁའ་མིག་དབང་འབྱུང་མདའ་གཟུགས་རྣམས་འོང་བ་ནི་བགོ་བྱའི་ལོ་ཚོགས་ཞག་གི་ཕུང་པོར་བྱས་པ་ཡིན་ནོ། །དེ་ལ་གཟའ་སོ་སོའི་དཀྱིལ་འཁོར་སུམ་བརྒྱ་དྲུག་ཅུས་བསྒྱུར་ནས་ཞག་གི་ཕུང་པོར་བྱས་ལ་བགོས་པས་ན་ལྷག་མེད་དུ་གྱུར་པ་ཙམ་ལ་སྟོང་འཇུག་ཏུ་གསུངས་པས་སོ། གཉིས་པ་གྲུབ་པའི་མཐའི་སྟོང་རྩིས་བཤད་པ་ལ་བཞི་སྟེ། མཁས་པ་གཞན་གྱིས་འབད་པས་བཙལ་ཀྱང་མ་རྙེད་པའི་ཚུལ། ཞལ་ལུང་མཁན་པོ་ཉིད་ཀྱིས་ཇི་ལྟར་རྙེད་པའི་ཚུལ། རྙེད་ཚུལ་རྣམས་རི་མོའི་ལམ་ནས་དྲངས་ཏེ་བཤད་ན་མཁོ་མོད་ཀྱང༌། ཡི་གེས་འཇིགས་ཏེ་རྒྱས་པར་མ་བརྗོད་པའི་ཚུལ། སྟོང་འཇུག་གནས་པའི་ལོ་ཚོགས་ཙམ་ཞིག་འདིར་བཤད་པའོ། དང་པོ་ནི། རྣམ་དག་གྲུབ་མཐར་བསྟེན་པ་ཡི་སོགས་སོ། གཉིས་པ་ནི་གྲུབ་མཐའི་སྐར་རྩིས་སོགས་སོ། གསུམ་པ་ནི། ཨེ་མ་ངོ་མཚར་སོགས་སོ། བཞི་པ་ལ་བཞི་སྟེ། དགོས་པ་བརྗོད་པས་མདོར་བསྟན་ཞིང་ཁས་བླང་པ། ལོ་ཚོགས་དངོས། ད་ལྟའི་ལོས་དུས་མཚམས་བཟུང་བ། མ་བརྗོད་པ་གཞན་དུ་ཁ་འཕང་བའོ། དང་པོ་ནི། དེ་ལྟ་ནའང་བྱེད་པ་ཡི་ཞེས་བྱ་བ་ལ་སོགས་པ་ཚིགས་སུ་བཅད་པ་གསུམ་གྱིས་མཁས་པ་མང་པོས་སྟོང་འཇུག་རྩི་ཚུལ་མ་རྟོགས་པ་དང་འགའ་ཞིག་གིས་ལོག་པར་རྟོག་པས་ཇི་སྙེད་གཅིག་སྨྲས་ཚུལ་བསྟན་ནས། དེས་ན་རིགས་པ་དང་བྲལ་བའི་འཁྱོག་བཤད་སྣ་ཚོགས་སྨྲས་པ་དེ་དག་རྒྱང་རིང་པོར་འདོར་བ་དང༌། མཁས་པའི་དབང་པོ་རྒྱ་མཚོའི་མཚན་ཅན་གྱིས་སྲོལ་གཏོད་པའི་རིགས་པའི་ལམ་བཟང་པོ་ལ་ངེས་པ་རྙེད་པར་བྱ་བའི་ཕྱིར་གྲུབ་མཐའི་སྟོང་རྩིས་གནས་པའི་ལོ་ཚོགས་ཙམ་ཞིག་འདིར་བརྗོད་པར་བྱ་ཞེས་ཁས་བླང་ངོ༌། གཉིས་པ་ལ་དགུ་སྟེ། ཉི་མ་དང༌། ཆ་རིལ་དང༌། གཟའ་ཚེས་དང༌། སྒྲ་གཅན་དང༌། མིག་དམར་དང༌། ཕུར་བུ་དང༌། སྤེན་པ་དང༌། པ་སངས་དང༌། ལྷག་པ་དག་པའི་ལོ་ཚོགས་སོ། དང་པོ་ནི། བྱེད་པའི་ལོ་དང་བསྟུན་པ་ཡི་ཞེས་བྱ་བ་སོགས་པའོ། གཉིས་པ་ནི། རིལ་པོ་ཆ་ཤས་ངེས་པ་ནི་ཞེས་བྱ་བ་ལ་སོགས་པའོ། གསུམ་པ་ནི། མཁའ་ཀླུ་རི་མེ་ཞེས་བྱ་བ་ལ་སོགས་པའོ། བཞི་པ་ནི། འབྱུང་རི་མཚོ་ཐུབ་ཅེས་བྱ་བ་ལ་སོགས་པའོ། ལྔ་པ་ནི། མཁའ་བུག་ཡོན་ཏན་ཞེས་སོགས་སོ། དྲུག་པ་ནི། ནམ་མཁའ་རྒྱ་མཚོ་ཞེས་སོགས་སོ། བདུན་པ་ནི། ནམ་མཁའ་དུས་ཐིག་ཅེས་སོགས་སོ། བརྒྱད་པ་ནི། ཐིག་ལེ་བུ་ག་ཞེས་སོགས་སོ། དགུ་པ་ནི། ནམ་མཁའ་སྐར་མ་ཞེས་བྱ་བ་ལ་སོགས་པའོ། །འདིར་དེ་ཐམས་ཅད་ལ་རང་རང་གི་ལོ་མཚམས་སུ་དག་པ་དང༌། དེ་དྲུག་ཅུ་སྐོར་གྱི་མཚམས་དང་སྒྲིག་པ་དང༌། དེ་ཡང་སྔ་མ་སྔ་མ་རྣམས་དང་ཕྱོགས་གཅིག་ཏུ་སྒྲིག་པའི་ལོ་ཚོགས་ཙམ་ཞིག་བཀོད་པ་ནི་གཞུང་ཉིད་ཀྱིས་ཆེས་གསལ་བས་འདིར་རྒྱས་པར་མ་བཀྲལ་ལོ། །དེ་ལྟར་ན་སྟོང་རྩིས་གནས་པའི་ལོ་ཚོགས་འདི་ལས་འཁོར་ཚུལ་མི་འདྲ་བའི་རིམ་པ་གཞན་ཅུང་ཟད་ཀྱང་མེད་པས་ལོ་འདི་དག་གི་མཐར་སྟོང་པར་ཞུགས་པ་ནས་སླར་ཡང་སྔ་མ་བཞིན་དུ་འཁོར་བ་ཡིན་ནོ། གསུམ་པ་དུས་མཚམས་བཟུང་བ་ནི། སྟོང་འཇུག་དཀྱིལ་འཁོར་ཐོག་མ་ནས། ཞེས་སོགས་ཀྱིས་སྔར་ངེས་པ་ཐམས་ཅད་སྟོང་པར་ཞུགས་པ་གཅིག་ནས་ད་ལྟའི་ལྕགས་བྱ་ཡན་ལ་ལོ་ཇི་ཙམ་སོང་བའི་གྲངས་དང༌། དེ་ཡིས་སྟོང་འཇུག་སོགས་ཀྱིས་ད་ནས་དུས་ཇི་ཙམ་ན་སྟོང་པར་འཇུག་བརྟག་པའི་དུས་མཚམས་ངེས་པ་བཟུང་བའོ། །བཞི་པ་མ་བརྗོད་པ་གཞན་དུ་ཁ་འཕང་བ་ནི། གཞུང་འདིར་ནི་ལོ་མཚམས་སུ་དག་ཚུལ་ཙམ་ཞིག་བཤད་ཀྱི། དེ་ལས་གཞན་ཡང་ཞག་མཚམས་སུ་དག་ཚུལ། ཟླ་མཚམས་སུ་དག་ཚུལ། སྟོང་འཇུག་གི་རྩིས་རྣམས་ཀྱི་འབྱུང་ཁུངས་ཞག་གསུམ་གྱི་སྣ་མཉམ་པར་བྱེད་པའི་མན་ངག་སོགས་ཞིབ་པ་འདིར་མ་བརྗོད་པ་ནི། ཧ་ཅང་ཡང་ཡི་གེ་མང་གི་དོགས་པ་དང༌། ཡི་གེ་ཉུང་ངུ་ཙམ་ཞིག་གིས་ནི་གང་དུའང་མི་ཕྱིན་པས་གཞུང་དུ་བསྡུས་ཏེ་བཤད་པ་བཞིན་འགྲེལ་པས་ཀྱང་རྒྱ་ཆེར་འགྲོལ་བའི་འབད་པ་མ་བྱས་ལ། གལ་ཏེ་ཤེས་པར་འདོད་ན་པད་དཀར་ཞལ་ལུང་དང༌། དེའི་འཆད་ཐབས་གསལ་སྒྲོན་ལ་སོགས་པར་བལྟ་ཞིང༌། རི་མོའི་ལམ་ནས་དྲངས་པའི་ལྷན་ཐབས་ཀྱི་ཡི་གེ་ཞིབ་མོ་ཞིག་སླར་ཟུར་དུ་འཆད་ལ་སྤྲོ་བའང་ཡིན་ནོ། །རྩིས་ཀྱི་མན་ངག་ཉིན་བྱེད་སྣང་བ་ལས། དུས་བཞིའི་མཐར་ངེས་པ་སྡུད་པའི་ཚུལ་བཤད་པའི་སྐབས་ཏེ་བཅོ་བརྒྱད་པའི་འགྲེལ་པའོ། །ཞེས་སྐབས་བསྡུས་སོ།། །།

