ལེའུ་ཞེ་བདུན་པ། སྐྱིགས་བུའི་ནད་གསོ་བ།

དེ་ནས་ཡང་དྲང་སྲོང་རིག་པའི་ཡེ་ཤེས་ཀྱིས་འདི་སྐད་ཅེས་གསུངས་སོ། །ཀྱེ་དྲང་སྲོང་ཆེན་པོ་ཉོན་ཅིག སྐྱིགས་བུའི་ནད་ལ་རྒྱུ་རྐྱེན་དབྱེ་བ་དང༌། །རྟགས་དང་བཅོས་ཐབས་རྣམ་པ་བཞི་ཡིས་བསྟན།།

རྒྱུ་རྐྱེན་ཟས་སྤྱོད་གདོན་གྱིས་རླུང་འཁྲུགས་པས། །གྱེན་རྒྱུའི་བུ་ག་འགགས་ཏེ་སྐྱིགས་བུ་འབྱུང༌།།

དབྱེ་བ་ཟས་བྱུང་ཕྲན་ཚེགས་ཟུང་འབྱུང་དང༌། །ཆེན་པོ་ཟབ་མོ་ཞེས་བྱ་རྣམ་ལྔར་བཤད།།

དེ་རྟགས་ཟས་བྱུང་རིངས་སྟབས་ཟོས་རྗེས་འབྱུང༌། །ཕྲན་ཚེགས་ཟས་ཟོས་རྗེས་འབྱུང་མོད་ལ་ཆད། །ཟུང་འབྱུང་ཚིགས་རིང་ཞུ་དུས་གཉིས་བསྟུད་འབྱུང།༌།  ཆེན་པོ་ཤུགས་དྲག་མིག་ཧར་ཚིག་མི་ཐོན། །ཟབ་མོ་ལྟེ་བའི་འོག་ནས་བསྟུད་འབྱུང་གསང། །ཉམ་ཆུང་ཟུངས་ཟད་གློ་རྡོལ་རྒས་པ་ལ། །སྐྱིགས་བུ་ཆེན་པོ་ཤུགས་དྲག་བྱུང་བ་སྤང༌།།

བཅོས་ཐབས་དང་པོ་འབྲུ་མར་བསྐུ་མཉེ་བྱ། །ཚབས་ཆེ་བ་ལ་སྐྱུགས་ཁྲུས་འཇམ་པོས་སྦྱང༌། །དབུགས་མི་བདེར་བཤད་དུ་བ་རྔུབ་པར་བྱ། །ནུ་ཞོ་ཙན་དན་སྦྲང་རྩི་སྦྱར་བའམ། །སྦྲང་རྩི་ནས་ཟན་བྲུན་སྦྱར་སྣ་སྨན་བཏང༌། །བྲ་བོ་བྱི་བྲུན་བརྔོས་པའི་སྟེང་དུ་ཉལ། །གྲང་རྗེས་མར་བྱུགས་ལག་པའི་སྙིང་རྩ་མནན། །གཅིག་བགྲང་དབུགས་ཐུབ་བསྡམས་པས་རླུང་ཁྱིམས་སེལ། །མ་ཚོར་འཇིགས་སྐྲག་དངངས་པའི་ཆོ་ག་བྱ། །ཆད་དཀའ་སྤྱི་གཙུག་མཚོགས་སྒོ་སྐེ་སྟོང་དང༌།  །ཚིགས་པ་བརྒྱད་པ་ནང་ལོང་འཕར་རྩ་བསྲེག །ཅེས་གསུངས་སོ།།

བདུད་རྩི་སྙིང་པོ་ཡན་ལག་བརྒྱད་པ་གསང་བ་མན་ངག་གི་རྒྱུད་ལས་སྐྱིགས་བུའི་ནད་གསོ་བའི་ལེའུ་སྟེ་བཞི་བཅུ་རྩ་བདུན་པའོ།། །།

མཐའ་མའི་འདོན་ཐེངས་།: 20.12.2022 ཉིན། 4:38 PM