སྨན་རྩིས་དྲ་བ། - རྣམ་འགྲེལ་གསེར་གྱི་ཤིང་རྟ།

སྐབས་བཅུ་གསུམ་པ། འཇིག་རྟེན་ཁམས་ཀྱི་ཚད་དང་གོ་ལ་བཤད་པ།

བརྗོད་བྱ་སྤེལ་མཁན། རྩོམ་སྒྲིག་པ། (admin) ཟླ་ཚེས། 16.12.2013
རྣམ་འགྲེལ་གསེར་གྱི་ཤིང་རྟ། >> སྐབས་བཅུ་གསུམ་པ། འཇིག་རྟེན་ཁམས་ཀྱི་ཚད་དང་གོ་ལ་བཤད་པ།

ད་ནི་སྐབས་བཅུ་གསུམ་པས་འཇིག་རྟེན་ཁམས་ཀྱི་ཚད་དང་གོ་ལ་བཤད་པ་ལ་བསྟན་བཤད་གཉིས་ལས། དང་པོ་ནི། སྐབས་བཅུ་གཉིས་པའི་རྗེས་དེ་ནས་བགྲོད་བྱའི་ཡུལ་སྐར་ཁྱིམ་དང༌། དེ་ལ་བགྲོད་པར་བྱེད་པ་པོ་གཟའ་བཅུ་པོ་སྟེ། བགྲོད་བྱ་བགྲོད་བྱེད་གཉིས་པོ་དེའི་ཚུལ་ཤེས་པར་བྱ་བའི་ཕྱིར་སྟེང་འོག་གི་འཁོར་ལོ་བཤད་པར་བྱ་ཞེས་ཁས་བླང་པའི་སྒོ་ནས་མདོར་བསྟན་པའོ། །གཉིས་པ་ལ་གཉིས་ཏེ། སྣོད་བཅུད་ཀྱི་འཇིག་རྟེན་སྤྱིར་བཤད་པ་དང་བགྲོད་བྱ་བགྲོད་བྱེད་བྱེ་བྲག་ཏུ་བཤད་པའོ། །དང་པོ་ལ་གཉིས་ཏེ། སྣོད་ཆགས་པའི་རིམ་པ་ཚད་དང་བཅས་པ་བཤད་པ་དང༌། དེར་གནས་པའི་བཅུད་ཀྱི་སེམས་ཅན་སྤྱིའི་རྣམ་བཞག་བཤད་པའོ། །དང་པོ་ནི། ཐོག་མར་སྣོད་ཀྱི་འཇིག་རྟེན་གྱི་རྣམ་པར་བཞག་པ་ལའང༌། རིག་བྱེད་པ་དག ཚངས་པའི་ཡུལ་ས་གཅིག་པོ་འདི་ཉིད་དཔག་ཚད་བྱེ་བའི་ཁྱོན་དང་ལྡན་པར་འདོད་པ་སོགས་ནི་དྲང་སྲོང་འགའ་ཞིག་གི་འདུ་ཤེས་བསྒྱུར་ཏེ་རྫུན་དུ་སྨྲས་པ་ཡིན་པས་འདོད་པ་དེའི་དོན་ནི་ཐ་སྙད་ཙམ་དུའང་མ་གྲུབ་ལ། དེ་ལས་གཞན་དུ་གསུང་རབ་རྣམས་ལས། རྣལ་མ་དང༌། སྤྱིའུ་ཚུགས་དང༌། སྣྲེལ་གཞིའི་འཇིག་རྟེན་ཞེས་དེ་རྣམས་གོ་ས་གཅིག་ན་ཡོད་པར་གསུངས་ཤིང༌། རྣལ་མའི་འཇིག་རྟེན་གྱི་ཁམས་ལའང་སེམས་ཅན་གྱི་བསམ་པ་མཐའ་ཡས་པའི་དབང་གིས་ལས་གཟུགས་མཐའ་ཡས་པ་ལས་གྲུབ་པའི་ཕྱིར་འཇིག་རྟེན་གྱི་ཁམས་ཀྱི་བཀོད་པའང་དེ་དང་འདྲ་བར་མཐའ་ཡས་པ་ཞིག་འབྱུང་བར་འགྱུར་བ་ལས། འཕགས་པ་ཐོགས་མེད་ཞབས་ཀྱིས་མདོ་སྡེ་སྣ་ཚོགས་སུ་གསུངས་པའི་དགོངས་དོན་བསྡུས་ཏེ་ས་སྡེར་གསུངས་པ་དང༌། བདག་ཉིད་ཆེན་པོ་དབྱིག་གཉེན་གྱིས་འཇིག་རྟེན་གདགས་པ་ལ་སོགས་པའི་དོན་བསྡུས་ཏེ་ཆོས་མངོན་པ་མཛོད་དུ་འཇིག་རྟེན་གྱི་ཚད་དབྱིབས་སོགས་རྒྱ་ཆེར་གསུངས་ཤིང༌། དེར་མ་ཟད་ཕལ་ཆེན་ལས། འོག་གཞིར་མེའི་དཀྱིལ་འཁོར་བཤད་པ་དང༌། རྨད་དུ་བྱུང་བ་ཞེས་བྱ་བའི་ཆོས་ཀྱི་རྣམ་གྲངས་ཀྱི་མདོར། འཛམ་གླིང་གི་མཆུར་དཔག་ཚད་བདུན་སྟོང་སོགས་གླིང་བཞིའི་ཚད་གཞན་དང་མི་མཐུན་པར་གསུངས་པ་དང༌། དྲན་ཉེར་ཉི་མ་ལྷུན་པོའི་རྩེ་ནས་འཆར་ནུབ་བྱེད་པ་སོགས་སྣོད་ཀྱི་འཇིག་རྟེན་གྱི་བཀོད་པ་མི་གཅིག་པ་དུ་མ་ཞིག་གསུངས་པ་རྣམས་ཀྱང༌། ཕལ་པོ་ཆེའི་ལེའུ་དགུ་པ་ལས། ཇི་ལྟར་ས་བོན་ཁྱད་པར་གྱིས། །འབྲས་བུ་སྣ་ཚོགས་སྣང་བ་ལྟར། །དེ་བཞིན་ལས་ཀྱི་ཁྱད་པར་གྱིས། །སེམས་ཅན་རྣམས་དང་ཞིང་འབྱུང་ངོ༌། །ཞེས་པ་ལྟར་འགྲོ་བའི་བསམ་པའི་དབང་གིས་བཞག་པའི་ཕྱིར་སོ་སོའི་སྣང་བ་ལ་ལྟོས་ནས་བདེན་པས་ཀུན་རྫོབ་ཏུ་ཚད་མས་གྲུབ་མོད་ཀྱི། དེ་ལྟ་ནའང་འདིར་འཇིག་རྟེན་གྱི་ཁམས་ཀྱི་ཚད་སེམས་ཅན་ཕྱོགས་གཅིག་གི་མོས་པའི་དབང་གིས་འབུམ་ཕྲག་བཞི་པར་གསུངས་པ་འདི་ནི། ཇི་ལྟར་ཕྱི་རོལ་དེ་བཞིན་ལུས། །ཞེས་གསུངས་པའི་དོན་ཏེ། ཕྱི་རོལ་དེ་བཞིན་དུ་ནང་ལུས་དང༌། གཞན་དཀྱིལ་འཁོར་གསུམ་དགོངས་པ་གཅིག་ཏུ་འགྲིག་པ་ནི་དུས་ཀྱི་འཁོར་ལོའི་ལུགས་འདི་ཉིད་ཡིན་ནོ། །ཇི་ལྟར་ན་ཕྱི་རོལ་དུ་ལྷུན་པོ་དཔངས་དཔག་ཚད་འབུམ་ཡིན་པ་དེ་བཞིན་དུ་ནང་དུ་སྒལ་ཚིགས་ཀྱི་དཔངས་ཁྲུ་གང་སྟེ་དེའི་ཚད་ཀྱི་ལུས་ཁྲུ་བཞི་དང༌། ལྷུན་པོའི་ཚད་དེས་འཇིག་རྟེན་གྱི་ཁམས་འབུམ་ཕྲག་བཞིའོ། །གཞན་དཀྱིལ་འཁོར་བཞི་ཆའི་ཚད་དུ་མཉམ་ཞིང༌། དེ་ཁོ་ན་ཉིད་རྡོ་རྗེའི་བཞིའམ་བསྙེན་སྒྲུབ་ཡན་ལག་བཞིའི་གནད་བཅིངས་པས་སྦྱང་བྱ་གནས་སྐབས་བཞིའི་དྲི་མ་བཞི་སེལ་ལ། སྦྱངས་འབྲས་དྲི་བྲལ་གྱི་རྡོ་རྗེ་བཞི་མངོན་དུ་བྱེད་པའི་རྒྱུ་མཚན་གྱིས་སོ། །རྣམ་པ་གཞན་དུ་ན། ཇི་ལྟར་ཕྱི་རོལ་དེ་བཞིན་ལུས་སོགས་སུ་མི་འགྱུར་ཏེ། མི་མཉམ་པའི་ཕྱིར་རོ། །དེ་ལྟ་བས་ན། བཅོམ་ལྡན་འདས་ཀྱིས་མངོན་པར་ཞེན་པས་འཇིག་རྟེན་གྱི་ཁམས་གཟིགས་ནས་གཟུང་འཛིན་གྱི་ངོ་བོས་དངོས་པོའི་ཚད་གསུངས་པ་ནི་འགའ་ཡང་མེད་དེ། སེམས་ཅན་རྣམས་ལ་རང་སེམས་ཀྱི་བག་ཆགས་ཀྱི་དབང་གིས་སྣང་བ་ཙམ་ཞིག་གསུངས་པ་ཡིན་ནོ། །དེ་ལ་འདི་སྙམ་དུ། ཆུ་ལ་ལྷས་བདུད་རྩི་དང་ཡི་དྭགས་ཀྱིས་རྣག་ཁྲག་ཏུ་མཐོང་བ་ལྟར་རིགས་མི་མཐུན་པའི་འགྲོ་བ་ལ་དངོས་པོ་གཅིག་ལ་མཐོང་སྣང་ཐ་དད་པ་བདེན་ཡང༌། རིགས་མཐུན་གྱི་འགྲོ་ལ་དངོས་གཅིག་ཐ་དད་དུ་སྣང་བ་མི་རིགས་སོ་སྙམ་ན། དེ་ཡང་མ་ངེས་ཏེ། མིའི་འགྲོ་བར་རིགས་གཅིག་པ་ལ། འགའ་ཞིག་ལ་དུང་སེར་པོ་དང་མཁའ་ལས་སྐྲ་ཤད་འཛག་པར་སྣང་བའི་ཕྱིར་དང༌། མདོ་ལས། གྲོ་བཞིན་སྐྱེས་ཀྱི་རྣམ་ཐར་གྱི་སྐབས་སུ། ཟན་གྱི་དངོས་པོ་གཅིག་ཉིད། ཡི་དྭགས་བཞི་ལ། ཕུབ་མ་དང༌། ཐོ་ལུམ་དང༌། རང་གི་ཤ་དང༌། རྣག་ཁྲག་ཏུ་གྱུར་པ་གསུངས་པའི་ཕྱིར་རོ། །དེས་ན་འདིར་དུས་ཀྱི་འཁོར་ལོ་ལས་གསུངས་པ་དེ་ཉིད་ལེགས་པར་བཤད་ཀྱི་ཉོན་ཅིག་པའོ། །དེ་ལ་འདིར་དབང་ཕྱུག་པ་དག སྣོད་བཅུད་ཀྱི་འཇིག་རྟེན་འདི་དག་དབང་ཕྱུག་རྫ་མཁན་ལྟ་བུའི་འདོད་པས་རྩེད་མོའི་དོན་དུ་བྱས་པར་འདོད་པ་དང༌། རིག་བྱེད་ཀྱི་མཐའ་གསང་བར་སྨྲ་བ་དག འཇིག་རྟེན་ཐམས་ཅད་ཀྱི་འོག་ན་སྐྱེས་བུ་དྲང་སྲོང་ཆེན་པོ་ཉི་མའི་མདོག་ཅེས་བྱ་བ་ཡོད་དེ། དེས་འཇིག་རྟེན་ཐམས་ཅད་བྱས་སོ་ཞེས་སྨྲ་བ་དག་ནི་སངས་རྒྱས་པ་རྣམས་ཀྱི་གཞུང་ལས་རྣམ་གྲངས་དུ་མར་བཀག་གོ། །དེས་ན་དབང་ཕྱུག་ལ་སོགས་པ་བྱེད་པ་པོ་གཞན་མེད་ཀྱི། འཇུག་པ་ལས། སེམས་ཉིད་ཀྱིས་ནི་སེམས་ཅན་འཇིག་རྟེན་དང༌། །སྣོད་ཀྱི་འཇིག་རྟེན་སྣ་ཚོགས་ཤིན་ཏུ་འགོད། །འགྲོ་བ་མ་ལུས་ལས་ལས་སྐྱེ་བར་གསུངས། །སེམས་སྤངས་ནས་ནི་ལས་ཀྱང་ཡོད་མ་ཡིན། །ཞེས་གསུངས་པ་ལྟར་འདིར་ཆགས་པའི་འཇིག་རྟེན་གྱི་ཁམས་དེ་ཉིད་དུ་རང་གི་ལས་ཀྱི་འབྲས་བུ་ལ་ལོངས་སྤྱོད་པར་འགྱུར་བའི་སེམས་ཅན་གང་ཡིན་པ་དེ་རྣམས་ཀྱི་སྤྱི་མཐུན་གྱི་ལས་ཀྱི་རྟེན་སྣོད་བཅུད་ཀྱི་འཇིག་རྟེན་གྱི་ཁམས་དང་རྗེས་སུ་མཐུན་པའི་འོད་གསལ་རྒྱུ་རྒྱུད་གཞོམ་མེད་འོད་ཟེར་དྲུག་དང་ལྡན་པ་སྟེ། ཤར་དུ་ནག་པོ་འབར་བ། ལྷོར་དམར་པོ། བྱང་དུ་དཀར་པོ། ནུབ་ཏུ་སེར་པོ། སྟེང་དུ་ལྗང་གུ། འོག་ཏུ་སྔོན་པོ་འབར་བ་རྣམས་སོ། །དེ་ལྟར་ཀུན་གཞི་རྒྱུ་རྒྱུད་ཀྱི་སྟེང་གི་འོད་ལྗང་གུ་ལས་སྲོག་འཛིན་གྱི་རླུང་དང༌། འོག་གི་འོད་ཟེར་སྔོན་པོ་ལས་ཐུར་སེལ་གྱི་རླུང་སྟེ་སྲོག་ཐུར་གྱི་རླུང་གཉིས་གྲུབ། དེ་བཞིན་དུ་ཤར་གྱི་འོད་ནག་པོ་ལས་མཉམ་གནས་དང༌། སོགས་ཁོངས་ནས། གྱེན་རྒྱུ། ཁྱབ་བྱེད། ཀླུ། རུས་སྦལ། རྩངས་པ། ལྷས་བྱིན་ཏེ་རླུང་བདུན་སྐྱེས་ཤིང༌། རྒྱུ་རྒྱུད་དང་ལྷན་ཅིག་པའི་ནོར་ལས་རྒྱལ་བའི་རླུང་སྟེ། དེ་ལྟར་ལས་རླུང་བཅུ་པོ་ཡང༌། འཛིན་སྲུབ་དབྱིབས་བྱེད་གསུམ་དུ་འདུས་ཏེ། ཁྱབ་བྱེད་དང༌། ལྷས་བྱིན་ཆུའི་ཁམས་ཡིན་པས། ཁམས་ལྔའི་རྡུལ་ཕྲ་རབ་སིལ་བུར་གནས་པ་དབང་པོའི་སྤྱོད་ཡུལ་དུ་མ་གྱུར་པས་སྟོང་རྡུལ་ཞེས་མིང་གི་སྙད་པ་དེ་རྣམས་གོང་བུར་སྡུད་པར་བྱེད་ཅིང༌། ཀླུ་དང་ནོར་ལས་རྒྱལ་གཉིས་ས་ཁམས་ཡིན་པས་བསྡུས་པ་དེ་རྣམས་སྲ་བར་བྱེད་པས་ན། རླུང་བཞི་པོ་དེ་དག་ནི་འཛིན་བྱེད་ཀྱི་རླུང་ཡིན་ནོ། །གྱེན་རྒྱུ་དང་རྩངས་པ་ནི་མེ་ཁམས་ཡིན་པས་བཟུང་བ་དེ་དག་བསྲུབ་པའི་ཚུལ་གྱིས་སྨིན་པར་བྱེད་དོ། །མཉམ་གནས་དང་རུས་སྦལ་གྱི་རླུང་ནི་རླུང་གི་ཁམས་ཡིན་པས་བསྲུབས་ཏེ་སྨིན་པ་དེ་དག་དཀྱིལ་འཁོར་དང་རི་གླིང་ལ་སོགས་པ་དེ་དང་དེའི་གནས་སུ་བསྐྱོད་ཅིང་འཇོག་པའི་ཚུལ་གྱིས་དབྱིབས་ཀྱི་བྱ་བ་བྱེད་པས་དབྱིབས་བྱེད་ཀྱི་རླུང་ཡིན་ལ། སྲོག་དང་ཐུར་སེལ་གཉིས་ནི་དེ་ཐམས་ཅད་ཀྱི་གྲོགས་བྱས་ཏེ་གོ་སྐབས་སྦྱིན་པར་བྱེད་དོ། །དེ་ལྟར་ན་རླུང་བདུན་པོ་འདི་དག་གིས་གཙོ་བོར་ནམ་མཁའ་ལ་རླུང་གི་རྡུལ་ཕྲ་རབ་རྣམས་བསྡུས་ཏེ་འདབ་འབྱར་དུ་གྱུར་པས་ཡང་ཞིང་གཡོ་བའི་རླུང་གི་དཀྱིལ་འཁོར་དབྱིབས་ཟླུམ་པོ་ཐད་ཀར་དཔག་ཚད་འབུམ་ཕྲག་བཞི་པ་ཁོར་ཡུག་ཏུ་འབུམ་ཕྲག་བཅུ་གཉིས་དང༌། འཐུག་རྔམས་སུ་དཔག་ཚད་སྟོང་ཕྲག་ལྔ་བཅུ་ཡོད་པ་ཐ་མ་གྱེན་དུ་ལངས་པ་ཞིག་གྲུབ་བོ། །དེས་སྐྱོར་བའི་ནང་དུ་ལྷོའི་འོད་ཟེར་དམར་པོ་ལས་མེའི་རྡུལ་ཕྲ་རབ་རྣམས་འབྱར་བ་ལས་རླུང་དང་ལྡན་པའི་གློག་འཁྲིགས་པ་ལྟ་བུའི་མེའི་དཀྱིལ་འཁོར་ཁོར་ཡུག་ཏུ་དཔག་ཚད་འབུམ་ཕྲག་དགུ་དང་ཐད་ཀར་གསུམ་ཡོད་པ་དེའི་མཐའི་མེ་རི་རྟའི་གདོང་པ་ལྟར་གྱེན་དུ་འབར་བས་རྟ་གདོང་གི་མེའམ་རི་བདུན་པ་རྡོ་རྗེའི་རི་ཞེས་གྲགས་པ་ཡིན་ནོ། །དེས་སྐྱོར་བའི་ནང་དུ་བྱང་གི་འོད་ཟེར་དཀར་པོ་ལས་ཆུ་རྡུལ་འབྱར་བས་རླུང་མེ་དང་ལྡན་པའི་སྤྲིན་བྱུང་བ་ལས་ཆར་བབས་པས་ཆུའི་དཀྱིལ་འཁོར་ཁོར་ཡུག་ཏུ་འབུམ་ཕྲག་དྲུག་དང་ཐད་ཀར་གཉིས་ཡོད་པ་དེའི་མཐའ་མ་གྱེན་དུ་འཕྱོ་བ་ལ་མཚོ་བདུན་པ་ལན་ཚྭའི་མཚོ་རུ་གྲགས་པ་ཡིན་ནོ། །དེས་སྐྱོར་བའི་ནང་དུ་ནུབ་ཀྱི་འོད་ཟེར་སེར་པོ་ལས་སའི་རྡུལ་འབྱར་བའི་རླུང་མེ་ཆུ་དང་ལྡན་པའི་འཇའ་ཚོན་འཁྲིགས་པ་མཐའ་ཡས་པའི་དཀྱིལ་འཁོར་ཁོར་ཡུག་ཏུ་འབུམ་ཕྲག་གསུམ་དང་ཐད་ཀར་གཅིག་དང༌། འཐུག་རྔམས་སུ་ནི་མེ་ཆུ་སའི་དཀྱིལ་འཁོར་གསུམ་ཀར་སྟོང་ཕྲག་ལྔ་བཅུ་རེ་ཡོད་པས་རླུང་དཀྱིལ་དང་འདྲའོ། །དེ་ལྟར་འོག་ནས་ཡར་རླུང་མེ་ཆུ་སའི་དཀྱིལ་འཁོར་བཞི་པོ་བརྩེགས་པའི་རྣམ་པ་ནི་འོག་མ་རྣམས་ཀྱི་སྟེང་དུ་སྟེང་མ་རྣམས་བྲེ་ནང་དུ་བྲེ་ཆུད་པ་ལྟར་གནས་ལ། དེ་ཡང་དཀྱིལ་འཁོར་བཞི་པོའི་སྟེང་གི་ཆ་ཁད་ཚད་དུ་མཉམ་པའི་དབུས་ནས་སའི་མཐའི་བར་དུ་དཔག་ཚད་སྟོང་ཕྲག་ལྔ་བཅུ། དེ་བཞིན་དུ་དཀྱིལ་འཁོར་གཞན་གསུམ་གྱི་ཡང་རང་རང་གི་ནང་མཐའ་ནས་ཕྱི་མཐའི་བར་གྱི་ཚད་སྟོང་ཕྲག་ལྔ་བཅུ་ལྔ་བཅུ་སྟེ་རང་རང་གི་འཐུག་རྔམས་ཉིད་དོ། །དཀྱིལ་འཁོར་བཞི་ཀའང་དབྱིབས་ཟླུམ་པོའོ། །དེ་དག་ཀུན་ལའང་ནམ་མཁའི་ཁམས་ཀྱི་རྡུལ་ཕྲན་ཁྱབ་བྱེད་དུ་ལྡན་པས་གཟུགས་ཅན་གཞན་གྱི་གོ་འབྱེད་དོ། །དེ་རྗེས་འབྱུང་བཞིའི་ཚོགས་རྣམས་ད་དུང་ཆེར་བསྲུབས་པའི་སྙིང་པོ་ལྟ་བུ་ས་རྡོ་ཕྲ་སྦོམ་ལས་རི་གླིང་ལ་སོགས་པ་མུ་ཁྱུད་ཀྱི་མཐའི་བར་དུ་གྲུབ་པ་ཡིན་ཏེ། དེ་ཡང་སའི་དཀྱིལ་འཁོར་གྱི་སྟེང་དུ་འབུར་དོད་ཀྱི་ཚུལ་གྱི་ས་དབུས་སུ་ལྷུན་པོ་རྒྱུ་རྡོ་སྦོམ་པོ་ཞེས་པ་རིན་པོ་ཆེ་སྣ་ལྔའི་རང་བཞིན་ཅན་དཔངས་སུ་དཔག་ཚད་འབུམ་ཕྲག་གཅིག་དང༌། དེ་ནས་ལྷུན་པོའི་མགྲིན་པ་དང༌། གདོང་དང༌། གཙུག་ཏོར་གྱི་ཐ་སྙད་ཀྱིས་ཕྱེ་བའི་བར་སྣང་སྟོང་པར་སྣང་བ་ཡིད་གཟུགས་ཀྱི་རྣམ་པའི་ཚད་ནི་རིམ་པར་སྟོང་ཕྲག་ཉེར་ལྔ་དང༌། ལྔ་བཅུ་དང་ཉེར་ལྔ་སྟེ་བསྡོམས་པས་དཔག་ཚད་འབུམ་ཕྲག་གཅིག་ཡིན་ནོ། །དེ་ཡང་ལྷུན་པོ་ནི་ཕྱི་དབྱིབས་ཟླུམ་པོ་དཀར་ཡོལ་བསླང་པ་ལྟ་བུ་རྩ་བར་དབུས་ནས་ཕྱོགས་ཕྱོགས་ཀྱི་མཐའི་བར་དུ་དཔག་ཚད་སྟོང་ཕྲག་བརྒྱད་བརྒྱད་དེ་བཅུ་དྲུག་དང༌། དེའི་མཐར་ཁོར་ཡུག་སྟོང་ཕྲག་གཅིག་གིས་ཟླུམ་པོར་བསྐོར་བ། སྟེང་ངོས་རིམ་གྱིས་འཕེལ་བ་རྭ་ལྔ་པའི་རྣམ་པ་ཅན་ཏེ། རྭའི་གནས་ཚུལ་ལ་འདོད་པ་མི་མཐུན་པ་མང་ཡང་རང་ལུགས་ནི། རྭ་འོག་མ་བཞི་པོ་ལྷུན་པོར་སྐེ་རགས་བཅིངས་པའི་ཚུལ་དུ་བསྐོར་བ་སྟེ། དེ་ཡང་རྭ་འོག་མ་ཐུར་ལ་འཕྱངས་ནས་འཁོར་བ་དང་རྩ་བའི་ཁོར་ཡུག་སྟོང་ཕྲག་གཅིག་པོའི་ཕྱི་མཐའ་མཉམ་ཞིང༌། རྭ་འོག་མ་དེའི་མཚམས་ནས་རི་རབ་ཀྱི་རྩེའི་བར་ལ་ཆ་མཉམ་བཞིར་བྱས་པའི་འོག་མ་གསུམ་གྱི་ཆ་རེ་རེའི་མཚམས་ནས་རྭ་རེ་རེ་འཕྱང་བ། རྭ་ལྔ་པ་སྟེང་མ་ནི་རི་རབ་ཀྱི་རྩེ་དང་ཁད་མཉམ་པ་ཕྱོགས་ཀུན་ཏུ་ཕྱིར་སོན་པ་བསིལ་རིའི་ཐོད་པར་གྱེས་པ། དེ་ལྟར་རྭ་ལྔ་པོ་རག་སྡེར་ཁ་འཕྱང་ཆུང་ངུའི་སྟེང་དུ་ཆེན་པོ་བརྩེགས་པའི་དབྱིབས་ཇི་ལྟ་བ་བཞིན་དུ་ཐུར་དུ་འཕྱང་བ་འོག་མ་ལས་སྟེང་མ་རྒྱ་ཇེ་ཆེར་རྒྱས་པའི་རི་རབ་ཀྱི་རྩེ་མོའི་མཐའ་གཅིག་ནས་གཅིག་ཤོས་ཀྱི་བར་ཐད་ཀར་དཔག་ཚད་སྟོང་ཕྲག་ལྔ་བཅུ་དང༌། ཁོར་ཡུག་ཏུ་ཁྲི་ཕྲག་བཅོ་ལྔ་ཡོད་དེ། འགྲེལ་ཆེན་ལས། ལྷུན་པོ་ཡི་ནི་སྟེང་གི་རྒྱ་ཤར་དང་ནུབ་དང་བྱང་ལྷོའི་ཆའི་བར་དུ་སྟོང་ཕྲག་ལྔ་བཅུའོ། །ཞེས་དང༌། སྟེང་གི་རྩེ་མོ་ལྔ་པོ་རྣམས་ནི་ས་གཞིའི་གནས་རྣམས་ལ་ཕྱིར་སོན་པ་སྟེ་ཕྱོགས་ཀུན་ཏུ་ནི་ཁོར་ཡུག་ཀྱང་ངོ༌། །དེའི་ཕྱི་རོལ་གླིང་དང་རི་བོ་དག་དང་ཞེས་པ་ནི་ཁོར་ཡུག་དེའི་ཕྱི་རོལ་རྩེ་མོ་བཞིའི་ཁོངས་སྐྱིབས་ཀྱི་གནས་སུ་གླིང་བཞི་དང་ཞེས་སོགས་གསུངས་པ་ལྟར། རྭ་ལྔའི་སྟེང་མ་བསིལ་རིའི་སྟེང་གི་བར་དུ་ཁྱབ་པ་བྱ་སྐྱིབས་ལྟ་བུར་གནས་པའི་ཁོངས་ཀྱི་རྒྱར་དཔག་ཚད་སྟོང་ཕྲག་བཅུ་དྲུག་ཡོད་པ་དུམ་བུ་བཅོ་བརྒྱད་དུ་མཉམ་པར་བགོས་པའི་ཆ་རེ་ལ་གླིང་མཚོ་རི་གསུམ་དྲུག་དྲུག་ནང་ནས་རིམ་པར་སྤེལ་ཏེ་ལྷུན་པོའི་རྭ་བར་མ་གསུམ་གྱི་འོག་གི་ས་གཞི་ལ་གནས་སོ། །དེ་ལ་གླིང་དྲུག་ནི་ནང་ནས་རིམ་པར་ཟླ་བ་འོད་དཀར། ཞེས་སོགས་སོ། །གླིང་རེ་རེའི་ཕྱི་ནས་མཚོ་དྲུག་གིས་བསྐོར་བ་ནི། སྦྲང་རྩི་ཞེས་སོགས་སོ། །མཚོ་རེ་རེའི་མཐར་རི་རེ་རེས་བསྐོར་བ་ནི། རིམ་པར་འོད་སྔོན་སོགས་སོ། །དེ་ལྟར་ན་རི་མཐའ་མ་བསིལ་རིའི་རྩེ་མོ་དང༌། ལྷུན་པོའི་རྭ་ལྔ་པ་ཐུར་དུ་འཕྱང་པའི་རྩེ་མོ་གཉིས་འཕྲད་ནས་བསྲུབས་མེད་པས། ནང་གི་རི་མཚོ་གླིང་གསུམ་ལ་ཕྱིའི་ཉི་ཟླའི་འོད་ཟེར་འཕོག་མི་སྲིད་ཀྱང་ནང་གི་མི་རྣམས་རང་ལུས་ཀྱི་འོད་ཀྱིས་འཚོ་བ་སོགས་ལྷ་དང་ལོངས་སྤྱོད་མཉམ་པའི་ཕྱིར། ནང་གི་གླིང་དྲུག་པོ་ལ་ལོངས་སྤྱོད་ཀྱི་ས་ཞེས་གྲགས་ཤིང་རི་གླིང་མཚོ་གསུམ་རེ་རེའི་ཁ་ཞེང་ནི། དཔག་ཚད་སྟོང་ཕྲག་བཅུ་དྲུག་ལ་བཅོ་བརྒྱད་ཀྱིས་བགོས་པས། དཔག་ཚད་བརྒྱད་བརྒྱ་དང༌། བརྒྱད་ཅུ་རྩ་བརྒྱད། དགུར་ཉེ་བ་ཞེས་པ་ནི། རྒྱང་གྲགས་གསུམ་དང༌། གཞུ་འདོམ་སྟོང་དང་བརྒྱད་ཅུ་རྩ་གཅིག་སོར་བཅུ་ལྷག་ཙམ་རེ་ཐོབ་སྟེ་རེ་རེའི་ཞེང་ཚད་དོ། །དེ་ནས་ཁ་བའི་རིའི་ཕྱི་རོལ་ནས་ཆུའི་དཀྱིལ་འཁོར་གྱི་ནང་མཐའི་བར་དུ་གླིང་བདུན་པ་འཛམ་གླིང་ཆེན་པོ་ལས་ཀྱི་ས་ཞེས་པ་ཁ་ཞེང་སྟོང་ཕྲག་ཉེར་ལྔ་ཡོད་པ། དེ་ཉིད་ལྷུན་པོའི་ཕྱོགས་བཞི་པོར་ཆ་མཉམ་པའི་དུམ་བུ་གསུམ་གསུམ་སྟེ་ཁྱོན་བཅུ་གཉིས་བཅད་པ་ནི་དུམ་བུ་བཅུ་གཉིས་སམ་གླིང་བཅུ་གཉིས་ཏེ། ཤར་གླིང་ཐོག་མ་ནས་གཡས་བསྐོར་དུ་རིམ་པར་ཤར་གླིང་ཤར་མ་དང༌། ཤར་གླིང་དབུས་མ་དང༌། ཤར་གླིང་ནུབ་མ་ཞེས་སོགས་ཀུན་ལ་འགྲེ་ཞིང༌། གླིང་རེ་རེ་ཡང་ཕྱི་མཐའི་སྲིད་དུ་སྟོང་ཕྲག་ཉེར་ལྔ་དང༌། ནང་མཐའི་ཁྱོན་ལ་སྟོང་ཕྲག་ཕྱེད་དང་བཅུ་གསུམ་ཁོ་ནའོ། །གླིང་བཅུ་གཉིས་ཀྱི་དབུས་མ་བཞིའི་དཀྱིལ་ན་ཤར་ནས་རིམ་པ་བཞིན་དུ་དཔག་ཚད་སྟོང་ཕྲག་བདུན་དང༌། བརྒྱད་དང༌། དགུ་དང༌། བཅུའི་ཚད་ཅན་གྱི་ཤར་དུ་རླུང་ཟླུམ་པོ། ལྷོར་མེ་གྲུ་གསུམ། ནུབ་ཏུ་ས་གྲུ་བཞི། བྱང་དུ་ཆུ་ཟླ་གམ་རྣམས་ཀྱི་རྣམ་པའི་མཚན་མ་རིམ་བཞིན་དུ་ལྡན་ནོ། །འདི་ནི་རྒྱུད་ལས། ཤར་དུ་རླུང་ནི་ཤིན་ཏུ་ཟླུམ་པོར་འགྱུར་ཏེ་མི་ཡི་བདག་པོ་ལྷོ་རུ་མེ་ནི་གྲུ་གསུམ་མོ། ཞེས་གསུངས་པའི་རྩ་འགྲེལ་ལྟར་བཀོད་ལ། དེ་ལྟ་ནའང༌། སྐབས་འདིའི་རྒྱ་དཔེར། པཱུརྦབཱཡྭརྡྷ་བྲྀཏྟཾབྷབཏི། ཞེས་པའི་ཨརྡྷ་ཕྱེད་ལ་འཇུག་པ་དང༌། འོག་ཏུ་འགྲེལ་བས་ཀྱང་ཤར་ཟླུམ་པོ་ཕྱེད་པ་སོགས་སུ་གསུངས་པ་ལྟར་འཐད་ཅེས་མཁས་པ་དག་གསུང་ངོ༌། །དེ་ལས་འཛམ་གླིང་ཆུང་ངུ་ལྷོ་གླིང་དབུས་མ་འདིའི་ཡུལ་དབུས་ནས་བསིལ་རིའི་བར་གྱི་དཔག་ཚད་སྟོང་ཕྲག་ཕྱེད་དང་བཅུ་གསུམ་པོ་དུམ་བུ་དྲུག་ཏུ་བྱས་པ་རྣམས་ནི་བྱང་ནས་རིམ་པ་བཞིན་དུ་ཀཻ་ལ་ཤ་དང༌། ཤམྦྷ་ལ་དང༌། རྒྱ་ནག་དང༌། ལི་དང༌། བོད་དང༌། འཕགས་པའི་ཡུལ་ཏེ་ཡུལ་དྲུག་ཡིན་ལ། དེ་རྣམས་དང་ཁྱོན་མཚུངས་ཀྱི་སའི་ཆ་དུམ་བུ་བཅུ་གཅིག་པོ་རྣམས་ཀྱི་ཕྱེད་བྱང་མ་རྣམས་ལའང་ཤེས་པར་བྱའོ། །དེ་ལྟར་ལས་ས་དཔག་ཚད་སྟོང་ཕྲག་ཉེར་ལྔ་བའི་ཕྱི་རོལ་ན། ལན་ཚྭའི་མཚོ་དང༌། དེ་བྲེས་པ་ལས་མི་འདའ་བ་སྐེམས་པར་བྱེད་པའི་རྟ་གདོང་གི་མེ་དང༌། རླུང་གི་དཀྱིལ་འཁོར་དང་བཅས་པ་སྟེ་རེ་རེའང་འབུམ་ཕྲག་ཕྱེད་ཕྱེད་དེ་སྟོང་ཕྲག་ལྔ་བཅུ་ལྔ་བཅུའི་ཚད་ཅན་ཡིན་ལ། དེ་ལྟ་བུའི་འཇིག་རྟེན་གྱི་ཁམས་ཀྱི་སྟེང་འོག་དང་ཤར་ནུབ་ལྷོ་བྱང་སོགས་ཕྱོགས་ཀུན་ནས་དཔག་ཚད་འབུམ་ཕྲག་བཞི་པར་མཉམ་པ་སྟེ། རླུང་དཀྱིལ་གྱི་མཐའ་གཅིག་ནས་མཐའ་གཅིག་ཤོས་ཀྱི་བར་ཐད་ཀའི་རྒྱར་དཔག་ཚད་འབུམ་ཕྲག་བཞི་ཡོད་པ་བཞིན་དུ། རླུང་མེ་ཆུ་སའི་དཀྱིལ་འཁོར་བཞི་པོ་རེ་རེའི་དཔངས་སུ་སྟོང་ཕྲག་ལྔ་བཅུ་རེ་སྟོ་ཁྱོན་འབུམ་ཕྲག་གཉིས་དང༌། དེའི་སྟེང་དུ་ལྷུན་པོ་ལ་དཔངས་སུ་འབུམ་ཕྲག་གཅིག་དང༌། ལྷུན་པོའི་མགྲིན་གདོང་གཙུག་ཏོར་གྱི་ཐ་སྙད་ཀྱིས་ཕྱེ་བའི་ཡིད་གཟུགས་འབུམ་ཕྲག་གཅིག་སྟེ་བསྡོམས་པས་འབུམ་ཕྲག་བཞིའོ། །གཉིས་པ་བརྟེན་པ་བཅུད་ཀྱི་སེམས་ཅན་ལ་བསྟན་བཤད་གཉིས་ལས། དང་པོ་ནི། སྣོད་ཀྱི་འཇིག་རྟེན་དེར་གནས་པའི་བཅུད་ཀྱི་སེམས་ཅན་ནི། གཟུགས་མེད་ན་བཞི་དང༌། གཟུགས་ན་བཅུ་དྲུག་དང༌། འདོད་པ་ན་བཅུ་གཅིག་སྟེ། སྲིད་པ་སུམ་ཅུ་རྩ་གཅིག་གོ། །གཉིས་པ་ནི། རེ་རེ་ལའང་རྒྱུ་ཚོགས་དང་གནས་དང་ཚེ་ཚད་དེ་གསུམ་གསུམ་གྱིས་འཆད་དེ། ཆོས་བཟང་བསྐལ་པ་ཞེས་པའི་མིང་ཅན་གཟུགས་མེད་བཞི་ནི་རྒྱུ་ཚོགས། ཟད་པར་ནམ་མཁའ་སོགས་དང༌། གནས་ནི་གཙུག་ཏོར་ཆ་བཞིར་སོགས་དང༌། ཚེ་ཚད་ནི། ཚེ་ཚད་བསྐལ་པ་སོགས་སོ། །འདིར་མཛོད་ལས། གཟུགས་མེད་གང་དུ་ཤི་པའོ། །ཞེས་གསུངས་པས་རྟེན་གཞི་ནམ་མཁའི་དབྱེ་བ་མི་འཐད་དོ་ཞེ་ན། ཀུན་མཁྱེན་ཆོས་ཀྱི་རྒྱལ་པོའི་ཡིད་བཞིན་རིན་པོ་ཆེའི་མཛོད་དུ། ནམ་མཁའི་གོ་རིམས་བསྟན་པས་དེར་འགྱུར་ན། གང་དུ་ཤི་བའང་དེ་དང་ཅིས་མི་མཚུངས། ཞེས་གསུངས་པས་མགོ་སྙོམས་པར་འགྱུར་རོ། །གཟུགས་ཀྱི་གནས་ལ་བཞི་ཚན་བཞི་ལས། ཡ་མཐའ་ནས་མར་བགྲངས་པའི་ཚན་པ་གསུམ་གྱི་གནས་བགོ་བ་ནི། གདོང་ལ་དཔྲལ་བ་སྣ་དང་ནི། ཞེས་སོགས་སོ། །དེ་ལྟར་བགོས་པའི་བཞི་ཚན་དང་པོའི་གནས་ནི། དཔྲལ་བའི་སོགས་སོ། །རྒྱུ་ཚོགས་ནི་ཟད་པར་རླུང་བཞི་སོགས་སོ། །དེར་གནས་ལ་དབྱེ་ན་བཞི་སྟེ་ཚངས་པའི་བསྐལ་པའི་སོགས་སོ། །ཚེ་ཚད་ནི། ཚེ་ཚད་མཆོག་གི་སོགས་སོ། །བཞི་ཚན་གཉིས་པའི་གནས་ནི། དེ་འོག་སྣ་ཡི་སོགས་སོ། །རྒྱུ་ཚོགས་ནི། ཟད་པར་མེ་སོགས་སོ། །དབྱེ་ན་བཞི་སྟེ། ཚངས་འདས་ཞེས་སོགས་སོ། །བཞི་ཚན་གསུམ་པའི་གནས་ནི། དེ་འོག་ཀོས་ཀོ་སོགས་སོ། །རྒྱུ་ཚོགས་ནི། ཟད་པར་ཆུ་ཏིང་སོགས་སོ། །དབྱེ་ན་ཚད་མེད་དགེ་སོགས་བཞིའོ། །བཞི་ཚན་བཞི་པའི་གནས་ནི། མགྲིན་པའི་སུམ་ཆ་སོགས་སོ། །རྒྱུ་ཚོགས་ནི། ཟད་པ་ས་གཞི་སོགས་སོ། །དབྱེ་ན་དཀར་པོའི་བསྐལ་པའི་སོགས་བཞིའོ། །འབྲས་བུ་ཆེ་བ་ནས་བཟུང་སྟེ་ཚངས་རིགས་ཀྱི་བར་གྱི་གཟུགས་ཁམས་འོག་མ་བཅུ་གཉིས་ཀྱི་ཚེའི་ཚད་ནི། བར་བསྐལ་བཅུ་གཉིས་སོགས་སོ། །འོ་ན་ཁམས་གོང་མ་རྣམས་སུ་སྐྱེ་བའི་རྒྱུ་ཟད་པར་འདི་རྣམས་གང་ཞེ་ན། འདི་དག་ནི་ཟིལ་གནོན་ལ་སོགས་པ་དང་འབྲེལ་བའི་ཟད་པར་མ་ཡིན་ཏེ། ཨ་ཡིག་ལ་སོགས་པའི་ཡི་གེ་སྟོབས་སུ་གྱུར་པས་འདོད་པའི་གནས་ཟད་པར་བྱེད་པའི་ཏིང་ངེ་འཛིན་ཟད་པར་ཞེས་བྱ་བ་ཡིན་གསུང་ངོ༌། །འདོད་པའི་ཁམས་ལ་འགྲོ་བ་རིགས་ལྔའམ་དྲུག་ཏུ་གསུངས་པ་ལས། ནམ་མཁའ་ལ་བརྟེན་པའི་འདོད་ལྷའི་གནས་ནི། མགྲིན་པའི་སུམ་ཆ་མན་ཆད་ལ། ཞེས་བྱ་བ་ལ་སོགས་པའོ། །ལྷུན་པོ་ལ་གནས་པའི་འདོད་ལྷའི་གནས་ནི། རི་རབ་རྩེ་ན་སོགས་ཀྱིས་སུམ་ཅུ་རྩ་གསུམ་གྱི་གནས་བཀོད་པ་དང་བཅས་པ་དང༌། དེ་འོག་རི་རབ་ཀྱི་དཔུང་པ་མན་ནས་ས་མཚམས་ཀྱི་བར་དུ་རྒྱལ་ཆེན་རིགས་བཞིའི་གནས་སུ་བསྟན་ནོ། །འདོད་ལྷ་རིགས་དྲུག་ཏུ་སྐྱེ་བའི་རྒྱུ་ཚོགས་ནི། འཕེན་བྱེད་དགེ་བའི་ལས་དང་རྫོགས་བྱེད་སྦྱིན་པ་དང་སྔགས་བཟླས་པའི་སྟོབས་ཀྱིས་སོ། །གཞན་འཕྲུལ་དབང་བྱེད་ནས་རྒྱལ་ཆེན་བཞིའི་བར་གྱི་ཚེའི་ཚད་ནི། ཚེ་ཚད་བསྐལ་ཆུང་ཞེས་སོགས་སོ། །མིའི་གནས་ནི། ལོངས་སྤྱོད་ཀྱི་ས་ནང་གི་གླིང་དྲུག་དང༌། ཕྱིའི་གླིང་བདུན་པ་ལས་ས་རྣམས་སུའོ། །རྒྱུད་འགྲེལ་ལས་དུད་འགྲོ་དང་ཡི་དྭགས་ལ་གནས་ཟུར་པ་མ་གསུངས་ཀྱང༌། དྲི་མེད་འོད་རྒྱན་ལས། ལས་ཀྱི་ས་དུམ་བུ་བཅུ་གཉིས་ནི་མི་དང་དུད་འགྲོ་དང་ཡི་དྭགས་རྣམས་ཅི་རིགས་པའི་གནས་སུ་གསུངས་པ་ལྟར། འདིར་ཡང་མི་དང་དེ་བཞིན་དུད་འགྲོ་དང༌། འབྱུང་པོ་ཡི་དྭགས་ཅི་རིགས་གནས་ཞེས་སྨྲས་སོ། །འོན་ཀྱང༌། དྲན་ཉེར། ལྷ་མིན་དུད་འགྲོ་ཀླུ་དུད་འགྲོ། ཞེས་གསུངས་པ་ལྟར་དུད་འགྲོའི་གནས་ས་དཀྱིལ་གྱི་ཕྱེད་གོང་ལྷ་མིན་དང་ཀླུའི་གནས་ཀྱི་ཁོངས་སུ་བསྡུས་ཀྱང་མི་འགལ་ཞིང༌། ཕྱིས་ཀྱི་མཁས་པ་དག་འབྲུག་པད། གསེག་མའི་དམྱལ་བ་ཡི་དྭགས་ཀྱང༌། ཞེས་ཡི་དྭགས་ཀྱི་གནས་གསེག་མའི་དམྱལ་བའི་ལྷོ་ཕྱོགས་གཤིན་རྗེའི་རྒྱལ་པོ་གནས་ས་དེར་འདོད་པ་ལའང་མི་འཐད་རྒྱུ་མེད་དམ་སྙམ་སྟེ་དཔྱད་པར་བྱའོ། །མི་དང་ལྷ་མིན་དུད་འགྲོ་ཡི་དྭགས་རྣམས་ཀྱི་ཚེའི་ཚད་ནི། ཚེ་ཚད་མི་ཡི་དབུགས་གཅིག་ནི། ཞེས་སོགས་ཏེ། འདི་དག་རྒྱུད་འགྲེལ་ལས་ལྷ་སོགས་ཀྱི་ཚེ་ཚད་འཆད་པའི་སྐབས་འདིར་མ་གསུངས་ཀྱང༌། ཕྲ་དབུགས་རྒྱུ། ཞེས་པའི་སྐབས་ཀྱི་འགྲེལ་ཆེན་ལས་བསྟན་ཏེ། དེའི་དོན་སྔར་ལེའུ་དང་པོའི་ནང་གི་འཇལ་བྱེད་འཆད་པའི་སྐབས་སུ་