ད་ནི་སྐབས་བཅུ་གཅིག་པས་དུ་བ་འཆར་བའི་ངེས་པ་བཤད་པ་ལ་བསྟན་བཤད་གཉིས་ལས། དང་པོ་ནི། དུ་བ་མཇུག་རིང་རྒྱུ་བའི་རྟག་པའི་ལོངས་སྤྱོད་ནི་ཕལ་ཆེར་ཉི་དག་དང་མཐུན་མོང་བས་ཡུལ་སྟེང་ནས་བགྲོད་ཚུལ་ཉི་མ་དང་མཚུངས་ཀྱང༌། རང་གི་ཐུན་མོང་མ་ཡིན་པའི་མྱུར་རྐང་ལ་བསྟེན་ནས་འགྲོས་བཞི་རྩོམ་པའི་རྐང་པའི་ཁྱད་པར་གྱིས་འཆར་ཏེ། རིམ་པ་ལ་ཉི་མའི་མདུན་དང༌། རིམ་མིན་ལ་ཉི་མའི་རྒྱབ་ཏུ་མཐོང་བར་འགྱུར་བའི་ཕྱིར། དཔེར་ན་ཞི་གཟའ་གཉིས་བཞིན་ནོ། གཉིས་པ་རྒྱས་པར་བཤད་པ་ལ་གསུམ་སྟེ། འགྲོས་བཞི་རྫོགས་པའི་ཚད། དལ་མྱུར་རྒྱུ་བའི་ལོངས་སྤྱོད། མཐོང་ནུབ་ཀྱི་དུས་མཚམས་ངེས་པའི་སྒོ་ནས་བསྟན་པའོ། དང་པོ་ནི། ལོ་གསུམ་དང་ཟླ་བ་ཕྱེད་པ་སྟེ་ཕྱོགས་གསུམ་པོ་ཉིས་འགྱུར་དུ་བྱས་པ་ཟླ་བ་བདུན་ཅུ་དོན་ལྔས་ནི་མྱུར་འགྲོས་དང་དལ་བའི་འགྲོས་རྫོགས་པར་འགྱུར་ལ། དེ་བཞིན་དུ་སླར་ཡང་ཟླ་བ་བདུན་ཅུ་དོན་ལྔས་འཁྱོག་འགྲོས་དང་འབྱུང་འགྲོས་གཉིས་ཀྱི་འགྲོས་རྫོགས་པར་འགྱུར་བ་དེའི་ཕྱིར། རྒྱབ་མདུན་དུ་རྒྱུ་བའི་འགྲོ་བ་དང་འོང་བའི་འགྲོས་གཉིས་གཉིས་རྫོགས་པའི་ཟླ་གྲངས་མདའ་རི་ཉིས་འགྱུར་ཟླ་བ་བརྒྱ་དང་ལྔ་བཅུ། དེ་ལོར་དྲིལ་ན་ལོ་བཅུ་གཉིས་དང་ཟླ་བ་དྲུག་རེས་དུ་བའི་འགྲོས་བཞི་པོ་ཚར་གཅིག་རྫོགས་པ་ཡིན་ཏེ། རྒྱུ་མཚན་ཅིའི་ཕྱིར་ཞེ་ན། འགྲོས་བཞི་ཚར་གཅིག་རྫོགས་མཚམས་ནས་མགོ་བརྩམས་ཏེ། ཤར་དུ་གདོང་ཕྱོགས་ནས་ལོ་གསུམ་གྱི་བར་དུ་དལ་བར་རྒྱུ་བས་ཉིན་རེ་བཞིན་ལོའི་རྐང་ལོངས་སྤྱོད་པས་ཉི་མ་ལས་ཤར་དུ་ཆུ་ཚོད་ཞེ་ལྔ་ཙམ་འཕགས་ཏེ་འཆར་བའི་འགོ་རྩོམ། དེ་ནས་ཕྱོགས་གསུམ་གྱི་བར་དུ་མྱུར་བར་རྒྱུ་བས་ཉིན་རེ་བཞིན་ཕྱོགས་ཀྱི་རྐང་ལོངས་སྤྱོད་པས་དེའི་མཐར་མྱུར་འགྲོས་རྫོགས་པ་ཡིན་མོད། འོན་ཀྱང་དུ་ཕོད་དང་བཅས་ཏེ་འཆར་བ་ནི་ཕྱོགས་གསུམ་པོ་རྫོགས་པ་ན་ཉི་མའི་སྔོན་དུ་སྐར་མ་གཉིས། ཆུ་ཚོད་དགུ། སྲང་ཉེར་གཉིས་ལྷག་ཙམ་ཐལ་བར་འགྱུར་བ་ལས། ཕྱོགས་གཉིས་ཏེ་ཟླ་བ་གཅིག་སོང་བའི་མཐར་ཉི་མའི་མདུན་དུ་སྲོད་ལ་འཆར་ཤིང༌། དེ་ནས་ཡང་ཕྱོགས་གསུམ་དང་ལོ་གསུམ་གྱི་རིང་རང་རང་གི་རྐང་ལོངས་སྤྱད་པས་ལྷོར་གདོང་ཕྱོགས་ནས་སླར་ལྡོག་སྟེ་འོང་བ་དལ་བའི་འགྲོས་ཀྱིས་མཐར་རང་གི་ཞིང་ལ་ཐིམ་པ་སྟེ་ཉི་དུ་ལྷན་ཅིག་ཏུ་འཛོམ་མོ། དེ་བཞིན་དུ་སླར་ཡང་ལོ་གསུམ་ཕྱོགས་གསུམ་གྱི་བར་ནུབ་ཏུ་གདོང་ཕྱོགས་ནས་ལོ་དང་ཕྱོགས་ཀྱི་རྐང་ལོངས་སྤྱད་པས་འཁྱོག་འགྲོས་ཀྱི་མཇུག་གི་ཕྱོགས་གཉིས་སོང་བའི་མཐའ་མར་ཉི་མའི་རྒྱབ་ནུབ་ཏུ་འཕགས་ཏེ་ཐོ་རངས་འཆར་ཞིང༌། དེ་རྗེས་ཕྱོགས་གསུམ་དང་ལོ་གསུམ་གྱི་བར་དུ་རང་རང་གི་རྐང་ལོངས་གདོང་བྱང་དུ་ཕྱོགས་པ་འབྱུང་འགྲོས་ཀྱིས་སྤྱད་པ་རྫོགས་མཐར་ཉི་མའི་རྗེས་ཟིན་པས་ཉི་མར་ཐིམ་མོ། །དེ་ལྟར་ན་འགྲོས་རེའི་ཚད་ཟླ་བ་ཕྱེད་བཅས་སོ་བདུན་ཉིས་འགྱུར་དུ་བྱས་པ་ཟླ་བ་དོན་ལྔས་འགྲོ་བ་མྱུར་འཁྱོག་གཉིས་ལ་འོང་བ་དལ་འབྱུང་གཉིས་དགོས་པས་འགྲོ་འོང་གི་འགྲོས་རེ་རེ་རྫོགས་པ་ཡིན་ཏེ། ཁམས་ལེའི་ཚིགས་བཅད་ཞེ་དགུ་པར། སུམ་ཅུ་རྩ་བདུན་ལག་པས་བསྒྱུར་བའི་ཟླ་བ་རྣམས་ཀྱིས་མཇུག་རིང་དག་ནི་མྱུར་དང་འཁྱོག་པོར་འགྱུར། ཞེས་སོ། འདིར་ཁ་ཅིག མཇུག་རིང་ལ་དལ་འབྱུང་གི་འགྲོས་གཉིས་མེད་གསུང་ནའང༌། དལ་འབྱུང་གི་འགྲོས་མ་བྱས་ན་མྱུར་འཁྱོག་བྱེད་མི་ཤེས་པའི་ཕྱིར། མཁས་མཆོག་བུས། འགྲོ་བ་དང་འོང་བའི་དབྱེ་བས། ཞེས་པའི་འགྲེལ་ཆེན་གྱི་ལུང་ལ་བརྟེན་ནས་མདུན་དུ་རྒྱུ་བ་ལ་འགྲོ་འོང་གཉིས། རྒྱབ་ཏུ་རྒྱུ་བ་ལ་འགྲོ་འོང་གཉིས་ཏེ། འགྲོ་བའི་འགྲོས་གཉིས་དངོས་སུ་གསུངས་པས་འོང་བའི་འགྲོས་གཉིས་ཤུགས་ལས་རྟོགས་པ་ཡིན་པར་བཤད་པ་ལྟར་འཐད་པས་འགྲོས་བཞི་གྲུབ་བོ། གཉིས་པ་ལ་བཞི་སྟེ། རང་གི་ཐུན་མོང་མ་ཡིན་པའི་རྐང་ལོངས་བཤད་པ། དེ་རྒྱུན་བཅས་ཀྱིས་རྩི་བའི་ཚུལ། འགྲོས་བཞི་ངོས་བཟུང་བ། འཆར་ནུབ་ཀྱི་དུས་གཟེར་བཤད་པས་དོན་བསྡུ་བའོ། དང་པོ་ནི། བཤད་མ་ཐག་པ་དེའི་ཕྱིར་འགྲོས་བཞི་གང་ལ་སྤྱོད་པའི་དུས་ཡིན་ཀྱང་རུང་སྟེ། ལོ་གསུམ་པོའི་རིང་ལོངས་སྤྱོད་པ་ལོའི་རྐང་ལོངས་ནི། ཉིན་རེ་བཞིན་ཆུ་སྲང་གཉིས་དང་དབུགས་གསུམ་རེས་ཉི་མ་ལས་ལྷག་པོར་མདུན་དུ་འགྲོ་འོང་རིམ་པའི་རྐང་སྔ་ཕྱི་ལ་ནོར་དང༌། རྒྱབ་ཏུ་འགྲོ་འོང་རིམ་མིན་གྱི་རྐང་སྔ་ཕྱི་ལ་བུ་ལོན་གྱི་ཚུལ་དུ་སྤྱོད་ཅིང༌། ཡང་ཕྱོགས་གསུམ་གྱི་བར་དུ་སྤྱོད་པ་ཕྱོགས་ཀྱི་རྐང་ལོངས་ནི། ཉིན་རེ་བཞིན་ཆུ་སྲང་ང་དྲུག་བཞི་ཆ་ལ་ཆུ་ཚོད་རེར་བྱས་པའི་ཆུ་ཚོད་གཉིས་རེའམ། ཆུ་སྲང་དྲུག་ཅུ་ལ་ཆུ་ཚོད་དུ་བྱས་པའི་ཆུ་ཚོད་གཅིག་དང་ཆུ་སྲང་ང་གཉིས་དབུགས་གསུམ་རེས་ཉི་མ་ལས་ཆེས་ཆེར་ལྷག་པས་རིམ་རིམ་མིན་ལ་ནོར་དང་བུ་ལོན་གྱི་ཚུལ་དུ་སྤྱོད་པ་ཡིན་ནོ། །གཉིས་པ་རྒྱུན་བཅས་ཀྱི་རྩི་ཚུལ་ནི། དེ་ལྟར་སྤྱོད་པའི་ཚུལ་དེ་རི་མོས་གཏན་ལ་འབེབས་ན། བློ་ངན་འདས་ལོར་བྱས་པའི་གང་རྩིའི་བྱེད་པའི་ཟླ་དག་བསྒྲུབ་པ་ལ་ཀླུ་ལག་གིས་སྦྱང་བ་ནི་དུ་བའི་རྩིས་འཕྲོ་སྟེ་ལྷག་གྱུར་དོར་བའོ། །དེ་ལ་དུ་བ་སྔར་མཐོང་ནས་ཕྱིས་མཐོང་འགྱུར་གྱི་བར་གྱི་འཁོར་ལོ་མདའ་རིས་བགོས་པས་ལྷག་མ་སྟོངས་པ་དེའི་ཚེ་དུ་བ་མཐོང་བའི་དུས་ཡིན་ལ། དེའང་རྙེད་པ་འཕར་ཏེ་མི་མཉམ་པ་ཐོབ་པའི་ཚེ་འཁྱོག་འགྲོས་ཀྱི་མཐར་ཉི་མའི་རྗེས་སུ་ལུས་པས་ཐོ་རེངས་ཤར་གྱི་ཕྱོགས་སུ་བརྟག་པར་བྱ། ཡང་རྙེད་པ་འཕེལ་ཏེ་མཉམ་པར་གྱུར་པའི་ཚེ་མྱུར་འགྲོས་ཀྱི་མཐར་ཉི་མའི་མདུན་དུ་ཐལ་བས་སྲོད་ལ་ནུབ་ཀྱི་ཕྱོགས་སུ་མཐོང་བས་བརྟག་ཅིང༌། ཐོབ་ནོར་དེ་འོག་ཏུ་སྣོན་འབྲིད་ཀྱིས་མཚན་མར་ཟུར་དུ་བཞག་གོ། །འཆར་བའི་དུས་ངེས་པ་དེ་ནས་རྒྱུན་བཅས་ཀྱི་ཕྱོགས་ལོའི་ལོངས་སྤྱོད་དག་བརྟག་པའི་ཕྱིར་དུ་སྔར་མདའ་རིས་བགོས་པའི་ལྷག་མ་ཇི་ཙམ་ལུས་པའི་ཚོགས་དེ་མིག་གིས་བསྒྱུར་བ་ནི་ཟླ་ཕྱེད་ཀྱི་ཕུང་པོར་གསིལ་བ་ཡིན་ལ། ཟླ་བ་ཕྱེད་པའི་ཕུང་པོར་གང་མ་ལོངས་པའི་ཆ་དེ་འོག་ཏུ་བསྲེ་རྒྱུ་བདེ་བླག་ཏུ་རྟོགས་པའི་ཕྱིར། དུས་དེར་གང་རྩིའི་ཞག་གྲངས་ལ་ཚེས་ཏེ་བཅོ་ལྔས་བགོས་པས་ཐོབ་ནོར་དུ་གང་བྱུང་འདིར་བསྲེ་ཞིང་ལྷག་མ་ཟུར་དུ་བཞག་པར་བྱའོ། །སླར་ཡང་འགྲོས་རེའི་ལོ་ལོངས་སྤྱོད་པའི་ལོ་གསུམ་གྱི་ཟླ་གྲངས་སོ་དྲུག་ཤེད་སྙོམས་ཀྱི་ཕྱིར་ཉིས་འགྱུར་དུ་བྱས་པ་ལ་ཕྱོགས་ལོངས་སྤྱོད་པའི་ཕྱོགས་གྲངས་གསུམ་བསྣན་པས་མདའ་རི་འབྱུང་སྟེ། མདུན་རྒྱབ་གང་རུང་དུ་ཤར་ནས་དེ་ཙམ་སོང་མཚམས་ལྷོ་བྱང་གི་འགྲོས་མཐར་ནོར་བུ་ལོན་ཁ་དག་པས་འཕྲོ་རྩི་མི་དགོས་པའི་ཕྱིར་དེས་དོར་བའོ། །དེ་ཡང་སྔར་འཆར་དུས་བརྟག་པའི་ཐོབ་ནོར་མཉམ་ལ། སྐབས་འདིར་དོར་བ་ལྡངས་ན་རིམ་མིན་གྱི་སྔ་རྐང་འཁྱོག་འགྲོས་ལ་སྤྱོད་པའི་དུས་དང༌། མ་དོར་ན་རིམ་པའི་ཕྱི་རྐང་དལ་འགྲོས་ལ་སྤྱོད་པའི་དུས་ཡིན་ཞིང༌། ཡང་སྔར་གྱི་ཐོབ་ནོར་མི་མཉམ་ལ། འདིར་དོར་བ་ལྡངས་ན་རིམ་པའི་སྔ་རྐང་མྱུར་འགྲོས་ལ་སྤྱོད་པའི་དུས་དང་མ་དོར་ན་རིམ་མིན་གྱི་ཕྱི་རྐང་འབྱུང་འགྲོས་ལ་སྤྱོད་པའི་དུས་ཡིན་ཏེ། རྒྱུ་མཚན་དེས་རིམ་རིམ་མིན་གང་ཡིན་ནའང༌། རྐང་རྒྱུན་ལ་དོར་བ་སྔ་རྐང་ལ་སྟེར་ཞིང་མ་དོར་བ་ཕྱི་རྐང་ལ་དབྲི། ཞག