ལེའུ་བཅུ་གཅིག་པ། ནད་ཀྱི་མཚན་ཉིད་བསྟན་པ། 

དེ་ནས་ཡང་དྲང་སྲོང་རིག་པའི་ཡེ་ཤེས་ཀྱིས་འདི་སྐད་ཅེས་གསུངས་སོ། །ཀྱེ་དྲང་སྲོང་ཆེན་པོ་ཉོན་ཅིག །ཉེས་པའི་མཚན་ཉིད་འཕེལ་ཟད་འཁྲུགས་པ་གསུམ། །འཕེལ་ཟད་ནད་ཟུངས་དྲི་མ་རྣམ་གསུམ་སྟེ། །དེ་ལ་རྒྱུ་དང་མཚན་མ་རྟགས་བསྟན་པའོ།།

དང་པོ་ཉེས་པ་འཕེལ་དང་ཟད་པའི་རྒྱུ། །ཟས་སྤྱོད་མི་འདོད་སློང་དང་མི་འཕྲོད་འཕྲོད། །སྤངས་བྱིན་དེ་དང་དེས་འཕེལ་ཟད་པར་འགྱུར། །གཉིས་པ་ལུས་ཀྱི་མེ་དྲོད་རང་གནས་འདུག །ཆ་ཤས་ལུས་ཟུངས་ཀུན་ལ་གནས་པ་དེ། །བྲི་དང་འབར་བས་འཕེལ་དང་ཟད་པར་འགྱུར། །དང་པོས་ཕྱི་མ་རྒྱས་དང་འགྲིབ་བྱེད་ཡིན། །དྲི་མ་ཐོགས་དང་ཤིན་ཏུ་འབྱུང་ལས་ཤེས། །དེ་རྟགས་རླུང་འཕེལ་སྐེམ་ནག་དྲོད་ལ་དགའ། །ལུས་འདར་ལྟོ་བ་སྦོ་ཞིང་བཤང་བ་སྲི། །སྨྲ་མང་མགོ་འཁོར་སྟོབས་གཉིད་དབང་པོ་ཉམས། །མཁྲིས་པ་འཕེལ་བས་བཤང་གཅི་ལྤགས་མིག་སེར། །བཀྲེས་སྐོམ་ལུས་ཚ་གཉིད་ཆུང་འཁྲུ་བར་བྱེད། །བད་ཀན་འཕེལ་བས་དྲོད་ཉམས་ཟས་མི་འཇུ། །ལུས་ལྕི་མདོག་དཀར་ཁོང་སྙོམ་ཡན་ལག་ལྷོད། །མཆིལ་མང་ལུད་པ་གཉིད་ཆེ་དབུགས་མི་བདེ། །དྭངས་མ་འཕེལ་བས་བད་ཀན་དང་འདྲ་ལ། །ཁྲག་འཕེལ་མེ་དབལ་ཁོང་འབྲས་མཆེར་པའི་ནད། །མཛེ་སྐྲན་ཁྲག་མཁྲིས་ནད་དང་མིག་སེར་དང༌། །རྙིལ་ནད་བསྐྱོད་དཀའ་མིག་དང་གཅིན་ལྤགས་དམར། །ཤ་འཕེལ་ལྦ་བ་རྨེན་བུ་ཤ་རྒྱས་འགྱུར། །ཚིལ་འཕེལ་ངལ་དང་ནུ་མ་གསུས་ཚིལ་སྐྱེ། །རུས་པ་འཕེལ་བས་རུས་ལྷག་སོ་ལྷག་འབྱུང༌། །རྐང་འཕེལ་ལུས་ལྕི་མིག་གཡུང་ཚིགས་ཁ་སྦོམ། །ཁུ་འཕེལ་ཁུ་བའི་རྡེ་འགྱུར་བུད་མེད་དད། །བཤང་འཕེལ་ལུས་ལྕི་ལྟོ་སྦོ་རྒྱུ་མ་འཁྲུག གཅིན་འཕེལ་ཆུ་སོར་ཟུག་ཅིང་མ་གཅིས་སེམས། །རྔུལ་འཕེལ་རྔུལ་ཆེ་དྲི་ལྡོག་ལྤགས་ནད་འབྱུང༌། །ཕྲ་མོ་འཕེལ་བས་ལྕི་ཞིང་གཡའ་འདྲུལ་བྱེད།།

