སྨན་རྩིས་དྲ་བ། - ཕྱི་མ་རྒྱུད།

ལེའུ་བདུན་པ། སྨན་མར་གྱི་སྡེ་ཚན་བསྟན་པ།

བརྗོད་བྱ་སྤེལ་མཁན། རྩོམ་སྒྲིག་པ། (admin) ཟླ་ཚེས། 06.02.2011
ཕྱི་མ་རྒྱུད། >> ལེའུ་བདུན་པ། སྨན་མར་གྱི་སྡེ་ཚན་བསྟན་པ།



ལེའུ་བདུན་པ། སྨན་མར་གྱི་སྡེ་ཚན་བསྟན་པ།

དེ་ནས་ཡང་དྲང་སྲོང་རིག་པའི་ཡེ་ཤེས་ཀྱིས་འདི་སྐད་ཅེས་གསུངས་སོ། །ཀྱེ་དྲང་སྲོང་ཆེན་པོ་ཉོན་ཅིག །སྨན་མར་སྡེ་ཚན་ཚ་སེལ་གྲང་སེལ་གཉིས།།

ཚ་སེལ་ཏིག་ཏ་ཧོང་ལེན་བ་ཤ་ཀ །སྤང་རྩི་ཀྱི་ལྕེ་ཁུ་བ་ཕྱུངས་པ་ཡི། །དྭངས་མ་བ་མཛོའི་འོ་མ་མར་གསར་ལ། །སྦྱར་བའི་མར་ཁུར་གུར་ཀུམ་གེ་སར་གསུམ། །ཀ་ར་སྦྲང་སྦྱར་མིག་སེར་སྐྱ་རྦབ་དང༌། །ཆུ་སེར་ལྤགས་ནད་ཚད་རྙིང་རླུང་ལྡན་འདོན། །ཏིག་ཏ་ཀྱི་ལྕེ་བ་དང་སུམ་ཅུ་ཏིག །བ་ལེ་ཀ་དང་འབྲས་བུ་གསུམ་གྱི་མར། །མཆིན་མཁྲིས་སྙིང་གི་ཚ་བ་རྙིངས་པ་སེལ། །ཏིག་ཏ་ནིམ་པ་ཧོང་ལེན་པ་ཏོ་ལ། །སྐྱེར་པ་བྱི་ཚེར་ཀྱི་ལྕེ་པར་པ་ཏ། །བསྐོལ་ཁུར་གླ་སྒང་རྩ་མཁྲིས་དུག་མོ་ཉུང༌། །ཙན་དན་པི་པི་ལིང་རྣམས་ཕྱེ་མར་སྦྱར། །དེ་ལ་མར་ཕྱུངས་སྦྲང་སྦྱར་མཛེ་ནད་དང༌། །ཤ་བཀྲ་མེ་དབལ་ཁོང་འབྲས་མཚན་བར་རྡོལ། །གཞང་འབྲུམ་སྐྱ་རྦབ་སྐོམ་དད་མགོ་འཁོར་སེལ། །ཏིག་ཏ་གསེར་གྱི་མེ་ཏོག་བ་ཤ་ཀ །སྐྱེར་པའི་རྩ་བ་བྲག་ཞུན་བ་ལེ་ཀ །ཀྱི་ལྕེ་པར་པ་ཏ་དང་སུམ་ཅུ་ཏིག །བྱི་ཚེར་དུག་མོ་ཉུང་དང་པུ་ཤེལ་རྩེ། །འབྲས་བུ་གསུམ་གྱི་མར་ལ་ཀ་ར་སྦྱར། །ཚད་པ་རྙིངས་རྙོགས་རྣམས་ཀྱི་བདུད་རྩི་ཡིན། །དེ་དག་ཏིག་ཏ་རབ་འབྲིང་ཐ་མར་རོ། །འབྲས་བུ་གསུམ་བསྡུས་འོ་མ་མར་ལ་བསྡུ། །ཆུ་ཆོད་དྭངས་མ་ལྕགས་ཕྱེ་ཨ་བ་སྦྲུལ། །གུར་ཀུམ་གོ་སྙོད་མདུང་རྩེ་གསལ་