་ལ་མྱུར་དལ་ལ་སྟེར་ཞིང་འཁྱོག་འབྱུང་ལ་དབྲི་བ་ཡིན་ནོ། །དེ་ནས་རྐང་མཚམས་དོར་བའི་ལྷག་དེ་ཚེས་ཞེས་པ་བཅོ་ལྔས་བསྒྱུར་བ་ནི་ཟླ་བ་ཕྱེད་པའི་ཚོགས་དེ་ཞག་ཏུ་གསིལ་བའོ། །དེ་ལ་དེར་མ་ལོངས་པའི་སྔར་ཟུར་དུ་བཞག་པའི་ཚེས་ཀྱིས་ཐོབ་པའི་ལྷག་མ་གང་བྱུང་དེ་བསྲེས་ལ། གནས་བཞི་སྟེང་ནས་རིམ་བཞིན་ལོའི་རྐང་ལོངས་མཁའ་དང་མཁའ་དང་མིག་དང་མེས་བསྒྱུར་བ་འོག་ནས་རོ་དང་མཁའ་རོས་དབྱུག་སར་དྲིལ་བའི་ཚོགས་སྐབས་དེའི་ཉི་དག་ལོངས་སྤྱོད་ལ་ནོར་མཉམ་དོར་བ་འཁྱོག་འགྲོས་ཀྱི་ཚེ་སྦྱང་བར་བྱ་ཞིང༌། ནོར་མི་མཉམ་ལ་དོར་བ་མྱུར་འགྲོས་ཀྱི་ཚེ་ན་སྦྱིན་པར་བྱའོ། །གལ་ཏེ་རྐང་མཚམས་དོར་བའི་ལྷག་མ་ལ་ལོ་གསུམ་གྱི་ཟླ་ཕྱེད་ཀྱི་གྲངས་ལག་ཐུབ་སྟེ་དོན་གཉིས་ལོངས་ན་ལོ་ལོངས་སྤྱོད་པའི་དུས་རྫོགས་ཟིན་པས་དོར་ལ། ལྷག་མའི་ཚོགས་དེ་ཚེས་ཀྱིས་བསྒྱུར་བ་ལ་སྔར་བཞིན་ལྷག་མ་ཟུར་དུ་བཞག་པ་དེ་བསྲེས་པ་ཕྱོགས་ལོངས་ལ་སྤྱོད་བཞིན་པའི་དུས་ཡིན་པས་གནས་བཞི་སྟེང་ནས་རིམ་བཞིན་ཕྱོགས་ལོངས་ནམ་མཁའ་དང་གཟུགས་དང་མིག་དབང་དང་མེས་བསྒྱུར་བ་འོག་ནས་རོ་དང་མཁའ་རོ་དང་མཁའ་རོས་སྐར་གནས་སུ་དྲིལ་བའི་ཚོགས་དེ་ཉིད་སྔར་གྱི་ལོའི་རྐང་ལོངས་ཀྱི་རྒྱུན་དབྱུག་གུ་ཞེ་ལྔ་ལ་བསྲེས་པ་དེ་ཉི་མ་དག་པའི་ལོངས་སྤྱོད་དུ་སྔར་བཞིན་ནོར་མཉམ་དོར་ཚེ་སྦྱང་བ་སོགས་སྦྱིན་དོར་བྱ་བ་ཡིན་ནོ། །ཡང་ཟླ་ཕྱེད་ཀྱི་འཁོར་ལོ་མདའ་རིས་རྐང་མཚམས་དོར་བ་མ་ལྡངས་པའི་ཚེ་དེ་ཉིད་ལ་ཕྱོགས་གསུམ་གྱི་གྲངས་རྩེ་མོ་ཅན་ཏེ་གསུམ་གྱིས་དབྲི་ཞིང༌། གལ་ཏེ་དེས་དབྲི་བར་མ་ལྡངས་ན་ཕྱོགས་ལོངས་སྤྱོད་པའི་དུས་ཏེ་སྔར་བཞིན་ཚེས་ཀྱིས་བསྒྱུར་ལ་ལྷག་མ་ཟུར་དུ་བཞག་པ་དེ་བསྲེས་པ། གནས་བཞི་སོགས་ཏེ་ཕྱོགས་ལོངས་ཀྱིས་བསྒྱུར་ཞིང་དྲིལ་བའི་ཚོགས་དེ་ཡིས་ཕྱོགས་ལོ་དྲིལ་བའི་རྐང་རྒྱུན་སྐར་མིག་དབྱུག་བུག་སོགས་ལ་སྦྱངས་པའི་ལྷག་མ་སྐབས་དེའི་ཉི་མ་དག་པའི་ལོངས་སྤྱོད་དུ་ནོར་མཉམ་མ་དོར་དལ་འགྲོས་ལ་སྦྱིན་པར་བྱ་ཞིང༌།  