སྨན་རྩིས་དྲ་བ། - ཕྱི་མ་རྒྱུད།

ལེའུ་དང་པོ། རེག་པ་རྩ་ལ་ནད་ངོས་བཟུང་བ།

བརྗོད་བྱ་སྤེལ་མཁན། རྩོམ་སྒྲིག་པ། (admin) ཟླ་ཚེས། 22.11.2017
ཕྱི་མ་རྒྱུད། >> ལེའུ་དང་པོ། རེག་པ་རྩ་ལ་ནད་ངོས་བཟུང་བ།

༄༅། །དེ་ནས་སྟོན་པ་བཅོམ་ལྡན་འདས་འཚོ་མཛད་སྨན་གྱི་བླ་བཻཌཱུརྱ་འོད་ཀྱི་རྒྱལ་པོ་དེས་ཏིང་ངེ་འཛིན་དེ་ལས་བཞེངས་ཏེ། ཐོགས་པ་མེད་པ་ཞེས་བྱ་བའི་སྨན་གྱི་ཏིང་ངེ་འཛིན་ལ་སྙོམས་པར་ཞུགས་སོ། །སྙོམས་པར་ཞུགས་མ་ཐག་ཏུ་སྐུའི་གསང་བ་ལས་འོད་ཟེར་ཁ་དོག་བརྒྱ་སྟོང་དུ་མ་ཕྱོགས་བཅུར་འཕྲོས་པས་ཕྱོགས་བཅུའི་འགྲོ་བ་སེམས་ཅན་ཐམས་ཅད་ཀྱི་སེམས་ཞུམ་པ་དང་སྐྲག་པའི་ཉེས་སྐྱོན་ཐམས་ཅད་བསལ། །ལུས་དང་ཚེ་ལ་བར་དུ་གཅོད་པའི་ནད་དང་གདོན་ཐམས་ཅད་ཞི་བར་བྱས་ཏེ་སླར་སྐུའི་གསང་བར་འདུས་པ་ལས། སྤྲུལ་པའི་སྟོན་པ་དྲང་སྲོང་རིག་པའི་ཡེ་ཤེས་ཞེས་བྱ་བ་ཞིག་ཕྲིན་ལས་ལས་སྤྲུལ་ཏེ་མདུན་གྱི་བར་སྣང་ལ་བཞུགས་པ་ལས། གསུང་གི་སྤྲུལ་པ་དྲང་སྲོང་ཡིད་ལས་སྐྱེས་ཞེས་བྱ་བ་དེས་སྟོན་པ་ལ་ཕྱག་དང་སྐོར་བ་བྱས་ནས་འདི་སྐད་ཅེས་ཞུས་སོ། །ཀྱེ་སྟོན་པ་དྲང་སྲོང་རིག་པའི་ཡེ་ཤེས་ལགས། །རྒྱུད་སྡེ་བཞི་ལ་བསླབ་པར་བྱའོ་གསུངས་པ་ལས། །རྩ་རྒྱུད་བཤད་རྒྱུད་མན་ངག་རྒྱུད་དང་གསུམ། །དབང་པོ་རབ་འབྲིང་ཐ་མའི་དོན་དུ་གསུངས་ལགས་ན། །ད་ནི་ཕྱི་མའི་རྒྱུད་ལ་ཇི་ལྟར་བསླབ་པར་བགྱི། །འཚོ་མཛད་སྨན་པའི་རྒྱལ་པོས་བཤད་དུ་གསོལ། །ཞེས་ཞུས་པ་དང༌། །ཕྲིན་ལས་ཀྱི་སྤྲུལ་པ་དྲང་སྲོང་རིག་པའི་ཡེ་ཤེས་དེས་འདི་སྐད་ཅེས་གསུངས་སོ། །ཀྱེ་དྲང་སྲོང་ཆེན་པོ་ཡིད་ལས་སྐྱེས། རྒྱུད་བཞིའི་ཐ་མ་ཕྱི་མའི་རྒྱུད་ལ་བསླབ་པ་ནི། །ནད་དང་གཉེན་པོ་གསོ་བའི་ཐབས་གསུམ་ལས༌། གསོ་ཡུལ་ནད་ལ་བཞི་བརྒྱ་རྩ་བཞིར་གསུངས། །རྒྱས་པར་ཕྱེ་ན་སྟོང་དང་ཉིས་བརྒྱ་ཡོད། །མདོ་རུ་བསྡུས་པས་བཅོས་དགོས་བརྒྱ་རྩ་གཅིག །གསོ་བྱེད་གཉེན་པོ་སྟོང་དང་རྩ་གཉིས་ཏེ། །མདོ་རུ་བསྡུས་པས་སྨན་དཔྱད་ཟས་སྤྱོད་བཞི། །སྨན་ལ་ཞི་སྦྱང་ཞི་ལ་བསིལ་དྲོད་གཉིས། །སྦྱོང་བྱེད་ཀུན་ལ་དྲག་དང་འཇམ་པ་གཉིས། །དཔྱད་ལ་འཇམ་རྩུབ་ཟས་ལ་ཕན་གནོད་གཉིས། །སྤྱོད་ལམ་དྲག་དལ་ཟས་སྨན་སྤྱིར་འགྲོའོ། །དེ་ལྟར་གཉེན་པོ་བཅུ་ཡིས་ནད་ཀུན་འཇོམས། །གསོ་ཐབས་ལག་ལེན་སུམ་བརྒྱ་དྲུག་ཅུ་ཡོད། །མདོར་བསྡུས་བརྟག་ཐབས་གསོ་ཚུལ་བཅོས་ཐབས་གསུམ། །བརྟག་ཐབས་རེག་མཐོང་གཉིས་ཀྱིས་ནད་ངོས་བཟུང༌། །འཁྲུལ་གཞི་གལ་འགག་བཞི་ཡིས་དཔྱད་འཕྲང་བསལ། །གསོ་ཚུལ་དགུ་ཡིས་ནད་དང་གཉེན་པོ་སྤྲད། །གསོ་ཐབས་ལག་ལེན་བཅོ་བརྒྱད་ནད་དཔུང་གཞོམ། །སུམ་ཅུ་རྩ་གསུམ་ལག་ལེན་སྙིང་པོར་དྲིལ། །འདི་དག་ཕྱི་མ་རྒྱུད་ཀྱི་སྡོམ་ཚིག་ཡིན། །དྲང་སྲོང་རྣམས་ཀྱི་སེམས་ལ་དེ་ལྟར་ཆོངས། །ཞེས