སྨན་རྩིས་དྲ་བ། - འབྱུང་རྩིས་ཟླ་ཟེར།

ལེའུ་དྲུག་པ། སྲིའུ་དང་ནད་པའི་རྩིས།

བརྗོད་བྱ་སྤེལ་མཁན། རྩོམ་སྒྲིག་པ། (admin) ཟླ་ཚེས། 07.02.2011
འབྱུང་རྩིས་ཟླ་ཟེར། >> ལེའུ་དྲུག་པ། སྲིའུ་དང་ནད་པའི་རྩིས།

༈ འབྱུང་བ་འཁྲུགས་དང་རྣམ་རྟོག་གིས། །བསྐྱེད་པའི་ནད་འདྲེས་གདུངས་པའམ། །བཙས་མ་ཐག་གི་བྱིས་པའི་ཆེད། །རྡེའུ་བཅུ་དགུ་བོར་བར་བྱ། །དེ་ཡང་བརྩི་བྱའི་སྲོག་གིས་ནི། །གནམ་ལོའི་སྲོག་འཐབ་རྡེའུ་དང་། །སྲོག་གི་དར་གུད་ལོ་ཡི་སྟེང། །ཕབ་པའི་རྡེའུ་གཅིག་དེ་བཞིན་དུ། །ཟླ་ཞག་དུས་ཚོད་སྲོག་ལ་འང། །བརྩི་བྱའི་སྲོག་གིས་འཐབ་པ་དང་། །སྲོག་གི་དར་གུད་ཟླ་སོགས་སྟེང་། །བརྩིས་པའི་རྡེའུ་རེ་རེ་སྟེ། །འཐབ་བསྐོར་སྤེལ་སྒྲིགས་སྲོག་རྡེལ་བརྒྱད། །དེ་བཞིན་བརྩི་བྱའི་ལུས་ཀྱིས་ཀྱང། །ལོ་ཟླ་ཞག་དང་དུས་ཚོད་ཀྱི། །ལུས་ལ་སོ་སོར་འཐབ་པ་དང་། །ལུས་ཀྱི་དར་གུད་ལོ་སོགས་བཞིའི། །སྟེང་ཕབ་བརྩིས་པས་ལུས་རྡེལ་བརྒྱད། །དྲིལ་བས་སྲོག་ལུས་རྡེལ་བཅུ་དྲུག །དེ་སྟེང་ཟླ་བ་ངོ་རེ་ཞིང། །ལྷ་མོ་བརྒྱད་འཆར་ཚེས་གཅིག་ནས། །འོད་འབར་བརྟན་མ་རྣོ་དབལ་མ། །མདངས་ལྡན་ཆར་འབེབས་གཡོ་མེད་དང་། །འོད་ལྗང་སྐྱེད་བྱེད་རིམ་པ་བཞིན། །དང་པོ་དྲུག་ལ་ཞག་བཞི་དང་། །ཕྱི་མ་གཉིས་ལ་ཞག་གསུམ་རེ། །སྦྱར་བའི་ཚེས་གྲངས་བཟང་ངན་དང་། །དེ་བཞིན་གཟའ་དང་སྐར་མ་ཡང། །བཟང་ངན་རྩིས་པའི་རྡེལ་གསུམ་སྟེ། །དྲིལ་བས་རྡེའུ་བཅུ་དགུ་བོར། །དེ་ལྟར་བརྩིས་པའི་འབྲས་བུ་འང་། །རྩ་འགྲེལ་ཉི་ཤུ་པ་སོགས་ལྟོས། །གཞན་ཡང་ནད་རྩིས་ཐང་ཤིང་ནི། །ཐོག་མར་བརྩི་གཞི་ངོས་བཟུང་བྱ། །དེ་ལས་རྩིས་འགོ་བཅོ་ལྔ་སྟེ། །དང་པོ་རང་གི་བླ་ཚེ་ནི། །སྟོར་རམ་མ་སྟོར་གནམ་ལོ་ནས། །མི་དེས་དུ་ལོན་ཐུར་དུ་སྦུབ། །གཉིས་པ་རྒྱལ་པོ་གདན་ས་ནས། །འདྲེད་དམ་མི་འདྲེད་ལྕགས་སྟག་ནས། །དུ་ལོན་ཐུར་དུ་སྦུབ་ལ་བརྩི། །གསུམ་པ་ཞྭ་འཕྱིང་ཐལ་འོག་ཏུ། །ཚུད་དམ་མ་ཚུད་ཆུ་སྟག་ནས། །ཐུར་དུ་དུ་ལོན་བགྲངས་ལ་བརྩི། །བཞི་པ་བློན་པོ་གྲལ་ས་ནས། །ཡར་རམ་མ་ཡར་ཤིང་སྟག་ནས། །དུ་ལོན་ཐུར་དུ་སྦུབ་ལ་བརྩི། །ལྔ་པ་གཡི་སྤྱང་གྲ་ཆག་གམ། །མ་ཆག་ས་ཕོ་སྟག་ནས་ནི། །དུ་ལོན་ཐུར་དུ་སྦུབ་ལ་བརྩི། །དྲུག་པོ་བདུད་ཀྱིས་འཚོལ་མི་འཚོལ། །ལྕགས་མོ་ཡོས་ནས་དུ་ལོན་སྦུབ། །བདུན་པ་སྲིན་པོས་ཁྲིད་མ་ཁྲིད། །ས་མོ་ཡོས་ནས་དུ་ལོན་སྦུབ། །བརྒྱད་པ་ལྗོན་ཤིང་ཆག་མ་ཆག །ཤིང་མོ་ཡོས་ནས་དུ་ལོན་སྦུབ། །དགུ་པ་བང་མཛོད་སྟོང་མ་སྟོངས། །མེ་མོ་ཡོས་ནས་དུ་ལོན་སྦུབ། །བཅུ་པ་ཡས་ཐག་ཆད་མ་ཆད། །གནམ་ལོའི་ཡར་གྱི་བཅུ་གསུམ་ནས། །ཐུར་དུ་དུ་ལོན་སྦུབ་ལ་བརྩི། །བཅུ་གཅིག་དཔྱད་ཐག་ཆད་མ་ཆད། །གནམ་ལོའི་མར་གྱི་བཅུ་གསུམ་ནས། །དུ་ལོན་གྱེན་དུ་བཀན་ལ་བརྩི། །བཅུ་གཉིས་པ་ནི་བྱང་ཐང་རླུང་། །ལངས་སམ་མ་ལངས་མེ་སྟག་ནས། །དུ་ལོན་ཐུར་དུ་བགྲངས་ལ་བརྩི། །བཅུ་གསུམ་སྒཱོུ་ཁྱིམ་ཞིག་མ་ཞིག །ཆུ་ཕོ་སྤྲེལ་ནས་དུ་ལོན་བཀན། །བཅུ་བཞི་པ་ནི་ཉལ་བའི་སྔས། །ཞིག་གམ་མ་ཞིག་གནམ་ལོ་ཡི། །ཡར་གྱི་ལྔ་ནས་དུ་ལོན་སྦུབ། །བཅོ་ལྔ་རྟེན་ཕུར་ཕྱུངས་མ་ཕྱུངས། །གནམ་ལོའི་མར་གྱི་ལྔ་མཐུན་ནས། །དུ་ལོན་གྱེན་དུ་བགྲངས་ལ་བརྩི། །བཅུ་དྲུག་རྡེལ་སྒོ་འགགས་མ་འགགས། །གནམ་ལོའི་མར་གྱི་དྲུག་འབྲས་ནས། །དུ་ལོན་གྱེན་དུ་བགྲངས་ལ་བརྩི། །དེ་ལྟར་རྩིས་གཞི་གར་བབས་ཀྱི། །སྲོག་ལུས་དབང་ཐང་ཀླུང་རྟ་ལ། །བརྩི་བྱའི་སྲོག༌ལུས་དབང་ཀླུང་གིས། །འཐབ་པའི་རྡེའུ་བཞི་བཞི་སྟེ། །དཀར་ནག་གཏན་རྩིས་བཞིན་དུ་བོར། །དེ་ནས་དཀར་ནག་བགྲངས་བྱས་ལ། །སོ་སོའི་བཟང་ངན་སྟངས་གཅོད་བྱ། །དེ་རྗེས་རྩིས་མིག་བཅུ་དྲུག་ཀྱང། །རྩིས་ཆེན་བདུན་དུ་དྲིལ་ལ་བརྟག །དེ་ཡང་ཐང་ཤིང་རིང་མོ་དང་། །གཟེར་ཟམ་གཡུ་ཤུག་དཔག་བསམ་ལྗོན། །དཔལ་བྱུར་ཁྱིམ་དང་གཤིན་གསོན་མིག །ལིང་རྩེ་བརྒལ་ལམ་མ་བརྒལ་བལྟ། །དེ་དག་རྡེའུ་ལྔ་ཚན་གསུམ། །བཅད་ལ་དང་པོ་སྐྱེས་པའི་ས། །བར་པ་བུད་མེད་ཐ་བྱིས་པ། །རིམ་བཞིན་སོ་སོའི་ས་རུ་བརྟག །གཞན་དུ་རྩིས་འགོ་ཐ་མ་ཡི། །རྡེལ་བོར་ད་ལྟའི་ཕྱག་བཞེད་དུ། །གནམ་ལོ་རང་གི་སྲོག་ལུས་དབང་། །ཀླུང་རྟ་བཞི་ཡི་སྨེ་བ་ལ། །བརྩི་བྱའི་སྲོག་སོགས་སྨེ་བ་བཞིས། །འཐབ་པས་རྡེལ་སྒོ་བརྟག་པ་ཡོད། །གཞན་ཡང་ལོག་མེན་སྤར་སྨེ་དང་། །ཉི་མའི་ནད་གདན་བརྟག་པ་སོགས། །རྒྱ་ཆེན་གཞུང་ལས་ཤེས་པར་བྱ། །དེ་ལྟར་ནད་ཀྱིས་གདུང་བའི་འགྲོར། །ཕན་པའི་ལྷག་བསམ་དྲག་པོ་ཡིས། །ལེགས་པར་བརྩིས་ལ་ཁ་དམར་རྣམས། །རང་རང་འགྲེལ་པས་སྟངས་བཅད་དེ། །འཁྲུགས་པ་བཅོས་ཤིང་གུད་པ་གསོ། །རྣམ་རྟོག་འདྲེ་གདོན་བསལ་བར་བྱ། །འབྱུང་རྩིས་མན་ངག་ཟླ་བའི་འོད་ཟེར་ལས་སྲིའུ་དང་ནད་པའི་རྩིས་ཀྱི་ལེའུ་སྟེ་དྲུག་པའོ།།

མཐའ་མའི་འདོན་ཐེངས་།: 07.02.2011 ཉིན། 5:59 PM

<< སྔ་མ།

ནང་གསེས་དཀར་ཆག

ཡིག་ཆ་གསར་ཤོས།

ཐོན་ཟོག་ཁྲལ་འབབ་སྡེ་ཚན་གྱིས་ཆེ་བསྟོད་གནང་།

བོད་ཡིག་མིང་བྱང་ལ་འགྱུར་བཅོས་བཏང་བ།

ཅོན་ཏ་ར་སྨན་སྦྱོར་སྡེ་ཚན་དུ་ཆོད་གན་ལས་མི་དྲུག་གི་ས་མིག་གསལ་བསྒྲགས།

བརྟན་བཞུགས་སྔོན་འགྲོའི་རིམ་གྲོར་སྲོག་ཆགས་ཚེ་ཐར་བཏང་བ།

འགྲོ་ཕན་སྨན་རྩིས་ཁང་གི་མིང་དུ་བརྫུས་ཏེ་ནད་པ་བསླུ་བྲིད་བྱེད་པའི་གནས་ཚུལ།

ཁ་ལོ་བ་གཅིག་དང་ཆོད་གན་ལས་མི་དྲུག་གི་ས་མིག་གསལ་བསྒྲགས།

ཆོད་གན་ལས་མི་སྐྱེས་པ་གཉིས་དང་བུད་མེད་གསུམ་གྱི་ས་མིག་གསལ་བསྒྲགས།

ལེའུ་དང་པོ། ཀླད་དོན་གླེང་སློང་བ།

ལེའུ་གཉིས་པ། རླུང་ནད་གསོ་བ།

ལེའུ་གསུམ་པ། མཁྲིས་པའི་ནད་གསོ་པ།

ལེའུ་བཞི་པ། བད་ཀན་གྱི་ནད་བཅོས་པ།

ལེའུ་ལྔ་པ། འདུས་པའི་ནད་གསོ་བ།

ལེའུ་དྲུག་པ། མ་ཞུ་བ་གསོ་བ།

ལེའུ་བདུན་པ། གཅོང་ཆེན་སྐྲན་ནད་བཅོས་པ།

ལེའུ་བརྒྱད་པ། སྐྱ་རྦབ་ཀྱི་ནད་གསོ་བ།