ནོར་མི་མཉམ་ལ་མ་དོར་བ་འབྱུང་འགྲོས་ཀྱི་ཚེ་སྦྱང་བར་བྱའོ། །ཡང་རྩེ་མོས་སྦྱང་བར་ལྷག་པའི་ཚེ་ལོ་ལོངས་ལ་སྤྱོད་པའི་དུས་ཡིན་པས་ལྷག་མ་ཚེས་བསྒྱུར་སྔར་ལྷག་ཟུར་དུ་བཞག་པ་དེ་བསྲེས་ལ་ཚོགས་དེ་གནས་བཞི་སོགས་ཏེ་ལོ་ལོངས་ཀྱིས་བསྒྱུར་ཞིང་དྲིལ་བ་དེ་ཡིས་སྔར་རྩེ་མོས་སྦྱངས་ཟིན་པའི་ཕྱིར་ཕྱོགས་ཀྱི་རྐང་རྒྱུན་དོར་ནས་འདིར་ལོ་ལོངས་ཀྱི་རྐང་རྒྱུན་དབྱུག་གུ་ཞེ་ལྔ་ལ་སྦྱངས་ལྷག་སྐབས་དེའི་ཉི་མ་དག་པའི་ལོངས་སྤྱོད་ཀྱི་སྟེང་སྔ་མ་བཞིན་དུ་ནོར་མཉམ་མ་དོར་སྦྱིན་པ་སོགས་སྦྱིན་དོར་བྱ་བ་ཡིན་ནོ། གསུམ་པ་འགྲོས་བཞི་ངོས་བཟུང་བ་ནི། རིམ་པའི་སྔ་རྐང་མྱུར་འགྲོས་ཤར། །ཞེས་བྱ་བ་ལ་སོགས་པ་དང༌། དལ་འབྱུང་འགྲོས་མཐར་སོགས་ཀྱིས་འགྲོས་བཞི་ལ་འཆར་ནུབ་བྱེད་ཚུལ་སྟེ། སྔར་བཤད་རྣམས་དང་གཞུང་བཀླགས་པས་ཀྱང་གོ་ནུས་པའི་ཕྱིར་མ་སྤྲོས་སོ། །བཞི་པ་དོན་བསྡུ་བ་ནི། མདོར་ན་ཉི་མའི་ཟེར་འོག་ནས་འཐོན་པ་ནུབ་སྟེ་ལོ་དྲུག་གི་བར་ཉི་འོད་ཀྱིས་མནན་ཏེ་མཐོང་བར་མི་འགྱུར་ཞིང༌། དེ་རྗེས་ཟླ་གསུམ་གྱི་ཐོག་མཐའི་ཟླ་བ་གཉིས་ལ་སྐར་མའི་རྣམ་པ་དང་བར་མའི་ཟླ་གཅིག་གི་བར་དུ་བ་དང་བཅས་པ་སྲོད་ལ་མཐོང་དེ་ནས་ཡང་ནུབ་སྟེ་ལོ་དྲུག་མི་མཐོང་ཞིང༌། དེ་རྗེས་སླར་ཡང་ཟླ་གསུམ་ཐོག་མཐར་སྐར་མ་དང་བར་མ་ལ་དུ་བ་དང་བཅས་པ་ཐོ་རེངས་མཐོང་བ་སོགས་སྔར་བཞིན་འགྲེ་བ་ཡིན་ནོ། །གསུམ་པ་མཐོང་ནུབ་ཀྱི་དུས་མཚམས་ངེས་པའི་སྒོ་བསྟན་པ་ནི། དེ་བས་ན་འདི་ནི་རྟག་པའི་འགྲོས་ཅན་ཡིན་པའི་ཕྱིར་དེ་ལས་འཆར་ནུབ་ཀྱི་རིམ་པ་གཞན་མེད་པས་དུ་བ་ཤར་བ་ལན་གཅིག་མཐོང་སྟེ་ནུབ་པ་གཅིག་ནས་དུས་མཚམས་བཟུང་སྟེ། དེ་ནས་ཟླ་བ་དོན་བཞི་སྟེ་ལོ་དྲུག་དང་ཟླ་བ་གཉིས་སོང་བའི་མཐར་ཟླ་བ་རེ་རེའི་བར་དུ་དུ་ཕོད་དང་བཅས་པ་ནི་ཐོ་རེངས་ཤར་དང་སྲོད་ལ་ནུབ་ཀྱི་ཕྱོགས་གཉིས་སུ་སྤེལ་མའི་ཚུལ་དུ་འཆར་བ་མཐོང་བར་བཤད་ཅིང་དེས་ནི་འཆར་ནུབ་མཐའ་ཡས་པ་བདེ་བླག་ཏུ་ཤེས་པར་འགྱུར་རོ། །འོན་ཀྱང་མི་དགེ་བའི་ལྟས་སུ་དུས་མིན་དུ་འཆར་བའང་ངེས་པ་མེད་པར་སྣང་བའི་ཕྱིར་ན་མཐའ་གཅིག་ཏུ་འཆར་བ་དང་ནུབ་པའི་ངེས་པ་འཆའ་བའང་དཀའ་བ་ཡིན་ལ། རྒྱུ་མཚན་དེས་ན་སྒྲིམས་པོའི་བློ་ཅན་རྣམས་ཀྱིས་ལན་གཉིས་ལ་སོགས་པ་མང་པོ་ཞིག་མཐོང་ནས་བསླུ་བ་མེད་པའི་ངེས་པ་ནི་རྙེད་པ་ནས་འགོ་བརྩམས་ཏེ་ངེས་བཟུང་བྱའོ་ཞེས་གོང་མ་རྣམས་གསུང་ངོ༌། །འདིར་ནི་འཆར་བའི་དུས་བརྟག་ཐབས་ཀྱི་ཁུངས་རོང་པ་རྒྭ་ལོ་དང་མཁས་མཆོག་བུ་སྟོན། ཕུག་ལུགས་ལ་འཕྲིན་ལས་པའི་རྩིས་གཞི་སོགས་དམ་པ་གོང་མ་རྣམས་ཀྱི་རྗེས་སུ་འབྲངས་ཏེ་བཀོད་པ་ཡིན་ལ། དལ་མྱུར་གྱི་རྒྱུན་བཅས་ལོངས་སྤྱོད་བརྟག་པ་སྟེ་རྩི་ཚུལ་གྱི་ཆོ་ག