ལེའུ་དྲུག་པ། ཁོང་ནད་ཐམས་ཅད་ཀྱི་རྒྱུ་མ་ཞུ་བ་བཅོས་པ།

དེ་ནས་ཡང་དྲང་སྲོང་ཡིད་ལས་སྐྱེས་ཀྱིས་འདི་སྐད་ཅེས་ཞུས་སོ། །ཀྱེ་སྟོན་པ་དྲང་སྲོང་རིག་པའི་ཡེ་ཤེས་ལགས། །དམར་ཁྲིད་ལག་ལེན་མན་ངག་རྒྱུད་འདི་ཡི། །ཁོང་ནད་གསོ་བའི་སྐབས་ལ་ཇི་ལྟར་བསླབ། །འཚོ་མཛད་སྨན་པའི་རྒྱལ་པོས་བཤད་དུ་གསོལ། །ཞེས་ཞུས་པས།  སྟོན་པས་གསུངས་པ། །ཀྱེ་དྲང་སྲོང་ཆེན་པོ་ཉོན་ཅིག །ཁོང་ནད་གཅོང་ལ་རྣམ་པ་གཉིས་ཡིན་ཏེ། །སྡེ་བཞི་གཅོང་གི་རྩ་བ་མ་ཞུ་དང༌། །འབྲས་བུ་གཅོང་ནད་གསར་རྙིང་རྣམ་གཉིས་སོ། །མ་ཞུ་གཅོང་གི་རྒྱུ་ལ་སྤྱི་དོན་དྲུག །རྒྱུ་དང་རྐྱེན་དང་གྱུར་ཚུལ་བསྟན་པ་དང༌། །དབྱེ་བ་རྟགས་དང་དེ་ཡི་བཅོས་ཐབས་སོ།།

རྒྱུ་ནི་བད་ཀན་ལྕི་ཞིང་བསིལ་བ་ལ། །དེ་རྐྱེན་རྟེན་དང་མ་གོམས་མི་འཕྲོད་དང༌། །ངོ་བོ་མི་འཇུ་བ་ཡི་རྐྱེན་བཞི་ཡོད། །དང་པོ་རྟེན་ནི་གྲང་རླུང་ཅན་གྱི་མི། །ཟུངས་ངན་སྦེག་དང་ཁ་ཟས་སྐྱ་བ་ཟ། །དལ་བར་འདུག་དང་མྱ་ངན་སེམས་ལས་དུབ། །རྒས་དང་ཟས་ཀྱིས་མནར་ཤུལ་འཇུ་མི་ནུས། །མ་གོམས་ནམ་ཕྱེད་ཁ་ཟས་མ་མྱོང་ཟ། །མི་འཕྲོད་དཀར་སྐྱུར་སྔོ་ངད་འོ་མ་ཉ། །སྔ་མ་མ་ཞུ་ཕྱི་མ་ཟོས་པ་དང༌། །འདྲེས་པར་ཟོས་པས་མི་འཕྲོད་འཇུ་མི་འགྱུར། །ཟས་ཀྱི་ངོ་བོ་འབྲུ་གསར་བསེར་ཅན་རུལ། །ཤ་རིད་ཚིལ་བུ་འོ་རློན་རྗེན་པ་དང༌། །མ་ཚོས་འཚིག་དང་ཁེངས་པོ་ཆུ་བསྲེས་རྣམས། །དུས་མེད་ཟས་ཚོད་མ་ཟིན་འཇུ་བ་དཀའ།།