བྱེད་དགུ། །མིག་འགྲིབས་རབ་རིབ་དམར་ཚག་སྐམ་ཚག་སེལ། །སེང་ལྡེང་ཀྱི་ལྕེ་འབྲས་བུ་གསུམ་གྱི་མར། །སྦྲང་རྩི་ཆུ་སེར་སྨན་གསུམ་པི་པི་ལིང༌། །སྦྱར་བ་སེང་ལྡེང་དགུ་ཡི་སྨན་མར་ཏེ། །མཛེ་ནད་དྲེག་གྲུམ་ལུས་ལ་རྒྱས་པ་སེལ། །སེང་ལྡེང་གུ་གུལ་ཐལ་ཀ་རྡོ་རྗེ་དང༌། །སོ་མ་ར་ཛ་ཀྱི་ལྕེ་ཨ་གར་ནག །སྐྱེར་ཤུན་མར་ལ་སྦྲང་སྦྱར་སེང་ལྡེང་བདུན། ཆུ་སེར་རྩ་ཚིགས་ལྤགས་ལ་རྒྱས་པ་དང༌། །དྲེག་དང་གྲུམ་བུ་མཛེ་ནད་སེལ་བར་བྱེད། །ཨ་རུ་ཆང་སྦངས་ཤ་དང་བསིལ་གསུམ་དང༌། །ཤིང་ཚ་ཤིང་མངར་བཅའ་སྒ་གེ་སར་གཉིས། །ག་དུར་མར་ཁུ་སྦྲང་སྦྱར་འབྲི་རྐང་མར། །གློ་ནད་རྒྱས་དང་རུས་རླུང་སྙིང་ཚད་སེལ། །བ་གསར་དམར་ཟལ་ཆུ་དང་ལྕི་བ་དང༌། །འོ་མ་ཞོ་དང་མར་ལ་སྦྲང་རྩི་སྦྱར། །བ་ཡི་རྣམ་ལྔའི་སྨན་མར་མཆིན་ནད་རྙིང༌། །ཚ་བ་རླུང་ལྡན་ཆུ་སེར་སྐྱ་རྦབ་འཇོམས། །ཨ་གར་ཙན་དན་གུ་གུལ་སྙིང་ཞོ་ཤ །རྒུན་འབྲུམ་མར་ལ་ཀ་རས་ཁ་བླངས་པ། །ཞོ་ཤའི་སྨན་མར་སྙིང་གི་ཚད་པ་འཇོམས༌། སྲོ་ལོ་ཨ་རུའི་མར་ལ་ཅུ་གང་དང༌། །ཤིང་མངར་སྦྲང་སྦྱར་སྲོ་ལོའི་སྨན་མར་ཏེ། །གློ་རྣག་འབྱམས་དང་གློ་ཡི་ཚད་པ་སེལ། །ཙན་དན་དཀར་དམར་སླེ་ཏྲེས་དུག་མོ་ཉུང༌། །གླ་སྒང་ཀབྲསྤྱ་ཀ་རི་ཀྱི་ལྕེ་བ། །ཧོང་ལེན་སྤང་སྤོས་སྐྱེར་ཤུན་སྐྱུ་རུ་ར། །ཤུག་པའི་མར་ལ་བསིལ་གསུམ་ཀ་ར་སྦྱར། །ཙན་དན་མར་གྱིས་གློ་སྙྀང་མཆིན་ཚད་དང༌། །རིམས་སྨྱོ་སྟོང་སྐྱུགས་ཚིགས་གཞི་སྐྲངས་པ་སེལ། །འབྲི་མོག་ཚོས་བཙོད་ཨ་རུ་ར་ཡི་མར། །ཀ་ར་སྦྱར་བས་གློ་ཚད་རྣག་ཁྲག་སྐེམ། །གུར་ཀུམ་མཚལ་དང་གེ་སར་རྣམ་པ་གསུམ། །མཁྲིས་པ་སྣ་ཚོགས་མར་ལ་ཀ་ར་སྦྲང༌། །རྩ་རུལ་བུ་ག་དགུ་ནས་ཁྲག་འཛག་གཅོད།།

