ལེའུ་བདུན་ཅུ་པ། མཚན་བར་རྡོལ་བ་གསོ་བ།

དེ་ནས་ཡང་དྲང་སྲོང་རིག་པའི་ཡེ་ཤེས་ཀྱིས་འདི་སྐད་ཅེས་གསུངས་སོ། །ཀྱེ་དྲང་སྲོང་ཆེན་པོ་ཉོན་ཅིག མཚན་བར་རྡོལ་ལ་རྒྱུ་རྐྱེན་དབྱེ་བ་དང༌། །རྟགས་དང་བཅོས་ཐབས་རྣམ་པ་བཞི་ཡིས་བསྟན།།

རྒྱུ་ནི་སྟན་སྲབ་ཙོག་པུར་འདུག་པ་དང༌། །བཞོན་སྟན་རླན་སྟེང་ཡུན་རིང་འདུག་ལས་འབྱུང༌།།

དབྱེ་བ་རྐྱང་པ་ལྡན་འདུས་གསུམ་དུ་བཤད།།
དེ་རྟགས་མཚན་དབྲག་འབྲུམ་ཐོར་ཆུ་སེར་འཛག །སྨིན་ནས་རྣག་ཁྲག་སྲིན་འཛག་འཚོར་མི་འདོད། །ཞི་ཡང་སླར་ལྡང་བཤང་གཅི་ཁུ་ཁྲག་འཛག །རླུང་གྱུར་ཁ་མང་ལྦུ་ཅན་སླ་བ་འཛག །མཁྲིས་པ་དམར་ཚ་བད་ཀན་ལས་གྱུར་གཡའ། །རླུང་མཁྲིས་དམར་མཆེད་བད་རླུང་སྨིན་དཀའ་ནག།བད་མཁྲིས་ཚ་སྐྲངས་འདུས་པ་ནད་ཚབས་ཆེ།།

གསོ་ཐབས་གསར་དུས་གཏར་ཞིང་ཐོར་པ་བརྟོལ། །རྟ་སྦངས་དུགས་བྱ་ནི་རུ་ཧ་ཡིས་དྲང༌། །རྙིངས་ནས་ལྟོས་སྦྱངས་ཆུ་ཚན་ནང་དུ་སྤྱིང༌། །འབྲས་གསུམ་བྱི་ལའི་རུས་པ་རྨ་ལ་བྱུག །བྱི་ཏང་ག་དང་ར་གསུམ་པི་པི་ལིང༌། །ཙི་ཏྲ་ཀ་དང་སྦྲང་རྩི་མར་སྦྱར་བཟའ། །སླེ་ཏྲེས་སུག་སྨེལ་བྱི་ཏང་དུག་མོ་ཉུང༌། །བ་རུ་ཨ་རུ་སྐྱུ་རུ་སྤོས་དཀར་རྣམས། །རིམ་པས་བསྐྱེད་ལ་སྦྲང་སྦྱར་བཟའ་བར་བྱ། །དུག་ཉུང་པི་པི་ལིང་དང་ཙི་ཏྲ་ཀ །བྱི་ཏང་ག་རྣམས་འབྲས་བུ་གསུམ་གྱི་ཕྱེད། །ཀུན་དང་སྤོས་དཀར་མཉམ་སྟེ་སྦྲང་སྦྱར་བཟའ། །གུ་གུལ་པི་པི་ལིང་དང་འབྲས་བུ་གསུམ། །ཤིང་ཚ་སུག་སྨེལ་སྦྲང་རྩི་སྦྱར་བ་བཏང༌། །སྨན་གྱིས་ཞི་དཀའ་བཅད་དེ་བསྲེག་པར་བྱ། །ཟས་དང་སྤྱོད་ལམ་འདུ་བའི་རིགས་དང་བསྟུན། །ཞེས་གསུངས་སོ།།

བདུད་རྩི་སྙིང་པོ་ཡན་ལག་བརྒྱད་པ་གསང་བ་མན་ངག་གི་རྒྱུད་ལས་མཚན་བར་རྡོལ་བ་གསོ་བའི་ལེའུ་སྟེ་བདུན་ཅུ་པའོ།། །།

མཐའ་མའི་འདོན་ཐེངས་།: 21.12.2022 ཉིན། 9:55 AM