༄༅། །གསོ་བ་རིག་པའི་བསྟན་བཅོས་སྨན་བླའི་དགོངས་རྒྱན་

རྒྱུད་བཞིའི་གསལ་བྱེད་བཻཌཱུར་སྔོན་པོའི་ཕྲེང་བ་ལས་

དུམ་བུ་གཉིས་པ་བཤད་པའི་རྒྱུད་ཀྱི་

རྣམ་བཤད་ཅེས་བྱ་བ་

བཞུགས་སོ།།

ལེའུ་དང་པོ། བཤད་རྒྱུད་ཀྱི་སྡོམ་ཚིག་བསྟན་པ།

༄༅། །དབང་པོ་རབ་ལ་ས་བོན་ལྟ་བུའི་རྩ་རྒྱུད་དེ་ལྟར་དུ་བསྟན་ཞིང་དགོངས་པ་བཀྲལ་ཟིན་ཀྱང༌། རྩ་བའི་རྒྱུད་ཀྱི་བཤད་པ་རྒྱས་པ་དང༌། ལག་ལེན་གྱི་སྐོར་མི་སྟོན་པས་སྐུའི་རྒྱུད་ཅེས་དོན་རྒྱ་ཆེ་བ་དུམ་བུ་གཉིས་པ་བཤད་པའི་རྒྱུད་ཚིག་དོན་མ་ལུས་གསལ་བར་སྟོན་པ་བར་སྣང་དུ་ཉི་ཟླ་ཤར་བ་ལྟ་བུ་འདི་ལ། གནས་བཅུ་གཅིག་གི་འབྲེལ་བཤད་པས་ལེའུའི་འབྲེལ་ཤུགས་སུ་རྟོགས་ལ། དེའང་རྩ་བ་མདོའི་གནས་ཐོག་མར་འབྱུང་བའི་རྒྱུ་མཚན་ནི། གནས་གཞན་རྣམས་འདི་ལ་བརྟེན་ནས་བསྐྱེད་པ་ཡིན་པའི་ཕྱིར། དང་པོར་བཞག་ནས་དེའི་རྗེས་སུ་ལུས་ཀྱི་ཆགས་ཚུལ་དང་འདྲ་དཔེ་དང་གནས་ལུགས་དང་མཚན་ཉིད་དང་ལས་དང་འཇིག་ལྟས་རྣམས་རིམ་པ་བཞིན་དུ་སྟོན་པས་གྲུབ་པ་ལུས་གནས་མ་བཤད་ན་ནད་འཇུག་པའི་གཞི་དང་སྨན་དཔྱད་བྱ་བའི་ཡུལ་ངོ་མི་ཤེས་པས་གྲུབ་པ་ལུས་ཀྱི་གནས་དང་པོར་བཤད། དེ་དག་ཁོང་དུ་ཆུད་ནས་དེ་ལ་བརྟེན་པའི་ནད་ཀྱི་རྒྱུ་རྐྱེན་ཞུགས་ཚུལ་མཚན་ཉིད་དབྱེ་བ་རྣམས་རིམ་པ་བཞིན་སྟོན་པ་འཕེལ་འགྲིབ་ནད་ཀྱི་གནས་བཤད་ཅིང༌། དེ་ལྟ་བུའི་ལུས་དང་ནད་ཀྱི་རྣམ་པར་གཞག་པ་ཇི་ལྟ་བ་ཁོང་དུ་ཆུད་པའི་རྗེས་སུ། ལུས་འདི་ཉིད་མི་ན་བར་གནས་པའི་ཐབས་རྒྱུན་དུས་གནས་སྐབས་ཀྱི་སྤྱོད་པ་བསྟན་པ་བྱ་བ་སྤྱོད་ལམ་གྱི་གནས་དང༌། ཟས་ཚུལ་ཟས་བསྡམ་ཟ་ཚོད་རན་པར་བཟའ་བའི་འཚོ་བ་ཟས་ཀྱི་གནས་གཉིས་རིམ་པ་བཞིན་བསྟན། དེའི་རྗེས་སུ་འཕེལ་འགྲིབ་ནད་ཀྱི་གཉེན་པོར་རོ་དང་ནུས་པ་སྦྱར་ཐབས་སྟོན་པ་སྦྱོར་བ་སྨན་གྱི་གནས་དང༌། ཆ་བྱད་དཔྱད་ཀྱི་གནས་བསྟན། དེ་ལྟ་བུའི་བྱེད་པས་ལུས་དེ་ཉིད་ནད་མེད་པ་གནས་པ་ཞིག་འབྱུང་བ་