གྲང་སེལ་ཨ་རུ་བར་སྐྱུར་ཕྱེད་ཆ་སྐྱུང༌། །བསྡུས་ཁུ་དྭངས་མ་མར་ཕྱུང་བུ་རམ་སྦྱར། །ཛཱ་ཏི་ཁ་རུ་ཚྭ་དང་པི་པི་ལིང༌། །སུག་སྨེལ་བཅའ་སྒ་ཁ་ཚར་བཏབ་པ་ཡི། །འབྲས་བུ་གསུམ་གྱི་སྨན་མར་རྒས་ཀ་སྲ། །མིག་དང་རྣ་བ་སོ་དང་སྣ་ཡི་ནད། །མགོ་ནད་རྩ་བྱེར་རྣག་འབྱམས་རླུང་ནད་སེལ། །ཁྱད་པར་སྙིང་ལ་རླུང་ཞུགས་འཇོམས་པའི་མཆོག །ར་མཉེ་ཉེ་ཤིང་ལྕ་བ་བ་སྤྲུ་བ། །གཟེ་མ་འབྲི་མར་རྩ་བ་ལྔ་ཡི་མར། །ཚྭ་སྣ་གསུམ་དང་སླེ་ཏྲེས་བཟང་པོ་གསུམ། །བཅའ་སྒ་པི་པི་ལིང་དང་བུ་རམ་སྦྱར། །མཁལ་མའི་གྲང་ནད་རླུང་ཚབས་སེལ་བར་བྱེད། །འབྲས་བུ་གསུམ་དང་རྩ་བ་ལྔ་བསྲེས་པ། །འབའ་སམ་ཞེས་བྱ་སྟོད་སྨད་ཀུན་ལ་བསྔགས། །འབའ་སམ་དེ་ནང་ད་བྱིད་ལུག་ཐུག་འབྲས། །མར་ལ་ཅོང་ཞི་བཅའ་སྒ་པི་པི་ལིང༌། །སླེ་ཏྲེས་རྒྱམ་ཚྭ་སུག་སྨེལ་བྲེ་ག་དང༌། །བུ་རམ་སྦྱར་བ་ད་བྱིད་སྐྱིན་གོར་ཏེ། །རོ་ཙ་མཁལ་ནད་ཟ་ཁུ་འདོད་ཉམས་སེལ། །སྒོག་སྐྱ་ཨ་རུ་སྒ་ཡི་སྨན་མར་ལ། །རྒྱམ་ཚྭ་ཁ་རུ་ཚྭ་དང་པི་པི་ལིང༌། །སུག་སྨེལ་བུ་རམ་བཏབ་པས་ད་རྒན་དང༌། །རྒྱུ་ལོང་མཁལ་རྐེད་ནད་དང་རླིག་རླུགས་སེལ། །སྒོག་སྐྱ་སྲང་བརྒྱད་འབྲི་མར་ཆ་མཉམ་སྦྱར། །བཅུ་གཉིས་ནས་ཀྱི་གསེབ་ཏུ་ནུས་པ་བསྐྱེད། །རླུང་ནད་མ་ལུས་ཀུན་སེལ་བཅུད་ལེན་འགྱུར། །བ་སྤྲུ་པི་པི་ལིང་རྩ་འབྲི་མར་སྦྱར། །མོ་གཤམ་བུ་རྙེད་མཆོག་ཏུ་སྐྱིགས་བུ་སེལ། །སེ་འབྲུ་འུ་སུ་དོང་གྲ་ཙི་ཏྲ་ཀ །པི་པི་ལིང་གི་མར་དང་བུ་རམ་སྦྱར། །བཟང་པོ་ལྔ་ཡི་སྨན་མར་བད་རླུང་རྒྱས། །སྐྱ་རྦབ་གཞང་འབྲུམ་མཆེར་ནད་དབུགས་མི་བདེ། །མེ་དྲོད་སྐྱེད་ཅིང་ལུས་ཤ་རྒྱས་པར་བྱེད། །བུད་མེད་བུ་མེད་ལ་ཡང་བུ་རྙེད་འགྱུར། །གཟེ་མ་ཆང་སྦངས་ཚད་ལྡན་ཆུར་བསྡུས་པའི། །མར་ལ་ཁ་རུ་ཚྭ་དང་ཚ་བ་གསུམ། །རྒྱུ་ལོང་སྦོ་འཁྲོག་མཁལ་རླུང་གཟེར་བ་འཇོམས།།