གྱུར་ཚུལ་རྒྱུ་དང་རྐྱེན་དུ་ལྡན་པ་ཡིས། །བད་མཁྲིས་རླུང་གིས་འཇུ་བའི་མཐུ་ཉམས་ཏེ། །མྱགས་བྱེད་བད་ཀན་དག་གིས་མྱག་མ་ནུས། །འཇུ་བར་བྱེད་པའི་མཁྲིས་པས་འཇུ་མ་ནུས། །མེ་མཉམ་རླུང་གིས་དྭངས་སྙིགས་འབྱེད་མ་ནུས། །དེ་ལ་མ་ཞུ་ཞེས་སུ་བརྗོད་པ་ཡིན། །མ་ཞུའི་དབང་གིས་ཕོ་བའི་བད་ཀན་འཕེལ། །བེ་སྣབས་དེ་ཡིས་རླུང་རྒྱུའི་རྩ་སྦུབས་བཀག །ལྷེན་དང་ལྕགས་དྲེག་མེ་དྲོད་ཉམས་ལ་སོགས། །གཅོང་ནད་མ་ལུས་སྐྱེད་པར་བྱེད་པ་ཡིན། །དར་ལ་བབ་ཅིང་སྟོབས་ལྡན་མེ་དྲོད་ཆེ། །ལུས་ངག་བྲེལ་ཞིང་སྣུམ་བག་རྒྱུན་དུ་ཟ། །མི་འཕྲོད་ཟས་ལ་གོམས་སམ་བྲིད་ནས་སློབ། །དེ་ལ་དུས་ཀུན་མ་ཞུ་འབྱུང་མི་འགྱུར།།

དབྱེ་བ་རྫས་དང་ངོ་བོ་རིགས་གྲོགས་དུས། །རྫས་ཀྱིས་དབྱེ་ན་གྱོང་རླན་སྣུམ་དང་གསུམ། །གྱོང་ནི་རྩམ་པ་སྔོ་ངད་ཤ་རིད་དོ། །རླན་ནི་ཆང་ཆུ་འོ་མ་ཞོ་དར་ཇ། །སྣུམ་ནི་རྩི་མར་འབྲུ་མར་ཚིལ་ཞག་རྐང༌། །རླན་སྣུམ་མ་ཞུ་ཕལ་ཆེར་ཉེས་པ་ཆེ། །ངོ་བོས་དབྱེ་ན་སྙིགས་མ་དྭངས་མ་གཉིས། །དེ་ལ་སྙིགས་མ་མ་ཞུ་ཞེས་བྱ་བ། །ཁ་ཟས་མ་ཞུ་རང་སར་ཕོ་ལོང་ལས། །བད་ཀན་བེ་སྣབས་འཕེལ་བས་གཏུམས་ནས་གནས། །རྙིངས་ནས་སྙིགས་མ་འདྲིལ་བའི་ཟས་སྐྲན་འགྱུར། །མེ་མཉམ་རླུང་གིས་དྭངས་སྙིགས་མ་ཕྱེད་པའི། །སྙིགས་མ་དྭངས་མའི་རྩ་མིག་ཤོར་བ་ཡིས། །མདངས་སྒྱུར་མཁྲིས་པས་ཟུངས་ཁྲག་མ་སྨིན་ཏེ། །ཡུན་རིང་མཆིན་གནས་དྭངས་མ་མ་ཞུ་ཡིན། །རྙིངས་ནས་དྭངས་མ་འདྲིལ་ཟགས་བྱེར་འགྱིངས་བཞི། །འདྲིལ་བས་སྐྲན་རྣམས་སྐྱེད་པར་བྱེད་པ་སྟེ། །ཟགས་པས་སྐྱ་རྦབ་དམུ་ཆུ་སྐྱེད་པར་བྱེད། །བྱེར་བས་དུག་མཛེ་མེ་དབལ་འོར་དུ་ལྷུང༌། །འབྲས་དང་སུར་ཡ་དྲེག་དང་གྲུམ་བུ་དང༌། །མིག་སེར་རྩ་སྐྲན་རྐང་འབམ་དུ་མར་འགྱུར། །འགྱིངས་པས་སྨུག་པོ་རྒྱས་གབ་མཆེར་པའི་ནད། །ནད་རྣམས་ཕལ་ཆེར་དྭངས་མ་མ་ཞུས་སྐྱེད། །རིགས་ཀྱིས་དབྱེ་ན་བེ་སྣབས་བསུད་ནད་དང༌། །མ་ཞུ་ཤིང་འདྲ་དུག་འདྲ་རྣམ་པ་བཞི། །གྲོགས་ཀྱིས་དབྱེ་ན་རླུང་མཁྲིས་བད་ཀན་གསུམ། །དུས་ཀྱིས་དབྱེ་ན་གསར་རྙིང་གཉིས་སུ་འགྱུར།།

