ལེའུ་དོན་དགུ་པ། བརྗེད་བྱེད་ཀྱི་ནད་གསོ་བ།

དེ་ནས་ཡང་དྲང་སྲོང་རིག་པའི་ཡེ་ཤེས་ཀྱིས་འདི་སྐད་ཅེས་གསུངས་སོ། །ཀྱེ་དྲང་སྲོང་ཆེན་པོ་ཉོན་ཅིག བརྗེད་བྱེད་དབྱེ་བ་རྟགས་དང་བཅོས་ཐབས་གསུམ།།

དབྱེ་བ་རླུང་མཁྲིས་བད་ཀན་དུག་གདོན་ལྔ།།
དེ་རྟགས་བྱུང་ཚུལ་སྙིང་འདར་མགོ་བོ་འཐོམ། །རྔུལ་འབྱུང་སྦོ་ཞིང་སྟོབས་ཆུང་རུས་ཤིང་ན།  །ཁ་ཆུ་སྣ་ཆུ་མང་ཞིང་ནད་ལངས་དུས། །འགྱེལ་ཞིང་སོ་འཆའ་རྐང་ལག་གཡབ་པ་དང༌། །ལྦུ་བར་སྐྱུག་ཅིང་མུན་པར་ཞུགས་སྙམ་སེམས། །རླུང་གྱུར་རྐང་ལག་འདར་རེངས་ཡང་ཡང་ལྡང༌། །མཁྲིས་པ་བཞིན་སེར་ཁ་སྐམ་ཞུ་དུས་ལྡང་། །བད་ཀན་ཚིགས་རིང་ཁྱད་པར་ཁ་ཆུ་མང༌། །དུག་གྱུར་ནད་རྟགས་མི་གསལ་ཤེས་པ་འཁྲུལ།  །གདོན་གྱུར་སྔར་བས་སྤྱོད་པ་གཞན་དུ་འགྱུར།།

བཅོས་ཐབས་ནི་རུ་ཧ་དང་སྣ་བཤལ་དང་།  །སྐྱུགས་ཁྲུས་རྣོ་བས་བུ་ག་དག་པར་སྦྱང༌། །འུག་པ་བྱ་རོག་བྱ་རྒོད་ཟེར་མོ་སྦྲུལ། །ཁྱི་སྤྲེ་རྟ་ཡི་ཆུ་སྒྲོ་བྲུན་དུད་བདུག །བ་སེར་མཁྲིས་པའི་ཁུ་བ་སྣ་སྨན་བཏང༌། །ཤུ་དག་རུ་རྟ་མར་རྙིང་སྦྲང་སྦྱར་བྱིན། །བོག་ཡུན་རིང་ན་སོར་མོ་ཉི་ཤུ་བསྲེག །འཇམ་རྩི་བུར་ཆང་བཏང་ཞིང་རླུང་གསང་བསྲོ། །སྲོག་རྩ་མྱོས་བྱེད་གསང་ལ་མེ་ཐུར་བྱ། །བྱེ་བྲག་གསོ་བ་སྨྱོ་བྱེད་དག་དང་འདྲ། །སྤྱིར་ན་སྨྱོ་བྱེད་བརྗེད་བྱེད་གང་ལ་ཡང༌། །ཁྲག་མཁྲིས་ཚ་བའི་ཕུགས་བཅས་བཅོས་མི་ལེན། །དེ་ཕྱིར་ཚ་བ་དག་པར་སྦྱང་བྱ་སྟེ། །དེ་འོག་ཟས་སྨན་དྲོད་བཅུད་མེ་ཐུར་བྱ། །སྨྱོ་དང་བརྗེད་བྱེད་ཕལ་ཆེར་གདོན་གྱུར་པས། །བསྐང་བཤགས་ཁྲུས་གཏོར་བདེན་བདར་ཞི་བས་བསྟེན། །ཆུ་གཏོར་ཀླུ་ཆོག་གཏོར་མས་བྲིད་ལ་བཅོས། །ཐ་མ་དྲག་པོའི་ལས་ཀྱིས་མཐའ་རུ་བསྐྱལ། །ཞེས་གསུངས་སོ།།

བདུད་རྩི་སྙིང་པོ་ཡན་ལག་བརྒྱད་པ་གསང་བ་མན་ངག་གི་རྒྱུད་ལས་བརྗེད་བྱེད་ཀྱི་ནད་གསོ་བའི་ལེའུ་སྟེ་བདུན་ཅུ་རྩ་དགུ་པའོ།། །།

མཐའ་མའི་འདོན་ཐེངས་།: 21.12.2022 ཉིན། 10:15 AM