སྨན་རྩིས་དྲ་བ། - རྣམ་འགྲེལ་གསེར་གྱི་ཤིང་རྟ།

སྐབས་ཉེར་གཅིག་པ། རེའུ་མིག་སྤེལ་པའི་ཁ་བྱང་བཤད་པ།

བརྗོད་བྱ་སྤེལ་མཁན། རྩོམ་སྒྲིག་པ། (admin) ཟླ་ཚེས། 16.12.2013
རྣམ་འགྲེལ་གསེར་གྱི་ཤིང་རྟ། >> སྐབས་ཉེར་གཅིག་པ། རེའུ་མིག་སྤེལ་བའི་ཁ་བྱང་བཤད་པ།

ད་ནི་སྐབས་ཉི་ཤུ་རྩ་གཅིག་པས་རེའུ་མིག་སྤེལ་བའི་ཁ་བྱང་བཤད་པ་ལ་བསྟན་བཤད་བསྡུ་གསུམ་ལས། དང་པོ་ནི། ཡར་ལོག་བཤད་པའི་རྗེས་དེ་ནས་ལྔ་སྒྲ་གཟའ་ལྔ་ཡི་སོགས་སོ། །གཉིས་པ་ལ་བཞི་སྟེ། ལྔ་བསྡུས་ཀྱི་རེའུ་མིག་སྤེལ་ཚུལ། སྒྲ་གཅན་གྱི་རེའུ་མིག་སྤེལ་ཚུལ། གཟའ་ལྔའི་རེའུ་མིག་སྤེལ་ཚུལ། ཞག་གསུམ་གྱི་བར་ཁྱད་ཀྱི་རེའུ་མིག་སྤེལ་ཚུལ་ལོ། །དང་པོ་ལ་གཉིས་ཏེ། བྱེད་གྲུབ་ཀྱི་བསྐལ་ལི་སྤེལ་ཚུལ་དང༌། ཆ་ཤས་རེའུ་མིག་སྤེལ་ཚུལ་ལོ། །དང་པོ་ལའང་གཉིས་ཏེ། སྤྱི་ནུར་སྒྲུབ་པ་དང༌། སྤེལ་ཚུལ་དངོས་སོ། དང་པོ་ནི། ཐོག་མར་བྱེད་གྲུབ་གང་བྱེད་ཀྱིས་ཉི་མའི་རྐང་འབྲས་སྒྲུབ་པའི་ཆོ་ག་དང༌། དེ་ནས་བྱེད་གྲུབ་སོགས་ཀྱིས་སྤྱི་ནུར་བསྒྲུབ་ལུགས་བསྡུས་དོན་དྲུག་པའི་ཆོ་གའོ། གཉིས་པ་ནི། བསྐལ་ལིའི་རེའུ་མིག་སྤེལ་ཚུལ་ནི། ཞེས་སོགས་སོ། གཉིས་པ་ཆ་ཤས་རེའུ་མིག་ལ་གཉིས་ཏེ། རྐྱང་པ་དང༌། ཁུག་པའོ། དང་པོ་ནི། དེ་ནས་ཆ་ཤས་རེའུ་མིག་སོགས་སོ། གཉིས་པ་ནི། དམར་ནག་འཁོར་མ་བྱ་འདོད་ན་ཞེས་སོགས་སོ། གཉིས་པ་ནི། སྒྲ་གཅན་རེའུ་མིག་སྤེལ་ཚུལ་ནི་ཞེས་སོགས་སོ། གསུམ་པ་ནི། སྒྲ་གཅན་བཤད་པའི་རྗེས་དེ་ནས་གཟའ་ལྔ་ཉིན་ཞག་མའི་རེའུ་མིག་རྒྱ་མཚོ་སྤེལ་ཚུལ་རྗེ་ཟླུམ་པོ་པས་མཛད་པའི་སྦས་དོན་གསལ་བའི་དགོངས་བཞེད་བཞིན་བཤད་ཅེས་ཁས་བླང་ངོ༌། འདི་ལ་གཉིས་ཏེ། དལ་བ་མྱུར་བར་དང་བཅས་པའི་རེའི་མིག་དང༌། མྱུར་དག་གི་རེའུ་མིག་གོ། དང་པོ་ལ་གསུམ་སྟེ། གཟའ་ལྔ་ཐུན་མོང་གི་རེའུ་མིག དྲག་གསུམ་དལ་དག་གི་རེའུ་མིག