ངོས་འཛིན་རྟགས་ལ་སྤྱི་དང་བྱེ་བྲག་གཉིས། །སྤྱི་རྟགས་དྲི་མ་འགག་གམ་དུས་མིན་འབྱུང༌། །འོག་རླུང་འགྱུ་དཀའ་འཁྱིལ་ཞིང་ཁོང་པ་སྦོ། །སྐབས་སུ་འགྱིངས་རྗེས་བུངས་ཆེར་འཁྲུ་བར་འགྱུར། །དྭངས་སྙིགས་འདྲེས་པས་བཤང་གཅི་ཞག་ཅན་འཁྲུ། །ཁོང་སྙོམ་ལུས་ལྕི་ཡི་ག་ལྡོག་པར་བྱེད། །ཟོས་དུས་ན་ཞིང་སྒྲེག་ལ་མགོ་བོ་ན། །བྱེ་བྲག་རྟགས་ལ་སྙིགས་མ་མ་ཞུ་ན། །ཁ་མངལ་ཕོ་བ་འཚིང་ལ་སྒྲེག་ཅིང་སྐྱུག །གང་མ་ཞུ་བའི་ཟས་དེ་ཁྱད་པར་གནོད། །གོམས་པར་ཟོས་སམ་རྙིངས་ནས་དེ་ལྟར་མིན། །མིག་དང་གདོང་པ་རྐང་བོལ་གཡོ་བར་བྱེད། །དྭངས་མ་མ་ཞུ་ཁོང་སྙོམ་ཡི་ག་འགག །སྒྲེག་མང་ཤ་སྐམ་སྙིང་ག་རྩིབ་ལོགས་ན། །མ་ཞུ་བེ་སྣབས་བད་ཀན་འཕེལ་བ་ཡིས། །སྟེང་འོག་མེ་མཉམ་རླུང་རྒྱུའི་ལམ་བཀག་པས། །ཁོང་སྦོ་ཐེར་ཟུག་ན་ལ་འོག་རླུང་སྡོམ། །སྒྲེག་པ་མི་ཐོན་མ་ཞུ་ཀུན་གྱི་རྒྱུ། །མ་ཞུ་བསུད་ནད་ཅེས་བྱ་བེ་སྣབས་དེས། །ཐུར་སེལ་ལམ་བཀག་གྱེན་དུ་ལོག་པ་ཡིས། །དབུགས་ངན་སྲི་ཞིང་དྲི་མ་སྐམ་པ་དང༌། །བྲང་ཚ་ཆུ་ཚན་འོང་ཞིང་སྒྲེག་པ་བསུད། །མཆིན་དྲི་ན་ཞིང་མཇུག་ཏུ་སྨུག་པོར་འགྱུར། །མ་ཞུ་ཤིང་འདྲ་ཞེས་བྱ་བེ་སྣབས་དེས། །སྟེང་འོག་རྒྱུ་བ་རླུང་གི་ལམ་བཀག་པས། །མེ་མཉམ་མཆིན་མཆེར་རྩིབ་ལོགས་རྩ་ནང་ཞུགས། །དགྱེ་དགུ་མི་ཤེས་ནང་དུ་ཤིང་བཅུག་འདྲ། །གར་ཞུགས་གཟེར་ཞིང་གླང་ཐབས་འབྱུང་བ་ཡིན། །དུག་འདྲ་