བཤད་གྲུབ་བོ། །ས་དཀྱིལ་ཕྱེད་དུ་བཅད་པའི་གོང་མ་ཆ་གཉིས་སུ་བྱས་པའི་སྟེང་མར་ལྷ་མིན་དང་འོག་མར་ཀླུ་གནས་སོ། །ཆུ་མེ་རླུང་གི་དཀྱིལ་འཁོར་གསུམ་པོ་རེ་རེ་ཡང་ཕྱེད་ཕྱེད་དུ་བྱས་པ་ས་དཀྱིལ་གྱི་ཕྱེད་འོག་མ་དང་བཅས་པའི་ཆ་བདུན་ནི་དམྱལ་བ་བརྒྱད་ཀྱི་གནས་ཏེ། ཕྱེད་འོག་གསེག་མའི་ཆུའི་དམྱལ་བ། ཞེས་བྱ་བ་སོགས་སོ། །ཆ་བདུན་ལ་དམྱལ་བ་བརྒྱད་དུ་ཇི་ལྟར་འགྱུར་ཞེ་ན། བརྒྱད་པ་རྡོ་རྗེ་མེ་ལྕེ་དང་བཅས་པའི་དམྱལ་བ་ནི། རྒྱུད་ལས། ངུ་འབོད་བདུན་པ་དང༌། ཞེས་པའི་དང་ཡིག་གིས་གནས་བདུན་པ་ངུ་འབོད་ཀྱི་གནས་ཉིད་ན་ཡོད་ཀྱི། གནས་གཞན་ལོགས་ཤིག་ན་མེད་པར་འགྲེལ་པས་གསུངས་སོ། །དམྱལ་བའི་ཚེ་ཚད་ནི། ཚེ་ཚད་ས་ཆུ་མེ་རྣམས་ནི། ཞེས་བྱ་བ་ལ་སོགས་པའོ། །ལྷ་མ་གཏོགས་པའི་འདོད་ཁམས་གཞན་རྣམས་སུ་སྐྱེ་བའི་རྒྱུ་ཚོགས་ནི། རྒྱུ་ནི་འཕེན་བྱེད་དགེ་བ་དང༌། ཞེས་བྱ་བ་ལ་སོགས་པའོ། །འོ་ན་སྲིད་པ་གསུམ་པོ་དེ་དག་སྔ་ཕྱིར་ཆགས་པའི་རིམ་པ་གང་ཞེ་ན། འགྲེལ་པ་ལས་དངོས་སུ་གསུངས་པ་མ་མཐོང་ཡང༌། ཐུགས་གསུང་སྐུ་རྣམས་སྐྱེ་བའི་རིམ་པ་ཡིན་པས། དང་པོར་གཟུགས་མེད། དེ་ནས་གཟུགས། དེ་ནས་འདོད་པའི་ཁམས་རྣམས་ཆགས་ལ། འདོད་པའི་ཁམས་ཉིད་ནི། ས་འོག་དང༌། ས་སྟེང་དང༌། ས་བླ་རྣམས་རིམ་གྱིས་ཆགས་སོ། །དེ་ལྟར་བཅུད་ཀྱི་རྣམ་གཞག་འདི་དག་ཀྱང་རྒྱས་པར་བཀྲལ་ན་རྟོག་པ་པོ་རྣམས་ལ་ཉེ་བར་མཁོ་མོད་ཀྱི། དེ་ལྟ་ནའང་སྐབས་འདིར་གཟའ་རྣམས་ཀྱི་བགྲོད་པ་ཤེས་པའི་སླད་དུ་སྐར་ཁྱིམ་གྱི་བཀོད་པ་ལ་ཉེ་བར་མཁོ་བ་སྣོད་ཀྱི་འཇིག་རྟེན་ལས་འཕྲོས་ཏེ་བཤད་པ་ཙམ་ཡིན་པའི་ཕྱིར་དང༌། ཡི་གེས་ཀྱང་འཇིགས་པའི་ཕྱིར་བསྡུས་ཏེ་བཀྲལ་ལོ། །ད་ནི་འདི་དག་གི་སྐབས་སུ་མཁོ་བ་འཇལ་བྱེད་ཀྱི་ངེས་པ་བཤད་པ་ལས། སྣོད་ཀྱི་ཚད་དེ་དག་གི་འཇལ་བྱེད་ནི། རྡུལ་ནི་ཕྲ་རབས་ཞེས་སོགས་ཏེ། འདིར་རྡུལ་ཕྲ་རབས་ཀྱི་རྒྱ་སྐད་དུ། པ་ར་མ་ཨ་ཎཱ་ཞེས་ཡོད་པས་ཕྲ་བའི་མཆོག་གམ་མཐར་ཐུག་པའི་དོན་དང༌། སྐེ་ཚེ་ཞེས་པའི་རྒྱ་སྐད། རཱ་ཛཱི་ཞེས་པ། རྭས་ཉི་རྡུལ་དུ་འགྱུར་རོ། །འོ་ན་སེམས་ཅན་གྱི་ཚེའི་ཚད་དེ་དག་གི་འཇལ་བྱེད་ཇི་ལྟ་བུ་སྙམ་ན། མི་ལོས་གཞལ་དགོས་པ་རྣམས་ནི་སྔར་བཤད་གྲུབ་ལ། འདིར་ཁམས་གསུམ་གྱི་ལྷ་དམྱལ་བ་རྣམས་ཀྱི་ཚེ་ཚད་ནི་བསྐལ་པས་གཞལ་དགོས་པས་དེ་ལ་བཞི་སྟེ། བསྐལ་པ་ཆུང་ངུ་དང༌། བར་མ་དང༌། མཆོག་དང༌། ཆེན་པོའོ། །དང་པོ་ནི། གྲུ་བཞི་ཀུན་ནས་དཔག་ཚད་རེ་ཞེས་བྱ་བ་ལ་སོགས་པའོ། །ཕྱི་མ་གསུམ་པོ་ནི། དེ་རྣམས་རིམ་བཞིན་རང་གིས་རང༌། ཞེས་བྱ་བ་ལ་སོགས་པ་སྟེ། འདིར་རང་གིས་རང་བསྒྱུར་བ་ནི། འགྲེལ་ཆེན་ལས། དེ་བཞིན་དུ་དེའི་སྡེ་ནི་བསྐལ་པ་བར་མ་དང༌། བསྐལ་པ་བར་མའི་སྡེས་མཆོག་གི་བསྐལ་པའོ། །ཞེས་པའི་སྡེའི་དོན། ཡེ་ལེར། གཅིག་གི་སྡེ་ནི་གཅིག་དང༌། གཉིས་ཀྱི་སྡེ་ནི་བཞི་དང་ཞེས་པ་ནས། དགུའི་སྡེ་ནི་བརྒྱད་ཅུ་རྩ་གཅིག་དང་བཅུའི་སྡེ་ནི་བརྒྱ་སྟེ། ཞེས་གསུངས་པ་ལྟར་རོ། །གཉིས་པ་བགྲོད་བྱ་བགྲོད་བྱེད་བྱེ་བྲག་ཏུ་བཤད་པ་ལས་གསུམ་སྟེ། སྤྱིར་བཤད་པ། བྱེ་བྲག་ཏུ་ཉི་མའི་གོ་ལ་འཁོར་ཚུལ་བཤད་པ། དེ་ལ་བརྟེན་ནས་ས་ལ་དུས་རྣམས་འཁོར་ཚུལ་བཤད་པའོ། །དང་པོ་ལ་གཉིས་ཏེ། བགྲོད་བྱ་སྐར་ཁྱིམ་བཤད་པ་དང༌། བགྲོད་བྱེད་གཟའ་བཤད་པའོ། །དང་པོ་ལའང་གསུམ་སྟེ། ངོ་བོ་སྒྲ་དོན། གནས་ལུགས་སོ། །དང་པོ་ནི། དཀྱིལ་འཁོར་རི་གླིང་ལ་སོགས་པ་ཆགས་པའི་རྗེས་དེ་ནས། ཤར་གྱི་འོད་ཟེར་ནག་པོ་ལས་གཟའ་སྐར་སོགས་ལྷའི་གཞལ་མེད་ཁང་བརྟན་པར་བྱེད་པའི་བརྟན་གཡོའི་རླུང་ཇི་སྙེད་པ་སྐྱེས་ཏེ། ཁྱིམ་གྱི་རྒྱ་སྐད་རྭ་ཤི་ཞེས་པ་ཚོགས་པའམ་ཕུང་པོའི་དོན་ཡིན་པས་སོ། །དེ་ལྟ་ནའང་དེ་རྣམས་ཀྱི་གཙོ་བོ་འཇིག་རྟེན་དུ་ཕན་གནོད་སྟོན་པའི་ཁྱིམ་བཅུ་གཉིས་ཀྱི་བདག་ཉིད་ཅན་འབྱུང་བའི་དབང་གིས་ཁ་དོག་ཐ་དད་པའི་རླུང་གི་འཁོར་ལོ་རྩིབས་བཅུ་གཉིས་པའི་དབྱིབས་ཅན་དབུས་མཐོ་བ་རི་རབ་ལ་ཉེ་ཞིང༌། མཐའ་བགས་ཀྱིས་གཞོལ་བ་མེར་ཉེ་བའི་ཕྱོགས་དམའ་བ་སྟེ། རི་རབ་ཀྱི་སྟེང་ངོས་ལ་གདུགས་ཕུབ་པ་བཞིན་དུ་སྒང་གཤོངས་སམ་མཐོ་དམན་ཉིད་ཀྱི་རྣམ་པར་སོ་སོའི་རྒྱུ་ལམ་གཅིག་ལས་མི་འདའ་བར་གཡས་སྐོར་དུ་རྒྱུ་སྟེ། དཔལ་ལྡན་རྒྱུད་ལས། དབུས་ན་ལྷུན་པོ་གང་གི་སྟེང་དུ་ཁྱིམ་གྱི་འཁོར་ལོ་རྒྱུ་སྐར་བཅས་ཉིན་དང་མཚན་དུ་འཁོར་བ་སྟེ། ཞེས་སོ། །གཉིས་པ་ནི། གོ་ལ་ཞེས་པའི་སྒྲ་དོན་ཡང༌། ཞེས་སོགས་ཏེ། གུ་རུ་ལྕི་བ་དང༌། ལ་གྷུ་ཡང་བའི་སྐད་དོད་ཀྱི་ཐོག་མ་བསྡུས་ནས་ལྕི་ཡང་ངམ་སྒང་གཤོངས་ཞེས་བསྒྱུར་ཏེ། རྡོ་རྗེ་མཁའ་འགྲོར། སྒང་གཤོངས་འཁོར་ལོ་ཁྱོད་ཀྱིས་གསུངས། ཞེས་སོ། །དེ་བཞིན་དུ་སྦུབས་དང་ཁོངས་སོགས་སུ་བསྒྱུར་བ་ཡང་དོན་དང་འབྲེལ་མོད། འོན་ཀྱང༌། གོ་སྒྲ་ངག་ཕྱོགས་འོད་ཟེར་དང༌། མིག་དང་ཕྱུགས་དང་བརྒྱ་བྱིན་དང༌། མཐོ་རིས་ས་དེ་དོན་དགུར་འཇུག ཅེས་པ་ལས། འདིར་གནམ་གྱི་གོ་ལའི་སྐབས་སུ། གོ་མཐོ་རིས་དང་ལ་འཛིན་པར་བསྒྱུར་ན་ལེགས་ཏེ་རྒྱུ་མཚན་ཅི་སྟེ་སོགས་སོ། །དེ་བཞིན་དུ་སྐབས་ཐོབ་སོ་སོར་སྦྱར་དགོས་པས། སའི་གོ་ལའི་སྐབས་སུ་གོ་ཕྱོགས་སམ་ས་དང་ལ་འཁོར་བ་ཞེས་བསྒྱུར་བར་བྱའོ། །གསུམ་པ་སྐར་ཁྱིམ་གྱི་གནས་ལུགས་ནི། དེ་ལྟར་འཁོར་གཞི་རླུང་གི་འཁོར་ལོ་གྲུབ་པའི་རྗེས་སུ་དེའི་སྟེང༌། ནུབ་ཀྱི་འོད་ཟེར་སེར་པོ་ལ་སོགས་ཏེ། རྒྱུ་སྐར་ཉེར་བདུན་དུས་མཉམ་དུ་སྐྱེ་ལ། དེ་མ་ཐག་ནས་གཡས་སུ་འཁོར་བ་དེའི་ཚེ་འཛམ་གླིང་ཆུང་ངུ་འདིར་ཐོག་མར་ཐ་སྐར་ནས་འགོ་དྲངས་ཏེ་ཤར་བས་དེ་ཉིད་རྒྱུ་སྐར་གྱི་དང་པོར་བཞག་གོ། གཞན་ཕལ་ཆེ་བ་ནས་སྨིན་དྲུག་དང་པོར་བཤད་པའང་སྣང་སྟེ། ཉི་སྙིང་ལས། རེ་ཞིག་དང་པོར་སྨིན་དྲུག་ཅེས། རྒྱུ་སྐར་དཀྱིལ་འཁོར་ཐམས་ཅད་ལ། ནང་གི་དང་པོར་བཞག་པར་བྱ། ཞེས་པས་མཐའ་གཅིག་ཏུ་མ་ངེས་སོ། །དེ་ཡང་ཁྱིམ་རེའི་ཁྱོན་ལ་སྐར་མ་ཇི་ཙམ་རེ་གནས་ཤེ་ན། ཐ་སྐར་བྲ་ཉེ་སྨིན་དྲུག་གི། ཞེས་བྱ་བ་ལ་སོགས་པ་སྟེ། འགྲེལ་ཆེན་ལས། ཐ་སྐར་དང་བྲ་ཉེ་དང་སྨིན་དྲུག་གི་རྐང་པ་གཅིག་ནི་ལུག་ལའོ། །ཞེས་སོགས་གསུངས་པ་ལྟར་སྐར་མ་སྒང་པོ་གཉིས་གཉིས་དང་བཞི་ཆ་རེ་ལ་ཁྱིམ་རེར་བྱས་སྟེ། སྔར་ལེའུ་གཉིས་པར་བཤད་གྲུབ་པས་འདིར་རྒྱ་མི་བསྐྱེད་དོ། །ཁྱིམ་འདི་དག་གི་མིང་དང་མཚན་གཞི་ནི། ལྷུན་པོའི་ཕྱོགས་ཀྱི་དབྱེ་བས་གླིང་བཞི་སྟེ་དུམ་བུ་བཅུ་གཉིས་པོ་ཀུན་ན་འགྱུར་བ་མེད་པ་ཉིད་དོ། །གཉིས་པ་བགྲོད་བྱེད་གཟའ་བཅུ་བཤད་པ་ལ་གསུམ་སྟེ། སོ་སོའི་སྐྱེས་ཁྱིམ་བཤད་པ། ཕན་ཚུན་འཐབ་ཚུལ། ཁྱིམ་བཅུ་གཉིས་ལ་ལོངས་སྤྱོད་ཅིང་འཁོར་ཚུལ་ལོ། དང་པོ་ནི། ཕྱོགས་གཞན་ལས་བསྐལ་པ་དང་པོའི་མི་རྣམས་ཀྱི་འོད་ནུབ་པའི་རྗེས་སུ་ཉི་ཟླ་རྣམས་རིམ་པར་བྱུང་བར་གསུངས་ཏེ། གདགས་པ་ལས། ཆོས་ཉིད་ཀྱིས་ནི་འཇིག་རྟེན་དུ་མུན་པ་འབྱུང་བ་ན། ཉི་མ་དང་ཟླ་བ་འདི་གཉིས་འཇིག་རྟེན་དུ་བྱུང་བར་གྱུར་ཏོ། ཞེས་དང༌། འཇམ་དཔལ་རྩ་རྒྱུད་ལས། རང་ཉིད་འོད་ལྡན་སེམས་ཅན་ནི། དེ་ཡི་དུས་སུ་རྫོགས་ལྡན་ཡིན། །ཐམས་ཅད་ནམ་མཁའ་ལ་འགྲོ་ཞིང༌། །རྒ་དང་འཆི་བ་རྣམ་པར་སྤངས། །དེ་ཡི་དུས་དུ་སྐར་མ་མེད། །ལྷ་དང་ལྷ་མིན་འཇིག་རྟེན་མེད། །དང་པོའི་དུས་ནི་དུས་མཆོག་ཡིན། །མིང་མེད་རིགས་ཀྱང་ཡོད་མ་ཡིན། །ཚེས་དང་སྐྱེ་བའི་སྐར་མ་མེད། །བསྙུང་བ་མེད་ཅིང་སྔགས་ཀྱང་མེད། །དགེ་དང་མི་དགེའི་ལས་ཀྱང་མེད། །འདི་དག་རང་གར་སྤྱོད་པ་སྟེ། །བཟའ་དང་བཟའ་བར་བྱ་བའང་མེད། །འདི་དག་ནད་མེད་དག་པ་སྟེ། །རྟག་ཏུ་སེམས་ཅན་རྣམ་མང་པོ། །དེ་ནས་དུས་ནི་བྲི་བ་ན། །འཇིག་རྟེན་མ་ཡིན་རབ་ཏུ་འཇུག །སྔོན་གྱི་ལས་ཀྱིས་དྲངས་ནས་ནི། །དེ་ནས་ས་ཡི་སྟེང་དུ་འགྲོ། །ས་སྟེང་ལྷ་གནས་གཞལ་ཡང་ཁང༌། །ལྷ་དང་ལྷ་མིན་གང་དག་བྱུང༌། །བར་མའི་དུས་སུ་ཕྱིན་གྱུར་ནས། །མི་ཡི་ལུས་ལ་ཡང་དག་བསྟེན། །བཟའ་དང་བཏུང་བར་སྐམ་ཆགས་པས། །འོད་དེ་དག་ནི་རབ་ཏུ་ཉམས། །ལུས་ནི་སྲ་བ་ཉིད་གྱུར་ཅིང༌། །དགེ་དང་མི་དགེ་རྣམ་པར་སྤྱོད། །དེ་ནས་ཉིན་ཞག་ཟླ་བ་དང༌། །གཟའ་ཡི་འོད་ནི་བྱུང་བར་གྱུར། །ཅེས་སོ། །དེ་ལྟ་ནའང་རྒྱུད་འགྲེལ་ལས། སྐྱེས་སྐར་གསུངས་པ་ཙམ་ལས་དུས་འདི་དང་འདིའི་ཚེ་སྐྱེས་ཞེས་མ་གསུངས་སོ། །འོན་ཀྱང་བགྲོད་བྱ་སྐར་ཁྱིམ་འཁོར་དང་བཅས་པ་ཆགས་པའི་རྗེས་སུ་བགྲོད་བྱེད་གཟའ་རྣམས་སྐྱེས་པར་རང་རང་གི་སྐྱེས་སྐར་གསུངས་པས་ཀྱང་སྒྲུབ་ནུས་ལ། དེར་མ་ཟད་ནང་དུ་ལྟེ་བའི་རྩ་གྲུབ་ནས། དེ་ལས་སྙིང་གའི་རྩ་བརྒྱད་གྲུབ་པའི་རིམ་པས་ཀྱང་སྔ་ཕྱིའི་རིམ་པ་འདི་ལྟར་འཐད་དོ། །དེ་ཡང་ཀརྐ་ཊའི་ཁྱིམ་གྱི་ཐོག་མར་ལྷོའི་འོད་དམར་ལས་ཉི་མ་སྐྱེས་ཏེ། ལོ་དངོས་གཞིའི་ཐོག་མ་ཡིན་ལ། དེ་ནས་ཉི་མས་ཉིན་ཞག་རྣམས་ལ་ལོངས་སྤྱོད་དོ། །དེ་ནས་རིམ་བཞིན་ཉི་མ་རྒྱུ་སྐར་ལ་གཡོན་སྐོར་དུ་སྤྱོད་པ་ལས་གཟའ་སོ་སོའི་སྐྱེས་སྐར་གྱི་སྟེང་དུ་ཉི་མས་སླེབ་སྟེ་ཉི་མ་སྐྱེས་སྐར་དང་བཅས་པ་ཤར་གླིང་དབུས་མའི་ཚངས་ཐིག་ཏུ་སླེབ་པ་དང་ལྷན་ཅིག་ཏུ་གཟའ་རྣམས་གཡས་གཡོན་གྱི་འོད་ཟེར་དཀར་དམར་ལས་རང་རང་གི་སྐྱེས་སྐར་གྱི་སྟེང་དུ་སྐྱེ་བ་ཡིན་ནོ། །དེ་ཡང་གཡས་ལྷོའི་འོད་ཟེར་དམར་པོ་ལས་ནི་ཉི་མ་མིག་དམར་ཕུར་སྤེན་དུས་མེ་སྟེ་དྲག་གཟའ་ལྔ་སྐྱེས་ལ། བྱང་གི་འོད་དཀར་ལས་ནི་ཟླ་བ་ལྷག་སངས་སྒྲ་གཅན་མཇུག་རིང་སྟེ་ཞི་གཟའ་ལྔ་སྐྱེས་སོ། །རང་རང་གི་སྐྱེས་སྐར་ནི་ཟླ་བ་ཐ་སྐར་སོགས་ཏེ། ཡེ་ལེའི་འགྲེལ་ཆེན་ལས། ད་ནི་གཟའ་རྣམས་ཀྱི་སྐྱེ་བའི་ཁྱིམ་གསུངས་པ། ལུག་ཅེས་པ་ལ་སོགས་པ་རྣམས་ཏེ། འདིར་གྲངས་བཞིན་དུ་ལུག་དང་འཁྲིག་པ་དང༌། ཀརྐ་ཊར་ནི་རི་བོང་ཅན་དང་པ་སངས་དང་ནི་ཉི་མ་བྱུང་བར་གྱུར་ཏོ། །སེངྒེར་ས་སྐྱེས་དང༌། བུ་མོར་ཕུར་བུ་དང༌། སྲང་དུ་སྒྲ་གཅན་དང༌། སྡིག་པར་གཟའ་ལྷག་དང༌། གཞུའི་ཐོག་མར་སྤེན་པ་དང༌། དེའི་མཐའ་མར་མཇུག་རིང་ངོ༌། །ཞེས་གསུངས་པ་ལྟར་རོ། །དེ་ཡང་ཟླ་བ་སྐྱེས་པ་ནས། །དཀར་ཆ་དང་པོར་སྐྱེ་བ་དང༌། །ཚེས་ཞག་དང་བྱེད་པའི་ལོ་རྣམས་ཀྱི་ཐོག་མའི་མགོ་རྩོམ་པ་དུས་མཚུངས་ཤིང་དེས་ན་ཁྱིམ་གྱི་ཐོག་མ་ལུག་དང༌། ཕྱོགས་ཀྱི་དང་པོ་ཡར་ངོ་དང༌། ཟླ་བ་དེའི་ཚེས་བཅོ་ལྔ་ལ་ནག་པས་ཉ་བས་ནག་ཟླ་ཟླ་བའི་ཐོག་མར་བཞག་གོ། ཉི་མ་སོགས་བདུན་པོ་རང་རང་སྐྱེས་པའི་ཉིན་ཞག་དེ་ལ་དབང་བྱས་པས་ན་རེས་གཟའ་ཞེས་གྲགས་ཏེ། རྒྱུ་མཚན་གཟའ་རྣམས་སྐྱེས་སྐར་མི་གཅིག་པས་དུས་མཉམ་དུ་སྐྱེས་པ་མ་ཡིན་ལ། དུས་རིམ་ཅན་དུ་སྐྱེས་པས་ཕྱི་མ་ཕྱི་མ་མ་སྐྱེས་བར་དུ་སྔ་མ་སྔ་མ་རྣམས་ཀྱིས་ཉིས་རེས་སུམ་རེས་སོགས་བྱས་ལ་སྤེན་པ་སྐྱེས་ནས་བདུན་རེས་བྱས་སོ། །སྐྱེ་བའི་ས་ཁྱོན་ཡང་ཁ་ཅིག་ཉི་མ་ལྷོ་གླིང་དབུས་མ་དང་ཟླ་བ་བྱང་གླིང་དབུས་མའི་ཚངས་ཐིག་ཏུ་སྐྱེས་ཟེར་བ་མི་རིགས་ཏེ། དེ་ལྟར་ན་གླིང་འདིའི་ཉིན་ཞག་གི་འཕོ་མཚམས་ལྷོ་གླིང་དབུས་མའི་དབུས་དྲང་པོའི་ཉིན་གུང་ནས་འཛིན་དགོས་པ་སོགས་བ་གླང་རྫིས་ཀྱང་མ་ཚང་བདེ་བླག་ཏུ་རྟོགས་པར་འགྱུར་རོ། །དེས་ན་འདིར་བཤད་པ་འདི་ནི་གླིང་འདིའི་རེས་གཟའ་འཕོ་མཚམས་ནམ་ལངས་ཀྱི་དུས་ཡིན་པ་དེའི་རྒྱུ་མཚན་གྱིས་སོ། །གཉིས་པ་ནི། གཟའ་དེ་རྣམས་ཀྱང་ཕན་ཚུན་གཉིས་གཉིས་དགྲ་ཟླར་གྱུར་པ་ཡིན་ཏེ། མིག་དམར་དང་ལྷག་པ། ཕུར་བུ་དང་པ་སངས། སྤེན་པ་དང་མཇུག་རིང་ངོ༌། །དེ་དག་རང་རང་གིས་དབང་བྱེད་པའི་ཞིང༌། མིག་དམར་གྱི་ལུག་དང་སྡིག་པ། ལྷག་པའི་འཁྲིག་པ་དང་བུ་མོ། ཕུར་བུའི་གཞུ་དང་ཉ། པ་སངས་ཀྱི་གླང་དང་སྲང༌། སྤེན་པའི་ཆུ་བུམ། ཟླ་བའི་ཀརྐ་ཊ་སྟེ་སོ་སོའི་ཞིང་དང༌། རང་རང་གི་སྐྱེས་སྐར་ལ་གང་དགྲ་ཟུན་དུ་གྱུར་པའི་གཟའ་དེ་ཞུགས་ན་འཐབ་ཅིང་རྩོད་པར་བྱེད་དོ། །ཁྱད་པར་ཟླ་བའི་ཞིང་ལ་སྤེན་པ་ཞུགས་ན་མཇུག་རིང་ཟླ་བའི་རིགས་ཅན་ཡིན་པས་དེས་རྩོད་རོགས་བྱེད་ལ། མཁས་པའི་དབང་པོ་ལ་ལ་དག