ལ་བསམས་ནས་ཐ་མལ་ནད་མེད་ཀྱི་གནས་བསྟན། གལ་ཏེ་གློ་བུར་གྱི་རྐྱེན་སྣ་ཚོགས་པས་ན་བའི་ཚེ་སོ་སོར་བརྟག་པ་ལ་ཉེས་པ་དངོས་སྟོན་པ་དང༌། ངན་གཡོ་སྐྱོན་དང་སྤང་བླང་མུ་བཞིའི་སྒོ་ནས་བརྟག་པ་ངོས་བཟུང་རྟགས་ཀྱི་གནས་བསྟན། དེས་ནད་ཀྱི་དམིགས་ཕྱེ་ནས་ཇི་ལྟར་གསོ་བ་ལ་སྤྱིའི་གསོ་ཚུལ་དང་ཁྱད་པར་གྱི་གསོ་ཚུལ་གཉིས། གསོ་ཐབས་ལ་ཐུན་མོང་བ་དང༌། གསོ་ཐབས་དངོས་ཏེ་བཞི་པོའི་སྒོ་ནས་གསོ་བྱེད་ཐབས་ཀྱི་གནས་བསྟན། དེ་དག་ཐམས་ཅད་གསོ་བ་པོ་སྨན་པ་ལ་རག་ལུས་པས་བྱ་བྱེད་སྨན་པའི་གནས་ཀྱིས་ཀུན་བསྡུས་པའི་ཚུལ་དུ་བསྟན་པ་ཡིན་ནོ།།

          དེ་ཡང་འགྲོ་བ་ཕལ་ཆེར་གྱི་སྣང་བ་ལ། བཤད་པའི་རྒྱུད་འདི་ཉིད་ཤེས་པས་ཁ་བཤད་ཙམ་མ་གཏོགས་དོན་ལག་ཏུ་བླང་བྱའི་རིམ་པ་ལ་མི་ཕན་ནོ་བསམ་པ་དང༌། སྨན་པ་འདི་དག་བཤད་པ་ལ་ཤིན་ཏུ་མཁས་ཀྱང་ལག་ལེན་གྱི་ཕྱོགས་ལ་རྨོངས་པའོ་སྙམ་པ་དང༌། དེའི་དོན་གྱིས་བཤད་པའི་རྒྱུད་འདི་ལ་མི་སློབ་པར་ཐོག་མ་ནས་རྒྱུད་ཕྱི་མ་ལ་སློབ་ཅིང༌། དེའི་ལག་ལེན་འགའ་ཞིག་གི་ཕྱོགས་ཙམ་མཐོང་བ་དང་མན་ངག་མྱོང་བཅོས་འགའ་མཐོང་བས་ཆོག་པར་འཛིན་པ་ཞིག་སྣང་ཡང༌། ལག་ལེན་སྟོན་བྱེད་ཀྱི་ཚིག་མ་ཤེས་པར་དོན་རྟོགས་འདོད་པ་རྣམས་ནི་ངོ་མཚར་བའི་གནས་ཡིན་ནོ། །དེ་ཅིའི་ཕྱིར་ཞེ་ན། གང་ཞིག་བཤད་པའི་རྒྱུད་མི་ཤེས་པ་དེས་ནི་ལུས་ཀྱི་མཚན་ཉིད་མི་ཤེས་སོ། །ལུས་ཀྱི་མཚན་ཉིད་མི་ཤེས་པ་དེས་ནི་ནད་ཀྱི་རང་བཞིན་མི་ཤེས་སོ། །ནད་ཀྱི་རང་བཞིན་མི་ཤེས་པ་དེས་ནི་སྨན་དཔྱད་ཟས་སྤྱོད་ཀྱི་ཚུལ་མི་ཤེས་སོ། །སྨན་དཔྱད་ཟས་སྤྱོད་ཀྱི་ཚུལ་མི་ཤེས་པ་དེས་ནི་གསོ་བ་རིག་པའི་ཕྱོགས་ཙམ་ཡང་མི་ཤེས་པ་ཡིན་ནོ། །དེས་ན་གསོ་བ་རིག་པ་མི་ཤེས་པ་དེས་གསོ་ཐབས་ཀྱི་ལག་ལེན་ཇི་ལྟར་ཤེས། དཔེར་ན་མིག་གི་དབང་པོ་མེད་པར་གཟུགས་ཀྱི་ལྟད་མོ་མཐོང་པར་འདོད་པ་བཞིན་མུན་པའི་གནས་སུ་རྣམ་པར་འཁྱམས་པ་ཡིན་ནོ། །རྒྱུ་མཚན་དེ་རྣམས་ཀྱི་ཕྱིར་ཐོག་མ་ཉིད་ནས་རྩ་བའི་རྒྱུད་དང༌། བཤད་པའི་རྒྱུད་འདི་ཁོ་ན་ལ་ཡང་དག་པར་སྦྱངས་ནས། གནས་བཅུ་གཅིག་པོའི་དོན་ཐམས་ཅད་ཁོང་དུ་ཆུད་པའི་ཚེ་མན་ངག་རྒྱུད་དང་ཕྱི་མ་རྒྱུད་སོགས་ལའང་གཞུག་པར་བྱ་ཞིང༌། རིམ་པས་ལག་ལེན་རྣམས་གཞུང་ཚིག་ཇི་ལྟ་བ་བཞིན་དུ་ཉམས་སུ་ལེན་དགོས་པ་ཡིན་ནོ།།

          གཞུང་འདིའི་དེ་ནས་ཞེས་འབྱུང་བ་ནི། འདིའི་སྐབས་ཀྱི་རྒྱ་དཔེ་ལ་ཨ་ཐཱ་ཞེས་བྱ་བ་ཡོད་ཅིང༌། ཨོཾ་སྔ་མ་ཅན་གྱི་ཡི་གེ་གཉིས་པོ་དེ་ལ་བརྟེན་ནས་སྔོན་ལྷ་ཆེན་པོ་ཚངས་པས་ཚེའི་རིག་བྱེད་དམ་གསོ་དཔྱད་འབུམ་པ་ཞེས་བྱ་བ་དྲན་པས་ན་བཀྲ་ཤིས་པ་དང༌། འགྲོ་བ་ཉམ་ཐག་པ་རྣམས་ཀྱི་དབང་དུ་བྱ་བ། བྱ་བ་སྔ་མ་འགའ་ཞིག་གྲུབ་ཚར་བའི་དེ་མ་ཐག་པ་རྣམས་ཀྱི་དོན་ཡིན་ཏེ། འགྲེལ་པ་ཟླ་ཟེར་དུ། འདིར་དེ་ནས་ཞེས་བྱ་བའི་སྒྲ་ནི་བཀྲ་ཤིས་པ་དང༌། །དབང་དུ་བྱ་བ་དང༌། དེ་མ་ཐག་པའི་དོན་གྱི་དབང་དུ་བྱས་པ་ཡིན་ཏེ། དེ་ཡང་ཡི་གེ་ཨོཾ་དང་ཨ་ཐཱའི་སྒྲ། །གཉིས་པོ་འདི་དག་སྔོན་ཚངས་པའི། །མཁུར་ཚོས་བརྟོལ་ནས་བྱུང་བ་སྟེ། །དེས་ན་འདི་དག་བཀྲ་ཤིས་ཡིན། །ཞེས་སྨོས་པ་ཡིན། བཀྲ་ཤིས་པ་ལ་སོགས་པ་ནི་དེ་འདོན་པར་བྱེད་པ་རྣམས་བར་ཆད་མེད་པར་རབ་ཏུ་འཇུག་ཅིང་མངོན་པར་འདོད་པའི་དོན་འགྲུབ་པ་འབྱུང་བར་འགྱུར་བ་ཡིན་ནོ། །དབང་དུ་བྱ་བ་ནི། ཚེ་འདོད་པ་ལ་ཕན་པའི་བསྟན་བཅོས་ཀྱི་དབང་དུ་བྱས་པ་ཡིན་ཏེ། གང་འདི་ནས་ཉེ་བར་བརྩམས་ཏེ་གཞུང་ཡོངས་སུ་རྫོགས་པ་དེ་ཐམས་ཅད་ནི་ཚེ་འདོད་པ་རྣམས་ལ་ཕན་པ་ཡིན་ནོ། །དེ་མ་ཐག་པ་ཡང་ལྷ་ལ་ཕྱག་བྱས་པའི་རྗེས་ཐོག་ཉིད་ལ་ཚེ་རིང་བར་འདོད་པ་རྣམས་ལ་ཕན་པར་བཤད་པར་བྱའོ་ཞེས་གསུངས་ལ། གཞན་ཡང་རབ་ཏུ་བསྔགས་པ་དེ་སྲུངས་ཤིག་ཅེས་དང༌། བསོད་ནམས་ལེན་པ་དང༌། དམ་བཅའ་བ་རྣམས་ཀྱི་དོན་ཡིན་ཏེ། སྒྲོལ་མར། སྭཱ་ཧཱ་ཨོཾ་དང་ཡང་དག་ལྡན་མ། །ཞེས་པའི་རྒྱ་དཔེ་ལ། སྭཱ་ཧཱ་པྲ་ཎ་ཝ་སཾ་ཡུཀྟ་ཞེས་ཡོད