ལེའུ་དྲུག་པ། ལྡེ་གུའི་སྡེ་ཚན་བསྟན་པ།

དེ་ནས་ཡང་དྲང་སྲོང་རིག་པའི་ཡེ་ཤེས་ཀྱིས་འདི་སྐད་ཅེས་གསུངས་སོ། །ཀྱེ་དྲང་སྲོང་ཆེན་པོ་ཉོན་ཅིག །ལྡེ་གུའི་སྡེ་ཚན་ཚ་སེལ་གྲང་སེལ་གཉིས།།

ཚ་སེལ་སོ་མ་ར་ཛ་ཨ་རུ་ར། །བསིལ་གསུམ་འདམ་བུ་ཤིང་མངར་ལྕགས་ཀྱི་ཕྱེ། །ཀ་ར་མར་གསར་ལྡེ་གུ་བྱས་པ་ཡིས། །གློ་མཆིན་ཚ་བ་རྙིངས་རྙོགས་སེལ་བར་བྱེད། །ཏིག་ཏ་གསེར་གྱི་མེ་ཏོག་བོང་ང་དཀར། །མ་ནུ་པི་པི་ལིང་དང་བ་ལེ་ཀ །སྦྲང་རྩིའི་ལྡེ་གུས་མཁྲིས་པའི་གློ་ནད་དང༌། །ཆང་ནད་མཁྲིས་པར་སྐྱུག་དང་མགོ་ནད་སེལ། །གུར་ཀུམ་མཚལ་དང་མཁྲིས་པ་སྣ་ཚོགས་དང༌། །གེ་སར་གསུམ་དང་མར་གསར་སྦྲང་ལ་སྦྱར། །གློ་མཆིན་ཟླ་མཚན་རྨ་རྙིངས་སྣ་ཁྲག་གཅོད། །བྲག་ཞུན་ཨ་རུ་ར་དང་བ་ཤ་ཀ །གུར་ཀུམ་སྦྲང་རྩིས་མཆིན་ཁྲག་དྲེག་ནད་སེལ། །ཙན་དན་ཨུཏྤལ་གུར་གུམ་སྐྱུ་རུ་ར། །ཀ་ར་སྦྲང་སྦྱར་མཁྲིས་སྐྱུག་གློ་ནད་སེལ། །རླུང་ལྡན་མར་གསར་བད་ལྡན་ག་དུར་སྡེབ། །ཨ་རུ་རྒྱ་སྐྱེགས་བཙོད་དང་འབྲི་མོག་རྩི། །བསིལ་གསུམ་འདམ་བུ་ཤིང་མངར་ལི་ག་དུར། །ཀ་ར་མར་གསར་སྦྲང་གི་ལྡེ་གུ་ཡིས། །ལུད་པ་ཤེ་རུལ་རྣག་ཁྲག་གློ་རྡོལ་སེལ། །འབྲས་བུ་གསུམ་དང་ཨ་བ་ལྕགས་ཕྱེ་དང༌། །གོ་སྙོད་ཤིང་མངར་མར་གསར་ཀ་ར་སྦྲང༌། །ལྡེ་གུས་མིག་ནད་དམར་ཚག་རབ་རིབ་འཇོམས། །བསེ་རུ་མཁྲིས་པའི་ལྡེ་གུས་གློ་རྣག་སྐེམ། །ཙན་དན་དམར་པོ་སྐྱེར་པ་ཨ་རུ་རའི། །ལྡེ་གུས་ཚད་རྙིང་ཆུ་སེར་ལྡན་པ་སེལ། །མཚལ་དང་རྒྱ་སྐྱེགས་དོམ་མཁྲིས་ལྡེ་གུ་ཡིས། །རྟག་ཏུ་ཟླ་མཚན་འཛག་པ་གཅོད་པར་བྱེད། །ཅུ་གང་གུར་ཀུམ་ལི་ཤི་ཨ་རུ་ར། །སུག་སྨེལ་མར་གསར་ལྡེ་གུས་རབ་རིབ་སེལ། །ཚད་ནད་རྙིངས་རྙོགས་དུག་ནད་ཞི་བར་བྱེད། །བསིལ་བཞི་ཙན་དན་དཀར་དམར་རུ་རྟ་སྦྲང༌། །མར་གསར་ལྡེ་གུས་བུ་ཆུང་གློ་ནད་སེལ། །མཆིན་པ་སྣ་ཚོགས་མ་རུལ་གུར་ཀུམ་དང༌། །མར་གསར་སྦྲང་སྦྱར་མིག་ནད་མཆིན་ནད་སེལ།།