ཉི་མའི་ཞིང་ལ་མཇུག་རིང་ཞུགས་ན་སྤེན་པས་རྩོད་གསུང་ཡང་རྒྱུད་འགྲེལ་ལས་དངོས་སུ་མ་གསུངས་སོ། །དེ་ལས་གཞན་དུ་མི་རྩོད་དོ། །གསུམ་པ་ནི། སྐར་ཁྱིམ་གོ་ལ་སོགས་ཏེ། དེ་འཁོར་བའི་དབང་གིས་གཟའ་སྐར་རྣམས་ཀྱང་རི་རབ་ལ་ཞག་རེ་བཞིན་རླུང་འགྲོས་ནི་གཡས་སུ་འཁོར་ལ། སྒྲ་གཅན་གྱི་གདོང་དང་དུས་མེ་མ་གཏོགས་པའི་གཟའ་གཞན་རྣམས་རང་རང་འགྲོས་ནི་གཡོན་སྐོར་དུ་སྤྱོད་དོ། །དེ་ཡང་ཇི་ཙམ་རེ་སྤྱོད་ཅེ་ན། གཟའ་ལྔ་ཉི་མ་དང་བཅས་པའི་དལ་རྐང་རྣམས་རང་རང་གི་སྐྱེས་སྐར་དང༌། གཟའ་ལྔ་པོའི་མྱུར་རྐང་རང་རང་གི་དལ་བ་ལས་བརྩམས་ཏེ། དལ་བ་ལ་རིམ་པའི་སྔ་རྐང་དང༌། རིམ་མིན་གྱི་ཕྱི་རྐང་དུ་རྐང་པ་རྣམས་བུ་ལོན་དང༌། དེ་དང་དེའི་ཕྱི་རྐང་དང་སྔ་རྐང་དུ་ནོར་དུ་སྤྱོད་ལ། མྱུར་རྐང་གི་ཚེ་རིམ་པའི་སྔ་རྐང་དང་རིམ་མིན་གྱི་ཕྱི་རྐང་དུ་ནོར་དང་རིམ་མིན་གྱི་སྔ་རྐང་དང་རིམ་པའི་ཕྱི་རྐང་དུ་རྐང་པ་རྣམས་བུ་ལོན་གྱིས་སྤྱད་ནས་སླར་ཡང་རང་རང་གི་སྐྱེས་སྐར་གྱི་སྟེང་དུ་སླེབས་པ་ན་དལ་རྐང་གི་ནོར་བུ་ལོན་ཁ་དག་ཅིང༌། འབྱུང་འགྲོས་ཀྱི་མཐར་ཉི་མ་ལ་ནུབ་པ་ན་མྱུར་རྐང་གི་ནོར་བུ་ལོན་ཁ་དག་པར་འགྱུར་ལ། གལ་ཏེ་གཟའ་ལྔ་རང་རང་གི་སྐྱེས་སྐར་དང་ཉི་མའི་སྟེང་དུ་ལྷན་ཅིག་ཏུ་འཛོམ་པའི་ཚེ་དལ་རྐང་དང་མྱུར་རྐང་གཉིས་ཀའི་ནོར་བུ་ལོན་ཁ་དག་པར་འགྱུར་བ་ཡིན་ནོ། །དེ་བཞིན་དུ་ཞི་བའི་གཟའ་ལྷག་སངས་གཉིས་དང་ཀེ་ཏུ་ཡང་ལུས་ཞི་བ་ཡིན་པས་དེ་རྣམས་ནི་ཉི་མའི་གཡོན་ཕྱོགས་ནས་འཆར་ནུབ་བྱེད་ཅིང༌། དྲག་གཟའ་དམར་སྤེན་གཉིས་དང་ཕུར་བུ་ཡང་ལུས་དྲག་པོ་ཡིན་པས་དེ་རྣམས་ཉི་མའི་གཡས་ཕྱོགས་ནས་འཆར་ནུབ་བྱེད་པར་བཤད་པ་ཡིན་ནོ། །དེ་བཞིན་དུ་ཞི་གཟའ་དང་དྲག་གཟའ་ཕྲད་པའི་ཚེ་ཡང་ཞི་བ་གཡོན་དང་དྲག་པོ་གཡས་ནས་འགྲོ་ཚུལ་དེ་ལྟར་རོ། །སྒྲ་གཅན་ནི་གདོང་ནས་དུས་མེའི་བར་སྐར་མ་ཕྱེད་དང་བཅུ་གསུམ་རེ་ཡོད་པས་སྐར་ཁྱིམ་གྱི་འཁོར་ལོའི་ཕྱེད་ལུས་ཀྱིས་ཁྱབ་པར་གནས་ཏེ་རླུང་འགྲོས་བཞིན་དུ་རང་འགྲོས་ཀྱང་གཡས་སྐོར་དུ་རྒྱུའོ། །འདིར་ཤོང་སྟོན་ཆེན་པོས་གཟའ་གསལ་སྒྲོན་དུ། དཔལ་ལྡན་སྒྲ་གཅན་འགྲོས་ལ་ནི། རྐང་པ་མེད་ཕྱིར་མགྱོགས་བུལ་སྤངས། །རྟག་ཏུ་ལོངས་སྤྱོད་མཚུངས་འགྱུར་ཞེས། །མཁས་པས་ལེགས་པར་བཤད་ལས་རྙེད། །ཞེས་གསུངས་པའི་རྗེས་སུ་འབྲངས་ཏེ། མཁས་པ་ཕལ་ཆེ་བ་སྒྲ་གཅན་ལ་རྐང་པ་མེད་པས་ལྷོ་བྱང་གི་བགྲོད་པ་མེད་པར་རྟག་ཏུ་ཉིན་མཚན་མཉམ་པའི་ལམ་དུ་རྒྱུ་ཞེས་ཟེར་ཀྱང་ཉི་ཟླར་འཇུག་ཚུལ་མངོན་སུམ་པ་འདི་ལ་བརྟག་ན་རྟག་ཏུ་ཉིན་མཚན་མཉམ་པའི་ལམ་དུ་འགྲོ་བར་འདོད་པའི་དམ་བཅའ་འདི་འཇིག་པར་འགྱུར་རོ། །ཇི་ལྟར་ན། ཉི་ཟླ་ལྷོ་བྱང་གི་བགྲོད་པ་མཐར་ཐུག་པའི་ཚེ་གུང་གཉིས་ཀྱི་དུས་སུ་གཟའ་འཛིན་འབྱུང་བ་མི་སྲིད་པར་ཐལ་ཏེ། སྒྲ་གཅན་མཉམ་པའི་ལམ་གྱི་ཕྱི་ནང་དུ་མི་འགྲོ་བ་གང་ཞིག བགྲོད་པ་མཐར་ཐུག་པའི་ཉིན་གུང་དང་ནམ་གུང་གི་ཚེ་ཉི་ཟླ་མཉམ་པའི་ལམ་དུ་འགྲོ་བ་མི་སྲིད་པའི་ཕྱིར་རོ། །དེར་མ་ཟད་འགྲེལ་ཆེན་ལས། འདིར་ཁྱིམ་གྱི་འཁོར་ལོ་ལ་གཟའ་ཐམས་ཅད་བྱང་དུ་འགྲོ་བ་དང༌། ལྷོར་འགྲོ་བ་ཡོད་དེ། དཔེར་ན། ཉི་མ་རྒྱུ་སྐར་ལ་ལོངས་སྤྱོད་པའི་དབང་དང༌། ཁྱིམ་དྲུག་ལོངས་སྤྱོད་པའི་དབང་གིས་བཞིན་ནོ། །ཞེས་གཟའ་ཐམས་ཅད་ལ་བགྲོད་པ་གཉིས་ཡོད་པར་གསུངས་པས་སྒྲ་གཅན་ལའང་ཡོད་དགོས་པར་གོའོ། །དེས་ན་སྔར་བཤད་པ་ལྟར་རྩ་བའི་རྒྱུད་དང་མུ་སྟེགས་པའི་བྱེད་རྩིས་ལ་ཁ་འཕང་བར་མཛད་ནས། རྒྱུད་འགྲེལ་པ་དང་བཅས་པ་འདིར་སྒྲ་གཅན་རང་འགྲོས་ཀྱིས་སྐར་ཁྱིམ་ལ་གཡས་སྐོར་དུ་སྤྱོད་པ་ཙམ་ཞིག་ལས་བགྲོད་ཚུལ་མ་གསུངས་སོ། །གཉིས་པ་བྱེ་བྲག་ཏུ་ཉི་མའི་གོ་ལ་འཁོར་ཚུལ་ལ་གཉིས་ཏེ། རྣམ་གྲངས་སྤྱིར་བཤད་པ་དང༌། གྲུ་ཆགས་བྱེ་བྲག་ཏུ་བཤད་པའོ། །དང་པོ་ལ་བསྟན་བཤད་གཉིས་ལས། དང་པོ་ནི། འཁོར་ཚུལ་ཁྱིམ་དང་ཁྱིམ་ཅན་གཉིས། ཞེས་སོགས་ཚིགས་སུ་བཅད་པ་གཅིག་གོ། །གཉིས་པ་ལ་གཉིས་ཀྱི་དང་པོ་ཁྱིམ་དང་ཁྱིམ་ཅན་གཉིས་ཀ་འཆུགས་མེད་དུ་འདོད་པ་རྨོག་བརྩེགས་པའི་ལུགས་ཏེ། དེ་ཡང་མུ་སྟེགས་པ་ཁ་ཅིག་ན་རེ། ཁྱིམ་སྐར་རྣམས་ལྷོ་བགྲོད་དང་བྱང་བགྲོད་གཉིས་ཀ་མི་བྱེད་པ་མངོན་གསུམ་གྱིས་གྲུབ་པ་ལྟར་དུ་ཉི་ཟླ་གཟའ་ལྔ་སྒྲ་གཅན་སོགས་ཁྱིམ་ཅན་རྣམས་ཀྱང་ལྷོ་བགྲོད་དང་བྱང་བགྲོད་གཉིས་ཀ་མི་བྱེད་པར། འབྲས་སོ་བ་ཆགས་པ་ལ་བ་ལང་ཀ་བ་ལ་བསྐོར་བའི་དཔེས་གཟའ་བརྒྱད་པོ་འགྲོས་དལ་རིམ་གྱིས་རི་རབ་ལ་ཉེ་བར་འཁོར་བས་འཕོ་འཆུག་མེ་བྱེད་པར་སྟེང་ནས་སྟེང་དུ་བརྩེགས་མར་གནས་པར་འདོད་དོ། །དེ་ནི་མི་རིགས་ཏེ་གཟའ་འཕྲད་པ་མི་སྲིད་པར་ཐལ་བས་གཟའ་རྩོད་པར་འགྱུར་བ་དང་འགལ་བའི་ཕྱིར་དང༌། གཟའ་རྣམས་ལ་ལྷོ་བྱང་གི་བགྲོད་པ་ཡོད་ཅིང་ཉི་མ་ལས་འཆར་ནུབ་བྱེད་དགོས་པའི་ཕྱིར་དང༌། ཞི་གཟའ་གཉིས་སྐབས་འགར་ཉི་མའི་མདུན་རྒྱབ་གང་རུང་ནས་འཆར་བ་ཡང་མཐོང་བའི་ཕྱིར་མངོན་སུམ་དང་འགལ་ལོ། །གཉིས་པ་ལའང་བསྟན་བཤད་གཉིས་ལས། དང་པོ་ནི། འཆུགས་པར་འདོད་པའི་སོགས་སོ། །རྒྱས་པར་བཤད་པ་ལ་བཞིའི་དང་པོ་ཕྱིར་བསྐྱེད་མ་དང༌། གཉིས་པ་སྟེང་བསྐྱེད་མ་གཉིས་པོ་ནི་གླིང་བཞི་ཀུན་ཏུ་དབྱར་དགུན་གྱི་བགྲོད་པ་གཉིས་དང༌། སྟོན་དཔྱིད་ཀྱི་མཉམ་པ་གཉིས་ཏེ་དུས་བཞི་པོ་མཉམ་པོར་འཁོར་བར་འདོད་པ་གཅིག་ཀྱང༌། འཁོར་ཚུལ་མི་གཅིག་སྟེ། འདི་ལྟར་འདུལ་འཛིན་ཆེན་པོ་དམར་སོགས་ཕྱིར་བསྐྱེད་པ་རྣམས་ན་རེ། གླིང་བཞི་ཀའི་བྱང་བགྲོད་མཐར་ཐུག་དུས་མཉམ་དུ་བྱུང་བའི་ཕྱིས་ཉིན་ནས་ཐ་དད་པར་རྒྱ་ཇེ་ཆེ་ཇེ་ཆེར་སོང་བས་དཀྱིལ་ཐད་དུ་སླེབ་པ་ན་གླིང་བཞི་ཀའི་སྟོན་མཉམ། དེ་ནས་ཀྱང་ཕྱིར་ལ་ཇེ་ཆེར་སོང་བས་ཕྱི་མཐར་སླེབ་པ་ན་གླིང་བཞི་ཀའི་ལྷོ་བགྲོད་མཐར་ཐུག་སྟེ་དགུན་ཉི་ལྡོག ཡང་ཕྱིས་ཉིན་ནས་རྒྱ་ཇེ་ཆུང་ཇེ་ཆུང་དུ་བཏང་བའི་དཀྱིལ་ཐད་དུ་སླེབ་པ་ན་དཔྱིད་མཉམ་ཞིང་ད་དུང་རྒྱ་ཇེ་ཆུང་དུ་སོང་བའི་ནང་མཐར་བྱང་བགྲོད་མཐར་ཐུག་སྟེ་དབྱར་ཉི་ལྡོག་ཟེར་རོ། །སྟེང་བསྐྱེད་པ་རྣམས་ན་རེ། གླིང་འདིའི་ལྷོ་བགྲོད་མཐར་ཐུག་གི་ཚེ་གླིང་ཐམས་ཅད་ཀྱི་ལྷོ་བགྲོད་མཐར་ཐུག་ཡིན་པ་བདེན་ཡང༌། ཕྱིས་ཉིན་ནས་རྒྱ་ཇེ་ཆེར་མི་འགྲོ་བའི་ཇེ་མཐོ་ཇེ་མཐོར་སོང་ནས་དཀྱིལ་མཚམས་སུ་ཀུན་གྱི་དཔྱིད་མཉམ། མཐོ་ཚད་ལ་ཀུན་གྱི་བྱང་བགྲོད་མཐར་ཐུག་ཡང་ཇེ་དམའ་རུ་བཏང་ནས་དཀྱིལ་དུ་སྟོན་མཉམ་སོགས་འོང་ཞེས་ཟེར་རོ། །གསུམ་པ་སྣར་ཐང་པ་སོགས་ལྕགས་སྒྲོག་མའི་ལུགས་འཛིན་པ་རྣམས་ན་རེ། རྨ་བྱ་ཆེན་མོ་ལས། མཚོན་ཆའི་འཁོར་ལོ་བཞིན་དུ་རྒྱུ། ཞེས་པའི་ལུང་གིས་གླིང་གཉིས་ན་དབྱར་ཡོད་པའི་དུས་ལ་གླིང་གཞན་གཉིས་ན་དགུན་དང༌། མཉམ་གཉིས་ཀྱང་དེ་བཞིན་དུ་ཡོད་དེ། དཔེར་ན། ལྷོ་གླིང་འདིའི་བྱང་བགྲོད་མཐར་ཐུག་གི་མཚན་མོ་བྱང་གི་ཡང་བྱང་བགྲོད་མཐར་ཐུག་ཏུ་བྱས་ཏེ་འགྲོ་ས་ཤིན་ཏུ་རིང་བས་ལྷུན་པོ་བར་དུ་ཚུད་ཙམ་གྱི་ཤར་ནུབ་ཏུ་ཤིན་ཏུ་རིང་བ་རྩེ་སྦྲེལ་ལྟ་བུར་གནས་པས་ཤར་ནུབ་གཉིས་ཀའི་ལྷོ་བགྲོད་མཐར་ཐུག་ཡོང་བས། ལྷོ་བྱང་གི་དབྱར་ཉི་དང་ཤར་ནུབ་ཀྱི་དགུན་ཉི་ལྡོག་པ་ཉིན་གཅིག་ཏུ་འདོད། དེའི་ཕྱི་ཉིན་བྱང་བགྲོད་གཉིས་ཀ་ཇེ་འགྱེད་ལ་བཏང་བས་ཟླུམ་པོ་ཉིད་དུ་སོང་བའི་ཉིན་གཅིག་པོ་དེ་ཉིད་ཀྱི་ཞག་གཅིག་ལ་གླིང་གཉིས་ཀྱི་སྟོན་མཉམ་དང་གཉིས་ཀྱི་དཔྱིད་མཉམ་ཡོང༌། དེ་ནས་ཇེ་འགྱེད་ལ་བཏང་ནས་ལྷོ་བྱང་ཤིན་ཏུ་རིང་ཞིང་ཤར་ནུབ་ཐུང་བའི་ཚེ་ཤར་ནུབ་གཉིས་དང་ལྷོ་བྱང་དུ་ལྡོག་ཅེས་ཟེར་རོ། །འདོད་པ་དེ་གསུམ་ཀ་མི་རིགས་ཏེ། ལུང་རིགས་གཉིས་ཀ་དང་འགལ་བས་སོ། །ལུང་དང་འགལ་ཏེ། འགྲེལ་ཆེན་ལས། ད་ནི་ཉི་མའི་ཁྱིམ་འཁོར་བའི་དབང་གིས་དུམ་བུ་བཅུ་གཉིས་སུ་བྱང་དུ་བགྲོད་པ་བཅུ་གཉིས་དང༌། ལྷོར་བགྲོད་པ་བཅུ་གཉིས་གསུངས་པ་འདིར་ནི་གཡོན་བགྲོད་དུ་འགྱུར་ཞེས་པ་སྟེ། ཞེས་སོགས་གསུངས་པས་སོ། །རིག་པ་དང་ཡང་འགལ་ཏེ། དབྱར་ཉི་ལྡོག་པའི་ཉིན་ཞག་ཕྲུགས་གཅིག་ལ་ཆུ་ཚོད་དོན་གཉིས་དང༌། དགུན་ཉི་ལྡོག་པའི་ཉིན་ཞག་ཕྲུགས་གཅིག་ལ་ཞེ་བརྒྱད་ལས་མེད་པར་ཐལ་བའི་ཕྱིར་རོ། །འོ་ན་རྨ་བྱ་ཆེན་མོའི་ལུང་དེའི་དོན་གང་ཡིན་ཞེ་ན། ཁ་ཅིག་ན་རེ། དེ་ནི་མཚོན་ཆའི་འཁོར་ལོ་འཕངས་པ་བཞིན་ནམ་མཁའ་ལ་འཁོར་ཞིང་འགྲོ་བའི་དཔེ་ཡིན་གྱི། ལྕགས་སྒྲོག་མའི་ལུང་དུ་མི་འགྲོ་ཟེར། ཁ་ཅིག་ན་རེ། འདི་ནི་ཛོ་གིས་ཁྱེར་བའི་ཙ་ཀ་ར་ཟེར་བ་དེ་ཡིན་པས་མཁའ་ལ་འཕངས་པའམ་མཛུབ་མོ་ལ་བསྐོར་བ་ན་སྒང་གཤོངས་སུ་འཁོར་བས་སོ་ཟེར་རོ། །ཁ་ཅིག གཟའ་སྐར་འདི་དག་ཚུལ་བཞིན་དང་ཚུལ་བཞིན་མ་ཡིན་པར་རྒྱུ་བ་ལས་འཇིག་རྟེན་དུ་ཕན་གནོད་འབྱུང་བའི་ལྟས་སུ་འཁོར་ཚུལ་གསུངས་པ་ཡིན་ཟེར་རོ། །ཁོ་བོ་ནི་ལུགས་གསུམ་ཀ་ལུང་དང་མི་འགལ་བར་འཆད་ཐུབ་མོད་ཀྱི། འོན་ཀྱང་ཕྱི་མ་ལྟར་བཤད་ན་ཅུང་ཟད་བདེ་འམ་སྙམ་སྟེ། ལུང་དེ་ལས། སུམ་ཅུ་རྩ་བདུན་ཚངས་པ་ཡང༌། །འཆར་བ་དང་ནི་ནུབ་པ་དག །མཚོན་ཆ་འཁོར་ལོ་བཞིན་དུ་རྒྱུ། །འཇིག་རྟེན་དུ་ནི་འཕེལ་ཟད་བྱེད། །ཅེས་གསུངས་པས་སོ། །བཞི་པ་གྲུ་ཆགས་མའི་ལུགས་ནི། །གླིང་བཞི་ཀུན་ཏུ་དུས་བཞི་འཁོར་བར་འདོད་དོ། །དུས་བཞི་འཁོར་བར་འདོད་པའི་ལུགས་འདི་ལའང་དབྱེ་ན་འདོད་ལུགས་གསུམ་ཡོད་དེ། ཁ་ཅིག མཁའ་ལ་སྐར་ཁྱིམ་གྱི་གོ་ལ་དང་སའི་གོ་ལ་དུས་བཞི་གཉིས་ཀ་གཡོན་སྐོར་ཁོ་ནར་འདོད་པ་དང༌། ཁ་ཅིག