་གསུངས་སོ། །དེ་ནས་དྲང་སྲོང་ཡིད་ལས་སྐྱེས་ཀྱིས་འདི་སྐད་ཅེས་ཞུས་སོ། །ཀྱེ་དྲང་སྲོང་ཆེན་པོ་རིག་པའི་ཡེ་ཤེས་ལགས། །རེག་མཐོང་གཉིས་ཀྱིས་ནད་ཀྱི་ངོས་འཛིན་པ། །རེག་པ་རྩ་ལ་ཇི་ལྟར་བརྟག་པར་བགྱི། །མཐོང་བ་ཆུ་ལ་ཇི་ལྟར་བརྟག་པར་བགྱི། །གལ་འགག་བཞི་ཡི་འཁྲུལ་སོ་ཇི་ལྟར་བསལ། །འཚོ་མཛད་སྨན་པའི་རྒྱལ་པོས་བཤད་དུ་གསོལ། །ཞེས་ཞུས་པ་ལས། །སྟོན་པས་གསུངས་པ། །ཀྱེ་དྲང་སྲོང་ཆེན་པོ་ཡིད་ལས་སྐྱེས། །དང་པོ་རེག་པ་རྩ་ལ་བརྟག་པ་ནི། །ནད་དང་སྨན་པ་བརྡ་སྦྱོར་འཕྲིན་པ་རྩ། །སྔོན་འགྲོ་ཟས་སྤྱོད་བསླབ་དང་བལྟ་དུས་བསྟན། །བལྟ་གནས་མནན་ཚད་བལྟ་ཚུལ་ཤེས་པ་ཡིས། །ཐ་མལ་རྩ་ལ་རྩ་རྒྱུད་གསུམ་དུ་བརྟག །དུས་བཞིའི་རྩ་ལ་ཁམས་ལྔ་འབྱུང་བ་རྩི། །ངོ་མཚར་རྩ་བདུན་ནད་མེད་མི་ལ་བལྟ། །ནད་དང་ནད་མེད་འཕར་བའི་གྲངས་ལས་དཔགས། །སྤྱི་དང་བྱེ་བྲག་རྩ་ཡིས་ནད་ངོས་བཟུང༌། །འཆི་རྩ་གསུམ་གྱིས་འཚོ་འཆི་ཁ་དམར་གདགས། །གདོན་རྩ་གློ་བུར་ཡེ་འདྲོག་རིམ་འགྲོ་འབོགས། །ཚེ་རྟགས་བླ་ཡི་རྩ་ལ་བརྟག་པ་སྟེ། །སྤྱི་དོན་བཅུ་གསུམ་རེག་པའི་མདོར་བསྟན་ཡིན། །དང་པོ་སྔོན་འགྲོ་ཟས་སྤྱོད་བསླབ་པ་ནི། །ཤ་ཆང་ལ་སོགས་དྲོད་བཅུད་དྲག་པོ་དང༌། །འཇུ་དཀའ་བསིལ་ཆེས་ནད་གཞི་འཁྲུག་པ་སྤང༌། །འགྲངས་ཆེས་ལྟོགས་ཆེས་ཉལ་པོ་གཉིད་ཆག་དང༌། །སྨྲ་བརྗོད་སེམས་ལས་འགྲོ་འདུག་སྤངས་ཏེ་བརྟག །དེ་ཡིས་འདུ་བ་རྣམ་གསུམ་མི་འཁྲུག་གསལ། གློ་བུར་དུ་ཡང་དབུགས་མལ་ཚུད་པ་དང༌། །རྩ་དཔངས་རྐྱེན་གྱིས་མ་བཏེག་གཅེས་པ་ཡིན། བལྟ་དུས་མཁའ་ལ་ཉི་ཤར་ཀླུངས་མ་ཕེབས། །ནང་དབུགས་དྲོན་མོ་ཕྱིར་མ་རྒྱུས་པ་དང༌། །ཕྱི་དབུགས་གྲང་མོ་ནང་དུ་མ་ཤོར་བ། །མལ་ནས་མ་འགུལ་ཁ་ཟས་མ་ཟོས་པའི། །གདགས་སྲིབས་དབུགས་སྙོམས་རྩ་མལ་གནས་དུས་བལྟ། །བལྟ་གནས་མཁྲིག་མའི་གཉེར་མ་དང་པོ་ནས། །མཚོན་གང་མར་བཅལ་རུས་པ་འབུར་པོའི་ལྡེབས། །ཚོན་ཀན་ཆག་གསུམ་མ་འདྲུས་སྙོམས་པར་བཞག །ཅི་ཕྱིར་འཕར་རྩ་ཀུན་ལ་ཡོད་མོད་ཀྱང༌། །དོན་དང་ཉེ་ན་ཕུ་ཆུ་འབྲུབ་དང་མཚུངས། །རིང་བ་ཐག་རིང་འགྲོན་པོའི་གཏམ་དང་འདྲ། །འཚམ་པས་རྒྱང་གྲགས་དབྱར་སྐད་བཞིན་དུ་གསལ། །ཐམས་ཅད་རྒྱུ་བས་ཚོང་དུས་བརྒྱ་སྲང་བཞིན། །དོན་སྣོད་དེར་མི་རྒྱུ་བས་འགལ་ཞེ་ན། །རླུང་ཁྲག་ཀུན་ཏུ་རྒྱུ་བས་ཚོང་དཔོན་བཞིན། །བཅུ་གཉིས་མ་འདྲེས་ཕ་ཙེའི་རེ་སོ་འདྲ། །བླ་རྩ་མར་ཟུར་ཆུ་རྒྱུས་གསེབ་ཏུ་བརྟག །མཐའ་ནས་སྡུད་ཕྱིར་འཆི་རྩ་བོལ་ལ་བརྟག །མནན་ཚད་ཚོན་གྱིས་པགས་པ་ཀན་གྱིས་ཤ །ཆག་གིས་རུས་པ་ནོན་ཙམ་གསལ་བར་མནན། །ཅི་ཕྱིར་ཞེ་ན་རྩ་དབྱིབས་ལ་ཕུག་འདྲ། །ཤ་རྔམས་ཟབ་མི་ཟབ་ལས་བྱུང་བ་ཡིན། །བལྟ་ཚུལ་ལག་པའི་སོར་མོ་མ་གྲང་པའི། །འཇམ་ཞིང་མཉེན་ལ་དྲོད་དང་མཐུན་པ་ཡིས། །ཕོ་རྩ་གཡོན་དང་མོ་རྩ་གཡས་སུ་བརྟག །དང་པོ་ནད་པའི་ལག་གཡོན་སྨན་པའི་གཡས། །ཚོན་གྱི་འོག་ཏུ་སྙིང་དང་རྒྱུ་མའི་རྩ། །ཀན་གྱི་འོག་ཏུ་མཆེར་པ་ཕོ་བའི་རྩ། །ཆག་གི་འོག་ཏུ་མཁལ་གཡོན་བསམ་སེ་བརྟག །ནད་པའི་ལག་གཡས་སྨན་པའི་གཡོན་པས་བལྟ། །ཚོན་འོག་གློ་ལོང་ཀན་འོག་མཆིན་མཁྲིས་རྩ། །ཆག་འོག་མཁལ་མ་གཡས་དང་ལྒང་པ་བརྟག །མོ་ལ་ཚོན་རྩ་གཉིས་པོ་གཡས་གཡོན་ལྡོག །ཅི་ཕྱིར་གློ་སྙིང་གཡས་གཡོན་ཕྱོགས་མེད་ཀྱང༌། །སྙིང་གི་རྩེ་མོ་དེ་ལྟར་བསྟན་པའི་ཕྱིར། །གཞན་རྣམས་གནས་ཀྱིས་བསྐལ་ཕྱིར་གོང་ལྟར་ངེས། །ཐ་མལ་རྟེན་གྱི་རྩ་རྒྱུད་རྣམ་གསུམ་ནི། །ཕོ་རྩ་མོ་རྩ་བྱང་ཆུབ་སེམས་རྩ་གསུམ། །ཕོ་ཡི་རྩ་ནི་སྦོམ་ལ་རགས་པར་འཕར། །མོ་ཡི་རྩ་ནི་ཕྲ་ལ་མྱུར་བར་འཕར། །བྱང་ཆུབ་སེམས་རྩ་རྒྱུད་རིང་འཇམ་ལ་མཉེན། །ཕོ་ལ་མོ་རྩ་ཆགས་ན་ཚེ་རིང་ཞིང༌། །མོ་ལ་ཕོ་རྩ་ཆགས་ན་བུ་དཔལ་ཆེ། །གཉིས་ཀར་བྱང་ཆུབ་སེམས་དཔའི་རྩ་བྱུང་ན། །ཚེ་རིང་ནད་དཀོན་ཡས་བྱམས་མས་སྡང་སྟེ། །དྲུང་གསུམ་དགྲར་ལྡང་མཐའ་ཕུགས་རབ་ཀྱང་ཆད། །ཕོ་རྩ་ནང་ཕྲད་ཕལ་ཆེར་བུ་མང་སྟེ། །མོ་རྩ་ནང་ཕྲད་བུ་མོ་ཕལ་ཆེར་མང༌། །བྱང་ཆུབ་སེམས་རྩ་ཕོ་མོ་གང་ཕྲད་པ། །དེ་ཡི་དབང་གིས་གཅིག་འབྱུང་དེ་ནས་མིན། །དུས་བཞི་ཁམས་ལྔའི་འབྱུང་བ་བརྩི་བ་ནི། །དང་པོ་དུས་དོན་ཁམས་དང་རྩ་རུ་སྦྱར། །མ་བུ་དགྲ་གྲོགས་བཞི་ཡིས་སྐོར་འགོ་བརྩི། །དཔྱིད་དང་དབྱར་སྟོན་དགུན་བཞི་དུས་མཚམས་ལྔ། །དཔྱིད་ཟླ་གསུམ་ནི་ཤིང་རྩི་ཁ་འབུས་དུས། །རྟ་པ་དབོ་དང་ནག་པས་ནམ་ཚོད་འཛིན། །བྱིའུ་ཅོ་ག་རང་སྐད་འབྱིན་པའི་དུས། །བདུན་ཅུ་རྩ་གཉིས་ཤིང་ཁམས་མཆིན་རྩ་རྒྱུ། །ཅོ་གའི་སྐད་ལྟར་ཕྲ་ལ་གྲིམས་པར་འཕར། །ལྷག་མ་བཅོ་བརྒྱད་ས་ཁམས་མཆེར་རྩ་རྒྱུ། །དབྱར་ཟླ་གསུམ་ནི་འདབ་རྒྱས་ཆར་གྱི་དུས། །ས་ག་སྣྲོན་དང་ཆུ་སྟོད་ནམ་ཚོད་འཛིན། །བྱ་ཡི་རྒྱལ་པོ་ཁུ་བྱུག་སྐད་འབྱིན་དུས། །བདུན་ཅུ་རྩ་གཉིས་མེ་ཁམས་སྙིང་རྩ་རྒྱུ། །ཁུ་བྱུག་སྐད་ལྟར་སྦོམ་ལ་རིང་བར་འཕར། །ལྷག་མ་བཅོ་བརྒྱད་ས་ཁམས་མཆེར་རྩ་རྒྱུ། །སྟོན་ཟླ་གསུམ་ནི་རྩི་ཐོག་སྨིན་པའི་དུས། །གྲོ་ཞུན་ཁྲུམས་སྟོད་དབྱུག་པས་ནམ་ཚོད་འཛིན། །བྱེའུ་འུར་པ་གཤོག་སྒྲ་འབྱིན་པའི་དུས། །བདུན་ཅུ་རྩ་གཉིས་ལྕགས་ཁམས་གློ་རྩ་རྒྱུ། །བྱིད་པོའི་སྐད་ལྟར་ཐུང་ལ་རྩུབ་པར་འཕར། །ལྷག་མ་བཅོ་བརྒྱད་ས་ཁམས་མཆེར་རྩ་རྒྱུ། །དགུན་ཟླ་གསུམ་ནི་ས་ཆུ་འཁྱགས་སྒང་དུས། །སྨིན་དྲུག་མགོ་རྒྱལ་གསུམ་གྱིས་ནམ་ཚོད་འཛིན། །ཤ་བ་ནག་པོ་ངུ་སྐད་འདོན་པའི་དུས། །བདུན་ཅུ་རྩ་གཉིས་ཆུ་ཁམས་མཁལ་རྩ་རྒྱུ། །མཐིང་རིལ་སྐད་ལྟར་འཇམ་ལ་དལ་བར་འཕར། །ལྷག་མ་བཅོ་བརྒྱད་ས་ཁམས་མཆེར་རྩ་རྒྱུ། །ཉི་མ་གང་ལྡོག་དབྱར་དགུན་འབྲིང་པོར་བརྩི། །དུས་མཚམས་བཅོ་བརྒྱད་