་པའི་པྲ་ཎ་ཝ་ནི། ཨོཾ་གྱི་མངོན་བརྗོད་ཡིན་པ་དྲང་ཐད་དུ་བསྒྱུར་ན་རབ་ཏུ་བསྔགས་པ་ཞེས་བྱ་བའི་དོན་དང༌། ཨ་ཝ་རཀྵ་སྲུངས་ཤིག་ཅེས་པའི་སྒྲ་ལས་དྲངས་ན་ཤིས་པ་བརྗོད་པའི་དོན་དང༌། ཟླ་གྲགས་ཞབས་ཀྱི་སྒྲོན་གསལ་ལས། །ཨོཾ་ནི་བསོད་ནམས་ལེན་པ་པོ། །ཞེས་འབྱུང་བས་འདོད་པའི་ལྷ་ལ་འདུད་པར་བྱ་བའི་དོན་དང༌། བཤད་པར་དམ་བཅའ་བ་སོགས་དོན་གཞན་ཡང་མང་པོ་ལ་འཇུག་པར་གསུངས་ཏེ། རྡོ་རྗེ་རྩེ་མོ་ལས། ཡི་གེ་ཨོཾ་ནི་ཅི་ཞིག་བཤད། །མཆོག་དང་ནོར་སྟེར་དཔལ་དང་གཡང༌། །སྐལ་བཟང་རྣམ་པར་དག་ལྡན་ཞིང༌། །དམ་བཅའ་བ་དང་བཀྲ་ཤིས་དོན། །ནོར་བུ་འཛིན་པའི་སྙིང་པོ་ཡིན། །ཞེས་འབྱུང་བ་སོགས་དེ་ལྟར་བཤད་པའི་དོན་ཐམས་ཅད་འདིར་ཡང་བཤད་དུ་ཡོད་མོད། འོན་ཀྱང་བོད་སྐད་དུ་བསྒྱུར་ཟིན་པའི་དེ་ནས་ཞེས་པའི་དངོས་བསྟན་གྱི་སྒྲ་ནི་སྔ་ཕྱི་མཚམས་སྦྱར་བ་དང༌། དེ་མ་ཐག་པ་དང༌། དམ་བཅའ་བ་དང༌། དབང་དུ་བྱ་བ་རྣམས་ཀྱི་དོན་ཡིན་ནོ། །དེ་ཡང་སྨན་གྱི་གྲོང་ཁྱེར་ལྟ་ན་སྡུག་གི་དབུས་ཀྱི་གཞལ་མེད་ཁང་ཆེན་པོར་འཁོར་སྡེ་བཞི་འདུས་པ་ལ་དཔལ་ལྡན་རྩ་བ་ཐུགས་ཀྱི་རྒྱུད་བསྟན་ཚར་བའི་རྗེས་སུ་བྱ་བ་གཞན་གྱིས་བར་མ་ཆོད་པའི་དེ་མ་ཐག་པ་དེ་ནས། ཆོས་སྨྲ་བ་པོ་འཇིག་རྟེན་པའི་ལེགས་ལྡན་རྣམས་ལས་ཁྱད་པར་དུ་འཕགས་པའི་སྟོན་པ་ཉོན་མོངས་པ་ལ་སོགས་པའི་བདུད་མཐའ་དག་བཅོམ་པའོ། །ཡང་ན་དབང་ཕྱུག་ལ་སོགས་པའི་ཡོན་ཏན་ཀུན་དང་ལྡན་ཞིང༌། མྱ་ངན་གྱི་གནས་ལས་ཡོངས་སུ་འདས་པའི་སངས་རྒྱས་བཅོམ་ལྡན་འདས་ཏེ་བྱེ་བྲག་ཏུ་གདུལ་བྱ་རིགས་ཅན་གསུམ་གྱི་སྲོག་འཚོ་བར་མཛད་པས་ན། གནས་སྐབས་སུ་མཚན་སྨན་གྱི་བླ་མ་ཞེས་བྱ་བ་དེའི་གཟུགས་སྐུའི་ཁྱད་པར་ནི་ཡིད་བཞིན་གྱི་ནོར་བུ་བཻ་ཌཱུརྱ་སྔོན་པོ་ལྟར་གསལ་ཞིང་དྭངས་ལ་ཉི་མ་ལ་སོགས་པ་འཇིག་རྟེན་ན་འོད་ཆེ་བར་གྲགས་པ་ཐམས་ཅད་ཀྱི་རྒྱལ་པོ་ལྟར་གཟི་བརྗིད་ཀྱི་ཕུང་པོ་མཚན་དང་དཔེ་བྱད་བཟང་པོས་ཡང་དག་པར་