ཞི་གཉིས་རྐང་འཛིན་གྱི་རེའུ་མིག་གོ། དང་པོ་ནི། དང་པོར་གྲངས་འཛིན་སོགས་ཀྱིས་རེའུ་མིག་གི་བྱ་ར་བཀོད་ལ། དེའི་འོག་ཏུ་རེའུ་མིག་སྟེང་འོག་གསུམ་ཡོད་པའི་གནས་དང་པོར། དེ་འོག་ཉིན་ཞག་རྟག་ལོངས་དེ་སོགས་ཀྱིས་དྲག་གཟའི་རྐང་འཛིན་སྤེལ་ལོ། བར་འོག་གི་རེའུ་མིག་གཉིས་ལ་ལྷག་སངས་ཀྱི་དལ་དག་འགོད་པས། དེ་བསྒྲུབ་པ་ནི། དེ་ནས་ཞི་གཟའི་དལ་དག་ནི་སོགས་ཀྱིས་ཞི་གཉིས་ཀྱི་རྐང་འབྲས་ཀྱི་ཆོ་ག་དང༌། དེ་ནས་ཉིན་ཞག་རྟག་ལོངས་ཞེས་སོགས་ཀྱིས་ཞི་གཉིས་ཀྱི་སྤྱི་ནུར་སྒྲུབ་པ་སྟེ། འདི་ལྟར་ཚན་པ་དང་པོའི་སོགས་ཀྱིས་ལྷག་པའི་སྤྱི་ནུར་དང་ཚན་པ་གཉིས་པའི་སོགས་ཀྱིས་པ་སངས་ཀྱི་སྤྱི་ནུར་སྒྲུབ་པའོ། དེ་ནས་ལྷག་པའི་དོན་དུ་སོགས་དང༌། དེ་ནས་པ་སངས་ཀྱི་དོན་དུ་སོགས་ཀྱིས་ཞི་གཉིས་ཀྱི་དལ་དག་རེའུ་མིག་སྒྲུབ་པའི་ཆོ་གའོ། དེ་ལྟར་ན་ཐུན་མོང་གི་རེའུ་མིག་དེ་ལ་གནས་གསུམ་ཡོད་པའི་གནས་དང་པོ། དྲག་གསུམ་གྱི་རྐང་འཛིན་རེའུ་མིག གནས་བར་པ་ལྷག་པ་དང་འོག་མ་པ་སངས་ཀྱི་དལ་དག་རེའུ་མིག་སྟེ། དེའི་ཕྱིར་དེ་ནི་གཟའ་ལྔ་སྤྱིའི་བསྐལ་ལི་ཡིན་ནོ། གཉིས་པ་ནི། དྲག་གཟའ་གསུམ་གྱི་སོགས་ཏེ། འདི་ལ་གསུམ། དམར། ཕུར། སྤེན་པའི་དལ་དག་རེའུ་མིག་གོ། དང་པོ་ནི། མིག་དམར་ཉིན་ལོངས་སོགས་ཀྱིས་རྐང་འབྲས་དང་མིག་དམར་རྟག་ལོངས་གནས་དྲུག་སོགས་ཀྱིས་སྤྱི་ནུར། དེ་ནས་བཀྲ་ཤིས་སོགས་ཀྱིས་དལ་དག་གི་རེའུ་མིག་སྒྲུབ་པའོ། གཉིས་པ་ཕུར་བུའི་རེའུ་མིག་ནི། ཕུར་བུའི་ཉིན་ལོངས་ཀྱི་རྐང་འབྲས། ཕུར་བུའི་རྟག་ལོངས་སོགས་ཀྱིས་སྤྱི་ནུར། དེ་ནས་གྲངས་འཛིན་སོགས་ཀྱིས་དལ་དག་གི་རེའུ་མིག་སྤེལ་ཚུལ་ལོ། གསུམ་པ་སྤེན་པའི་རེའུ་མིག་ནི། སྤེན་པའི་ཉིན་ལོངས་སོགས་ཀྱི་རྐང་འབྲས། སྤེན་པའི་རྟག་ལོངས་སོགས་ཀྱིས་སྤྱི་ནུར། དེ་ནས་གྲངས་འཛིན་སོགས་ཀྱིས་དལ་དག་གི་རེའུ་མིག་སྤེལ་ཚུལ་ལོ། གསུམ་པ་ཞི་གཉིས་ཀྱི་རྐང་འཛིན་རེའུ་མིག་ནི། དེ་ནས་ཞི་གཉིས་རྐང་འཛིན་གྱི་ཞེས་སོགས་སོ། །ཡང་ཞི་གཉིས་ཀྱི་རྐང་འཛིན་རེའུ་མིག་བསྡུས་པ་ལ་དགའ་ན། རེའུ་མིག་བསྡུས་པ་སྤེལ་འདོད་ན་ཞེས་སོགས་སོ། སྐབས་འདིར་དྲག་གསུམ་གྱི་དལ་དག་ཆ་ཤས་དང་ཞི་གཟའ་གཉིས་ཀྱི་རྐང་འཛིན་ཆ་ཤས་ནི། མིག་དམར་བུག་མིག་ལག་པའི་ཆ་ཞེས་སོགས་སོ། གཉིས་པ་མྱུར་རྐང་གི་རེའུ་མིག་ནི། དལ་དག་དང་རྐང་འཛིན་གྱི་རེའུ་མིག་བཤད་པའི་རྗེས་དེ་ནས་མྱུར་རྐང་གི་རེའུ་མིག་བཤད་ཅེས་ཁས་བླང་ངོ༌། །དང་པོར་རིམ་པའི་སོགས་ཀྱིས་བྱ་ར་ལུགས་འབྱུང་དུ་བཀོད་ལ། དེའི་འོག་ཏུ་གྲངས་འཛིན་ཐིག་འོག་སོགས་ཏེ་རིམ་པའི་རེའུ་མིག་བརྒྱད་བརྒྱ་བཅུ་ཉིད་སྤེལ་ཚུལ་ལོ། འོག་ཏུ་རིམ་མིན་སོགས་ནི། རེའུ་མིག་དེ་རྣམས་ཀྱི་འོག་ཏུ་གྲངས་འཛིན་ནག་པོ་ལུགས་ལྡོག་ཏུ་བྲིས་པས་རིམ་མིན་གྱི་རེའུ་མིག་འགྲུབ་བོ། བཞི་པ་ཞག་གསུམ་གྱི་བར་ཁྱད་ཀྱི་རེའུ་མིག་ལ་གཉིས་ཏེ། ཉིན་ཚེས་བར་ཁྱད་ཀྱི་རེའུ་མིག་དང༌། ཁྱིམ་ཚེས་བར་ཁྱད་ཀྱི་རེའུ་མིག་གོ། དང་པོ་ནི། གཟའ་ལྔ་བཤད་པའི་རྗེས་དེ་ནས་ཉིན་ཚེས་བར་ཁྱད་སོགས་ཏེ། ཐོག་མར་གྲངས་འཛིན་སོགས་ཀྱིས་ཉིན་ཞག་གི་རེ་བཞི་ཆའི་རེའུ་མིག་དང་ཡང་ནི་གྲངས་འཛིན་སོགས་ཀྱིས་རེ་བཞི་ཆའི་རི་མཁའ་རི་ཆའི་རེའུ་མིག་དང༌། ཡང་ཅིག་གཅིག་ནས་སོགས་ཀྱིས་བུག་སོགས་ཀྱི་རེ་བདུན་ཆ་སྤེལ་ཚུལ་ལོ། གཉིས་པ་ཁྱིམ་ཚེས་བར་ཁྱད་ཀྱི་རེའུ་མིག་སྤེལ་ཚུལ་ནི། ཉིན་ཚེས་བར་ཁྱད་ཀྱི་རེའུ་མིག་བཤད་པའི་རྗེས་དེ་ནས་བཅུ་གསུམ་ཆའི་སོགས་ཀྱིས་བཅུ་གསུམ་ཆའི་རེའུ་མིག་དང༌། དེ་ཡི་ལྔ་ཆ་སོགས་ཀྱིས་བཅུ་གསུམ་ཆའི་ལྔ་ཆ་སྤེལ་ཚུལ་ལོ། །དེ་ལྟར་རེའུ་མིག་སྤེལ་ཚུལ་འདི་རྣམས་གཞུང་བཀླགས་པ་ཙམ་གྱིས་གོ་བའི་ཕྱིར་རྒྱས་པར་མ་བཀྲལ་ལོ། །གསུམ་པ་བསྡུ་བ་ལ་གཉིས་ཏེ། དངོས་དང་འབད་པས་སྦྱང་རིགས་པར་གདམས་པའོ། དང་པོ་ནི། དེ་ལྟར་ལྔ་སྒྲ་སོགས་སོ། གཉིས་པ་ནི། རེའུ་མིག་སྤེལ་བའི་ཚུལ་འདི་ལེགས་པར་ཤེས་པར་གྱུར་པ་དེའི་ཚེ་ན་གཟའ་རྣམས་ཀྱི་ཁྱིམ་སོ་སོའི་མ་འདྲེས་པའི་ལོངས་སྤྱོད་ཀྱི་རྣམ་པར་གཞག་པ་རྣམས་དཀའ་བ་མེད་པར་བདེ་བླག་ཏུ་རྟོགས་པར་འགྱུར་བ་དེའི་ཕྱིར་འབད་པས་སྦྱོང་བར་རིགས་ཞེས་གདམས་སོ། རྩིས་ཀྱི་མན་ངག་ཉིན་བྱེད་སྣང་བ་ལས། རེའུ་མིག་སྤེལ་བའི་ཁ་བྱང་བཤད་པའི་སྐབས་ཏེ་ཉེར་གཅིག་པའི་འགྲེལ་པའོ། །ཞེས་སྐབས་བསྡུས་སོ།།

