ལེའུ་སུམ་ཅུ་པ། གསོ་ཐབས་དངོས་བསྟན་པ། 

གསོ་ཐབས་གཉིས་བསྟན་པའི་ལེའུ་གསུངས་ཟིན་པའི་མཇུག་དེ་ཉིད་ནས་ཡང་དྲང་སྲོང་ཆེན་པོ་རིག་པའི་ཡེ་ཤེས་ཀྱིས་འདི་སྐད་ཅེས་གསུངས་སོ། །དེ་ཡང་ཀྱེ་ཞེས་བོས་ནས་དྲང་སྲོང་ཆེན་པོ་ཡིད་ལས་སྐྱེས་ལེགས་པར་ཉོན་ལ་ཡིད་ལ་ཟུངས་ཤིག་དང༌། གོང་དུ་ནད་ཀྱི་རྣམ་པ་སྤྱིའི་གསོ་ཐབས་བཤད་ནས་འདིར་ཁྱད་པར་དུ་ཉེས་པ་གསུམ་པོ་སོ་སོར་བཅོས་པའི་ཐབས་ནི་འདི་ལྟར་ངས་བཤད་པར་བྱའོ།།

ཚ་གྲང་གཉིས་ཀའི་ཟུང་དུ་འཇུག་པ་རླུང་གི་ནད་གསོ་བ་ལ་ཟས་སྤྱོད་སྨན་དཔྱད་བཞིའི་དང་པོ་ཟས་ཀྱི་ནང་ཚན་ནས་རླུང་ནད་མཐའ་དག་ལ་ཏིལ་གྱི་མར་ཁུའི་བཏུང་བ་འཐུང་བ་ཉིད་མཆོག་ཏུ་གྱུར་པ་ཡིན་ཏེ། གཞན་ཡང་བུ་རམ་དང་ཆང་དང་མར་རྙིང་པ་དང༌། ལུག་ཤ་ཡིབ་པ་དང་འཕྱི་བའི་ཤ་དང་རྟ་དང་བོང་བུ་དང་མི་ཤ་རྣམས་དང་སྒོག་པ་དང་བཙོང་ལ་སོགས་པ་ལྕི་སྣུམ་འཇམ་དྲོ་དང་ལྡན་པའི་ཁ་ཟས་ཀྱི་སྒོ་ནས་བཅོས་པར་བྱའོ། །དེ་བཞིན་དུ་སྤྱོད་ལམ་ཡང་མུན་ཁུང་ཤིན་ཏུ་དྲོ་བའི་གནས་སུ་བསྡད་པ་དང༌། ཡིད་དུ་འོང་བའི་གྲོགས་ཀྱི་ཚིག་སྙན་པ་ཉན་ཞིང་བདེ་བར་གཉིད་ལོག་པ་དང་གོས་དྲོ་བར་བགོ་སྟེ་གནས་པའི་སྒོ་ནས་བཅོས་པ་དང༌། སྨན་དུ་ལུག་གི་སྲེ་ལོང་གཞུག་ཏོ་སོག་ཡུ་སྟེ་རུས་བཅུད་གསུམ་གྱི་ཁུ་བ་དང༌། མན་ངག་རྒྱུད་དུ་གསུངས་པའི་ལུག་མགོ་རྙིང་པའི་མགོ་ཁྲོལ་གྱི་སྦྱོར་བ་བྱ་ཞིང༌། ཤ་མར་ཆང་དང་བུ་རམ་རྙིང་པ་སྟེ་བཅུད་བཞིའི་བསྡུས་ཐང་དང༌། ཤིང་ཀུན་སྒ་དང་རྒྱམ་ཚྭ་གསུམ་གྱི་བསྡུས་ཐང་བཏང་ལ། ཕྱེ་མ་ནི་མན་ངག་རྒྱུད་དུ། ཕྱེ་མ་ཛཱ་ཏི་ཤིང་ཀུན་ཁ་རུ་ཚྭ། །ཙབས་རུ་ཚྭ་དང་རྒྱམ་ཚྭ་ཚ་བ་གསུམ། །ཞེས་སོགས་ཀྱི་ཅུར་ནིས་བསྟེན་པ་དང༌། དེ་བཞིན་དུ་ཙག་བཅད་ཀྱི་མར་ལ་སྦྱར་བའི་དཀར་འདོན་དང༌། ལུག་ཤའི་ཁུ་བར་སྦྱར་བའི་ཤ་འདོན་དང་སྒོག་སྐྱ་བཙོས་པ་ལ་སྦྱར་བའི་སྒོག་འདོན་དང་ཆང་ཞིམ་པ་ནར་སོན་གྱི་སྣུམ་ཉེ་ལ་སྦྱར་བའི་སྐྱུར་འདོན་ཏེ་འདོན་བཞིའི་སྦྱོར་བ་དང༌། ཛཱ་ཏི་དང་སྒོག་སྐྱ་དང་བཙན་དུག་དང་རུས་ཆེན་དང་འབྲས་བུ་གསུམ་དང་རྩ་བ་ལྔ་རྣམས་ཀྱི་སྨན་མར་མན་ངག་རྒྱུད་ནས་བཤད་པ་ལྟར་སྦྱར་བར་བྱ་ཞིང༌། མདོར་ན་རོ་མངར་སྐྱུར་ལན་ཚྭ་གསུམ་དང་ནུས་པ་སྣུམ་ཞིང་དྲོ་བའི་སྒོ་ནས་བཅོས་པ་དང༌། ཁྱད་པར་དུ་མར་རྙིང་ལ་སོགས་པ་དྲོད་བཅུད་ཀྱི་འཇམ་རྩི་བཏང་བ་ཉིད་བསྔགས་པ་ཡིན་ནོ། །དེ་བཞིན་དུ་དཔྱད་དུའང་ལོ་མར་རྙིང་པའི་བསྐུ་མཉེ་བྱ་ཞིང་གོ་སྙོད་སྣུམ་ལྡན་ལ་སོགས་པའི་དུགས་ཀྱིས་གཟེར་བའི་གནས་རྣམས་སུ་བདུགས་པ་དང༌། སྤྱི་གཙུག་དང་ཨན་སྟོང་ལ་སོགས་པའི་རླུང་གསང་རྣམས་སྤྲ་བའི་མེས་མནན་པ་སྟེ། དེ་ལྟ་བུའི་སྒོ་ནས་གསོ་བ་ལ་འབད་པར་བྱའོ།།