དུས་བཞི་གཡོན་སྐོར་དང་ཁྱིམ་ནི་གཡས་སུ་འཁོར་བར་འདོད་པ་དང༌། མཁས་པ་ཕལ་མོ་ཆེ་གནམ་སའི་གོ་ལ་གཉིས་ཀ་གཡས་སྐོར་དུ་འདོད་པ་དང་གསུམ་མོ། །དེ་ལྟར་འདོད་པ་གསུམ་པོ་དེ་ལས། དང་པོ་གནམ་ས་གཉིས་ཀ་གཡོན་འཁོར་དང༌། གཉིས་པ་ས་གཡོན་འཁོར་དུ་འདོད་པའི་ཞེ་འདོད་གཉིས་པོ་དེ་ནི། མཛོད་ལས། ནམ་ཕྱེད་ཉི་མ་ནུབ་པ་དང༌། །ཉི་མ་ཕྱེད་དང་འཆར་དུས་གཅིག །ཅེས་པ་འདི་དུས་རྟག་ཏུ་འབྱུང་བར་བཞེད་པས། ཞིབ་མོར་དཔྱད་པ་ན་སྔ་དྲོ་ཕྱི་དྲོའི་ཆུ་ཚོད་མ་འགྲིགས་པ་མཐོང་ནས་དུས་བཞི་གཡོན་འཁོར་གྱི་འདོད་ལུགས་གཉིས་པོ་དེ་བྱས་པ་ཡིན་མོད་ཀྱི། འོན་ཀྱང་ཤིན་ཏུ་མི་རིགས་པ་ཉིད་དེ་གུང་གཉིས་དང་འཆར་ནུབ་དུས་གཅིག་པ་ཚངས་ཐིག་གི་སྟེང་ལྟ་བུ་མཚམས་གཅིག་ཁོ་ནར་རྟག་ཏུ་འབྱུང་བར་སྟོན་པ་མ་ཡིན་གྱི། ཞག་རེ་ལ་དེ་འདྲའི་དུས་རེ་འབྱུང་བར་ངེས་སོ་ཞེས་རགས་རྩིས་ཀྱིས་གསུངས་པའི་ཕྱིར་དང༌། ཛི་ན་མི་ཏྲའི་སའི་འགྲེལ་པར་ཡང་རྟག་ཏུ་དེ་ལྟར་མ་ངེས་པར་གསུངས་པའི་ཕྱིར་དང༌། ཁྱད་པར་རྒྱུད་འགྲེལ་འབྲོ་འགྱུར་ལས། འདིར་ཉི་མ་ལུག་ལ་གནས་པས་ལྷུན་པོའི་ལྷོའི་དུམ་བུར་དཔྱིད་ཀྱི་དུས་དཔྱིད་ཟླ་ཐ་ཆུང་དུ་བྱེད་དོ། །མེའི་ཟུར་ཕྱེད་དུམ་བུ་གཉིས་པར་ནི་དབྱར་ཟླ་ར་བ་བྱེད་དོ། །དེ་བཞིན་དུ་མེའི་མཚམས་ཀྱི་གཞན་ཕྱེད་ཀྱི་དུམ་བུ་གསུམ་པར་དབྱར་ཟླ་འབྲིང་པོ་བྱེད་དོ། །ཞེས་དང༌། རྭ་འགྱུར་ལས་ཀྱང༌། འདིར་ལྷུན་པོ་ནས་ལྷོ་ཕྱོགས་ཀྱི་སའི་དུམ་བུར་ཉི་མ་ལུག་ལ་སོགས་ལ་གནས་པ་དཔྱིད་ཀྱི་མཚམས་དཔྱིད་ཟླ་ཐ་ཆུང་གི་ཟླ་བར་བྱེད་དོ། །མེའི་མཚམས་ཀྱི་ཕྱེད་དུམ་བུ་གཉིས་པར་དབྱར་ཟླ་ར་བར་བྱེད་དོ། །ཞེས་སོགས་གསུངས་པའི་ལུང་དང་འགལ་བའི་ཕྱིར་རོ། །དེས་ན་བུ་སྟོན་རིན་པོ་ཆེས་ཀྱང་ཞ་ལུ་བླ་བྲང་གི་ལྡེབས་རིས་ལ་དུས་བཞི་གཡོན་སྐོར་དུ་འབྲི་བར་མཛད་པ་ན། གཡུང་སྟོན་ཆེན་པོ་རྡོ་རྗེ་དཔལ་བཟང་པོས་དེ་མི་འཐད་པར་དགོངས་ཏེ་རྩོད་ཡིག་གི་བཀའ་ཤོག་བསྲིངས་པས་དེ་ཕྱིན་ཆད་བུ་སྟོན་རིན་པོ་ཆེ་ཡང་རང་གི་བཞེད་པ་དོར་ཏེ་རྒྱུད་འགྲེལ་གྱི་དགོངས་པ་རྣམ་པར་དག་པ་དུས་བཞི་གཡས་སྐོར་གྱི་ཚུལ་འདི་ཐུགས་སུ་ཆུད་ཅིང་ལོགས་བྲིས་ཀྱང་བསྒྱུར་བར་གྲགས་སོ། །དེ་ཡང་གཡུང་སྟོན་ཆེན་པོས་བསྲིངས་པའི་བཀའ་ཤོག་ནི་འདི་ཡིན་ཏེ། ༈ ཨོཾ་ཨཱཿཧཱུཾ་ཧོཿཧྃཀྵམླཝརཡ དུས་ཀྱི་འཁོར་ལོ་ངའི་གཏམ། ཞྭ་ལུ་རི་ཕུག་གི་བླ་བྲང་ལྷོ་ལོགས་གོ་ལའི་རི་མོ་ལ་ཟློ་བ། ཁྱོད་ངའི་དགོངས་པ་མིན་བཞིན་དུ་ང་ལ་མཁས་པར་གྲགས་ཤིང༌། མཁས་པར་རློམ་པ་རྣམས་ཀྱི་ནང་མཚང་སྟོན་ཅིང་རྟག་ཏུ་དེར་འདུག་པའི་ལུགས་གར་ཡོད། གལ་ཏེ་ཁྱོད་ལ་བདེན་ཡུས་ཡོད་ན། དཔྱིད་འབྲིང་ནམ་ཉི་མ་མཉམ་དུས་ཀྱི་ཉི་མ་ཤར་ལྷོ་ནས་ཤར་ནས་ནུབ་ནུབ་བྱང་དུ་རྒས་འགྲོ་ཞིང༌། སྟོན་འབྲིང་ནམ་ཉི་མ་མཉམ་དུས་ཀྱི་ཉི་མ་བྱང་ཤར་ནས་ལྷོ་ནུབ་ཏུ་རྒས་འགྲོ་བར་ཐལ། རྟགས་ཁས་བླངས། ཁྱབ་པ་ཚད་མས་གྲུབ། འདོད་ན་སྟོན་འབྲིང་དང༌། དཔྱིད་འབྲིང་ཉིན་མཚན་མཉམ་པའི་དུས་ཉི་མ་ཤར་ས་དང་ནུབ་ས་གཅིག་ཏུ་འདུག་པ་དབང་ཤེས་མ་འཁྲུལ་བ་ཀུན་གྱི་མཐུན་སྣང་དུ་གྲུབ་པས་གསལ། ཡང་དབྱར་ཉི་ལྡོག་དུས་དང༌། དགུན་ཉི་ལྡོག་དུས་ཤར་ས་དང་ནུབ་ས་གཅིག་ཏུ་ཐལ། རྟགས་ཁས་བླངས། ཁྱབ་པ་ཚད་མས་གྲུབ། འདོད་ན་དགུན་ཉི་ལྡོག་དུས་ཤར་ལྷོ་ནས་ཤར་ནས་ལྷོ་ནུབ་ཏུ་རྒས་འགྲོ་ཞིང༌། དབྱར་ཉི་ལྡོག་དུས་བྱང་ཤར་ནས་ཤར་ནས་ནུབ་བྱང་དུ་རྒས་འགྲོ་བ་དབང་ཤེས་མ་འཁྲུལ་བ་ཀུན་གྱི་མཐུན་སྣང་དུ་གྲུབ་པས་གསལ། གཞན་ཡང་ངའི་གྲུབ་མཐའ་དུ་མ་དང་འགལ་བཞིན་དུ་དེར་ཤེ་མོང་གིས་འདུག་པ་ཡིན་ན། ངའི་རྒྱུད་འགྲེལ་པ་དང་བཅས་པའི་ལུང་དང༌། ས་རིས་ཀྱི་ལམ་ནས་སྟོན་པའི་རྒྱུ་མཚན་རྩིས་དང་དངོས་པོ་སྟོབས་ཞུགས་ཀྱི་རིགས་པ་དང༌། མིག་ཤེས་མ་འཁྲུལ་བའི་མངོན་སུམ་རྣམས་འཛོམས་པའི་ཁྲིམས་ར་བཅས་ནས་རྩ་ར་བྱས་དུས་མི་སྐྲག་པ་ཨེ་ཡིན། ཐོག་མཐའ་མེད་པའི་ལོ། མཉམ་པ་ཉིད་ཀྱི་ཟླ་བ། དུས་གསུམ་དུས་མེད་དུ་རྟོགས་པའི་ཚེས་གཅིག་ལ་མཐའ་དབུས་མེད་པའི་ཁྲིམས་ར་ཆེན་པོ་ནས་སརྦ་མངྒ་ལཾ། ཞེས་གསུངས་སོ། །དེ་ལྟར་གསུངས་པ་བཞིན་དུ་ལུང་དང་རིགས་པ་དང་ས་རིས་ཀྱི་རྒྱུ་མཚན་རྩིས་དང་མིག་ཤེས་མ་འཁྲུལ་བ་ཀུན་གྱི་མངོན་སུམ་དུ་དབང་པོས་མཐོང་བ་ལ་སོགས་རྣམ་གྲངས་དུ་མས་གནོད་ཅིང༌། ཁྱད་པར་ལུགས་སྔ་མ་ཁྱིམ་ཡང་གཡོན་འཁོར་འདོད་པའི་ཕྱོགས་ནི་གཟའ་སྐར་གྱི་འཆར་ཞུད་ཙམ་ཡང་མིག་གིས་མ་མཐོང་བའི་སྨྱོན་གཏམ་སྟེ་མཁས་པས་དགག་པའི་ཡུལ་མ་ཡིན་ནོ། །དེ་ལྟར་དུས་བཞི་གཡོན་སྐོར་དུ་མ་བྱས་ན་དུས་སྦྱོར་ཉིན་དྲུག་མཚན་དྲུག་འཆར་བ་དང་འགལ་ལོ་ཞེ་ན། མི་འགལ་ཏེ། དུས་སྦྱོར་ཉིན་དྲུག་མཚན་དྲུག་འཆར་བ་དུས་བཞི་གཡས་སྐོར་ལའང་འགྲིག་པ་ཡིན་ཏེ། སྔ་དྲོ་ཕྱེད་གསུམ་ཙམ་དང་ཕྱི་དྲོ་ཕྱེད་བཞི་ཙམ་རེ་འཆར་བ་སོགས་སྨྲས་པ་ལ་སྐྱོན་ཅི་ཡང་མེད་པའི་ཕྱིར་རོ། །གལ་ཏེ་སྔ་གསུམ་ཕྱི་གསུམ་ཁོ་ནར་ངེས་ན། གཡོན་སྐོར་ལའང་བགྲོད་མཐའ་གཉིས་དང་མཉམ་པ་གཉིས་ལ་འགྲིག་ཀྱང་གཞན་མི་འགྲིག་པ་མངོན་སུམ་གྱིས་སྟོན་པས་སོ། །དེ་ཕྱིར་བློ་ཁ་ཕྱོགས་ན་གཡོན་སྐོར་བའི་ཞེ་འདོད་འདི་ལ་གནོད་བྱེད་རྟོགས་སླའོ། །དེས་ན་ལུགས་ཐ་མ་དུས་ཁྱིམ་གཉིས་ཀ་གཡས་སྐོར་དུ་འདོད་པ་རྒྱུད་འགྲེལ་གྱི་དགོངས་པ་སྟེ། དེའི་ཕྱིར་མཁས་པ་རྣམས་ཀྱིས་བླང་བྱའི་གནས་ཡིན་ནོ། །འདི་ལ་བཞི། ངོ་བོ། ཚད། ལྡོག་རྐྱེན། རགས་པའི་འཆར་ནུབ་བཤད་པའོ། །དང་པོ་ལ་གསུམ་སྟེ། ས་དུམ་བུ་བཅུ་གཉིས་པོ་སྤྱིའི་སྟེང་གི་གོ་ལ་འཁོར་ཚུལ་བཤད་པ། སྟེང་འོག་གི་འཁོར་ལོ་སྤྱིའི་ཁ་དོག་བཤད་པའོ། །དང་པོ་ནི། དེས་ན་ཚུལ་དེ་འདིར་གསལ་བྱ། ཇི་ལྟར་རིགས་པའི་གཞི་ངོས་ལ། ཞེས་པ་ནས། ཐིག་སྐུད་སྔར་འདྲ་བཟུང་ནས་བསྐོར། ཞེས་པའི་བར་གོ་ལའི་ཤོག་ཁྲ་རི་མོ་འགོད་པའི་ལས་ཏེ་གོ་སླའོ། །འདིར་ཐིག་སྦྱོར་བའི་གཞི་ཤོག་བུ་ལ་སོགས་པའམ། ཕྱིས་རྒྱུན་བརྟན་པར་འདོད་ན་རྩིག་པའི་ངོས་ལ་ཚོན་རྩིས་སོ་སོར་ཕྱེ་ནས་བྲིས་ན་བློ་དམན་པ་དག་གིས་ཀྱང་རྣམ་པ་བདེ་བླག་ཏུ་རྟོགས་པར་འགྱུར་རོ། །དེ་ཡང་གནས་ཚོད་དུ་ཉི་མའི་རྒྱུ་ལམ་གྱི་ཟླུམ་བསྐོར་འདི་ལྟར་གནས་པའི་བཤད་ཁུངས་གསལ་བར་མེད་ཀྱང༌། གོ་སླའི་ཕྱིར་མཁས་པ་རྣམས་ཀྱིས་འདི་ལྟར་དུམ་བུ་རང་རང་གི་བསིལ་རིའི་དབུས་ནས་མཚན་མ་བཟུང་སྟེ་དུམ་བུ་བདུན་པའི་ཕྱེད་མཚམས་སུ་བསྐོར་བའི་ཟླུམ་བསྐོར་གྱིས་དུམ་བུ་དེའི་ལྷོ་བགྲོད་དང་བདུན་པའི་བྱང་བགྲོད། གཞན་གྱི་སྟོན་དཔྱིད་ཀྱི་ཉི་མའི་རྒྱུ་ལམ་འཆར་ལ་དེ་བཞིན་དུ་བསྣོལ་ཏེ་བཏབ་པས་ཁྱིམ་ཟླ་བཅུ་གཉིས་ཀྱི་རྒྱུ་ལམ་ཟླུམ་བསྐོར་བཅུ་གཉིས་འབྱུང་ལ། ཞིབ་པར་ན་དུམ་བུ་རེ་ལ་དུམ་བུ་ཆུང་ངུ་སུམ་ཅུ་རེ་རེར་ཕྱེ་སྟེ་དུམ་ཕྲན་སོ་སོའི་དབུས་ནས་སྔར་བཞིན་བཏབ་པས་ཁྱིམ་ཞག་སུམ་བརྒྱ་དྲུག་ཅུ་སོ་སོའི་རྒྱུ་ལམ་གསལ་བར་བྱེད་དོ། །དེ་ལྟར་གོ་ལའི་ཟླུམ་བསྐོར་གྱི་སྐབས་འདིར་རྒྱུད་འགྲེལ་ལས་རགས་ཞིབ་ཀྱི་དབང་གིས་ཚུལ་གཉིས་གསུངས་ཏེ། དེ་ཡང་ཁམས་ལེའི་འགྲེལ་ཆེན་ལས། འདིར་ལྷོ་མེའི་དཀྱིལ་འཁོར་ནས་བྱང་ཁ་བ་ཅན་ཆེན་པོའི་མཚམས་སུ་གོ་ལའི་དཔག་ཚད་སྟོང་ཕྲག་བདུན་ཅུ་རྩ་ལྔའོ། །དེ་བཞིན་དུ་ཤར་དང་ནུབ་འཁོར་བ་ནས་ཏེ། ཞེས་དང༌། ལན་ཚྭའི་རྒྱ་མཚོ་འགོངས་ནས་ཉིན་མོར་བྱེད་པ་དག་ནི་ལྷོ་རུ་མེའི་བར་དུ་འགྲོ་བར་བྱེད། ཅེས་སོགས་རྩ་འགྲེལ་གྱི་ཉི་མའི་དཀྱིལ་འཁོར་བྱང་ལྷུན་པོའི་རྭ་ནས་ལྷོ་རྟ་གདོང་ལ་རེག་པའི་བར་དུ་འགྲོ་བར་གསུངས་པ་བཞིན་དུ་ཇོ་ནང་པ་ཆེན་པོ་བཞེད་དོ། །དེ་ལྟ་ནའང༌། བྱང་བགྲོད་ཀྱི་ཚེ་ཐུར་ཤིང་གི་གྲིབ་མ་བྱང་དུ་ཅུང་ཟད་ལུས་ཤིང༌། ལྷོ་བགྲོད་མཐར་ཐུག་གི་ཚེ་ནའང་ཉི་མའི་དཀྱིལ་འཁོར་གྱི་འགྲོ་ལམ་གྱི་ཕྱི་རོལ་དུ་སྐར་མ་མང་པོ་མཐོང་བ་མངོན་སུམ་གྱིས་གྲུབ་པའི་ཕྱིར། ཤོང་བུ། འགོས་ལོ་ཆེན་པོ། ཞལ་ལུང་མཁན་པོ་སོགས་མཁས་པ་ཕལ་ཆེར་འདིར་བཤད་པ་ལྟར་ཉི་མའི་འགྲོ་ལམ་དངོས་གཞི་སའི་དཀྱིལ་འཁོར་གྱི་དཔག་ཚད་སྟོང་ཕྲག་ཕྱེད་དང་བཅུ་གསུམ་ཕན་ཆད་དང༌། ཆུའི་དཀྱིལ་འཁོར་གྱི་བཞི་གསུམ་ཚུན་ཆད་ཀྱི་དཔག་ཚད་སྟོང་ཕྲག་ལྔ་བཅུ་ཡོད་པར་བཞེད་པ་འདི་ལེགས་པ་ཡིན་ཏེ། རིག་པ་དེར་མ་ཟད་ལུང་སྔ་ཕྱིའི་བཞུགས་ཚུལ་ལའང་ཕྱི་མ་འབྱོར་བའི་ཕྱིར་རོ། །ཇི་ལྟར་ན་ཁམས་ལེའི། འདིར་ལྷོ་མེའི་དཀྱིལ་འཁོར་ནས་ཞེས་སོགས་དྲངས་མ་ཐག་པ་དེའི་ལུང་གི་འཕྲོས་ལས། གསལ་བར་ལེའུ་ལྔ་པ་ལས་བརྗོད་པར་བྱའོ། །ཞེས་གསུངས་པས་ཁམས་ལེར་བཤད་པ་འདི་སྤྱིར་བཏང་རགས་པའི་དབང་དུ་མཛད་ནས། དམིགས་བསལ་གྱི་འགྲོ་ལམ་ཇི་ལྟ་བ་ནི་ལེའུ་ལྔ་པར་གསལ་བར་བཤད་པ་ལས་ཤེས་དགོས་སོ་ཞེས་ཡེ་ལེར་ཁ་འཕང་བར་མཛད་ལ། ཡེ་ལེར་དེ་ལྟར་འཆད་པའི་རྒྱུད་ཚིག་ཤོང་དཔང་རྣམ་གཉིས་འགྱུར་སོགས་སུ་མི་འབྱུང་ཡང༌། འགྱུར་རྙིང་གྱི་ཇོ་ནང་རྨ་འགྱུར་ལས། ཚིགས་བཅད་བརྒྱ་གྱ་དགུའི་རྗེས་སུ། ཉིན་མོར་བྱེད་པའི་བགྲོད་པ་ལྷོ་དང་བྱང་གི་མཐར་ནི་རྐང་པ་གསུམ་བཅས་བ་ཚྭའི་ཆུ་གཏེར་དང༌། ཀཻ་ལ་ཤ་ཡི་ཇི་སྙེད་དུ་འགྲོ་སྟེ་ཕྱོགས་ཀྱི་བགྲོད་པ་དག་ལ་དཔག་ཚད་སྟོང་ཕྲག་ནི། ལྔ་བཅུའོ་གང་དུ་གོ་ལ་ཕྱེད་ཀྱི་རེ་ཁར་ཉིན་མོ་དང་ནི་མཚན་མོ་ཆུ་ཚོད་མཁའ་མེ་སྤྱོད། གང་ཞིག་ཁྲི་ཕྲག་ལྔ་ལ་མིག་དང་ཀླུ་དང་ཟླ་བའི་ཆ་ཡིས་ཐོབ་པ་ཉིན་དང་ཉིན་ལ་བགྲོད། ཅེས་པའི་ཚིགས་བཅད་འདི་ཡོད་པའི་དོན་ནོ། དེས་ན་སྔ་མ་རི་རབ་དང་རྟ་གདོང་ལ་དཀྱིལ་འཁོར་ཐུག་པར་བཤད་པ་འདི་ནི་སྤྱིར་བཏང་རགས་པ་ཡིན་ཏེ་སྐར་ཁྱིམ་འཁོར་དང་བཅས་པའི་དབང་དུ་བྱས་ནས་གསུངས་པས་སོ། །ལུགས་ཕྱི་མ་ཉི་མའི་གདུང་བྱེད་ཅེས་པ་འོད་ཟེར་ཤིན་ཏུ་ཚ་བ་ཞིག་ལ་དཔག་ཚད་སྟོང་ཕྲག་ཕྱེད་དང་བཅུ་གསུམ་ཡོད་པས་དེ་རེག་པ་ཡིན་གྱི་དཀྱིལ་འཁོར་མི་རེག་པར་བཤད་པ་འདི་ནི་དམིགས་བསལ་ཞིབ་མོ་ཡིན་ཏེ། ལུང་སྔ་ཕྱིའི་འཆད་ཚུལ་དང་རིགས་པ་དེ་དག་གི་ཕྱིར་རོ། །ཐིག་གི་སྐབས་འདིར་མཁས་མཆོག་ལ་ལ་དག་བྱམས། ལྟེ་བ་རྣམས་ནས་སོར་ཚེས་ཀྱིས། བསྐོར་བ་བཅུ་གཉིས་ཁྱིམ་ཡིན་ནོ། །ལྷུན་པོའི་དབུས་ནས་ཚེས་ཀྱིས་བསྐོར། ཉིན་མཚན་མཉམ་པའི་རི་མོར་འགྱུར། ཞེས་རི་རབ་ཀྱི་རྭ་ནས་བ་ཚྭའི་ཕྱི་མཐའ་ཚུན་ཆད་ཀྱི་ཁྱོན་ཕྱེད་དུ་བཅད་པའི་ཟླུམ་བསྐོར་དེ་ཉིན་མཚན་མཉམ་པའི་རི་མོར་འདོད་པ་ནི་མི་རིགས་ཏེ། ཉི་མ་འདིའི་སྟེང་དུ་འགྲོ་བ་ཕྱིར་བསྐྱེད་སོགས་ལ་རུང་གི། གྲུ་ཆགས་མ་འདི་ལ་འབྱུང་མི་སྲིད་པའི་ཕྱིར་རོ། །ཡང་ཇོ་ནང་པའི་བཞེད་པ་ལྟར། ཉི་མའི་དཀྱིལ་འཁོར་ཉིད་མེ་དང་རྭ་ལ་རེག་པའི་འགྲོ་ལམ་གྱི་ཟླུམ་འཁོར་བསྐོར་ན། གླིང་རྣམས་ཀུན་གྱི་དབུས་དྲང་ནས། གོ་ལ་བསྐོར་བའི་བྱ་རྗེས་བྱ། དེ་སྟེང་ཐིག་སྐུད་བཟུང་བྱས་ནས། དུམ་བུ་བདུན་པའི་ནང་མཐའ་དང༌། རྒྱ་མཚོའི་ཕྱི་མཐའི་བར་བསྐོར་བས། རང་གི་ལྷོ་བགྲོད་གཞན་ཕྱོགས་བྱང༌། ཕན་ཚུན་གཉིས་ཀྱི་མཉམ་གཉིས་སྟོན། ཞེས་བསྒྱུར་ཆོག་གོ། །ད་ནི་དཀྱུས་ལ་འཇུག་པར་བྱ་སྟེ། དེ་ལས་དུས་སྦྱོར་བཅུ་གཉིས་པོ་ཞེས་སོགས་ཏེ་སྐར་ཁྱིམ་འཁོར་དང་བཅས་པ་རྟག་ཏུ་གཡས་སུ་འཁོར་བ་ལ་མགྱོགས་བུལ་མེད་ཅིང་རྒྱུ་ལམ་ཡང་གཅིག་ཁོ་ན་ལ་འགྲོ་བས་ཁྱིམ་བཅུ་གཉིས་འཁོར་ཚུལ་ལ་མཐོ་དམའ་མེད་པར་འདོད་དོ། །དེ་ལྟ་ནའང་ལུག་ཁྱིམ་ཤར་དུ་ཞེས་སོགས་ཀྱིས་ཁྱིམ་ན་གནས་པའི་རྒྱུ་སྐར་རྣམས་ལ་མཐོ་དམའ་ཡོད་པར་སྟོན་པ་སྟེ། ལུག་ཁྱིམ་ན་གནས་པའི་རྒྱུ་སྐར་རྣམས་ཤར་གླིང་དབུས་མའི་ཚངས་ཐིག་གི་ཐད་དུ་བསིལ་རི་ལ་ཉེ་བར་འཁོར་བས་མཐོ་བ་དང༌།ནུབ་གླིང་དབུས་མའི་ཚངས་ཐིག་གི་ཐད་དུ་མེར་ཉེ་བར་འཁོར་བས་དམའ་བ་ཉིད་དུ་གནས་ལ་ལྷོ་བྱང་གི་དབུས་སུ་ནི་མཉམ་པར་རྒྱུ་བ་སོགས་ཐམས་ཅད་ལ་སྦྱར་རོ། །གཉིས་པ་ལ་གཉིས་ཏེ། འཛམ་གླིང་ཆུང་ངུ་འདིའི་སྟེང་གི་ཁྱིམ་བཅུ་གཉིས་པོའི་འགྲོ་ལམ་རྟོགས་པའི་ཐབས་ཀྱི་གོ་ལ་བཤད་པ་དང༌། དེ་ལ་བརྟེན་ནས་དུམ་བུ་ལྷག་མ་བཅུ་གཅིག་པོའི་སྟེང་ཐད་ཀྱི་ཁྱིམ་བཅུ་གཉིས་པོ་ཚང་བའི་གོ་ལའི་འཁོར་ཚུལ་གོ་ནུས་པར་བསྟན་པའོ། །དང་པོ་ནི། སྤྱིར་བཤད་པ་དེ་ལས་ད་ནི་ཁྱད་པར་དུ། རྒྱུད་ལས། ཐ་སྐར་ལ་སོགས་པ་ནག་པའི་ཕྱེད་དུ་ཉིན་དང་མཚན་མོ་མཉམ་པའི་དབུས་སུ་གོ་ལའི་རི་མོའོ། །རྒྱུ་སྐར་གཡས་དང་གཡས་མིན་དག་ལ་ངེས་པར་སྲིད་པའི་གནས་སུ་ཁྱིམ་གྱིས་དབྱེ་བས་ཡང་དག་གནས། གཞུ་ཡི་རྣམ་པའི་དུས་ཁྱིམ་དག་ལ་གོ་ལའི་དབུས་ནས་ལྷོར་ནི་མེ་ཡི་དཀྱིལ་འཁོར་ལ་གནས་ཤིང༌། བྱང་དུ་དེ་ནི་བསིལ་བའི་རི་སྟེ་པད་འདབ་བཟང་པོ་བཞིན་དུ་ཤར་དུ་ལུག་དང་སྲང་ལ་སོགས། ཞེས་པ་རྩ་འགྲེལ་གྱི་དོན་ཤོག་ཁྲའི་རི་མོ་རྣམས་ལ་བརྟེན་ནས་ལྷོ་གླིང་འདིའི་སྟེང་ཐད་ཀྱི་ཁྱིམ་བཅུ་གཉིས་ཀྱི་འགྲོ་ལམ་རྣམས་བདེ་བླག་ཏུ་རྟོགས་པར་བྱེད་པའི་མན་ངག་གི་གོ་ལ་འདྲི་ཚུལ་ནི། ཚངས་ཐིག་སོགས་ཚིགས་བཅད་གཅིག་གིས་ཟླུམ་པོར་བསྐོར་ལ། དེ་ཡི་ཤར་ནུབ་སོགས་ཀྱིས་མཉམ་ལམ་གྱི་རེ་ཁས་བཅད། ཟླུམ་པོ་དེ་ཡི་ཞེས་སོགས་ཀྱིས་རྒྱུ་སྐར་འགོད་པ་སྟེ། འགྲེལ་ཆེན་ལས། འདིར་ཤར་གྱི་ཕྱེད་དུ་ལུག་གོ། དབང་ལྡན་དུ་གླང་ངོ༌། བྱང་གི་ཕྱེད་དུ་འཁྲིག་པའོ། །སླར་ཡང་བྱང་གི་ཕྱེད་དུ་ཀརྐ་ཊའོ། །རླུང་དུ་སེང་གེའོ། །ནུབ་ཀྱི་ཕྱེད་དུ་བུ་མོའོ། །སླར་ཡང་ནུབ་ཀྱི་ཕྱེད་དུ་སྲང་ངོ༌། །བདེན་བྲལ་དུ་སྡིག་པའོ། །ལྷོའི་ཕྱེད་དུ་གཞུའོ། །སླར་ཡང་ལྷོའི་ཕྱེད་དུ་ཆུ་སྲིན་ནོ། །མེ་རུ་བུམ་པའོ། ཤར་གྱི་ཕྱེད་ཉའོ། ཞེས་པ་ནི་གོ་ལར་ཁྱིམ་འགོད་པའོ། །ཞེས་གསུངས་པའི་དོན་ནོ། །དེ་ལྟ་བས་ན་ཉི་མ་ཁྱིམ་གང་དང་གང་དུ་སླེབ་མ་ཐག་པའི་ཉིན་མོ་དེའི་ཚེ། ལྷོ་གླིང་དབུས་མ་འདིའི་ཚངས་པའི་ཐིག་ཐད་ཀྱི་ཉི་མའི་དཀྱིལ་འཁོར་གྱི་འགྲོ་ལམ་ཡང་ཁྱིམ་དེ་དང་དེའི་ཐོག་མའི་སྐར་མའི་འགྲོ་ལམ་ཉིད་ཡིན་ཏེ། དཔེར་ན་ལུག་ཁྱིམ་དུ་ཉེ་བར་སླེབ་མ་ཐག་པའི་ཉིན་ལྷོ་གླིང་འདིའི་ཚངས་ཐིག་གི་སྟེང་ཐད་དུ་ཉི་མ་ལུག་ཁྱིམ་དང་བཅས་པ་ཉིན་མཚན་མཉམ་པའི་ལམ་དུ་འགྲོ་བ་བཞིན་ནོ། །དེ་ལྟར་ངེས་པར་བྱས་ནས་ལྷོ་བྱང་གི་ཁྱིམ་དྲུག་དྲུག་གི་མཚམས་སུ་མཉམ་ལམ་གྱི་རེ་ཁས་བཅད་པའི་ལྷོའི་ཁྱིམ་དྲུག་པོ་འོད་མའི་གཞུའི་དབྱིབས་ཅན་རྟ་གདོང་གི་མེ་རིའི་ཕྱོགས་སུ་གནས་པ་དང་དེ་བཞིན་དུ་བྱང་གི་ཁྱིམ་དྲུག་པོ་པདྨའི་འདབ་མ་ཕྱེད་པའི་དབྱིབས་ཅན་བྱང་བསིལ་རིའི་ཕྱོགས་སུ་གནས་པ་སྟེ། འདི་ལས་གཞན་དུ་མཁས་པ་ཕལ་ཆེར་གོ་ལའི་ཉིན་མཚན་མཉམ་པའི་རི་མོའི་དབུས་ནས་ཞེས་སོགས་ཤར་ནུབ་ཀྱི་གླིང་གི་བར་གྱི་ལྷུན་པོའི་སྟེང་གི་ནམ་མཁའ་ལ་ཡིད་ཀྱིས་བྲིས་པའི་རི་མོའི་བྱང་ཕྱོགས་ཀྱི་ཁྱིམ་དྲུག ལྷུན་པོའི་བྱང་དང་ལྷོ་ཕྱོགས་ཀྱི་ཁྱིམ་དྲུག་ལྷུན་པོའི་ལྷོར་ཡོད་པར་འདོད་པ་ནི་བྱང་དུ་དེ་ནི་བསིལ་བའི་རི་སྟེ་ཞེས་པ་དང་འགལ་ཏེ། ཁྱོད་ཀྱི་ལུགས་ལ་བྱང་དུའང་མེའི་ཕྱོགས་སུ་གནས་པའི་ཕྱིར། ཡང་ཁ་ཅིག་གཞུའི་རྣམ་པ་ཤར་ནུབ་དང༌། པད་འདབ་བཟང་པོ་ལྷོ་བྱང་དུ་འདོད་པ་ཡང་མི་རིགས་ཏེ། གཞུ་ཡི་རྣམ་པའི་སོགས་དང་འགལ་ལོ། །ཡང་ལ་ལ་དག་སྔ་དྲོ་བྱང་དུ་པད་འདབ་དང༌། ཕྱི་དྲོ་ལྷོར་གཞུ་དབྱིབས་སུ་འདོད་པ་ཡང་མི་འཐད་དེ། རྒྱུད་འགྲེལ་གྱི་ལུང་དེ་ཐོག་མཐའ་ལ་དགོངས་པར་རང་གི་འདོད་པས་སྦྱར་བ་ཙམ་དུ་ཟད་པའི་ཕྱིར་རོ། །དེ་ལྟར་སྨྲ་བའི་འདོད་པ་དེ་ཐམས་ཅད་ལ་ཐུན་མོང་དུ་གནོད་བྱེད་ནི། ཉིན་མཚན་མཉམ་པའི་རི་མོའི་དབུས་ནས་རྒྱུ་སྐར་གྱི་འཁོར་ལོ་ཕྱེད་ཀྱིས་རྒྱུ་སྐར་གྱི་འཁོར་ལོ་ལྷོར་གནས་སོ་ཞེས་པའི་འཁོར་ཕྱེད་ཀྱི་རི་མོ་དེ་ལྷུན་པོའི་སྟེང་གི་ནམ་མཁའ་ལ་ཡིད་ཀྱིས་བྲིས་ན་ཉིན་མཚན་མཉམ་པའི་རི་མོ་དང་ནམ་དུའང་བསྒྲིག་ཏུ་མེད་པས་སོ། །དེའི་ཕྱིར་བཞེད་པ་དེ་དག་འཁྲུལ་པ་ཡིན་པས་རྒྱང་རིང་བོར་དོར་བར་བྱའོ། །འོ་ན་ལྷོ་བྱང་གི་ཁྱིམ་དྲུག་དྲུག་དབྱིབས་ཟླུམ་པོ་ཕྱེད་པའི་རྣམ་པར་འདྲ་བ་ལ་ཡང་ཕྱེད་ལ་པད་འདབ་དང་ལྷོ་ཕྱེད་ལ་གཞུའི་དབྱིབས་སུ་གསུངས་པ་གང་ཞེ་ན། དེ་ནི་རྒྱུད་ཀྱི་སྡེབ་སྦྱོར་གྱི་དབང་གིས་ཡིན་ཞེས་སྔ་མ་རྣམས་གསུངས་སོ། །གཉིས་པ་ནི། འཛམ་གླིང་ཆུང་ངུ་འདི་ལས་དུམ་བུ་ལྷག་མ་གཞན་བཅུ་གཅིག་པོའི་རང་རང་གི་སྟེང་ཐད་ཀྱི་ཁྱིམ་བཅུ་གཉིས་ཀྱི་འགྲོ་ལམ་རྟོགས་པའི་ཐབས་ཀྱི་གོ་ལ་དེ་ཇི་ལྟར་ཞེ་ན། དེ་ནི་ལྷོ་གླིང་དབུས་མའི་གོ་ལ་བཤད་པ་འདི་ལ་བརྟེན་ནས་གོ་ནུས་པས་བློ་ལྡན་རྣམས་ཀྱིས་ཞིབ་མོར་དཔྱོད་ཅིག་ཅེས་གདམས་སོ། །དེ་ཡང་དུམ་བུ་བཅུ་གཅིག་པོ་སོ་སོའི་སྟེང་གི་ཟླུམ་སྐོར་ལ་ལྷོ་བྱང་གི་ཁྱིམ་བཅུ་གཉིས་ཚང་བར་བཀོད་ཚུལ་ལྷོ་གླིང་དབུས་མ་ལྟར་སྦྱར་ནས་བཤད་ན་དགེ་མོད་ཀྱི། དེ་ལྟ་ནའང་ཡི་གེ་མང་བར་འགྱུར་གྱི་དོགས་ནས་འདིར་མ་བྲིས་ལ། སླར་ཞིག་ལྷན་ཐབས་ཀྱི་ཤོག་ཁྲའི་རི་མོ་ཟུར་དུ་འདྲི་བར་འདོད་པས་སྤྲོ་ན་དེར་བལྟ་བར་བྱའོ། །གསུམ་པ་སྟེང་འོག་གི་འཁོར་ལོ་སྤྱིའི་ཁ་དོག་བཤད་པ་ནི། ཁ་དོག་རི་རབ་ཀྱི་དབུས་མ་རྒད་ལྗང་གུ། ཤར་ཨིནྡྲནཱི་ལ་སྔོ་ནག ལྷོ་པདྨ་རཱ་ག་དམར་པོ། བྱང་ཟླ་བ་ཆུ་ཤེལ་དཀར་པོ། ནུབ་ཀེ་ཏ་ཀ་སེར་པོ་སྟེ། ཡེ་ཤེས་ལེའུ་ལས། མཐའ་དག་རི་ཡི་བདག་པོའི་ཤར་ནི་དག་པའི་ཨིནྡྲནཱི་ལ་ལྷོ་ནི་པདྨ་རཱ་ག་སྟེ། ནུབ་ནི་ཀེ་ཏ་ཀ་ནི་སེར་པོ་བྱང་ནི་རི་བོང་འཛིན་པ་ལྟར་དཀར་ཟླ་བ་ཆུ་ཤེལ་ལོ། །དབུས་ནི་ལྗང་གུ་ཞེས་གསུངས་པས་སོ། །ནང་གླིང་དྲུག་ལ་སོགས་པ་གཞིའི་བཀོད་པ་གཞན་རྣམས་ནི་ཇི་ལྟར་འོས་པ་དང་ལྡན་པའི་ཚོན་རྩིས་མཛེས་པར་བྱའོ། །ཁྱིམ་དྲུག་མཚན་གཉིས་ནི་ལུག་དང་བུ་མོ་དཀར་ཞེས་སོགས་སོ། །ས་ཆུ་མེ་རླུང་ནམ་མཁའ་ནི་རིམ་བཞིན་སེར་དཀར་དམར་ནག་ལྗང་གུའོ། །གཉིས་པ་ཚད་ལ་གསུམ་སྟེ། རྒྱའི་ཚད། དཔངས་ཀྱི་ཚད། མགྱོགས་བུལ་གྱི་ཚད་དོ། །དང་པོ་ནི། གོ་ལའི་ལྷོ་བྱང་གི་རྒྱ་ལ་ཇི་ཙམ་ཡོད་སྙམ་ན། འདི་ལྟར་ལྷོ་རྟ་གདོང་གི་མེ་ནས་བྱང་བསིལ་བའི་རིའི་བར་གྱི་འགྱངས་ཚད་ལ་དཔག་ཚད་བདུན་ཁྲི་ལྔ་སྟོང་ཡོད་དེ། རྒྱུད་ལས། མེ་ནས་བསིལ་བའི་རི་བོའི་མཚམས་སུ་དཔག་ཚད་སྟོང་ཕྲག་མཁའ་དང་ནམ་མཁའ་མཁའ་དང་མདའ་རིའོ། །ཞེས་གསུངས་པས་སོ། །བདུན་ཁྲི་ལྔ་སྟོང་གི་ཚད་དེ་ལས་ལྷོ་མའི་ཕྱོགས་དང་བྱང་བསིལ་རིའི་ཕྱོགས་གཉིས་ཀ་ནས་དཔག་ཚད་སྟོང་ཕྲག་ཕྱེད་དང་བཅུ་གསུམ་རེ་གདུང་བྱེད་ཀྱི་ས་ཡིན་པས་དོར་བའི་དབུས་སུ་དཔག་ཚད་ལྔ་ཁྲི་ནི་ཉི་མའི་དཀྱིལ་འཁོར་འགྲོ་བའི་ལམ་མོ། །ཟླུམ་པོའི་མཐའ་ནི་གསུམ་འགྱུར་ཡིན་པས་ཉི་མའི་རྒྱུ་ལམ་ཟླུམ་སྐོར་གྱི་ཚད་ལ་དྲང་ཐད་དུ་དཔག་ཚད་ཆིག་འབུམ་ཉི་ཁྲི་ལྔ་སྟོང་ཡོད་པ་དེ་སུམ་འགྱུར་དུ་བྱས་པས་མཐའ་སྐོར་ལ་སུམ་འབུམ་བདུན་ཁྲི་ལྔ་སྟོང་ཡོད་དོ། །གཉིས་པ་དཔངས་ཚད་ནི། མཐོ་ཚད་རང་གླིང་གི་ཉི་མ་ཕྱེད་ཀྱི་བྱང་བགྲོད་མཐར་ཐུག་པའི་ནམ་མཁའ་ལ་འགྲོ་བའི་ཚེ་ལས་སའི་དཀྱིལ་འཁོར་ནས་དཔག་ཚད་བརྒྱད་ཁྲི་དྲུག་སྟོང་འཕགས་པ་ན་འཁོར་ཏེ། ལྷུན་པོའི་རྭ་རྩེ་ལ་རེག་པའོ། །དེ་ནས་དཔག་ཚད་སྟོང་ཕྲག་བཅུ་གཅིག་གིས་དམའ་བའི་ཚད་ལྷོ་བགྲོད་མཐར་ཐུག་གི་ནམ་མཁའ་ལ་སའི་དཀྱིལ་འཁོར་ལས་དཔག་ཚད་བདུན་ཁྲི་ལྔ་སྟོང་འཕགས་པའི་ཐད་དུ་འཁོར་བ་ཡིན་ཏེ་རྟ་གདོང་གི་མེ་ལ་རེག་གོ། །ལྷོ་བྱང་གི་བགྲོད་མཐའ་གཉིས་པོ་དེ་ལས་དཔག་ཚད་ལྔ་སྟོང་ལྔ་བརྒྱ་སྟེང་འོག་ཏུ་གཞལ་བའི་དབུས་ཉིན་མཚན་མཉམ་པའི་དུས་ཀྱི་རི་མོའི་ལམ་དུ་འགྲོ་བའི་ཚེ་སའི་དཀྱིལ་འཁོར་ལས་དཔག་ཚད་བརྒྱད་ཁྲི་ལྔ་བརྒྱ་འཕགས་པའི་ནམ་མཁའ་ལ་འཁོར་བའོ། །འདིར་རྒྱུད་ལས། སྟེང་དུ་དྲུག་དང་ཀླུ་ཡི་གྲངས་ནི་ཉི་མའི་གདུང་བྱེད་དག་ཀྱང་ཞེས་པས་ཉི་མའི་གདུང་བྱེད་སྟེང་འོག་ཏུ་འགྲོ་བའི་ཚད་གསུངས་པ་ཡིན་གྱི། དཀྱིལ་འཁོར་དངོས་ནི་མ་ཡིན་ནོ། །འོ་ན་དབྱར་དགུན་གྱི་ཉི་མ་ལ་མཐོ་དམན་གྱི་ཁྱད་དེ་ཙམ་ཡོད་ན། དབྱར་བསིལ་བ་དང་དགུན་དྲོ་དགོས་པ་ལས་དེ་ལྟར་མི་འབྱུང་བའི་ཕྱིར་མངོན་སུམ་དང་འགལ་ལོ་ཞེ་ན། སྐྱོན་མེད་དེ། དབྱར་མཐོ་ཡང་གླིང་ཕྱེད་ཕྱི་མ་ཚུན་ཉི་མའི་དཀྱིལ་འཁོར་འོང་བས་གཡས་གཡོན་གྱི་གདུང་བྱེད་སྟོང་ཕྲག་ཉེར་ལྔས་གླིང་སྟོང་ཕྲག་ཉེར་ལྔའི་སྟེང་ནས་ཁེབས་པས་དྲོ་བ་ཡིན་ལ། དགུན་ཇི་ཙམ་དམའ་བར་གྱུར་ཀྱང་གདུང་བྱེད་རྒྱ་མཚོའི་ཕྱི་མཐའི་བར་འགྲོ་བས་ལྷོ་བགྲོད་མཐར་ཐུག་གི་ཚེ་གདུང་བྱེད་ཀྱི་ནང་མཐའ་དང་གླིང་གི་ཕྱི་མཐའི་བར་དུ་དཔག་ཚད་སུམ་ཁྲི་བདུན་སྟོང་ལྔ་བརྒྱ་ཙམ་གྱི་འགྱངས་ཞུགས་པའི་ཕྱིར་གྲང་བ་ཡིན་ནོ། །ཉིན་ཞག་རེ་རེ་བཞིན་སྟེང་འོག་དང་ལྷོ་བྱང་དུ་ཇི་ཙམ་འགྲོ་ཞེ་ན། ཕྱེད་བཅས་བརྒྱ་གྱ་གཉིས་ནི་ལྷོ་བྱང་གི་བགྲོད་པ་རེ་རེའི་ཞག་ཡིན་པས། ཞག་དེ་རེ་རེ་བཞིན་ལ་སའི་དཀྱིལ་འཁོར་ལས་འཕགས་པའི་སྟེང་འོག་དང་གླིང་ཕྱེད་ཕྱི་མ་ནས་རྒྱ་མཚོའི་བཞི་གསུམ་ཚུན་ཆད་ལྷོ་བྱང་དུ་འགྲོ་བ་ཡིན་ནོ། །དེ་ལྟར་ན་ཕྱེད་པོ་གཞུག་པའི་ཕྱིར་བརྒྱ་གྱ་གཉིས་ཕྱེད་པའི་ཕུང་པོར་བྱས་པས་སུམ་བརྒྱ་རེ་ལྔ་འབྱུང་བ་བགོད་བྱེད་དོ། །དེས་སྟོབས་མཚུངས་ཀྱི་རིགས་པས་མཐོ་དམན་སྟོང་ཕྲག་བཅུ་གཅིག་པོ་གཉིས་ཀྱིས་བསྒྱུར་བས་ཉི་ཁྲི་ཉིས་སྟོང་འབྱུང་བ་ལ་བགོས་པས་ཐོབ་པའི་ནོར་དཔག་ཚད་དྲུག་ཅུ་རྒྱང་གྲགས་གཅིག གཞུ་འདོམ་བརྒྱ་གོ་གཅིག