བརྒྱན་པ་སྟེ། དེ་འདྲ་བའི་ཁྱད་ཆོས་ཕུན་སུམ་ཚོགས་པ་དང་ལྡན་པའི་སངས་རྒྱས་དེས་རྩ་བའི་རྒྱུད་གསུངས་པའི་དུས་ཀྱི་ཏིང་ངེ་འཛིན་དེ་ལས་བཞེངས་ཏེ། སླར་ཡང་དུམ་བུ་གཉིས་པ་བཤད་པ་སྐུའི་རྒྱུད་འདི་ཉིད་གསུང་བའི་སླད་དུ་སྨྲ་བའི་སེང་གེ་རྣམ་པར་བསྒྱིངས་པ་ཞེས་བྱ་བའི་སྨན་གྱི་ཏིང་ངེ་འཛིན་ལ་སྙོམས་པར་ཞུགས་ཏེ་ཡང་དག་པར་གནས་སོ། །ཏིང་ངེ་འཛིན་གྱི་ཁྱད་པར་དེ་ལྟ་བུ་ལ་སྙོམས་པར་ཞུགས་མ་ཐག་ཏུ་སྤྲུལ་པ་འབྱུང་བའི་སྔ་ལྟས་སུ་བཅོམ་ལྡན་འདས་ཀྱི་དབུའི་གཙུག་ཏོར་མཆོག་ཏུ་མཐོ་ཞིང་ཟླུམ་པའི་དབུས་རྣམ་པར་སྣང་མཛད་ཀྱི་དབུའི་གཙུག་ནས་འོད་ཟེར་ཁ་དོག་མི་འདྲ་བ་བརྒྱ་སྟོང་འབུམ་ཕྲག་དུ་མ་ཕྱོགས་བཅུར་འཕྲོས་པས་ཕྱོགས་བཅུ་པོ་དེ་རྣམས་ན་གནས་པའི་འགྲོ་བ་རིགས་དྲུག་གིས་བསྡུས་པའི་སེམས་ཅན་ཐམས་ཅད་ཀྱི་ལུས་ཀྱི་ཉེས་པ་སྟེ། སྲོག་གཅོད་པ་དང༌། མ་བྱིན་པར་བླངས་པ་དང༌། མི་ཚངས་པར་སྤྱད་པའི་སྡིག་པའི་སྐྱོན་ཐམས་ཅད་ཕྱིར་བསལ། ཁྱད་པར་དུ་རླུང་མཁྲིས་བད་ཀན་ལས་གྱུར་པའི་ནད་སོགས་མདོར་ན་ལུས་ཀྱི་ཟུག་རྔུ་ཐམས་ཅད་ཞི་བར་བྱས་ནས། འོད་ཟེར་དེ་རྣམས་སླར་ཡང་རང་གི་གནས་དབུའི་གཙུག་ཏོར་ཉིད་དུ་འདུས་པར་གྱུར་པ་ལས་དེ་ལྟར་འདུས་མ་ཐག་ཏུ་དབུའི་གཙུག་ཏོར་གྱི་དབུས་དེ་ནས་བཅོམ་ལྡན་འདས་རང་ཉིད་ཀྱི་སྤྲུལ་པའི་སྟོན་པ་ཉོན་མོངས་པ་དང་ཤེས་བྱའི་སྒྲིབ་པ་བག་ཆགས་དང་བཅས་པ་ཟད་པར་སྤངས་པ་ལས་བྱུང་བའི་ཆོས་ཀྱི་དབྱིངས་རྣམ་པར་དག་པའི་ཡེ་ཤེས་རྣམ་པར་སྣང་མཛད་ཀྱི་ངོ་བོ་ཐ་སྙད་དུ་མཚན་དྲང་སྲོང་རིག་པའི་ཡེ་ཤེས་ཞེས་བྱ་བ་ཞིག་སྐུའི་རང་བཞིན་གཙུག་ཏོར་གྱི་དབུས་ལས་མངོན་པར་སྤྲུལ་ཏེ། གཡུ་ཐོག་སྙིང་ཐིག་ལས། སྐུ་སྤྲུལ་རྣམ་སྣང་རིག་པའི་ཡེ་ཤེས་དཀར། །མཚན་དཔེ་རྒྱན་རྫོགས་འཁོར་ལོ་ལྷུང་བཟེད་བསྣམས། །བཤད་རྒྱུད་སྟོན་མཛད་ཆོས་དབྱིངས་ཡེ་ཤེས་དང༌། །གཏི་མུག་རྒྱུ་འབྲས་ནད་སེལ་དབང་བསྐུར་རོ། །ཞེས་པ་ལྟར་གྱི་སྐུ་རང་ཉིད་ཀྱི་མདུན་གྱི་བར་སྣང་ལ་སེམས་དཔའི་སྐྱིལ་མོ་ཀྲུང་གིས་བཞུགས་པའི་རྫུ་འཕྲུལ་མངོན་སུམ་དུ་བསྟན་པ་ལས་ཞེས་བྱ་བའི་དོན་ཏོ། །དེ་ཡང་ཆོས་སྟོན་པའི་དྲང་སྲོང་སྐུ་ལས་སྤྲུལ་ཞེས་པའི་ཚིག་འདིས་བཤད་པའི་རྒྱུད་འདི་ཉིད་རྒྱ་ཆེ་བ་སྐུའི་རྒྱུད་དུ་ཤེས་པར་བྱ་བའི་ཆེད་ཡིན་ནོ། །གོང་དུ་རྩ་རྒྱུད་གསུངས་པའི་སྐབས་སུ་བཅོམ་ལྡན་འདས་ཀྱི་གསུང་ལས་སྤྲུལ་པའི་ཞུ་བ་པོ་ཐ་སྙད་དུ་མཚན་དྲང་སྲོང་ཡིད་ལས་སྐྱེས་ཞེས་བྱ་བ་དེས་བཤད་པའི་རྒྱུད་གསུང་བ་ལ་མངོན་དུ་ཕྱོགས་པའི་སྐབས་འདིར་ཡང་སྟོན་པ་བཅོམ་ལྡན་འདས་རིག་པའི་ཡེ་ཤེས་དང་བཅས་པ་ལ་འཁོར་གཞན་རྣམས་ཀྱང་གུས་པ་བསྐྱེད་པའི་ཆེད་དུ་ཕྱག་དང་བསྐོར་བ་ལན་གསུམ་དུ་བྱས་ནས་གཡོན་ཕྱོགས་སུ་པུས་མོ་གཡས་པའི་ལྷ་ང་ས་ལ་བཙུགས་ཏེ་དྲི་བའི་ཚིག་འདི་སྐད་ཅེས་ཞུས་སོ།།

          ཀྱེ་སྟོན་པ་དྲང་སྲོང་རིག་པའི་ཡེ་ཤེས་ལགས། །ཞེས་གུས་པའི་ཞེ་ས་དང་བཅས་པས་མཚན་ནས་བོས་ཏེ། གསོ་བ་རིག་པའི་གཞུང་ལུགས་ཐམས་ཅད་ཀྱི་བསྡུས་དོན་དཔལ་ལྡན་རྩ་བའི་རྒྱུད་དེ་ལྟར་གསུངས་པ་དང་བདག་ཅག་རྣམས་ཀྱིས་རྟོགས་ཤིང་ཁོང་དུ་ཆུད་ལགས་ནའང་དེའི་སྐབས་སུ་རྩ་བའི་རྒྱུད་དང༌། བཤད་པའི་རྒྱུད་དང༌། མན་ངག་རྒྱུད་དང༌། ཕྱི་མ་རྒྱུད་དང༌། དེ་ལྟར་རྒྱུད་བཞི་རུ་ཤེས་པར་བྱའོ། །ཞེས་གསུངས་པའི་ནང་ནས་དུམ་བུ་གཉིས་པ་བཤད་པའི་རྒྱུད་ལ་ཇི་ལྟར་བསླབ་ཅིང་ཉམས་སུ་བླང་བར་བགྱི་ཞེས་འདྲི་ན། ལུས་ཅན་རྣམས་ཀྱི་སྲོག་འཚོ་བར་མཛད་པ་སྨན་པའི་རྒྱལ་པོ་ཁྱེད་ཀྱིས་བདག་ཅག་རྣམས་ལ་བཀའ་སྩོལ་ཅིག དེ་སྐད་ཅེས་ཞུས་པ་དང༌། བཅོམ་ལྡན་འདས་ཀྱི་སྐུ་ལས་སྤྲུལ་པའི་སྟོན་པ་དྲང་སྲོང་རིག་པའི་ཡེ་ཤེས་དེས་དྲང་སྲོང་ཡིད་ལས་སྐྱེས་ལ་སོགས་པའི་འཁོར་རྣམས་ལ་འདི་སྐད་ཅེས་གསུངས་སོ། །ཀྱེ་དྲང་སྲོང་ཆེན་པོ་ཡིད་ལས་སྐྱེས་ལེགས་པར་ཉོན་ལ་ཡིད་ལ་ཟུངས་ཤིག་ཅེས་གདམས་ནས།

