ལེའུ་སོ་གཅིག་པ། སྣ་ནད་གསོ་བ།

དེ་ནས་ཡང་དྲང་སྲོང་རིག་པའི་ཡེ་ཤེས་ཀྱིས་འདི་སྐད་ཅེས་གསུངས་སོ། །ཀྱེ་དྲང་སྲོང་ཆེན་པོ་ཉོན་ཅིག །སྣ་ནད་རྒྱུ་རྐྱེན་དབྱེ་བ་བཅོས་ཐབས་གསུམ།།

རྒྱུ་རྐྱེན་ཟས་དང་སྤྱོད་ལམ་གདོན་རྐྱེན་གྱིས། །འདུ་བ་འཁྲུགས་པས་སྣ་ནད་སྐྱེད་པར་བྱེད།།

དབྱེ་བ་སྣ་བསུབས་འབྲུམ་ཐོར་ཤ་ལུ་དང༌། །རྣག་ཁྲག་འཛག་དང་རྣམ་པ་ལྔར་བཤད་དོ།།

བཅོས་ཐབས་རྣག་དང་ཆུ་སེར་སྣ་འགགས་ན། །དབུགས་འཚུབ་མཚུལ་པ་ཤུ་ལ་སྣ་བཤལ་བཏང༌། །དྲོད་སྨན་སྟར་བུ་ཤིང་མངར་སྦྲང་རྩི་སྦྱར། །གདོང་སྐྲངས་སྟོད་བརྒྱངས་མཚུལ་པ་འགགས་པ་སེལ། །འབྲུམ་ཐོར་བྱུང་ན་ཏི་ཚ་མར་དཀར་བྱུག །དནྡ་དུར་བྱིད་ལྡོང་རོས་ལྕེ་མྱང་ཚྭ། །ཙི་ཏྲ་ཀ་དང་པི་ལིང་མར་དང་སྦྲང༌། །རེང་བུ་སྦྱར་ལ་སྣ་ནང་གཞུག་པར་བྱ། །དེས་མ་སེལ་ན་རྣ་བ་ལྟ་བུར་བཅོས། །སྐམ་ཞིང་ཚ་ན་གུར་ཀུམ་ཞུན་མར་བླུག །སྣ་ལ་འབྲས་བྱུང་སྣ་ནད་ཤ་ལུ་ཡིན། །བྲུད་དང་གཅོད་སྨན་གཏར་ལུམས་སྐེམས་ཀྱིས་བཅོས། །ཕལ་ཆེར་འཚོ་དཀའ་སྔོན་གྱི་ལས་ནད་ཡིན། །ཚད་རོ་རྫོང་ལ་བྲོས་ཏེ་རྣག་འཛག་ན། །སྐྱུགས་རྗེས་རྒྱ་སྐྱེགས་ཤིང་ཀུན་བྱི་ཏང་ག །བུ་རམ་པི་པི་ལིང་དང་ན་ལེ་ཤམ། །ལུག་ཐུག་གཅིན་དང་སྦྱར་བའི་སྣ་སྨན་བཏང༌། །ཡང་ན་ཚ་བ་གསུམ་དང་དུག་མོ་ཉུང༌། །ཟི་ར་བྱི་ཏང་ག་ཡི་ཁུ་བ་བླུག །ཐོང་ཚེར་མགོ་ཤ་རུས་པ་ཀླད་པར་བཅས། །ཟི་ར་དཀར་པོ་ཤིང་ཀུན་བཏབ་ལ་བསྡུ། །སྒ་དང་པི་པི་ལིང་གཉིས་འཚོས་ཁར་གདབ། །ལྟོ་སྟོང་བསྐོལ་བཏང་འབྲས་བུའི་སྨན་མར་བྱ། །སྣ་ནས་ཁྲག་འཛག་དེ་རིགས་རྣམ་པ་གསུམ། །སེར་ལ་སླ་བ་ཀླད་པ་ལས་འབྱུང་སྟེ། །སྨིན་དབྲག་མེས་བསྡམ་རྟ་སྦངས་སྣ་སྨན་བཏང༌། །སྨུག་ནག་སྣེ་བཞི་ལས་བབས་སྣེ་ས་བཅིང༌། །ནུ་མ་རླིག་པ་ཟ་འོག་སྐུད་པས་བཀྱིག །དམར་ལ་དྭངས་པ་རྩ་ཁ་བྱེ་བ་ཡིན། །སྣ་ཡི་དབུགས་ཀྱིས་གར་སླེབ་དཔུང་འཛུམ་བསྲེག །སྣ་རུ་གསུར་བདུག་ཐང་དང་ལྡེ་གུ་བཏང༌། །ཀུན་ལ་མཁན་སྐྱའམ་སྤྲུ་མའི་རེང་བུ་ཡི། །མགོ་ལ་གུར་ཀུམ་དོམ་མཁྲིས་ཟབ་འགྲོན་ཐལ། །ལྡེ་གུ་བྱུགས་ལ་ཕུགས་སུ་སླེབ་པར་བརྫང༌། །སྣ་ཁྲག་ཕལ་ཆེར་ཁྲག་འཕེལ་ལས་འབྱུང་བས། །རྩེ་ཆུང་གཏར་ཏེ་འོལ་ཁ་བསྒྱུར་བར་བྱ། །ཞེས་གསུངས་སོ།།

བདུད་རྩི་སྙིང་པོ་ཡན་ལག་བརྒྱད་པ་གསང་བ་མན་ངག་གི་རྒྱུད་ལས་སྣ་ནད་གསོ་བའི་ལེའུ་སྟེ་སོ་གཅིག་པའོ།། །།


 

མཐའ་མའི་འདོན་ཐེངས་།: 20.12.2022 ཉིན། 4:10 PM