ཕྲག་བཞི་བདུན་ཅུ་གཉིས། །ས་ཁམས་མཆེར་རྩ་དར་ཞིང་རྒྱུ་དུས་དེར། །ནས་ཟན་སྐད་ལྟར་ཐུང་ལ་འཇམ་པར་འཕར། །དེ་ལྟར་དུས་བཞི་ཁམས་ལྔར་ཕྱེ་ནས་ནི། །ད་ནི་མ་བུ་དགྲ་གྲོགས་སྐོར་འགོ་བརྩི། །ཤིང་མེ་ས་ལྕགས་ཆུ་ལྔ་མ་བུ་བསྐོར། །མེ་ཆུ་ས་ཤིང་ལྕགས་ལྔ་དགྲ་གྲོགས་བསྐོར། །མ་བུ་དགྲ་གྲོགས་འབྱུང་བ་བརྟགས་ལ་བརྩི། །མ་དང་རང་རྩ་དར་ན་རབ་ཏུ་བཟང༌། །གྲོགས་རྩ་གྲོགས་འབྱུང་བུ་རྩ་དབང་ཐང་ཆེ། །དགྲ་རྩ་དགྲ་འོང་ཡང་ན་གསོ་དཀའ་འཆི། །ངོ་མཚར་རྩ་བདུན་ཁྱིམ་ཕྱྭ་འགྲོན་ཕྱྭ་དང༌། །དགྲ་ཕྱྭ་གྲོག་ཕྱྭ་གདོན་ཕྱྭ་བསྟན་པ་དང༌། །མེ་ཆུ་གོ་ལྡོག་བུ་རྩ་བརྟག་པའོ། །དང་པོ་བྱིང་ཞིང་འཐིབས་ན་མི་གཙང་རྩ། །རྨུགས་ཤིང་འཐིབས་ན་མྱ་ངན་འོང་བའི་རྩ། །འབྲུབ་ཅིང་བརྒྱལ་ན་བྲེད་དངངས་འོང་བའི་རྩ། །སྐྱེར་ཚེར་འདྲ་ན་སྡུག་བསྔལ་ཐར་མེད་རྩ། །ཆུ་ཚན་ཁོལ་འདྲ་མི་ཁ་འོང་བའི་རྩ། །མེ་ལྕེ་ཆད་འདྲ་ནོར་གོད་འོང་བའི་རྩ། །དེ་དག་གང་ཡང་རང་རྩ་དར་དུས་སུ། །རང་གི་རྩ་ལ་གང་བྱུང་རང་ལ་འོང༌། །མ་རྩ་མ་ཞང་བུ་རྩ་བུ་ཚ་ལ། །གྲོགས་རྩ་ནོར་ལ་དགྲ་རྩ་དགྲ་ལ་འོང༌། །འགྲོན་ཕྱྭ་གཞི་པ་གང་བརྩེ་གཅིག་ལ་བརྟག །མཆིན་རྩ་གློ་སྙིང་མཆེར་མཁལ་གང་དྲག་པ། །གཞི་ལ་ཡོད་དང་ལམ་དུ་ཞུགས་པ་དང༌། །ཉེ་བར་སླེབ་དང་ཕྱིན་ལ་ཁད་པ་དང༌། །འགྲོན་དགྲ་འོང་བ་རིམ་པས་བརྟག་པར་བྱ། །ཡང་ན་མ་དང་རང་རྩ་གཞི་ལ་གནས། །བུ་རྩ་ལམ་ཞུགས་དགྲ་རྩ་ད་ལྟ་སླེབ། །དོན་གཉེར་འགྲུབ་བམ་མི་འགྲུབ་བརྟག་པ་ནི། །སྙིང་མཆིན་མཁལ་རྩ་དྲག་པར་འཕར་བ་གསུམ། །དགྲ་འོང་དོན་འགྲུབ་སྟོང་ལོག་བྱེད་པ་ཡིན། །དགྲ་རྩ་མི་འགྲུབ་གྲོགས་རྩ་བྱུང་ན་འགྲུབ། །དགྲ་ཕྱྭ་ཕར་རྒོལ་གློ་རྩ་དྲག་ན་ཐུབ། །མཆེར་རྩ་དྲག་ན་མི་ཐུབ་དགྲ་གཡུལ་མཐོ། །དགྲ་ཡི་རྩ་ལ་དགྲ་རྩ་བྱུང་ན་ཐུབ། །རང་ལ་དགྲ་རྩ་བྱུང་ན་ཐུབ་མི་འགྱུར། །ཚུར་རྒོལ་དེ་དང་འདྲ་ན་དགྲ་ཡིས་ཚུགས། །རང་དང་མ་རྩ་དར་ན་ཚུགས་མི་འགྱུར། །གྲོགས་ཕྱྭ་ནོར་བདག་རྩ་ལ་བལྟས་པ་ཡིས། །མཆིན་རྩ་དྲག་ན་ནོར་འཕེལ་གོད་མི་འོང༌། །སྙིང་རྩ་མཆེར་རྩ་ཞན་ན་གོད་ཀ་འོང། །གྲོགས་ཀྱི་རྩ་ལ་གྲོགས་རྩ་བྱུང་ན་རབ། །མ་རྩ་འབྲིང་ཡིན་རང་རྩ་ཐ་མ་ཡིན། །བུ་རྩ་གྲོག་མེད་དགྲ་རྩ་གྲོག་དགྲས་ཁྱེར། །གདོན་ཕྱྭ་ཤིང་རྩ་གཉན་དང་རྒྱལ་པོར་བཟུང༌། །མེ་རྩ་བཙན་བདུད་ལྕགས་རྩ་རྒྱལ་པོ་དཀོར། །ས་ཡི་རྩ་ལ་ས་བདག་མ་མོར་བཟུང༌། །ཆུ་རྩ་ཀླུ་དང་ཀླུ་སྲིན་དམ་སྲིར་བཟུང༌། །མ་ཡི་རྩ་ལ་ཕ་མའི་ཆགས་འདྲེར་བཟུང༌། །བུ་ཡི་རྩ་ལ་བུ་ཚའི་ཞང་འདྲེར་བཟུང༌། །དགྲ་ཡི་རྩ་ལ་དགྲ་བོས་རྦད་འདྲེར་བཟུང༌། །གྲོགས་ཀྱི་རྩ་ལ་ནོར་གྱི་ཕྱི་འདྲེར་བཟུང༌། །རང་གི་རྩ་ལ་གྲོགས་ཀྱི་འགོས་འདྲེར་བཟུང༌། །མེ་ཆུ་གོ་ལྡོག་ཕ་ན་བུ་ལ་བལྟ། །མཆིན་རྩ་ཚང་ན་མི་འཆི་མ་ཚང་འཆི། །མ་རྩ་དར་ན་མི་འཆི་གུད་ན་འཆི། །བུ་ན་ཕ་ཡི་རྩ་ལ་བལྟས་པ་ཡི། །སྙིང་རྩ་ཚང་ན་མི་འཆི་མ་ཚང་འཆི། །བུ་རྩ་དར་ན་མི་འཆི་གུད་ན་འཆི། །མ་དང་བུ་མོའི་རྩ་ཡང་དེ་ལྟར་བལྟ། །ཁྱོ་ན་ཆུང་མའི་རྩ་ལ་བལྟས་པ་ཡིས། །མཆིན་རྩ་མ་ཚང་འཆི་ལ་ཚང་ན་འཚོ། །ཆུང་མ་ན་བ་ཁྱོ་ལ་རྩ་བལྟས་པས། །མཁལ་རྩ་མ་ཚང་འཆི་ལ་ཚང་ན་འཚོ། །ཡང་ན་ཁྱོ་གྲོགས་ཆུང་མ་དགྲ་རུ་བརྩི། །དགྲ་གྲོགས་རྩ་དར་མི་འཆི་གུད་ན་འཆི། །སྦྲུམ་མའི་རྩ་ནི་འབུར་ལ་འདྲིལ་བར་འཕར། །མཁལ་རྩ་གཡས་པ་དྲག་ན་བུ་ཕོ་སྐྱེ། །གཡོན་པ་དྲག་ན་བུ་མོ་སྐྱེ་བར་འགྱུར། །བུ་ཡི་རྩ་ལ་མ་རྩ་བུ་རྩ་བྱུང༌། །བཙས་ནས་གསོ་སླ་དགྲ་རྩ་བྱུང་ན་དཀའ། །ནད་དང་ནད་མེད་འཕར་བའི་གྲངས་བསྟན་པ། །ནད་མེད་ཐ་མལ་རྒྱུན་རྩ་སྨན་པ་ཡི། །ཕྱི་ནང་དབུགས་ལ་ལན་ལྔ་འཕར་བར་འདོད། །དེ་ཡང་ལན་གྲངས་བརྒྱ་ཡི་བར་དག་ཏུ། །ཆེ་ཆུང་སྟོད་སྨད་དྲག་དལ་བྱིང་རྒྱས་དང༌། །སྡོད་འཐེན་ཐང་ལྷོད་མེད་པར་འཕར་བར་འདོད། །དེ་ལས་ལྡོག་པ་ནད་ཅན་རྩ་ཡིན་ཏེ། །མང་འཕར་ཚ་བ་ཉུང་འཕར་གྲང་བ་ཡིན། །འོན་ཀྱང་ནད་མེད་རྩ་རྒྱུད་མུ་ཏིག་འཕྲེང༌། །གོང་རྒལ་མ་ཚང་སྡོད་འཐེན་ལ་སོགས་པ། །ངེས་མེད་སྲིད་ཕྱིར་གོང་དུ་གཏན་ལ་དབབ། །གཞི་རྩ་མ་རྟོགས་ཁ་དམར་ལོག་པར་འགྲོ། །ཕོ་མོ་བུ་རྩ་མ་ཤེས་ཚ་བར་འཁྲུལ། །བྱང་ཆུབ་སེམས་རྩ་གྲང་བར་འཁྲུལ་བ་དང༌། །མ་ཚང་གཅོད་སྡོད་འཆི་རྩར་འཁྲུལ་པ་ཡོད། །རྒྱུས་མེད་རྣམས་ལ་ཐོག་མར་དྲི་བ་གཅེས། །ནད་ངོས་བཟུང་བ་སྤྱི་དང་བྱེ་བྲག་གཉིས། །སྤྱི་རྩ་དྲུག་གིས་ཚ་གྲང་ལ་ཤན་དབྱེ། །དྲག་རྒྱས་འདྲིལ་མགྱོགས་གྲིམས་མཁྲང་ཚ་བའི་རྩ། །དེ་ཡང་དཔངས་ཚ་གྲངས་ཚ་སྙུགས་ཚ་གསུམ།།དཔངས་དང་གྲངས་ཀྱི་ཚ་བ་འཁྲུགས་རིམས་གསར། །སྙུགས་ཀྱི་ཚ་བ་རྙིངས་པའི་ཚ་བ་ཡིན། །གྲང་རྩ་ཞན་བྱིང་གུད་བུལ་ལྷོད་སྟོང་དྲུག །སྙུགས་གྲང་གསར་ལ་གྲངས་དཔངས་རྙིང་པར་འདོད། །བྱེ་བྲག་བརྟག་པ་རྣམ་པ་གཉིས་ཡིན་ཏེ། །རྩ་རྒྱུད་སོ་སོས་ནད་རིགས་དབྱེ་བ་དང༌། །ཚོན་ཀན་ཆག་གསུམ་རྒྱུ་བ་བཅུ་གཉིས་ཀྱིས། །སྟོད་སྨད་དོན་སྣོད་བྱེ་བྲག་གར་བབས་བརྟག །དང་པོ་རྩ་རྒྱུད་སོ་སོར་བརྟག་པ་ནི། །རླུང་གི་རྩ་ནི་རྐྱལ་སྟོང་སྐབས་སུ་སྡོད། །མཁྲིས་པའི་རྩ་ནི་ཕྲ་ལ་གྲིམས་པར་འཕར། །བད་ཀན་སྐྱ་བོའི་རྩ་ནི་བྱིང་ལ་རྒུད། །རླུང་ཚད་ལྡན་པའི་རྩ་ནི་སྟོང་ལ་རྒྱུག །བད་མཁྲིས་ལྡན་པ་ཁ་བྱིང་གཏིང་ན་གྲིམས། །བད་རླུང་ལྡན་པའི་རྩ་ནི་སྟོང་ལ་དལ། །བད་ཀན་སྨུག་པོ་སྦོམ་ཁེངས་ཀན་རྩ་ཞར། །ཁྲག་གི་རྩ་ནི་འབུར་ལ་འདྲིལ་བར་འཕར། །ཆུ་སེར་རྩ་ནི་འདར་ལ་རྒྱུ་བ་དཀའ། །སྲིན་རྩ་འཁྱིག་ཅིང་ཞེང་དུ་ལེབ་མོར་འཕར། །ཞར་ཅིང་འདར་ལ་འཕྲིག་པ་མཛེ་ཡི་རྩ། །འཁྲུགས་ཚད་རྩ་ནི་སྦོམ་རྒྱས་འབུར་ལ་འདྲིལ། །འགྲམས་ཚད་རྩ་ནི་ཕྲ་མཁྲང་གྲིམས་པར་འཕར། །རིམས་ཚད་རྩ་ནི་ཕྲ་ལ་མགྱོགས་པར་འཕར། །གཉན་གྱི་རྩ་ནི་འཁྱིག་ཅིང་ལྕམ་དྲལ་བྱེད། །གཟེར་ཐུང་རྩ་ནི་ཐུང་ཐུང་སྦུད་སྦུད་འཕར། །སྦྱར་དུག་རྩུབ་སྤུན་འཆོལ་པ་མངོན་མི་བཏུབ། །ཤ་དུག་རྩ་ནི་ཕྲ་མགྱོགས་ཞར་བྱིང་རྒྱུ། །མ་སྨིན་ཚ་བ་ཕྲ་མགྱོགས་རླུང་ལྟར་གཡོ། །རྒྱས་ཚད་རྩ་ནི་དྲག་ལ་གྲིམས་པར་འཕར། །སྟོངས་ཚད་རྩ་ནི་སྟོང་ལ་རྒྱུག་པ་སྟེ། །གབ་པའི་ཚད་པ་རྩ་དཔངས་དམའ་ལ་གྲིམས། །ཚད་པ་རྙིང་པ་ཕྲ་ལ་གྲིམས་པར་འཕར། །རྙོགས་ཚད་རྩ་ནི་ཕྲ་མོ་གཏིང་ན་རྒྱུག །རྨ་ཚད་རྩ་ནི་སྦོམ་མཁྲང་མགྱོགས་པར་འཕར། །ཟུག་རྔུའི་རྩ་ནི་ཞར་ཞིང་ལྕམ་དྲལ་བྱེད། །མགོ་ཆག་ཤ་རུས་ཀླད་པ་རྣམ་པ་གསུམ། །གང་ལ་སྐྱོན་ཡོད་ཚོན་ཀན་ཆག་གི་རྩ། །རིམ་བཞིན་དྲག་ཅིང་གྲིམས་ལ་མགྱོགས་པའོ། །རྣག་རྩ་འདར་རམ་ཡང་ན་ཚ་ལ་སྤུན། །གྲང་རྩ་མ་ཞུ་གསར་པ་སྦོམ་ལ་མཁྲང༌། །མ་ཞུ་རྙིང་པ་ཤེད་ཆུང་རྩ་རྒྱུད་ཕྲ། །སྐྲན་གྱི་རྩ་ནི་ཞན་ཅིང་ཞར་བར་འཕར། །དམུ་འོར་སྐྱ་རྦབ་ཕྲ་བྱིང་གཏིང་ན་དམ། །སྐྱུག་ན་སྟོད་ཞན་འཁྲུ་ནད་རྩ་སྨད་ཞན། །འོན་ཀྱང་རྩ་ལ་ནོར་བའི་འཕྲང་དྲུག་སྟེ། །ཁྲག་རྩ་རླུང་རྩ་རྐྱལ་བྱེད་ནོར་ར་རེ། །ས་ཚད་སྟོངས་ཚད་རྒྱུག་བྱེད་ནོར་ར་རེ། །བད་ཀན་ཁྲག་རྒན་བྱིང་བྱེད་ནོར་ར་རེ། །དེ་དག་སྟོད་སྨད་དོན་སྣོད་གར་བབས་ནད། །ཚོན་རྩ་གཉིས་ཀྱིས་གློ་སྙིང་སྟོད་ནད་བརྟག །ཀན་རྩ་གཉིས་ཀྱིས་ཕོ་མཆིན་བར་ནད་བརྟག །ཆག་རྩ་གཉིས་ཀྱིས་མཁལ་རྐེད་སྨད་ནད་བརྟག །གདགས་སྲིབས་རྩ་ཡིས་དོན་ལྔ་སྣོད་དྲུག་བརྟག །ཡར་ཟུར་དོན་ལྔ་ཕྱིར་རྒྱུ་གདགས་ཀྱི་རྩ། །མར་ཟུར་སྣོད་དྲུག་ནང་རྒྱུ་སྲིབས་ཀྱི་རྩ། །དོན་སྣོད་ཕལ་ཆེར་ཆོ་རོལ་མི་འབྱུང་ཞིང༌། །དོན་ཚ་སྣོད་ལ་གྲང་བ་འབྱུང་སྲིད་ཀྱི། །སྣོད་ཚ་དོན་ལ་གྲང་བ་འབྱུང་མི་སྲིད། །སྟོད་སྨད་གཉིས་ཀྱང་དེ་བཞིན་ཤེས་པར་བགྱི། །དེ་དག་མ་འདྲེས་ཕྲ་ཞིབ་ཕྱེད་པར་རྟོགས། །འཆི་རྩ་རྒྱུད་འགྱུར་མ་ཚང་སྡོད་པའོ། །རྩ་རྒྱུད་འགྱུར་བ་དར་ལྕེ་རླུང་བསྐྱོད་འདྲ། །ཁྲ་ཡི་མཇུག་རྩེ་ཐིགས་ཟགས་ཆུ་གཞུག་འདྲ། །ཉ་མོ་རྔམ་འདྲ་མཆིལ་པ་སྒུམ་འཐུ་འདྲ། །སྦལ་པ་མཆོངས་དང་གླང་རྒན་ཁ་ཆུ་འདྲ། །སྟོབས་ཆེན་གློ་བུར་ནད་ལ་རྩ་སྟོབས་ཕྲ། །ཡུན་རིང་ཟུངས་ཟད་ནད་ལ་རྩ་རྒྱས་འབྲུབ། །གྲང་ལ་ཚ་བ་ཚ་ལ་གྲང་རྩ་བྱུང༌། །གློ་ཚད་ཤ་དུག་བད་མཁྲིས་ཕོ་ཁར་འདྲིལ། །འདི་བཞི་ནད་མེད་རྩ་བྱུང་འཆི་བ་ཡིན། །མ་ཚང་འབྲེལ་འབྱོར་ཕྱི་ཡི་རྟགས་ལ་དཔག །སྙིང་རྩ་མ་ཚང་ལྕེ་ནག་འབུར་ཚུགས་བལྟ། །གློ་རྩ་མ་ཚང་སྣ་ཞོམ་ནང་སྤུ་ལོག །མཆིན་རྩ་མ་ཚང་མིག་ཟློག་སྨིན་མ་འཚོམ། །མཆེར་རྩ་མ་ཚང་མཆུ་འཕྱངས་ལྷེན་སྣ་རྡིབ། །མཁལ་རྩ་མ་ཚང་སྒྲ་ཆད་རྣ་བ་འབྱར། །ཞག་གཅིག་གཉིས་གསུམ་ལྔ་དང་བརྒྱད་ན་འཆི། །སྡོད་ལ་ན་སྡོད་འཆི་སྡོད་འདྲེ་སྡོད་གསུམ། །ན་དུས་གང་ནའི་རྩ་སྡོད་ན་སྡོད་ཡིན། །འདྲེ་སྡོད་ངེས་མེད་དྲག་དལ་བྱེད་པ་སྟེ། །གྲངས་དུས་ངེས་པར་སྡོད་པ་འཆི་སྡོད་ཡིན། །འདྲེ་ལ་ཡས་བྱིན་ནད་ལ་སྨན་གྱིས་བཅོས། །དེ་བྱས་སྐྱེད་མེད་ཅིས་ཀྱང་འཆི་བར་འགྱུར། །ནད་བྱིང་རྐྱེན་གྱིས་གབ་དང་གདོན་གྱིས་སྦས། །རྩ་མེད་གྱུར་ཀྱང་ངེས་མེད་ཕལ་ཆེར་འཚོ། །གདོན་རྩ་རྩ་རྒྱུད་མི་སྙོམས་འགྱུར་ལྡོག་མང༌། །ངེས་མེད་སྡོད་འཐེན་ལྕམ་དྲལ་བྱེད་པ་སྟེ། །སྙིང་གི་རྩ་ལ་ལྷ་བསྲུངས་རྒྱལ་པོ་བརྟག །གློ་བའི་རྩ་ལ་ཀླུ་བདུད་ཀླུ་བཙན་བརྟག །མཆིན་པར་ས་བདག་དམ་སྲི་གྲེ་མོ་བརྟག །མཆེར་པར་གྲེ་ཕོ་གཉན་དང་ས་བདག་བརྟག །མཁལ་མ་གཡས་ལ་ཀླུ་དང་གཉན་དུ་བརྟག །མཁལ་མ་གཡོན་པ་མཚོ་སྨན་ཀླུ་བསེན་བརྟག །ཆེ་རིང་མི་གྲུང་གཡས་ལ་ཕོ་གདོན་བཟུང༌། །ཆུང་ཐུང་མི་གྲུང་གཡོན་ལ་མོ་གདོན་བཟུང༌། །རླུང་གི་ནད་ལ་དཀོར་བདག་རྒྱལ་པོ་གནོད། །གློ་ཚ་གཟེར་ལ་བཙན་བདུད་ཀླུ་བཙན་གནོད། །རིམས་དང་མཁྲིས་ནད་མ་མོ་བྱང་སྨན་གནོད། །དམུ་སྐྲན་འབྲས་ལྷོག་ཀླུ་གཉན་ས་བདག་གནོད། །ངོས་ཟིན་བོན་དང་མདོས་དང་བསྐྲད་པ་དང༌། །བྱིན་རླབས་བཀའ་བསྒྲག་བསོད་ནམས་བསག་ལ་སོགས། །ཡུལ་ལུགས་སྦྱར་ཏེ་གང་ལ་འཚམ་པས་བཅོས། །ཚེའི་རྟགས་བླ་ཡི་རྩ་ལ་བརྟག་པ་ནི། །སེམས་ལ་རང་དབང་མ་ཐོབ་ཕྱིར་བལྟས་པས། །མ་རིག་སྲིད་པའི་ལུས་ངན་བླངས་པ་ཡིས། །ཚེ་སྲོག་རྟེན་དུ་བླ་རྩ་འཁྱམ་པོ་བྱུང༌། །བླ་རྩ་གནས་ན་བླ་ཚེ་མལ་དུ་གནས། །བླ་རྩ་འགྱུར་ལྡོག་བྱེད་ན་ཚེ་མི་བརྟན། །བླ་རྩ་བྲོས་ན་བླ་ཚེ་ཡར་ཏེ་འཆི། །ཚེ་ཆོག་འཆི་བསླུས་ཁུགས་པ་སྲིད་པ་ཙམ། །ཡར་མར་ཆུ་རྒྱུས་འོག་ནས་མི་རྒྱུ་ན། །བན་བོན་ཡིན་ན་བསྲུངས་མ་བདུད་དུ་བབས། །སྐྱེ་བོ་ཡིན་ན་ཟོར་ཁ་ཀླུ་གཉན་འགྲས། །ཕོ་ལ་གཡས་པ་འཁྱིག་སྡོད་ཕ་སྤུན་འཆི། །གཡོན་པ་འཁྱིག་ཅིང་སྡོད་ན་བུ་སྨད་འཆི། །གཉིས་ཀ་འཁྱིག་སྡོད་རང་ཉིད་གྲི་རུ་འཆི། །ཐེངས་གཅིག་སྡོད་ན་གོད་ཀ་ཁ་ཡོགས་འོང༌། །བུད་མེད་གཡས་པ་འཁྱིག་སྡོད་ཁྱོ་ཕྱོགས་འཆི། །གཡོན་པ་འཁྱིག་ཅིང་སྡོད་ན་ཕ་མིང་འཆི། །གཉིས་ཀ་འཁྱིག་ཅིང་སྡོད་ན་བུ་ཁྱོ་འཆི། །སྟོང་བརྒྱལ་གོད་འོང་ཐང་འཁྱིག་ཁ་སྨྲས་འོང༌། །མལ་མི་ཐུབ་ན་གདོན་གྱི་རྩ་ཡིན་ཏེ། །སྦོམ་འཁྲུག་ཕོ་གདོན་ཐུང་རྩུབ་མོ་གདོན་བཟུང༌། །བླ་རྩ་སྙོམས་པར་ལན་བརྒྱ་འཕར་བ་ནི། །ལོ་བརྒྱ་ཐུབ་སྟེ་ལྔ་བཅུས་ལྔ་བཅུ་ཐུབ། །དེ་བཞིན་འཕར་རེས་ལོ་རེ་ཐུབ་པར་བཤད། །དེ་ལྟར་རྟོག་པའི་སྨན་པ་ཉན་པ་འདྲ། །ཤེས་པ་མ་ཡེངས་གཅིག་ཏུ་བསྡུས་ལ་སྤྲོ། །ཞེས་གསུངས་སོ། །བདུད་རྩི་སྙིང་པོ་ཡན་ལག་བརྒྱད་པ་གསང་བ་མན་ངག་གི་རྒྱུད་ལས་རེག་པ་རྩ་ལ་ནད་ངོས་བཟུང་བའི་ལེའུ་སྟེ་དང་པོའོ།། །།