་འདི་ནི་སྔར་མེད་པའི་ལེགས་བཤད་རང་བློས་གསར་དུ་བསྐྲུན་པ་སྟེ། བློ་གྲོས་དང་ལྡན་པའི་སྐྱེ་བོ་རྣམས་ཐུགས་དགྱེས་པར་མཛོད་ཅིག་ཅེས་གསོལ་བའོ། །ད་ནི་མཇུག་རིང་གི་ལོངས་སྤྱོད་སྒྲ་གཅན་གྱི་ལོངས་སྤྱོད་ལས་བཙལ་དགོས་པར་གསུངས་ཤིང༌། དེ་ཡང་གཟའ་ལྔའི་དལ་རྐང་ལ་མ་སྤྱད་པའི་ཟླ་བ་གཅིག་པོ་ཡོན་ཏན་བརྒྱད་ཀྱིས་བསྒྱུར་བ་ནི་སྒྲ་གཅན་དང་མཇུག་རིང་ཐུན་མོང་གི་ལོངས་སྤྱོད་དུ་གསུངས་པ་ལས་འཕྲོས་ཏེ་སྐབས་འདིར་ཡེ་ཤེས་ཀྱི་རླུང་ལ་གཟའ་རྣམས་ཀྱི་རྐང་པ་འཆར་ཚུལ་ཅུང་ཟད་བརྗོད་པར་བྱའོ། །འདི་ལ་བཞི་སྟེ། གཟའ་ལྔའི་མྱུར་རྐང་དང་སྦྱར་བ། དལ་རྐང་དང་སྦྱར་བ། མཇུག་རིང་གི་རྐང་པ་དང་སྦྱར་བ། ཉི་ཟླའི་རྐང་པ་དང་སྦྱར་བའོ། །དང་པོ་ནི། སྐྱེས་བུ་ལོ་བརྒྱ་པའི་ཡེ་ཤེས་ཀྱི་རླུང་གི་ཆ་བསྡོམས་པས་ལོ་གསུམ་ཕྱོགས་གསུམ་འབྱུང་བ་ཞག་ཏུ་གསིལ་བས་ཞག་ཆིག་སྟོང་ཆིག་བརྒྱ་ཉི་ཤུ་རྩ་ལྔའི་སྟེང་དུ་མངལ་གྱི་ཟླ་བ་དགུའི་རིང་གི་དབུགས་བསགས་པའི་ཞག་དགུ་སྦྱིན་པས་ཞག་ཆིག་སྟོང་ཆིག་བརྒྱ་སོ་བཞི་འབྱུང་ཞིང༌། གཟའ་ལྔ་པོའི་མྱུར་རྐང་གི་རྐང་གྲངས་ཇི་སྙེད་པ་བསྡོམས་པས་ཀྱང་དེ་ཙམ་འབྱུང་བའི་ཕྱིར་རོ། །གཉིས་པ་དལ་རྐང་ནི། ལོ་གསུམ་དང་ཕྱོགས་གཅིག་གི་བརྒྱད་ཆའི་གྲངས་ལས་འཆར་ཏེ། དེ་ཡང་ལོ་གསུམ་གྱི་ཟླ་བ་ཕྱེད་དང་བཅས་པའི་སུམ་ཅུ་རྩ་དྲུག་ཉི་ཟླའི་ཡོན་ཏན་བརྒྱད་ཀྱིས་བསྒྱུར་བས་ཉིས་བརྒྱ་གོ་གཉིས་འབྱུང་ལ། གཟའ་ལྔའི་དལ་རྐང་གི་རྐང་གྲངས་བསྡོམས་ནའང་དེ་ཙམ་མོ། །གསུམ་པ་མཇུག་རིང་གི་ལོངས་སྤྱོད་ནི། སྒྲ་གཅན་གྱི་ལོངས་སྤྱོད་ལས་འབྱུང་སྟེ། འདི་ལྟར། ལོ་གསུམ་དང་ཕྱོགས་གཅིག་གཟའ་ལྔའི་དལ་རྐང་དང་སྦྱར་ནས། མ་སྦྱར་བ་ཕྱོགས་གཉིས་བསྡོམས་པའི་ཟླ་བ་གཅིག་པོ་ཡོན་ཏན་བརྒྱད་ཀྱིས་བསྒྱུར་བ་དྲུག་ཅུའི་ཆར་གསིལ་བ་ལ་དྲུག་ཅུས་ཐོབ་པ་ནི་ཆུ་ཚོད་དོ། །རྙེད་པ་བརྒྱད་པོ་དེ་ལས་ཕྱེད་དོར་པས་ཆུ་ཚོད་ཕྱེད་བཅས་བདུན་ནི་སྒྲ་གཅན་གྱི་ཁྱིམ་ཟླ་གཅིག་གི་རྟག་ལོངས་ཡིན་ཏེ། སྒྲ་གཅན་གྱིས་རྒྱུ་སྐར་འཁོར་བའི་ལོ་གྲངས་བཅོ་བརྒྱད་ཁྱིམ་ཟླར་གསིལ་བས་ཉིས་བརྒྱ་བཅུ་དྲུག་འབྱུང་ལ། དེས་རྒྱུ་སྐར་འཁོར་ལོ་ལ་ཕྱེ་བས་དེ་ལྟར་འབྱུང་བའི་ཕྱིར་རོ། །དེ་ལྟར་སྒྲ་གཅན་གྱི་ལོངས་སྤྱོད་དེ་ལས་མཇུག་རིང་གི་རྐང་པའི་ལོངས་སྤྱོད་འབྱུང་བའི་ཚུལ་ནི། སྒྲ་གཅན་གྱི་ཟླ་བའི་ལོངས་སྤྱོད་ཆུ་ཚོད་ཕྱེད་དང་བརྒྱད་པོ་གཉིས་ཀྱིས་བསྒྱུར་ནས་དྲིལ་བས་ཆུ་ཚོད་བཅོ་ལྔ་འོང༌། །དེ་ལས་སྒྲ་གཅན་གྱི་ཕྱོགས་ལོངས་ཆུ་ཚོད་གསུམ་དང༌། སྲང་ཞེ་ལྔ་པོ་ཆུ་སྲང་དུ་གསིལ་བས་ཉིས་བརྒྱ་ཉེར་ལྔ་འོང་བ་བགོད་བྱེད་ཡིན་ལ། ཤེད་མཚུངས་ཀྱི་ཆེད་དུ་ཆུ་ཚོད་བཅོ་ལྔ་པོ་ཆུ་སྲང་གི་ཕུང་པོར་བྱས་པ་ལ་བགོས་པས་བཞི་ཐོབ་པ་ནི་ཆུ་ཚོད་ཀྱི་གནས་སུ་བཞག་གོ། །སླར་ཡང་སྒྲ་གཅན་གྱི་ཟླ་བའི་ལོངས་སྤྱོད་ལས་ཆུ་སྲང་བདུན་དང་དབུགས་གསུམ་ཕྱུངས་ཏེ། གནས་གཉིས་ཀ་ཡོན་ཏན་གསུམ་གྱིས་བསྒྱུར་ཞིང་དྲིལ་བས་ཆུ་སྲང་ཉེར་གཉིས་དང་དབུགས་གསུམ་དུ་འགྱུར་ཏེ་ཆུ་ཚོད་ཀྱི་འོག་ཏུ་བཞག་གོ། །དེ་ལྟར་ན། ཆུ་ཚོད་བཞི། སྲང་ཉེར་གཉིས། དབུགས་གསུམ་རྣམས་ནི་དུ་བའི་ཞག་གཅིག་གི་ལོངས་སྤྱོད་ཡིན་ནོ། །དེ་དག་ཀྱང་བྱེད་པ་ལ་ལྟོས་པ་ཡིན་གྱི་གྲུབ་པའི་མཐའ་ལ་ལྟོས་པ་ནི་མ་ཡིན་ཏེ། རྒྱུ་མཚན་ཉི་མས་གང་སྤྱོད་མཇུག་རིང་གིས་ཀྱང་སྤྱོད་པས་ཉི་མས་ཉིན་ཞག་རེ་ཞིང་ཆུ་ཚོད་བཞི་ཆུ་སྲང་ཉེར་དྲུག་སོགས་སྤྱོད་པའི་ཕྱིར་ཆུ་སྲང་ཕྱེད་དང་བཞི་ཆད་པར་གསུངས་སོ། །འོན་ཀྱང་འདིར་བྱེད་པ་ཉིད་ཀྱི་དབང་དུ་བྱས་ཏེ་ཉི་མའི་རྟག་ལོངས་ཆུ་ཚོད་བཞི་དང་ཆུ་སྲང་ཉི་ཤུས་དུ་བའི་རྟག་ལོངས་ཆུ་ཚོད་བཞི། སྲང་ཉེར་གཉིས་དབུགས་གསུམ་རྣམས་ལ་སྦྱངས་པས་ལྷག་མ་ཆུ་སྲང་གཉིས་དང༌། དབུགས་གསུམ་འབྱུང་བ་ནི་དུ་བའི་ལོའི་རྐང་ལོངས་སམ་དལ་བར་རྒྱུ་བའི་དུས་ཀྱི་རྐང་ལོངས་ཏེ། ལོ་གསུམ་གྱི་བར་དུ་ཉིན་རེ་བཞིན་རིམ་རིམ་མིན་ལ་ནོར་བུ་ལོན་དུ་སྤྱོད་པའི་རྐང་ལོངས་ཡིན་ནོ། །དེ་ནས་ཕྱོགས་གསུམ་གྱི་རིང་ལ་ལོའི་རྐང་ལོངས་དོར་ནས་ཞག་རེ་རེ་བཞིན་ཆུ་སྲང་ང་དྲུག་རྐང་བཅས་ལ་ཆུ་ཚོད་དུ་བྱས་པའི་ཆུ་ཚོད་གཉིས་རེ་སྤྱོད་དེ། དེ་ཡང་ལོའི་རྐང་ལོངས་ཀྱི་གནས་གཉིས་ཀ་ཕྱོགས་གསུམ་གྱི་ཞག་གིས་བསྒྱུར་ནས་དྲིལ་བས་སྲང་བརྒྱ་དང་བཅུ་གཉིས། དབུགས་གསུམ་འོང་སྟེ་བགོད་གཞིའོ། །དེ་ལ་ཆུ་སྲང་ང་དྲུག་རྐང་བཅས་ཆུ་སྲང་གི་བཞི་ཆའི་ཕུང་པོར་བྱས་པས་ཉིས་བརྒྱ་ཉེར་ལྔ་འབྱུང་བ་བགོད་བྱེད་ཡིན་ལ། ཤེད་མཚུངས་ཆེད་དུ་བགོད་གཞིའང་བཞིས་བསྒྱུར་ཏེ་དྲིལ་བ་ལ་བགོས་པས་ཆུ་ཚོད་གཉིས་ཐོབ་པའི་ཕྱིར་ཆུ་སྲང་ང་དྲུག་བཞི་ཆ་ལ་ཆུ་ཚོད་དུ་བྱས་པའི་ཆུ་ཚོད་གཉིས་ཡིན་གྱི། ཆུ་སྲང་དྲུག་ཅུ་ལ་ཆུ་ཚོད་དུ་བྱས་ན་ནི་སྲང་བརྒྱ་བཅུ་གཉིས་པོ་ལ་དྲུག་ཅུས་དྲིལ་བས་ཆུ་ཚོད་གཅིག