ལེའུ་ཞེ་ལྔ་པ། ཡི་ག་འཆུས་པ་གསོ་བ།

དེ་ནས་ཡང་དྲང་སྲོང་རིག་པའི་ཡེ་ཤེས་ཀྱིས་འདི་སྐད་ཅེས་གསུངས་སོ། །ཀྱེ་དྲང་སྲོང་ཆེན་པོ་ཉོན་ཅིག ཡི་ག་འཆུས་པའི་ནད་ལ་རྒྱུ་རྐྱེན་དང༌། །དབྱེ་བ་རྟགས་དང་བཅོས་ཐབས་རྣམ་པ་བཞི།།

རྒྱུ་རྐྱེན་ཟས་སྤྱོད་གདོན་གྱིས་འདུ་བ་འཁྲུགས། །ལྕེ་སྙིང་ལ་ཞེན་ཡི་ག་འཆུས་པར་འགྱུར།།

དབྱེ་བ་རླུང་མཁྲིས་བད་ཀན་འདུས་པ་བཞི།།
དེ་རྟགས་རླུང་གྱུར་རོ་བསྐ་མཁྲིས་པ་ཁ། །བད་ཀན་རོ་མངར་འདུས་པ་རོ་དང་བྲལ།།

གསོ་ཐབས་ཡིད་ལ་འཐད་པའི་ཟས་གང་ཡང༌། །གང་ལ་ཕན་པའི་སྨན་དང་སྦྱར་ལ་བྱིན། །ཕྱི་ནང་ཁྲུས་སྦྱང་འབྲས་བུ་འོ་མར་སྦྱར། །དཀར་བའི་ཟས་བསྟེན་བསྐ་བའི་ཆུས་ཁ་བཀྲུ། །ཡིད་ལ་འཐད་པའི་དུ་བ་སྣ་རུ་རྔུབ། །བ་ལུ་ཕོ་བ་རིས་སྒ་པི་པི་ལིང༌། །རིམ་བསྐྱེད་ཤིང་ཚ་སུག་སྨེལ་ཀ་ར་སྦྱར། །ཕོ་བའི་དྲོད་སྐྱེད་ཡི་ག་འབྱེད་པར་བྱེད། །ལ་ལ་ཕུད་དང་ད་ཏྲིག་སྟར་བུ་སྒ། །སེ་འབྲུ་རྒྱ་ཤུག་ཀ་ར་འུ་སུ་དང༌། །ཤིང་ཚ་ཁ་རུ་ཚྭ་དང་པི་པི་ལིང༌། །གོ་སྙོད་ན་ལེ་ཤམ་སྦྱར་ཡི་ག་འབྱེད༌།  སུག་སྨེལ་ཤིང་ཚ་ནཱ་ག་པུཥྤ་དང༌། །ཚ་བ་གསུམ་གྱི་ཕྱེ་མས་ཡིག་འཆུས་སེལ། །ཚ་བ་ཤས་ཆེ་ཅུ་གང་བདེ་བྱེད་ཤིས། །བྱེ་བྲག་ཤུ་དག་ཀ་ར་ནིམ་པའི་ཆུས། །སྐྱུགས་རྗེས་ཆང་དྭངས་སྐར་ཆུ་སྦྲང་ཆང་བླུད། །འདུས་པའི་ནད་ལ་ཀུན་གྱིས་རློན་བྱས་ལ། །ཤུ་དག་ནིམ་པ་བུ་རམ་ཆུ་སྦྱར་བླུད། །ཅེས་གསུངས་སོ།།

བདུད་རྩི་སྙིང་པོ་ཡན་ལག་བརྒྱད་པ་གསང་བ་མན་ངག་གི་རྒྱུད་ལས་ཡི་ག་འཆུས་པ་གསོ་བའི་ལེའུ་སྟེ་བཞི་བཅུ་རྩ་ལྔ་པའོ།། །།

མཐའ་མའི་འདོན་ཐེངས་།: 20.12.2022 ཉིན། 4:35 PM