མཁྲིས་པའི་ནད་འདི་ལའང་ཟས་སྤྱོད་སྨན་དཔྱད་བཞིའི་དང་པོ་ཟས་ལ་བ་རའི་མར་གསར་ཕྱུང་མ་ཐག་པ་དེ་ཉིད་མཆོག་ཏུ་གྱུར་པ་ཡིན་ཏེ། དེ་བཞིན་དུ་བ་ལང་རི་དྭགས་ཀྱི་ཤ་གསར་དང༌། གངས་དང་རྫའི་ཆུ་བསིལ་མ་དང་ཇ་བསྐོལ་ལེགས་པ་དང༌། བ་རའི་ཞོ་དར་སྐྱབས་དང་ཁུར་མང་གི་ཚོད་མ་དང་ཆག་ཚེ་དང་ཕྱེ་ཐུག་ཚྭ་སྡོར་མེད་པའི་སླ་ཞིང་ཚོས་པ་ལ་སོགས་པ་བསིལ་བའི་ཟས་ཀྱི་སྒོ་ནས་བཅོས་པར་བྱའོ། །དེ་བཞིན་དུ་སྤྱོད་ལམ་ཡང་རླུང་བསེར་བུ་ཕོག་པའི་ཤིང་གྲིབ་དང་ནེའུ་གསིང་བསྟེན་ཞིང༌། ཡང་ན་ཆུ་འགྲམ་ལ་སོགས་པ་བསིལ་བའི་གནས་སུ་མ་འཁྲུགས་པར་དལ་བར་བསྡད་ལ་ལུས་ལ་ག་བུར་དང་ཨུ་ཤི་ར་ལ་སོགས་པའི་དྲི་བཟང་པོ་བསིལ་ཞིང་ཡིད་དུ་འོང་བས་བྱུགས་ལ་གནས་པར་བྱས་ལ། སྨན་དུ་མན་ངག་རྒྱུད་དུ་བཤད་པའི་ཏིག་ཏ་ལ་སོགས་པ་བསིལ་བའི་སྔོ་སྨན་དང༌། བོང་ང་དཀར་པོ་ལ་སོགས་པ་བསིལ་བའི་ཐང་སྨན་དང༌། ཅུ་གང་ལ་སོགས་པ་བསིལ་བའི་ལ་སྨན་རྣམས་ཐུན་མོང་དུ་སྦྱར་བ་སྟེ་རྣམ་པ་གསུམ་མོ། །ལ་སྨན་གྱི་སྦྱོར་བ་དེ་ལའང་ཚད་སྟོབས་ཤིན་ཏུ་ཆེ་བ་ལ་ག་བུར་གྱིས་གཙོ་བྱས་ནས་སྦྱར། ཚད་སྟོབས་འབྲིང་ལ་ཙནྡན་དཀར་པོ། སྟོབས་ཆུང་བ་ལ་གི་ཝང་གིས་གཙོ་བྱས་པའི་སྦྱོར་བ་དེ་ཚད་སྟོབས་དང་སྦྱར་བ་གཅེས་སོ། །མདོར་ན་རོ་མངར་ཁ་བསྐ་བ་དང་ནུས་པ་བསིལ་བའི་སྨན་གྱིས་བཅོས་དགོས་ཤིང༌། ཁྱད་པར་དུ་མཁྲིས་པ་བཤལ་ལས་མི་འདའ་བའི་ཕྱིར་མངར་བའི་བཤལ་སྨན་གྱིས་སྦྱང་བ་ཉིད་བསྔགས་ལ་དེ་བཞིན་དུ་དཔྱད་དུའང་རྔུལ་དབྱུང་བའི་ཆོ་ག་དང་ཆུ་བསིལ་གྱི་འཁྲུལ་འཁོར་བསྐོར་བ་དང༌། གང་རྒྱས་ཀྱི་རྩ་ལ་གཏར་ཞིང་བསིལ་སྨན་དང་སྦྱར་བའི་ཆུ་བསིལ་གྱིས་བདུག་པ་ལ་སོགས་པའི་སྒོ་ནས་གསོ་བར་བྱའོ།།

བད་ཀན་གྱི་ནད་ལའང་ཟས་ལ་སོགས་པ་བཞིའི་སྒོ་ནས་བཅོས་དགོས་པའི་དང་པོ་ཟས་ནི་སྦྲང་རྩི་དཀར་པོ་ཉིད་མཆོག་ཏུ་གྱུར་པ་ཡིན་ཏེ། དེ་བཞིན་དུ་ཉ་དང་ལུག་དང་གཡག་རྒོད་དེ་བྱང་འབྲོང་དང་ཡུལ་འབྲོང་དང་གཡི་དང་བྱ་རྒོད་རྣམས་ཀྱི་ཤ་རྙིང་པ་དང༌། འབྲུ་སྟེ་ནས་རྙིང་པའི་ཟན་དྲོན་དང་ཆང་ཞིམ་ནར་ཕྱིན་པ་དང༌། ཆུ་བསྐོལ་དང་སྒ་བཏབ་པའི་ཆུ་བསྐོལ་ལ་སོགས་པ་ཡང་ཞིང་རྩུབ་པ་དང་དྲོ་ལ་ཆུང་བ་སྟེ་འགྲངས་ཆེས་པ་མ་ཡིན་པར་འཇུ་སླ་ཞིང་ཉུང་ཟད་ཀྱི་ཟས་ཀྱིས་བཅོས་པར་བྱའོ། །དེ་བཞིན་སྤྱོད་ལམ་ཡང་མེ་དང་ཉི་མས་བསྲོ་ཞིང་གོས་དྲོ་བར་གཡོགས་ལ་སྐམ་ས་རྣམས་སུ་ལུས་སེམས་གཉིས་ཀ་རྩོལ་བས་བྱ་བ་ལ་ལོངས་སྤྱོད་ཅིང་ཉིན་གཉིད་མི་ལོག་པ་གཅེས་ལ། སྨན་ལའང་རྒྱམ་ཚྭ་དང་ན་ལེ་ཤམ་ལ་སོགས་པ་ལན་ཚྭ་དང་ཚ་བའི་སྨན་གྱི་བསྡུས་ཐང་བཏང་ལ། ཕྱེ་མ་ལའང་སེ་འབྲུ་དང་ད་ལིས་ཀྱིས་གཙོ་བྱས་པ་དང་ཐལ་སྨན་གྱི་སྦྱོར་བ་སྦྱར་ལ། མདོར་ན་རོ་ཚ་སྐྱུར་དང་ནུས་པ་ཡང་རྩུབ་དང་རྣོ་བ་བསྟེན་པ་དང༌། ཁྱད་པར་དུ་བད་ཀན་སྐྱུགས་ཀྱིས་དྲངས་ཞེས་པ་ལྟར་རྣོ་ལ་རྩུབ་པའི་སྐྱུགས་སྨན་ཉིད་གཙོ་བོར་བསྔགས་པ་ཡིན་ནོ། །དེ་བཞིན་དུ་དཔྱད་དུའང་ཚྭ་དང་བོང་བ་སྟེ་སོ་ཕག་ལ་སོགས་གོང་བུར་འགྲིལ་བ་དང་གཡི་སྤྱང་སོགས་ཀྱི་སྤུ་དུགས་བསྟེན་ཞིང༌། ཤིན་ཏུ་རྒྱས་པའི་བད་ཀན་ལ་ནི་མེ་བཙའ་དང་ཚ་ཐུར་གྱིས་ལྷག་མ་ལུས་པར་བཅོས་ཏེ་གསོ་བར་བྱའོ།།