མཐའ་མའི་འདོན་ཐེངས་།: 17.12.2013 ཉིན། 9:53 AM

<< སྔ་མ།

ནང་གསེས་དཀར་ཆག

ཡིག་ཆ་གསར་ཤོས།

ཐོན་ཟོག་ཁྲལ་འབབ་སྡེ་ཚན་གྱིས་ཆེ་བསྟོད་གནང་།

བོད་ཡིག་མིང་བྱང་ལ་འགྱུར་བཅོས་བཏང་བ།

ཅོན་ཏ་ར་སྨན་སྦྱོར་སྡེ་ཚན་དུ་ཆོད་གན་ལས་མི་དྲུག་གི་ས་མིག་གསལ་བསྒྲགས།

བརྟན་བཞུགས་སྔོན་འགྲོའི་རིམ་གྲོར་སྲོག་ཆགས་ཚེ་ཐར་བཏང་བ།

འགྲོ་ཕན་སྨན་རྩིས་ཁང་གི་མིང་དུ་བརྫུས་ཏེ་ནད་པ་བསླུ་བྲིད་བྱེད་པའི་གནས་ཚུལ།

ཁ་ལོ་བ་གཅིག་དང་ཆོད་གན་ལས་མི་དྲུག་གི་ས་མིག་གསལ་བསྒྲགས།

ཆོད་གན་ལས་མི་སྐྱེས་པ་གཉིས་དང་བུད་མེད་གསུམ་གྱི་ས་མིག་གསལ་བསྒྲགས།

ལེའུ་དང་པོ། ཀླད་དོན་གླེང་སློང་བ།

ལེའུ་གཉིས་པ། རླུང་ནད་གསོ་བ།

ལེའུ་གསུམ་པ། མཁྲིས་པའི་ནད་གསོ་པ།

ལེའུ་བཞི་པ། བད་ཀན་གྱི་ནད་བཅོས་པ།

ལེའུ་ལྔ་པ། འདུས་པའི་ནད་གསོ་བ།

ལེའུ་དྲུག་པ། མ་ཞུ་བ་གསོ་བ།

ལེའུ་བདུན་པ། གཅོང་ཆེན་སྐྲན་ནད་བཅོས་པ།

ལེའུ་བརྒྱད་པ། སྐྱ་རྦབ་ཀྱི་ནད་གསོ་བ།