ལེའུ་བརྒྱད་ཅུ་པ། གཟའི་གདོན་ནད་བཅོས་པ།

དེ་ནས་ཡང་དྲང་སྲོང་རིག་པའི་ཡེ་ཤེས་ཀྱིས་འདི་སྐད་ཅེས་གསུངས་སོ། །ཀྱེ་དྲང་སྲོང་ཆེན་པོ་ཉོན་ཅིག །གཟའ་ཡི་གདོན་ལ་འཛིན་དུས་བརྟག་ཐབས་དང༌། །བསྲུང་བ་བཅོས་ཐབས་ཕྱིར་མི་ལྡོག་པའོ།།

འཛིན་དུས་ཚེས་བཞི་བརྒྱད་དམ་བཅུ་གཅིག་དང༌། །བཅོ་ལྔ་བཅོ་བརྒྱད་ཉི་ཤུ་གཉིས་དང་ལྔ། །ཉི་ཤུ་དགུ་དང་རྒྱུ་དུས་བརྒྱད་ལ་འཛིན།།

བརྟག་ཐབས་སྤྱི་དང་ཁྱད་པར་སྤང་བླང་བརྟག །སྤྱི་རྟགས་གཞོགས་བཤལ་མིག་རྩ་གྲུང་བ་དང༌། །ཁ་ལུགས་ཁ་སླེ་ངུ་དང་དགོད་པར་བྱེད། །ཁྱད་པར་བརྟག་པ་མེ་གཟའ་ཆུ་གཟའ་གཉིས། །མེ་གཟའ་གཞོགས་གཡས་ལ་ཕོག་ལྕེ་གཡས་ཐུང༌། །ཚ་བ་ཆེ་ཞིང་སེན་མོ་གཞོབ་རོག་འོང༌། །ཆུ་གཟའ་གཡོན་ལ་ཕོག་ཅིང་ལྕེ་གཡོན་ཐུང༌། །ལུས་ཀུན་དྲོད་དང་བྲལ་ཞིང་ཆུ་རྒྱུས་གྱོང་། །སྤང་བླང་བརྟག་པ་ཉི་ཤུ་དགུ་ལ་ཟིན། །ཕོག་མ་ཐག་ཏུ་སྐྱུག་ཅིང་ལུགས་པ་དང༌། །སྙིང་གར་ཆུ་ལྕག་རྒྱབ་པས་མི་དངངས་དང༌། །མིག་འཛུམ་མི་ཤེས་དྲུག་ཅུ་ཡར་འདས་པ། །གསོས་ཀྱང་སོས་པར་མི་འགྱུར་སྤང་བར་བྱ།།

བསྲུང་བ་རང་དང་ནད་པ་སྲུང་བ་གཉིས། །རང་གི་སྲུང་བ་སྐེ་ཚེ་དཀར་ཁྲ་མེན། །རྨིགས་པའི་ཤ་ལ་སྔགས་བཟླས་ལུས་ལ་བཅང༌། །ཨོཾ་བ་ར་ཙ་ཀྲ་རཱ་ཧུ་ལ་སྭཱ་ཧཱ།  ཨོཾ་ཧཱུཾ་སུ་ལི་ཧཱུཾ་སུ་ལི་ཏིང་བྲི་དུ་སུ་སུ་མེ་མེ་ཤིག་ཤིག་སྭཱཧཱ། །ཨོཾ་སྟུམ་པོ་ལི་སྟུམ་པོ་ལི་ཏིང་བྷི་མ་ཏུམ་བྷེ་སུ་སུ་མེ་མེ་ཤིག་ཤིག་སྭཱ་ཧཱ། །བློ་ལ་མ་བརྗེད་གནས་པས་གཟའ་གདོན་ཐུབ། །ནད་པའི་སྲུང་བ་རིང་བསྲེལ་དཀར་ཁྲ་མེན། །རྨ་བྱ་བྱ་རོག་སྙིང་ཁྲག་ལུས་ལ་བཅང།༌།  གུ་གུལ་དཀར་ནག་ཡུགས་སའི་དོར་རྟ་ལ། །ཐུམ་པོ་བྱས་ལ་གཡོན་གྱི་ངོས་སུ་གདགས། །བཟང་དྲུག་གླ་རྩི་སྒོག་ཐལ་མར་གསར་བྱུག །རྒྱུ་དུས་ནད་པའི་མལ་དུ་ཕུག་རོན་གཞུག །ཨོཾ་ཏྲི་ཁྱེ་ད་བཾ་ཧཱུཾ། །སྡོད་སའི་གྱང་ངམ་ཐོག་ལ་བྲིས་པས་ཐུབ།།

བཅོས་ཐབས་བཙོན་དུ་བཟུང་དང་དངངས་སུ་གཞུག །ཟས་དང་སྤྱོད་ལམ་ཁྲུས་ཆུ་གཟའ་ཆོག་བྱ། །ཟིན་པའི་མོད་ལ་བཙོན་དུ་བཟུང་བྱ་སྟེ། །ཡུགས་སའི་ཞབས་མས་ནད་པའི་མགོ་ཕུར་ལ། །ཀེ་ཏ་བཟླས་ཤིང་གུ་གུལ་དུ་བས་བདུག །གུ་གུལ་ཆུར་སྦྱངས་སྔགས་བཏབ་ཁོང་དུ་བཏང༌། །སྒོག་ཐལ་གངས་ཐིགས་རྡོ་མཁྲིས་དྲི་ཆུ་སྦྱར། །ལུས་ལ་བྱུགས་པས་འཁོར་ལ་འཕྲོ་མི་འགྱུར། །དེ་ནས་དངངས་སུ་གཞུག་པ་མེ་གཟའ་ལ། །ཉི་གྲིབ་མཚམས་སུ་ནད་པ་ཙོག་པུར་བཞག །སྟེང་ནས་ཆུ་རྫ་བདུན་གྱིས་བསྟུད་ལ་བྲན། །རྒྱབ་ནས་དུང་འབུད་བྲོས་ན་སྔར་ཤུལ་དབུལ། །ཆུ་གཟས་ཟིན་ན་ཐ་མ་མེ་ཡིས་བསྐོར། །བྲོས་ན་མདའ་བཀང་གྲི་ཐོགས་རྒྱོབ་སོད་བསྡིགས། །དེས་ཀྱང་མ་སོས་ནད་པ་མཐོང་ཀར་བཞག །འོག་ཏུ་སོག་འབོལ་སྟེང་དུ་གོས་བཏིང་ལ། །དུང་འབུད་པ་དང་བསྐྱུར་བ་དུས་གཅིག་བྱ། །ཁ་ཟས་ཆང་དང་མར་རྙིང་ཤ་ཁྲག་སྤང༌། །སྦྲང་དང་མར་གསར་ཞོ་དར་དཀར་ཆོས་བསྟེན། །སྤོས་དཀར་སྦྲང་དང་སྦྱར་བ་ཁོང་དུ་བཏང༌། །སྤྱོད་ལམ་མི་གཙང་གྲིབ་འཛེམ་མེ་ཉི་སྤང༌། །མི་ཡིས་མི་ལབ་མི་ཅོལ་སྙན་ཚིག་སྨྲ། །ཁྲུས་ཆུ་ག་བུར་གི་ཝཾ་བཟང་པོ་དྲུག །ཙན་དན་གླ་རྩི་སྤོས་དཀར་དྲི་ཆུས་བཀྲུ། །ཡང་ན་དེ་རྣམས་སྒོག་སྐྱ་ནུས་ལྡན་བསྲེགས། །ཆང་དང་སྦྱར་ལ་ལུས་ཀུན་ཡང་ཡང་བཀྲུ། །རྣམ་འཇོམས་ལ་སོགས་ཁྲུས་ཆུས་བཀྲུ་བ་བསྔགས། །གཟའ་ཆོག་གཏོར་མ་བྱིན་དང་བྱད་དགྲོལ་གཉིས། །གང་ཡང་དང་པོ་ཀླུ་ཆོག་རྒྱབ་བཅོས་ལ། །དེ་རྗེས་དཀར་གཏོར་ཞིག་དང་དམར་གཏོར་ཞིག །སྔགས་དང་ཕྱག་རྒྱས་བྱིན་བརླབས་གུ་གུལ་གྱིས། །ནད་པར་བདུག་ཅིང་ཀེ་ཏ་མང་དུ་བཟླས། །ཨོཾ་ཀེ་ཏ་ཀེ་ཏ་སྭཱཧཱ། །དེ་རྗེས་སྔགས་ཀྱིས་གཟའ་ལ་གཏོར་མ་བྱིན། །སྨྲང་གིས་བཀྲོལ་ལ་གཏོར་མ་སྐྱེལ་དུ་བཏང༌། །དེ་ཤུལ་ནད་པ་དེ་དང་རྒྱབ་སྤྲད་ལ། །སྟེའུ་ཤུག་པ་ལ་བརྡེག་གཏམ་ཁ་དྲི། །དེ་ཡི་ནུབ་མོ་གཟའ་ཡི་བྱད་དགྲོལ་ཏེ། །སླ་ང་ཆུ་ཡིས་བཀང་པའི་ཁ་གདང་དུ། །གཟའ་བརྒྱད་གཟུགས་ལ་ཁ་དོག་སོ་སོར་བསྒྱུར།  །(ཤར་དུ་གཟའ་ཉི་མ་སྐུ་མདོག་དམར་པོ་ཕྱག་ན་པདྨ་བསྣམས་པ། །ལྷོར་ཕུར་བུ་སེར་པོ་པུ་ཏི།  ནུབ་ཏུ་ཟླ་བ་དཀར་པོ་ཀུ་མུ་ད།  བྱང་དུ་ལྷག་པ་སེར་པོ་ཨུཏྤལ།  ཤར་ལྷོར་མིག་དམར་པོ་མེ་དཔུང༌།  ལྷོ་ནུབ་ཏུ་རཱ་ཧུ་ལ་ནག་པོ་བུམ་པ།  ནུབ་བྱང་དུ་པ་སངས་དཀར་པོ་པདྨ། །བྱང་ཤར་དུ་སྤེན་པ་སྔོན་པོ་དབྱུག་པ་བསྣམས་པའོ།) །ཁ་གདངས་ཆུ་ཡི་ནང་དུ་བསྟན་ལ་བཞག །རང་རང་མིང་དང་སྙིང་པོ་བྲིས་ལ་གླན། །ནད་པ་བྱད་ཐག་བཏགས་ལ་གཟུགས་དང་སྦྲེལ། །སླ་ངའི་ཕྱོགས་བཞིར་མར་མེ་བཞི་བཏང་ལ། །ཨོཾ་ཀེ་ཏ་ཀེ་ཏ་རཱ་ཧུ་ལ་སྭཱཧཱ། །བརྒྱ་རྩ་བཟླས་ལ་བྱད་བཀྲོལ་བྱད་ཐག་བཅད།  ཡག་ཤཾ་ཕཊ།  དུར་ཤཾ་ཕཊ། །སེ་ཤཾ་ཕཊ།  ཕག་ཤཾ་ཕཊ།  ཕེ་ཤཾ་ཕཊ།  ཕེར་ཤཾ་ཕཊ།  ཤར་ཤཾ་ཕཊ།  ཏྲག་ཤཾ་ཕཊ།  ཙ་ཤཾ་ཕཊ།  བརྒྱ་རྩ་བཟླས་ཤིང་ཉི་མ་ཟླ་བ་དང༌། །མིག་དམར་ལྷག་པ་ཕུར་བུ་པ་ཝ་སངས། །སྤེན་པ་རཱ་ཧུ་ལ་བརྒྱད་སྨྲང་གིས་བཀྲོལ། །བྱད་ཐག་བཅད་དེ་ཆུ་ཡི་ནང་དུ་བསྐྱུར། །རྫ་སྣོད་བྱོ་ལ་ཐོ་རངས་ཆུ་གཞུང་བསྐྱལ། །རྒྱུ་དུས་བརྒྱད་ལ་གཟའ་ཆོག་ཐེབས་རེ་བྱ།།

མི་ལྡོག་ཐབས་ལ་ཟིན་ནས་ཞག་བདུན་ནས། །ཀླུ་བརྒྱད་བྱས་ཏེ་ཟིན་དུས་རྒྱུ་ཕྱོགས་སུ། །བོང་བུ་ཕུག་རོན་གླུད་དུ་བྱས་ཏེ་བཏང༌། །ནད་པ་སོས་རྗེས་ཕ་ཝཾ་ཆོ་ལོང་དང་། །དཀར་ཁྲ་མེན་དང་བཟླས་ཡུངས་སྐེ་རུ་གདགས། །དེ་ཡིས་ཕྱིར་མི་ལྡོག་པར་ངེས་པ་ཡིན། །ཞེས་གསུངས་སོ།།

བདུད་རྩི་སྙིང་པོ་ཡན་ལག་བརྒྱད་པ་གསང་བ་མན་ངག་གི་རྒྱུད་ལས་གཟའི་གདོན་ནད་བཅོས་པའི་ལེའུ་སྟེ་བརྒྱད་ཅུ་པའོ།། །།

མཐའ་མའི་འདོན་ཐེངས་།: 21.12.2022 ཉིན། 10:17 AM