དེ་སོགས་སྨན་མར་མཐའ་དག་སྦྱར་བའི་ཐབས། །འཚོས་པར་བཙོས་ལ་ཁུ་བ་ཡང་ཡང་གདོན། །ཁུ་ཕྱིན་དྭངས་མ་ཆུ་བྲེ་གསུམ་དུ་བསྡུས། །དེ་ལ་བཞོས་ཐོག་འོ་མ་བྲེ་བཞི་བླུག །དཀྲུག་ཅིང་བཙོས་པས་ཆུ་དེ་འོ་མར་སྟིམ། །དེ་ལ་ཚ་སེལ་བ་ར་མཛོ་ཡི་མར། །གྲང་སེལ་འབྲི་དང་ལུག་མར་རྙིང་པ་གཞུག །འོ་མ་མར་ལ་ཐིམ་པར་བསྡུས་བྱས་ཏེ། །ཆུ་ཆོད་དྭངས་སྙིགས་བྱེ་ནས་མཛུབ་མོས་ཚུགས། །མེར་བཅུག་སྒྲ་མེད་ཚིགས་མ་དྲིལ་དུ་བཏུབ། །ཆུ་ཆོད་ཚད་ཡིན་ཐལ་ན་ནུས་པ་འཚིག །མ་ཆོད་ཕོ་བས་མི་ཆུན་ནུས་པ་ཆུང༌། །ཚད་ལྡན་ཕོག་ལ་ཁུ་བ་གུད་དུ་བཞུར། །དེ་ལ་ཁ་ཚར་སྨན་གདབ་མངར་གསུམ་སྦྱར། །འདྲེས་པར་དཀྲུགས་ལ་ཐོ་རངས་ཁམ་རེ་བཏང༌། །རླན་གྲང་བསེར་བུ་འཇུ་དཀའ་དྲག་ཤུལ་སྤང༌། །སྨན་མ་ཞུ་ན་རྒྱམ་ཚྭ་བཞི་ཐང་བཏང༌། །སྨན་ཟད་རྗེས་ལ་ཟས་ཀྱིས་ལུས་ཟུངས་གསོ། །ཞེས་གསུངས་སོ།།

བདུད་རྩི་སྙིང་པོ་ཡན་ལག་བརྒྱད་པ་གསང་བ་མན་ངག་གི་རྒྱུད་ལས་སྨན་མར་གྱི་སྡེ་ཚན་བསྟན་པའི་ལེའུ་སྟེ་བདུན་པའོ།། །།


 

མཐའ་མའི་འདོན་ཐེངས་།: 22.12.2022 ཉིན། 11:14 AM

<< སྔ་མ།

ནང་གསེས་དཀར་ཆག

ཡིག་ཆ་གསར་ཤོས།

ཐོན་ཟོག་ཁྲལ་འབབ་སྡེ་ཚན་གྱིས་ཆེ་བསྟོད་གནང་།

བོད་ཡིག་མིང་བྱང་ལ་འགྱུར་བཅོས་བཏང་བ།

ཅོན་ཏ་ར་སྨན་སྦྱོར་སྡེ་ཚན་དུ་ཆོད་གན་ལས་མི་དྲུག་གི་ས་མིག་གསལ་བསྒྲགས།

བརྟན་བཞུགས་སྔོན་འགྲོའི་རིམ་གྲོར་སྲོག་ཆགས་ཚེ་ཐར་བཏང་བ།

འགྲོ་ཕན་སྨན་རྩིས་ཁང་གི་མིང་དུ་བརྫུས་ཏེ་ནད་པ་བསླུ་བྲིད་བྱེད་པའི་གནས་ཚུལ།

ཁ་ལོ་བ་གཅིག་དང་ཆོད་གན་ལས་མི་དྲུག་གི་ས་མིག་གསལ་བསྒྲགས།

ཆོད་གན་ལས་མི་སྐྱེས་པ་གཉིས་དང་བུད་མེད་གསུམ་གྱི་ས་མིག་གསལ་བསྒྲགས།

ལེའུ་དང་པོ། ཀླད་དོན་གླེང་སློང་བ།

ལེའུ་གཉིས་པ། རླུང་ནད་གསོ་བ།

ལེའུ་གསུམ་པ། མཁྲིས་པའི་ནད་གསོ་པ།

ལེའུ་བཞི་པ། བད་ཀན་གྱི་ནད་བཅོས་པ།

ལེའུ་ལྔ་པ། འདུས་པའི་ནད་གསོ་བ།

ལེའུ་དྲུག་པ། མ་ཞུ་བ་གསོ་བ།

ལེའུ་བདུན་པ། གཅོང་ཆེན་སྐྲན་ནད་བཅོས་པ།

ལེའུ་བརྒྱད་པ། སྐྱ་རྦབ་ཀྱི་ནད་གསོ་བ།