ཁྲུ་གསུམ། སོར་གཉིས་ལྷག་ཙམ་འབྱུང་བ་ནི་ཉིན་ཞག་གཅིག་ལ་ཉི་མ་གདུང་བྱེད་དང་བཅས་པ་སྟེང་འོག་ཏུ་འགྲོ་བའི་ཚད་དོ། །ཡང་ཞག་དེས་ཉི་མའི་དཀྱིལ་འཁོར་ལྷོ་བྱང་དུ་འགྲོ་བའི་བར་འགྱངས་ལྔ་ཁྲི་ཤེད་མཚུངས་ཀྱི་ཆེད་དུ་གཉིས་ཀྱིས་བསྒྱུར་བས་འབུམ་ཕྲག་གཅིག་འོང་བ་ལ་བགོས་པས་ཐོབ་པའི་ནོར་དཔག་ཚད་ཉིས་བརྒྱ་དོན་གསུམ། རྒྱང་གྲགས་གསུམ། འདོམ་སྟོང་བདུན་བརྒྱ་བརྒྱད་ཅུ། ཁྲུ་གསུམ། སོར་དྲུག་ལྷག་ཙམ་འབྱུང་བ་ནི་ཉིན་ཞག་གཅིག་ལ་ཉི་མའི་དཀྱིལ་འཁོར་ལྷོ་བྱང་དུ་བགྲོད་པའི་ཚད་དེ། གལ་ཏེ་ཉི་མའི་གདུང་བྱེད་ལྷོ་བྱང་དུ་འགྲོ་བའི་ཚད་ལ་བརྟག་ན་བགོད་བཞི་བདུན་ཁྲི་ལྔ་སྟོང་གཉིས་ཀྱིས་བསྒྱུར་བ་ལ་བགོད་བྱེད་ཀྱིས་བགོ་བར་བྱའོ། །གསུམ་པ་ནི། ཉི་མ་རླུང་འགྲོས་ཀྱི་མགྱོགས་ཁྱད་ནི་ཉི་མ་བརྟེན་པའི་གཞི་སྐར་ཁྱིམ་རྣམས་ཞག་རེ་བཞིན་གཡས་སྐོར་དུ་བགྲོད་པའི་ཡུན་ཁྱིམ་རེ་རེར་ཆུ་ཚོད་ལྔ་ལྔ་སྟེ་ཁྱོན་ཆུ་ཚོད་དྲུག་ཅུ་ཡིན་ལ། དེ་འདྲའི་ཆུ་ཚོད་རེའི་ཡུན་ལ་དཔག་ཚད་དྲུག་སྟོང་ཉིས་བརྒྱ་ལྔ་བཅུ་རེ་ཡོད་དེ། རྒྱུ་མཚན་དེ་ཉིད་ཞག་གི་ཆུ་ཚོད་དྲུག་ཅུས་བསྒྱུར་བས་ཉི་མའི་རྒྱུ་ལམ་ཟླུམ་པོའི་ཚད་དཔག་ཚད་སུམ་འབུམ་བདུན་ཁྲི་ལྔ་སྟོང་འབྱུང་བའི་ཕྱིར་རོ། །དེ་བས་ན་ཉི་མས་ཆུ་ཚོད་རེའི་ཡུན་ལ་རླུང་འགྲོས་ཀྱིས་གཡས་སྐོར་དུ་དཔག་ཚད་དྲུག་སྟོང་ཉིས་བརྒྱ་ལྔ་བཅུ་རེ་བགྲོད་ནུས་པས་ན་ཤིན་ཏུ་མགྱོགས་པ་སྟེ། མདོ་མྱང་འདས་ལས། སྐྱེས་བུ་བཞིས་དུས་གཅིག་ཏུ་ཕྱོགས་བཞིར་མདའ་འཕངས་པ་དེ་བཞི་ཀ་ས་ལ་མི་ལྷུང་བར་འཛིན་ནུས་ན་ཤིན་ཏུ་མགྱོགས་མོད་ཀྱི། དེ་ལས་ས་ལ་རྒྱུ་བའི་ཡི་དྭགས་དང་དེ་ལས་མཁའ་ལ་འགྲོ་བའི་ཡི་དྭགས་དང༌། དེ་ལས་རྒྱལ་ཆེན་བཞི་དང༌། དེ་ལས་ཉི་ཟླ་མགྱོགས་པར་གསུངས་པ་བཞིན་ནོ། །གསུམ་པ་ལྡོག་རྐྱེན་ནི། རྒྱུ་ལམ་ལྷོ་བྱང་ཞེས་སོགས་ནི་ཉི་མའི་གདུང་བྱེད་ཀྱི་ཚད་དེ་སྔར་བཤད་ཟིན་ལ། དེ་ལྟར་ན་བགྲོད་པ་གཉིས་ཀྱི་མཐར་གདུང་བྱེད་བྱང་གི་ལྷུན་པོའི་རྭ་ལ་ཐུག་པའི་རྐྱེན་གྱིས་དབྱར་ཉི་ལྡོག་ལ། ས་དུམ་བུ་དེ་ནས་བགྲངས་པའི་དུམ་བུ་བདུན་པའི་ཡང་དེའི་ཐད་ཀའི་ས་ཁྱོན་དུ་ལྷོའི་རྟ་གདོང་གི་མེ་ལ་གདུང་བྱེད་དེ་ཉིད་རེག་པའི་རྐྱེན་གྱིས་ཚུར་བཅུར་བ་ལས་དགུན་ཉི་ལྡོག་པར་གསུངས་ཏེ། འགྲེལ་ཆེན་ལས། འདིར་ལྷུན་པོའི་ཕྱོགས་ཀྱི་ཆ་ཐམས་ཅད་དུ་ཁྱིམ་གྱི་འཁོར་ལོ་འཁོར་བའི་དབང་གིས་མེ་ལ་རེག་པ་གང་ཡིན་པ་དེ་ནི་བདུན་པའི་ཕྱོགས་ཐོབ་པ་ན་ལྷུན་པོའི་རྭ་ལ་རེག་ཅིང༌། གངས་ཀྱི་རིའི་སྟེང་དུ་འགྲོའོ། །ཞེས་པའི་རིགས་པས་ཉི་མ་ཁྱིམ་སོ་སོར་གནས་པའི་དུས་ཀྱི་ཚོགས་ལ་སོགས་པ་མཐའ་དག་སྟེ་ཐམས་ཅད་རིགས་པར་བྱའོ། །ཞེས་གསུངས་པས་སོ། །བཞི་པ་ལ་གཉིས་ཏེ། ཕྱོགས་ངོས་བཟུང་བ་དང༌། འཆར་ནུབ་བཤད་པ་དངོས་སོ། །དང་པོ་ནི། རང་གླིང་ལྷོ་སྟེ་ཞེས་བྱ་བ་ལ་སོགས་པ་སྟེ། རྒྱུད་ལས། རི་ཡི་རྒྱལ་པོ་དག་ནི་སྐྱེ་བོ་ཐམས་ཅད་ཀྱི་ཡང་བྱང་ན་གནས་པར་འགྱུར་རོ་མི་ཡི་བདག ཉི་མ་ཤར་བ་ཤར་དུ་འགྱུར་ཏེ་རི་དང་མཉམ་པ་བགྲོད་པ་དག་དང་དེ་ནི་ནུས་པ་ནུབ། ཅེས་སོ། །གཉིས་པ་ནི། གླིང་འདིར་སོགས་ཏེ། མཛོད་ལས། ནམ་ཕྱེད་ཉི་མ་སོགས་དང་བསྟུན་ཏེ་རགས་པའི་རྣམ་གཞག་ཡིན་ཚུལ་སྔར་བཤད་གྲུབ་བོ། །དེ་ལ་འདིར་ཉིན་མཚན་གཉིས་འབྱུང་བའི་རྒྱུ་ལ་ཁ་ཅིག་ན་རེ། རི་རབ་ཀྱིས་སྒྲིབ་པ་དང་མ་བསྒྲིབས་པའི་ཁྱད་པར་ཡིན་ཅེས་ཟེར་རོ། །དེ་ལྟ་ན་གླིང་འདིའི་བྱང་བགྲོད་མཐར་ཐུག་པའི་ནམ་ཕྱེད་ཀྱི་ཚེ་ལྷོ་གླིང་གསུམ་ཙམ་མ་གཏོགས་གླིང་ལྷག་མ་དགུ་པོར་ཉི་མས་ཁྱབ་པར་ཐལ། རི་རབ་ཀྱིས་སྒྲིབ་པ་ལས་མཚན་མོ་འབྱུང་བ་གང་ཞིག དེའི་ཚེ་གླིང་དགུ་པོ་དེ་དག་ལྷུན་པོས་བསྒྲིབ་མི་ནུས་པའི་ཕྱིར་ཏེ། དེའི་ཚེ་ཉི་མ་སྒྲ་མི་སྙན་གྱི་ཐད་ཀའི་མེ་རི་ལ་ཤིན་ཏུ་ཉེ་བས་རི་རབ་ཀྱི་གྲིབ་མ་རྒྱ་ཆུང་དགོས་པའི་ཕྱིར་རོ། །རྩ་བར་འདོད་མི་ནུས་ཏེ། ལམ་ཕྱེད་འབུམ་ཕྲག་གསུམ་པོ་དག་དང་འགལ་བའི་ཕྱིར་རོ། །ཡང་ཁ་ཅིག དཀྱིལ་འཁོར་ཐག་རིང་པོར་སོང་བས་མ་མངོན་པ་ན་ནུབ་ལ་འཆར་བ་ན་ཉེ་བར་གྱུར་ཟེར་རོ། །དེ་ལྟ་ན་ནུབ་པའི་ཚེ་དཀྱིལ་འཁོར་ཇེ་ཆུང་ཇེ་ཆུང་དུ་སོང་བ་སོགས་དགོས་ན་དེ་ལྟར་མ་མཐོང་བའི་ཕྱིར་མི་རིགས་སོ། །དེས་ན་སྔར་ཐིག་གི་སྐབས་སུ་བཤད་པའི་མཐོ་གང་གི་ནམ་མཁའ་ཟླུམ་པོར་སྣང་བ་འདིའི་ནང་དུ་ནམ་ཚུད་པའི་ཚེ་རང་རང་གི་ཡུལ་དུ་འཆར་ཞིང༌། འཐོན་པའི་ཚེ་ནུབ་པར་འགྱུར་རོ། །འོན་ཀྱང་དབང་ལེར། ཐོ་རེངས་ནས་ནི་གྲིབ་མའི་མཐའ། ཞེས་གསུངས་པས་ནམ་ལངས་ནས་ཉི་མ་ཤར་གྱི་བར་དང༌། ཉི་མ་ནུབ་ནས་ས་སྲོས་ཀྱི་བར་ནི་མཐོ་གང་ནམ་མཁའི་ཁོངས་སུ་བསྡུ་སྟེ། ཉི་མའི་བྱེད་ལས་སྣང་བའི་ཕྱོགས་ཤས་ཆེ་བའི་ཕྱིར་རོ། །དེས་ན་རྒྱུད་འགྲེལ་ལས། ཉིན་མཚན་གྱིས་ཁྱབ་པའི་ཁྱོན་ལ་ལམ་ཕྱེད་འབུམ་ཕྲག་གསུམ་གསུངས་པའང་མཚན་མོས་མུན་པ་དང་ཉིན་མོས་སྣང་བར་བྱེད་པའི་དོན་དུ་བཟུང་གི། འབུམ་ཕྲག་གསུམ་པོའི་ཁྱོན་མ་ལུས་པ་ཉི་མའི་འོད་ཀྱིས་ཁྱབ་པའི་དོན་དུ་མི་བཟུང་ངོ༌། །གསུམ་པ་ས་ལ་དུས་བཞི་འཁོར་ཚུལ་བཤད་པ་ལ་གཉིས་ཏེ། དངོས་དང༌། རྒྱུ་མཚན་བཤད་པའོ། །དང་པོ་ནི། ཉི་མ་ལུག་ཁྱིམ་དུ་ཞུགས་པའི་ཁྱིམ་ཟླ་གཅིག་པོ་དེ་ཉིད་ལ་དུས་བཞིའི་དབང་དུ་བྱས་ན། ལྷོ་གླིང་དབུས་མ་འདིར་དཔྱིད་ཟླ་འབྲིང་པོ། བྱང་གླིང་དབུས་མར་སྟོན་ཟླ་འབྲིང་པོ་དང༌། ཤར་གླིང་དབུས་མར་དབྱར་ཟླ་འབྲིང་པོ་དང༌། ནུབ་གླིང་དབུས་མར་དགུན་ཟླ་འབྲིང་པོ་དང༌། དེ་བཞིན་དུ་ལྷོ་གླིང་ནུབ་མར་དཔྱིད་ར་དང༌། ཤར་མར་དཔྱིད་ཟླ་ཐ་ཆུང་དང༌། སོགས་ཁོངས་ནས་ཤར་གླིང་ནུབ་མར་དབྱར་ར་དང༌། ཤར་མར་དབྱར་ཐ། བྱང་གླིང་ནུབ་མར་སྟོན་ར་དང༌། ཤར་མར་སྟོན་ཐ། ནུབ་གླིང་ནུབ་མར་དགུན་ར་དང༌། ཤར་མར་དགུན་ཐ་རྣམས་འཁོར་ལ། དེ་བཞིན་དུ་ཉི་མ་གླང་ཁྱིམ་དུ་གནས་པའི་ཚེ་ནུབ་གླིང་ཤར་མ་དང༌། ལྷོ་གླིང་ནུབ་མ་དང༌། ལྷོ་གླིང་དབུས་མ་གསུམ་ན་དཔྱིད་ཟླ་ར་འབྲིང་ཐ་གསུམ། དེ་ནས་གཡོན་སྐོར་གྱི་རིམ་བཞིན་གླིང་གསུམ་ཚན་གསུམ་ན། དབྱར་དང༌། སྟོན་དང༌། དགུན་རྣམས་ཡོད་དེ། འགྲེལ་ཆེན་ལས། ལྷོའི་དུམ་བུ་འདིར་ཁྱིམ་བཅུ་གཉིས་ཀྱི་དབང་གིས་འཕོ་བ་ལ་ཟླ་བ་གང་ཞིག་གྱུར་བ་དེ་ནི་འཕོ་བ་གཞན་ལ་གཡས་སྐོར་གྱིས་བདེན་བྲལ་གྱི་ཟུར་དུ་འགྲོའོ། །ཞེས་སོགས་གསུངས་པ་ལྟར་ཁྱིམ་གཞན་རྣམས་ལའང་སྦྱར་ཏེ་འཕོ་ཚུལ་ཤེས་པར་བྱའོ། །དེ་བཞིན་དུ་དུས་དྲུག་ཏུ་འགྱུར་ཚུལ་ནི། ཉི་མ་ལུག་ཁྱིམ་ན་གནས་པའི་ཚེ། ལྷོ་གླིང་ཤར་མ་དང་དབུས་མར་དཔྱིད་མཉམ། དེ་ནས་གཡོན་སྐོར་གྱིས་ཤར་གླིང་ནུབ་མ་དང་དབུས་མར་སོ་ཀ་དང༌། དེ་ནས་རིམ་བཞིན་གླིང་གཉིས་ན་དབྱར་དང༌། གཉིས་ན་སྟོན་དང༌། གཉིས་ན་དགུན་སྟོད་དང༌། གཉིས་ན་དགུན་སྨད་དེ་ཁྱིམ་གཞན་ལའང་སྦྱར་རོ། །ཡང་ཉ་སྐར་དང་བསྟུན་ཏེ་ར་འབྲིང་སོགས་ཟླ་བ་རྣམས་དང་ཁྱིམ་གང་ན་ཡོད་པ་རྣམས་སྦྱོར་བ་ནི། སྔར་ལེའུ་གཉིས་པར་ལོ་འགོའི་སྐབས་བཤད་པ་ལྟར་ལུག་ཁྱིམ་ནག་པ་དང་ས་ག་གཉིས་པོ་དང་སྦྱར་ཚུལ་གཉིས་ཤེས་པར་བྱས་ནས། ལུག་ཁྱིམ་དང་སྦྱར་བའི་ཟླ་བ་དེ་ས་དུམ་བུ་ཐམས་ཅད་དུ་ཡར་ངོའི་ཚེ་ནག་ཟླ་དང༌། མར་ངོའི་ཚེ་ས་གའི་ཟླ་བར་བྱེད་ལ། དེས་ན་ཡར་ངོ་སྔོན་འགྲོའི་ཚེ་ལྷོ་གླིང་དབུས་མ་འདིར་དཔྱིད་འབྲིང་ནག་ཟླ་དང༌། གཡོན་སྐོར་གྱི་ལྷོ་གླིང་ཤར་མར་དཔྱིད་ཐ་ནག་ཟླ་སོགས་སྦྱར་རོ། །ཡང་མར་ངོ་སྔོན་འགྲོའི་ཚེ་ལྷོ་གླིང་དབུས་མ་འདིར་དཔྱིད་ཐ་ས་ག་ཟླ་བ་དང༌། དེ་བཞིན་དུ་གཡོན་སྐོར་གྱི་ལྷོ་གླིང་ཤར་མར་དབྱར་ར་ས་ག་ཟླ་བ་སོགས་བྱ་སྟེ་ཐམས་ཅད་ལ་སྦྱོར། གཉིས་པ་དུས་བཞི་རིམ་པར་འཁོར་བའི་རྒྱུ་མཚན་བཤད་པ་ནི། ས་དུམ་བུ་བཅུ་གཉིས་ལ་དུས་བཞི་གཡས་སྐོར་དུ་རྒྱུ་བའི་རྒྱུ་མཚན་ནི། ནམ་མཁའ་ལ་ཉི་མས་ཁྱིམ་བཅུ་གཉིས་པོ་རྣམས་འཁོར་བ་ལས་དེའི་དབང་གིས་ཏེ། འགྲེལ་ཆེན་ལས། ལུག་ལ་སོགས་པའི་ཁྱིམ་གང་ཡང་རུང་བ་གཅིག་ལ་ཉི་མ་གནས་པས་དུམ་བུ་བཅུ་གཉིས་སུ་དུས་དྲུག་དང༌། ཟླ་བ་བཅུ་གཉིས་དང༌། ཕྱོགས་ཉི་ཤུ་རྩ་བཞིར་བྱེད་དེ། ཁྱིམ་གྱི་འཁོར་ལོ་འཁོར་བའི་དབང་གིས་སོ། །ཞེས་སོ། །དེ་ལྟར་ན་དུམ་བུ་བཅུ་གཉིས་ལ་དུས་བཞི་འཁོར་ཚུལ་བཤད་པ་འདི་ཡང་རགས་པར་བརྗོད་པ་ཙམ་སྟེ། ཞིབ་མོར་འདོད་ན་གླིང་བཅུ་གཉིས་པོ་རེ་རེ་ཡང་དུམ་བུ་སུམ་ཅུ་ལྷག་ཙམ་རེ་སྟེ་ཁྱོན་སུམ་བརྒྱ་རེ་ལྔར་ཕྱེ་བས་ཉིན་མཚན་མཉམ་པའི་ཞག་ཀྱང་རིམ་བཞིན་སུམ་ཅུ་སུམ་ཅུ་སྟེ་སུམ་བརྒྱ་རེ་ལྔར་གྲུབ་ལ། དེའི་ཕྱིར་ན་ཉི་བར་ལུག་ཁྱིམ་ནས་ལུག་ཁྱིམ་དུ་འཁོར་བ་ལྟ་བུའི་ལོ་གཅིག་ལ་ཉི་མས་ལྷུན་པོར་གཡས་སྐོར་གྱིས་འཁོར་གྲངས་སུམ་བརྒྱ་རེ་ལྔ་བྱེད་པས། ས་དུམ་བུ་བཅུ་གཉིས་ལས་ཁྱོན་ཐ་དད་པ་སུམ་བརྒྱ་རེ་ལྔར་ཕྱེ་བའི་ས་ཁྱོན་རེ་རེར་བྱང་བགྲོད་མཐར་ཐུག་སྟེ་དབྱར་ཉི་ལྡོག་པ་རེ་རེ་དང༌། དེ་བཞིན་དུ་ལྷོ་བགྲོད་མཐར་ཐུག་སྟེ་དགུན་ཉི་ལྡོག་པ་རེ་རེ་དང༌། སྟོན་དཔྱིད་ཉིན་མཚན་མཉམ་པ་གཉིས་ཀྱང་རེ་རེ་སྟེ། དེ་ལྟར་ན་དུས་བཞི་ཞག་རེ་བཞིན་འཁོར་བས་དུས་བཞི་རེ་རེ་ཡང་སུམ་བརྒྱ་རེ་ལྔ་རེ་ལྔ་རེ་གྲུབ་སྟེ། འགྲེལ་ཆེན་ལས། འདིར་ལྷུན་པོའི་ཕྱོགས་ཀྱི་ཆ་ཐམས་ཅད་དུ་ཞེས་སོགས་སྔར་དྲངས་མ་ཐག་པ་འདིར་བསྟན་ནོ། ད་ནི་འཕྲོས་དོན་ལྷོ་བྱང་དུ་བགྲོད་པ་ལ་ཉི་མ་རིང་ཐུང་འོང་བའི་རྒྱུ་མཚན་ཅུང་ཟད་བཤད་པར་བྱ་སྟེ། ཁ་ཅིག་ན་རེ། ཉི་མའི་ལམ་ཟླུམ་པོ་མཐོ་དམན་ཅན་དུ་འཁོར་ཞིང་དེ་ཡང་ཕྱོགས་དང་ཕྱོགས་སུ་འཕོ་བ་ལས་གྱེན་དུ་འཛེག་པའི་ཚེ་བུལ་བས་རིང་བ་དང༌། ཐུར་དུ་བབས་པའི་ཚེ་མྱུར་བས་ཐུང་ཟེར་རོ། །དེ་ལྟར་ན་དུས་རྟག་ཏུ་ཉིན་མཚན་མཉམ་པ་འབའ་ཞིག་འབྱུང་བར་ཐལ། སྔ་དྲོ་ལྟ་བུ་གྱེན་དུ་འཛེག་པས་བུལ་བའི་ཚེ་ཕྱི་དྲོ་ལྟ་བུ་ཐུར་དུ་འབབ་པ་གོ་ལའི་ཟླུམ་སྐོར་གྱི་གནས་ལུགས་ཡིན་པས་གུན་བསབ་འགྲོ་བའི་ཕྱིར་དང༌། རླུང་སྟོབས་ཀྱིས་བགྲོད་པ་ལ་གྱེན་ཐུར་ལ་མྱུར་བུལ་གྱི་ཁྱད་པར་ཡང་མི་རིགས་པའི་ཕྱིར་རོ། །འོ་ན་གང་ཞེ་ན། སྤྱིར་ཕྱོགས་གང་ནས་གཞལ་ཀྱང་རུང་ཁྱིམ་གྱི་འཁོར་ལོའི་རླུང་རྣམས་ལྷུན་པོ་ལ་ཇེ་ཉེར་འཁོར་བ་རྣམས་དལ་ལ། རྟ་གདོང་གི་མེ་ལ་ཇེ་ཉེར་འཁོར་བ་རྣམས་མྱུར་ཞིང༌། མཉམ་ལམ་གྱི་ཚེ་དལ་མྱུར་བར་མར་འགྱུར་ཏེ། དཔེར་ན། གདུགས་སྐོར་བ་ན་ཕྱི་མཐའ་རྒྱ་ཆེ་བ་རྣམས་མྱུར་དུ་འཁོར་ཞིང༌། དེ་ལས་ནང་དུ་སོང་བ་རྣམས་རིམ་གྱིས་དལ་བར་འཁོར་ལ། ཕྱི་ནང་ཐམས་ཅད་ཀྱང་རྫོགས་པར་འཁོར་བའི་དུས་དང་གྲངས་མཉམ་པ་བཞིན་ནོ། །དེར་མ་ཟད་ལྟ་བ་བོ། རང་ཉིད་གང་ན་གནས་པ་དེ་དབུས་སུ་བྱས་པའི་མཐོ་གང་ནམ་མཁའ་ཟླུམ་པོར་སྣང་བ་དེའི་ཁྱོན་ཆེ་བ་དང་ཆུང་བའི་ཡུལ་སྤྱོད་པའི་དབང་གིས་ཉི་མ་རིང་ཐུང་དུ་འགྱུར་བའང་ཡིན་ཏེ་སྔར་མཐོ་གང་ཟླུམ་པོའི་རི་མོའི་གནད་ཀྱིས་སོ། །གཞན་ཡང་འདི་དག་ལས་འཕྲོས་པའི་བརྗོད་པ་མང་དུ་འདུག་སྟེ་རེ་ཞིག་དེ་ཙམ་མོ། །རྩིས་ཀྱི་མན་ངག་ཉིན་བྱེད་སྣང་བ་ལས་འཇིག་རྟེན་ཁམས་ཀྱི་ཚད་དང་གོ་ལ་བཤད་པའི་སྐབས་ཏེ་བཅུ་གསུམ་པའི་འགྲེལ་པའོ། །ཞེས་སྐབས་བསྡུས་སོ།།