དྭངས་མ་མ་ཞུ་རྩ་མིག་བྱེར། །རྩ་ནང་ཀུན་ཏུ་དྭངས་མ་ཆགས་ཤིང་ཞེན། །དུག་ནད་ལྟ་བུར་ཤ་ལུས་སྔོ་ཞིང་སྐམ། །ཤེད་ཆུང་ཟོས་རྗེས་མི་བདེ་དང་ག་ཞན། །ཚ་ཆེས་གྲང་ཆེས་གཉིས་ཀ་མི་བཟོད་ན། །མ་ཞུའི་རྣམ་པ་གང་ཡང་རླུང་ལྡན་ཚེ། །ཁོང་སྦོ་འདར་དང་མགོ་འཁོར་ཡན་ལག་རེངས། །མཁྲིས་ལྡན་ཁོང་ཚ་དྲི་ཆེ་འཁྲུ་བ་སེར། །སྒྲེག་སྐྱུག་སྐོམ་དད་ཆེ་ཞིང་རིམས་ཀྱིས་འདེབས།   །བད་ཀན་ལྡན་པ་མཆིལ་མ་འབྱར་བག་མང༌། །ལུས་ལྕི་སེམས་བྱིང་སྒྲེག་སྐྱུག་ཟས་མི་ཞིམ། །དུས་ཀྱིས་དབྱེ་ན་གསར་དང་རྙིང་པ་གཉིས། །གསར་པའི་དུས་ན་མ་ཞུ་བ་ཞེས་བྱ། །རྙིངས་ནས་མ་ཞུའི་རྒྱུས་བསྐྱེད་གཅོང་ནད་འགྱུར།།

བཅོས་པའི་ཐབས་ལ་གསར་རྙིང་རྣམ་པ་གཉིས། །གསར་དུས་བཅོས་ཐབས་སྤྱི་དང་བྱེ་བྲག་གཉིས། །སྤྱི་ལ་སྨན་དཔྱད་ཟས་དང་སྤྱོད་ལམ་བཞི། །མ་ཞུ་ཆུང་འབྲིང་ཆེན་པོ་ནད་སྟོབས་སྦྱར། །མ་ཞུ་ཆུང་ངུ་ཟས་ཀྱིས་བཀྲེས་སྐོམ་བྱ། །ནང་ནུབ་དུས་ན་རྒྱམ་ཚྭའི་ཆུ་སྐོལ་བཏུང༌། །སྙིགས་མ་རང་སར་ལས་པའི་མ་ཞུ་འཇུ། །བད་ཀན་བེ་སྣབས་རྩ་སྦུབས་འགགས་པ་སྦྱོང༌། །ཁ་ཟས་འཇུ་དཀའ་གྲང་མོ་ཆེས་པ་སྤང༌། །ཕྱེ་ཐུག་སྒ་བཏབ་ལུག་ཤ་ཡིབ་མ་དང༌། །ཉ་དང་རྒོད་ཤ་ཆང་དང་ཟན་དྲོན་སོགས། །ཡང་དྲོ་འཇུ་སླ་རྒྱུ་སྲུང་ཉུང་ཤས་བསྟེན། །སྤྱོད་ལམ་རླན་གྲང་བསེར་བུ་ཉིན་གཉིད་སྤང༌། །སྐམ་སར་ལུས་དྲོ་རྔུལ་ཕྱིས་རྩོལ་བ་སྤྱད། །འོན་ཀྱང་གསར་དུས་སྨྱུང་བྱ་ཉིན་གཉིད་ཕན། །ཁ་ཅིག་མ་ཞུ་གསར་རྙིང་ཐམས་ཅད་ལ། །བཅགས་པ་ཕན་ཞེས་རྨོངས་པའི་མུན་ཚིག་སྨྲ། །སྙིགས་མ་མ་ཞུ་གསར་པ་བཅགས་ཕན་ཏེ། །དྭངས་མ་མ་ཞུ་རྙིང་པའི་དུག་ཏུ་འགྱུར། །ཅི་ཕྱིར