སྨན་རྩིས་དྲ་བ། - མདུན་ངོས།

ས་བདག་འཁྲུག་བཅོས་ཀྱི་ཆོ་ག
བརྗོད་བྱ་སྤེལ་མཁན། རྩོམ་སྒྲིག་པ། (admin) ཟླ་ཚེས། 07.11.2013
མདུན་ངོས། >> གསར་འགྱུར།

ས་བདག་འཁྲུག་བཅོས་ཀྱི་ཆོ་ག

འདི་ཟླའི་ཚེས་༦ ཉིན་བོད་ཀྱི་སྨན་རྩིས་ཁང་གི་ལས་སློབ་ཡོངས་ནས་ཇི་ལྟར་ྋསྐྱབས་རྗེ་རྗོགས་ཆེན་དགའ་ནོར་རིན་པོ་ཆེས་བཀའ་སློབ་ལམ་སྟོན་གནང་བ་བཞིན་དྷ་རམ་ས་ལའི་རི་མགོར་ས་བདག་འཁྲུག་བཅོས་ཀྱི་ཆོ་ག་བསྡུས་པ་ཞིག་གཏོང་གནང་མཛད་སོང་། བོད་ཀྱི་སྨན་རྩིས་ཁང་གི་དབུ་འཛིན་ཕུ་རི་ཚེ་རིང་བཀྲིས་མཆོག་གིས་གཙོས་པའི་ལས་སློབ་བརྒྱ་ལྷག་སྔ་དྲོའི་ཆུ་ཚོད་༣:༣༠ ཙམ་ནས་དབུས་སྨན་རྩིས་ཁང་ནས་ཐོན་ཅིང་། ཆུ་ཚོད་གསུམ་ལྷག་གོམ་བགྲོད་བྱས་ཏེ་དྷ་རམ་ས་ལའི་རི་མགོར་ལས་སློབ་ཕལ་མོ་ཆེ་ཞོགས་པ་སྔ་པོར་ཕེབས་འབྱོར་ཐུབ་པ་བྱུང་སོང་། དེ་ནས་གྲ་སྒྲིག་ཚོགས་ཆུང་ནས་ཞོགས་ཇ་གཏོང་གནང་མཛད་པ་དང་སྔ་དྲོའི་ཆུ་ཚོད་༩:༣༠ ལ་མཆོད་པ་རྒྱས་པར་བཤམས་ཤིང་ས་བདག་འཁྲུག་བཅོས་ཀྱི་ཞལ་འདོན་རྣམས་དུས་ཡུན་ཆུ་ཚོད་ཕྱེད་དང་གསུམ་རིང་སྙན་འཇེབས་ལྡན་པའི་དབྱངས་རྟར་བསྐྱོན་ཏེ་འདོན་གནང་མཛད། དེ་ནས་སྐད་གསང་མཐོན་པོའི་སྒོ་ནས་རྣམ་ཐར་དང་ལྷ་རྒྱལ་བཏང་སྟེ་ས་བདག་འཁྲུག་བཅོས་ཀྱི་ཆོ་ག་ཕྱག་ལེན་ཡོངས་སུ་གྲུབ། དེ་ཉིན་ྋགོང་ས་མཆོག་གི་བླ་གཟའ་དང་ལྷག་དཀར་གྱི་ཉིན་མོ་ཡང་ཡིན་པས་འཛིན་སྐྱོང་གིས་དམར་ཟས་སྤོང་དགོས་པའི་རེ་བསྐུལ་གནང་བ་ལྟར་གོ་སྒྲིག་ཚོགས་ཆུང་ནས་དཀར་ཟས་ཀྱི་དགུང་ཚིགས་སྟབས་བདེ་ཞིག་འདེགས་འབུལ་ཞུས། ཕྱི་དྲོའི་ཆུ་ཚོད་༢:༠༠ཙམ་ནས་ལས་སློབ་ཡོངས་རིམ་བཞིན་སྨན་རྩིས་ཁང་ལ་ཕྱིར་ལོག་གནང་སོང་།