མཐའ་མའི་འདོན་ཐེངས་།: 17.12.2013 ཉིན། 10:41 AM

<< སྔ་མ།

ནང་གསེས་དཀར་ཆག

ཡིག་ཆ་གསར་ཤོས།

ཐོན་ཟོག་ཁྲལ་འབབ་སྡེ་ཚན་གྱིས་ཆེ་བསྟོད་གནང་།

བོད་ཡིག་མིང་བྱང་ལ་འགྱུར་བཅོས་བཏང་བ།

ཅོན་ཏ་ར་སྨན་སྦྱོར་སྡེ་ཚན་དུ་ཆོད་གན་ལས་མི་དྲུག་གི་ས་མིག་གསལ་བསྒྲགས།

བརྟན་བཞུགས་སྔོན་འགྲོའི་རིམ་གྲོར་སྲོག་ཆགས་ཚེ་ཐར་བཏང་བ།

འགྲོ་ཕན་སྨན་རྩིས་ཁང་གི་མིང་དུ་བརྫུས་ཏེ་ནད་པ་བསླུ་བྲིད་བྱེད་པའི་གནས་ཚུལ།

ཁ་ལོ་བ་གཅིག་དང་ཆོད་གན་ལས་མི་དྲུག་གི་ས་མིག་གསལ་བསྒྲགས།

ཆོད་གན་ལས་མི་སྐྱེས་པ་གཉིས་དང་བུད་མེད་གསུམ་གྱི་ས་མིག་གསལ་བསྒྲགས།

ལེའུ་དང་པོ། ཀླད་དོན་གླེང་སློང་བ།

ལེའུ་གཉིས་པ། རླུང་ནད་གསོ་བ།

ལེའུ་གསུམ་པ། མཁྲིས་པའི་ནད་གསོ་པ།

ལེའུ་བཞི་པ། བད་ཀན་གྱི་ནད་བཅོས་པ།

ལེའུ་ལྔ་པ། འདུས་པའི་ནད་གསོ་བ།

ལེའུ་དྲུག་པ། མ་ཞུ་བ་གསོ་བ།

ལེའུ་བདུན་པ། གཅོང་ཆེན་སྐྲན་ནད་བཅོས་པ།

ལེའུ་བརྒྱད་པ། སྐྱ་རྦབ་ཀྱི་ནད་གསོ་བ།