རླུང་ཟད་རྩོལ་ཆུང་སྨྲ་ཉམས་ལུས་མི་བདེ། །དྲན་པ་མི་གསལ་བད་ཀན་འཕེལ་རྟགས་འབྱུང༌། །མཁྲིས་ཟད་དྲོད་མདོག་ཉམས་པས་གྲང་དང་ནག །བད་ཀན་ཟད་པས་རང་གི་གནས་སྟོངས་ཤིང༌། །མགོ་འཁོར་སྙིང་འདར་ཚིགས་མཚམས་ལྷོད་པར་འགྱུར། །དྭངས་མ་ཟད་པས་ཤ་སྐམ་ཟས་མིད་དཀའ། །ལྤགས་རྩུབ་སྒྲ་ཆེར་མི་བཟོད་ན་བར་འགྱུར། །ཁྲག་ཟད་རྩ་ལྷོད་ལྤགས་རྩུབ་བསིལ་སྐྱུར་དད། །ཤ་ཟད་ལྷུ་ཚིགས་ན་ཞིང་རུས་ལྤགས་འབྱར། །ཚིལ་ཟད་གཉིད་ཆུང་ཤ་སྐམ་སྔོ་སྐྱར་འགྱུར། །རུས་པ་ཟད་པས་སྐྲ་འབྱི་སོ་སེན་ཕྱུང༌། །རྐང་ཟད་སྦུབས་སྟོང་མགོ་འཁོར་མིག་འགྲིབ་འགྱུར། །ཁུ་བ་ཟད་པས་ཁྲག་འབྱུང་འཚིག་གམ་སེམས། །བཤང་ཟད་རྒྱུ་མའི་ནང་དུ་སྒྲ་བཅས་འཁྱིལ། །གྱེན་དུ་འགྲོ་ཞིང་རྩིབ་ལོགས་སྙིང་ག་ན། །གཅིན་ཟད་མདོག་འགྱུར་སྲི་དང་ཉུང་ངུར་འགྱུར། །རྔུལ་ཟད་ལྤགས་འགས་བ་སྤུ་འགྲེང་དང་འབྱི། །ཕྲན་བུ་རང་གནས་སྟོངས་དང་ཡང་ལས་ཤེས། །ལུས་ཟུངས་དྲི་མ་ལ་ནི་བརྟེན་པའི་ཕྱིར། །འཕེལ་བསྐྱེད་ཟད་པས་སྟོབས་ལ་གནོད་པ་ཡིན། །མདངས་ནི་སེམས་ལ་སྡུག་བསྔལ་གྱིས་ཟད་དེ། །དངངས་རིད་ཉམ་ཆུང་མི་དགའ་གཟི་མདངས་ཉམས། འཚོ་བྱེད་འོ་མ་ཤ་ཁུ་དེ་སྨན་ཡིན།།

འཁྲུགས་རྟགས་རླུང་གི་རྩ་ནི་སྟོང་ལ་རྐྱལ། །ཆུ་ནི་ཆུ་འདྲ་དྭངས་ལ་ལོག་རྗེས་སླ། །འགྲོ་འདོད་ཤུས་འདེབས་ཤེས་པ་ཡང་ལ་འཕྱོ། །མགོ་བོ་ཟི་འཁོར་རྣ་བ་འུར་ལ་འཁྲོག །ལྕེ་སྐམ་དམར་རྩུབ་ཁ་རོ་བསྐ་བ་བྲོ། །གཟེར་འཕོ་གྲང་འདར་འགུལ་ཁྱབ་ཟུག་དང་སྙོམ། །རེངས་འཁུམས་བྱེ་ཆག་འབྱིན་དང་དཀྲིས་སྙམ་བྱེད། །འགུལ་ན་ཟུག་ཆེ་སྤུ་བརྩེ་ཕྲུམ་སེར་ཁྱེར། །གཉིད་མེད་གཡལ་འདར་རྐྱོང་འདོད་ཚིག་པ་ཟ། །དཔྱི་རྐེད་རུས་ཚིགས་མ་ལུས་བརྡུངས་སྙམ་བྱེད། །ལྟག་པ་བྲང་དང་མུར་འགྲམ་ཟུག་ཅིང་གཟེར། །རླུང་གསང་རྣམས་ནི་ཁ་བྱེ་མནན་ན་ན། །སྟོང་སྐྱུགས་བྱེད་ཅིང་ཐོ་རངས་ལྦུ་གསོབ་ལུ། །སྦོ་འཁྲོག་དགོང་དང་ཐོ་རངས་ཞུ་རྗེས་ན། །མཁྲིས་པ་འཁྲུགས་རྟགས་རྩ་རྒྱས་ཕྲ་གྲིམས་མགྱོགས། །ཆུ་མདོག་དམར་སེར་དྲི་དུགས་རླངས་པ་ཆེ། །མགོ་ན་ཤ་ཚ་ཁ་རོ་སྐྱུར་ལ་ཁ། །ལྕེ་སྟེང་བད་ཀན་ཆེ་ལ་སྣ་སྒོ་སྐམ། །མིག་སྤྲིན་དམར་སེར་གཟེར་བ་གཅིག་ཏུ་འདྲིལ། །ནུབ་གཉིད་ཆུང་ལ་ཉིན་པར་གཉིད་མི་ཐུབ། །ལུད་པ་དམར་སེར་ཚ་བྲོ་སྐོམ་དད་ཆེ། །ཁྲག་མཁྲིས་འཁྲུ་སྐྱུག་རྔུལ་ཆེ་དྲི་མ་མནམ། །ཁ་དོག་དམར་སེར་སྨིན་ཅིང་འདྲུལ་བར་བྱེད། །ཉིན་དགུང་མཚན་དགུང་ཞུ་བའི་དུས་ན་ན། །བད་ཀན་འཁྲུགས་རྟགས་རྩ་ནི་བྱིང་རྒུད་དལ། །ཆུ་ནི་མདོག་དཀར་དྲི་དང་རླངས་པ་ཆུང༌། །ཁ་མངལ་ལྕེ་རྙིལ་སྐྱ་ལ་མིག་དཀར་སྐྲང༌། །སྣབས་ལུད་མང་ཞིང་མགོ་འཐོམ་ལུས་སེམས་ལྕི། །དང་ག་མི་བདེ་དྲོད་མེད་འཇུ་སྟོབས་ཆུང༌། །མཁལ་རྐེད་ན་ཞིང་ལུས་སྦོ་ལྦ་བ་སྐྱེ། །ཁ་ཟས་བད་ཀན་སྐྱུག་ཅིང་འཁྲུ་བ་དང༌། །དྲན་པ་མི་གསལ་གཉིད་ཆེ་སྒྱིད་པ་སྐྱུར། །གཡའ་མཁྲང་ཚིགས་དམ་ཤ་རྒྱས་ལས་མཐའ་རིང༌། །ནམ་ཞོད་སྲོད་དང་སྔ་དྲོ་ཟོས་ཐོག་ལྡང༌། །དེ་ལྟར་མཚན་ཉིད་འཕེལ་ཟད་འཁྲུགས་གསུམ་གྱི། །ཇི་ལྟར་བཤད་པའི་རྟགས་ཀྱིས་ནད་ཀུན་ཁྱབ། །ལྡན་འདུས་འདྲེས་པའི་རྟགས་ལས་ཤེས་པར་བྱ། །འདིར་མ་འདུས་པའི་ནད་རྟགས་ཡོད་མི་སྲིད། །ཅེས་གསུངས་སོ།།

བདུད་རྩི་སྙིང་པོ་ཡན་ལག་བརྒྱད་པ་གསང་བ་མན་ངག་གི་རྒྱུད་ལས་ནད་ཀྱི་མཚན་ཉིད་བསྟན་པའི་ལེའུ་སྟེ་བཅུ་གཅིག་པའོ།། །།

མཐའ་མའི་འདོན་ཐེངས་།: 14.12.2022 ཉིན། 10:56 AM