་དྭངས་མ་མཆིན་གནས་མཁྲིས་ལྡན་ཚ། །སྙིགས་མ་ཕོ་ལོང་བད་རླུང་བསྡོངས་པས་གྲང༌། །མ་ཞུ་འབྲིང་པོ་རྒྱམ་ཚྭ་བཞི་ཐང་བཏང༌། །རྒྱམ་ཚྭ་ཁ་རུ་ཚྭ་དང་ཚ་བ་གསུམ། །བསྡུས་ཐང་ཚན་མོས་དྲོད་སྐྱེད་མ་ཞུ་འཇུ། །ཞི་དཀའ་རྒོད་མ་ཁ་ཡི་ཕྱེ་མ་འམ། །སེ་འབྲུ་ཚ་བ་ལྔ་དང་ཚྭ་སྣ་གསུམ། །བུར་དཀར་སྦྱར་ཕྱེ་ཐུན་སྐྱུངས་ཆུ་ཚན་དབུལ། །ཐུན་ཆེས་འཇུ་དཀའ་བེ་སྣབས་གྲོགས་སུ་འགྱུར། །རྡོ་དང་བོང་བ་ཚྭ་ཡི་དྲོད་དུགས་བདུག །ཁྱི་སྤྱང་གཡི་སོགས་སྤུ་དུགས་རྐེད་པར་དཀྲི། །མ་ཞུ་ཆེན་པོ་སྨན་གྱིས་བཞུས་རྗེས་སྦྱང༌། །སྟོད་གནས་སྐྱུགས་ལ་སྨད་གནས་ནི་རུ་ཧ། །བར་དུ་གནས་ན་བཤལ་གྱིས་སྦྱང་བར་བྱ། །རྗེས་ལ་ཟས་སྤྱོད་བསྟེན་ཉེས་སླར་འཕེལ་བྱེད། །དེ་ཕྱིར་རྗེས་ཀྱི་སྤྱོད་ལམ་ཤིན་ཏུ་གཟབ། །དེས་ཀྱང་ཞེན་ཆེ་རྩ་བ་མ་ཐོན་ན།  །ཕོ་གསང་གང་བབས་མེ་འམ་ཐུར་མ་སྤྲུག །བྱེ་བྲག་བཅོས་པ་སྙིགས་མ་མ་ཞུ་ལ། །ཕོ་བའི་དྲོད་སྐྱེད་སེ་འབྲུ་ཚ་བ་གསུམ། །མ་ཞུ་འཇུ་བྱེད་རྒྱམ་ཚྭ་ཁ་རུ་ཚྭ། །རྒྱ་ཚྭ་བུར་དཀར་སྦྱར་བའི་ཕྱེ་མ་ལ། །རྩམ་པ་མ་ཞུ་ཕབས་དང་བུལ་ཏོག་བསྣན། །ཤ་མ་ཞུ་ན་སྤྱང་ཀིའི་ཕོ་བའམ། །སོ་བྱ་རྒོད་ཀྱི་གྲེ་བ་བསྣན་ལ་བཏང༌། །ཤ་ཁུ་སོག་ཡུའི་ཐང་དང་ལྟག་པ་སྤྲད། །སྔོ་ངད་མ་ཞུ་ཟྭ་དང་དབྱི་མོང་བསྣན། །ཆང་མ་ཞུ་ལ་ཕབས་དང་ཆང་སྐོལ་བསྣན། །ཡང་ན་སོག་ཚིགས་ཐང་གིས་འཇུ་བར་བྱེད། །ཇ་ཆུ་མ་ཞུ་ཚྭ་བསྣན་དྲི་ཆུ་བཏུང༌། །ཞོ་དར་འོ་མ་མ་ཞུ་ཕྱུར་ཁུས་འཇུ། །མར་ཚིལ་མ་ཞུ་ཅོང་ཞི་མེས་བཏུལ་བསྣན། །འབྲུ་མར་མ་ཞུ་སྲན་ཕྱེ་ལྟག་སྤྲད་བསྣན། །རྡོ་མ་ཞུ་ལ་མཚུར་དང་ཟེ་ཚྭ་བསྣན། །སྨན་མ་ཞུ་ན་དུག་རིལ་ལྟག་པ་སྤྲད། །སྨན་རྗེས་སོ་ཆ་ཤུ་དག་པི་པི་ལིང༌། །སྒ་སྐྱ་ར་ཡི་འོ་མས་གྱེན་དུ་དྲང༌། །ནད་ཆེ་དང་པོར་སྐྱུགས་བྱས་རྗེས་ལ་སྨན། །ཁྱད་པར་ཚ་དུགས་རྩོལ་སྤྱད་ཆུ་སྐོལ་མཆོག །དྭངས་མ་མ་ཞུ་ཆ་མཉམ་བཞི་ཐང་བཏང༌། །བྱེར་ན་འོ་མ་ལན་ཚྭ་བཏབ་པས་བསྡུ། །མ་བྱེར་འདུས་ནས་དུར་བྱིད་ཤྲཱི་ཁཎ། །རུ་རྟ་རྒྱམ་ཚྭ་ཤུ་དག་བུ་རམ་སྦྱར། །ཆུ་ཚན་སྐྱུར་རྩབས་འབྲས་ཀྱིས་ཕྱི་རྗེས་བཅད། །སེ་འབྲུ་ལྔ་པ་ཆུ་སྐོལ་འཕུལ་ལ་བཏང༌། །མ་ཞུ་བེ་སྣབས་སོ་ཆ་ཤུ་དག་སྒ། །རྒྱམ་ཚྭ་ཆུ་སྐོལ་འཕུལ་བའི་སྐྱུགས་ཀྱིས་དྲང༌། །སྐྱུགས་རྗེས་ལྟོ་བར་དུགས་བྱ་ཆུ་སྐོལ་བཏུང་། །ལྕུམ་རྩ་སོ་ཆ་བུལ་ཏོག་པི་པི་ལིང༌། །ཚྭ་དང་མར་སྦྱར་རེང་བུས་སྨད་རླུང་སྦྱོང༌། །དེ་སྟེང་དུར་བྱིད་ཕབས་སྦྱར་མས་འདྲེན་བཏང༌། །སྲོད་ཀྱི་དུས་སུ་རྐང་མཐིལ་རྡོ་ཡིས་བདུག །བསུད་ནད་རྟིང་པའི་དྲེག་མཚམས་མེ་བཙའ་གདབ། །དེ་ཉིན་སྨྱུང་བྱས་སྟེང་རླུང་དྲག་ཏུ་བསྣན། །འོག་རླུང་གློད་ལ་བར་རླུང་དྲག་ཏུ་སྤྲུག །དེ་འོག་བཤལ་རྗེས་ལྟ་བུར་ཟས་སྤྱོད་གཟབ། །མ་ཞུ་ཤིང་འདྲ་ཐང་དུགས་རྩེ་བཅིལ་ལ། །སྦྱོངས་སྐྱུགས་སྦྲགས་བཏང་ལྟོ་བར་ཆུ་ཚན་བདུག །ལོང་རྩ་རུ་ཐུང་གཏར་ལ་ཁ་ཟས་དབྲི། །དུག་འདྲ་རུས་རྙིང་རླངས་དུགས་ཆུ་ཚན་བྱ། །དེ་འོག་དུག་གམ་སྨུག་པོ་ལྟ་བུར་བསྡུ། །འདུས་རྟགས་ཐོབ་ནས་ལྟོ་དང་རྩ་ནས་སྦྱང༌། །རྗེས་ལ་ག་བུར་ཉི་ཤུ་རྩ་ལྔ་དང༌། །སེ་འབྲུ་ལྔ་པ་ལྟག་པ་སྤྲད་ལ་བཏང༌། །མཇུག་ཏུ་འབའ་སམ་སྨན་མར་ཕྱི་རྗེས་བཅད། །མ་ཞུ་རླུང་ལྡན་དུགས་དང་འཇམ་རྩི་བཏང༌། །མཁྲིས་ལྡན་སྦྱང་ཞིང་བད་ཀན་ལྡན་པ་སྐྱུགས། །རང་རང་ཁ་འཛིན་ཟས་སྨན་འཚམ་པས་བཅོས། །མ་ཞུ་རྙིངས་ནས་ནད་གཞན་གྱུར་པ་ལ། །དང་པོ་མ་ཞུའི་རྒྱུ་ལས་སྐྱེས་པའི་ཕྱིར། །སེ་འབྲུ་ལྔ་པ་ཚ་གྲང་ཀར་བུར་བསྒྱུར། །ཆུ་སྐོལ་འཕུལ་བས་ཕོ་བའི་མེ་དྲོད་སྐྱེད། །མ་ཞུའི་ནད་འབྱང་དྭངས་མ་རང་གནས་འཇོག །འབྲས་བུ་ནད་གཞན་གསོ་སླའི་གྲོགས་སུ་འགྱུར། །རྒྱུ་མ་བཅོས་པར་འབྲས་བུ་གསོ་འདོད་པ། །དུག་རྩ་མ་ཕྱུངས་ལོ་མ་བཅད་སྐྱུར་འདྲ། །ཁོང་ནད་ཐམས་ཅད་མ་ཞུས་སྐྱེད་པའི་ཕྱིར། །མ་ཞུའི་གསོ་དཔྱད་མཁས་པ་ཤིན་ཏུ་གཅེས། །རྒྱུ་ཉིད་གྲོལ་ན་འབྲས་བུ་ག་ལ་འབྱུང༌། །ཞེས་གསུངས་སོ།།

དེ་ནས་ཡང་དྲང་སྲོང་ཡིད་ལས་སྐྱེས་ཀྱིས་ཞུས་པ། །ཀྱེ་སྟོན་པ་དྲང་སྲོང་རིག་པའི་ཡེ་ཤེས་ལགས། །མ་ཞུའི་རྒྱུས་བསྐྱེད་འབྲས་བུ་གཅོང་ནད་དུ། །དེ་དག་རྒྱུ་རྐྱེན་གྱུར་ཚུལ་དབྱེ་བ་དང་། །རྟགས་དང་བཅོས་ཐབས་རྗེས་གཅོད་ཇི་ལྟར་ལགས། །འཚོ་མཛད་སྨན་པའི་རྒྱལ་པོས་བཤད་དུ་གསོལ། །ཞེས་ཞུས་པ་དང༌།  སྟོན་པས་གསུངས་པ།  ཀྱེ་དྲང་སྲོང་ཆེན་པོ་ཉོན་ཅིག མ་ཞུའི་རྒྱུས་བསྐྱེད་འབྲས་བུ་གཅོང་ནད་ལ། །གསར་པ་ལྷེན་དང་ལྕགས་དྲེག་མེ་དྲོད་ཉམས། །དུག་གཅོང་བད་ཀན་སྨུག་པོ་མཁྲིས་པའི་ནད། །རྙིང་པ་སྐྲན་དང་སྐྱ་རྦབ་དམུ་འོར་བཞི། །གཅོང་ཆེན་ཟད་བྱེད་རྣམ་པ་ལྔ་རུ་བཤད། །དུག་ནད་ཕྱིས་འབྱུང་གསར་གཞན་སྔར་བརྗོད་པས། །སྐབས་འདིར་རྙིང་པའི་གཅོང་ནད་སྡེ་ལྔར་བསྟན། །ཞེས་གསུངས་སོ། །བདུད་རྩི་སྙིང་པོ་ཡན་ལག་བརྒྱད་པ་གསང་བ་མན་ངག་གི་རྒྱུད་ལས་ཁོང་ནད་ཐམས་ཅད་ཀྱི་རྒྱུ་མ་ཞུ་བ་བཅོས་པའི་ལེའུ་སྟེ་དྲུག་པའོ།། །།


 

མཐའ་མའི་འདོན་ཐེངས་།: 20.12.2022 ཉིན། 3:08 PM