གྲང་སེལ་ཚ་བ་གསུམ་དང་འབྲས་བུ་གསུམ། །ཙི་ཏྲ་བྱི་ཏང་ག་དང་ལི་ག་དུར། །རིམ་པས་ཆ་བསྐྱེད་ལྕགས་ཕྱེ་སྤོས་དཀར་བརྒྱད། །སྦྲང་སྦྱར་མིག་སེར་སྐྱ་རྦབ་གཞང་འབྲུམ་འཇོམས། །རྒྱ་ཚྭ་གླ་རྩི་སྡིག་སྲིན་ཚ་བ་གསུམ། །མཐིང་ཤུན་མོ་རྡེ་ཉི་དགའ་འབྲས་སྣ་གསུམ། །བུ་རམ་མར་སྦྱར་མཁལ་ནད་ཆུ་སྲི་སེལ། །ཤིང་ཚ་སུག་སྨེལ་དྲོད་སྨན་ཅུ་གང་དང༌། །ཀ་ར་རིམ་བསྐྱེད་མར་གསར་སྦྲང་ལྡེ་གུ། །བད་ཀན་གློ་ནད་འཇབ་འཇིབ་ལུ་ལ་བསྔགས། །མ་ནུ་རུ་རྟ་སྒེ་གཤེར་འབྲས་བུ་གསུམ། །ག་དུར་པི་པི་ལིང་དང་སྦྲང་རྩི་སྦྱར། །དབུགས་མི་བདེ་དང་བད་རླུང་གློ་ནད་སེལ། །སེ་འབྲུ་ཤིང་ཚ་སུག་སྨེལ་ཚ་བ་གསུམ། །ཁ་རུ་ཚྭ་དང་རུ་རྟ་ཙི་ཏྲ་ཀ །གཟེ་མ་བུར་སྦྱར་སྐྱ་རྦབ་རླུང་ཚབས་དང༌། །མཁལ་མ་ཕོ་བ་རྒྱུ་ལོང་གྲང་བ་སེལ།།

དེ་སོགས་ལྡེ་གུའི་སྦྱར་ཐབས་སྦྲང་ཆུ་བཅད། །བུ་རམ་ཆུར་བསྡུས་མར་གྱི་ལྦུ་སྙིགས་ཕྱུངས། །སྨན་ཀུན་ཞིབ་བཏགས་བསྲེས་ལ་འདྲེས་པར་བཀྲུག །ཀ་ར་ལ་སྦྱོར་ཞིབ་ཏུ་བཏགས་ལ་གདབ། །འཇུ་ཚོད་ལོན་ཙམ་ཁྱིའུ་སུས་བསྟེན་པར་བྱ། །ཞེས་གསུངས་སོ།།

བདུད་རྩི་སྙིང་པོ་ཡན་ལག་བརྒྱད་པ་གསང་བ་མན་ངག་གི་རྒྱུད་ལས་ལྡེ་གུའི་སྡེ་ཚན་བསྟན་པའི་ལེའུ་སྟེ་དྲུག་པའོ།། །།

མཐའ་མའི་འདོན་ཐེངས་།: 22.12.2022 ཉིན། 11:12 AM