སྲང་ང་གཉིས། དབུགས་གསུམ་འབྱུང་སྟེ་ཕྱོགས་གསུམ་གྱི་བར་དུ་ཉིན་རེ་བཞིན་རིམ་རིམ་མིན་ལ་ནོར་བུ་ལོན་དུ་སྤྱོད་པའི་རྐང་ལོངས་ཡིན་ནོ། །བཞི་པ་ཉི་ཟླའི་རྐང་པ་དང་སྦྱོར་བ་ནི་དུ་བའི་རྐང་པ་དང་སྦྱར་བ་དེའི་ལྷག་མ་ལས་ཉི་ཟླའི་རྐང་པར་འགྱུར་བ་ཡིན་ལ། སྒྲ་གཅན་གྱི་ཟླ་བའི་ལོངས་སྤྱོད་ཆུ་ཚོད་ཕྱེད་བཅས་བདུན་པོ་དེ་ཉི་མའི་དལ་རྐང་དང་པོའི་ཕྱེད་ལ་གསུམ་དང༌། ཟླ་རྐང་གི་དང་པོ་དང་བཅུ་གསུམ་པ་ལ་འཆར་བའི་ཆུ་ཚོད་ལྔ་སྟེ་བསྡོམས་པས་ཆུ་ཚོད་བརྒྱད་པོ་དེ་དང་སྦྱོར་བ་ཡིན་ལ། དེའི་སྟེང་ནས་ཕྱེད་ནི་མུན་པ་མེད་པའི་རང་བཞིན་ཡིན་པས་སྒྲ་གཅན་གྱིས་ལོངས་མ་སྤྱད་པས་དེ་ཉིད་ཉི་ཟླ་མྱུར་བུལ་གྱི་ཁྱད་པར་འབྱེད་པའི་རྐང་པར་འགྱུར་ཏེ། དེ་ཡང་ཕྱེད་པོ་དེ་སྒྲ་གཅན་གྱིས་མ་སྤྱད་པའི་དབང་གིས་རགས་པར་ན་ཞག་རེ་ལ་ཆུ་ཚོད་རེ་དང༌། ཟླ་བ་རེ་ལ་ཞག་ཕྱེད་རེ། ཟླ་བ་གཉིས་ན་ཞག་གཅིག་རེ་ཆད་པར་འགྱུར་ལ། དེ་ཡང་ཞིབ་མོར་རྩིས་ན་ཚེས་ཞག་རེ་བཞི་ན་ཉིན་ཞག་རེ་གསུམ་དང༌། ཉིན་ཞག་གཅིག་གི་བདུན་བརྒྱ་བདུན་གྱི་ཆ་རེ་ཆད་པ་སྟེ་ཟླ་རྐང་ལ་བུ་ལོན་དང་ཉི་རྐང་ལ་ནོར་དུ་སོང་བས་རགས་པར་ན་ཞག་རེ་ལ་ཆུ་ཚོད་གཉིས་གཉིས་ལྷག་པས་རགས་རྩིས་ཁྱིམ་ཟླ་རེ་ལ་ཚེས་ཞག་རེ་ཙམ་ལྷག་པོར་བྱུང་བ་དེ་ཟླ་བ་རེ་རེ་བཞིན་ཆུ་ཚོད་ཕྱེད་ཕྱེད་སྒྲ་གཅན་གྱིས་མ་སྤྱད་པའི་དོན་གྱིས་ཡིན་ལ། དེ་ཡང་ཞག་རེ་ལ་ཆུ་ཚོད་རེ་ཆད་པའི་ཆུ་ཚོད་དེ་ཆུ་སྲང་དྲུག་ཅུ་ལ་ཆུ་ཚོད་དུ་བྱས་པ་མ་ཡིན་གྱི། ཆུ་སྲང་ང་དྲུག་རྐང་བཅས་ལ་ཆུ་ཚོད་རེར་བྱས་པ་ཡིན་གསུང་ངོ༌། །དེ་དག་ཀྱང་འཕོ་ཆེན་གྱི་མཚམས་ཀྱི་མཚམས་སུ་ཡེ་ཤེས་ཀྱི་རླུང་ང་དྲུག་རྐང་བཅས་རྒྱུ་བའི་དབང་གིས་ཕྱི་ནང་མཐུན་པར་གྱུར་བས་ན་དབུ་མའི་ཡན་ལག་ཏུ་ཤེས་པར་བྱ་སྟེ། དེ་སྐད་དུའང་འགྲེལ་ཆེན་ལས། གང་ཞིག་མ་སྤྱད་ཕྱེད་ཀྱི་ཆུ་ཚོད་ཅེས་པ་ནི་སྒྲ་གཅན་གྱིས་མ་སྤྱད་པའོ། །ཞེས་པ་ནས། ཉིན་ཞག་གཅིག་ལྷག་པ་དེ་དབུ་མའི་ཡན་ལག་ཏུ་རིགས་པར་བྱའོ། །ཞེས་པའི་བར་གསུངས་སོ། །རྩིས་ཀྱི་མན་ངག་ཉིན་བྱེད་སྣང་བ་ལས། མཇུག་རིང་འཆར་བའི་ངེས་པ་བཤད་པའི་སྐབས་ཏེ་བཅུ་གཅིག་པའི་འགྲེལ་པ་འཕྲོས་དོན་དང་བཅས་པའོ། །ཞེས་སྐབས་བསྡུས་སོ།། །།

མཐའ་མའི་འདོན་ཐེངས་།: 17.12.2013 ཉིན། 10:51 AM