མཐའ་མའི་འདོན་ཐེངས་།: 22.11.2017 ཉིན། 4:31 PM

<< སྔ་མ།

ནང་གསེས་དཀར་ཆག

ཡིག་ཆ་གསར་ཤོས།

སློབ་ཐོན་པ་རྣམས་ལ་སྩལ་བའི་བཀའ་སློབ།

སྨན་རྩིས་སློབ་མ་གསར་བསྡུའི་གསལ་བསྒྲགས།

ཀོང་སྤྲུལ་ཡོན་ཏན་རྒྱ་མཚོ།

བླ་སྨན་ཨུ་རྒྱན་བསྟན་འཛིན་རྒྱ་མཚོ།

མགོ་ལོག་སྨན་པ་སྟག་བླ་ནོར་བུ།

འོ་རྫོང་བློ་བཟང་སྦྱིན་པ།

མི་ཕམ་རྣམ་རྒྱལ་རྒྱ་མཚོ།

སྔ་དགོང་གོམ་འགྲོས་གནང་རྒྱུ་མེད་པའི་ལམ་སྟོན།

འཇམ་དབྱངས་མཁྱེན་བརྩེའི་དབང་པོ།

ཀརྨ་ངེས་དོན་བསྟན་འཛིན་འཕྲིན་ལས་རབ་རྒྱས།

ཀརྨ་ངེས་ལེགས་བསྟན་འཛིན།

དེའུ་དམར་བསྟན་འཛིན་ཕུན་ཚོགས།

སི་ཏུ་ཆོས་ཀྱི་འབྱུང་གནས།

རིན་མེད་སྨན་རྩིས་ཞབས་ཞུ།

ལུས་སེམས་སྲོག་གི་བཅོས་ཐབས།