མཐའ་མའི་འདོན་ཐེངས་།: 17.12.2013 ཉིན། 10:00 AM

<< སྔ་མ།

ནང་གསེས་དཀར་ཆག

ཡིག་ཆ་གསར་ཤོས།

ཐོན་ཟོག་ཁྲལ་འབབ་སྡེ་ཚན་གྱིས་ཆེ་བསྟོད་གནང་།

བོད་ཡིག་མིང་བྱང་ལ་འགྱུར་བཅོས་བཏང་བ།

ཅོན་ཏ་ར་སྨན་སྦྱོར་སྡེ་ཚན་དུ་ཆོད་གན་ལས་མི་དྲུག་གི་ས་མིག་གསལ་བསྒྲགས།

བརྟན་བཞུགས་སྔོན་འགྲོའི་རིམ་གྲོར་སྲོག་ཆགས་ཚེ་ཐར་བཏང་བ།

འགྲོ་ཕན་སྨན་རྩིས་ཁང་གི་མིང་དུ་བརྫུས་ཏེ་ནད་པ་བསླུ་བྲིད་བྱེད་པའི་གནས་ཚུལ།

ཁ་ལོ་བ་གཅིག་དང་ཆོད་གན་ལས་མི་དྲུག་གི་ས་མིག་གསལ་བསྒྲགས།

ཆོད་གན་ལས་མི་སྐྱེས་པ་གཉིས་དང་བུད་མེད་གསུམ་གྱི་ས་མིག་གསལ་བསྒྲགས།

ལེའུ་དང་པོ། ཀླད་དོན་གླེང་སློང་བ།

ལེའུ་གཉིས་པ། རླུང་ནད་གསོ་བ།

ལེའུ་གསུམ་པ། མཁྲིས་པའི་ནད་གསོ་པ།

ལེའུ་བཞི་པ། བད་ཀན་གྱི་ནད་བཅོས་པ།

ལེའུ་ལྔ་པ། འདུས་པའི་ནད་གསོ་བ།

ལེའུ་དྲུག་པ། མ་ཞུ་བ་གསོ་བ།

ལེའུ་བདུན་པ། གཅོང་ཆེན་སྐྲན་ནད་བཅོས་པ།

ལེའུ་བརྒྱད་པ། སྐྱ་རྦབ་ཀྱི་ནད་གསོ་བ།