          དུམ་བུ་གཉིས་པ་བཤད་པའི་རྒྱུད་ལ་བསླབ་པར་འདོད་པ་རྣམས་ཀྱིས་ནི་འདི་ལྟར་ཤེས་པར་བྱ་དགོས་ཏེ། དེའང་དྲན་ཉེ་གདགས་འདུལ་མཛོད་སོགས་མདོ་དང་བདེ་དུས་སོགས་རྒྱུད་སྡེས་མཚོན་མདོ་རྒྱུད་ཕལ་ཆེར་གྱི་དགོངས་པ་བཞིན་ལས་ཀྱི་སར་སྐྱེས་ཤིང་ཁམས་དྲུག་དང་ལྡན་པས་དམ་པའི་ཆོས་ལ་སྤྱོད་པའི་སྐལ་བ་དང་ལྡན་པའི་མི་ལུས་ནི་ལྷ་ལ་སོགས་པའི་འགྲོ་བ་གཞན་རྣམས་ཐམས་ཅད་ཀྱིས་བསྔགས་ཤིང་སྨོན་པའི་གནས་ཡིན་པས་ན། འགྲོ་བ་རིགས་དྲུག་གི་གཙོ་བོར་གྱུར་པ་ཞེས་སྨོས་པ་ཡིན་ལ། དེ་འདྲ་བའི་ཁྱད་ཆོས་དང་ལྡན་པའི་མིའི་ལུས། དེ་ལ་རླུང་མཁྲིས་བད་ཀན་གསུམ་རང་བཞིན་གྱིས་གནས་པས་ནད་ཀྱི་ངོ་བོར་གྲུབ་ཀྱང་རྐྱེན་དང་མ་ཕྲད་པའི་སྐབས་སུ་བག་ལ་ཉལ་གྱི་ཚུལ་དུ་ཡོད་པས་མི་ན་བ་ཡིན་ཞིང༌། ལུས་མི་ན་བ་དེ་ཉིད་ཀྱི་ངང་ལ་ཡུན་རིང་དུ་གནས་པ་དང༌། གལ་ཏེ་དུས་གདོན་ཟས་སྤྱོད་ཀྱི་དབང་གིས་ན་བའི་ཚེ་ན་མྱུར་དུ་གསོ་བ་དང༌། ཇི་སྲིད་ཚེའི་འཕེན་པ་མ་རྫོགས་ཀྱི་བར་དུ་གནས་པ་ཚེ་རིང་བ་དང༌། འཇིག་རྟེན་མི་དང་དམ་པའི་ཆོས་ལུགས་ཀུན་དང༌། ཟང་ཟིང་དང་འཕགས་པའི་ནོར་རྣམས་དང༌། ཚེ་འདི་དང་ནམ་གཞག་གཏན་གྱི་བདེ་བ་དང༌། མདོར་ན་འཇིག་རྟེན་དང་འཇིག་རྟེན་ལས་འདས་པའི་དགེ་ལེགས་ཐམས་ཅད་ཅིག་ཅར་དུ་བསྒྲུབ་པར་བྱ་བའི་ཕྱིར་གསོ་བ་རིག་པའི་གནས་འདི་ཉིད་ལ་བསླབ་པར་བྱའོ་ཞེས་འབྲེལ་ལོ། །དེ་ལས་ཀྱང་ཕྱོགས་རེ་རེ་ཙམ་བསྒྲུབ་པའི་ཐབས་ནི་ཤིན་ཏུ་མང་མོད། བཤད་མ་ཐག་པའི་དོན་ཐམས་ཅད་ཆོས་གཅིག་གིས་བསྒྲུབ་པའི་ཐབས་ནི། གསོ་བ་རིག་པ་ལས་གཞན་དུ་མེད་དོ་ཞེས་རིག་པའི་གནས་གཞན་རྣམས་ལས་ཕུལ་དུ་བྱུང་བར་སྟོན་པའི་ཚིག་གོ། །དེ་ཡང་སྲིད་ཞིའི་ཕུན་ཚོགས་ཐམས་ཅད་སྒྲུབ་པའི་རྒྱུའི་གཙོ་བོ་གསོ་བ་རིག་པའི་དོན་མ་ལུས་པ་རྣམས་མདོར་ཧྲིལ་ཀྱིས་བསྒྲིལ་ནས་བསྡུས་ན། གསོ་བྱའི་ཡུལ་དང༌། གསོ་བར་བྱེད་པའི་གཉེན་པོ་དང༌། ཇི་ལྟར་གསོ་བར་བྱ་བའི་ཚུལ་དང༌། གསོ་བ་པོ་སྨན་པ་དང་རྣམ་པ་བཞི་རུ་འདུས་པར་བཤད་པ་ཡིན་ནོ།།

          དེ་ལྟར་གསོ་བ་རིག་པའི་དོན་ཐམས་ཅད་རྣམ་པ་བཞི་རུ་བཤད་པའི་དང་པོ་གསོ་བར་བྱ་བའི་ཡུལ་བསྟན་པ་ལ་གཉིས་ཏེ། གང་གི་ཞེས་པ་ཚེ་རིང་ཆོས་ནོར་བདེ་བ་སོགས་ལ་སྤྱི་ཁྱབ་ཀྱི་སྒྲ་དེ་རྣམས་བསྒྲུབ་པའི་དོན་དུ་གསོ་བ་ལུས་ཉིད་དང་ནི། གང་གསོ་བར་བྱ་བའི་ལུས་དེ་ལས་བྱུང་བའི་ནད་དང༌། རྣམ་པ་གཉིས་སུ་བསྟན་ནོ། །གཉིས་པ་ནད་དེ་ལ་གསོ་བར་བྱེད་པའི་གཉེན་པོ་ནི་རྣམ་པ་བཞི་སྟེ། སྤྱོད་ལམ་དང༌། ཟས་དང༌། སྨན་དང༌། དཔྱད་ཀྱི་གནས་རྣམས་སོ། །གསུམ་པ་ནད་དེ་ལྟ་བུ་ལ་གཉེན་པོ་བཞི་པོས་ཚུལ་ཇི་ལྟར་གསོ་བར་བྱ་བ་ལའང་གཉིས་ཏེ། ལུས་ནད་མེད་ཐ་མལ་དུ་གནས་ཤིང་ཡུན་རིང་དུ་འཚོ་བར་བྱ་བའི་ཚུལ་དང༌། རྣམ་པར་གྱུར་ནས་ན་བ་དེ་ཉིད་གསོ་བར་བྱ་བའོ། །འདིའི་ཕྱི་མ་རྣམ་གྱུར་ན་བ་དེ་ལའང་སོ་སོར་ངོས་བཟུང་བ་བརྟག་པའི་ཐབས་དང་ནི། འཁྲུལ་མེད་དུ་རྟོགས་ནས་ཇི་ལྟར་གསོ་བར་བྱ་བའི་གསོ་ཚུལ་དང༌། གཉེན་པོ་གང་གིས་གསོ་བའི་གསོ་ཐབས་དང་རྣམ་པ་གསུམ་དུ་བཤད་དོ། །བཞི་པ་དེ་ལྟར་གསོ་བར་བྱེད་པའི་གསོ་བ་པོ་སྨན་པ་ཁོ་ན་སྟེ་གཅིག་པུ་ཉིད་དོ།།

          དེ་ལྟར་གསོ་བྱ་གསོ་བྱེད་ཇི་ལྟར་གསོ་བ་པོ་སྟེ་རྩ་བ་བཞི་དང༌། དེ་ལས་གྱེས་པ་དང་ལུས་དང་ནད་གཉིས་ཟས་སྤྱོད་སྨན་དཔྱད་བཞི། ནད་མེད་རིང་དུ་གནས་པ། ནད་ཀྱི་བརྟག་ཐབས་གསོ་ཚུལ་བཅོས་ཐབས་བཞི། སྨན་པའི་བྱ་བ་སྟེ་ཡན་ལག་བཅུ་གཅིག་གོ །སྟེ་ཞེས་པ་ལྷག་མ་འདྲེན་པའི་སྒྲ་སྟེ་བཤད་མ་ཐག་པའི་རྩ་བ་ཡན་ལག་དང་བཅས་པ་འདི་དག་བཤད་པའི་རྒྱུད་ཀྱི་སྡོམ་ཚིག་ཡིན་ནོ་ཞེས་གསུངས་སོ།།

          བདུད་རྩི་སྙིང་པོ་ཡན་ལག་བརྒྱད་པ་གསང་བ་མན་ངག་གི་རྒྱུད་ལས་དུམ་བུ་གཉིས་པ་བཤད་པའི་རྒྱུད་ཀྱི་སྡོམ་ཚིག་བསྟན་པའི་ལེའུ་སྟེ་དང་པོའོ།། །།

མཐའ་མའི་འདོན་ཐེངས་།: 05.09.2023 ཉིན། 9:34 AM