གསེར་འོད་དམ་པ་ལས། རླུང་གི་བདག་ཉིད་ལ་ནི་བཅུད་ཀྱིས་གསོ། །བཀྲུ་སྨན་གྱིས་ནི་མཁྲིས་པ་སེལ་བར་བྱེད། །བད་ཀན་ཚིགས་སུ་བབས་ན་སྐྱུག་སྨན་བཏང༌། །ཞེས་གསུངས་པ་ལྟར་མདོར་ཧྲིལ་གྱིས་དྲིལ་ན་རླུང་ནད་ཐམས་ཅད་འཇམ་རྩི་དང་སྣུམ་བཅུད་ཀྱི་སྒོ་ནས་བཅོས་ཤིང༌། མཁྲིས་པའི་ནད་ཐམས་ཅད་ལ་བཤལ་དང་བསིལ་སྨན་གྱིས་བཅོས་ལ། བད་ཀན་གྱི་ནད་ཐམས་ཅད་ལ་སྐྱུགས་དང་དྲོད་དང་ཡང་རྩུབ་ཀྱི་སྨན་གྱིས་བཅོས་པར་བྱའོ། །རིག་པ་དེས་མཚོན་ནས་རླུང་དང་མཁྲིས་པར་ལྡན་པ་ལ་ཤ་གསར་དང་མར་གསར་ལ་སོགས་པ་བསིལ་བཅུད་དང་ལྡན་པའི་ཟས་དང་སྨན་གྱི་བཅོས་བསྟེན་པར་བྱ་ཞིང༌། དེ་བཞིན་དུ་བད་མཁྲིས་ལྡན་པའི་ནད་ལ་ཆག་ཚེ་དང་ཕྱེ་ཐུག་ལ་སོགས་པ་བསིལ་ལ་ཡང་བའི་ཟས་སྨན་གྱིས་བཅོས་ལ། བད་རླུང་ལྡན་པའི་ནད་ལ་ལུག་ཤ་དང་ཆང་ནར་སོན་ལ་སོགས་པ་དྲོ་ལ་བཅུད་པའི་ཟས་དང་སྨན་གྱིས་བཅོས་པར་བྱའོ། །ཚུལ་དེས་མཚོན་ནས་རླུང་མཁྲིས་བད་ཀན་གསུམ་འདུས་པའི་ནད་ལ་གསུམ་གའི་གཉེན་པོ་གཅིག་གཤེད་གཅིག་གིས་མི་བྱེད་པ་རྣམས་སྦྱར་དགོས་ཏེ། རི་དྭགས་ཀྱི་ཤ་དང་སྐམ་སའི་འབྲུ་ལ་སོགས་པ་བསིལ་བཅུད་ཡང་བ་དང་ལྡན་པའི་ཟས་སྨན་གྱི་སྒོ་ནས་བཅོས་པར་བྱའོ། །དེ་ལྟར་རྐྱང་པ་དང་ལྡན་འདུས་ཀྱིས་དབྱེ་བ་སོ་སོའི་བཅོས་ཚུལ་གྱི་དབང་དུ་བྱས་ཀྱི། དེ་དག་ཐམས་ཅད་ཀྱང་མདོར་བསྡུ་ན་ཚ་གྲང་གཉིས་སུ་མ་འདུས་པ་མེད་པས་ན་ཚ་བ་ཐམས་ཅད་གཉེན་པོ་བསིལ་གྱི་སྒོ་ནས་བཅོས་ཤིང༌། གྲང་བའི་ནད་གཞི་ཐམས་ཅད་ཀྱང་བད་ཀན་གྱི་བཅོས་ཚུལ་ལྟར་གཉེན་པོ་ཚ་བས་བཅོས་དགོས་ལ། རླུང་ནི་དེ་གཉིས་ཀའི་རྗེས་སུ་འཇུག་ཅིང་ངོ་བོ་རྩུབ་ཡང་དུ་གནས་པས་ན་ཚ་གྲང་གང་དང་འབྲེལ་བའི་གཉེན་པོའི་སྟེང་དུ་སྣུམ་དྲོ་དང་ལྡན་པའི་སྨན་གྱིས་བཅོས་པར་བྱའོ་ཞེས་གསུངས་སོ།།

བདུད་རྩི་སྙིང་པོ་ཡན་ལག་བརྒྱད་པ་གསང་བ་མན་ངག་གི་རྒྱུད་ལས་དུམ་བུ་གཉིས་པ་བཤད་པའི་རྒྱུད་ཀྱི་གསོ་ཐབས་དངོས་བསྟན་པའི་ལེའུ་སྟེ་སུམ་ཅུ་པའོ།། །།

མཐའ་མའི་འདོན་ཐེངས་།: 05.09.2023 ཉིན། 11:33 AM